ನೀವು ಯಾವುದಾದರೂ ಸೂಪರ್ ಮಾರ್ಕೆಟ್ಟಿಗೆ ಹೋದಾಗ ಅಲ್ಲಿ ಒಂದು ಪೆಟ್ಟಿಗೆ ಇಟ್ಟು ಇದರಲ್ಲಿ ನಿಮ್ಮ ಹೆಸರು, ವಿಳಾಸ, ಫೋನ್ ಸಂಖ್ಯೆ ನೀಡಿ, ಅದರಲ್ಲಿ ಕೆಲವನ್ನು ಹೆಕ್ಕಿ ಗೆದ್ದವರಿಗೆ ವಿಶೇಷ ಬಹುಮಾನ ನೀಡುತ್ತೇವೆ ಎಂದು ಜಾಹೀರಾತು ನೀಡಿದ್ದನ್ನು ನಂಬಿ ನಿಮ್ಮ ಮಾಹಿತಿ ನೀಡಿದ್ದೀರಾ? ನಿಮಗೆ ಬಹುಮಾನ ಅಂತೂ ಬಂದಿರುವುದಿಲ್ಲ. ಆದರೆ ಅನಾವಶ್ಯಕ ಕಿರಿಕಿರಿ ಫೋನ್ ಕರೆಗಳು ಬರಲು ಪ್ರಾರಂಭವಾಗಿರುತ್ತದೆ. ಇವೆಲ್ಲ ಜನರ ವೈಯಕ್ತಿಕ ಮಾಹಿತಿ ಸಂಗ್ರಹಿಸುವ ಹಳೆಯ ವಿಧಾನಗಳಾದವು. ಈಗ ಎಲ್ಲವೂ ಆನ್‌ಲೈನ್. ನಿಮ್ಮ ಮೊಬೈಲ್‌ನಲ್ಲಿ ಗೂಗ್ಲ್‌ನಲ್ಲಿ ಏನಾದರೂ ಒಂದು ಮಾಹಿತಿ ಹುಡುಕಿ. ನಂತರ ಫೇಸ್‌ಬುಕ್ ತೆರೆಯಿರಿ. ನೀವು ಏನನ್ನು ಹುಡುಕಿದ್ದೀರಾ ಅದಕ್ಕೆ ಸಂಬಂಧಿಸಿದ ಜಾಹೀರಾತುಗಳು ನಿಮಗೆ ಫೇಸ್‌ಬುಕ್‌ನಲ್ಲಿ ಬರುತ್ತವೆ. ಇನ್‌ಸ್ಟಾಗ್ರಾಂ ತೆರೆದರೆ ಅಲ್ಲೂ ಅವೇ ಜಾಹೀರಾತುಗಳು ಬರುತ್ತವೆ. ಅಲ್ಲಿಗೆ ಮುಗಿಯುವುದಿಲ್ಲ. ಯಾರು ಯಾರೋ ಕರೆ ಮಾಡುತ್ತಾರೆ. ಅರ್ಥಾತ್ ನಿಮ್ಮ ವೈಯಕ್ತಿಕ ಮಾಹಿತಿ ಸೋರಿಕೆಯಾಗಿದೆ. ಅಲ್ಲಲ್ಲ, ಕಳವಾಗಿದೆ.

21ನೆಯ ಶತಮಾನವನ್ನು ಮಾಹಿತಿ ಯುಗ ಎಂದು ಕರೆಯುತ್ತಾರೆ. Information is the new oil ಎಂಬ ಒಂದು ಹೇಳಿಕೆಯಿದೆ. ಅಂದರೆ ಈಗಿನ ಕಾಲದಲ್ಲಿ ಮಾಹಿತಿಯು ಚಿನ್ನ, ಎಣ್ಣೆಗಳಿಗಿಂತಲೂ ಹೆಚ್ಚು ಬೆಲೆಬಾಳುತ್ತದೆ ಎಂದು ಅರ್ಥ. ಯಾವ ಮಾಹಿತಿಯ ಬಗ್ಗೆ ಇವರು ಹೇಳುತ್ತಿದ್ದಾರೆ? ಪ್ರಮುಖವಾಗಿ ನಿಮ್ಮ ವೈಯಕ್ತಿಕ ಮಾಹಿತಿ. ಇದರಲ್ಲಿ ನಿಮ್ಮ, ಹೆಸರು, ವಿಳಾಸ, ಇಮೈಲ್, ಫೋನ್ ಸಂಖ್ಯೆ ಇವೆಲ್ಲ ಸಾಮಾನ್ಯ ಮಾಹಿತಿಗಳಾದವು. ಮುಂದುವರೆದು, ನಿಮ್ಮ ಸಂಬಳ, ನಿಮ್ಮಲ್ಲಿ ಎಷ್ಟು ಹಣವಿದೆ, ನೀವು ಏನನ್ನು ಇಷ್ಟ ಪಡುತ್ತೀರಿ, ನಿಮ್ಮ ವೈಯಕ್ತಿಕ ಇಷ್ಟಗಳೇನು, ಇತ್ಯಾದಿಗಳೆಲ್ಲ ಈಗಿನ ಕಾಲದಲ್ಲಿ ತುಂಬ ಬೆಲೆಬಾಳುವ ಮಾಹಿತಿಗಳು. ಇವುಗಳನ್ನು ತೆಗೆದುಕೊಂಡು ಅವರೇನು ಮಾಡುತ್ತಾರೆ? ನಿಮಗೆ ಯಾವುದು ಇಷ್ಟ ಎಂದು ತಿಳಿದು ಅದರ ಬಗ್ಗೆಯೇ ನಿಮಗೆ ಜಾಹೀರಾತು ಕಳುಹಿಸಿದರೆ ನೀವು ಅದನ್ನು ಕೊಳ್ಳುವ ಸಾಧ್ಯತೆ ಹೆಚ್ಚು. ನೀವು ಅದನ್ನು ಕೊಂಡುಕೊಂಡರೆ ಅವರಿಗೆ ವ್ಯಾಪಾರ ಆಗುತ್ತದೆ. ಅದಕ್ಕೇ ಅವರು ನಿಮ್ಮ ಮಾಹಿತಿಯನ್ನು ಕದಿಯುವುದು ಮಾತ್ರವಲ್ಲ, ಇತರೆ ಕಂಪೆನಿಗಳ ಜೊತೆ ಹಂಚಿಕೊಂಡಿರುತ್ತಾರೆ. ಇನ್ನೂ ನಿಖರವಾಗಿ ಹೇಳಬೇಕಾದರೆ ನಿಮ್ಮ ಮಾಹಿತಿಯನ್ನು ಕದ್ದು ಮಾರಾಟ ಮಾಡಿರುತ್ತಾರೆ.

ಈ ರೀತಿ ವೈಯಕ್ತಿಕ ಮಾಹಿತಿಯನ್ನು ದುರ್ಬಳಕೆ ಮಾಡುವವರಲ್ಲಿ ಸಾಮಾಜಿಕ ಮಾಧ್ಯಮಗಳು ಎತ್ತಿದ ಕೈ. ಅದರಲ್ಲೂ ಬಹುತೇಕ ಎಲ್ಲರೂ ಬಳಸುವ ಫೇಸ್‌ಬುಕ್ ಇದಕ್ಕೆ ಕುಪ್ರಸಿದ್ಧ. ಅವರನ್ನು ಹೀಗೇಕೆ ಮಾಡುತ್ತಿದ್ದೀರಾ ಎಂದು ಕೇಳಿದರೆ ನೀವೇ ಒಪ್ಪಿಗೆ ಕೊಟ್ಟಿದ್ದೀರಾ ನೋಡಿ ಎಂದು ಯಾವುದೋ ಪುಟವನ್ನು ತೋರಿಸುತ್ತಾರೆ. ನಿಜವಾಗಿ ನಡೆದಿರುವುದು ಏನೆಂದರೆ ನೀವು ಫೇಸ್‌ಬುಕ್ ಅಥವಾ ಯಾವುದೇ ಸಾಮಾಜಿಕ ಮಾಧ್ಯಮದ ಜಾಲತಾಣದಲ್ಲಿ ಅಥವಾ ಆಪ್‌ನಲ್ಲಿ ಖಾತೆ ತೆರೆಯುವಾಗ  ಹಲವು ಕಡೆ I agree ಎಂದು ಟಿಕ್ ಮಾಡಿರುತ್ತೀರಿ. ಬಹುತೇಕ ಮಂದಿ ಅಷ್ಟು ಉದ್ದದ ಒಪ್ಪಂದದ ಪುಟದಲ್ಲಿ ಏನಿದೆ ಎಂದು ಪೂರ್ತಿ ವಿವರವಾಗಿ ಓದಲು ಹೋಗಿರುವುದಿಲ್ಲ. ಅದರಲ್ಲಿ ನಿಮ್ಮ ವಿವರಗಳನ್ನು, ನಿಮ್ಮ ವಿಳಾಸ ಪುಸ್ತಕದಲ್ಲಿರುವ ನಿಮ್ಮ ಸ್ನೇಹಿತರ ಹೆಸರು ವಿಳಾಸಗಳನ್ನು ಇತರೆ ಮೂರನೆ ವ್ಯಕ್ತಿ ಅಥವಾ ಜಾಲತಾಣಗಳ ಜೊತೆ ಹಂಚಿಕೊಳ್ಳುತ್ತೇವೆ ಎಂದಿರುತ್ತದೆ. ಇದು ನಿಮ್ಮ ಅಪ್ಪಣೆ ಪಡೆದು ಮಾಡುವ ದುರ್ವ್ಯವಹಾರ. ಇನ್ನೂ ಕೆಲವು ನಿಮ್ಮ ನೇರ ಅಪ್ಪಣೆ ಇಲ್ಲದೆ ಮಾಡುವ ದುರ್ಬುದ್ಧಿಗಳಿವೆ.

ನಿಮ್ಮ ಮೊಬೈಲ್‌ನಲ್ಲಿ ನೀವು ಫೇಸ್‌ಬುಕ್ ಆಪ್ ಬಳಸಿ ನಂತರ ಅದರಿಂದ ಹೊರ ಬಂದು ಬೇರೆ ಏನೇನೋ ಮಾಡಿರುತ್ತೀರಿ. ಮನೆ ಹುಡುಕಾಟದ ಅಥವಾ ಬಸ್ ಟಿಕೆಟ್ ಬುಕಿಂಗ್‌ನ ಆಪ್ ಬಳಸಿದ್ದೀರಿ ಎಂದಿಟ್ಟುಕೊಳ್ಳಿ. ಮುಂದಿನ ಸಲ ಫೇಸ್‌ಬುಕ್ ತೆರೆದಾಗ ನಿಮಗೆ ಫೇಸ್‌ಬುಕ್ ತುಂಬೆಲ್ಲ ಮನೆಗಳ ಮತ್ತು ಬಸ್ ಬುಕಿಂಗ್‌ಗಳ ಜಾಹೀರಾತುಗಳೇ ಕಾಣಿಸುತ್ತವೆ. ಇಲ್ಲಿ ಏನಾಗಿದೆಯೆಂದರೆ ನೀವು ಫೇಸ್‌ಬುಕ್‌ನಿಂದ ಹೊರ ಬಂದರೂ ಫೇಸ್‌ಬುಕ್ ನೀವು ನಿಮ್ಮ ಮೊಬೈಲ್‌ನಲ್ಲಿ ಏನು ಮಾಡುತ್ತಿದ್ದೀರಿ ಎಂದು ಗಮನಿಸುತ್ತಿರುತ್ತದೆ. ಇದೂ ತಪ್ಪಲ್ಲವೇ ಎಂದು ನೀವು ಕೇಳಬಹುದು. ಹೌದು. ಇದು ಖಂಡಿತಾ ತಪ್ಪು. ಆದರೆ ಇದಕ್ಕೆ ನೀವೇ ಒಪ್ಪಿಗೆ ಕೊಟ್ಟಿರುತ್ತೀರಿ. ಫೇಸ್‌ಬುಕ್‌ನ ಗೌಪ್ಯ ಮತ್ತು ಸುರಕ್ಷತೆಯ ನೀತಿ ನಿಯಮಗಳು ಎಂಬ ಪುಟಕ್ಕೆ ಹೋಗಿ ಅಲ್ಲಿರುವ ಹಲವಾರು ಕೊಂಡಿಗಳಲ್ಲಿ ಎಲ್ಲೋ ಒಂದು ಕಡೆ ಫೇಸ್‌ಬುಕ್ ಮುಚ್ಚಿದ ನಂತರವೂ ನಿಮ್ಮ ಚಟುವಟಿಕೆಗಳನ್ನು ನಾವು ಗಮನಿಸುತ್ತಿರುತ್ತೇವೆ ಎಂಬುದಕ್ಕೆ ನೀವು ಒಪ್ಪಿಗೆ ಕೊಟ್ಟಿರುತ್ತೀರಿ. ನಾನು ಅಂತಹ ಯಾವುದೇ ಒಪ್ಪಂದಕ್ಕೆ ಒಪ್ಪಿಗೆ ಕೊಟ್ಟಿದ್ದು ನನಗೆ ನೆನಪಿಲ್ಲ ಎನ್ನುತ್ತೀರಾ? ಫೇಸ್‌ಬುಕ್‌ ಏನು ಮಾಡುತ್ತಿದೆಯೆಂದರೆ ಅದರಲ್ಲಿ ಹಲವಾರು ಆಯ್ಕೆಗಳು ನೀವು “ನಾನು ಒಪ್ಪುವುದಿಲ್ಲ” ಎಂದು ಹೇಳುವ ತನಕ ಅದುವೇ ಆಯ್ಕೆ ಆಗಿರುತ್ತದೆ. ಇದಕ್ಕೆ ಇಂಗ್ಲಿಷಿನಲ್ಲಿ default settings ಎನ್ನುತ್ತಾರೆ. ನೀವು ಪ್ರತಿ ಆಯ್ಕೆಯಲ್ಲೂ ಹುಡುಕಿ ಇವುಗಳನ್ನೆಲ್ಲ ಬದಲಿಸಬೇಕಾಗುತ್ತದೆ. ನಾನು ಇನ್ನೂ ಒಂದು ದುರ್ಬುದ್ಧಿಯನ್ನು ಗಮನಿಸಿದ್ದೇನೆ. ಅದೆಂದರೆ ಎಲ್ಲ ಕಡೆ ಹುಡುಕಿ ಈ ಆಯ್ಕೆಗಳನ್ನು ಬದಲಿಸಿಟ್ಟಿರುತ್ತೇನೆ. ಆಗಾಗ ಫೇಸ್‌ಬುಕ್ ಹೊಸ ಆವೃತ್ತಿ ಬಂದಿದೆ, ನವೀಕರಿಸಿಕೊಳ್ಳಿ ಎಂದು ಎಚ್ಚರಿಸುತ್ತಿರುತ್ತದೆ. ಹಾಗೆ ಎಚ್ಚರಿಸಿದಾಗ ನಾವು ಸಹಜವಾಗಿ ನಮ್ಮ ಆಪ್ ಅನ್ನು ಅಪ್‌ಡೇಟ್ ಮಾಡಿಕೊಳ್ಳುತ್ತೇವೆ. ತಕೊಳ್ಳಿ. ಇಲ್ಲೊಂದು ಪೀಕಲಾಟ ಆಗಿರುತ್ತದೆ. ಅದೆಂದರೆ ನಿಮ್ಮ ಆಪ್ ಅಪ್‌ಡೇಟ್ ಆದಾಗ ಮತ್ತೆ ಫೇಸ್‌ಬುಕ್ ತನ್ನ ಕಂಪೆನಿ ಸಿದ್ಧಪಡಿಸಿದ default settingsಗೆ ಬದಲಾಯಿಸಿರುತ್ತದೆ. ಮತ್ತೊಮ್ಮೆ ಎಲ್ಲ ಆಯ್ಕೆಗಳನ್ನು ಹುಡುಕಿ ಬದಲಾಯಿಸಬೇಕು. ಕೆಲವೊಮ್ಮೆ ಇದು ನಿಜಕ್ಕೂ ಸಿಕ್ಕಾಪಟ್ಟೆ ಸಿಟ್ಟು ತರಿಸುತ್ತದೆ. 

ಈ ರೀತಿ ನಿಮ್ಮ ವೈಯಕ್ತಿಕ ವ್ಯವಹಾರಗಳಲ್ಲಿ ಮೂಗು ತೂರಿಸುವುದರಲ್ಲಿ ಗೂಗ್ಲ್ ಇನ್ನೂ ಹಲವು ಹೆಜ್ಜೆ ಮುಂದೆ ಇದೆ. ಅದು ನಿಮ್ಮ ಇಮೈಲ್, ಎಸ್‌ಎಂಎಸ್, ಎಲ್ಲ ಓದಿ ನಿಮಗೆ ನೀವು ಕೇಳದೆಯೇ ಸಲಹೆ ನೀಡಲು ಪ್ರಾರಂಭಿಸುತ್ತದೆ. ನೀವು ಬೈಕಿನಲ್ಲಿ ಹೋಗುವಾಗ ಯಾರದೋ ಫೋನ್ ಬಂತು ಎಂದು ರಸ್ತೆ ಬದಿ ಗಾಡಿ ನಿಲ್ಲಿಸಿ ಸುಮಾರು ಹೊತ್ತು ಮಾತನಾಡಿ ನಂತರ ಗಾಡಿ ಹೊರಡಿಸಿರುತ್ತೀರಿ. ನೀವು ಗಾಡಿ ನಿಲ್ಲಿಸಿದ್ದು ಯಾವುದೋ ಬಾರ್ ಆಂಡ್ ರೆಸ್ಟೋರೆಂಟ್ ಮುಂದೆ ಆಗಿರುತ್ತದೆ. ತಗೊಳ್ಳಿ. ಗೂಗ್ಲ್ ನಿಮಗೆ ಆ ಬಾರ್ ಆಂಡ್ ರೆಸ್ಟೋರೆಂಟ್ ಹೇಗಿತ್ತು? ಅಲ್ಲಿ ಗಾಲಿ ಕುರ್ಚಿಯಲ್ಲಿ ಹೋಗಬಹುದೇ, ಅಲ್ಲಿಯ ಆಹಾರ ಚೆನ್ನಾಗಿತ್ತೇ, ಇತ್ಯಾದಿ ಪ್ರಶ್ನೆ ಕೇಳುತ್ತದೆ.

ಈ ಎಲ್ಲ ಪೀಕಲಾಟಗಳಿಂದ ಮುಕ್ತಿ ಹೇಗೆ? ಪೂರ್ತಿಯಾಗಿ ಇಂತಹವುಗಳಿಂದ ತಪ್ಪಿಸಿಕೊಳ್ಳುವುದು ಅಸಾಧ್ಯ. ಆದರೂ ಕೆಲವು ಎಚ್ಚರಿಕೆಗಳನ್ನು ವಹಿಸಿಕೊಳ್ಳಬಹುದು.

–ಡಾ| ಯು.ಬಿ. ಪವನಜ

gadgetloka @ gmail . com

The post ಇದು ಮಾಹಿತಿ ಯುಗ first appeared on Vishva Kannada.

ಗುಪ್ತ ಸಂದೇಶಗಳನ್ನು ಒಬ್ಬರಿಂದೊಬ್ಬರಿಗೆ ಕಳುಹಿಸುವುದು ಬಹು ಪುರಾತನ ವಿದ್ಯೆ. ಪುರಾಣಗಳಲ್ಲೇ ಇದರ ಉಲ್ಲೇಖಗಳಿವೆ. ಯುದ್ಧಕಾಲದಲ್ಲಿ ಸೈನಿಕರು ತಮ್ಮೊಳಗೆ, ಬೇಹುಗಾರಿಕೆ ಮಾಡುವವರು ತಮ್ಮೊಳಗೆ, ದೇಶದಿಂದ ದೇಶಕ್ಕೆ, ಹೀಗೆ ಹಲವು ರೀತಿಯಲ್ಲಿ ಗುಪ್ತ ಸಂದೇಶಗಳನ್ನು ಕಳುಹಿಸಲಾಗುತ್ತಿತ್ತು. ಈಗಲೂ ಕಳುಹಿಲಾಗುತ್ತಿದೆ. ಇಂತಹ ಗುಪ್ತ ಸಂದೇಶಗಳಲ್ಲಿ ಹಲವು ನಮೂನೆ. ಪದದಲ್ಲಿಯ ಅಕ್ಷರಗಳನ್ನು ಅದಲುಬದಲು ಮಾಡಿ ಮಾತನಾಡುವುದು ತುಂಬ ಸರಳವಾದ ಒಂದು ವಿಧಾನ. ಇದನ್ನು ಬಹುತೇಕ ಮಂದಿ ಚಿಕ್ಕವರಾಗಿದ್ದಾಗ ಮಾಡಿರುತ್ತೀರಿ. ಅಕ್ಷರಗಳ ಬದಲಿಗೆ ಅಂಕಿಗಳನ್ನು ಬಳಸುವುದು ಕೂಡ ಒಂದು ವಿಧಾನ.

ನಿಮಗೆಲ್ಲ ತಿಳಿದಿರಬಹುದು – ಮಾಹಿತಿ ತಂತ್ರಜ್ಞಾನದಲ್ಲಿ ಬಳಕೆಯಾಗುವುದು ಸೊನ್ನೆ ಮತ್ತು ಒಂದು ಎಂಬ ಎರಡೇ ಅಂಕಿಗಳು. ಎಲ್ಲ ಅಕ್ಷರಗಳೂ ಕೊನೆಗೆ ಸೊನ್ನೆ ಮತ್ತು ಒಂದರ ಸರಣಿಯಲ್ಲಿ ಪರಿವರ್ತನೆಯಾಗುತ್ತವೆ. ಈ ಸರಣಿಯು ಅಕ್ಷರ, ಅಂಕಿ, ಚಿಹ್ನೆಗಳನ್ನೆಲ್ಲ ಸೂಚಿಸುತ್ತದೆ. ಈ ಅಂಕಿಗಳನ್ನು ಬದಲಾಯಿಸಿ ಗುಪ್ತ ಸಂದೇಶ ಕಳುಹಿಸಬಹುದು. ಇದಕ್ಕೆ ಗೂಢಲಿಪೀಕರಣ ಎನ್ನುತ್ತಾರೆ. ಯಾವ ರೀತಿ ಬದಲಾಯಿಸಿದ್ದೇವೆ ಎಂದು ಸಂದೇಶ ಸ್ವೀಕರಿಸುವವನಿಗೆ ಇನ್ನೊಂದು ಸಂಕೇತ ಕಳುಹಿಸಿದರೆ ಆತ ಈ ಗೂಢಲಿಪೀಕೃತ ಸಂದೇಶವನ್ನು ಸರಿಯಾದ ಸಂದೇಶಕ್ಕೆ ಬದಲಾಯಿಸಿಕೊಳ್ಳಬಲ್ಲ. ಇವು ಕೂಡ ಬಹುತೇಕರಿಗೆ ತಿಳಿದಿರುವ ಅಥವಾ ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ದಿನನಿತ್ಯ ಬಳಕೆಯಾಗುತ್ತಿರುವ ಒಂದು ವಿಧಾನ. ಇಂತಹ ಸಂದೇಶಗಳಿಗೆ ಒಂದು ಉದಾಹರಣೆ ಎಂದರೆ ವಾಟ್ಸ್‌ಆಪ್ ಸಂದೇಶಗಳು.

ಇಂತಹ ಗೂಢಲಿಪೀಕೃತ ಸಂದೇಶಗಳನ್ನು ಕಳುಹಿಸುವುದರಲ್ಲಿ ಒಂದು ತೊಂದರೆಯಿದೆ. ಅದೇನೆಂದರೆ ಆ ಸಂದೇಶವನ್ನು ನೋಡಿದರೆ ಇದು ಗೂಢಲಿಪೀಕೃತ ಸಂದೇಶ ಎಂದು ಗೊತ್ತಾಗುತ್ತದೆ. ಅದನ್ನು ಓದಲು ಸಾಧ್ಯವಿಲ್ಲವಾದರೂ ಒಂದು ಗುಪ್ತ ಸಂದೇಶ ಹೋಗುತ್ತಿದೆ ಎಂದು ಗೊತ್ತಾಗುತ್ತದೆ. ಕೆಲವೊಮ್ಮೆ ಈ ಗೂಢಲಿಪೀಕರಣವನ್ನು ಭೇದಿಸಲೂ ಸಾಧ್ಯವಿದೆ. ಅದು ಅಷ್ಟು ಸುಲಭವಲ್ಲವಾದರೂ ಸಾಧ್ಯತೆಯನ್ನು ತಳ್ಳಿಹಾಕುವಂತಿಲ್ಲ.

ಒಂದು ಸಾಮಾನ್ಯ ನಿರಪಾಯಕಾರಿ ಚಿತ್ರ ಇದೆ ಎಂದಿಟ್ಟುಕೊಳ್ಳಿ. ಉದಾಹರಣೆಗೆ ಮೈಸೂರು ಅರಮನೆಯ ಫೋಟೋ. ಅದನ್ನು ಯಾರಿಗೋ ಕಳುಹಿಸುತ್ತೀರಿ. ಅದನ್ನು ನೋಡಿದವರಿಗೆ ಅದರಲ್ಲೇನೋ ವಿಶೇಷವಿದೆ ಎಂದು ಅನ್ನಿಸುವುದಿಲ್ಲ. ಆದರೆ ಅದರೊಳಗೆ ಇನ್ನೊಂದು ಚಿತ್ರ ಅಥವಾ ಸಂದೇಶ ಅಡಕವಾಗಿದ್ದಲ್ಲಿ? ಇದನ್ನೇ ಸ್ಟೆಗನೋಗ್ರಫಿ ಎನ್ನುತ್ತಾರೆ. ಸರಳವಾಗಿ ಹೇಳುವುದಾದರೆ ಒಂದು ಕಡತದ ಒಳಗೆ ಇನ್ನೊಂದು ಕಡತವನ್ನು ಗುಪ್ತವಾಗಿ ಅಡಕವಾಗಿಸಿ ಕಳುಹಿಸುವುದನ್ನು ಸ್ಟೆಗನೋಗ್ರಫಿ ಎನ್ನುತ್ತಾರೆ. ಇದು ತುಂಬ ಹಳೆಯ ವಿಧಾನವಾದರೂ ಈಗಿನ ಡಿಜಿಟಲ್ ಯುಗದಲ್ಲಿ ಇದರ ಹೊಸ ಅವತಾರಗಳು ಚಾಲ್ತಿಯಲ್ಲಿವೆ. ಅದರಲ್ಲಿ ಪ್ರಮುಖವಾದುದು ಚಿತ್ರಗಳಲ್ಲಿ ಇನ್ನೊಂದು ಚಿತ್ರ ಅಥವಾ ಪಠ್ಯ ಸಂದೇಶವನ್ನು ಅಡಗಿಸಿ ಕಳುಹಿಸುವುದು.

ಮಾಹಿತಿ ತಂತ್ರಜ್ಞಾನದಲ್ಲಿ ಕಡತಗಳು ಅಂದರೆ ಫೈಲ್‌ಗಳು ಡಿಜಿಟಲ್ ರೂಪದಲ್ಲಿರುತ್ತವೆ. ಈಗಾಗಲೇ ತಿಳಿಸಿರುವಂತೆ ಅಂತಿಮವಾಗಿ ಎಲ್ಲಾ ಮಾಹಿತಿಗಳು ಒಂದು ಮತ್ತು ಸೊನ್ನೆಗಳ ಸರಣಿ ಅಂದರೆ  ದ್ವಿಮಾನದಲ್ಲಿರುತ್ತವೆ. ಪ್ರತಿ ಅಕ್ಷರವನ್ನೂ ದ್ವಿಮಾನಕ್ಕೆ ಪರಿವರ್ತಿಸುವುದು ಮಾತ್ರವಲ್ಲ, ಅದರ ಕೊನೆಗೆ, ಪ್ರಾರಂಭದಲ್ಲಿ, ಕೆಲವು ಹೆಚ್ಚಿಗೆ ಅಂಕಿಗಳನ್ನೂ ಸೇರಿಸಲಾಗುತ್ತದೆ. ಸುಗಮವಾದ ಮಾಹಿತಿ ವಿನಿಮಯಕ್ಕೆ ಇವುಗಳು ಅವಶ್ಯ. ಈ ರೀತಿ ಸೇರಿಸಿದ ಅಂಕಿಗಳನ್ನೇ ಮಾರ್ಪಾಟು ಮಾಡಿ ಅವುಗಳಲ್ಲಿ ಗುಪ್ತ ಸಂದೇಶವನ್ನು ಅಡಗಿಸಿಡುವುದು ಸ್ಟೆಗನೋಗ್ರಫಿಯ ಒಂದು ಪ್ರಮುಖ ವಿಧಾನ. ಒಂದು ಸಾಮಾನ್ಯ ಫೋಟೋವನ್ನು ಈ ರೀತಿ ಮಾರ್ಪಡಿಸಿ ಕಳುಹಿಸಿದರೆ ಅದನ್ನು ನೋಡಿದವರಿಗೆ ಅದರಲ್ಲಿ ಗುಪ್ತ ಸಂದೇಶ ಅಡಗಿದೆ ಎಂದು ಗೊತ್ತಾಗುವುದಿಲ್ಲ. ಸೂಕ್ತ ತಂತ್ರಾಂಶ ಮತ್ತು ವಿಧಾನ ಬಳಸಿ ಆ ಸಂದೇಶವನ್ನು ಆ ಫೋಟೋದಿಂದ ತೆಗೆಯಬಹುದು. ಹಾಗೆ ಮಾಡಲು, ಸಂದೇಶ ಸ್ವೀಕರಿಸಿದವರಿಗೆ ಯಾವ ವಿಧಾನದಲ್ಲಿ ಫೋಟೋದ ಒಳಗೆ ಇನ್ನೊಂದು ಫೋಟೋ ಅಥವಾ ಸಂದೇಶವನ್ನು ಅಡಗಿಸಿದ್ದಾರೆ ಎಂದು ತಿಳಿದಿರಬೇಕು.

ಮೇಲೆ ತಿಳಿಸಿದ ಒಂದು ವಿಧಾನ ಮಾತ್ರವಲ್ಲ. ಸ್ಟೆಗನೋಗ್ರಫಿಯಲ್ಲಿ ಇನ್ನೂ ಹಲವಾರು ವಿಧಾನಗಳಿವೆ. ಚಿತ್ರದೊಳಗೆ ಚಿತ್ರ ಮಾತ್ರವಲ್ಲ, ಚಿತ್ರದೊಳಗೆ ಸಂದೇಶ ಮಾತ್ರವಲ್ಲ, ಚಿತ್ರದೊಳಗೆ ಇನ್ನೊಂದು ತಂತ್ರಾಂಶವೂ ಅಡಕವಾಗಿರಬಹುದು. ಹಾಗೆಯೇ ಗುಪ್ತ ಸಂದೇಶ ಅಥವಾ ಕಡತವನ್ನು ಹೊತ್ತು ತರುವ ಕಡತವು ಚಿತ್ರದ (ಫೋಟೋ, ಗ್ರಾಫಿಕ್ಸ್) ಕಡತವೇ ಆಗಿರಬೇಕಾಗಿಲ್ಲ; ಅದು ಧ್ವನಿ ಅಂದರೆ ಆಡಿಯೋ ಫೈಲ್ ಕೂಡ ಆಗಿರಬಹುದು.

ಎಲ್ಲ ತಂತ್ರಜ್ಞಾನಗಳನ್ನೂ, ಸೌಲಭ್ಯಗಳನ್ನೂ ದುರ್ಬಳಕೆ ಮಾಡಬಹುದು. ಸ್ಟೆಗನೋಗ್ರಫಿಯೂ ಇದಕ್ಕೆ ಹೊರತಾಗಿಲ್ಲ. ಒಂದು ಕಡತದ ಒಳಗೆ ಇನ್ನೊಂದು ಕಡತವನ್ನು ಅಡಕವಾಗಿಸಿ ಕಳುಹಿಸಬಹುದು ಎಂದೆನಲ್ಲ? ಆ ಇನ್ನೊಂದು ಕಡತ ನಿರಪಾಯಕಾರಿ ಫೋಟೋ ಅಥವಾ ಸಂದೇಶದ ಬದಲಿಗೆ ಯಾವುದಾದರೂ ಪೋಕರಿ ತಂತ್ರಾಂಶವೂ ಆಗಿರಬಹುದು. ಇಂತಹವಕ್ಕೆ ಇಂಗ್ಲಿಷಿನಲ್ಲಿ malware ಎನ್ನುತ್ತಾರೆ. ಹೀಗೆ ಬಂದ ಕುತಂತ್ರಾಂಶವು ನಿಮ್ಮ ಸಾಧನವನ್ನು (ಗಣಕ, ಲ್ಯಾಪ್‌ಟಾಪ್, ಸ್ಮಾರ್ಟ್‌ಫೋನ್, ಟ್ಯಾಬ್ಲೆಟ್, ಇತ್ಯಾದಿ) ಹಾಳುಗೆಡಹಬಹುದು. ಇನ್ನೂ ಅಪಾಯಕಾರಿ ಎಂದರೆ ಅದು ನೀವು ನಿಮ್ಮ ಸಾಧನದಲ್ಲಿ ಮಾಡುವ ಬ್ಯಾಂಕ್ ಅಥವಾ ಇನ್ಯಾವುದಾದರೂ ಹಣಕಾಸು ವ್ಯವಹಾರದಲ್ಲಿ ಬಳಸುವ ಪಾಸ್‌ವರ್ಡ್‌ಗಳನ್ನು ಕದಿಯುವುದು. ಹೀಗೆ ಕದ್ದು ಆ ಕುತಂತ್ರಾಂಶವನ್ನು ತಯಾರಿಸಿದವನಿಗೆ ಅದನ್ನು ರವಾನಿಸಿ ಆತ ಅದರ ಮೂಲಕ ನಿಮ್ಮ ಬ್ಯಾಂಕ್ ಖಾತೆಗೆ ಕನ್ನ ಹಾಕುವ ಸಾಧ್ಯತೆಯನ್ನು ಅಲ್ಲಗಳೆಯುವಂತಿಲ್ಲ. ಹಾಗಿದ್ದರೆ ಇಂತಹ ಧಾಳಿಯಿಂದ ರಕ್ಷಿಸಿಕೊಳ್ಳುವುದು ಹೇಗೆ? ನಿಮ್ಮ ಸಾಧನದಲ್ಲಿ ಸೂಕ್ತ ರಕ್ಷಣಾ ತಂತ್ರಾಂಶವನ್ನು ಬಳಸುವುದು ಮೊದಲನೆಯ ಉಪಾಯ. ಇನ್ನು ಮುಖ್ಯವಾಗಿ ಮಾಡಬೇಕಾಗಿರುವುದೆಂದರೆ ಪರಿಚಯವಿಲ್ಲದವರಿಂದ ಬಂದ ಕಡತಗಳನ್ನು ತೆರೆಯದಿರುವುದು. ಸಾಮಾನ್ಯವಾಗಿ ಇಂತಹವು ನಿಮಗೆ ಇಮೈಲ್ ಅಥವಾ ವಾಟ್ಸ್‌ಆಪ್‌ನಂತಹ ಸಂದೇಶಗಳ ಮೂಲಕ ಬರುತ್ತವೆ. ಸಂದೇಶಕ್ಕೆ ಲಗತ್ತಿಸಿದ ಕಡತವನ್ನು ಇಂಗ್ಲಿಷಿನಲ್ಲಿ attachment ಎನ್ನುತ್ತಾರೆ. ಬುದ್ಧ ಹೇಳಿದಂತೆ attachment is the root cause of all miseries. ಕಂಡಿತ ನಿರಪಾಯಕಾರಿ ಆಕರದಿಂದ ನಿಮಗೆ ಬಂದಿದೆ ಎಂದು ಖಾತ್ರಿಯಾಗದೆ ಯಾವ ಲಗತ್ತನ್ನೂ ತೆರೆಯದಿರುವುದೇ ಉತ್ತಮ.

–ಡಾ| ಯು.ಬಿ. ಪವನಜ

gadgetloka @ gmail . com

The post ಸ್ಟೆಗನೋಗ್ರಫಿ first appeared on Vishva Kannada.

ಚತುರ ಮನೆ ಅಂದರೆ ಮೊಬೈಲ್ ಫೋನ್ ಅಥವಾ ಅಂತಹುದೇ ಅಂತರಜಾಲ ಸಂಪರ್ಕದಲ್ಲಿರುವ ಸಾಧನಗಳನ್ನು ಬಳಸಿ ಅಂತರಜಾಲದ ಮೂಲಕ ಎಲ್ಲಿಂದ ಬೇಕಾದರೂ ನಿಯಂತ್ರಿಸಬಹುದಾದ ಸಾಧನಗಳನ್ನು ಒಳಗೊಂಡ ಮನೆ. ಈ ರೀತಿ ನಿಯಂತ್ರಿಸಬಹುದಾದ ವಸ್ತುಗಳನ್ನೊಳಗೊಂಡ ಜಾಲಕ್ಕೆ ವಸ್ತುಗಳ ಅಂತರಜಾಲ (Internet of Things, IoT) ಎಂಬ ಹೆಸರೂ ಇದೆ. ಮನೆಯಲ್ಲಿ ಬಳಕೆಯಾಗುವ ವಸ್ತುಗಳ ಅಂತರಜಾಲದಲ್ಲಿ ಮನೆಯಲ್ಲಿ ಬಳಸುವ ಸುರಕ್ಷಾ ಸಾಧನಗಳು, ದಿನ ನಿತ್ಯ ಬಳಕೆಯ ಗೃಹೋಪಕರಣಗಳು, ಕ್ಯಾಮೆರಾ ಇತ್ಯಾದಿಗಳೆಲ್ಲ ಸೇರಿವೆ.

ಚತುರ ಮನೆಯಲ್ಲಿ ತಾಪಮಾನವನ್ನು ಮೊಬೈಲ್ ಸಾಧನದಿಂದ ಅಂತರಜಾಲದ ಮೂಲಕ ನಿಯಂತ್ರಿಸಬಹುದು. ಕಚೇರಿಯಲ್ಲಿರುವ ವ್ಯಕ್ತಿ ಅಲ್ಲಿಂದ ಹೊರಡುವ ಅರ್ಧ ಗಂಟೆ ಮೊದಲು ಮನೆಯ ಹವಾನಿಯಂತ್ರಕವನ್ನು ಆನ್ ಮಾಡಿ ಆತ ಮನೆಗೆ ತಲುಪುವ ಹೊತ್ತಿಗೆ ತನಗೆ ಬೇಕಾದ ತಾಪಮಾನದಲ್ಲಿರುವಂತೆ ಮಾಡಬಹುದು.  ಮನೆಯಲ್ಲಿರುವ ಕಸ ಗುಡಿಸುವ ಹಾಗೂ ನೆಲ ಒರಸುವ ಯಂತ್ರವನ್ನು ಕೂಡ ಇದೇ ರೀತಿ ಅಂತರಜಾಲದ ಮೂಲಕ ನಿಯಂತ್ರಿಸಬಹುದು. ಅದನ್ನು ಪ್ರಾರಂಭಿಸುವುದು, ನಿಲ್ಲಿಸುವುದು ಇತ್ಯಾದಿಗಳನ್ನು ಮಾಡಬಹುದು. ಮನೆಯಲ್ಲಿರುವ ಶೈತ್ಯಕದಲ್ಲಿ ಹಾಲು ಮುಗಿದಿದೆ ಎಂದು ಕಚೇರಿಯಲ್ಲಿರುವ ಮನೆಯೊಡೆಯನಿಗೆ ಅದು ಸಂದೇಶ ಕಳುಹಿಸುವ ಸೌಲಭ್ಯ ಇಂತಹ ಚತುರ ಮನೆಯಲ್ಲಿ ಅಡಕವಾಗಿದೆ.

ಒಂದು ನಿಜವಾದ ಉದಾಹರಣೆ ನೋಡಿ. ಬೆಂಗಳೂರಿನಲ್ಲಿ ವೃದ್ಧ ಮಾತಾಪಿತರಿದ್ದಾರೆ. ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಕೆಲಸ ಮಾಡುವ ಮಗ ಅಮೇರಿಕದಲ್ಲಿದ್ದಾನೆ. ಮನೆಯಲ್ಲಿ ಬೇರೆ ಯಾರೂ ಇಲ್ಲ. ಆತ ಮನೆಯೊಳಗೆ ಕ್ಯಾಮೆರ ಅಳವಡಿಸಿದ್ದಾನೆ. ಈ ಕ್ಯಾಮೆರಗಳು ಅಂತರಜಾಲಕ್ಕೆ ಸಂಪರ್ಕ ಹೊಂದಿವೆ. ಮಗ ಅಮೆರಿಕದಲ್ಲಿ ಕುಳಿತೇ ತಂದೆ ತಾಯಿ ಏನು ಮಾಡುತ್ತಿದ್ದಾರೆ ಎಂದು ವೀಕ್ಷಿಸುತ್ತಿರುತ್ತಾನೆ. ಒಂದು ದಿನ ಆತನ ತಂದೆ ತಲೆಸುತ್ತು ಬಂದು ಬಿದ್ದಿದ್ದಾರೆ. ಮಗ ಅಮೆರಿಕದಿಂದ ಅದನ್ನು ಕ್ಯಾಮೆರ ಮೂಲಕ ನೋಡಿದ್ದಾನೆ. ತಕ್ಷಣ ಪಕ್ಕದ ಮನೆಯವರಿಗೆ ಫೋನ್ ಮಾಡಿ ವಿಷಯ ತಿಳಿಸಿ ಅವರು ಆತನ ತಂದೆಯನ್ನು ಆಸ್ಪತ್ರೆಗೆ ಕರೆದುಕೊಂಡು ಹೋಗಿ ಅವರಿಗೆ ಸೂಕ್ತ ಚಿಕಿತ್ಸೆ ನೀಡಲಾಯಿತು. ಇದು ನಿಜವಾಗಿ ನಡೆದ ಕಥೆ.

ಅಂತರಜಾಲದ ಮೂಲಕ ಸಂಪರ್ಕಗೊಂಡ ಕ್ಯಾಮೆರದ ಉಪಯೋಗದ ಇನ್ನೊಂದು ಕಥೆ ಕೇಳಿ. ಇದೂ ಸ್ವಲ್ಪ ಮೇಲಿನ ಕಥೆಯ ನಮೂನೆಯೇ. ಆದರೆ ವ್ಯತ್ಯಾಸ ಎಂದರೆ ಮನೆಯಲ್ಲಿ ಯಾರೂ ಇಲ್ಲ. ಮನೆಯಲ್ಲಿ ಕ್ಯಾಮೆರ ಅಳವಡಿಸಿ ಆತ ಅಮೆರಿಕದಲ್ಲಿ ಇದ್ದಾನೆ. ಈ ಕ್ಯಾಮೆರ ಅಂತರಜಾಲಕ್ಕೆ ಸಂಪರ್ಕಗೊಂಡಿದೆ. ಅದು ಚಲನೆಯನ್ನು ಗುರುತಿಸಿ ಕಾರ್ಯಮುಖವಾಗಿ ಎಚ್ಚರಿಸುವ ಕ್ಯಾಮೆರ (motion sensitive camera). ಒಂದು ದಿನ ರಾತ್ರಿ ಮನೆಯೊಳಗೆ ಕಳ್ಳ ನುಸುಳಿದ್ದಾನೆ. ಕ್ಯಾಮೆರ ಅದನ್ನು ಪತ್ತೆ ಹಚ್ಚಿ ಅಮೆರಿಕದಲ್ಲಿರುವ ಮನೆಯೊಡೆಯನಿಗೆ ಎಚ್ಚರಿಸುತ್ತದೆ. ಆತ ಪಕ್ಕದ ಮನೆಯವರಿಗೂ ಆತನ ಮನೆಯ ವ್ಯಾಪ್ತಿಯ ಪೋಲೀಸ್ ಠಾಣೆಗೂ ತಿಳಿಸುತ್ತಾನೆ. ಪೋಲಿಸರು ಬಂದು ಕಳ್ಳನನ್ನು ಬಂಧಿಸುತ್ತಾರೆ. ಇದು ಕೂಡ ನಿಜ ಘಟನೆಯೇ.

ಚತುರಮನೆಯ ಕೇಂದ್ರ ಸ್ಥಾನದಲ್ಲಿ ಅಂತರಜಾಲಕ್ಕೆ ಸಂಪರ್ಕಗೊಂಡ ಒಂದು ಚತುರವಾಣಿ (smartphone) ಇರುತ್ತದೆ. ಟ್ಯಾಬ್ಲೆಟ್, ಲ್ಯಾಪ್‌ಟಾಪ್ ಅಥವಾ ಗಣಕವೂ ಆಗಬಹುದು. ಸ್ಮಾರ್ಟ್‌ಫೋನ್ ಆದರೆ ಕೈಯಲ್ಲೆ ಇರುತ್ತದೆ. ನೀವು ರಸ್ತೆಯಲ್ಲಿದ್ದರೂ ಬಳಸಬಹುದು. ಮನೆಯಲ್ಲಿರುವ ಎಲ್ಲ ವಸ್ತುಗಳು ಅದರ ನಿಯಂತ್ರಣದಲ್ಲಿರುತ್ತವೆ. ಗೂಗ್ಲ್ ಹೋಂ, ಅಮೆಝಾನ್ ಅಲೆಕ್ಸಾ ಮಾದರಿಯ ತಂತ್ರಾಂಶಗಳ ಬಳಕೆ ಮಾಡಲಾಗುತ್ತದೆ. ನೀವು ಒಂದು ಕೋಣೆಯೊಳಗೆ ಪ್ರವೇಶ ಮಾಡಿದಾಗ ಅಲ್ಲಿಯ ದೀಪ ಉರಿಯುವುದು, ಹೊರಗೆ ಬಂದಾಗ ಅದು ಆರಿ ಹೋಗುವುದು, ಮಾಳಿಗೆಗೆ ಹೋಗುವ ಮೆಟ್ಟಿಲುಗಳಿಗೂ ಹೀಗೆಯೇ, ದೀಪಗಳನ್ನು ಆರಿಸುವುದು, ಉರಿಸುವುದು, ಸಂಗೀತ ನುಡಿಸುವುದು, ಇತ್ಯಾದಿಗಳನ್ನೆಲ್ಲ ಧ್ವನಿಯಲ್ಲೇ ಅಪ್ಪಣೆ ನೀಡಿ ಮಾಡಿಸಿಕೊಳ್ಳಬಹುದು. ಉದಾಹರಣೆಗೆ “ಅಲೆಕ್ಸಾ, ಪ್ಲೇ ಧರಣಿ ಮಂಡಲ ಮಧ್ಯದೊಳಗೆ” ಎಂದು ಹೇಳಿದರೆ ತಬ್ಬಲಿಯು ನೀನಾದೆ ಮಗನೆ ಸಿನಿಮಾಕ್ಕಾಗಿ ಪಿ.ಬಿ. ಶ್ರೀನಿವಾಸ್, ಬಿ.ಕೆ. ಸುಮಿತ್ರ ಮತ್ತು ವಿದ್ಯಾರಾಣಿ ಹಾಡಿದ ಹಾಡನ್ನು ಅದು ಪ್ಲೇ ಮಾಡುತ್ತದೆ. ಪ್ರತಿ ದಿನ ಬೆಳಿಗ್ಗೆ 6 ಗಂಟೆಗೆ ಎಂ.ಎಸ್. ಸುಬ್ಬುಲಕ್ಷ್ಮಿ ಹಾಡಿದ ವೆಂಕಟೇಶ ಸುಪ್ರಭಾತ ಬೇಕಿದ್ದರೆ ಹಾಗೆಂದು ಆಯ್ಕೆ ಮಾಡಿಟ್ಟುಕೊಳ್ಳಬಹುದು. ಪ್ರತಿದಿನ ಸಾಯಂಕಾಲ 5:00 ಗಂಟೆಗೆ ದೀಪ ಹಚ್ಚಬೇಕು ಎಂದು ಆಯ್ಕೆ ಮಾಡಿಟ್ಟುಕೊಳ್ಳಬಹುದು.

ಈ ಎಲ್ಲ ಆಯ್ಕೆಗಳನ್ನು ಬಳಸಲು ನೀವು ಗೂಗ್ಲ್ ಹೋಂ ಅಥವಾ ಅಮೆಜಾನ್ ಅಲೆಕ್ಸ ಬಳಸಬೇಕು. ಸಂಗೀತಕ್ಕಾಗಿ ಸ್ಪಾಟಿಫೈಗೆ ಚಂದಾದಾರರಾದರೆ ಉತ್ತಮ. ಅಂತರಜಾಲದಲ್ಲಿ ಇರುವ ಹಲವಾರು ಸೇವೆ, ಸಂಗೀತ, ಪುಸ್ತಕ ಮಳಿಗೆಗಳಿಗೆ ಚಂದಾದಾರರಾದರೆ ಉತ್ತಮ. ಆಗ ಎಲ್ಲವನ್ನು ಧ್ವನಿಯ ಮೂಲಕವೇ ಪಡೆದುಕೊಳ್ಳಬಹುದು. ಅದಕ್ಕಾಗಿ ನಿಮ್ಮ ಮನೆಯ ಟಿವಿ ಕೂಡ ಸ್ಮಾರ್ಟ್‌ಟಿವಿ ಆಗಿರಬೇಕು. ಅದೂ ಅಂತರಜಾಲಕ್ಕೆ ಸಂಪರ್ಕ ಹೊಂದಿರಬೇಕು.

ಮನೆಯ ಕಿಟಿಕಿ, ಮುಖ್ಯ ಬಾಗಿಲು, ಕಾಂಪೌಂಡ್ ಗೇಟುಗಳನ್ನೂ ವಸ್ತುಗಳ ಅಂತರಜಾಲಕ್ಕೆ ಸೇರಿಸಬಹುದು. ಕಾರಿನಲ್ಲಿ ಮನೆಗೆ ಬರುವಾಗ, ಮನೆ ಹತ್ತಿರ ಬರುತ್ತಿದ್ದಂತೆ ಸ್ಮಾರ್ಟ್‌ಫೋನ್ ಮೂಲಕ ಕಾಂಪೌಂಡ್ ಗೇಟು ತೆರೆಯಬಹುದು. ಕಾರು ಒಳ ಹೋಗುತ್ತಿದ್ದಂತೆ ಅದನ್ನು ಮುಚ್ಚಬಹುದು. ನಾಯಿಯ ಗೂಡಿನ ಗೇಟನ್ನು ಬೇಕಿದ್ದರೆ ನಿಯಮಿತ ಸಮಯಕ್ಕೆ ತೆರೆಯುವುದು ಮಾಡಬಹುದು.   

ಒಟ್ಟಿನಲ್ಲಿ ಎಲ್ಲವೂ ಬುದ್ಧಿವಂತ ಸಾಧನಗಳಾದರೆ ಮನೆಯೇ ಬುದ್ಧಿವಂತ ಆಗುತ್ತದೆ!

–ಡಾ| ಯು.ಬಿ. ಪವನಜ

gadgetloka @ gmail . com

The post ಚತುರ ಮನೆ first appeared on Vishva Kannada.

ಕೋವಿಡ್-19 ನಿಂದಾಗಿ ಹಲವು ಮಂದಿ ಹಲವು ತಿಂಗಳುಗಳ ಕಾಲ ಸಂಪಾದನೆ ಇಲ್ಲದೆ ತೊಂದರೆಗೀಡಾದರು. ಇಂತಹವರು ಈ ರೀತಿಯ ಕಿರುತಂತ್ರಾಂಶಗಳಿಗೆ ಸುಲಭದಲ್ಲಿ ಬಲಿಯಾಗುವವರು. ಬಲಿಯಾಗುವವರು ಎಂಬ ಪದ ಯಾಕೆ ಬಳಸಿದೆ?

ಬಂಗಾರದ ಮನುಷ್ಯ ಸಿನಿಮಾದ “ಹನಿ ಹನಿಗೂಡಿದ್ರೆ ಹಳ್ಳ” ಎಂಬ ಹಾಡಿನಲ್ಲಿ “ಸಾಲ ಕೊಟ್ಟು ಶೂಲ ಹಾಕುತಾರೆ” ಎಂಬ ಸಾಲಿದೆ. ಹಿಂದಿನ ಕಾಲದಲ್ಲಿ ಹಳ್ಳಿ ಹಳ್ಳಿಗಳಲ್ಲಿ ಇಂತಹ ಸಾಹುಕಾರರು ಇರುತ್ತಿದ್ದರು. ಹಣದ ಅಗತ್ಯವಿರುವವರಿಗೆ ಅಧಿಕ ಬಡ್ಡಿಯಲ್ಲಿ ಸಾಲ ನೀಡಿ ನಂತರ ಅವರ ಆಸ್ತಿಯನ್ನೇ ಬರೆಸಿಕೊಳ್ಳುತ್ತಿದ್ದರು. ಈಗಿನ ಡಿಜಿಟಲ್ ಯುಗದಲ್ಲಿ ಈ ಸುಲಭದಲ್ಲಿ ಸಾಲ ನೀಡುವ ಕಿರುತಂತ್ರಾಂಶಗಳೂ ಸ್ವಲ್ಪ ಆ ರೀತಿಯವೇ. ಅವು ಎಲ್ಲಿಂದ ಬಂದವು ಮತ್ತು ಹೇಗೆ ಕೆಲಸ ಮಾಡುತ್ತವೆ ಎಂದು ನೋಡೋಣ.

ಎಲ್ಲ ಪೋಕರಿ ತಂತ್ರಜ್ಞಾನದಂತೆ ಇವು ಕೂಡ ಚೈನಾ ದೇಶದಿಂದ ಬಂದವು. ಈ ಸಾಲ ನೀಡುವ ಕಿರುತಂತ್ರಾಂಶಗಳು ನೂರಾರಿದ್ದರೂ ಬಹುತೇಕ ಎಲ್ಲ ಕಿರುತಂತ್ರಾಂಶಗಳ ಮೂಲ ವಿನ್ಯಾಸ ಮತ್ತು ಅವು ಕೆಲಸ ಮಾಡುವ ವಿಧಾನ ಒಂದೇ ಆಗಿವೆ. ಚೈನಾ ದೇಶದ ಯಾವುದೋ ಕಂಪೆನಿ ಭಾರತದಲ್ಲಿ ಯಾವುದೋ ಏಜೆನ್ಸಿ ಮೂಲಕ ತನ್ನ ಶಾಖೆ ತೆರೆಯುತ್ತದೆ. ಅದಕ್ಕಾಗಿ 2-3 ಮಂದಿಯನ್ನು ನೇಮಿಸಿಕೊಳ್ಳುತ್ತದೆ. ಅವರು ಒಂದು ಕಂಪೆನಿ ನೋಂದಾಯಿಸುತ್ತಾರೆ. ಚೈನಾದವರು ನೀಡಿದ ಕಿರುತಂತ್ರಾಂಶದ ಆಕರವನ್ನು ಬಳಸಿ ಸ್ವಲ್ಪ ಬದಲಾವಣೆ ಮಾಡಿ ತಮ್ಮದೇ ಕಿರುತಂತ್ರಾಂಶ ತಯಾರಿಸಿ ಗೂಗ್ಲ್ ಪ್ಲೇ ಸ್ಟೋರಿನಲ್ಲಿ ಸೇರಿಸುತ್ತಾರೆ. ನಂತರ ಹಲವು ಕಡೆ ಈ ಕಿರುತಂತ್ರಾಂಶದ ಜಾಹೀರಾತುಗಳನ್ನು ಹಾಕುತ್ತಾರೆ. ಅಲ್ಲಿಂದ ದಂಧೆ ಪ್ರಾರಂಭ.

ಈ ಕಿರುತಂತ್ರಾಂಶಗಳು ಇತರೆ ಬ್ಯಾಂಕುಗಳಂತೆ  ಹಲವು ದಾಖಲೆಗಳನ್ನು ಕೇಳುವುದಿಲ್ಲ. ನಿಮ್ಮ ಆಧಾರ ಕಾರ್ಡ್ ಮತ್ತು ಪ್ಯಾನ್ ಕಾರ್ಡ್ ಮಾತ್ರ. ಇವು ನೀಡುವ ಸಾಲದ ಮೊತ್ತವೂ ಕಡಿಮೆ. ಕೇವಲ ಸಾವಿರದಿಂದ ಹಿಡಿದು 20-30 ಸಾವಿರ,  ಕೆಲವು 5 ಲಕ್ಷದ ವರೆಗೂ ನೀಡುತ್ತವೆ. ಈ ಕಿರುತಂತ್ರಾಂಶಗಳನ್ನು ಇನ್‌ಸ್ಟಾಲ್ ಮಾಡುವಾಗ ಅವು ನಿಮ್ಮ ಫೋನ್‌ಬುಕ್‌, ಫೋಟೋ, ಎಸ್‌ಎಂಎಸ್, ಇತ್ಯಾದಿಗಳನ್ನು ಬಳಸಲು ಅನುಮತಿ ಕೇಳುತ್ತವೆ. ಅನುಮತಿ ನೀಡದಿದ್ದಲ್ಲಿ ಅವು ಮುಂದೆಯೇ ಹೋಗುವುದಿಲ್ಲ. ಇವು ನೀಡುವ ಸಾಲಕ್ಕೆ ಅತ್ಯಧಿಕ ಬಡ್ಡಿ ಇರುತ್ತದೆ. ಬಹುತೇಕ ಸಂದರ್ಭಗಳಲ್ಲಿ ಸಾಲದ ಮೊತ್ತ 3000 ಎಂದಿದ್ದರೂ ಆರಂಭದ ಫೀಸ್, ಅರ್ಜಿಯ ಪ್ರೋಸೆಸಿಂಗ್ ಫೀ ಎಂದೆಲ್ಲ ಹೇಳಿ ಸುಮಾರು 1000-1200 ರ ತನಕವೂ ಕಡಿತ ಮಾಡುತ್ತಾರೆ. ಅಂದರೆ ನಿಮಗೆ ಕೇವಲ 1800-2000 ನೀಡಿ 3000 ನೀಡಿದ್ದೇವೆ ಎಂದು ದಾಖಲಿಸುತ್ತಾರೆ. ಸಾಲದ ಅಸಲು ಮತ್ತು ಬಡ್ಡಿ ವಾಪಾಸು ಕೊಡುವ ಸಮಯ ಬಂದಾಗ ಅವರು ಹೇಳಿದಷ್ಟು ಹಣ ವಾಪಾಸು ನೀಡದಿದ್ದಲ್ಲಿ ಪೀಡಿಸಲು ಪ್ರಾರಂಭಿಸುತ್ತಾರೆ.

ಮೊದಲಿಗೆ ಫೋನ್ ಕರೆಗಳು ಬರುತ್ತವೆ. ಫೋನಿನಲ್ಲಿ ಕೆಟ್ಟ ಭಾಷೆಯಲ್ಲಿ ಬೈಯುತ್ತಾರೆ. ಬೆಂಗಳೂರಿನಲ್ಲಿ ಈ ರೀತಿ ಕೆಟ್ಟದಾಗಿ ಬೈಯಲೆಂದೇ ಕೆಲವು ಕಾಲ್‌ಸೆಂಟರುಗಳು ಹುಟ್ಟಿಕೊಂಡಿವೆ ಎಂದರೆ ನಂಬುತ್ತೀರಾ? ನಿಮ್ಮ ಫೋನಿನಲ್ಲಿರುವ ಸ್ನೇಹಿತರ ವಿಳಾಸವನ್ನು ಪಡೆದುಕೊಂಡಿರುತ್ತಾರೆ ತಾನೆ? ಅವರುಗಳಿಗೆಲ್ಲ ಎಸ್‌ಎಂಎಸ್ ಸಂದೇಶ ಹೋಗಲು ಪ್ರಾರಂಭವಾಗುತ್ತದೆ. ನಿಮ್ಮ ಸ್ನೇಹಿತ ಹಣ ತೆಗೆದುಕೊಂಡು ವಾಪಾಸು ನೀಡಿಲ್ಲ, ಅವನು ಕೆಟ್ಟವನು, ಅವನಿಂದ ದೂರವಿರಿ ಎಂಬೆಲ್ಲ ಸಂದೇಶಗಳು ಹೋಗುತ್ತವೆ. ಕೆಲವೊಮ್ಮೆ ನಿಮ್ಮ ಫೋಟೋವನ್ನು ಎಡಿಟ್ ಮಾಡಿ ನಿಮ್ಮ ಮುಖಕ್ಕೆ ಯಾವುದೋ ನಗ್ನ ದೇಹ ಅಥವಾ ಲೈಂಗಿಕ ಕ್ರಿಯೆಯ ಫೋಟೋ ಸೇರಿಸಿ ನಿಮ್ಮ ಸ್ನೇಹಿತರುಗಳಿಗೆ ಕಳುಹಿಸುತ್ತಾರೆ. ಮಾನಕ್ಕೆ ಅಂಜಿ ನೀವು ಅವರು ಹೇಳಿದಷ್ಟು ಹಣ ನೀಡಿ ಹೊರಬರುತ್ತೀರಿ. ಹೀಗೆ ಹಲವರಿಂದ ಹಣ ಸಂಪಾದಿಸಿದರೆ ಒಟ್ಟು ಮೊತ್ತ ತುಂಬ ದೊಡ್ಡದಾಗಿರುತ್ತೆ ತಾನೆ? ಈ ಹಣ ಎಲ್ಲ ಇಂಡೋನೀಶಿಯಾ ಮೂಲಕ ಚೈನಾ ದೇಶಕ್ಕೆ ಹೋಗುತ್ತದೆ.

ಈ ಕಂಪೆನಿಗಳು ಕಾನೂನು ಪ್ರಕಾರ ಕೆಲಸ ಮಾಡುತ್ತಿವೆಯೇ? ಇಲ್ಲ. ಹಾಗಿದ್ದರೆ ರಿಸರ್ವ್ ಬ್ಯಾಂಕ್ ಏನು ಮಾಡುತ್ತಿದೆ? ಮೊದಲಿಗೆ ಎಂದಿನಂತೆ ನಿದ್ರೆ ಮಾಡುತ್ತಿತ್ತು. ಕೊನೆಗೂ ಎಚ್ಚೆತ್ತುಕೊಂಡು ಇವುಗಳ ಮೇಲೆ ಕ್ರಮ ಕೈಗೊಳ್ಳಲು ಪ್ರಾರಂಭಿಸಿತು. ಪೋಲೀಸರ ಕೇಂದ್ರ ಅಪರಾಧ ವಿಭಾಗದವರು ಇಂತಹ ಕಂಪೆನಿಗಳ ಹಿಂದೆ ಬಿದ್ದು ಹಲವರನ್ನು ಬಂಧಿಸಿದ್ದಾರೆ. ಜಾರಿ ನಿರ್ದೇಶನಾಲಯವೂ ಇವುಗಳ ಜನ್ಮ ಜಾಲಾಡತೊಡಗಿದವು. ಕಳೆದ ವರ್ಷದ ಮೇ ತಿಂಗಳಿನಲ್ಲಿ ಬೇರೆ ಬೇರೆ ಬ್ಯಾಂಕುಗಳಲ್ಲಿದ್ದ ಇಂತಹ ಕೆಲವು ಕಂಪೆನಿಗಳ ಒಟ್ಟು 76.67 ಕೋಟಿ ರೂ.ಗಳನ್ನು ಜಫ್ತಿ ಮಾಡಿತು. ಈ ಚೈನಾ ಮೂಲದ ಕಂಪೆನಿಗಳು ಭಾರತದಿಂದ ಒಟ್ಟು ಸುಮಾರು 21,000 ಕೋಟಿ ರೂ.ಗಳನ್ನು ನುಂಗಿಹಾಕಿವೆ ಎಂದು ಅಂದಾಜು ಮಾಡಲಾಗಿದೆ.

ಈ ರೀತಿಯ ದುರ್ವ್ಯವಹಾರ ಮಾತ್ರವಲ್ಲ. ಇತರೆ ಯಾವುದೇ ರೀತಿಯಲ್ಲಿ ಹಣಕಾಸಿನ ಮೋಸ, ವಂಚನೆಗಳು ನಿಮಗೆ ಕಂಡುಬಂದಲ್ಲಿ ಅಥವಾ ಇಲ್ಲಿ ಇಂತಹ ಏನೋ ಮೋಸ ನಡೆಯುತ್ತಿದೆ ಎಂಬ ಅನುಮಾನ ಬಂದಲ್ಲಿ ರಿಸರ್ವ್ ಬ್ಯಾಂಕಿನವರು ಇಂತಹವುಗಳನ್ನು ವರದಿ ಮಾಡಲೆಂದೇ ತಯಾರಿಸಿದ sachet.rbi.org.in ಜಾಲತಾಣದಲ್ಲಿ ನಿಮ್ಮ ದೂರನ್ನು ದಾಖಲಿಸಬಹುದು.

–ಡಾ| ಯು.ಬಿ. ಪವನಜ

gadgetloka @ gmail . com

The post ಸಾಲ ನೀಡುವ ಆಪ್‌ಗಳ ಜಾಲಕ್ಕೆ ಬೀಳದಿರಿ first appeared on Vishva Kannada.

ಬ್ಯಾಟರಿಗಳು ಎಲ್ಲ ವಿದ್ಯುತ್ ಚಾಲಿತ ಸಾಧನಗಳಿಗೂ ಬೇಕು. ಬ್ಯಾಟರಿಗಳಲ್ಲಿ ಹಲವಾರು ನಮೂನೆಗಳಿವೆ. ಬ್ಯಾಟರಿಯನ್ನು ಬ್ಯಾಟರಿ ಸೆಲ್ ಎನ್ನುವುದೇ ಸರಿಯಾದ ವೈಜ್ಞಾನಿಕ ವಿಧಾನ. ಬ್ಯಾಟರಿ ಸೆಲ್‌ಗಳ ಜೋಡಣೆಯೇ ಬ್ಯಾಟರಿ. ಆದರೆ ಬಳಕೆಯಲ್ಲಿ ಬ್ಯಾಟರಿ ಎಂದೇ ಬಂದುಬಿಟ್ಟಿದೆ. ಇರಲಿ. ಬ್ಯಾಟರಿಯ ಪ್ರಮುಖ ಅಂಗಗಳು ಮೂರು -ಋಣ ಮತ್ತು ಧನ ಇಲೆಕ್ಟ್ರೋಡ್‌ಗಳು ಮತ್ತು ಅವುಗಳ ಮಧ್ಯದಲ್ಲಿರುವ ದ್ರಾವಣ ಇಲೆಕ್ಟ್ರೋಲೈಟ್. ಲಿತಿಯಂ ಬ್ಯಾಟರಿಯಿರಲಿ, ಲೆಡ್ ಆಸಿಡ್ ಬ್ಯಾಟರಿಯಿರಲಿ, ಈ ಇಲೆಕ್ಟ್ರೋಲೈಟ್ ಸಾಮಾನ್ಯವಾಗಿ ದ್ರವವಾಗಿರುತ್ತದೆ. ನಿಮ್ಮ ಟಾರ್ಚ್‌ಗಳಲ್ಲಿ ಬಳಸುವ ಬ್ಯಾಟರಿ ಮಾತ್ರ ಡ್ರೈ ಸೆಲ್ ಆಗಿರುತ್ತದೆ. ಅಂದರೆ ಅದರ ಇಲೆಕ್ಟ್ರೋಲೈಟ್ ದ್ರವ ಅಲ್ಲ. ಬದಲಿಗೆ ಘನ ಆಗಿರುತ್ತದೆ.

ಸ್ಮಾರ್ಟ್‌ಫೋನ್‌ಗಳಲ್ಲಿ ಬಳಸುವ ಬ್ಯಾಟರಿ ಲಿತಿಯಂ ಬ್ಯಾಟರಿಯಾಗಿರುತ್ತದೆ. ಇದರ ಇಲೆಕ್ಟ್ರೋಲೈಟ್ ಕೂಡ ದ್ರವವೇ ಆಗಿದೆ. ಇತ್ತೀಚೆಗೆ ನೀವು ಗಮನಿಸಿರಬಹುದಾದ ಒಂದು ಅಂಶ ಎಂದರೆ ಅತಿ ವೇಗವಾಗಿ ಚಾರ್ಜ್ ಮಾಡುವ ಸೌಲಭ್ಯ. ಹಲವು ಫೋನ್‌ಗಳಲ್ಲಿ ಈ ಸೌಲಭ್ಯವಿದೆ. ಬ್ಯಾಟರಿಯನ್ನು ಸೊನ್ನೆಯಿಂದ ಸುಮಾರು 80% ತನಕ ಅತಿ ವೇಗವಾಗಿ ಅಂದರೆ 30 ರಿಂದ 45 ನಿಮಿಷಗಳ ಒಳಗೆ ಚಾರ್ಜ್ ಮಾಡಬಹುದಾಗಿದೆ. ಬೇರೆ ಬೇರೆ ಫೋನ್‌ಗಳಲ್ಲಿ ಈ ಸಮಯ ಸ್ವಲ್ಪ ಆಚೀಚೆ ಆಗಬಹುದು.  

ಪೆಟ್ರೋಲ್ ಅಥವಾ ಡೀಸಿಲ್ ಇಂಧನದಿಂದ  ಕೆಲಸ ಮಾಡುವ ವಾಹನಗಳು ನಿಮಗೆ ಗೊತ್ತು. ಈ ವಾಹನಗಳು ಪರಿಸರಕ್ಕೆ ಮಾರಕ. ಇದಕ್ಕೆ ಪರಿಹಾರವಾಗಿ ವಿದ್ಯುತ್ ಚಾಲಿತ ವಾಹನಗಳು ಮಾರುಕಟ್ಟೆಗೆ ಬರತೊಡಗಿವೆ. ಈ ವಾಹನಗಳಲ್ಲಿ ನೀವು ಈಗಾಗಲೇ ಊಹಿಸಿರುವಂತೆ ಬ್ಯಾಟರಿಗಳಿವೆ. ಇವು ಪರಿಸರಕ್ಕೆ ಮಾರಕವಲ್ಲ. ಯಾಕೆಂದರೆ ಅವು ಹೊಗೆ ಸೂಸುವುದಿಲ್ಲ. ಈ ಬ್ಯಾಟರಿ ಚಾಲಿತ ವಾಹನಗಳ ಬಹು ದೊಡ್ಡ ಸಮಸ್ಯೆ ಎಂದರೆ ಅವುಗಳ ಬ್ಯಾಟರಿಗಳು. ಅವುಗಳನ್ನು ಒಮ್ಮೆ ಪೂರ್ತಿ ಚಾರ್ಜ್ ಮಾಡಿದರೆ ಅವು ಚಲಿಸಬಲ್ಲ ದೂರದ ವ್ಯಾಪ್ತಿ ತುಂಬ ಇಲ್ಲ. ಸ್ಕೂಟರ್ ಆದರೆ ಸುಮಾರು 80 ರಿಂದ 100 ಕಿ.ಮೀ. ಕಾರು ಆದರೆ ಗರಿಷ್ಠ 300-550 ಕಿ.ಮೀ. ಸಾಗಬಹುದು. ನಂತರ ಬ್ಯಾಟರಿ ಚಾರ್ಜ್ ಮಾಡಬೇಕಾಗುತ್ತದೆ. ಬ್ಯಾಟರಿ ಪೂರ್ತಿ ಚಾರ್ಜ್ ಮಾಡಲು ಸುಮಾರು ಹತ್ತು ಗಂಟೆ ಹಿಡಿಯುತ್ತದೆ. ಫೋನ್‌ಗಳಲ್ಲಿ ಇರುವಂತೆ ಅತಿ ವೇಗವಾಗಿ ಅಂದರೆ ಸುಮಾರು 30-45 ನಿಮಿಷಗಳಲ್ಲಿ ಸುಮಾರು 80% ಚಾರ್ಜ್ ಮಾಡುವ ಸವಲತ್ತು ಈ ವಿದ್ಯುತ್ ಚಾಲಿತ ವಾಹನಗಳ ಬ್ಯಾಟರಿಗಳಲ್ಲಿ ಇಲ್ಲ. ಇನ್ನೊಮ್ಮೆ ಚಾರ್ಜ್ ಮಾಡದೆ ತುಂಬ ದೂರ ಸಾಗಬೇಕು ಎಂದಾದಲ್ಲಿ ಬ್ಯಾಟರಿಯ ಸಂಗ್ರಹ ಶಕ್ತಿ ಜಾಸ್ತಿ ಇರಬೇಕು. ಸಂಗ್ರಹ ಶಕ್ತಿ ಜಾಸ್ತಿ ಆದಂತೆ ಬ್ಯಾಟರಿಯ ಗಾತ್ರವೂ ಜಾಸ್ತಿಯಾಗುತ್ತದೆ. ಎಂಬಲ್ಲಿಗೆ ಎರಡು ಪ್ರಮುಖ ಸಮಸ್ಯೆಗಳು ಬ್ಯಾಟರಿ ಚಾಲಿತ ವಾಹನಗಳ ಬ್ಯಾಟರಿಗಳಿವೆ. ಈ ಸಮಸ್ಯೆಗಳಿಗೆ ಪರಿಹಾರವನ್ನು ಕಂಡುಹಿಡಿಯಲು ಜಗತ್ತಿನಾದ್ಯಂತ ವಾಹನ ಕಂಪೆನಿಗಳು, ವಿಜ್ಞಾನಿಗಳು ಹಗಲಿರುಳು ಪರಿಶ್ರಮ ಪಡುತ್ತಿದ್ದಾರೆ. ಅಂದರೆ ಕಡಿಮೆ ಗಾತ್ರದ ಬ್ಯಾಟರಿ ಆಗಿರಬೇಕು ಹಾಗೂ ಅತಿ ವೇಗವಾಗಿ ಚಾರ್ಜ್ ಆಗಬೇಕು. ಅದರ ಪರಿಣಾಮ ಘನಸ್ಥಿತಿಯ ಬ್ಯಾಟರಿಗಳ ಆವಿಷ್ಕಾರ. ಹಾಗೆಂದರೇನು ಎಂದು ಈಗ ತಿಳಿಯೋಣ.

ಮೊದಲನೆಯದಾಗಿ ರಿಚಾರ್ಜೇಬಲ್ ಬ್ಯಾಟರಿ ಬಗ್ಗೆ ತಿಳಿಯೋಣ. ಇವುಗಳನ್ನು ಲಿತಿಯಂ ಐಯಾನ್ ಬ್ಯಾಟರಿ ಎಂದೂ ಕರೆಯುತ್ತಾರೆ. ಇವುಗಳನ್ನು ಚಾರ್ಜ್ ಮಾಡಬಹುದು. ಅದರ ಚಾರ್ಜ್ ಮುಗಿದಾಗ ಮತ್ತೆ ಚಾರ್ಜ್ ಮಾಡಬಹುದು. ಎಲ್ಲ ಬ್ಯಾಟರಿಗಳಂತೆ ಇದರಲ್ಲೂ ಋಣ ಮತ್ತು ಧನ ಧ್ರುವಗಳಿವೆ. ಇವುಗಳಿಗೆ ಇಲೆಕ್ಟ್ರೋಡ್‌ಗಳು ಎನ್ನುತ್ತಾರೆ. ಇವು ಲೋಹಗಳಿಂದ ಮಾಡಲ್ಪಟ್ಟಿರುತ್ತವೆ. ಈ ಇಲೆಕ್ಟ್ರೋಡ್‌ಗಳ ಮಧ್ಯೆ ಇಲೆಕ್ಟ್ರೋಲೈಟ್ ದ್ರವ ಇರುತ್ತದೆ. ಲಿತಿಯಂ ಐಯಾನ್ ಬ್ಯಾಟರಿಯಲ್ಲಿರುವ ದ್ರವ ಇಲೆಕ್ಟ್ರೋಲೈಟ್ ಮತ್ತೆ ಮತ್ತೆ ಚಾರ್ಜ್, ಡಿಸ್ಚಾರ್ಜ್, ಆಗುವುದುರಿಂದ ಬಿಸಿಯಾಗುತ್ತದೆ. ತುಂಬ ಸಲ ಹಾಗೆ ಆದ ನಂತರ ಅದರ ಗಾತ್ರ ಹೆಚ್ಚಾಗುತ್ತದೆ. ಆಗ ಬ್ಯಾಟರಿ ಉಬ್ಬುತ್ತದೆ. ಇದನ್ನು ನೀವು ಹಲವು ಫೋನ್‌ಗಳಲ್ಲಿ ಗಮನಿಸಿರಬಹುದು. ಬ್ಯಾಟರಿ ಚಾರ್ಜ್ ಆಗುವಾಗ ಅದು ಬಿಸಿಯೂ ಆಗುತ್ತದೆ. ತುಂಬ ಬಿಸಿ ಆದರೆ ಕೆಲವೊಮ್ಮೆ ಸ್ಫೋಟ ಆದ ಉದಾಹರಣೆಗಳೂ ಇವೆ. ಲಿತಿಯಂ ಐಯಾನ್ ಬ್ಯಾಟರಿಗಳನ್ನು ಎಷ್ಟು ಸಲ ಚಾರ್ಜ್ ಮಾಡಬಹುದು ಎಂಬುದಕ್ಕೂ ಮಿತಿಯಿದೆ. ಲಿತಿಯಂ ಐಯಾನ್ ಬ್ಯಾಟರಿಯ ಸಂಗ್ರಹಶಕ್ತಿಯೂ ಕಡಿಮೆ. ಈ ಎಲ್ಲ ಸಮಸ್ಯೆಗಳಿಗೆ ಪರಿಹಾರವೇ ಘನಸ್ಥಿತಿಯ  ಇಲೆಕ್ಟ್ರೋಲೈಟ್ ಅನ್ನು ಬಳಸುವ ಬ್ಯಾಟರಿ. ಇಲೆಕ್ಟ್ರೋಲೈಟ್ ದ್ರವದ ಬದಲಿಗೆ ಘನ ವಸ್ತುವಾಗಿದ್ದಲ್ಲಿ ಅದನ್ನು ಘನಸ್ಥಿತಿಯ ಇಲೆಕ್ಟ್ರೋಲೈಟ್ (solid-state electrolyte) ಎನ್ನುತ್ತಾರೆ. ಇಂತಹ ಇಲೆಕ್ಟ್ರೋಲೈಟ್ ಅನ್ನು ಬಳಸುವ ಬ್ಯಾಟರಿಗಳಿಗೆ ಘನಸ್ಥಿತಿಯ ಬ್ಯಾಟರಿ (solid-state battery) ಎನ್ನುತ್ತಾರೆ.

ಈ ನಮೂನೆಯ ಬ್ಯಾಟರಿಯಲ್ಲಿ ಇಲೆಕ್ಟ್ರೋಡ್‌ಗಳು ತೆಳ್ಳನೆಯದಾಗಿರುತ್ತವೆ. ಅವುಗಳ ಮಧ್ಯೆ ತೆಳ್ಳನೆಯ ಪದರದ ರೂಪದಲ್ಲಿ ಘನಸ್ಥಿತಿಯ ಇಲೆಕ್ಟ್ರೋಲೈಟ್ ಇರುತ್ತದೆ. ಇಂತಹ ಬ್ಯಾಟರಿ ಸೆಲ್‌ಗಳನ್ನು ಅನುಕ್ರಮವಾಗಿ ಜೋಡಿಸಿದಾಗ ಅದು ಬ್ಯಾಟರಿ ಆಗುತ್ತದೆ. ಈ ನಮೂನೆಯ ಬ್ಯಾಟರಿಗಳ ಒಟ್ಟಾರೆ ಗಾತ್ರ ತುಂಬ ಕಡಿಮೆಯಾಗಿರುತ್ತದೆ, ಮಾತ್ರವಲ್ಲದೆ ಅವುಗಳ ಧಾರಣೆಯ ಶಕ್ತಿಯೂ ಹೆಚ್ಚಿರುತ್ತದೆ. ಘನಸ್ಥಿತಿಯ ಇಲೆಕ್ಟ್ರೋಲೈಟ್ ಅನ್ನು ಹಲವು ಬೇರೆ ಬೇರೆ ವಸ್ತುಗಳಿಂದ ವಿಜ್ಞಾನಿಗಳು ತಯಾರಿಸಿದ್ದಾರೆ ಮಾತ್ರವಲ್ಲ ಇನ್ನೂ ಹಲವು ನಮೂನೆಯ ವಸ್ತುಗಳನ್ನು ಬಳಸಿ ಪ್ರಯೋಗ ಮುಂದುವರೆದಿದೆ. ಘನಸ್ಥಿತಿಯ ಬ್ಯಾಟರಿಗಳ ಸಂಗ್ರಹ ಶಕ್ತಿ ಜಾಸ್ತಿ. ಅವುಗಳನ್ನು ಅತಿ ವೇಗವಾಗಿ ಚಾರ್ಜ್ ಮಾಡಬಹುದು. ಅವುಗಳನ್ನು ಲಿತಿಯಂ ಐಯಾನ್ ಬ್ಯಾಟರಿಗಳಿಗಿಂತ ಜಾಸ್ತಿ ಸಲ ಚಾರ್ಜ್ ಮಾಡಬಹುದು. ಈ ಎಲ್ಲ ಸಾಧಕಗಳನ್ನು ಗಮನಿಸಿದಾಗ ಈ ಘನಸ್ಥಿತಿಯ ಬ್ಯಾಟರಿಗಳನ್ನು ಭವಿಷ್ಯದ ಬ್ಯಾಟರಿ ಎನ್ನಬಹುದು.

–ಡಾ| ಯು.ಬಿ. ಪವನಜ

gadgetloka @ gmail . com

The post ಘನಸ್ಥಿತಿಯ ಬ್ಯಾಟರಿ first appeared on Vishva Kannada.

ಬಹುತೇಕ ಪ್ರಾಣಿಗಳು ಸತ್ತಾಗ ಕೈಕಾಲು ನೀಡಿ ಬಿದ್ದಿರುತ್ತವೆ. ದನ, ನಾಯಿ, ಬೆಕ್ಕು, ಇತ್ಯಾದಿ ಪ್ರಾಣಿಗಳಲ್ಲಿ ಇದನ್ನು ಗಮನಿಸಿರಬಹುದು. ಆದರೆ ಜೇಡ ಸತ್ತಾಗ ಅದರ ಕಾಲುಗಳು ಮುದುರುತ್ತವೆ. ಇದು ಯಾಕೆ ಹೀಗೆ ಎಂದು ವಿಜ್ಞಾನಿಗಳು ಪ್ರಶ್ನಿಸಿಕೊಂಡು ಸಂಶೋಧನೆ ಮಾಡಿದರು. ಆಗ ಅವರಿಗೆ ಕಂಡುಬಂದುದು ಜೇಡನ ಒಂದು ವಿಶಿಷ್ಟ ಗುಣವೈಶಿಷ್ಟ್ಯ. ಮನುಷ್ಯ, ನಾಯಿ, ಬೆಕ್ಕು, ಇತ್ಯಾದಿ ಪ್ರಾಣಿಗಳಲ್ಲಿ ಕೈ ಕಾಲು ಬಿಡಿಸಿ ಮಡಚಿ ಮಾಡಲು ಸ್ನಾಯುಗಳ ಬಳಕೆ ಆಗುತ್ತದೆ. ಅದು ಉಬ್ಬಿ, ಕುಬ್ಬಿ ಈ ಕೆಲಸ ಆಗುತ್ತದೆ. ಆದರೆ ಜೇಡನಲ್ಲಿ ಬೇರೆಯ ವಿಧಾನದಲ್ಲಿ ಕೈಕಾಲು ಮಡಚಿ ಬಿಡಿಸಿ ಆಗುತ್ತದೆ. ಜೇಡನ ಕೈಕಾಲುಗಳಲ್ಲಿ ಈ ಕೆಲಸ ಹೈಡ್ರಾಲಿಕ್ ವಿಧಾನದಲ್ಲಿ ಆಗುತ್ತದೆ. ಅದರ ಕೈಕಾಲುಗಳಲ್ಲಿ ಸ್ನಾಯುಗಳಂತೆ ಕೊಠಡಿಗಳಿವೆ. ಈ ಕೊಠಡಿಗಳ ಒಳಗೆ ಒಂದು ರೀತಿಯ ಗಾಳಿ + ದ್ರವ ಇದೆ. ಇದು ಒತ್ತಡ ಹಾಕಿ, ತೆಗೆದು ಕೈಕಾಲು ಮಡಚುವ ಬಿಡಿಸುವ ಕೆಲಸ ಆಗುತ್ತದೆ. ಜೇಡ ಸತ್ತಾಗ ಈ ಕೊಠಡಿಗಳು ಖಾಲಿ ಆಗುತ್ತವೆ. ಅದರಿಂಗಾಗಿ ಅದರ ಕೈಕಾಲುಗಳು ಮಡಚಿಕೊಳ್ಳುತ್ತವೆ.

ಜೇಡನ ಹೈಡ್ರಾಲಿಕ್ ವಿಧಾನದಲ್ಲಿ ಕೈಕಾಲು ಮಡಚುವ ಬಿಡಿಸುವ ಕೆಲಸವನ್ನು ನಾವು ಮಾಡಿದರೆ ಹೇಗೆ ಎಂದು ವಿಜ್ಞಾನಿಗಳು ಆಲೋಚಿಸಿದರು. ಅವರು ಸೂಕ್ತ ದ್ರವ + ಗಾಳಿಯನ್ನು ಸತ್ತ ಜೇಡನಿಗೆ ಅತಿ ಸೂಕ್ಷ್ಮ ಸಿರಿಂಜ್ ಮೂಲಕ ಚುಚ್ಚಿ ಕಳುಹಿಸಿದರು. ಜೇಡನ ತಲೆಯಲ್ಲಿ ಇದಕ್ಕೆಂದೇ ಒಂದು ಬೇರೆ ಬೇರೆ ಚಿಕ್ಕ ಚಿಕ್ಕ ವಿಭಾಗಗಳಿರುವ ಕೊಠಡಿ ಇದೆ. ಅಲ್ಲಿಂದ ಅದು ಬೇರೆ ಬೇರೆ ಕೈ ಕಾಲುಗಳಿಗೆ ಗಾಳಿ + ದ್ರವವನ್ನು ತಳ್ಳಿ ಆ ಕೈ ಅಥವಾ ಕಾಲು ಮಡಚುವಂತೆ ಅಥವಾ ಬಿಡಿಸಿಕೊಳ್ಳುವಂತೆ ಮಾಡುತ್ತದೆ. ವಿಜ್ಞಾನಿಗಳು ದ್ರವ + ಗಾಳಿಯನ್ನು ಈ ಪ್ರಧಾನ ಕೊಠಡಿಗೆ ಚುಚ್ಚಿದರು. ಅಲ್ಲಿಂದ ಅದು ಕೈಕಾಲುಗಳಿಗೆ ಪ್ರವಹಿಸಿತು. ಆಗ ಮಡಚಿಕೊಂಡಿದ್ದ ಸತ್ತ ಜೇಡನ ಕೈಕಾಲುಗಳು ಬಿಡಿಸಿಕೊಂಡವು. ಸಿರಿಂಜನ್ನು ಹಿಂದೆ ಮುಂದೆ ಮಾಡುವ ಮೂಲಕ ವಿಜ್ಞಾನಿಗಳು ಸತ್ತ ಜೇಡನ ಕೈಕಾಲುಗಳನ್ನು ಬಿಡಿಸಿ  ಮಡಚಿ ಮಾಡುವಲ್ಲಿ ಯಶಸ್ವಿಯಾದರು. ಇದೊಂದು ಅದ್ಭುತ ಆವಿಷ್ಕಾರ ಎನ್ನಬಹುದು.

ಗ್ರೀಕ್ ಭಾಷೆಯಲ್ಲಿ ನೆಕ್ರೊ ಎಂದರೆ ಸತ್ತ ಅಥವಾ ಶವ ಎಂದು ಅರ್ಥ. ರೋಬೋಟ್ ಎಂದರೆ ಯಂತ್ರಮಾನವ ಅಥವಾ ಕೈಕಾಲುಗಳನ್ನು ಬಳಸಿ ಬಹುತೇಕ ಮಾನವನಂತೆ ಕೆಲಸ ಮಾಡುವ ಯಂತ್ರ. ಈ ಎರಡು ಪದಗಳ ಜೋಡಣೆಯೇ ನೆಕ್ರೋಬೋಟ್. ಸತ್ತ ಜೇಡನಿಗೆ ಸಿರಿಂಜಿನಲ್ಲಿ ಚುಚ್ಚಿ ಕೈಕಾಲು ಬಿಡಿಸಿ ಮಡಚಿ ಬೇಕಾದ ರೀತಿಯಲ್ಲೆ ಕೆಲಸ ಮಾಡಿಸಿಕೊಳ್ಳುವುದಕ್ಕೆ ವಿಜ್ಞಾನಿಗಳು ನೆಕ್ರೋಬಾಟಿಕ್ಸ್ ಎಂದು ಕರೆದಿದ್ದಾರೆ.

ಈ ಪ್ರಯೋಗಗಳಿಗೆ ವಿಜ್ಞಾನಿಗಳು ಬಳಸಿಕೊಂಡದ್ದು ದೊಡ್ಡ ಗಾತ್ರದ ತೋಳ ಜೇಡ ಎಂಬ ಪ್ರಭೇದವನ್ನು. ಇವುಗಳ ಗಾತ್ರ ಸುಮಾರು 35 ಮಿ.ಮೀ. ತನಕವೂ ಇರಬಲ್ಲುದು. ಪ್ರಯೋಗದಲ್ಲಿ ಜೇಡನ ತೂಕಕ್ಕಿಂತ ಸುಮಾರು 1.2ರಷ್ಟು ಹೆಚ್ಚು ತೂಕವನ್ನು ವಿಜ್ಞಾನಿಗಳು ಇದರ ಮೂಲಕ ಎತ್ತಲು ಯಶಸ್ವಿಯಾಗಿದ್ದರು. ಚಿಕ್ಕ ಗಾತ್ರದ ಜೇಡಗಳಿಗೆ ತಮ್ಮ ದೇಹದ ತೂಕಕ್ಕಿಂತ ತುಂಬ ಜಾಸ್ತಿ ತೂಕವನ್ನು ಎತ್ತಲು ಸಾಧ್ಯವಾಗುತ್ತದೆ. ಆದುದರಿಂದ ಮುಂದಕ್ಕೆ ಈ ಪ್ರಯೋಗಗಳನ್ನು ಚಿಕ್ಕ ಗಾತ್ರದ ಜೇಡವನ್ನು ಬಳಸಿ ಮಾಡಲು ವಿಜ್ಞಾನಿಗಳು ಆಲೋಚನೆ ಮಾಡುತ್ತಿದ್ದಾರೆ.

ವಿಜ್ಞಾನಿಗಳು ಒಂದು ಸತ್ತ ಜೇಡದ ಮೂಲಕ ಪ್ರಯೋಗ ಮಾಡಿದ್ದಾರೆ. ಅದರ ಕೈಕಾಲುಗಳನ್ನು 1000 ಸಲ ಮಡಚಿ ಬಿಡಿಸಿ ಮಾಡಿದ್ದಾರೆ. ಚಿಕ್ಕ ಚಿಕ್ಕ ವಸ್ತುಗಳನ್ನು ಈ ಜೇಡನ ಕೈಕಾಲುಗಳ ಮೂಲಕ ಒಂಡು ಕಡೆಯಿಂದ ಎತ್ತಿ ಇನ್ನೊಂದು ಕಡೆ ಇಟ್ಟಿದ್ದಾರೆ.

ಈ ಸಂಶೋಧನೆಯ ಪ್ರಯೋಜನಗಳೇನು? ಬಹುತೇಕ ಸಂಶೋಧನೆಗಳ ಪ್ರಯೋಜನಗಳು ಮುಂದಕ್ಕೆ ನಿಧಾನವಾಗಿ ಆಗುತ್ತವೆ. ಇದೂ ಹಾಗೆಯೇ ಆಗಲಿದೆ. ಸದ್ಯಕ್ಕೆ ವಿಜ್ಞಾನಿಗಳು ಹೇಳುವಂತೆ ಚಿಕ್ಕ ಚಿಕ್ಕ ಇಲೆಕ್ಟ್ರಾನಿಕ್ ಬಿಡಿಭಾಗಗಳ ಜೋಡಣೆಯಲ್ಲಿ ಇದರ ಬಳಕೆ ಮಾಡಬಹುದು. ಮನುಷ್ಯರು ಕೈ ಹಾಕಲು ಅಸಾಧ್ಯವಾದ, ಕೈಹಾಕಬಾರದ ಸ್ಥಳಗಳಲ್ಲಿ ಈ ರೋಬೋಟ್ ಬಳಸಿ ಬಿಡಿಭಾಗಗಳ ಜೋಡಣೆ ಮಾಡಬಹುದು. ಉದಾಹರಣೆಗೆ ವಿಕಿರಣಗಳು ಇರುವ ಸ್ಥಳಗಳಲ್ಲಿ ಕೆಲಸ ಮಾಡುವುದು. ವಿಕಿರಣಶೀಲ ರಾಸಾಯನಿಕಗಳನ್ನು ಚಿಕ್ಕ ಚಿಕ್ಕ ಕ್ಯಾಪ್ಸೂಲು ಒಳಗೆ ತುಂಬಿಸುವುದು, ಇತ್ಯಾದಿ. ಚಿಕ್ಕ ಚಿಕ್ಕ ಕೀಟಗಳನ್ನು ಬಳಸಿ ಸಂಶೋಧನೆ ಮಾಡುವವರಿಗೆ ಈ ರೋಬೋಟ್ ಉಪಯುಕ್ತ. ಚಿಕ್ಕ ಕೀಟವೊಂದನ್ನು ಎತ್ತಿ ಇತರೆ ಕೀಟಗಳ ಮಧ್ಯೆ ಬಿಡಬೇಕು ಎಂದಿಟ್ಟುಕೊಳ್ಳಿ. ಯಾವುದೇ ಚಿಮಟ ಇತ್ಯಾದಿ ಉಪಕರಣದ ಮೂಲಕ ಈ ಕೆಲಸ ಮಾಡಿದರೆ ಇತರೆ ಕೀಟಗಳು ಯಾವುದೋ ವೈರಿ ಬಂದಿದೆ ಎಂದುಕೊಂಡು ಹೆದರಿ  ಓಡಿ ಹೋಗುತ್ತವೆ. ಆದರೆ ಈ ಶವರೋಬೋಟ್ ಮೂಲಕ ಕೀಟವನ್ನು ಇತರೆ ಕೀಟಗಳ ಮಧ್ಯೆ ಎತ್ತಿ ಇಟ್ಟರೆ ಇತರೆ ಕೀಟಗಳು ಭಯಪಡುವುದಿಲ್ಲ. ಯಾಕೆಂದರೆ ಮಧ್ಯೆ ಬಂದುದು ಜೇಡ ಎಂಬ ಇನ್ನೊಂದು ಕೀಟವೇ. ಇದು ಈ ಶವರೋಬೋಟ್‌ನ ಇನ್ನೊಂದು ಉಪಯೋಗ ಎನ್ನಬಹುದು.

–ಡಾ| ಯು.ಬಿ. ಪವನಜ

gadgetloka @ gmail . com

The post ಸತ್ತ ಜೇಡನಿಂದ ರೋಬೋಟ್ first appeared on Vishva Kannada.

ಮಾಹಿತಿಯು ಈಗ ಹೊಸ ಎಣ್ಣೆ ಎಂಬ ಮಾತಿದೆ. ಅಂದರೆ ಈ ಜಾಲಮಳಿಗೆಗಗಳು ತಮ್ಮ ಲಕ್ಷಾಂತರ ಗ್ರಾಹಕರ ಮಾಹಿತಿಗಳನ್ನು ಸಂಗ್ರಹಿಸಿಟ್ಟುಕೊಂಡಿವೆ. ಈ ಮಾಹಿತಿಯ ಬೆಲೆ ಬಹುಕೋಟಿಯಲ್ಲಿದೆ. ಈ ಜಾಲಮಳಿಗೆಗಗಳು ಕೃತಕಬುದ್ಧಿಮತ್ತೆಯನ್ನು ಬಳಸಿ ತನ್ನ ಗ್ರಾಹಕರು ವ್ಯಾಪಾರ ಮಾಡುವ ರೀತಿಯನ್ನು ವಿಶ್ಲೇಷಿಸಿಟ್ಟುಕೊಂಡಿವೆ. ಒಂದು ಉದಾಹರಣೆ ನೋಡೋಣ – ಪುಣೆ ನಗರದ ಜನರು ಶುಕ್ರವಾರ ಮಧ್ಯಾಹ್ನದ ನಂತರ ವ್ಯಾಪಾರ ಮಾಡುತ್ತಾರೆ. ಅವರಿಗೆ ಬಿಳಿ ಬಣ್ಣದ ಫ್ರಂಟ್ ಲೋಡಿಂಗ್ ವಾಶಿಂಗ್ ಮೆಶಿನ್ ಇಷ್ಟವಾಗುತ್ತದೆ. ಈ ಮಾಹಿತಿಯಿಂದೇನು ಲಾಭ ಎನ್ನುತ್ತೀರಾ? ಫ್ಲಿಪ್‌ಕಾರ್ಟ್ ವಾಶಿಂಗ್ ಮೆಶಿನ್ ತಯಾರಿಸುವ ಒಂದು ಚಿಕ್ಕ ಕಂಪೆನಿಯನ್ನು ಕೊಳ್ಳುತ್ತದೆ. ಇತರೆ ದೊಡ್ಡ ಹೆಸರಿನ ವಾಶಿಂಗ್ ಮೆಶಿನ್‌ಗಳಿಗಿಂತ ತನ್ನ ವಾಶಿಂಗ್ ಮೆಶಿನ್‌ನ ಬೆಲೆಯನ್ನು ಸ್ವಲ್ಪ ಕಡಿಮೆ ಇಡುತ್ತದೆ. ಫ್ಲಿಪ್‌ಕಾರ್ಟ್‌ನಲ್ಲಿ ವಾಶಿಂಗ್ ಮೆಶಿನ್ ಎಂದು ಹುಡುಕಿದರೆ ತನ್ನ ಕಂಪೆನಿಯ ಉತ್ಪನ್ನವೇ ಮೊದಲು ಬರುವಂತೆ ನೋಡಿಕೊಳ್ಳುತ್ತದೆ. ಜೊತೆಗೆ ಅದರ ಪಕ್ಕದಲ್ಲಿ ಫ್ಲಿಪ್‌ಕಾರ್ಟ್‌ಸಲಹೆ ಮಾಡಿದ ಉತ್ಪನ್ನ ಎಂಬ ಘೋಷಣೆಯೂ ಇರುತ್ತದೆ. ಈ ಮೂಲಕ ಅದು ತನ್ನ ಗಿರಾಕಿಗಳಿಗೆ ಇತರೆ ಕಂಪೆನಿಗಳ ಉತ್ಪನ್ನದ ಬದಲು ತನ್ನ ಉತ್ಪನ್ನವನ್ನೇ ಮಾರಾಟ ಮಾಡುತ್ತದೆ. ಇದು ಒಂದು ಉದಾಹರಣೆ ಮಾತ್ರ. ಇಂತಹ ಇನ್ನೂ ಹಲವಾರು ಉದಾಹರಣೆಗಳಿವೆ. ಇವೆಲ್ಲವೂ ಮಾರುಕಟ್ಟೆಯ ಮೇಲಿನ ಏಕಸ್ವಾಮ್ಯದಿಂದಾಗಿ ಬರುವಂತಹವು. ಈ ಏಕಸ್ವಾಮ್ಯವನ್ನು ಕತ್ತರಿಸಲು ಹೊಸ ಉಪಾಯವನ್ನು ಭಾರತ ಸರಕಾರ ಮಾಡಿದೆ.

ಭಾರತ ಸರಕಾರವು ಹೊಸದಾದ ಒಂದು ಡಿಜಿಟಲ್ ಮಾರುಕಟ್ಟೆಯ ವೇದಿಕೆಯನ್ನು ನಿರ್ಮಿಸಿದೆ. ಇದಕ್ಕೆ Open Network for Digital Commerce (ONDC) ಎಂದು ನಾಮಕರಣ ಮಾಡಿದೆ. ಇದನ್ನು ಕನ್ನಡದಲ್ಲಿ ಡಿಜಿಟಲ್ ವ್ಯಾಪಾರಕ್ಕಾಗಿ ಮುಕ್ತ ಜಾಲ ಎಂದು ಕರೆಯಬಹುದು. ಇದನ್ನು ಸ್ವಲ್ಪ ಮಟ್ಟಿಗೆ ಈಗ ಹಣಕಾಸು ವ್ಯವಹಾರಕ್ಕಾಗಿ ಬಳಕೆಯಲ್ಲಿರುವ ಯುಪಿಐಗೆ ಹೋಲಿಸಬಹುದು. ಯಾವ ಬ್ಯಾಂಕಿನಿಂದ ಯಾವ ವ್ಯಾಪಾರಿಗೂ ಈ ವ್ಯವಸ್ಥೆ ಮೂಲಕ ಹಣ ವರ್ಗಾಯಿಸಬಹುದು. ಡಿಜಿಟಲ್ ವ್ಯಾಪಾರಕ್ಕಾಗಿ ಮುಕ್ತ ಜಾಲವು ಅದರ ಹೆಸರೇ ಹೇಳುವಂತೆ ಅದೊಂದು ಮುಕ್ತ ಜಾಲ. ಅದಕ್ಕೆ ಹಲವು ವ್ಯಾಪಾರಿಗಳನ್ನು ಜೋಡಿಸಬಹುದು. ಅದೇ ರೀತಿ ಹಲವು ಕೋರಿಯರ್ ಕಂಪೆನಿಗಳನ್ನೂ ಜೋಡಿಸಬಹುದು. ಈ ಕಂಪೆನಿಗಳು ದೊಡ್ಡ ಕಂಪೆನಿಗಳಾಗಿಬೇಕಾಗಿಲ್ಲ. ಚಿಕ್ಕ ಚಿಕ್ಕ ಕಂಪೆನಿಗಳೂ ಈ ಸವಲತ್ತನ್ನು ಬಳಸಬಹುದು. ಕಂಪೆನಿಗಳು ಈ ಜಾಲದಲ್ಲಿ ನೋಂದಾಯಿಸಬಹುದು. ಅದೇ ರೀತಿ ಕೋರಿಯರ್ ಕಂಪೆನಿಗಳೂ ನೋಂದಾಯಿಸಿಕೊಳ್ಳಬಹುದು. ನೀವು ಹರ್ಷ ಎಂಬ ಕಂಪೆನಿಯಿಂದ ನೀರುಶುದ್ಧೀಕರಣ ಯಂತ್ರವನ್ನು ಕೊಂಡು ಅದನ್ನು ಪ್ರೊಫೆಶನಲ್ ಕೋರಿಯರ್ ಮೂಲಕ ತರಿಸಿಕೊಳ್ಳಬಹುದು. ನೀವು ಕೊಳ್ಳುವ ವಸ್ತು ಅತಿ ದೊಡ್ಡ ವಸ್ತುವಿನಿಂದ ಹಿಡಿದು ಅತಿ ಚಿಕ್ಕ ವಸ್ತುವಿನ ತನಕ ಯಾವುದೂ ಆಗಿರಬಹುದು. ಒಂದು ಕಂಪೆನಿ ಅಥವಾ ಅಂಗಡಿ ನಿಮಗೆ ಇಷ್ಟ. ಅದೇ ರೀತಿ ಕೋರಿಯರ್ ಕಂಪೆನಿ. ಒಂದು ಕೋರಿಯರ್ ಕಂಪೆನಿ ನೀವಿರುವ ಸ್ಥಳಕ್ಕೆ ಬರುವುದಿಲ್ಲ, ಇನ್ನೊಂದು ಬರುತ್ತದೆ. ಆದುದರಿಂದ ನಿಮಗೆ ಆ ಕಂಪೆನಿಯೇ ಆಗಬೇಕು. ಇತ್ಯಾದಿ ಬೇಕುಗಳನ್ನೆಲ್ಲ ಈ ವ್ಯವಸ್ಥೆ ಪೂರೈಸುತ್ತದೆ.

ಈಗಾಗಲೇ ತಿಳಿಸಿದಂತೆ ಇದೊಂದು ವೇದಿಕೆ. ಇದರಲ್ಲಿ ಯಾರು ಬೇಕಾದರೂ ತಮ್ಮ ಜಾಲಮಳಿಗೆಯನ್ನು ನೋಂದಾಯಿಸಿಕೊಳ್ಳಬಹುದು. ಇದರಿಂದ ಗ್ರಾಹಕರಿಗೆ ಲಾಭವಿದೆ. ಯಾವುದಾದರೊಂದು ಉತ್ಪನ್ನವನ್ನು ಕೊಳ್ಳಲು ಹೊರಟಾಗ ಆ ಉತ್ಪನ್ನವು ಬೇರೆ ಬೇರೆ ಮಳಿಗೆಗಗಳಲ್ಲಿ ಯಾವ ಯಾವ ಬೆಲೆಗೆ ಲಭ್ಯವಿದೆ ಎಂದು ಆತ ಹೋಲಿಕೆ ಮಾಡಿ ನೋಡಬಹುದು. ಈಗ ಹೋಟೆಲುಗಳ ಬೆಲೆಗಳ ಹೋಲಿಕೆಗೆ ಟ್ರಿಯಾಗೊ ಎಂಬ ಒಂದು ಜಾಲತಾಣ ಇದೇ ರೀತಿಯಲ್ಲಿ ಕೆಲಸ ಮಾಡುತ್ತಿದೆ. ಬರಿಯ ಬೆಲೆಗಳನ್ನು ಮಾತ್ರವಲ್ಲ, ಉತ್ಪನ್ನಗಳ ಗುಣವೈಶಿಷ್ಟ್ಯಗಳನ್ನೂ ಹೋಲಿಸಿ ನೋಡಬಹುದು.

ಓಎನ್‌ಡಿಸಿಯನ್ನು ಪ್ರಾಯೋಗಿಕವಾಗಿ ದೇಶದ 5 ನಗರಗಳಲ್ಲಿ ಚಾಲನೆಗೊಳಿಲಾಗಿದೆ. ಈ ಮೊದಲ ಹಂತದಲ್ಲಿ ದೆಹಲಿ, ಭೋಪಾಲ, ಬೆಂಗಳೂರು, ಶಿಲಾಂಗ್ ಮತ್ತು ಕೊಯಂಬತ್ತೂರುಗಳಲ್ಲಿ ಪ್ರಾಯೋಗಿಕವಾಗಿ ಪ್ರಾರಂಭಿಸಲಾಗಿದೆ. ಮುಂದಕ್ಕೆ ಇತರೆ ನಗರಗಳಿಗೆ ಹಂತ ಹಂತವಾಗಿ ವಿಸ್ತರಿಸಲಾಗುವುದು. ಅಂತಿಮವಾಗಿ ಇಡಿಯ ದೇಶಕ್ಕೇ ಇದನ್ನು ಹಬ್ಬಿಸಲಾಗುವುದು. ಈ ವ್ಯವಸ್ಥೆಯ ಉಸ್ತುವಾರಿಗೆ ಮಾಡಿರುವ ಸಲಹಾ ಮಂಡಳಿಯಲ್ಲಿ ನಂದನ್ ನೀಲೆಕಣಿಯವರೂ ಇದ್ದಾರೆ.

ಇದರ ಹೆಸರಿನಲ್ಲಿರುವ ಮುಕ್ತ (open) ಪದವನ್ನು ಗಮನಿಸಿ. ಇದು ಬಹುಮಟ್ಟಿಗೆ ಮುಕ್ತ ತಂತ್ರಾಂಶದ (opensource software) ಮಾದರಿಯಲ್ಲಿ ಕೆಲಸ ಮಾಡುತ್ತದೆ. ಇದು ಕೆಲಸ ಮಾಡಲು ಬೇಕಾದ ಮೂಲ ಘಟಕಗಳು ಮುಕ್ತವಾಗಿ ಲಭ್ಯವಿರುತ್ತವೆ. ಯಾವುದೇ ಕಂಪೆನಿ ಅದನ್ನು ತನ್ನ ಉತ್ಪನ್ನಗಳಿಗೆ ಬದಲಾಯಿಸಿ ಅಳವಡಿಸಿಕೊಳ್ಳಬಹುದು. ಉದಾಹರಣೆಗೆ ಶಿಯೋಮಿ, ನೋಕಿಯ, ಸ್ಯಾಮ್‌ಸಂಗ್ ಇತ್ಯಾದಿ ಫೋನ್ ಕಂಪೆನಿಗಳು ತಮ್ಮ ಫೋನ್‌ಗಳನ್ನು ಮಾರಲು ಬೇಕಾದ ರೀತಿಯಲ್ಲಿ ಅದನ್ನು ಬದಲಾಯಿಸಿ ಅಳವಡಿಸಿಕೊಳ್ಳಬಹುದು. ಎಂಟಿಆರ್, ಮಯ್ಯಾಸ್, ಹಳದಿರಾಂ, ಇತ್ಯಾದಿಯವರು ತಮ್ಮ ಆಹಾರ ಉತ್ಪನ್ನಗಳಿಗೆ ಬೇಕಾದ ರೀತಿಯಲ್ಲಿ ಬದಲಾಯಿಸಿ ಅಳವಡಿಸಿಕೊಳ್ಳಬಹುದು.

ಎಲ್ಲ ಜಾಲಮಳಿಗೆಗಳು ಈ ವ್ಯವಸ್ಥೆಗೆ ತಮ್ಮ ತಂತ್ರಾಂಶಗಳನ್ನು ಬದಲಾಯಿಸಿಕೊಳ್ಳಬೇಕಾಗಿದೆ. ಆಗ ಇದರ ಲಾಭ ಚಿಕ್ಕಪುಟ್ಟ ವ್ಯಾಪಾರಿಗಳಿಗೂ ದೊರೆಯುತ್ತದೆ. ದೊಡ್ಡ ದೊಡ್ಡ ಜಾಲಮಳಿಗೆಗಳ ಜೊತೆ ಅವೂ ಸ್ಪರ್ಧೆ ನೀಡಬಹುದು. ಕೊಳ್ಳುವವರಿಗೂ ಆಗ ಲಾಭವಿದೆ. ಕೇವಲ ಎರಡು ದೊಡ್ಡ ವ್ಯಾಪಾರಿಗಳಲ್ಲದೆ ಸಣ್ಣ ಸಣ್ಣ ವ್ಯಾಪಾರಿಗಳಿಂದಲೂ ಕೊಳ್ಳಬಹುದು. ಕೆಲವು ಉತ್ಪನ್ನಗಳನ್ನು ಕೆಲವೇ ಚಿಕ್ಕ ಪುಟ್ಟ ಕಂಪೆನಿಗಳು ತಯಾರಿಸುತ್ತವೆ. ಅವುಗಳಿಗೆ ದೊಡ್ಡ ಮಟ್ಟದ ಜಾಲತಾಣ ನಿರ್ಮಿಸಿ ಮಾರುವಷ್ಟು ತಾಕತ್ ಇರುವುದಿಲ್ಲ. ಅಂತಹವರು ಈ ವ್ಯವಸ್ಥೆಯನ್ನು ಬಳಸಿಕೊಳ್ಳಬಹುದು. ಆಗ ಕೊಳ್ಳುವವರಿಗೂ ಲಾಭವೇ.

–ಡಾ| ಯು.ಬಿ. ಪವನಜ

gadgetloka @ gmail . com

The post ಡಿಜಿಟಲ್ ಜಗತ್ತಿನ ಮುಕ್ತ ಮಾರುಕಟ್ಟೆ first appeared on Vishva Kannada.

ಅತಿ ಕಡಿಮೆ ಬೆಲೆಗೆ ಅತಿ ಹೆಚ್ಚು ಗುಣವೈಶಿಷ್ಟ್ಯಗಳನ್ನು ಒಳಗೊಂಡ ಒಂದು ಹೊಸ ಸಾಧನವನ್ನು ಅಥವಾ ಗ್ಯಾಜೆಟ್ ಅನ್ನು ಯಾವುದೋ ಒಂದು ಕಂಪೆನಿ ಘೋಷಿಸುತ್ತದೆ. ಎಲ್ಲರೂ ಅದಕ್ಕೆ ಕಾಯುತ್ತಿರುತ್ತಾರೆ. ಕೆಲವು ಸಂದರ್ಭಗಳಲ್ಲಿ ಮುಂಗಡ ಬುಕಿಂಗ್ ಕೂಡ ಆಗಿರುತ್ತದೆ. ಅಂತಿಮವಾಗಿ ಆ ಉತ್ಪನ್ನ ಮಾರುಕಟ್ಟೆಗೆ ಬರುವುದೇ ಇಲ್ಲ. ಇಂತಹ ಹಲವು ಘಟನೆಗಳನ್ನು ಕಂಡಿರಬಹುದು, ಕೇಳಿರಬಹುದು ಅಥವಾ ಸ್ವತಃ ಅನುಭವಿಸಿರಬಹುದು. ಮಾಹಿತಿ ತಂತ್ರಜ್ಞಾನ ಕೇತ್ರದಲ್ಲಿ ಇಂತಹವುಗಳಿಗೆ vapourware ಎಂಬ ಹೆಸರಿದೆ. vapour ಅಂದರೆ ಆವಿ. ನೀಡಲು ಅಸಾಧ್ಯವಾದುದುನ್ನು ನೀಡುತ್ತೇನೆಂದು ಅತಿಯಾಗಿ ಆಸೆ ಹುಟ್ಟಿಸಿ ಕೊನೆಗೆ ಅದು ನಿಜವಾಗದೆ ಆವಿಯಾಗಿ ಹೋಗುವುದನ್ನು ವಿವರಿಸಲು ಈ ಪದವನ್ನು ಹುಟ್ಟುಹಾಕಲಾಗಿದೆ. 

1982ರಲ್ಲಿ ಈ ಪದವನ್ನು ಮೊದಲ ಬಾರಿಗೆ ಬಳಸಲಾಯಿತು. ಮೈಕ್ರೋಸಾಫ್ಟ್ ಕಂಪೆನಿ ಕ್ಸೆನಿಕ್ಸ್ ಹೆಸರಿನ ಕಾರ್ಯಾಚರಣ ವ್ಯವಸ್ಥೆಯನ್ನು (operating system) ಮಾರುಕಟ್ಟೆಗೆ ಬಿಡುಗಡೆ ಮಾಡುವುದಾಗಿ ಘೋಷಿಸಿ ತಿಂಗಳು ವರ್ಷಗಳೇ ಕಳೆದರೂ ಅದು ಕಾಣಿಸದಿದ್ದಾಗ ಪತ್ರಕರ್ತರೊಬ್ಬರು ಈ ಪದವನ್ನು ಹುಟ್ಟುಹಾಕಿದ್ದರು. ಅನಂತರ ಮಾಹಿತಿ ತಂತ್ರಜ್ಞಾನದ ಬಗ್ಗೆ ಬರೆಯುವ ಹಲವು ಪತ್ರಿಕೆಗಳು ಈ ಪದವನ್ನು ಬಳಸತೊಡಗಿದವು. ವಯರ್‌ಡ್ ಹೆಸರಿನ ಜಾಲತಾಣವೊಂದು ಪ್ರತಿ ವರ್ಷ ವೇಪರ್‌ವೇರ್ ಅವಾರ್ಡ್ಸ್ ಹೆಸರಿನಲ್ಲಿ ಆಯಾ ವರ್ಷಗಳಲ್ಲಿ ತುಂಬ ಆಸೆ ಹುಟ್ಟಿಸಿ ಕೊನೆಗೆ ಮಾರುಕಟ್ಟೆಗೆ ಬಾರದ ತಂತ್ರಾಂಶ ಮತ್ತು ಯಂತ್ರಾಂಶಗಳ ಪಟ್ಟಿ ನೀಡುತ್ತ ಬಂದಿದೆ.

ಹೀಗೆ ಆಗುವುದು ಯಾಕೆ? ಅದಕ್ಕೆ ಹಲವು ಕಾರಣಗಳಿವೆ. ಮಾಹಿತಿ ತಂತ್ರಜ್ಞಾನದ ಒಂದು ಉತ್ಪನ್ನ, ಅದು ಯಂತ್ರಾಂಶ ಅಥವಾ ತಂತ್ರಾಂಶವಿರಬಹುದು, ಸಂಪೂರ್ಣವಾಗಿ ತಯಾರಾಗಿ, ಪರೀಕ್ಷೆಗಳನ್ನು ನಡೆಸಿ, ಅಂತಿಮವಾಗಿ ಮಾರುಕಟ್ಟೆಗೆ ಬಿಡುಗಡೆ ಮಾಡಲು ಇಂತಿಷ್ಟು ಸಮಯ ಬೇಕು ಎಂದು ಅಂದಾಜಿಸಿ ಅದರ ಘೋಷಣೆ ಮಾಡಲಾಗುತ್ತದೆ. ಈ ಲೆಕ್ಕಾಚಾರ ತಪ್ಪಾದಾಗ ಅದು ಮಾರುಕಟ್ಟೆಗೆ ಹೇಳಿದ ಸಮಯಕ್ಕೆ ತಲುಪುವುದಿಲ್ಲ, ಅಥವಾ ಮೊದಲು ಹೇಳಿದ ಗುಣವೈಶಿಷ್ಟ್ಯಗಳಿರುವುದಿಲ್ಲ, ಅಥವಾ ಮೊದಲು ಹೇಳಿದ ಬೆಲೆಗೆ ದೊರೆಯುವುದಿಲ್ಲ. ಇನ್ನೊಂದು ಕಾರಣವೆಂದರೆ ಮಾಹಿತಿ ತಂತ್ರಜ್ಞಾನದ ಕ್ಷೇತ್ರದಲ್ಲಿ ಸುಧಾರಣೆಗಳು ಅತಿ ವೇಗವಾಗಿ ಆಗುತ್ತಿರುತ್ತವೆ. ಒಂದು ಉತ್ಪನ್ನದ ವಿನ್ಯಾಸ ಮತ್ತು ತಯಾರಿ ಅತಿ ದೀರ್ಘವಾಗಿದ್ದರೆ ಅದು ತಯಾರಾಗಿ ಮಾರುಕಟ್ಟೆಗೆ ಬಿಡುಗಡೆಗೆ ತಯಾರಾದಾಗ ಅದು ಆವಾಗಲೇ ಅಪ್ರಸ್ತುತವಾಗಿರುತ್ತದೆ. ಉತ್ಪನ್ನದ ಯೋಜನೆ ಮಾಡುವಾಗ ಈ ಎಲ್ಲ ಅಂಶಗಳನ್ನು ಪರಿಗಣಿಸದಿದ್ದಲ್ಲಿ ಇಂತಹ ತಪ್ಪುಗಳು ಆಗುತ್ತವೆ. ಇನ್ನೂ ಒಂದು ಕಾರಣವಿದೆ. ಅದು ಪ್ರಮುಖವಾದುದು. ಅದೇನೆಂದರೆ ಎಷ್ಟು ಬೆಲೆಗೆ ನೀಡಲು ಸಾಧ್ಯವೋ ಅದಕ್ಕಿಂತ ಅತಿ ಕಡಿಮೆ ಬೆಲೆಗೆ ನೀಡುತ್ತೇನೆ ಎಂದು ವಾಗ್ದಾನ ಮಾಡುವುದು. ಬಹುತೇಕ ವೇಪರ್‌ವೇರ್‌ಗಳು ಈ ವಿಭಾಗದಲ್ಲಿ ಬರುತ್ತವೆ.

ಈ ಸಂದರ್ಭದಲ್ಲಿ ಎರಡು ಭಾರತೀಯ ಉತ್ಪನ್ನಗಳ ಬಗ್ಗೆ ಬರೆಯುವುದು ಉಚಿತ ಎಂದು ಅನ್ನಿಸುತ್ತಿದೆ. ಅವುಗಳೇ ಸಿಂಪ್ಯೂಟರ್ ಮತ್ತು ಆಕಾಶ್ ಟ್ಯಾಬ್ಲೆಟ್. ಯಾರಿಗಾದರೂ ಈ ಎರಡು ಹೆಸರುಗಳನ್ನು ಕೇಳಿದ ನೆನಪಿದೆಯಾ?

ಮೊದಲಿಗೆ ಸಿಂಪ್ಯೂಟರ್ ಬಗ್ಗೆ ನೋಡೋಣ. ಇದು ಬೆಂಗಳೂರಿನ ಭಾರತೀಯ ವಿಜ್ಞಾನ ಸಂಸ್ಥೆಯ ಕೆಲವು ವಿಜ್ಞಾನಿಗಳು ಸೇರಿಕೊಂಡು ತಯಾರಿಸಿದ ಕಡಿಮೆ ಬೆಲೆಯ ಕಂಪ್ಯೂಟರ್. ಇದು 2002ರಲ್ಲಿ ಮೊದಲ ಬಾರಿಗೆ ಮಾರುಕಟ್ಟೆಗೆ ಬಂತು. ಆ ಕಾಲದಲ್ಲೇ ಅದರಲ್ಲಿ ಸ್ಪರ್ಶಪರದೆ (touch screen), ಕೈಬರಹದಲ್ಲಿ ಬರೆದುದನ್ನು ಪಠ್ಯಕ್ಕೆ ಪರಿವರ್ತಿಸಿ ಅರ್ಥ ಮಾಡಿಕೊಳ್ಳುವ ಸಾಮರ್ಥ್ಯ, ಯುಎಸ್‌ಬಿ ಕಿಂಡಿ, ಅವಕೆಂಪು (infrared) ಸಂವೇದಕ ಎಲ್ಲ ಇದ್ದವು. ಅದರಲ್ಲಿ ಅಕ್ಸೆಲೆರೋಮೀಟರ್ ಕೂಡ ಇತ್ತು. ಹಾಗಂದರೆ ಏನು?  ಸಿಂಪ್ಯೂಟರನ್ನು ತಿರುಗಿಸಿದಾಗ ಭೂಮಿಯ ಗುರುತ್ವಾಕರ್ಷಣೆಯನ್ನು ಬಳಸಿಕೊಂಡು ಯಾವಾಗಲೂ ಅದರ ಪರದೆಯಲ್ಲಿಯ ಪಠ್ಯ, ಚಿತ್ರಗಳು ಮೇಲ್ಮುಖವಾಗಿರುವಂತೆ ಮಾಡುತ್ತಿತ್ತು. ಇದೇನು ವಿಶೇಷ, ನಮ್ಮ ಸ್ಮಾರ್ಟ್‌ಫೋನ್‌ಗಳಲ್ಲಿ ಇವೆಲ್ಲ ಇವೆ ಅನ್ನುತ್ತೀರಾ? ಈ ಸವಲತ್ತುಗಳನ್ನು ಸಿಂಪ್ಯೂಟರ್ ನೀಡಿದ್ದು 2002ನೆಯ ಇಸವಿಯಲ್ಲಿ. 6 ವರ್ಷಗಳ ನಂತರ ಐಫೋನ್ ಅಕ್ಸೆಲೆರೋಮೀಟರ್ ಅನ್ನು ಅಳವಡಿಸಿತ್ತು. ಸಿಂಪ್ಯೂಟರ್ ಭಾರತೀಯ ಪರಿಸ್ಥಿತಿಗೆ ಸರಿಹೊಂದುವಂತೆ ವಿನ್ಯಾಸ ಮಾಡಿದ್ದಾಗಿತ್ತು. ಹಳ್ಳಿಗಳಲ್ಲಿ ಕೈಯಲ್ಲಿ ಹಿಡಿದು ಮಾಹಿತಿ ಸಂಗ್ರಹಣೆ, ಹಣಕಾಸಿನ ವ್ಯವಹಾರ, ಇತ್ಯಾದಿಗಳನ್ನು ಸಿಂಪ್ಯೂಟರ್ ಬಳಸಿ ಮಾಡುವುದನ್ನು ಕಲ್ಪಿಸಲಾಗಿತ್ತು. ಈಗೆಲ್ಲ ಇವನ್ನು ಈಗಿನ ಕಾಲದ ಸ್ಮಾರ್ಟ್‌ಫೋನ್‌ಗಳನ್ನು ಬಳಸಿ ಮಾಡಬಹುದು.  ಆದರೆ 20 ವರ್ಷಗಳ ಹಿಂದೆ ಇವೆಲ್ಲ ಕ್ರಾಂತಿಕಾರಿ ಆವಿಷ್ಕಾರಗಳಾಗಿದ್ದವು. ಹಾಗಿದ್ದರೆ ಸಿಂಪ್ಯೂಟರ್ ಎಲ್ಲಿ ಹೋಯಿತು? ಅದು ಸರಿಯಾಗಿ ಜನರ ಕೈಗೆ ತಲುಪಲೇ ಇಲ್ಲ. ವಿಜ್ಞಾನಿಗಳು ಆವಿಷ್ಕಾರದಲ್ಲಿ ಪಳಗಿದಷ್ಟು ವ್ಯವಹಾರದಲ್ಲಿ ಪಳಗಿರಲಿಲ್ಲ. ಭಾರತೀಯ ಉದ್ಯೋಗಪತಿಗಳೂ ಇದಕ್ಕೆ ಹಣ ಹಾಕಲಿಲ್ಲ. ಅದು ಅಲ್ಲಿಗೇ ಸತ್ತು ಹೋಯಿತು.

ಈಗ ಆಕಾಶ್ ಟ್ಯಾಬ್ಲೆಟ್‌ನ ಕತೆ ನೋಡೋಣ. ಇದೊಂದು ಟ್ಯಾಬ್ಲೆಟ್ ಕಂಪ್ಯೂಟರ್. ಕಡಿಮೆ ಬೆಲೆಯಲ್ಲಿ ವಿದ್ಯಾರ್ಥಿಗಳ ಬಳಕೆಗೋಸ್ಕರ ದೊರೆಯಲಿದೆ ಎಂದು ಕೇಂದ್ರ ಸರಕಾರವು ಇದನ್ನು 2011 ರಲ್ಲಿ ಘೋಷಿಸಿದ್ದು.  ಆಗಿನ ಕೇಂದ್ರ ಸರಕಾರದ ಮಂತ್ರಿ ಕಪಿಲ್ ಸೈಬಲ್ ಇದನ್ನು ಮಾಧ್ಯಮದ ಮುಂದೆ ಪ್ರದರ್ಶಿಸಿದ್ದರು. ಇದನ್ನು 35$ ಕಂಪ್ಯೂಟರ್ ಎಂದು ಪ್ರಚಾರ ಮಾಡಲಾಗಿತ್ತು. ಮುಂಬಯಿ ಐಐಟಿಯಲ್ಲಿ ಇದನ್ನು ವಿನ್ಯಾಸ ಮಾಡಿ ಕೆನಡಾ ಮೂಲದ ಡಾಟಾವಿಂಡ್ ಎಂಬ ಕಂಪೆನಿಯ ಮೂಲಕ ಉತ್ಪಾದಿಸಿ ವಿದ್ಯಾರ್ಥಿಗಳಿಗೂ ಜನಸಾಮಾನ್ಯರಿಗೂ ನೀಡುವ ಯೋಜನೆ ಇದಾಗಿತ್ತು. ರೂ.500 ನೀಡಿ ಇದನ್ನು ಮುಂಗಡ ಬುಕಿಂಗ್ ಕೂಡ ಮಾಡಬಹುದಿತ್ತು. ಅಂತಿಮವಾಗಿ ಇದು ಸರಿಯಾಗಿ ಮಾರುಕಟ್ಟೆಗೆ ಬರಲೇ ಇಲ್ಲ. ಮುಂಗಡ ಹಣ ನೀಡಿದ ಬಹುಪಾಲು ಜನರಿಗೆ ಹಣ ವಾಪಾಸು ಮಾಡಲಾಯಿತು. ಕೆಲವೇ ಕೆಲವು ಟ್ಯಾಬ್ಲೆಟ್‌ಗಳು ಕೆಲವು ಕಾಲೇಜುಗಳಿಗೆ ತಲುಪಿದ್ದವು. ಅಂತಹ ಒಂದು ಟ್ಯಾಬ್ಲೆಟ್ ಅನ್ನು ನಾನು ಬಳಸಿ ನೋಡಿದ್ದೆ. ಅದು ತುಂಬ ನಿಧಾನವಾಗಿ ಕೆಲಸ ಮಾಡುತ್ತಿತ್ತು. ಪೂರ್ತಿಯಾಗಿ ಚಾರ್ಜ್ ಆಗಲು ಸುಮಾರು 6-7 ಗಂಟೆ ಸಮಯ ಹಿಡಿಯುತ್ತಿತ್ತು. ಒಮ್ಮೆ ಪೂರ್ತಿಯಾಗಿ ಚಾರ್ಜ್ ಆದರೆ ಕೇವಲ 2-3 ಗಂಟೆ ಕೆಲಸ ಮಾಡುತ್ತಿತ್ತು. ಅದರ ಸ್ಪರ್ಶಪರದೆಯ ಸಂವೇದನೆ ಏನೇನೂ ಚೆನ್ನಾಗಿರಲಿಲ್ಲ. ಅಂತಿಮವಾಗಿ ಆಕಾಶ್ ಪಾತಾಳಕ್ಕಿಳಿಯಿತು.

ಇವೆರಡೂ ವೇಪರ್‌ವೇರ್‌ಗಳಿಗೆ ನಮ್ಮದೇ ಆದ ಉದಾಹರಣೆಗಳು. ಮಾಹಿತಿ ತಂತ್ರಜ್ಞಾನ ಕೇತ್ರದಲ್ಲಿ ಇಂತಹ ಉದಾಹರಣೆಗಳು ಸಾವಿರಾರಿವೆ.

–ಡಾ| ಯು.ಬಿ. ಪವನಜ

gadgetloka @ gmail . com

The post ವೇಪರ್‌ವೇರ್ first appeared on Vishva Kannada.

ಈಗ ತುಂಬ ಕುಖ್ಯಾತವಾದ Error-53 ಕಥೆ ಕೇಳಿ. ಇದು ನಡೆದುದು 2016ರಲ್ಲಿ. ಕೆಲವು ಐಫೋನ್ ಬಳಕೆದಾರರು ತಮ್ಮ ಫೋನಿನ ಕೆಟ್ಟು ಹೋದ ಬೆರಳಚ್ಚು ಪರಿಶೀಲಕವನ್ನು (fingerprint scanner) ಐಫೋನ್‌ನವರ ಅಧಿಕೃತ ಸರ್ವಿಸ್ ಸೆಂಟರ್ ಬದಲಿಗೆ ಬೇರೆಯವರಿಂದ ದುರಸ್ತಿ ಮಾಡಿಸಿದರು. ಹಾಗೆ ಮಾಡಿಸಿಕೊಂಡವರೆಲ್ಲರ ಫೋನ್‌ಗಳು ಕೆಲಸ ಮಾಡುವುದು ನಿಲ್ಲಿಸಿ Error-53 ಎಂದು ತೋರಿಸತೊಡಗಿದವು. ಐಫೋನ್‌ನ ಗ್ರಾಹಕ ಸೇವೆಗೆ ಫೋನ್ ಮಾಡಿ ವಿಚಾರಿಸಿದರೆ ಅವರದು ಒಂದೇ ಉತ್ತರ – ನೀವು ಐಫೋನ್‌ನ ಅಧಿಕೃತ ಸರ್ವಿಸ್ ಸೆಂಟರಿನಲ್ಲಿ ದುರಸ್ತಿ ಮಾಡಿಸಿಲ್ಲ; ಅವರು ಕಳಪೆ ಭಾಗ ಅಳವಡಿಸಿದ್ದಾರೆ; ಆದುದರಿಂದ ನಾವು ಏನೂ ಮಾಡುವಂತಿಲ್ಲ. ವಿಷಯ ಏನೆಂದರೆ ಐಫೋನ್‌ನವರ ಅಧಿಕೃತ ಸರ್ವಿಸ್ ಸೆಂಟರಿನಲ್ಲಿ ದುರಸ್ತಿ ಮಾಡಿಸಿದರೆ ಅದು ಅತಿ ದುಬಾರಿ, ಬೇರೆಯವರಿಂದ ಮಾಡಿಸಿದರೆ ಅತಿ ಕಡಿಮೆಯಲ್ಲಿ ಆಗುತ್ತದೆ. ಆದರೆ ಅದರಿಂದ ಆಪಲ್ ಕಂಪೆನಿಗೆ ಹಣ ಬರುವುದಿಲ್ಲ. ಅದಕ್ಕಾಗಿ ಕಂಪೆನಿಯವರು ಅಂತಹ ಫೋನ್‌ಗಳನ್ನು ತಂತ್ರಾಂಶದ ನವೀಕರಣದ ಮೂಲಕ ಕೆಲಸ ಮಾಡದಂತೆ ಮಾಡಿದ್ದರು. ಈ ವಿಷಯ ಆಸ್ಟ್ರೇಲಿಯಲ್ಲಿ ನ್ಯಾಯಾಲಯಕ್ಕೆ ಹೋಯಿತು. ಕೆಲವು ಗ್ರಾಹಕ ಸಂಘಗಳು ಆಪಲ್ ಕಂಪೆನಿಯ ಮೇಲೆ ದಾವೆ ಹೂಡಿದರು. ಅಂತಿಮವಾಗಿ ಗ್ರಾಹಕರು ಗೆದ್ದರು. 9 ಮಿಲಿಯ ಡಾಲರ್ ದಂಡವನ್ನು ನ್ಯಾಯಾಲಯ ಆಪಲ್ ಕಂಪೆನಿಗೆ ವಿಧಿಸಿತು. ಎಲ್ಲರಿಗೂ ಬೇರೆ ಫೋನ್ ಕೊಡಿಸಿತು. ಇದು ಗ್ರಾಹಕರ ವಿಜಯ.

ಇಲ್ಲಿ ಒಂದು ವಿಷಯ ಗಮನಿಸಿರಬಹುದು. ಅದೆಂದರೆ ಒಮ್ಮೆ ಒಂದು ಸಾಧನವನ್ನು ನಾವು ಕೊಂಡ ನಂತರ ನಾವು ಅದರ ಯಜಮಾನರು. ಅದರ ಗ್ಯಾರಂಟಿ ಸಮಯ ಮುಗಿದ ನಂತರ ಅದನ್ನು ಎಲ್ಲಿ ಯಾರಿಂದ ದುರಸ್ತಿ ಮಾಡಿಸಬೇಕು ಎಂಬುದು ನಮ್ಮ ಅಧಿಕಾರವಾಗಿರಬೇಕು. ಅದನ್ನು ನಮ್ಮ ಮೇಲೆ ಹೇರುವ ಅಧಿಕಾರ ಆ ಸಾಧನವನ್ನು ತಯಾರಿಸಿದ ಕಂಪೆನಿಗೆ ಇರುವಂತಿಲ್ಲ. ಅಷ್ಟೇಕೆ, ನಾವು ತಾಂತ್ರಿಕವಾಗಿ ಪರಿಣತರಾಗಿದ್ದಲ್ಲಿ ಅದನ್ನು ನಾವೇ ಮನೆಯಲ್ಲೇ ದುರಸ್ತಿ ಮಾಡುವಂತಿರಬೇಕು. ಅದು ತಪ್ಪು ಎಂದು ಕಂಪೆನಿಯವರು ಹೇಳುವಂತಿಲ್ಲ. ನಾವೇ ದುರಸ್ತಿ ಮಾಡಿಕೊಂಡರೆ ಸಾಧನವನ್ನು ಕೆಲಸ ಮಾಡದಂತೆ ಅವರು ತಂತ್ರಾಂಶದ ಮೂಲಕ ನಿಯಂತ್ರಿಸುವಂತಿಲ್ಲ. ಈ ದುರಸ್ತಿಯ ವ್ಯಾಪ್ತಿಯಲ್ಲಿ ಸರಳವಾದ ಬ್ಯಾಟರಿ ಬದಲಾವಣೆಯೂ ಬರುತ್ತದೆ. ಈ ಹಕ್ಕನ್ನು ಸರಳವಾಗಿ ದುರಸ್ತಿಯ ಹಕ್ಕು ಎಂದು ಹೇಳಬಹುದು. ಇಂಗ್ಲಿಷಿನಲ್ಲಿ ಇದನ್ನು  right to repair ಎನ್ನುತ್ತಾರೆ. ಅಮೆರಿಕ ಮತ್ತು ಯುರೋಪಿನಲ್ಲಿ ಇದೊಂದು ದೊಡ್ದ ಚಳವಳಿಯಾಗಿ ರೂಪುಗೊಳ್ಳುತ್ತಿದೆ.      

ಇಲೆಕ್ಟ್ರಾನಿಕ್ ಸಾಧನಗಳು ಬಹುಬೇಗನೆ ಅಪ್ರಸ್ತುತವಾಗುತ್ತವೆ. ಅದನ್ನು ಕೊಳ್ಳುವವರೂ ಈ ಸಾಧನವನ್ನು ನಾವು ಹೆಚ್ಚೆಂದರೆ 5 ವರ್ಷ ಮಾತ್ರ ಬಳಸಬಹುದು ಎಂಬ ಆಲೋಚನೆಯಲ್ಲೇ ಕೊಳ್ಳುತ್ತಾರೆ. ಆದರೆ ಅದರ ಗ್ಯಾರಂಟಿ 6 ರಿಂದ 12 ತಿಂಗಳುಗಳಲ್ಲಿ ಮುಗಿದುಹೋಗುತ್ತದೆ. ನಂತರ ಚಿಕ್ಕ ದುರಸ್ತಿ ಮಾಡಿಸಬೇಕಿದ್ದರೂ ನೀವು ಅದರ ಅಧಿಕೃತ ಸರ್ವಿಸ್ ಸೆಂಟರಿಗೆ ತೆಗೆದುಕೊಂಡು ಹೋದರೆ ದುಬಾರಿ ಬೆಲೆ ತೆರಬೇಕಾಗುತ್ತದೆ. ಐಫೋನ್, ಮ್ಯಾಕ್, ಐಪ್ಯಾಡ್ ಇತ್ಯಾದಿ ತಯಾರಿಸುವ ಆಪಲ್ ಕಂಪೆನಿಯಂತೂ ತನ್ನ ಉತ್ಪನ್ನಗಳಲ್ಲಿ ತನ್ನದೇ ವಿನ್ಯಾಸದ ಸ್ಕ್ರೂಗಳನ್ನು ಬಳಸುತ್ತದೆ. ಇತರೆ ಕೆಲವು ಕಂಪೆನಿಗಳೂ ಇದೇ ರೀತಿ ಮಾಡುತ್ತಿವೆ. ಇದೆಲ್ಲವೂ ಒಂದು ರೀತಿಯಲ್ಲಿ ಅನೈತಿಕವೇ. ಇವುಗಳ ವಿರುದ್ಧ ನಡೆಯುತ್ತಿರುವ ಅಭಿಯಾನವೇ ದುರಸ್ತಿಯ ಹಕ್ಕು ಅಭಿಯಾನ. ಅಮೆರಿಕದಲ್ಲಿ ದುರಸ್ತಿಯ ಹಕ್ಕು ಕಾನೂನಾಗಿ ಬರುತ್ತಿದೆ. ಅದರಲ್ಲಿ ಅಡಕವಾಗಿರುವ ಕೆಲವು ಪ್ರಮುಖ ಅಂಶಗಳು – ಕಂಪೆನಿಗಳು ತಮ್ಮ ಉತ್ಪನ್ನಗಳ ದುರಸ್ತಿಯನ್ನು ಮಾಡಲು ಬೇಕಾಗಿರುವ ತಾಂತ್ರಿಕ ಕೈಪಿಡಿಯನ್ನು ಅಂತರಜಾಲದ ಮೂಲಕ ಬಿಡುಗಡೆ ಮಾಡಬೇಕು; ಉತ್ಪನ್ನದ ವಿನ್ಯಾಸವು ಯಾರು ಬೇಕಾದರೂ ದುರಸ್ತಿ ಮಾಡುವಂತಿರಬೇಕು, ದುರಸ್ತಿಗೆ ಬೇಕಾದ ಭಾಗಗಳನ್ನು ಲಭ್ಯ ಮಾಡಬೇಕು, ನಾವೇ ಅಥವಾ ಬೇರೆಯವರು ದುರಸ್ತಿ ಮಾಡಿದರೆ ಆ ಉತ್ಪನ್ನವನ್ನು ತಂತ್ರಾಂಶದ ಮೂಲಕ ಕೆಲಸ ಮಾಡದಂತೆ ಮಾಡಬಾರದು, ಇತ್ಯಾದಿ. ಇಂತಹ ಒಂದು ಅಭಿಯಾನ ಭಾರತದಲ್ಲೂ ಆಗಬೇಕಾಗಿದೆ.

–ಡಾ| ಯು.ಬಿ. ಪವನಜ

gadgetloka @ gmail . com

The post ದುರಸ್ತಿಯ ಹಕ್ಕು first appeared on Vishva Kannada.

ಅಂತರಜಾಲದಲ್ಲಿ ನೀವು ಏನು ಮಾಡಿದರೂ ಗೂಗ್ಲ್‌ಗೆ ಗೊತ್ತಾಗುತ್ತದೆ. ಅಂದರೆ ಬಹುತೇಕ ಎಲ್ಲ ಕೆಲಸಗಳೂ ಅದಕ್ಕೆ ಗೊತ್ತಾಗುತ್ತದೆ. ಅದಕ್ಕೆ ಮಾತ್ರವಲ್ಲ. ಫೇಸ್‌ಬುಕ್ ಕೂಡ ನಿಮ್ಮನ್ನು ಅಂತರಜಾಲದಲ್ಲಿ ಹಿಂಬಾಲಿಸುತ್ತದೆ. ನೀವು ಸಿಗ್ನಲ್‌ಗೆ ಕಾಯುತ್ತಿರುವಾಗ ನಿಮ್ಮ ವಾಹನವನ್ನು ಯಾವುದೋ ಬಾರ್ ಮುಂದೆ ಎರಡು ನಿಮಿಷ ನಿಲ್ಲಿಸಿರುತ್ತೀರಾ. ನಾಳೆ ನಿಮಗೆ ಗೂಗ್ಲ್ ಕೇಳುತ್ತದೆ –“ಆ ಬಾರ್ ಆಂಡ್ ರೆಸ್ಟಾರೆಂಟ್ ಹೇಗಿತ್ತು?” ಎಂದು. ಇದೆಲ್ಲಕ್ಕೂ ಕಾರಣ ಅಂತರಜಾಲದಲ್ಲಿ ನಮ್ಮ ಹೆಜ್ಜೆ ಗುರುತುಗಳು. ಈಗ ಇನ್ನೊಂದು ವಿಚಾರ. ಯಾರಿಗೋ ಯಾರೋ ಬ್ಲಾಕ್‌ಮೈಲ್ ಮಾಡಿರುತ್ತಾರೆ. ಅವರು ಅಂತರಜಾಲದ ಮೂಲಕವೇ ವ್ಯವಹರಿಸಿರುತ್ತಾರೆ. ಅಂತರಜಾಲದ ಮೂಲಕವೇ, ಬಹುತೇಕ ಸಂದರ್ಭಗಳಲ್ಲಿ ಬಿಟ್‌ಕಾಯಿನ್ ಮೂಲಕ, ಹಣ ಕೇಳಿರುತ್ತಾರೆ. ಈಗ ನಿಮಗೆ ಅನುಮಾನ ಬರುವುದಿಲ್ಲವೇ? ಯಾಕೆ ಈ ಕಿಲಾಡಿಗಳ ಹೆಜ್ಜೆಗುರುತುಗಳು ಅಂತರಜಾಲದಲ್ಲಿ ಲಭ್ಯವಿಲ್ಲ? ಅವರೇಕೆ ಪೋಲೀಸರಿಗೆ ಸಿಕ್ಕಿಹಾಕಿಕೊಳ್ಳುವುದಿಲ್ಲ? ಯಾಕೆಂದರೆ ಅವರುಗಳು ಬಳಸಿದ್ದು ನಾವು ನೀವು ಬಳಸುವ ಮಾಮೂಲಿ ಅಂತರಜಾಲವಲ್ಲ. ಬದಲಿಗೆ ಅಂತರಜಾಲದಲ್ಲಿರುವ ಒಂದು ಕತ್ತಲ ಲೋಕ. ಏನದು? ಬನ್ನಿ ತಿಳಿಯೋಣ.

ಅಂತರಜಾಲದ ಒಂದು ಪ್ರಮುಖ ಅಂಗ ವಿಶ್ವವ್ಯಾಪಿಜಾಲ (world-wide web, www). ಇದನ್ನೇ ಬಹುತೇಕ ಜನರು ಅಂತರಜಾಲ ಎಂದುಕೊಂಡಿದ್ದಾರೆ. ಇದನ್ನು ಹುಡುಕಲು ಬಳಸುವ ತಂತ್ರಾಂಶ ಶೋಧಕ ತಂತ್ರಾಂಶ. ಇದಕ್ಕೆ ಉತ್ತಮ ಉದಾಹರಣೆ ಗೂಗ್ಲ್. ಅದು ಅಂತರಜಾಲದಲ್ಲಿ ತನ್ನ ಹುಡುಕಾಟಕ್ಕೆ ಕಂಡುಬರುವ ಎಲ್ಲವನ್ನೂ ಹುಡುಕಿ ಮಾಹಿತಿ ನೀಡುತ್ತದೆ. ಇದನ್ನು ನೀವೆಲ್ಲ ಗಮನಿಸಿರುತ್ತೀರಿ. ಆದರೆ ಈ ಶೋಧಕಗಳಿಗೆ ಹುಡುಕಾಟಕ್ಕೆ ಕಂಡುಬರದ ಅಂತರಜಾಲವೊಂದಿದೆ ಅಥವಾ ಅಂತರಜಾಲದ ಭಾಗವೊಂದಿದೆ. ಅದನ್ನು ಬಳಸಲು ಅದಕ್ಕೆಂದೇ ರೂಪಿತವಾದ ತಂತ್ರಾಂಶಗಳು ಬೇಕು. ಈ ಜಾಲವನ್ನು ಇಂಗ್ಲಿಷಿನಲ್ಲಿ dark web ಎನ್ನುತ್ತಾರೆ. ಇದನ್ನೇ ನಾನು ಅಂತರಜಾಲದ ಕತ್ತಲಲೋಕ ಎಂದು ಹೆಸರಿಸಿದ್ದು.

ಡಾರ್ಕ್ ವೆಬ್‌ನಲ್ಲಿ ಹಲವು ಚಿಕ್ಕ ಚಿಕ್ಕ ಖಾಸಾ ಜಾಲಗಳೂ ದೊಡ್ಡ ದೊಡ್ಡ ಜಾಲಗಳೂ ಇರುತ್ತವೆ. ಇದರಲ್ಲಿ ಅಡಕವಾಗಿರುವ ವ್ಯಕ್ತಿಯಿಂದ ವ್ಯಕ್ತಿಗೆ ಸಂಪರ್ಕಗೊಳ್ಳುವ ಜಾಲಕ್ಕೆ ಇಂಗ್ಲಿಷಿನಲ್ಲಿ peer-to-peer network ಎನ್ನುತ್ತಾರೆ. ಇವು ಚಿಕ್ಕ ಜಾಲಗಳು. ದೊಡ್ಡ ಜಾಲಗಳಲ್ಲಿ ಪ್ರಮುಖವಾದ ಒಂದು ಉದಾಹರಣೆ ಟೋರ್. TOR ಎನ್ನುವುದು The Onion Router ಎನ್ನುವುದರ ಹ್ರಸ್ವ ರೂಪ. ಇದು ಮುಕ್ತ ತಂತ್ರಾಂಶಗಳ ಮೂಲಕ ಬಳಕೆದಾರ ಯಾರು ಎನ್ನುವುದನ್ನು ಮರೆಮಾಚಿ ಅನಾಮಿಕವಾಗಿ ಕೆಲಸ ಮಾಡಲು ಸಹಾಯ ಮಾಡುತ್ತದೆ. ಜಗತ್ತಿನಾದ್ಯಂತ ಇರುವ, ಬಹುತೇಕ ಶೋಧಕಗಳಿಗೆ ಕಾಣಿಸದ, ಒಂದು ಪ್ರತ್ಯೇಕ ಜಾಲದ ಮೂಲಕ ಇದು ಕೆಲಸ ಮಾಡುತ್ತದೆ. ವ್ಯಕ್ತಿಯ ಗೌಪ್ಯತೆಯನ್ನು ಕಾಪಾಡಲು ಈ ಜಾಲ ಅಸ್ತಿತ್ವಕ್ಕೆ ಬಂತು. ಈ ಜಾಲದ ಮೂಲಕ ಒಂದು ಇಮೈಲ್ ಕಳುಹಿಸಿದರೆ ಆ ಇಮೈಲ್ ಯಾವ ಸ್ಥಳದಿಂದ ಬಂದಿದೆ ಎಂದು ತಿಳಿಯಲು ಸಾಧ್ಯವಿಲ್ಲ. ಇತರೆ ಮಾಮೂಲಿ ಇಮೈಲಾದರೆ ಅದರ ಐ.ಪಿ. ವಿಳಾಸದ ಮೂಲಕ ಅದು ಯಾವ ಸ್ಥಳದಿಂದ ಬಂದಿದೆ ಎಂದು ತಿಳಿಯಬಹುದು. ಡಾರ್ಕ್ ವೆಬ್ ಟೋರ್ ಜಾಲದ ಮೂಲಕ ಮಾತ್ರವಲ್ಲ, ಅದೇ ಮಾದರಿಯ ಇನ್ನೂ ಹಲವು ಜಾಲಗಳನ್ನು ಬಳಸಿಕೊಳ್ಳುತ್ತದೆ.

ಡಾರ್ಕ್ ವೆಬ್ ಪ್ರಾರಂಭವಾದ ಉದ್ದೇಶ ಒಳ್ಳೆಯದಾಗಿದ್ದರೂ ಅದು ಬಹುತೇಕ ಅಪರಾಧ ಚಟುವಟಿಕೆಗಳಿಗೇ ಬಳಕೆಯಾಗುತ್ತಿದೆ. ಕೆಲವು ಸಂದರ್ಭಗಳಲ್ಲಿ ಕಾನೂನು ಪ್ರಕಾರ ಅಪರಾಧವಾಗಿರುವುದು ನಿಜವಾಗಿಯೂ ಅನ್ಯಾಯವಾಗಿರಬೇಕಾಗಿಲ್ಲ. ಹಲವು ದೇಶಗಳಲ್ಲಿ ಬಹಳ ಕಟ್ಟುನಿಟ್ಟಾದ ಸೆನ್ಸಾರ್ ನಿಯಮಗಳಿವೆ. ಅಲ್ಲಿ ಆನ್‌ಲೈನ್ ಸ್ವಾತಂತ್ರ್ಯ ಇಲ್ಲ. ಅಂತಹ ದೇಶಗಳಲ್ಲಿ ಮಾನವ ಹಕ್ಕುಗಳ ಹೋರಾಟಗಾರರು ಈ ಡಾರ್ಕ್ ವೆಬ್ ಅನ್ನು ಬಳಸುತ್ತಾರೆ. ಸಂಶೋಧಕರು 2015ರಲ್ಲಿ ಒಂದು ಸಮೀಕ್ಷೆ ಮಾಡಿದ್ದರು. ಅದರಲ್ಲಿ ಅವರಿಗೆ ಕಂಡು ಬಂದುದೇನೆಂದರೆ ಡಾರ್ಕ್ ವೆಬ್‌ನಲ್ಲಿರುವ ಸುಮಾರು 60% ರಷ್ಟು ಜಾಲತಾಣಗಳು ಕ್ರಿಮಿನಲ್ ಚಟುವಟಿಕೆಗಳಿಗೆ ಬಳಕೆಯಾಗುತ್ತಿದೆ ಎಂದು. 2019ರಲ್ಲಿ ನಡೆಸಿದ ಇನ್ನೊಂದು ಸಂಶೋಧನಾ ಸಮೀಕ್ಷೆಯಲ್ಲಿ ಕಂಡುಬಂದುದೇನೆಂದರೆ ಈ ನಮೂನೆಯ ಚಟುವಟಿಕೆಗಳು 20% ರಷ್ಟು ಹೆಚ್ಚಾಗಿದೆ ಎಂದು. 2023ರಲ್ಲಿ ಅದು ಇನ್ನೂ ಹೆಚ್ಚಾಗಿರುತ್ತದೆ.

ಡಾರ್ಕ್ ವೆಬ್‌ನಲ್ಲಿ ಕಾನೂನುಬಾಹಿರ ಚಟುವಟಿಕೆಗಳೇ ಅಧಿಕ. ಕೆಲವು ಉದಾಹರಣೆಗಳು – ಕದ್ದ ಕ್ರೆಡಿಟ್ ಕಾರ್ಡ್ ಮಾಹಿತಿ, ತಂತ್ರಾಂಶಗಳ ಸೀರಿಯಲ್ ನಂಬರ್, ನೆಟ್‌ಫ್ಲಿಕ್ಸ್‌ನಂತಹ ಸೇವೆಗಳ ಲಾಗಿನ್ ಮತ್ತು ಪಾಸ್‌ವರ್ಡ್, ಬ್ಯಾಂಕ್‌ಖಾತೆಗಳ ಲಾಗಿನ್ ಮತ್ತು ಪಾಸ್‌ವರ್ಡ್, ಇತ್ಯಾದಿ. ಬೇರೆಯವರ ಗಣಕ ಮತ್ತು ಗಣಕ ಜಾಲಗಳಿಗೆ ಕನ್ನ ಹಾಕುವ ಪರಿಣತರನ್ನು ಹ್ಯಾಕರುಗಳು ಎನ್ನುತ್ತಾರೆ. ಅಂತಹ ಹ್ಯಾಕರುಗಳ ನೇಮಕಾತಿ ನಡೆಯುವುದು ಡಾರ್ಕ್ ವೆಬ್ ಮೂಲಕ.

ಡಾರ್ಕ್ ವೆಬ್‌ನಲ್ಲಿ ಎಲ್ಲವೂ ಕಾನೂನುಬಾಹಿರವಾಗಿಯೇ ಇರಬೇಕಾಗಿಲ್ಲ. ಆನ್‌ಲೈನ್ ಮೂಲಕ ಚದುರಂಗ ಆಡುವ ಒಂದು ಜಾಲವು ಡಾರ್ಕ್ ವೆಬ್‌ನಲ್ಲೂ ಇದೆ. ಅದು ಕೆಟ್ಟ ಕೆಲಸವೇನಲ್ಲ. ಸಂಪೂರ್ಣ ಅನಾಮಧೇಯ ವ್ಯಕ್ತಿಯ ಜೊತೆ ಅನ್‌ಲೈನ್  ಮೂಲಕ ಚದುರಂಗದ ಆಟವನ್ನು ಈ ಜಾಲದ ಮೂಲಕ ಆಡಬಹುದು.

ಜನಸಾಮಾನ್ಯರು ಡಾರ್ಕ್ ವೆಬ್ ಬಳಸುವ ಸಾಧ್ಯತೆ ತುಂಬ ಕಡಿಮೆ. ಅಗತ್ಯವೂ ಇಲ್ಲ. ಡಾರ್ಕ್ ವೆಬ್‌ನಲ್ಲಿ ಕ್ರಿಮಿನಲ್  ಚಟುವಟಿಕೆಗಳೇ ಅಧಿಕ ಎಂದೆನಲ್ಲ. ಆದುದರಿಂದ ಅದನ್ನು ಬಳಸುವವರಲ್ಲಿ ಕ್ರಿಮಿನಲ್‌ಗಳೇ ಅಧಿಕ. ಅಂತಾರಾಷ್ಟ್ರೀಯ ಮಟ್ಟದ ಭಯೋತ್ಪಾದಕ ಚಟುವಟಿಕೆಯಲ್ಲಿ ಪಾಲುಗೊಳ್ಳುವವರು ತಮ್ಮೊಳಗೆ ಮಾಹಿತಿ ವಿನಿಮಯಕ್ಕೆ ಡಾರ್ಕ್ ವೆಬ್ ಬಳಸುತ್ತಾರೆ. ಶಸ್ತ್ರಾಸ್ತ್ರ ಖರೀದಿಗೂ ಇದೇ ಡಾರ್ಕ್ ವೆಬ್‌ನ ಬಳಕೆ ಆಗುತ್ತದೆ. ಬಹುತೇಕ ದೇಶಗಳ ರಕ್ಷಣಾಧಿಕಾರಿಗಳಿಗೆ, ಮಿಲಿಟರಿಯವರಿಗೆ, ತನಿಖಾ ಸಂಸ್ಥೆಗಳಿಗೆ ಇಲ್ಲಿಯ ವ್ಯವಹಾರ ಕಂಡುಬರುವುದಿಲ್ಲ. ಆದುದರಿಂದ ಅಂತಹ ಭೂಗತ ಚಟುವಟಿಕೆಗಳು ಈ ಡಾರ್ಕ್ ವೆಬ್ ಮೂಲಕ ನಡೆಯುತ್ತವೆ.

ಡಾರ್ಕ್ ವೆಬ್ ಬ್ಲಾಕ್‌ಮೈಲ್‌ಗೂ ಬಳಕೆಯಾಗುತ್ತದೆ. ಅದರ ಮೂಲಕ ಭಯೋತ್ಪಾದಕರು ಹಣ ಕೇಳುತ್ತಾರೆ. ಅವರುಗಳು ಸಾಮಾನ್ಯವಾಗಿ ಬಿಟ್‌ಕಾಯಿನ್ ಅಥವಾ ಅದೇ ಮಾದರಿಯ ಗೂಢನಾಣ್ಯಗಳ ಮೂಲಕ ಹಣ ಕೇಳುತ್ತಾರೆ. ಡಾರ್ಕ್ ವೆಬ್‌ನ ಮತ್ತೊಂದು ಪ್ರಮುಖ ಬಳಕೆ ಅಂದರೆ ಅಶ್ಲೀಲ ಸಿನಿಮಾ ಅರ್ಥಾತ್ ಪೋರ್ನ್.

–ಡಾ| ಯು.ಬಿ. ಪವನಜ

gadgetloka @ gmail . com

The post ಅಂತರಜಾಲದಲ್ಲೊಂದು ಕತ್ತಲ ಲೋಕ first appeared on Vishva Kannada.