ಹಿಂದಿನ ಸಂಚಿಕೆಗಳಲ್ಲಿ ಯಾವೆಲ್ಲ ರೀತಿಯಲ್ಲಿ ಜಾಲಾಪರಾಧಗಳು ನಡೆಯುತ್ತವೆ ಎಂದು ಓದಿದಿರಿ. ಯಾವೆಲ್ಲ ರೀತಿಯಲ್ಲಿ ತೊಂದರೆಗೊಳಗಾಗುತ್ತೀರಿ ಎಂದೂ ಓದಿದಿರಿ. ಜಾಲಾಪರಾಧಗಳಲ್ಲಿ ಬಹುದೊಡ್ಡ ಭಾಗ ಹಣಕಾಸಿಗೆ ಸಂಬಂದಪಟ್ಟದ್ದು. “ನಿಮ್ಮ ಬ್ಯಾಂಕಿನಿಂದ ಫೋನ್ ಮಾಡುತ್ತಿದ್ದೇನೆ. ನಿಮ್ಮ ಅಕೌಂಟ್ ಅನ್ನು ನಮ್ಮ ಕಂಪ್ಯೂಟರಿನಲ್ಲಿ ಅಪ್‌ಡೇಟ್ ಮಾಡುತ್ತಿದ್ದೇವೆ. ನಿಮ್ಮ ಫೋನಿಗೆ ಒಂದು ಓಟಿಪಿ ಬಂದಿರುತ್ತದೆ. ಅದನ್ನು ನನಗೆ ಓದಿ ಹೇಳಿ.”  ಎಂದು ಫೋನ್ ಬಂದಿರುತ್ತದೆ. ಅದನ್ನು ನಂಬಿ ಓಟಿಪಿ ಹೇಳಿದರೆ ಬ್ಯಾಂಕಿನ ಖಾತೆಯಿಂದ ಹಣ ಹೋಗಿರುತ್ತದೆ. ಇನ್ನೊಂದು ಸಾಮಾನ್ಯ ದರೋಡೆಯ ವಿಧಾನವೆಂದರೆ ವಿಡಿಯೋ ಕರೆ ಬರುವುದು. ಅದು ಯಾವುದೋ ಒಂದು ಹೆಣ್ಣಿನಿಂದ ಬಂದಿರುತ್ತದೆ. ವಿಡಿಯೋ ಕರೆ ಮಾಡಿ ಏನೇನೋ ಮಾತನಾಡಿರುತ್ತಾರೆ. ನಂತರ ಆ ವಿಡಿಯೋದಲ್ಲಿ ನಿಮ್ಮ ಮುಖಕ್ಕೆ ಇನ್ಯಾವುದೋ ನಗ್ನ ದೇಹವನ್ನು ಜೋಡಿಸಿ ಎಡಿಟ್ ಮಾಡಿ ನಂತರ ಬ್ಲಾಕ್‌ಮೈಲ್ ಮಾಡುವುದು. ಈ ಎರಡು ನಮೂನೆಗಳಲ್ಲದೆ ಇನ್ನೂ ಹಲವು ರೀತಿಯಲ್ಲಿ ಜಾಲಾಪರಾಧಗಳು ನಡೆಯುತ್ತವೆ. ಇವುಗಳಿಗೆ ಕಡಿವಾಣ ಹಾಕಲು ಅಥವಾ ಅಂತಹ ಸಂದರ್ಭಗಳಲ್ಲಿ ಪೋಲೀಸರು ಕ್ರಮ ಕೈಗೊಳ್ಳಲೆಂದೇ ಪ್ರತ್ಯೇಕ ಕಾನೂನುಗಳಿಲ್ಲವೇ ಎಂದು ಕೇಳುತ್ತಿದ್ದೀರಾ? ಹೌದು. ಜಾಲಾಪರಾಧಗಳಿಗೆ ಕಡಿವಾಣ ಹಾಕಲೆಂದೇ ಪ್ರತ್ಯೇಕ ಕಾನೂನು ಇದೆ. ಇದಕ್ಕೆ ಭಾರತೀಯ ಮಾಹಿತಿ ತಂತ್ರಜ್ಞಾನ ಕಾನೂನು ಎನ್ನುತ್ತಾರೆ. 2000ನೆಯ ಇಸವಿಯಲ್ಲಿ ಇದನ್ನು ಕಾನೂನಾಗಿ ಮಾಡಲಾಯಿತು. ಆದುದರಿಂದ ಇದಕ್ಕೆ Information Technology Act 2000 ಎಂಬ ಹೆಸರಿದೆ. ಈ ಸಂಚಿಕೆಯಲ್ಲಿ ಈ ಕಾನೂನಿಗೆ ಬಗ್ಗೆ ತಿಳಿಯೋಣ.

ಈ ಕಾನೂನು ಗಣಕ, ಗಣಕ ಜಾಲ, ಅಂತರಜಾಲ, ಮೊಬೈಲ್ ಫೋನ್, ಇತ್ಯಾದಿ ಮಾಹಿತಿ ತಂತ್ರಜ್ಞಾನದ ಅಂಗಗಳನ್ನು ಬಳಸಿ ಮಾಡಿದ ಅಪರಾದಗಳಿಗೆ ಅನ್ವಯವಾಗುತ್ತದೆ. ಇದು ಇಡಿಯ ಭಾರತ ದೇಶಕ್ಕೆ ಅನ್ವಯವಾಗುತ್ತದೆ. ಯಾವುದೋ ಒಂದು ಅಥವಾ ಕೆಲವು ರಾಜ್ಯಗಳಿಗೆ ಸೀಮಿತವಾದುದಲ್ಲ. ಭಾರತದಲ್ಲಿ ನಡೆದ ಮಾತ್ರವಲ್ಲ ಭಾರತದಿಂದ ಹೊರಗೆ ನಡೆದ ಅಪರಾಧಗಳೂ ಇದರ ಪರಿಧಿಯಲ್ಲಿ ಬರುತ್ತವೆ.

ಈ ಕಾನೂನು ಕೇವಲ ಅಪರಾಧಗಳಿಗೆ ಸಂಬಂಧಿಸಿದ್ದಲ್ಲ. ಡಿಜಿಟಲ್ ಯುಗದಲ್ಲಿ ನಡೆಯುವ ಹಲವಾರು ಡಿಜಿಟಲ್ ವ್ಯವಹಾರಗಳಿಗೆ ಇದು ಅಧಿಕೃತತೆಯ ಮುದ್ರೆಯನ್ನು ಒತ್ತುತ್ತದೆ. ಇದರಲ್ಲಿ ಪ್ರಮುಖವಾದುದು ಡಿಜಿಟಲ್ ಸಹಿ. ನೀವು ತೆರಿಗೆ ಕಟ್ಟುವವರಾದರೆ ನಿಮಗೆ ಭಾರತ ಸರಕಾರದ ಆದಾಯ ತೆರಿಗೆ ಇಲಾಖೆಯಿಂದ ಬರುವ ಇಮೈಲ್ ಜೊತೆ ಇರುವ ಪತ್ರವನ್ನು ಡಿಜಿಟಲ್ ಸಹಿ ಮಾಡಿ ಕಳುಹಿಸಿರಲಾಗುತ್ತದೆ. ಇದನ್ನು ಸೂಕ್ತ ತಂತ್ರಾಂಶದ ಮೂಲಕ ತೆರೆಯಬಹುದು. ಅದೇ ರೀತಿ ನೀವು ಯಾರಿಗಾದರೂ ಹಣಕಾಸಿನ ಮಾಹಿತಿ, ಕಂಪೆನಿಯ ಆಯವ್ಯಯದ ಕೋಷ್ಟಕ, ಬಹುಮುಖ್ಯ ಇಮೈಲ್, ಇತ್ಯಾದಿಗಳನ್ನು ಕಳುಹಿಸುವಾಗ ನೀವು ಅದಕ್ಕೆ ನಿಮ್ಮ ಡಿಜಿಟಲ್ ಸಹಿ ಹಾಕಬಹುದು. ಇದಕ್ಕಾಗಿ ನೀವು ಡಿಜಿಟಲ್ ಸಹಿ ಕೊಳ್ಳಬೇಕು. ಅದು ನಿಮ್ಮ ವೈಯಕ್ತಿಕವಾಗಿರುತ್ತದೆ. ಹೀಗೆ ಡಿಜಿಟಲ್ ಸಹಿ ಮಾಡಿ ಕಳುಹಿಸಿದ ಪತ್ರ, ಇಮೈಲ್, ಫೈಲ್‌ಗಳು ಅಧಿಕೃತ ಎಂದೆನಿಸುತ್ತವೆ. ಮಾಮೂಲಿ ಇಮೈಲ್ ಕೂಡ ಅಧಿಕೃತ ಎಂದು ಈ ಕಾನೂನು ತಿಳಿಸುತ್ತದೆ. ಉದಾಹರಣೆಗೆ ನೀವು ಬ್ಯಾಂಕಿಗೆ, ಜೀವ ವಿಮಾ ಸಂಸ್ಥೆಗೆ, ಸರಕಾರಕ್ಕೆ, ನಿಮ್ಮ ಕಂಪೆನಿಗೆ, ಎಲ್ಲ ಇಮೈಲ್ ಮೂಲಕ ಮಾಹಿತಿ ಕಳುಹಿಸಿದರೆ ಸಾಕು. ಪತ್ರದ ಮೂಲಕವೇ ಕಳುಹಿಸಬೇಕಾಗಿಲ್ಲ. ರಿಜಿಸ್ಟರ್ಡ್ ಪತ್ರದ ಮೂಲಕ ನೀವು ಕಳುಹಿಸಿಲ್ಲ ಎಂದು ಅವರು ಹೇಳಿ ನುಣುಚಿಕೊಳ್ಳುವಂತಿಲ್ಲ.  

ಹಲವು ನಮೂನೆಯ ಜಾಲಾಪರಾಧಕ್ಕೆ ತುತ್ತಾದವರು ಈ ಕಾನೂನಿನ ಮೊರೆ ಹೋಗಬಹುದು. ಸರಕಾರವು ಇಂತಹ ದೂರುಗಳನ್ನು ಸ್ವೀಕರಿಸಿ ಸೂಕ್ತ ಕ್ರಮ ಕೈಗೊಳ್ಳಲೆಂದೇ ಪ್ರತ್ಯೇಕ ಪೋಲೀಸ್ ವಿಭಾಗವನ್ನು ತೆರೆದಿದ್ದಾರೆ. ಇದಕ್ಕೆ ಸೈಬರ್ ಪೋಲೀಸ್ ಎನ್ನುತ್ತಾರೆ. ನೀವು ಜಾಲಾಪರಾಧಕ್ಕೆ ತುತ್ತಾದವರಾಗಿದ್ದರೆ ದೂರನ್ನು ಸೈಬರ್ ಪೋಲೀಸರಿಗೆ ನೀಡಬಹುದು. ಅದಕ್ಕಾಗಿ ನೀವು ಪೋಲೀಸ್ ಠಾಣೆಗೆ ಹೋಗಬೇಕಾಗಿಲ್ಲ. cybercrime.gov.in ಜಾಲತಾಣಕ್ಕೆ ಭೇಟಿ ನೀಡಿ ನಿಮ್ಮ ದೂರನ್ನು ದಾಖಲಿಸಬಹುದು.

ಈ ಕಾನೂನಿನ ಪ್ರಕಾರ ಅಪರಾಧಗಳು:-

• ಗಣಕದಲ್ಲಿ ಸಂಗ್ರಹಿಸಿಡುವ ತಂತ್ರಾಂಶಗಳ ಮೂಲ ಆಕರಗಳನ್ನು (ಫೈಲ್‌ಗಳು) ಕೆಡಿಸುವುದು, ಕದಿಯುವುದು, ಅನಧಿಕೃತವಾಗಿ ಹಂಚುವುದು. ಇದು ಸಾಮಾನ್ಯವಾಗಿ ತಂತ್ರಾಂಶ ಪರಿಣತರು ಮಾಡುವ ಅಪರಾಧಗಳು.
• ಹ್ಯಾಕಿಂಗ್. ಗಣಕ ಅಥವಾ ಗಣಕ ಜಾಲಕ್ಕೆ ಅನಧಿಕೃತವಾಗಿ ಪ್ರವೇಶಿಸಿ ತಂತ್ರಾಂಶಗಳನ್ನು, ಮಾಹಿತಿಗಳನ್ನು ಕೆಡಿಸುವುದನ್ನು ಹ್ಯಾಕಿಂಗ್ ಎನ್ನುತ್ತಾರೆ. ಬಹುಮುಖ್ಯವಾಗಿ ಜಾಲತಾಣಗಳನ್ನು ಕೆಡಿಸುವುದಕ್ಕೆ ಹ್ಯಾಕಿಂಗ್ ಅನ್ನು ಬಳಸುತ್ತಾರೆ.
• ಕದ್ದ ಗಣಕ ಅಥವಾ ಯಾವುದೇ ಮಾಹಿತಿ ತಂತ್ರಜ್ಞಾನದ ಸಾಧನವನ್ನು ಸ್ವೀಕರಿಸುವುದು ಅಥವಾ ಬಳಸುವುದು.
• ಇನ್ನೊಬ್ಬರ ಪಾಸ್‌ವರ್ಡ್ ಅಥವಾ ಡಿಜಿಟಲ್ ಸಹಿಯನ್ನು ಬಳಸುವುದು.
• ಗಣಕ ಅಥವಾ ಮಾಹಿತಿ ತಂತ್ರಜ್ಞಾನದ ಸಾಧನ ಸಲಕರಣೆಗಳನ್ನು ಬಳಸಿ ಮೋಸ ಮಾಡುವುದು.
• ಇತರರ ಅನುಮತಿಯಿಲ್ಲದೆ ಅವರ ಖಾಸಗಿ ಚಿತ್ರಗಳನ್ನು ಪ್ರಕಟಿಸುವುದು ಮತ್ತು ಹಂಚುವುದು.
• ಸೈಬರ್ ಭಯೋತ್ಪಾದನೆ. ಗಣಕ ಜಾಲಕ್ಕೆ ನುಗ್ಗಿ ದೇಶಕ್ಕೆ, ದೇಶದ ಭದ್ರತೆಗೆ, ದೇಶದ ಏಕತೆಗೆ, ತೊಂದರೆ ನೀಡುವಂತಹ ಕೆಲಸ ಮಾಡುವುದು.
• ವಿದ್ಯುನ್ಮಾನ ರೀತಿಯಲ್ಲಿ ಅಶ್ಲೀಲ ಮಾಹಿತಿಯನ್ನು ಪ್ರಕಟಿಸುವುದು ಅಥವಾ ಹಂಚುವುದು. ಲೈಂಗಿಕ ಕ್ರಿಯೆಗಳನ್ನು ತೋರಿಸುವ ಚಿತ್ರ ಅಥವಾ ವಿಡಿಯೋಗಳನ್ನು ಪ್ರಕಟಿಸುವುದು ಅಥವಾ ಹಂಚುವುದು. ಮಕ್ಕಳನ್ನು ಬಳಸಿ ತಯಾರಿಸಿದ ಲೈಂಗಿಕ ಕ್ರಿಯೆಗಳ ವಿಡಿಯೋಗಳೂ ಇದರಡಿಯಲ್ಲಿ ಬರುತ್ತವೆ. ಎಲ್ಲ ಪೋರ್ನ್ ಜಾಲತಾಣಗಳು ಇದರಡಿಯಲ್ಲಿ ಬರುತ್ತವೆ. ನಿಮಗೆ ಯಾರಾದರೂ ಇಮೈಲ್ ಅಥವಾ ವಾಟ್ಸ್‌ಆಪ್ ಮೂಲಕ ಅಶ್ಲೀಲ ಚಿತ್ರ ಅಥವಾ ವಿಡಿಯೋ ಕಳುಹಿಸಿದರೆ ನೀವು ಅವರ ಮೇಲೆ ಈ ಕಾನೂನಿನ ಪ್ರಕಾರ ಕ್ರಮ ಕೈಗೊಳ್ಳಲು ದೂರು ನೀಡಬಹುದು.

ಈ ಕಾನೂನಿನ 66A ವಿಭಾಗವು ವಿವಾದಾಸ್ಪದವಾಗಿತ್ತು. ಅದರ ಪ್ರಕಾರ ಸುಲಭದಲ್ಲಿ ಜನರನ್ನು ಬಂಧಿಸಬಹುದಾಗಿತ್ತು. ಮಾರ್ಚ್ 2015ರಲ್ಲಿ ಸರ್ವೋಚ್ಚ ನ್ಯಾಯಾಲಯವು ಕಾನೂನಿನ ಈ ವಿಭಾಗವು ಸಂವಿಧಾನದ ಮೂಲ ಆಶಯಗಳಿಗೆ ವಿರುದ್ಧವಾಗಿದೆ ಎಂದು ಹೇಳಿ ಅದನ್ನು ವಜಾ ಮಾಡಿತು.

–ಡಾ| ಯು.ಬಿ. ಪವನಜ

gadgetloka @ gmail . com

The post ಭಾರತೀಯ ಮಾಹಿತಿ ತಂತ್ರಜ್ಞಾನ ಕಾಯಿದೆ first appeared on Vishva Kannada.

ಕಳೆದು ಎರಡು ಸಂಚಿಕೆಗಳಲ್ಲಿ ಅಂತರಜಾಲದ ಮೂಲಕ ಮಾಡುವ ಎರಡು ಅಪರಾಧಗಳ ಬಗ್ಗೆ ತಿಳಿದುಕೊಂಡೆವು. ಅಂತರಜಾಲ, ಗಣಕ ಮತ್ತು ಇತರೆ ಮಾಹಿತಿ ತಂತ್ರಜ್ಞಾನದ ಸವಲತ್ತುಗಳನ್ನು ಬಳಸಿ ಮಾಡುವ ಅಪರಾಧಗಳ ಪಟ್ಟಿ ಬಲು ದೊಡ್ಡದಿದೆ. ಇಂತಹ ಅಪರಾಧಗಳಿಗೆ ಇಂಗ್ಲಿಷಿನಲ್ಲಿ cyber crime ಎಂಬ ಹೆಸರಿದೆ. ನಾವು ಇದಕ್ಕೆ ಕನ್ನಡದಲ್ಲಿ ಸೈಬರ್ ಅಪರಾಧ, ಜಾಲ ಅಪರಾಧ ಅಥವಾ ಜಾಲಾಪರಾಧ ಎನ್ನಬಹುದು. ಇದು ತುಂಬ ದೊಡ್ಡ ವಿಷಯ. ಇದರಲ್ಲಿ ಹಲವು ವಿಭಾಗಗಳಿವೆ. ಕೆಲವು ಜಾಲಾಪರಾಧಗಳ ಬಗ್ಗೆ ಚುಟುಕಾಗಿ ತಿಳಿದುಕೊಳ್ಳೋಣ.

ಜಾಲಾಪರಾಧಗಳಲ್ಲಿ ಪ್ರಮುಖವಾದುದು ಹಣಕಾಸಿಗೆ ಸಂಬಂಧಿಸಿದ್ದು. ಫಿಶಿಂಗ್ ಮೂಲಕ ಹೇಗೆ ಮೋಸ ಮಾಡಿ ಹಣ ದೋಚುತ್ತಾರೆ ಎಂಬುದನ್ನು ಹಿಂದಿನ ಸಂಚಿಕೆಯಲ್ಲಿ ವಿವರಿಸಲಾಗಿತ್ತು. ನೈಜೀರಿಯನ್ ಸ್ಕ್ಯಾಮ್ ಎಂಬುದು ಸ್ವಲ್ಪ ವರ್ಷಗಳ ಹಿಂದೆ ಕುಖ್ಯಾತವಾಗಿತ್ತು. ಇದನ್ನು ಇಮೈಲ್ ಮೂಲಕ ಮಾಡುತ್ತಾರೆ. “ನಾನು ನೈಜೀರಿಯದ ಪದಚ್ಯುತ ಸರ್ವಾಧಿಕಾರಿಯ ಮೊಮ್ಮಗಳು. ನನಗೆ ಹದಿನಾರು ವರ್ಷ ಪ್ರಾಯ. ನನ್ನ ಹೆಸರಿನಲ್ಲಿ ಮಿಲಿಯಗಟ್ಟಳೆ ಹಣ ಇದೆ. ಅದನ್ನು ದೇಶದ ಹೊರಗೆ ಸ್ಥಳಾಂತರಿಸಬೇಕಾಗಿದೆ. ಅಂತರಜಾಲದಲ್ಲಿ ಹುಡುಕಾಡಿದಾಗ ನೀವು ತುಂಬ ಪ್ರಾಮಾಣಿಕ  ವ್ಯಕ್ತಿ ಎಂದು ತಿಳಿದುಬಂತು. ಆದುದರಿಂದ ನಿಮ್ಮ ಸಹಾಯ ಕೇಳುತ್ತಿದ್ದೇನೆ. ಹಣವನ್ನು ವರ್ಗಾಯಯಿಸಲು ನಿಮ್ಮ ಬ್ಯಾಂಕ್ ಖಾತೆ ವಿವರ ನೀಡಿ. ಮೊದಲಿಗೆ ವರ್ಗಾವಣೆಯ ಪ್ರಕ್ರಿಯೆಗೆ ಸ್ವಲ್ಪ ಫೀಸ್ ನೀಡಬೇಕು. ನಂತರ ಆ ಹಣ ವಾಪಾಸು ಬರುತ್ತದೆ.” ಎಂಬ ಒಕ್ಕಣೆಯ ಇಮೈಲ್ ಬರುತ್ತದೆ. ಇದನ್ನು ನಂಬಿ ಕೆಲವರು ಹಣ ಕಳೆದುಕೊಂಡಿದ್ದಾರೆ.

ಕೆಲವರಿಗೆ “ನಾನು ನಿಮ್ಮ ಬ್ಯಾಂಕಿನಿಂದ ಕರೆ ಮಾಡುತ್ತಿದ್ದೇನೆ. ನಿಮ್ಮ ಆನ್‌ಲೈನ್ ಬ್ಯಾಂಕಿಂಗ್ ಖಾತೆಯನ್ನು ರಿಸೆಟ್ ಮಾಡುತ್ತಿದ್ದೇವೆ. ನಿಮ್ಮ ಫೋನಿಗೆ ಒಂದು ಓಟಿಪಿ ಬರುತ್ತದೆ. ಅದನ್ನು ನನಗೆ ಹೇಳಿ” ಎಂದು ಫೋನ್ ಬರುತ್ತದೆ. ಅವರ ಮಾತನ್ನು ನಂಬಿ ನಿಮ್ಮ ಫೋನಿಗೆ ಬಂದ ಓಟಿಪಿಯನ್ನು ಅವರಿಗೆ ಹೇಳಿದರೆ ನಿಮ್ಮ ಖಾತೆಯಿಂದ ಹಣ ಹೋಗಿರುತ್ತದೆ. ಇದೇ ರೀತಿ, “ನಾನು ಇನ್‌ಕಂಟ್ಯಾಕ್ಸ್ ವಿಭಾಗದಿಂದ ಫೊನ್ ಮಾಡುತ್ತಿದ್ದೇನೆ. ನಿಮ್ಮ ಫೋನಿಗೆ ಬಂದ ಓಟಿಪಿ ಹೇಳಿ” ಎಂದೂ ಕರೆಗಳು ಬರುತ್ತವೆ. ನೀವು ತೆಗೆದುಕೊಳ್ಳಬೇಕಾದ ಎಚ್ಚರಿಕೆಯೇನೆಂದರೆ ಯಾರೇ ಯಾವ ರೀತಿ ಕೇಳಿದರೂ ಫೋನಿಗೆ ಬಂದ ಓಟಿಪಿ ಸಂಖ್ಯೆಯನ್ನು ಯಾರಿಗೂ ಯಾವುದೇ ಕಾರಣಕ್ಕೂ ಹೇಳಬಾರದು. ಜೊತೆಗೆ ನಿಮ್ಮ ಖಾತೆಗೆ ಕಳ್ಳರು ಪ್ರವೇಶಿಸಲು ಪ್ರಯತ್ನಿಸುತ್ತಿದ್ದಾರೆ ಎಂದು ತಿಳಿದುಕೊಂಡು ಕೂಡಲೇ ನಿಮ್ಮ ಪಾಸ್‌ವರ್ಡ್ ಅನ್ನು ಬದಲಿಸಬೇಕು.    

ಅಂತರಜಾಲದ ಮೂಲಕ ಸುಲಿಗೆ ಮಾಡುವುದನ್ನು cyber extortion ಎನ್ನುತ್ತಾರೆ. ಇದನ್ನು ಸೈಬರ್ ಸುಲಿಗೆ ಅಥವಾ ಜಾಲಸುಲಿಗೆ ಎನ್ನಬಹುದು. ಇದರಲ್ಲೂ ಹಲವು ವಿಧಾನಗಳಿವೆ. ನೀವು ಒಂದು ಕಂಪೆನಿ ನಡೆಸುವವರಾಗಿದ್ದು ನಿಮ್ಮ ಕಂಪೆನಿಯ ಸರ್ವರ್‌ನಲ್ಲಿ ಅತಿ ಮುಖ್ಯ ಮಾಹಿತಿಗಳಿದ್ದಲ್ಲಿ ಅಂತರಜಾಲದ ಮೂಲಕ ಸರ್ವರ್‌ಗೆ ದಾಳಿ ಇಡುತ್ತಾರೆ. ಸರ್ವರ್ ಅನ್ನು ತಮ್ಮ ಸುಪರ್ದಿಗೆ ತೆಗೆದುಕೊಂಡು  ನಂತರ ಇಂತಿಷ್ಟು ಹಣ ನೀಡಿದರೆ ಮಾತ್ರ ಸರ್ವರ್‌ನಿಯಂತ್ರಣವನ್ನು ಅನ್ನು ವಾಪಾಸು ನೀಡುತ್ತೇವೆ ಎಂದು ಬ್ಲಾಕ್‌ಮೈಲ್ ಮಾಡುತ್ತಾರೆ. ಇಂತಹ ಸಂದರ್ಭಗಳಲ್ಲಿ ಸಾಮಾನ್ಯವಾಗಿ ಸುಲಿಗೆ ಮಾಡುವವರು ಬಿಟ್‌ಕಾಯಿನ್ ಮೂಲಕ ಹಣ ಕೇಳುತ್ತಾರೆ.

ಸರ್ವರ್‌ ಮತ್ತು ಗಣಕಜಾಲಗಳಿಗೆ ದಾಳಿ ಇಡುವುದು ಜಾಲಾಪರಾಧಗಳಲ್ಲೊಂದು ನಮೂನೆ. ಜಾಲತಾಣಗಳು ಇರುವುದು ಅಂತರಜಾಲಕ್ಕೆ ಜೋಡಿಸಲ್ಪಟ್ಟ ಯಾವುದೋ ಒಂದು ಸರ್ವರ್‌ನಲ್ಲಿ. ಈ ಸರ್ವರ್‌ಗೆ ಕಿಡಿಗೇಡಿಗಳು ದಾಳಿ ಇಡುತ್ತಾರೆ. ಇದರಲ್ಲೂ ಹಲವು ನಮೂನೆಗಳಿವೆ. ಸರ್ವರ್‌ಅನ್ನು ಸುಪರ್ದಿಗೆ ತೆಗೆದುಕೊಂಡು ಜಾಲತಾಣವನ್ನು ಕೆಡಿಸಿ ಅದರಲ್ಲಿ ತಮ್ಮದೇ ಪ್ರಚಾರವನ್ನು ಹಾಕುವುದು ಒಂದು ವಿಧ. ಇದನ್ನು ಸಾಮಾನ್ಯವಾಗಿ ಸರಕಾರಗಳ ಜಾಲತಾಣಗಳಿಗೆ ಮಾಡುತ್ತಾರೆ. ಉದಾಹರಣೆಗೆ ಭಾರತ ಸರಕಾರದ ಯಾವುದೋ ಒಂದು ಇಲಾಖೆಯ ಜಾಲತಾಣಕ್ಕೆ ಪಾಕಿಸ್ತಾನಿಗಳು ನುಗ್ಗಿ ಕೆಡಿಸುವುದು. ಇಂತಹವರಿಗೆ ಹ್ಯಾಕರ್‌ಗಳು ಎನ್ನುತ್ತಾರೆ. ಒಂದು ಸರ್ವರ್‌ಗೆ ಏಕಕಾಲದಲ್ಲಿ ಲಕ್ಷಗಟ್ಟಲೆಯಲ್ಲಿ ಭೇಟಿ ನೀಡಿದರೆ ಕೆಲವು ಸರ್ವರ್‌ಗಳು ಸುಸ್ತಾಗಿ ಪ್ರತಿಕ್ರಿಯೆ ನೀಡದೆ ಸ್ಥಬ್ಧವಾಗುತ್ತವೆ. ಇಂತಹ ದಾಳಿಯನ್ನು ಒಂದೇ ಗಣಕದಿಂದ ಮಾಡಲು ಆಗುವುದಿಲ್ಲ. ಅಥವಾ ಹಾಗೆ ಮಾಡಿದರೆ ಸರ್ವರ್‌ಗೆ ಗೊತ್ತಾಗಿ ಅದನ್ನು ಸ್ವೀಕರಿಸುವುದೂ ಇಲ್ಲ. ಅದಕ್ಕಾಗಿ ಪ್ರಪಂಚದ ಹಲವು ಗಣಕಗಳನ್ನು ತಮ್ಮ ಸುಪರ್ದಿಗೆ ತೆಗೆದುಕೊಂಡು ಎಲ್ಲ ಗಣಕಗಳಿಂದ ಸರ್ವರ್‌ಗೆ ಏಕಕಾಲದಲ್ಲಿ ದಾಳಿ ಇಡುತ್ತಾರೆ. ಈ ರೀತಿ ದಾಳಿ ಇಡುವುದಕ್ಕೆ distributed denial of service ಎನ್ನುತ್ತಾರೆ. ನಿಮ್ಮ ಗಣಕವನ್ನೂ ನಿಮಗೆ ಗೊತ್ತಿಲ್ಲದೆ ಹ್ಯಾಕರ್‌ಗಳು ಇಂತಹ ದಾಳಿಗೆ ಬಳಸಿಕೊಂಡಿರಬಹುದು!   

ಕೆಲವರಿಗೆ ವಾಟ್ಸ್‌ಆಪ್‌ನಲ್ಲಿ ಪರಿಚಯವೇ ಇಲ್ಲದವರಿಂದ ವಿಡಿಯೋ ಕರೆ ಬರುತ್ತದೆ. ಮುಗ್ಧರಾದ ಕೆಲವರು ಇಂತಹ ಕರೆಯನ್ನು ಸ್ವೀಕರಿಸುತ್ತಾರೆ. ವಿಡಿಯೋ ಕರೆಯಲ್ಲಿ ಮಾತನಾಡುವಾಗ ಸಾಮಾನ್ಯವಾಗಿ ಪರದೆ ಎರಡು ಭಾಗವಾಗಿ ಮೇಲಿನ ಭಾಗದಲ್ಲಿ ಕರೆ ಮಾಡಿದ ವ್ಯಕ್ತಿ ಮತ್ತು ಕೆಳಗಿನ ಭಾಗದಲ್ಲಿ ನಿಮ್ಮ ಮುಖ ಕಾಣಿಸುತ್ತದೆ. ಕರೆ ಮಾಡಿದ ವ್ಯಕ್ತಿ ಏನೇನೋ ಮಾತನಾಡಿ ನಂತರ ಕ್ಷಮಿಸಿ ನಾನು ಮಾತನಾಡಬೇಕಾದ ವ್ಯಕ್ತಿ ನೀವಲ್ಲ ಎಂದು ಕರೆ ಕತ್ತರಿಸಬಹುದು. ಇನ್ನೂ ಕೆಲವು ಸಂದರ್ಭಗಳಲ್ಲಿ ಗಂಡಸರಿಗೆ ಯಾವುದೋ ಹೆಣ್ಣು ಕರೆ ಮಾಡಿ ರಮ್ಯವಾಗಿ ಮಾತನಾಡಿ ಗಾಳ ಹಾಕುವುದೂ ಇದೆ. ಇವರೂ ರಮ್ಯವಾಗಿ ಮಾತನಾಡಿದರೆ ಮುಗಿಯಿತು. ಅವರು ಕರೆಯ ವಿಡಿಯೋ ರೆಕಾರ್ಡ್ ಮಾಡಿಟ್ಟುಕೊಂಡಿರುತ್ತಾರೆ. ನಂತರ ಆ ವಿಡಿಯೋವನ್ನು ಎಡಿಟ್ ಮಾಡಿ ನಿಮ್ಮ ಮುಖಕ್ಕೆ ಬೇರೆ ಯಾವುದೂ ನಗ್ನ ದೇಹವನ್ನು ಜೋಡಿಸಿ ವಿಡಿಯೋ ತಯಾರಿಸಿ ಅದನ್ನು ನಿಮಗೆ ಕಳುಹಿಸಿ ಬ್ಲಾಕ್‌ಮೈಲ್ ಮಾಡಿ ಹಣ ಕೇಳುತ್ತಾರೆ. ಮರ್ಯಾದೆಗೆ ಅಂಜಿ ಹಣ ನೀಡಿ ಮೋಸಹೋದವರು ತುಂಬ ಮಂದಿ ಇದ್ದಾರೆ. ಇಂತಹವುಗಳಿಂದ ಮೋಸಹೋಗದಿರಲು ಸುಲಭ ಮಾರ್ಗವೆಂದರೆ ಪರಿಚಯವಿಲ್ಲದವರಿಂದ ವಿಡಿಯೋ ಕರೆ ಬಂದರೆ ಸ್ವೀಕರಿಸಬಾರದು.

ಜಾಲಾಪರಾಧಗಳಲ್ಲಿ ಇನ್ನೂ ಹಲವು ನಮೂನೆಗಳಿವೆ.

–ಡಾ| ಯು.ಬಿ. ಪವನಜ

gadgetloka @ gmail . com

The post ಜಾಲಾಪರಾಧ first appeared on Vishva Kannada.