ಬ್ಯಾಟರಿಗಳು ಎಲ್ಲ ವಿದ್ಯುತ್ ಚಾಲಿತ ಸಾಧನಗಳಿಗೂ ಬೇಕು. ಬ್ಯಾಟರಿಗಳಲ್ಲಿ ಹಲವಾರು ನಮೂನೆಗಳಿವೆ. ಬ್ಯಾಟರಿಯನ್ನು ಬ್ಯಾಟರಿ ಸೆಲ್ ಎನ್ನುವುದೇ ಸರಿಯಾದ ವೈಜ್ಞಾನಿಕ ವಿಧಾನ. ಬ್ಯಾಟರಿ ಸೆಲ್‌ಗಳ ಜೋಡಣೆಯೇ ಬ್ಯಾಟರಿ. ಆದರೆ ಬಳಕೆಯಲ್ಲಿ ಬ್ಯಾಟರಿ ಎಂದೇ ಬಂದುಬಿಟ್ಟಿದೆ. ಇರಲಿ. ಬ್ಯಾಟರಿಯ ಪ್ರಮುಖ ಅಂಗಗಳು ಮೂರು -ಋಣ ಮತ್ತು ಧನ ಇಲೆಕ್ಟ್ರೋಡ್‌ಗಳು ಮತ್ತು ಅವುಗಳ ಮಧ್ಯದಲ್ಲಿರುವ ದ್ರಾವಣ ಇಲೆಕ್ಟ್ರೋಲೈಟ್. ಲಿತಿಯಂ ಬ್ಯಾಟರಿಯಿರಲಿ, ಲೆಡ್ ಆಸಿಡ್ ಬ್ಯಾಟರಿಯಿರಲಿ, ಈ ಇಲೆಕ್ಟ್ರೋಲೈಟ್ ಸಾಮಾನ್ಯವಾಗಿ ದ್ರವವಾಗಿರುತ್ತದೆ. ನಿಮ್ಮ ಟಾರ್ಚ್‌ಗಳಲ್ಲಿ ಬಳಸುವ ಬ್ಯಾಟರಿ ಮಾತ್ರ ಡ್ರೈ ಸೆಲ್ ಆಗಿರುತ್ತದೆ. ಅಂದರೆ ಅದರ ಇಲೆಕ್ಟ್ರೋಲೈಟ್ ದ್ರವ ಅಲ್ಲ. ಬದಲಿಗೆ ಘನ ಆಗಿರುತ್ತದೆ.

ಸ್ಮಾರ್ಟ್‌ಫೋನ್‌ಗಳಲ್ಲಿ ಬಳಸುವ ಬ್ಯಾಟರಿ ಲಿತಿಯಂ ಬ್ಯಾಟರಿಯಾಗಿರುತ್ತದೆ. ಇದರ ಇಲೆಕ್ಟ್ರೋಲೈಟ್ ಕೂಡ ದ್ರವವೇ ಆಗಿದೆ. ಇತ್ತೀಚೆಗೆ ನೀವು ಗಮನಿಸಿರಬಹುದಾದ ಒಂದು ಅಂಶ ಎಂದರೆ ಅತಿ ವೇಗವಾಗಿ ಚಾರ್ಜ್ ಮಾಡುವ ಸೌಲಭ್ಯ. ಹಲವು ಫೋನ್‌ಗಳಲ್ಲಿ ಈ ಸೌಲಭ್ಯವಿದೆ. ಬ್ಯಾಟರಿಯನ್ನು ಸೊನ್ನೆಯಿಂದ ಸುಮಾರು 80% ತನಕ ಅತಿ ವೇಗವಾಗಿ ಅಂದರೆ 30 ರಿಂದ 45 ನಿಮಿಷಗಳ ಒಳಗೆ ಚಾರ್ಜ್ ಮಾಡಬಹುದಾಗಿದೆ. ಬೇರೆ ಬೇರೆ ಫೋನ್‌ಗಳಲ್ಲಿ ಈ ಸಮಯ ಸ್ವಲ್ಪ ಆಚೀಚೆ ಆಗಬಹುದು.  

ಪೆಟ್ರೋಲ್ ಅಥವಾ ಡೀಸಿಲ್ ಇಂಧನದಿಂದ  ಕೆಲಸ ಮಾಡುವ ವಾಹನಗಳು ನಿಮಗೆ ಗೊತ್ತು. ಈ ವಾಹನಗಳು ಪರಿಸರಕ್ಕೆ ಮಾರಕ. ಇದಕ್ಕೆ ಪರಿಹಾರವಾಗಿ ವಿದ್ಯುತ್ ಚಾಲಿತ ವಾಹನಗಳು ಮಾರುಕಟ್ಟೆಗೆ ಬರತೊಡಗಿವೆ. ಈ ವಾಹನಗಳಲ್ಲಿ ನೀವು ಈಗಾಗಲೇ ಊಹಿಸಿರುವಂತೆ ಬ್ಯಾಟರಿಗಳಿವೆ. ಇವು ಪರಿಸರಕ್ಕೆ ಮಾರಕವಲ್ಲ. ಯಾಕೆಂದರೆ ಅವು ಹೊಗೆ ಸೂಸುವುದಿಲ್ಲ. ಈ ಬ್ಯಾಟರಿ ಚಾಲಿತ ವಾಹನಗಳ ಬಹು ದೊಡ್ಡ ಸಮಸ್ಯೆ ಎಂದರೆ ಅವುಗಳ ಬ್ಯಾಟರಿಗಳು. ಅವುಗಳನ್ನು ಒಮ್ಮೆ ಪೂರ್ತಿ ಚಾರ್ಜ್ ಮಾಡಿದರೆ ಅವು ಚಲಿಸಬಲ್ಲ ದೂರದ ವ್ಯಾಪ್ತಿ ತುಂಬ ಇಲ್ಲ. ಸ್ಕೂಟರ್ ಆದರೆ ಸುಮಾರು 80 ರಿಂದ 100 ಕಿ.ಮೀ. ಕಾರು ಆದರೆ ಗರಿಷ್ಠ 300-550 ಕಿ.ಮೀ. ಸಾಗಬಹುದು. ನಂತರ ಬ್ಯಾಟರಿ ಚಾರ್ಜ್ ಮಾಡಬೇಕಾಗುತ್ತದೆ. ಬ್ಯಾಟರಿ ಪೂರ್ತಿ ಚಾರ್ಜ್ ಮಾಡಲು ಸುಮಾರು ಹತ್ತು ಗಂಟೆ ಹಿಡಿಯುತ್ತದೆ. ಫೋನ್‌ಗಳಲ್ಲಿ ಇರುವಂತೆ ಅತಿ ವೇಗವಾಗಿ ಅಂದರೆ ಸುಮಾರು 30-45 ನಿಮಿಷಗಳಲ್ಲಿ ಸುಮಾರು 80% ಚಾರ್ಜ್ ಮಾಡುವ ಸವಲತ್ತು ಈ ವಿದ್ಯುತ್ ಚಾಲಿತ ವಾಹನಗಳ ಬ್ಯಾಟರಿಗಳಲ್ಲಿ ಇಲ್ಲ. ಇನ್ನೊಮ್ಮೆ ಚಾರ್ಜ್ ಮಾಡದೆ ತುಂಬ ದೂರ ಸಾಗಬೇಕು ಎಂದಾದಲ್ಲಿ ಬ್ಯಾಟರಿಯ ಸಂಗ್ರಹ ಶಕ್ತಿ ಜಾಸ್ತಿ ಇರಬೇಕು. ಸಂಗ್ರಹ ಶಕ್ತಿ ಜಾಸ್ತಿ ಆದಂತೆ ಬ್ಯಾಟರಿಯ ಗಾತ್ರವೂ ಜಾಸ್ತಿಯಾಗುತ್ತದೆ. ಎಂಬಲ್ಲಿಗೆ ಎರಡು ಪ್ರಮುಖ ಸಮಸ್ಯೆಗಳು ಬ್ಯಾಟರಿ ಚಾಲಿತ ವಾಹನಗಳ ಬ್ಯಾಟರಿಗಳಿವೆ. ಈ ಸಮಸ್ಯೆಗಳಿಗೆ ಪರಿಹಾರವನ್ನು ಕಂಡುಹಿಡಿಯಲು ಜಗತ್ತಿನಾದ್ಯಂತ ವಾಹನ ಕಂಪೆನಿಗಳು, ವಿಜ್ಞಾನಿಗಳು ಹಗಲಿರುಳು ಪರಿಶ್ರಮ ಪಡುತ್ತಿದ್ದಾರೆ. ಅಂದರೆ ಕಡಿಮೆ ಗಾತ್ರದ ಬ್ಯಾಟರಿ ಆಗಿರಬೇಕು ಹಾಗೂ ಅತಿ ವೇಗವಾಗಿ ಚಾರ್ಜ್ ಆಗಬೇಕು. ಅದರ ಪರಿಣಾಮ ಘನಸ್ಥಿತಿಯ ಬ್ಯಾಟರಿಗಳ ಆವಿಷ್ಕಾರ. ಹಾಗೆಂದರೇನು ಎಂದು ಈಗ ತಿಳಿಯೋಣ.

ಮೊದಲನೆಯದಾಗಿ ರಿಚಾರ್ಜೇಬಲ್ ಬ್ಯಾಟರಿ ಬಗ್ಗೆ ತಿಳಿಯೋಣ. ಇವುಗಳನ್ನು ಲಿತಿಯಂ ಐಯಾನ್ ಬ್ಯಾಟರಿ ಎಂದೂ ಕರೆಯುತ್ತಾರೆ. ಇವುಗಳನ್ನು ಚಾರ್ಜ್ ಮಾಡಬಹುದು. ಅದರ ಚಾರ್ಜ್ ಮುಗಿದಾಗ ಮತ್ತೆ ಚಾರ್ಜ್ ಮಾಡಬಹುದು. ಎಲ್ಲ ಬ್ಯಾಟರಿಗಳಂತೆ ಇದರಲ್ಲೂ ಋಣ ಮತ್ತು ಧನ ಧ್ರುವಗಳಿವೆ. ಇವುಗಳಿಗೆ ಇಲೆಕ್ಟ್ರೋಡ್‌ಗಳು ಎನ್ನುತ್ತಾರೆ. ಇವು ಲೋಹಗಳಿಂದ ಮಾಡಲ್ಪಟ್ಟಿರುತ್ತವೆ. ಈ ಇಲೆಕ್ಟ್ರೋಡ್‌ಗಳ ಮಧ್ಯೆ ಇಲೆಕ್ಟ್ರೋಲೈಟ್ ದ್ರವ ಇರುತ್ತದೆ. ಲಿತಿಯಂ ಐಯಾನ್ ಬ್ಯಾಟರಿಯಲ್ಲಿರುವ ದ್ರವ ಇಲೆಕ್ಟ್ರೋಲೈಟ್ ಮತ್ತೆ ಮತ್ತೆ ಚಾರ್ಜ್, ಡಿಸ್ಚಾರ್ಜ್, ಆಗುವುದುರಿಂದ ಬಿಸಿಯಾಗುತ್ತದೆ. ತುಂಬ ಸಲ ಹಾಗೆ ಆದ ನಂತರ ಅದರ ಗಾತ್ರ ಹೆಚ್ಚಾಗುತ್ತದೆ. ಆಗ ಬ್ಯಾಟರಿ ಉಬ್ಬುತ್ತದೆ. ಇದನ್ನು ನೀವು ಹಲವು ಫೋನ್‌ಗಳಲ್ಲಿ ಗಮನಿಸಿರಬಹುದು. ಬ್ಯಾಟರಿ ಚಾರ್ಜ್ ಆಗುವಾಗ ಅದು ಬಿಸಿಯೂ ಆಗುತ್ತದೆ. ತುಂಬ ಬಿಸಿ ಆದರೆ ಕೆಲವೊಮ್ಮೆ ಸ್ಫೋಟ ಆದ ಉದಾಹರಣೆಗಳೂ ಇವೆ. ಲಿತಿಯಂ ಐಯಾನ್ ಬ್ಯಾಟರಿಗಳನ್ನು ಎಷ್ಟು ಸಲ ಚಾರ್ಜ್ ಮಾಡಬಹುದು ಎಂಬುದಕ್ಕೂ ಮಿತಿಯಿದೆ. ಲಿತಿಯಂ ಐಯಾನ್ ಬ್ಯಾಟರಿಯ ಸಂಗ್ರಹಶಕ್ತಿಯೂ ಕಡಿಮೆ. ಈ ಎಲ್ಲ ಸಮಸ್ಯೆಗಳಿಗೆ ಪರಿಹಾರವೇ ಘನಸ್ಥಿತಿಯ  ಇಲೆಕ್ಟ್ರೋಲೈಟ್ ಅನ್ನು ಬಳಸುವ ಬ್ಯಾಟರಿ. ಇಲೆಕ್ಟ್ರೋಲೈಟ್ ದ್ರವದ ಬದಲಿಗೆ ಘನ ವಸ್ತುವಾಗಿದ್ದಲ್ಲಿ ಅದನ್ನು ಘನಸ್ಥಿತಿಯ ಇಲೆಕ್ಟ್ರೋಲೈಟ್ (solid-state electrolyte) ಎನ್ನುತ್ತಾರೆ. ಇಂತಹ ಇಲೆಕ್ಟ್ರೋಲೈಟ್ ಅನ್ನು ಬಳಸುವ ಬ್ಯಾಟರಿಗಳಿಗೆ ಘನಸ್ಥಿತಿಯ ಬ್ಯಾಟರಿ (solid-state battery) ಎನ್ನುತ್ತಾರೆ.

ಈ ನಮೂನೆಯ ಬ್ಯಾಟರಿಯಲ್ಲಿ ಇಲೆಕ್ಟ್ರೋಡ್‌ಗಳು ತೆಳ್ಳನೆಯದಾಗಿರುತ್ತವೆ. ಅವುಗಳ ಮಧ್ಯೆ ತೆಳ್ಳನೆಯ ಪದರದ ರೂಪದಲ್ಲಿ ಘನಸ್ಥಿತಿಯ ಇಲೆಕ್ಟ್ರೋಲೈಟ್ ಇರುತ್ತದೆ. ಇಂತಹ ಬ್ಯಾಟರಿ ಸೆಲ್‌ಗಳನ್ನು ಅನುಕ್ರಮವಾಗಿ ಜೋಡಿಸಿದಾಗ ಅದು ಬ್ಯಾಟರಿ ಆಗುತ್ತದೆ. ಈ ನಮೂನೆಯ ಬ್ಯಾಟರಿಗಳ ಒಟ್ಟಾರೆ ಗಾತ್ರ ತುಂಬ ಕಡಿಮೆಯಾಗಿರುತ್ತದೆ, ಮಾತ್ರವಲ್ಲದೆ ಅವುಗಳ ಧಾರಣೆಯ ಶಕ್ತಿಯೂ ಹೆಚ್ಚಿರುತ್ತದೆ. ಘನಸ್ಥಿತಿಯ ಇಲೆಕ್ಟ್ರೋಲೈಟ್ ಅನ್ನು ಹಲವು ಬೇರೆ ಬೇರೆ ವಸ್ತುಗಳಿಂದ ವಿಜ್ಞಾನಿಗಳು ತಯಾರಿಸಿದ್ದಾರೆ ಮಾತ್ರವಲ್ಲ ಇನ್ನೂ ಹಲವು ನಮೂನೆಯ ವಸ್ತುಗಳನ್ನು ಬಳಸಿ ಪ್ರಯೋಗ ಮುಂದುವರೆದಿದೆ. ಘನಸ್ಥಿತಿಯ ಬ್ಯಾಟರಿಗಳ ಸಂಗ್ರಹ ಶಕ್ತಿ ಜಾಸ್ತಿ. ಅವುಗಳನ್ನು ಅತಿ ವೇಗವಾಗಿ ಚಾರ್ಜ್ ಮಾಡಬಹುದು. ಅವುಗಳನ್ನು ಲಿತಿಯಂ ಐಯಾನ್ ಬ್ಯಾಟರಿಗಳಿಗಿಂತ ಜಾಸ್ತಿ ಸಲ ಚಾರ್ಜ್ ಮಾಡಬಹುದು. ಈ ಎಲ್ಲ ಸಾಧಕಗಳನ್ನು ಗಮನಿಸಿದಾಗ ಈ ಘನಸ್ಥಿತಿಯ ಬ್ಯಾಟರಿಗಳನ್ನು ಭವಿಷ್ಯದ ಬ್ಯಾಟರಿ ಎನ್ನಬಹುದು.

–ಡಾ| ಯು.ಬಿ. ಪವನಜ

gadgetloka @ gmail . com

The post ಘನಸ್ಥಿತಿಯ ಬ್ಯಾಟರಿ first appeared on Vishva Kannada.

ಈಗಿನ ಕಾಲದಲ್ಲಿ ಬಹುತೇಕ ಎಲ್ಲ ಸಾಧನಗಳು ವಿದ್ಯುತ್ತಿನಿಂದ ಕೆಲಸ ಮಾಡುತ್ತವೆ. ‌ಇದು ಮನೆಯಲ್ಲಿರುವ ವಿದ್ಯುತ್ ಪೂರೈಕೆ ಮೂಲಕ, ಸೌರಶಕ್ತಿಯಿಂದ, ಬ್ಯಾಟರಿ ಮೂಲಕ ಇರಬಹುದು. ಬ್ಯಾಟರಿ ಇಲ್ಲದ ಸಾಧನವೇ ಇಲ್ಲವೇನೋ? ಸೌರಶಕ್ತಿಯಿಂದ ಕೆಲಸ ಮಾಡುವ ಸಾಧನಗಳಲ್ಲೂ ಬ್ಯಾಟರಿಯಲ್ಲಿ ವಿದ್ಯುತ್ ಸಂಗ್ರಹವಾಗಿ ನಂತರವೇ ಬಳಕೆಗೆ ಲಭ್ಯವಾಗುತ್ತದೆ. ಬ್ಯಾಟರಿಗಳಲ್ಲಿ ಪ್ರಮುಖವಾಗಿ ಎರಡು ನಮೂನೆ. ಒಮ್ಮೆ ಬಳಸಿ ಎಸೆಯುವಂತಹವು ಹಾಗೂ ಮತ್ತೆ ಮತ್ತೆ ಚಾರ್ಜ್ ಮಾಡಿ ಬಳಸಬಹುದಾದ ರಿಚಾರ್ಜೇಬಲ್ ಬ್ಯಾಟರಿಗಳು. ರಿಚಾರ್ಜೇಬಲ್ ಬ್ಯಾಟರಿಗಳು ಹಲವು ಗಾತ್ರ, ಶಕ್ತಿಗಳಲ್ಲಿ ಬರುತ್ತವೆ. ಕೈಯಲ್ಲಿ ಧರಿಸುವ ವಾಚಿನಲ್ಲಿರುವುದು ಅತಿ ಚಿಕ್ಕ ಬ್ಯಾಟರಿ. ವಿದ್ಯುತ್ ಚಾಲಿತ ಕಾರಿನಲ್ಲಿರುವುದು ದೊಡ್ಡ ಬ್ಯಾಟರಿ. ಸಾಮಾನ್ಯವಾಗಿ ಯಾರು ಬೇಕಾದರೂ ಊಹಿಸಬಹುದಾದ ಸಂಗತಿ ಎಂದರೆ ಬ್ಯಾಟರಿಯ ಗಾತ್ರ ಹಾಗೂ ಅದರ ಸಂಗ್ರಹ ಶಕ್ತಿ ಮತ್ತು ಚಾರ್ಜ್ ಮಾಡಲು ತಗಲುವ ಸಮಯ ಇವುಗಳ ನಡುವಿನ ಸಂಬಂಧ. ಬ್ಯಾಟರಿಯ ಗಾತ್ರ ದೊಡ್ಡದಿದ್ದಷ್ಟೂ ಅದರ ಸಂಗ್ರಹ ಶಕ್ತಿ ಅಧಿಕವಾಗುತ್ತದೆ. ಜೊತೆಗೆ ಅದನ್ನು ಚಾರ್ಜ್ ಮಾಡಲು ತಗಲುವ ಸಮಯವೂ. ಬ್ಯಾಟರಿ ಚಾಲಿತ ವಾಹನಗಳ ಬಹುದೊಡ್ಡ ಸಮಸ್ಯೆ ಇದೇ ಆಗಿದೆ. ಒಮ್ಮೆ ಚಾರ್ಜ್ ಮಾಡಿದರೆ ತುಂಬ ದೂರ ಚಲಿಸಬೇಕಾದರೆ ಅದರ ಗಾತ್ರ ದೊಡ್ಡದಿರಬೇಕು. ಆಗ ಅದರ ಚಾರ್ಜಿಂಗ್ ಸಮಯ ಜಾಸ್ತಿಯಾಗುತ್ತದೆ. ಈ ಸಮಸ್ಯೆಗೆ ಪರಿಹಾರವಿಲ್ಲವೇ? ಕ್ವಾಂಟಂ ಬ್ಯಾಟರಿಗಳು ಲಭ್ಯವಾದಾಗ ಈ ಸಮಸ್ಯೆ ಪರಿಹಾರವಾಗುತ್ತದೆ. ಏನು ಈ ಕ್ವಾಂಟಂ ಬ್ಯಾಟರಿ ಎಂದರೆ? ಈ ಸಂಚಿಕೆಯಲ್ಲಿ ಅದರ ಬಗ್ಗೆ ತಿಳಿಯೋಣ.

ಮೊದಲಿಗೆ ಈ ಕ್ವಾಂಟಂ ಪದದ ಬಗೆಗೆ ತಿಳಿಯೋಣ. ಆಧುನಿಕ ಭೌತವಿಜ್ಞಾನದ ತಳಹದಿ ಈ ಪದದಲ್ಲಿದೆ. ಬೆಳಕನ್ನು ಅಲೆಗಳಾಗಿಯೂ ಕಣಗಳಾಗಿಯೂ ನೋಡಬಹುದು. ಕಣಗಳಾಗಿ ನೋಡಿದಾಗ ಬೆಳಕಿನ ಒಂದು ಅತಿ ಚಿಕ್ಕ ಘಟಕ ಅಥವಾ ಕಣವನ್ನು ಫೋಟೋನ್ ಎನ್ನುತ್ತಾರೆ. ಬೆಳಕು ಏಕಕಾಲದಲ್ಲಿ ಅಲೆಯಾಗಿಯೂ ಕಣವಾಗಿಯೂ ನಡವಳಿಕೆಯನ್ನು ತೋರುತ್ತದೆ. ಯಾವುದೇ ಒಂದು ಗುಣವೈಶಿಷ್ಟ್ಯವನ್ನು ಅತಿ ಚಿಕ್ಕ ಘಟಕವಾಗಿ ಒಡೆದು ಅದರ ಗುಣವೈಶಿಷ್ಟ್ಯವನ್ನು ವಿವರಿಸುವ ವಿಜ್ಞಾನವೇ ಕ್ವಾಂಟಂ ಮೆಕಾನಿಸಂ. ಉದಾಹರಣೆಗೆ ಬೆಳಕಿನ ಕಣಗಳ ನಡವಳಿಕೆಗಳನ್ನು ಕ್ವಾಂಟಂ ಮೆಕಾನಿಸಂ ಮೂಲಕ ವಿವರಿಸಬಹುದು. ವಸ್ತುಗಳು ದೊಡ್ಡಮೊತ್ತದಲ್ಲಿ ನಡೆದುಕೊಳ್ಳುವುದಕ್ಕೂ ಅತಿ ಚಿಕ್ಕ ಘಟಕವಾದಾಗ ನಡೆದುಕೊಳ್ಳುವುದಕ್ಕೂ ಹಲವು ಸಂದರ್ಭಗಳಲ್ಲಿ ತುಂಬ ವ್ಯತ್ಯಾಸಗಳಿರುತ್ತವೆ. ಇದುವೇ ಕ್ವಾಂಟಂ ಜಗತ್ತಿನ ಅಚ್ಚರಿ. ಈ ವ್ಯತ್ಯಾಸವನ್ನೇ ಹಲವು ಸಂದರ್ಭಗಳಲ್ಲಿ ನಮ್ಮ ಲಾಭಕ್ಕಾಗಿ ಬಳಸಿಕೊಳ್ಳಬಹುದು.

ಅಣುಗಳು ತಮ್ಮಲ್ಲಿ ಶಕ್ತಿಯನ್ನು ಸಂಗ್ರಹಿಸಿಟ್ಟುಕೊಳ್ಳಬಹುದು. ಸಾಮಾನ್ಯವಾಗಿ ಅವು ತಮ್ಮ ಸಹಜ ಸ್ಥಿತಿಯಲ್ಲಿರುತ್ತವೆ. ಅವುಗಳ ಮೇಲೆ ವಿಶಿಷ್ಟ ಕಂಪನಾಂಕದ ಬೆಳಕನ್ನು ಚೆಲ್ಲಿದಾಗ ಅವು ಶಕ್ತಿಯನ್ನು ಹೀರಿಕೊಂಡು ಉದ್ರಿಕ್ತ ಸ್ಥಿತಿಗೆ ಹೋಗುತ್ತವೆ. ಹೀಗೆ ಹೋಗಬೇಕಾದರೆ ಬೇರೆ ಬೇರೆ ಅಣುಗಳಿಗೆ ಬೇರೆ ಶಕ್ತಿಯ ಅಂದರೆ ಬೇರೆ ಬೇರೆ ಕಂಪನಾಂಕದ ಬೆಳಕಿನ ಅಗತ್ಯವಿದೆ. ಇಂತಹ ನಿರ್ದಿಷ್ಟ ಕಂಪನಾಂಕದ ಬೆಳಕೇ ಲೇಸರ್ ಬೆಳಕು. ಹೀಗೆ ಉದ್ರಿಕ್ತ ಸ್ಥಿತಿಗೆ ಹೋದ ಅಣು ತನ್ನಲ್ಲಿ ಸಂಗ್ರಹವಾದ ಶಕ್ತಿಯನ್ನು ಬಿಡುಗಡೆ ಮಾಡಲು ಪ್ರಯತ್ನಿಸುತ್ತದೆ. ಬಿಡುಗಡೆ ಮಾಡುತ್ತದೆ ಕೂಡ. ಹೀಗೆ ಬಿಡುಗಡೆಯಾಗುವ ಶಕ್ತಿ ಬೆಳಕು ಅಥವಾ ವಿದ್ಯುತ್ತಿನ ರೂಪದಲ್ಲಿರಬಹುದು. ಶಕ್ತಿಯನ್ನು ಹೀರಿದ ನಂತರ ಹಾಗೆಯೇ ಹಿಡಿದಿಟ್ಟುಕೊಳ್ಳುವ ಹಾಗಿದ್ದರೆ? ನಂತರ ನಮಗೆ ಬೇಕಾದಾಗ ಬೇಕಾದ ಪ್ರಮಾಣದಲ್ಲಿ ಬಿಡುಗಡೆ ಮಾಡುವಂತಿದ್ದರೆ? ಕ್ವಾಂಟಂ ಬ್ಯಾಟರಿಗಳು ಇದನ್ನು ಮಾಡಬಲ್ಲವು.

ಹಲವು ದೇಶಗಳ ವಿಜ್ಞಾನಿಗಳು ಒಟ್ಟುಗೂಡಿ ಈ ದಿಸೆಯಲ್ಲಿ ಪ್ರಯತ್ನಿಸುತ್ತಿದ್ದಾರೆ. ಪ್ರಾರಂಭದಲ್ಲಿ ಈ ಕ್ವಾಂಟಂ ಬ್ಯಾಟರಿ ಎನ್ನುವುದು ಕೇವಲ ಸೈದ್ಧಾಂತಿಕ ಎಂದು ನಂಬಲಾಗಿತ್ತು. ಇತ್ತೀಚೆಗೆ ಕೆಲವು ಪ್ರೋತ್ಸಾಹದಾಯಕ ಫಲಿತಾಂಶಗಳು ದೊರೆಯತೊಡಗಿವೆ. ಲೈಮೋಜೆನ್ ಎಫ್ ಆರೆಂಜ್ ಎಂಬ ಹೆಸರಿನ ಒಂದು ಸಾವಯವ ಬಣ್ಣದ ರಾಸಾಯನಿಕ ದ್ರವದ ಮೇಲೆ ಸೂಕ್ತ ಕಂಪನಾಂಕದ ಬೆಳಕನ್ನು ಚೆಲ್ಲಿ ಅದು ಆ ಶಕ್ತಿಯನ್ನು ಹೀರಿ ಸಂಗ್ರಹಿಸಿಟ್ಟುಕೊಳ್ಳುವಂತೆ ಮಾಡುವಲ್ಲಿ ವಿಜ್ಞಾನಿಗಳು ಸಫಲರಾಗಿದ್ದಾರೆ. ಈ ದ್ರವದ ಸೂಕ್ಷ್ಮ ಘಟಕಗಳಲ್ಲಿ ಅವರು ಶಕ್ತಿಯನ್ನು ಸಂಗ್ರಹಿಸಿದರು. ಚಿಕ್ಕ ಘಟಕವಾದಾಗ ಅದರ ನಡೆವಳಿಕೆ ಬೇರೆಯೇ ರೀತಿಯದಾಗಿತ್ತು. ಸಹಜ ಸ್ಥಿತಿಯಿಂದ ಉದ್ರಿಕ್ತ ಸ್ಥಿತಿಗೆ ಹೋಗಲು ಪ್ರತಿ ಸೂಕ್ಷ್ಮ ಘಟಕಕ್ಕೂ ಬೇರೆಯೇ ಶಕ್ತಿ ಬೇಕಿತ್ತು. ಅಂತೆಯೇ ಉದ್ರಿಕ್ತ ಸ್ಥಿತಿಯಿಂದ ಸಹಜ ಸ್ಥಿತಿಗೆ ಮರಳುವಾಗ ಹೊರಸೂಸುವ ಶಕ್ತಿಯೂ ಬೇರೆ ಬೇರೆಯೇ ಆಗಿತ್ತು. ಅಂದರೆ ಎಲ್ಲ ಸೂಕ್ಷ್ಮ ಘಟಕಗಗಳೂ ಒಂದು ಹೊಂದಾಣಿಕೆಗೊಂಡು ಒಂದೇ ಕಂಪನಾಕದ ಬೆಳಕನ್ನು ಅಥವಾ ಒಂದೇ ಪ್ರಮಾಣದ ಶಕ್ತಿಯನ್ನು ಹೊರಸೂಸುತ್ತಿರಲಿಲ್ಲ. ಇದನ್ನೇ ವಿರುದ್ಧವಾಗಿಸಿದರೆ ಎಲ್ಲ ಸೂಕ್ಷ್ಮ ಘಟಕಕ್ಕೂ ಉದ್ರಿಕ್ತ ಸ್ಥಿತಿಗೆ ತೆಗೆದುಕೊಂಡು ಹೋಗಲು ಬೇರೆಯೇ ಪ್ರಮಾಣದ ಶಕ್ತಿಯ ಅಗತ್ಯವಿತ್ತು.

ಯಾವುದೇ ರಿಚಾರ್ಜೇಬಲ್ ಬ್ಯಾಟರಿಯ ಗಾತ್ರ ಹೆಚ್ಚಾದಂತೆ ಅದನ್ನು ಚಾರ್ಜ್ ಮಾಡಲು ಹೆಚ್ಚು ವಿದ್ಯುತ್ ಹಾಗೂ ಸಮಯ ಬೇಕಾಗುತ್ತದೆ. ಮೇಲೆ ವಿವರಿಸಿದ ಸಾವಯವ ದ್ರವದ ಕ್ವಾಂಟಂ ಬ್ಯಾಟರಿಯಲ್ಲಿ ಒಂದು ವಿಚಿತ್ರ ಗುಣವನ್ನು ವಿಜ್ಞಾನಿಗಳು ಗಮನಿಸಿದರು. ಅದೆಂದರೆ ಬ್ಯಾಟರಿಯ ಗಾತ್ರ ಹೆಚ್ಚಿದಂತೆ ಅಂದರೆ ಸೂಕ್ಷ್ಮ ಘಟಕಕಗಳ ಸಂಖ್ಯೆ ಹೆಚ್ಚಿದಂತೆ ಅದರಲ್ಲಿ ಶಕ್ತಿ ಸಂಗ್ರಹಣೆಯ ವೇಗ ಹೆಚ್ಚಾಯಿತು. ಅಂದರೆ ದೊಡ್ಡ ಗಾತ್ರದ ಬ್ಯಾಟರಿಯನ್ನು ಹೆಚ್ಚು ವೇಗದಲ್ಲಿ ಚಾರ್ಜ್ ಮಾಡಬಹುದು ಹಾಗೂ ಅದರಿಂದಾಗಿ ಬೇಗನೆ ಚಾರ್ಜ್ ಮಾಡಬಹುದು. ಕ್ವಾಂಟಂ ಬ್ಯಾಟರಿಗಳ ಈ ಅದ್ಭುತ ಗುಣ ಬ್ಯಾಟರಿ ಜಗತ್ತಿನಲ್ಲಿ ಅತಿ ದೊಡ್ಡ ಕ್ರಾಂತಿಯನ್ನೇ ತರಬಲ್ಲುದು. ಸದ್ಯಕ್ಕೆ ವಿಜ್ಞಾನಿಗಳು ಅತಿ ಚಿಕ್ಕ ಮಟ್ಟದಲ್ಲಿ ಪ್ರಯೋಗಶಾಲೆಯಲ್ಲಿ ಮಾತ್ರ ಈ ಕ್ವಾಂಟಂ ಬ್ಯಾಟರಿಗಳನ್ನು ತಯಾರಿಸುವಲ್ಲಿ ಸಫಲರಾಗಿದ್ದಾರೆ. ಈ ಕ್ವಾಂಟಂ ಬ್ಯಾಟರಿಗಳು ಪ್ರಯೋಗಶಾಲಿಯಿಂದ ಹೊರಬಂದು ಜನಸಾಮಾನ್ಯರ ಕೈಗೆ ಬಂದಾಗ ಅದು ದೊಡ್ಡ ಬದಲಾವಣೆಯನ್ನೇ ತರಬಲ್ಲುದು. ಅದು ಯಾವಾಗ? ಬಹುಶಃ ಅತಿ ಸದ್ಯದಲ್ಲಂತೂ ಇಲ್ಲ ಎಂದೇ ಹೇಳಬಹುದು.

–ಡಾ| ಯು.ಬಿ. ಪವನಜ

gadgetloka @ gmail . com

The post ಕ್ವಾಂಟಂ ಬ್ಯಾಟರಿ first appeared on Vishva Kannada.

ವಿದ್ಯುತ್ತಿನಿಂದ ಚಲಿಸುವ ಸ್ಕೂಟರ್ ಮತ್ತು ಕಾರುಗಳ ಬಗ್ಗೆ ಇದೇ ಅಂಕಣದಲ್ಲಿ ಬರೆಯುವಾಗ ವಿದ್ಯುತ್ ಶಕ್ತಿಯ ಬೇಡಿಕೆ ಎಷ್ಟು ತುಂಬ ಇದೆ ಎಂದು ಬರೆಯಲಾಗಿತ್ತು. ಈ ವಿದ್ಯುತ್ ಹಲವು ಶಕ್ತಿಗಳಲ್ಲಿ ಬೇಕಾಗಿದೆ. ಸ್ಕೂಟರು, ಕಾರು, ಇತ್ಯಾದಿ ವಾಹನಗಳನ್ನು ನಡೆಸಲು ತುಂಬ ಶಕ್ತಿಯ ಬ್ಯಾಟರಿ ಬೇಕು. ಮೊಬೈಲು, ಟ್ಯಾಬ್ಲೆಟ್ ಇತ್ಯಾದಿಗಳಿಗೆ ಸ್ವಲ್ಪ ಕಡಿಮೆ ಶಕ್ತಿ ಸಾಕು. ವಸ್ತುಗಳ ಅಂತರಜಾಲದಲ್ಲಿ ಬಳಕೆಯಾಗುವ ಬ್ಯಾಟರಿಗಳಿಗೆ ಅತಿ ಕಡಿಮೆ ಶಕ್ತಿ ಸಾಕು. ಅಂತರಜಾಲದ ಮೂಲಕ ಸಂಪರ್ಕ ಹೊಂದಿರುವಂತಹ ವಸ್ತುಗಳ ಪ್ರಪಂಚಕ್ಕೆ ಇಂಗ್ಲಿಶಿನಲ್ಲಿ Internet of Things ಅಥವಾ ಚುಟುಕಾಗಿ IoT (ಐಓಟಿ) ಎಂಬ ಹೆಸರಿದೆ. ಇದಕ್ಕೆ connected devices ಎಂಬ ಇನ್ನೊಂದು ಹೆಸರೂ ಇದೆ. ಸಾಧನ, ಪರಿಕರ, ಸಂಪರ್ಕಕ್ಕೊಳಪಡಬಹುದಾದ ಗ್ಯಾಜೆಟ್‌ಗಳು, ಗಣಕ, ಸಂವೇದಕ (sensor) ಇವೆಲ್ಲ ಅಂತರಜಾಲದ ಮೂಲಕ ಸಂಪರ್ಕಗೊಂಡು ಅವುಗಳನ್ನು ವೀಕ್ಷಿಸುವುದು, ಅವುಗಳಿಂದ ಮಾಹಿತಿಯನ್ನು ಪಡೆಯುವುದು ಮತ್ತು ಅವುಗಳನ್ನು ನಿಯಂತ್ರಿಸುವುದು ಇವೆಲ್ಲ ಈ ವಿಷಯದ ವ್ಯಾಪ್ತಿಯಲ್ಲಿ ಬರುತ್ತವೆ.

ಬ್ಯಾಟರಿಗಳ ಬಗ್ಗೆ ಬರೆಯುವುದಾದರೆ ಕೆಲವು ಪ್ರಮುಖ ವಿಷಯಗಳ ಬಗ್ಗೆ ಬರೆಯಬೇಕು. ಮೊದಲನೆಯದಾಗಿ ಬ್ಯಾಟರಿಗಳ ಆಯಸ್ಸು. ಒಂದು ಸಲ ಬಳಸಿ ಬಿಸಾಡುವ ಬ್ಯಾಟರಿಗಳ ಕಾಲ ಹಳತಾದರೂ ಈಗಲೂ ಅಂತಹವುಗಳ ಬಳಕೆ ಇದೆ. ರಿಚಾರ್ಜೇಬಲ್ ಬ್ಯಾಟರಿಗಳ ಬಳಕೆ ಇವೆಯಾದರೂ ಅವುಗಳಿಗೂ ಆಯಸ್ಸು ಇದೆ. ಅವುಗಳನ್ನು 250, 500, 1000 ಸಲ ರಿಚಾರ್ಜ್ ಮಾಡಬಹುದಷ್ಟೆ. ನಂತರ ಎಸೆಯಲೇ ಬೇಕು. ಈ ಬ್ಯಾಟರಿಗಳಲ್ಲಿ ಬಳಸುವುದು ಪರಿಸರಸ್ನೇಹಿ ಲೋಹ, ರಾಸಾಯನಿಕಗಳಲ್ಲ. ಅಂದರೆ ಅವುಗಳನ್ನು ಜನರು ಸುಮ್ಮನೆ ಕಸದ ತೊಟ್ಟಿಯಲ್ಲಿ ಎಸೆಯುವುದು ಪರಿಸರಕ್ಕೆ ಮಾರಕ. ಸೌರಶಕ್ತಿಯನ್ನು ವಿದ್ಯುತ್ ಆಗಿ ಪರಿವರ್ತಿಸಿ ಅದನ್ನು ಬ್ಯಾಟರಿಯಲ್ಲಿ ಸಂಗ್ರಹಿಸಿ ಬಳಸುವುದು ಪರಿಸರಸ್ನೇಹಿ ಎಂದು ಬಿಂಬಿಸಲಾಗುತ್ತಿದೆ. ಆದರೆ ಇದು ಕೂಡ ಪರಿಸರಸ್ನೇಹಿಯಲ್ಲ. ಯಾಕೆಂದರೆ ಸೌರವಿದ್ಯುತ್ ಪ್ಯಾನೆಲ್‌ಗಳ ತಯಾರಿಕೆ ಅತ್ಯಂತ ಪ್ರದೂಷಣದಾಯಕ. ಈ ವಿಷಯಗಳೆಲ್ಲ ಇ-ತ್ಯಾಜ್ಯದ ಬಗೆಗಿನ ಚರ್ಚೆಯ ವ್ಯಾಪ್ತಿಯಲ್ಲಿ ಬರುತ್ತದೆ. ಅಂದರೆ ನಮಗೆ ಬೇಕಾಗಿರುವುದು ಪರಿಸರಕ್ಕೆ ಮಾರಕವಲ್ಲದ, ಎಷ್ಟು ಸಲವಾದರೂ ರಿಚಾರ್ಜ್ ಮಾಡಬಲ್ಲ ಅಥವಾ ತನ್ನ ವಿದ್ಯುತ್ ಅನ್ನು ತಾನೇ ಉತ್ಪಾದಿಸುವ ಬ್ಯಾಟರಿ. ಈಗ ಅಂತಹ ಒಂದು ಬ್ಯಾಟರಿ ಬಗ್ಗೆ ತಿಳಿಯೋಣ.

ಇಂಗ್ಲೆಂಡಿನ ಕೇಂಬ್ರಿಜ್ ವಿಶ್ವವಿದ್ಯಾಲಯದ ವಿಜ್ಞಾನಿಗಳು, ಆರ್ಮ್ ಚಿಪ್ ವಿನ್ಯಾಸದ ಕಂಪೆನಿಯ ವಿಜ್ಞಾನಿಗಳು ಮತ್ತು ಇತರರು ಸೇರಿ ಒಂದು ಆವಿಷ್ಕಾರ ಮಾಡಿದ್ದಾರೆ. ಅದು ಪಾಚಿಯಿಂದ ಕೆಲಸ ಮಾಡುವ ಬ್ಯಾಟರಿ. ಎಲ್ಲ ಕಡೆ ಕಾಣಿಸುವ ಅತಿ ಸಾಮಾನ್ಯವಾದ ನೀಲಿ-ಹಸಿರು ಪಾಚಿಯಿಂದ ಅವರು ತಯಾರಿಸಿದ ಬ್ಯಾಟರಿಯು ಸೂರ್ಯನ ಬೆಳಕು ಮತ್ತು ನೀರನ್ನು ಬಳಸಿ ವಿದ್ಯುತ್ ತಯಾರಿಸುತ್ತಿದೆ. ಅದು ಒಂದು ಮೈಕ್ರೋಪ್ರೋಸೆಸರ್‌ಗೆ ಒಂದು ವರ್ಷದಿಂದ ವಿದ್ಯುತ್ ಸರಬರಾಜು ಮಾಡಿ ಅದು ಕೆಲಸ ಮಾಡುವಂತೆ ನೋಡಿಕೊಳ್ಳುತ್ತಿದೆ. ಈ ಬ್ಯಾಟರಿ ಪರಿಸರಕ್ಕೆ ಸ್ವಲ್ಪವೂ ಹಾನಿಕಾರಕವಲ್ಲ. ಯಾಕೆಂದರೆ ಇದರಲ್ಲಿ ಯಾವುದೇ ತ್ಯಾಜ್ಯವಿಲ್ಲ. ಇದು ಯಾವುದೇ ಹಾನಿಕಾರಕ ರಾಸಾಯನಿಕವನ್ನು ಬಳಸುವುದೂ ಇಲ್ಲ.

ಸುಮಾರು ಎಎ ಗಾತ್ರದ ಒಂದು ಮಾಮೂಲಿ ಬ್ಯಾಟರಿಯಷ್ಟು ದೊಡ್ಡದಿರುವ ಈ ವ್ಯವಸ್ಥೆಯಲ್ಲಿ ವಿಷಕಾರಿಯಲ್ಲದ ಸೈನೆಕೋಸಿಸ್ಟ್ ಎಂಬ ಹೆಸರಿನ ಪಾಚಿಯನ್ನು ಬಳಸಲಾಗಿದೆ. ಈ ಪಾಚಿಯು ಸೂರ್ಯನ ಬೆಳಕಿನಿಂದ ದ್ಯುತಿಸಂಶ್ಲೇಷಣೆಯ ಮೂಲಕ ಶಕ್ತಿಯನ್ನು ಉತ್ಪಾದಿಸುತ್ತದೆ. ಇದು ಉತ್ಪಾದಿಸುವ ಅತಿ ಕಡಿಮೆ ಶಕ್ತಿಯ ವಿದ್ಯುತ್ ಪ್ರವಾಹವು ಒಂದು ಮೈಕ್ರೋಪ್ರೋಸೆಸರ್ ಅನ್ನು ಚಲಾಯಿಸುತ್ತದೆ. ಈ ಬ್ಯಾಟರಿಯನ್ನು ತಯಾರಿಸುವಲ್ಲಿ ಮರುಬಳಕೆ ಮಾಡಬಲ್ಲ ವಸ್ತುಗಳನ್ನೇ ಬಳಸಲಾಗಿದೆ. ಈ ಬ್ಯಾಟರಿಯು ಅತಿಯಾದ ಶಕ್ತಿಯನ್ನು ಬೇಡುವ ಸಾಧನಗಳನ್ನು ನಡೆಸಲಾರದು. ಆದರೆ ಕಡಿಮೆ ಶಕ್ತಿಯಿಂದ ಕೆಲಸ ಮಾಡಬಲ್ಲ ಮೈಕ್ರೋಪ್ರೋಸೆಸರ್‌ಗಳನ್ನು ಇದು ನಡೆಸಬಲ್ಲುದು. ಸಾಮಾನ್ಯವಾಗಿ ವಸ್ತುಗಳ ಅಂತರಾಲದಲ್ಲಿ ಇಂತಹ ಕಡಿಮ ಶಕ್ತಿಯಿಂದ ಕೆಲಸ ಮಾಡಬಲ್ಲ ವಸ್ತುಗಳಿರುತ್ತವೆ. ಈ ಬ್ಯಾಟರಿಗೆ ಇತರೆ ಬ್ಯಾಟರಿಗಳಂತೆ ನಿಯಮಿತ ಆಯುಸ್ಸು ಇಲ್ಲ. ಇದು ಸೂರ್ಯನ ಬೆಳಕನ್ನು ಬಳಸುತ್ತದೆ. ಅದಕ್ಕೆ ಮಿತಿಯಿಲ್ಲ.

ಈ ಸಂಶೋಧನೆಯಲ್ಲಿ ಕೇಂಬ್ರಿಜ್ ವಿಶ್ವವಿದ್ಯಾಲಯ, ಆರ್ಮ್ ಚಿಪ್ ವಿನ್ಯಾಸ ಕಂಪೆನಿ, ಇಟೆಲಿಯ ಒಂದು ವಿಶ್ವವಿದ್ಯಾಲಯ, ಸ್ಕಾಟ್‌ಲೆಂಡಿನ ಒಂದು ಸಂಶೋಧನಾಲಯ, ನಾರ್ವೆ ಹಾಗೂ ನ್ಯೂಝೀಲ್ಯಾಂಡಿನ ಸಂಶೋಧನಾಯಗಳು ಜೊತೆ ಸೇರಿವೆ. ಈ ಸಂಶೋಧನೆಯಲ್ಲಿ ಅವರು ತಯಾರಿಸಿದ ಸಾಧನವು ಆರ್ಮ್ ಕಂಪೆನಿಯ Arm Cortex M0+ ಮೈಕ್ರೋಪ್ರೋಸೆಸರಿಗೆ ವಿದ್ಯುತ್ ನೀಡುತ್ತಿದೆ. ಒಂದು ವರ್ಷದಿಂದ ಹೆಚ್ಚು ಕಾಲ ಇದು ಕೆಲಸ ಮಾಡಿದೆ ಮತ್ತು ಈಗಲೂ ಕೆಲಸ ಮಾಡುತ್ತಿದೆ. ಈ ಸಾಧನವು ಸಾಮಾನ್ಯವಾಗಿ ಮನೆಗಳಲ್ಲಿ ಇರುವ ವಾತಾವರಣದಲ್ಲಿ ಕೆಲಸ ಮಾಡುತ್ತಿದೆ. ಇದು ಬಳಸುವ ವಸ್ತುಗಳೂ ಸಾಮಾನ್ಯವಾಗಿ ಎಲ್ಲೆಡೆ ದೊರೆಯುವ ಹಾಗೂ ಬಳಸುವ ವಸ್ತುಗಳೇ. ಇದನ್ನು ತಯಾರಿಸಲು ದೊಡ್ಡ ಫ್ಯಾಕ್ಟರಿಯೂ ಬೇಕಾಗಿಲ್ಲ.

ಪಾಚಿಗೆ ಯಾವುದೇ ಆಹಾರ ನೀಡುವ ಅಗತ್ಯವಿಲ್ಲ. ಅದು ತನ್ನ ಆಹಾರವನ್ನು ತಾನೇ ತಯಾರಿಸಿಕೊಳ್ಳುತ್ತದೆ. ಅದು ಸೂರ್ಯನ ಬೆಳಕಿನಿಂದ ದ್ಯುತಿಸಂಶ್ಲೇಷಣೆಯ ಮೂಲಕ ತನ್ನ ಆಹಾರವನ್ನು ತಾನೆ ತಯಾರಿಸಿಕೊಳ್ಳುತ್ತದೆ. ಈ ಸಾಧನವು ಸೌರಶಕ್ತಿಯನ್ನು ವಿದ್ಯುತ್ ಆಗಿ ಪರಿವರ್ತಿಸುತ್ತದೆ. ಹಾಗೆಂದು ಹೇಳಿ ಇದು ಕತ್ತಲಿನಲ್ಲಿ ಕೆಲಸವೇ ಮಾಡುವುದಿಲ್ಲ ಎನ್ನುವಂತಿಲ್ಲ. ಇದು ಕತ್ತಲಲ್ಲೂ ಸ್ವಲ್ಪ ವಿದ್ಯುತ್ ನೀಡುತ್ತದೆ. ಇದಕ್ಕೆ ಕಾರಣ ಪಾಚಿಯು ತನ್ನಲ್ಲಿ ಶೇಖರವಾಗಿರುವ ಶಕ್ತಿಯನ್ನು ಕತ್ತಲಿನಲ್ಲಿ ಸ್ವಲ್ಪ ಸ್ವಲ್ಪ ಬಿಡುಗಡೆ ಮಾಡುವುದು. ಅಂದರೆ ಇದು ವಸ್ತುಗಳ ಅಂತರಜಾಲಕ್ಕೆ ಉತ್ತಮ ಬ್ಯಾಟರಿ ಆಗಬಲ್ಲುದು.

ವಸ್ತುಗಳ ಅಂತರಜಾವು ಅತಿ ವೇಗವಾಗಿ ಬೆಳೆಯುತ್ತಿದೆ. ಅವುಗಳಲ್ಲಿ ಸದ್ಯಕ್ಕೆ ಲಿಥಿಯಂ ಬ್ಯಾಟರಿ ಬಳಕೆಯಾಗುತ್ತಿದೆ. ಇಂತಹ ಸಾಧನಗಳ ಸಂಖ್ಯೆ ಟ್ರಿಲಿಯಂ ದಾಟುವ ಅಂದಾಜಿದೆ. ಇಷ್ಟು ದೊಡ್ಡ ಸಂಖ್ಯೆಯಲ್ಲಿ ಪರಿಸರಕ್ಕೆ ಮಾರಕವಾದ ಬ್ಯಾಟರಿಗಳನ್ನು ಬಳಸುವುದು ಒಳಳೆಯದಲ್ಲ. ಈ ಸಮಸ್ಯೆಗೆ ಈ ಪಾಚಿಯಿಂದ ಕೆಲಸ ಮಾಡುವ ಬ್ಯಾಟರಿ ಉತ್ತಮ ಪರಿಹಾರವಾಗಬಲ್ಲುದು.

ಅಂದ ಹಾಗೆ ಈ ಸಂಶೋಧನೆ ಮಾಡಿದ ತಂಡದಲ್ಲಿ ಇಂಗ್ಲೆಂಡಿನ ಆರ್ಮ್ ಕಂಪೆನಿಯಲ್ಲಿ ಕೆಲಸ ಮಾಡುತ್ತಿರುವ ಕನ್ನಡಿಗ ಆನಂದ ಸಾವಂತ ಅವರೂ ಇದ್ದಾರೆ.

–ಡಾ| ಯು.ಬಿ. ಪವನಜ

gadgetloka @ gmail . com

The post ಪಾಚಿಯಿಂದ ವಿದ್ಯುತ್ first appeared on Vishva Kannada.