ತುಂಬ ದುಬಾರಿಯೂ ಅಲ್ಲದ, ಅತಿ ಅಗ್ಗದ್ದೂ ಅಲ್ಲದ ಒಂದು ಮಧ್ಯಮ ಬೆಲೆಯ ಟ್ಯಾಬ್ಲೆಟ್ HCL ME X1. ಅದರ ಗುಣಾವಗುಣಗಳನ್ನು ಸ್ವಲ್ಪ ನೋಡೋಣ.

ಅತ್ತ ಲ್ಯಾಪ್‌ಟಾಪೂ ಅಲ್ಲದ, ಇತ್ತ ದೊಡ್ಡ ಫೋನ್ ಎಂದೂ ಅನಿಸಿಕೊಳ್ಳಲಾರದ ಮಧ್ಯಮ ದರ್ಜೆಯ ಗ್ಯಾಜೆಟ್‌ಗಳೆ ಈ ಟ್ಯಾಬ್ಲೆಟ್‌ಗಳು. ಇವುಗಳನ್ನು ಬಳಸಿ ಅಂತರಜಾಲ ವೀಕ್ಷಣೆ, ಇಮೈಲ್, ಸಂಗೀತ ಆಲಿಸುವುದು, ವೀಡಿಯೋ ವೀಕ್ಷಣೆ, ಕಡತಗಳ ವೀಕ್ಷಣೆ ಹಾಗೂ ಚಿಕ್ಕಪುಟ್ಟ ಸಂಪಾದನೆ -ಎಲ್ಲ ಮಾಡಬಹುದು. ಆದರೆ ಇವು ಪೂರ್ಣಪ್ರಮಾಣದ ಗಣಕ ಅಥವಾ ಲ್ಯಾಪ್‌ಟಾಪ್‌ಗಳ ಕೆಲಸವನ್ನು ಮಾಡಲಾರವು. ಬಹುಪಾಲು ಮಂದಿ ಈಗಾಗಲೇ ಒಂದು ಗಣಕ ಇರುವವರೇ ಈ ಟ್ಯಾಬ್ಲೆಟ್ ಕೊಳ್ಳುತ್ತಾರೆ. ಬಿಸಿನೆಸ್ ಮೀಟಿಂಗ್‌ಗಳಲ್ಲಿ ಎರಡು ಮೂರು ವ್ಯಕ್ತಿಗಳಿಗೆ ಪ್ರಸೆಂಟೇಶನ್ ಕೊಡಬೇಕಿದ್ದಲ್ಲಿ ಇವು ಸೂಕ್ತ. ತೆಳ್ಳಗಾಗಿದ್ದು, ತೆಗೆದುಕೊಂಡು ಹೋಗಲು ಸುಲಭವಾಗಿದ್ದು ಇಂತಹ ಕೆಲಸಕ್ಕೆಂದೇ ಹೇಳಿ ಮಾಡಿಸಿದಂತಿವೆ. ಮನೆಮನೆಗಳಿಗೆ, ಅಂಗಡಿಗಳಿಗೆ, ಮಾಹಿತಿ ಸಂಗ್ರಹಕ್ಕೆ ಹೋದುವವರಿಗೂ ಇದು ತುಂಬ ಉಪಯುಕ್ತ. ಪಿಗ್ಮಿ ಸಂಗ್ರಹ ಮಾಡುವ ಏಜೆಂಟರಿಗಂತೂ ಇದು ಹೇಳಿ ಮಾಡಿಸಿದಂತಿದೆ. ದುರದೃಷ್ಟಕ್ಕೆ ಅವರಿಗಾಗಿ ಇನ್ನೂ ಯಾರೂ ಅಗತ್ಯ ತಂತ್ರಾಂಶ ತಯಾರಿಸಿಲ್ಲ.

ಈ ಟ್ಯಾಬ್ಲೆಟ್‌ಗಳಲ್ಲಿ ಪ್ರಮುಖವಾಗಿ ಮೂರು ಮಾದರಿ ಅಥವಾ ಕಾರ್ಯಾಚರಣ ವ್ಯವಸ್ಥೆಯನ್ನು (operating system) ಬಳಸುವವಿವೆ. ಅವು ಆಪಲ್ ಕಂಪೆನಿಯ ಐಪ್ಯಾಡ್ (ಐಓಎಸ್), ಆಂಡ್ರೋಯಿಡ್ ಮತ್ತು ಮೈಕ್ರೋಸಾಫ್ಟ್ ವಿಂಡೋಸ್ ಬಳಸುವವು. ಇವುಗಳಲ್ಲಿ ವಿಂಡೋಸ್ ಟ್ಯಾಬ್ಲೆಟ್‌ಗಳು ಇನ್ನೂ ಶೈಶವಾವಸ್ಥೆಯಲ್ಲಿವೆ. ಮಾರುಕಟ್ಟೆಯಲ್ಲಿ ಮೊದಲನೆಯ ಸ್ಥಾನದಲ್ಲಿ (ಜಾಗತಿಕವಾಗಿ) ಆಪಲ್ ಕಂಪೆನಿಯ ಐಪ್ಯಾಡ್ ಇದೆ. ಆಂಡ್ರೋಯಿಡ್ ಬಳಸುವ ಟ್ಯಾಬ್ಲೆಟ್ ತಯಾರಿಸುವ ಕಂಪೆನಿಗಳು ಹಲವಾರಿವೆ. ಆಂಡ್ರೋಯಿಡ್ ಟ್ಯಾಬ್ಲೆಟ್‌ಗಳು ದುಬಾರಿ ಎನಿಸುವ ಬೆಲೆಯಿಂದ ಹಿಡಿದು ಕೈಗೆಟುಕಬಹುದಾದ ಅಥವಾ ಅಗ್ಗ ಅನಿಸಿಕೊಳ್ಳಬಹುದಾದ ಬೆಲೆಯಲ್ಲೂ ಲಭ್ಯ. ಈ ಸಲ ಅಂತಹ ಒಂದು ಟ್ಯಾಬ್ಲೆಟ್ ಕಡೆ ಗಮನ ಹರಿಸೋಣ.

ಎಚ್‌ಸಿಎಲ್ ಕಂಪೆನಿಯು ತಯಾರಿಸಿದ ಈ HCL ME X1 ಟ್ಯಾಬ್ಲೆಟ್ ಆಂಡ್ರೋಯಿಡ್ ಕಾರ್ಯಾಚರಣ ವ್ಯವಸ್ಥೆ ಆವೃತ್ತಿ 2.3.3 ಅನ್ನು ಒಳಗೊಂಡಿದೆ. 1 ಗಿಗಾಹರ್ಟ್ಸ್ ಪ್ರೋಸೆಸರ್ ಇದೆ. 512 ಮೆಗಾಬೈಟ್ ಪ್ರಾಥಮಿಕ ಮತ್ತು 4 ಗಿಗಾಬೈಟ್ ಹೆಚ್ಚುವರಿ ಮೆಮೊರಿ ಇದೆ. ಇದರ ಜೊತೆ 32 ಗಿಗಾಬೈಟ್ ತನಕ ಎಸ್‌ಡಿ ಕಾರ್ಡ್ ಮೂಲಕ ಮೆಮೊರಿ ಸೇರಿಸಿಕೊಳ್ಳಬಹುದು. ಯುಎಸ್‌ಬಿ ಪೋರ್ಟ್ ಇದೆ. ಅದಕ್ಕೆ ಯುಎಸ್‌ಬಿ ಡ್ರೈವ್ ಸೇರಿಸಿ ಅದರಿಂದ ಫೈಲುಗಳನ್ನು ಬಳಸಿಕೊಳ್ಳಬಹುದು. ಅಂದರೆ 1 ಗಿಗಾಬೈಟ್ ಗಾತ್ರದ ಸಿನಿಮಾ ನೋಡಬೇಕಿದ್ದರೆ ಅದನ್ನು ಟ್ಯಾಬ್ಲೆಟ್‌ಗೆ ವರ್ಗಾಯಿಸಿಕೊಳ್ಳಬೇಕಾಗಿಲ್ಲ. ಯುಎಸ್‌ಬಿ ಡ್ರೈವಿನಲ್ಲಿ ಇಟ್ಟುಕೊಂಟು ಅದನ್ನು ಜೋಡಿಸಿ ಅಲ್ಲಿಂದಲೇ ನೋಡಬಹುದು. ಟ್ಯಾಬ್ಲೆಟ್‌ನಲ್ಲಿರುವ ಯಾವುದೋ ಒಂದು ಫೈಲನ್ನು ನಿಮ್ಮ ಗೆಳೆಯರಿಗೆ ಮಾರ್ಗದ ಬದಿಯಲ್ಲಿ ನಿಂತುಕೊಂಡು ಯುಎಸ್‌ಬಿ ಕಿಂಡಿ ಮೂಲಕ ಪ್ರತಿ ಮಾಡಿಕೊಡಬಹುದು.

7 ಇಂಚು ಗಾತ್ರದ, 800×480 ಪಿಕ್ಸೆಲ್ ರೆಸೊಲೂಶನ್ ಇರುವ ಕೆಪಾಸಿಟಿವ್ ಸ್ಪರ್ಶಪರದೆ (touchscreen) ಇದೆ. ಪರದೆಯ ಗುಣಮಟ್ಟ ಅಷ್ಟಕ್ಕಷ್ಟೆ. ಸುಕೋಮಲವಾಗಿ ಅಂದರೆ ಮೆತ್ತಗೆ ಒತ್ತಿದರೆ ಇದು ಕೆಲಸ ಮಾಡುವುದಿಲ್ಲ. ಸ್ವಲ್ಪ ಶಕ್ತಿಹಾಕಿ ಒತ್ತಬೇಕು. ಸಿನಿಮಾ ನೊಡಲು ಅಡ್ಡಿಯಿಲ್ಲ. ಆದರೆ ಆಪಲ್ ಐಪ್ಯಾಡ್‌ನ ಗುಣಮಟ್ಟದ ಪರದೆ ಇದರಲ್ಲಿಲ್ಲ. 10 ಸಾವಿರ ರೂ.ಗೆ ಇನ್ನೆಷ್ಟು ಸಿಗಬಹುದು? ಐಪ್ಯಾಡ್‌ಗೆ ಕನಿಷ್ಠ 24,500 ರೂ. ಬೆಲೆ ಇದೆ.

2 ಮೆಗಾಪಿಕ್ಸೆಲ್‌ನ ಫ್ರಂಟ್ ಕ್ಯಾಮರಾ ಇದೆ. ಆದರೆ ಮುಂದುಗಡೆ ಇನ್ನೊಂದು ಕ್ಯಾಮರ ಇಲ್ಲ. ಇದಕ್ಕೆ ಅಂತರಜಾಲ ಸಂಪರ್ಕಕ್ಕೆ ವೈಫೈ ಮಾತ್ರ ಇದೆ. 3ಜಿ ಇಲ್ಲ. ಆದುದರಿಂದ ಕ್ಯಾಮರಾವನ್ನು ವಸ್ತುಗಳ ಚಿತ್ರ ತೆಗೆಯುವಂತೆ ಅಳವಡಿಸುವ ಬದಲು ನಮ್ಮ ಮುಖ ಕಾಣುವಂತೆ ಅಳವಡಿಸಿದ್ದು ಯಾಕೋ ಸರಿಯಿಲ್ಲ. ಬಹುಶಃ ವೀಡಿಯೋ  ಚಾಟ್ ಮಾಡುವುದಕ್ಕೆ ಅನುವಾಗಲಿ ಎಂದು ಇರಬಹುದು. ಆದರೆ 3ಜಿ ಇಲ್ಲದಿರುವುದರಿಂದ ಕೇವಲ ಅಂತರಜಾಲ ಮೂಲಕ ಮಾತ್ರ ಚಾಟ್ ಮಾಡಬಹುದಷ್ಟೆ. ಯುಎಸ್‌ಬಿ ಕಿಂಡಿಗೆ ನಿಮ್ಮ ಮಾಮೂಲಿ ಯುಎಸ್‌ಬಿ ಡಾಂಗಲ್ (3ಜಿ ಮೋಡೆಮ್) ಜೋಡಿಸಿ ಅಂತರಜಾಲ ಸಂಪರ್ಕ ಸಾಧ್ಯ. ಇದು ಉತ್ತಮ ಸೌಕರ್ಯ. ಹೈಡೆಫಿನಿಶನ್ ವೀಡಿಯೋ ಸೌಲಭ್ಯ ಇದೆ. HDMI ಪೋರ್ಟ್ ಕೂಡ ಇದೆ. ಅಂದರೆ ಇದನ್ನು ಆದುನಿಕ ಟಿವಿಗೆ ಜೋಡಿಸಿ ಸಿನಿಮಾ ನೋಡಬಹುದು. ಗುರುತ್ವಾಕರ್ಷಣೆಯನ್ನು ಗುರುತಿಸಿ ಟ್ಯಾಬ್ಲೆಟ್ ಎತ್ತಕಡೆಗೆ ನೋಡುತ್ತಿದೆ ಎಂದು ಅರಿತು ಅದರಂತೆ ಪರದೆಯನ್ನು ತಿರುಗಿಸುತ್ತದೆ. 3500mAH ಬ್ಯಾಟರಿ ಇದೆ. ಪೂರ್ತಿ ಚಾರ್ಜ್ ಮಾಡಿದ ನಂತರ ಸುಮಾರು ಒಂದು ದಿನ ಕೆಲಸ ಮಾಡಬಹುದು.

ಎಚ್‌ಸಿಎಲ್ ಕಂಪೆನಿ ತನ್ನದೇ ಆದ ಆಪ್ (ಮೊಬೈಲ್ ತಂತ್ರಾಂಶ) ಸ್ಟೋರ್ ಇಟ್ಟುಕೊಂಡಿದೆ. ಅದೇನೋ ಒಳ್ಳೆಯದೇ ಇರಬಹುದು. ಆದರೆ ಗೂಗಲ್ ಪ್ಲೇ (ಮಾರುಕಟ್ಟೆ) ಸೌಲಭ್ಯವನ್ನು ತೆಗೆದುಹಾಕಿದ್ದು ಸರಿಯಿಲ್ಲ. ಎಚ್‌ಸಿಎಲ್‌ನವರ ಮಾರುಕಟ್ಟೆಯಲ್ಲಿ ಸೀಮಿತ ತಂತ್ರಾಂಶಗಳು ಲಭ್ಯ. ಅದಕ್ಕೆ ಇದುತನಕ ನನಗೆ ಲಾಗಿನ್ ಆಗಲು ಸಾಧ್ಯವಾಗಿಲ್ಲ. ಅವರ ಜಾಲತಾಣವು ಟ್ಯಾಬ್ಲೆಟ್‌ನ ಹಿಂಬದಿಯಲ್ಲಿ ನೀಡಿರುವ ಕ್ರಮಸಂಖ್ಯೆಯನ್ನು ಒಪ್ಪಿಕೊಳ್ಳುತ್ತಿಲ್ಲ. ನಾನಂತೂ ಗೂಗ್ಲ್ ಪ್ಲೇಯ ಆಪ್ (app -.apk file) ಅನ್ನು ಅಂತರಜಾಲದಲ್ಲಿ ಹುಡುಕಿ ಅದನ್ನು ಗಣಕದಲ್ಲಿ ಡೌನ್‌ಲೋಡ್ ಮಾಡಿಕೊಂಡು ನಂತರ ಅದನ್ನು ನನಗೇ ಇಮೈಲ್ ಮಾಡಿಕೊಂಡೆ. ನಂತರ ಟ್ಯಾಬ್ಲೆಟ್‌ನಲ್ಲಿ ಆ ಫೈಲನ್ನು ಇಮೈಲ್ ಮೂಲಕ ಡೌನ್‌ಲೋಡ್ ಮಾಡಿಕೊಂಡು ಅದನ್ನು ಇನ್‌ಸ್ಟಾಲ್ ಮಾಡಿಕೊಂಡೆ. ಈಗ ನನ್ನ ಟ್ಯಾಬ್ಲೆಟ್‌ನಲ್ಲಿ ಗೂಗ್ಲ್ ಮಾರುಕಟ್ಟೆ ಲಭ್ಯ!

ಒಟ್ಟಿನಲ್ಲಿ ಹೇಳುವುದಾದರೆ ಇದನ್ನು ಒಂದು ರಾಜಿಸೂತ್ರದ ಗ್ಯಾಜೆಟ್ ಎನ್ನಬಹುದು. ಈಗ ಬಂದ ಸುದ್ದಿಯಂತೆ ಎಚ್‌ಸಿಎಲ್‌ನವರು ಇನ್ನೂ ಎರಡು ಮಾದರಿಗಳನ್ನು ಇದಕ್ಕಿಂತ ಒಂದೆರಡು ಸಾವಿರ ರೂ. ಕಡಿಮೆ ಬೆಲೆಗೆ ಮಾರುಕಟ್ಟೆಗೆ ಬಿಡುವವರಿದ್ದಾರೆ. ಅವು ಇದಕ್ಕಿಂತ ಚೆನ್ನಾಗಿರಬಹುದೇನೋ? ಅಥವಾ ಮೈಕ್ರೋಮ್ಯಾಕ್ಸ್‌ನವರು ಘೋಷಿಸಿರುವ 6,500 ರೂ ಬೆಲೆಯ ಟ್ಯಾಬ್ಲೆಟ್ ಇದಕ್ಕಿಂತ ಉತ್ತಮ ಖರೀದಿ ಆಗಬಹುದೇನೋ? ಬಳಸಿಯೇ ನೋಡಬೇಕು.

ಎಚ್‌ಸಿಎಲ್ ಮಿ ಟ್ಯಾಬ್ಲೆಟ್‌ನ ಜಾಲತಾಣ www.hclmetablet.com.

ಗ್ಯಾಜೆಟ್ ಸಲಹೆ

ರಾಜಶೇಖರ ಗುರಡ್ಡಿಯವರ ಪ್ರಶ್ನೆ: ನಿಮ್ಮ ಗ್ಯಾಜೆಟ್‌ಲೋಕ ಅಂಕಣದ ಹಳೆಯ ಸಂಚಿಕೆಗಳು ಎಲ್ಲಿ ಸಿಗುತ್ತವೆ?

ಉ: vishvakannada.com/gadgetloka ಜಾಲತಾಣದಲ್ಲಿ.

ಸುಮ್ಮನೆ ನೋಡುವುದು ಮತ್ತು ಕ್ಲಿಕ್ ಮಾಡುವುದು -ಇಂತಹ ಕ್ಯಾಮರಾಗಳಿಗೆ ಏಮ್ ಆಂಡ್ ಶೂಟ್ ಕ್ಯಾಮರ ಎನ್ನುತ್ತಾರೆ. ಅಂತಹ ಕ್ಯಾಮರಗಳನ್ನೆ ಬಹುಪಾಲು ಜನರು ಕೊಳ್ಳುವುದು. ಇಂತಹ ಕ್ಯಾಮರ ಕೊಳ್ಳುವುದಕ್ಕೊಂದು ಕಿರು ಕೈಪಿಡಿ ನೀಡಲು ಸಣ್ಣ ಪ್ರಯತ್ನ.

ಏಮ್ ಆಂಡ್ ಶೂಟ್ ಕ್ಯಾಮರಾಗಳಲ್ಲಿ ಹೆಸರೇ ಸೂಚಿಸುವಂತೆ ಇವುಗಳಲ್ಲಿ ಹೆಚ್ಚು ಆಯ್ಕೆಗಳಿಲ್ಲ. ಸುಮ್ಮನೆ ಕ್ಯಾಮರಾ ಮೂಲಕ ನೋಡುವುದು ಮತ್ತು ಕ್ಲಿಕ್ ಮಾಡುವುದು, ಅಷ್ಟೆ. ಅತಿಯಾದ ಹಾಗೂ ಕ್ಲಿಷ್ಟವಾದ ಆಯ್ಕೆಗಳಿಲ್ಲ. ಇವುಗಳ ಬಗ್ಗೆ ಪ್ರಾಥಮಿಕ ಜ್ಞಾನಕ್ಕೆ ಜನವರಿ ೧೯, ೨೦೧೨ರ ಗ್ಯಾಜೆಟ್‌ಲೋಕ ಓದಿ (bit.ly/gadgetloka3). ಜನಸಾಮಾನ್ಯರು ಕೊಳ್ಳುವುದು ಇಂತಹ ಕ್ಯಾಮರಗಳನ್ನೇ. ಅವುಗಳನ್ನು ಕೊಳ್ಳುವಾಗ ಯಾವ್ಯಾವುದರ ಬಗ್ಗೆ ಗಮನ ನೀಡಬೇಕು ಎಂದು ಈ ಕಿರು ಲೇಖನದಲ್ಲಿ ವಿವರಿಸಲು ಪ್ರಯತ್ನಿಸಿದ್ದೇನೆ.

ಏಮ್ ಆಂಡ್ ಶೂಟ್ ಕ್ಯಾಮರಾಗಳಲ್ಲಿ ಮೂರು ವಿಧ. ತುಂಬ ಸರಳವಾದ ಯಾವುದೇ ಆಯ್ಕೆಗಳಿಲ್ಲದ ಕ್ಯಾಮರ (ಪಾಯಿಂಟ್ ಆಂಡ್ ಶೂಟ್), ಸಂಪೂರ್ಣ ಸ್ವಯಂಚಾಲಿತ (ಆಟೋ) ಜೊತೆ ಕೆಲವು ಮ್ಯಾನ್ಯುವಲ್ ಆಯ್ಕೆಗಳು ಇರುವಂತದ್ದು ಮತ್ತು ಮೆಗಾಝೂಮ್ ಕ್ಯಾಮರಾಗಳು.

ಪಾಯಿಂಟ್ ಆಂಡ್ ಶೂಟ್ ಕ್ಯಾಮರಾಗಳಲ್ಲಿ ನಮಗೆ ಯಾವುದೇ ಆಯ್ಕೆಗಳಿರುವುದಿಲ್ಲ. ಕೆಲವು ಸೀನರಿ, ವ್ಯಕ್ತಿ, ಹೂವು, ರಾತ್ರಿ, ಹಗಲು, ಇತ್ಯಾದಿ ಕೆಲವು ಆಯ್ಕೆಗಳಿರುವ ಸಾಧ್ಯತೆಗಳಿರುತ್ತವೆ. ಇವುಗಳ ಸಂವೇದಕ (ಸೆನ್ಸರ್) ತುಂಬ ಚಿಕ್ಕದಾಗಿರುವುದರಿಂದ ಅವುಗಳ ಬೆಳಕು ಸಂಗ್ರಹಿಸುವ ಶಕ್ತಿ ಅತಿ ಕಡಿಮೆಯಾಗಿರುತ್ತದೆ. ಕೆಲವು ವಿಷಯಗಳಲ್ಲಿ ಈ ಕ್ಯಾಮರಾಗಳು ಶಕ್ತಿಶಾಲಿಯಾದ ಕ್ಯಾಮರ ಹೊಂದಿರುವ ಮೊಬೈಲ್ ಫೋನ್‌ಗಳಷ್ಟೆ ಅಥವಾ ಇನ್ನೂ ಕಡಿಮೆ ಶಕ್ತಿಶಾಲಿಯಾಗಿರುತ್ತವೆ. ಇವುಗಳಲ್ಲಿರುವ ಐಎಸ್‌ಒ ಆಯ್ಕೆಗಳೂ ಸಾಮಾನ್ಯವಾಗಿ ಆಟೋ ಆಗಿರುತ್ತವೆ. ಆದುದರಿಂದ ಕಡಿಮೆ ಬೆಳಕಿನಲ್ಲಿ ಇವು ಉತ್ತಮ ಚಿತ್ರ ನೀಡುವ ಸಾಧ್ಯತೆಗಳು ಕಡಿಮೆಯೇ. ಸಾಧಕಗಳು: ಬಹಳ ತೆಳ್ಳಗಾಗಿರುತ್ತವೆ, ಕಿಸೆಯಲ್ಲಿ ಇಟ್ಟುಕೊಳ್ಳಬಹುದು, ಯಾವುದೇ ಆಯ್ಕೆಗಳನ್ನು ಮಾಡಿಕೊಳ್ಳಬೇಕಾದ ತಲೆನೋವು ಇಲ್ಲ. ಬಾಧಕಗಳು: ಯಾವುದೇ ಮ್ಯಾನ್ಯುವಲ್ ಆಯ್ಕೆಗಳಿಲ್ಲ, ಅತ್ಯುತ್ತಮ ಗುಣಮಟ್ಟದ ಚಿತ್ರ ಸಿಗುವುದಿಲ್ಲ ಅದರಲ್ಲೂ ಮುಖ್ಯವಾಗಿ ಕಡಿಮೆ ಬೆಳಕಿನಲ್ಲಿ ದೊರೆಯುವ ಚಿತ್ರಗಳ ಗುಣಮಟ್ಟ ಚೆನ್ನಾಗಿರುವುದಿಲ್ಲ.

ಸುಧಾರಿತ ಏಮ್ ಆಂಡ್ ಶೂಟ್ ಕ್ಯಾಮರಾಗಳಲ್ಲಿ ಪಾಯಿಂಟ್ ಆಂಡ್ ಶೂಟ್ ಕ್ಯಾಮರಾಗಳಲ್ಲಿರುವ ಎಲ್ಲ ಆಯ್ಕೆಗಳ ಜೊತೆ ಮ್ಯಾನ್ಯುವಲ್ ಆಯ್ಕೆಗಳೂ ಇರುತ್ತವೆ. ಜೊತೆ ಇವುಗಳ ಸಂವೇದಕ ಸ್ವಲ್ಪ ದೊಡ್ಡದಾಗಿರುತ್ತದೆ. ಆದುದರಿಂದ ಇವುಗಳ ಬೆಳಕು ಸಂಗ್ರಹಿಸುವ ಶಕ್ತಿ ಜಾಸ್ತಿ. ಇದರ ಪರಿಣಾಮವಾಗಿ ಕಡಿಮೆ ಬೆಳಕಿನಲ್ಲೂ ಉತ್ತಮ ಚಿತ್ರ ಪಡೆಯಬಹುದು. ಇವುಗಳಲ್ಲಿ ನಾವು ನಮಗೆ ಬೇಕಾದ ಐಎಸ್‌ಒ ಆಯ್ಕೆ ಮಾಡಿಕೊಳ್ಳಬಹುದು. ಝೂಮ್ ಲೆನ್ಸ್ ಇರುತ್ತದೆ. ಸಾಮಾನ್ಯವಾಗಿ ಈ ಝೂಮ್ ಲೆನ್ಸ್‌ಗಳ ಶಕ್ತಿಯನ್ನು 3x, 6x, 10x, ಇತ್ಯಾದಿಯಾಗಿ ನಮೂದಿಸಿರುತ್ತಾರೆ. ಈ ಸಂಖ್ಯೆ ಜಾಸ್ತಿಯಿದ್ದಷ್ಟು ವಸ್ತುಗಳನ್ನು ದೊದ್ಡದು ಮಾಡಿ ಫೋಟೋ ತೆಗೆಯುವ ಸಾಮರ್ಥ್ಯ ಲೆನ್ಸ್‌ಗೆ ಜಾಸ್ತಿಯಿದೆ ಎಂದು ತಿಳಿದುಕೊಳ್ಳಬಹುದು. ಸಾಧಕಗಳು: ಉತ್ತಮ ಗುಣಮಟ್ಟದ  ಫೋಟೋ ಪಡೆಯಬಹುದು, ಮ್ಯಾನ್ಯುವಲ್ ಆಯ್ಕೆಗಳು, ಎಸ್‌ಎಲ್‌ಆರ್ ಕ್ಷೇತ್ರಕ್ಕೆ ಕಾಲಿಡುವ ಮುನ್ನ ಬಳಸಬಹುದಾದುದು. ಬಾಧಕಗಳು: ತುಸು ಜಾಸ್ತಿ ಬೆಲೆ, ಗಾತ್ರದಲ್ಲಿ ದೊಡ್ಡದಾಗಿದ್ದು ಕಿಸೆಯಲ್ಲಿಟ್ಟುಕೊಳ್ಳಲು ಅಸಾಧ್ಯ.

ಮೆಗಾಝೂಮ್ ಕ್ಯಾಮರಾಗಳು ಅತಿಹೆಚ್ಚಿನ ಝೂಮ್ ಸೌಲಭ್ಯ ನೀಡುತ್ತವೆ. ಸಾಮಾನ್ಯವಾಗಿ ಇವು 20x, 30x, ಇತ್ಯಾದಿ ಆಗಿರುತ್ತವೆ. ಇವುಗಳ ಝೂಮ್ ಶಕ್ತಿ ಎಷ್ಟು ಹೆಚ್ಚಿರುತ್ತದೆಯೆಂದರೆ ಚಂದ್ರನ ಫೋಟೋ ಬೇಕಿದ್ದರೂ ತೆಗೆಯಬಹುದು. ಆದರೆ ಇವುಗಳ ಗಾತ್ರ ಅತಿ ದೊಡ್ಡದಾಗಿರುತ್ತವೆ. ಹೆಸರಿಗೆ ಇವು ಎಸ್‌ಎಲ್‌ಆರ್ ಕ್ಯಾಮರ ಅಲ್ಲ, ಅಷ್ಟೆ. ಆದರೆ ಗಾತ್ರ ಮತ್ತು ಶಕ್ತಿಯಲ್ಲಿ ಇವು ಎಸ್‌ಎಲ್‌ಆರ್‌ಗಳಿಗೆ ಅತಿ ಸಮೀಪವಾಗಿರುತ್ತವೆ. ಇವುಗಳಲ್ಲಿ ಎಸ್‌ಎಲ್‌ಆರ್ ಕ್ಯಾಮರಾಗಳಂತೆ ಲೆನ್ಸ್ ಬದಲಾಯಿಸಲು ಆಗುವುದಿಲ್ಲ. ಝೂಮ್‌ನ ತುದಿಗಳಲ್ಲಿ ಫೋಟೋ ತೆಗೆದರೆ ಮೂಲೆಗಳಲ್ಲಿ ಸ್ವಲ್ಪ ವ್ಯತ್ಯಯ ಕಂಡುಬರುವ ದೋಷ ಸಾಮಾನ್ಯ. ಇವುಗಳಲ್ಲೂ ಮ್ಯಾನ್ಯುವಲ್ ಆಗಿ ಷಟರ್ ವೇಗ, ಅಪೆರ್ಚರ್ ಆಯ್ಕೆ ಮಾಡಿಕೊಳ್ಳುವ ಸೌಲಭ್ಯಗಳು ಇರುತ್ತವೆ. ಸಾಧಕಗಳು: ಎಸ್‌ಎಲ್‌ಆರ್ ಕ್ಯಾಮರಾಗಳಿಗೆ ಅತಿ ಸಮೀಪದ ಗುಣಮಟ್ಟ ಮತ್ತು ಸೌಲಭ್ಯಗಳು, ಅತಿ ವಿಶಾಲವಾದ ಝೂಮ್, ಉತ್ತಮ ಗುಣಮಟ್ಟದ ಲೆನ್ಸ್, ದೊಡ್ಡ ಸಂವೇದಕ. ಬಾಧಕಗಳು: ದೊಡ್ಡ ಗಾತ್ರ, ಎಸ್‌ಎಲ್‌ಆರ್ ಕ್ಯಾಮರದಷ್ಟೆ ಅಥವಾ ಇನ್ನೂ ಹೆಚ್ಚು ಬೆಲೆ.

ಕ್ಯಾಮರ ಕೊಳ್ಳುವಾಗ ನೋಡಬೇಕಾದ ವಿಷಯಗಳೇನು? ಮೊದಲನೆಯದಾಗಿ ನಿಮ್ಮ ಬಜೆಟ್ ಎಷ್ಟು ಮತ್ತು ನಿಮಗೆ ಏನೇನು ಸೌಲಭ್ಯಗಳು ಬೇಕು ಎಂಬುದರ ಕಡೆಗೆ ಗಮನ ನೀಡಿ. ಮಾರುಕಟ್ಟೆಯಲ್ಲಿ ಸಾವಿರಾರು ಕ್ಯಾಮರಾಗಳಿವೆ. ಪ್ರತಿಯೊಂದಕ್ಕೂ ತನ್ನದೇ ವೈಶಿಷ್ಟ್ಯ ಇರುತ್ತದೆ. ಕೆಲವು ಕ್ಯಾಮರಾಗಳು ನೀಡುವ ಸವಲತ್ತು ನಿಮಗೆ ಬೇಕಿಲ್ಲದಿರಬಹುದು. ಉದಾಹರಣೆಗೆ ಕೆಲವು ಸ್ಥಿರ ಕ್ಯಾಮರಾಗಳು ವೀಡಿಯೋ ಕೂಡ ಚಿತ್ರೀಕರಿಸುವ ಸವಲತ್ತು ನೀಡುತ್ತವೆ. ನನ್ನ ಪ್ರಕಾರ ಅತ್ಯುತ್ತಮ ವೀಡಿಯೋ ಬೇಕಿದ್ದಲ್ಲಿ ಪ್ರತ್ಯೇಕ ವೀಡಿಯೋ ಕ್ಯಾಮರ ಕೊಂಡುಕೊಳ್ಳುವುದೇ ಲೇಸು. ಕೆಲವು ಗುಣವೈಶಿಷ್ಟ್ಯಗಳು ಮತ್ತು ಅವುಗಳಲ್ಲಿ ನಮಗೆ ಬೇಕಾದುದನ್ನು ಆಯ್ಕೆಮಾಡಿಕೊಳ್ಳುವ ಬಗೆ ಹೇಗೆ ಎಂದು ನೋಡೋಣ.

ಮೊದಲನೆಯದಾಗಿ ಕ್ಯಾಮರಾದ ಲೆನ್ಸ್. ಇವು ಉತ್ತಮ ಗುಣಮಟ್ಟದ್ದಾಗಿರಬೇಕು. ಎಸ್‌ಎಲ್‌ಆರ್ ಕ್ಯಾಮರಗಳಲ್ಲಿ ಲೆನ್ಸ್‌ನ ಸಂಪೂರ್ಣ ಜಾತಕ ದೊರೆಯುತ್ತದೆ. ಏಮ್ ಆಂಡ್ ಶೂಟ್ ಕ್ಯಾಮರಾಗಳಲ್ಲೂ ಕೆಲವು ಕಂಪೆನಿಗಳು ಕೆಲವು ಕನಿಷ್ಟ ಗುಣವೈಶಿಷ್ಟ್ಯಗಳನ್ನು ನೀಡುತ್ತಾರೆ. ಲೆನ್ಸ್‌ನ F ಸಂಖ್ಯೆ ಚಿಕ್ಕದಿದ್ದಷ್ಟು ಹೆಚ್ಚು ಬೆಳಕನ್ನು ಗ್ರಹಿಸುವ ಶಕ್ತಿ ಇದೆ ಎಂದು ತಿಳಿಯಬೇಕು. ಉದಾಹರಣೆಗೆ F/1.8 ಲೆನ್ಸ್ F/5.6 ಲೆನ್ಸ್‌ಗಿಂತ ಒಳ್ಳೆಯದು. ಎಲ್ಲ ಕ್ಯಾಮರಾಗಳಲ್ಲಿ ಝೂಮ್ ಲೆನ್ಸ್ ಇರುವುದರಿಂದ ಈ ಸಂಖ್ಯೆ ಒಂದು ಶ್ರೇಣಿಯನ್ನು ಸೂಚಿಸುತ್ತದೆ. ಅಂತೆಯೇ ಲೆನ್ಸ್ ಮೇಲೆ 1:4 – 1:5.6 ಎಂದು ಬರೆದಿರುವ ಲೆನ್ಸ್ 1:5.6 – 1:8 ಎಂದು ಬರೆದಿರುವ ಲೆನ್ಸ್‌ಗಿಂತ ಒಳ್ಳೆಯದು. ಇತ್ತೀಚೆಗೆ ಇಮೇಜ್ ಸ್ಟೆಬಿಲೈಸೇಶನ್ ಎಂಬ ಹೊಸ ಸವಲತ್ತೂ ಕ್ಯಾಮರದಲ್ಲಿ ಅಳವಡಿಸಲ್ಪಟ್ಟಿರುತ್ತದೆ. ವಾಸ್ತವವಾಗಿ ಇದು ಲೆನ್ಸ್‌ನಲ್ಲಿ ಅಳವಡಿಸಿರುವ ಸವಲತ್ತು. ಇದು ಇದ್ದಲ್ಲಿ ಫೋಟೋ ತೆಗೆಯುವಾಗ ಕೈ ಅಲ್ಪಸ್ವಲ್ಪ ಅಳ್ಳಾಡಿದರೂ ಚಿತ್ರ ಸ್ಪಷ್ಟವಾಗಿಯೇ ಮೂಡಿಬರುತ್ತದೆ. ಆದುದರಿಂದ ಈ ಸವಲತ್ತು ಇದ್ದರೆ ಒಳ್ಳೆಯದು. ಕ್ಯಾನನ್ ಕಂಪೆನಿ ಇದಕ್ಕೆ IS (Image Stabilisation) ಎಂದೂ ನಿಕಾನ್ ಇದಕ್ಕೆ VR (Vibration Resistent)  ಎಂದೂ ಹೆಸರಿಟ್ಟಿದೆ.

ಕ್ಯಾಮರದ ಷಟರ್ ವೇಗದ ಬಗ್ಗೆ ಈ ಹಿಂದೆ ಹಲವು ಬಾರಿ ಬರೆದಾಗಿದೆ. ಇದರ ವ್ಯಾಪ್ತಿಯೂ ಹೆಚ್ಚಿದ್ದಷ್ಟೂ ಒಳ್ಳೆಯದೇ. ಇದರಲ್ಲಿ ಬಲ್ಬ್ ಎಂಬ ಒಂದು ವಿಧಾನ ಕೂಡ ಇದ್ದರೆ ಒಳ್ಳೆಯದು. ಇದರಲ್ಲಿ ಕ್ಯಾಮರಾದ ಷಟರ್ ಗುಂಡಿ ಒತ್ತಿ ಹಿಡಿದಷ್ಟು ಕಾಲ ಷಟರ್ ತೆರೆದಿರುತ್ತದೆ. ಈ ವಿಧಾನದಲ್ಲಿ ಅತಿ ಕಡಿಮೆ ಬೆಳಕಿನಲ್ಲಿ ಸೃಜನಶಿಲ ಛಾಯಾಗ್ರಹಣ ಮಾಡಬಹುದು. ಉದಾಹರಣೆಗೆ ದೀಪಾವಳಿಯ ಸುರುಸುರುಬತ್ತಿಯನ್ನು ಕೈಯಲ್ಲಿ ಹಿಡಿದು ಸುತ್ತಿಸುತ್ತಿರುವ ಬಾಲೆಯ ಚಿತ್ರ. ಹೀಗೆ ಫೋಟೋ ತೆಗೆಯಲು ಕ್ಯಾಮರ ಸ್ಟ್ಯಾಂಡ್ ಬಳಸಬೇಕು.

ಕ್ಯಾಮರಾದ ಸಂವೇದಕ (sensor) ಬಹುಮುಖ್ಯ. ಇದು ದೊಡ್ಡದಿದ್ದಷ್ಟೂ ಒಳ್ಳೆಯದು. ಹಾಗೆಯೆ ಮೆಗಾಪಿಕ್ಸೆಲ್ ಕೂಡ. ಮೆಗಾಪಿಕ್ಸೆಲ್ ಮಾಯೆ ಬಗ್ಗೆ ಹಿಂದಿನ ಸಂಚಿಕೆಯಲ್ಲಿ ಬರೆಯಲಾಗಿದೆ.

ಗ್ಯಾಜೆಟ್ ಸಲಹೆ

ಚಿತ್ರದುರ್ಗದ ಗೌತಮರ ಪ್ರಶ್ನೆ: ನಾನು ಒಂದು ಸ್ಮಾರ್ಟ್‌ಫೋನ್ ಕೊಳ್ಳಬೇಕು ಎಂದು ಅಂತರಜಾಲದಲ್ಲಿ ಹುಡುಕಾಡಿದಾಗ, ಒಂದು ಮಾದರಿ ನನಗಿಷ್ಟವಾಯಿತು. ಆದರೆ ಅದನ್ನು AT & T ಎಂದು ನಮೂದಿಸಲಾಗಿತ್ತು. ಹಾಗೆಂದರೇನು? ನಾನು ಅದನ್ನು ಕೊಳ್ಳಬಹುದೇ?

ಉ: AT & T ಎಂದರೆ ಅಮೆರಿಕದ ಒಂದು ಮೊಬೈಲ್ ಸಂಪರ್ಕ ಸೇವೆ ನೀಡುವ ಕಂಪೆನಿ. ಅದು ಭಾರತದಲ್ಲಿ ಲಭ್ಯವಿಲ್ಲ. ನೀವು ಭಾರತೀಯ ಜಾಲತಾಣ (ಉದಾ – flipkart.com) ಮೂಲಕ ಆರ್ಡರ್ ಮಾಡಿ.

ಡಿಜಿಟಲ್ ಕ್ಯಾಮರ ಕೊಳ್ಳುವಾಗ ಎದುರಾಗುವ ಒಂದು ಬಹುಮುಖ್ಯ ಪದ ಮೆಗಾಪಿಕ್ಸೆಲ್. ಹೆಚ್ಚು ಮೆಗಾಪಿಕ್ಸೆಲ್ ಆದಷ್ಟು ಕ್ಯಾಮರ ಒಳ್ಳೆಯದು ಎಂಬ ಭಾವನೆ ಜನರಲ್ಲಿದೆ. ವ್ಯಾಪಾರಿಗಳೂ ಅದಕ್ಕೆ ನೀರೆರೆಯುತ್ತಾರೆ. ಆದರೆ ಈ ಮೆಗಾಪಿಕ್ಸೆಲ್ ಎಷ್ಟು ಮಹತ್ವವುಳ್ಳದ್ದು?

ಸಂಖ್ಯಾಮಟ್ಟಕ್ಕಿಂತ ಗುಣಮುಟ್ಟ ಮುಖ್ಯ. ಒಪ್ಪುತ್ತೀರಿ ತಾನೆ? ಇದು ಹಲವು ಕ್ಷೇತ್ರಗಳಿಗೆ ಅನ್ವಯವಾಗುತ್ತದೆ. ಇದು ನಮ್ಮ ಗ್ಯಾಜೆಟ್‌ಗಳ ಲೋಕಕ್ಕೂ ಒಪ್ಪುತ್ತದೆ.

ಕ್ಯಾಮರಾ ಕೊಳ್ಳುವಾಗ ಮೊಟ್ಟಮೊದಲನೆಯ ಪ್ರಶ್ನೆಯೇ ಮೆಗಾಪಿಕ್ಸೆಲ್‌ಗಳದು. “ಸ್ವಾಮಿ ಇದು ನೋಡಿ 12 ಮೆಗಾಪಿಕ್ಸೆಲ್, ಇದಕ್ಕೆ 12 ಸಾವಿರ ಬೆಲೆ. ಅದು ನೋಡಿ ಎಂಟೇ ಮೆಗಾಪಿಕ್ಸೆಲ್, ಅದಕ್ಕೆ 8 ಸಾವಿರ ಬೆಲೆ. ನಿಮಗೆ ಗೊತ್ತೇ ಇದೆ, ಹೆಚ್ಚು ಮೆಗಾಪಿಕ್ಸೆಲ್ ಇದ್ದಷ್ಟು ಒಳ್ಳೆಯ ಚಿತ್ರ ತೆಗೆಯಬಹುದು. ಅಂದ ಮೇಲೆ 12 ಸಾವಿರದ ಕ್ಯಾಮರಾವನ್ನೆ ಕೊಂಡುಕೊಳ್ಳುತ್ತೀರಿ ತಾನೆ?” ಅಂದ ವ್ಯಾಪಾರಿಯ ಮಾತು ನಿಮ್ಮನ್ನು ಆತನ ವಾದಗಳಿಗೆ ಒಪ್ಪುವಂತೆ ಮಾಡಿಬಿಡುತ್ತದೆ. ಆದರೆ ಈ ಮೆಗಾಪಿಕ್ಸೆಲ್ ಎಂಬ ಮಿಥ್ಯೆಯ ಬಗ್ಗೆ ಸ್ವಲ್ಪ ಕಣ್ಣಾಡಿಸೋಣ.

ಮೊತ್ತಮೊದಲನೆಯದಾಗಿ ಈ ಮೆಗಾಪಿಕ್ಸೆಲ್ ಎಂದರೇನು ನೋಡೋಣ. ಪಿಕ್ಸೆಲ್ (pixel)  ಎನ್ನುವುದು picture element ಎನ್ನುವುದರ ಹೃಸ್ವ ರೂಪ. ಗಣಕ ಪರದೆ ಅಥವಾ ಮುದ್ರಿತ ಚಿತ್ರದಲ್ಲಿ ಅಡ್ಡಕ್ಕೆ ಮತ್ತು ನೀಟಕ್ಕೆ ಚುಕ್ಕಿಗಳಿರುತ್ತವೆ. ಚುಕ್ಕಿಗಳ ಗಾತ್ರ ಅತಿ ಚಿಕ್ಕದಾಗಿರುತ್ತದೆ. ಈ ಚುಕ್ಕಿಗಳು ಒಟ್ಟು ಸೇರಿ ಚಿತ್ರವಾಗುತ್ತದೆ. ಈ ಒಂದು ಚುಕ್ಕಿಯೇ ಪಿಕ್ಸೆಲ್. ಮೆಗಾ ಎಂದರೆ 106. ಅಂದರೆ ಹತ್ತು ಲಕ್ಷ ಅರ್ಥಾತ್ ಒಂದರ ಮುಂದೆ ಆರು ಸೊನ್ನೆ ಬರೆಯಬೇಕು. ಆದರೆ ಗಣಕ ಪರಿಭಾಷೆಯಲ್ಲಿ ಮೆಗಾ ಎಂದರೆ 10,48,576.

ಈಗ ಇನ್ನೊಂದು ಪದವನ್ನು ತಿಳಿಯೋಣ. ಅದುವೇ ರೆಸೊಲೂಶನ್. ಒಂದು ಚಿತ್ರದಲ್ಲಿ ಅಡ್ಡಕ್ಕೆ ಮತ್ತು ನೀಟಕ್ಕೆ ಎಷ್ಟು ಚುಕ್ಕಿಗಳನ್ನು ಪೇರಿಸಿದ್ದೀರಿ ಎಂಬುದೇ ರೆಸೊಲೂಶನ್. ಸಾಮಾನ್ಯ ಗಣಕ ಪರದೆಯ ರೆಸೊಲೂಶನ್ 1024 x 768 ಇರುತ್ತದೆ. ಇತರೆ ರೆಸೊಲೂಶನ್‌ಗಳು 640 x 480, 800 x 600, ಇತ್ಯಾದಿ.  1024 x 768 ಎಂದರೆ ಪರದೆಯ ಅಡ್ಡಕ್ಕೆ 1024 ಚುಕ್ಕಿಗಳಿವೆ ಮತ್ತು ನೀಟಕ್ಕೆ 768 ಚುಕ್ಕಿಗಳಿವೆ ಎಂದರ್ಥ. ಈ ಚುಕ್ಕಿಗಳ ಸಂಖ್ಯೆ ಜಾಸ್ತಿಯಿದ್ದಷ್ಟು ಪರದೆ ಒಳ್ಳೆಯದು ಮತ್ತು ಮೂಡಿಬಂದ ಚಿತ್ರ ನೈಜವಾದುದಕ್ಕೆ ಹೆಚ್ಚು ಸಮೀಪವಾಗಿರುತ್ತದೆ. ಚುಕ್ಕಿಗಳು ಸೇರಿ ಚಿತ್ರವಾಗುತ್ತದೆ.  ಇದು ಗಣಕ ಪರದೆಯ ರೆಸೊಲೂಶನ್.

ಮುದ್ರಣಕ್ಕೆ ಬಂದಾಗ ಇನ್ನೊಂದು ರೆಸೊಲೂಶನ್ ಅಸ್ತಿತ್ವದಲ್ಲಿದೆ. ಅದು ಸಾಮಾನ್ಯವಾಗಿ ಒಂದು ಇಂಚಿಗೆ 300 ಅಥವಾ 600 ಇರುತ್ತದೆ. ಇದನ್ನು dots per inch (DPI) ಎಂದು ಕರೆಯುತ್ತಾರೆ. ಇದನ್ನು ಮುದ್ರಣದ ಸಾಂದ್ರತೆ ಎಂದೂ ಕರೆಯಬಹುದು. ಇದೇ ರೀತಿ ಪರದೆಗೂ ಸಾಂದ್ರತೆಯಿದೆ. ಅದು ಸಾಮಾನ್ಯವಾಗಿ ಒಂದು ಇಂಚಿಗೆ 102 ಚುಕ್ಕಿ ಆಗಿರುತ್ತದೆ.

ಈಗ ಮೆಗಾಪಿಕ್ಸೆಲ್ ಕಡೆಗೆ ಬರೋಣ. 3 ಮೆಗಾಪಿಕ್ಸೆಲ್ ಕ್ಯಾಮರಾದಲ್ಲಿ ತೆಗೆದ ಚಿತ್ರದಲ್ಲಿ ಅಡ್ಡಕ್ಕೆ 2,048 (horizontal)  ಮತ್ತು ನೀಟಕ್ಕೆ  1,536 (vertical) ಪಿಕ್ಸೆಲ್‌ಗಳಿರುತ್ತವೆ, ಅರ್ಥಾತ್ 31,45,728 ಚುಕ್ಕಿಗಳಿರುತ್ತವೆ. ಈ ಲೆಕ್ಕಾಚಾರದಲ್ಲಿ ಅಡ್ಡ ಮತ್ತು ನೀಟಗಳ ಗುಣಲಬ್ಧವು ಗಣನೆಗೆ ಬರುತ್ತದೆ. ಆದುದರಿಂದ ಮೆಗಾಪಿಕ್ಸೆಲ್ ಅನ್ನು ದುಪ್ಪಟ್ಟು ಮಾಡಿದಾಗ ಒಂದು ಆಯಾಮದಲ್ಲಿ ಅಂದರೆ ಉದ್ದ ಅಥವಾ ನೀಟದಲ್ಲಿ ಅದರ ಗುಣಮಟ್ಟದಲ್ಲಿ ಕೇವಲ 40% ಹೆಚ್ಚಳ ಆಗಿರುತ್ತದೆ. ಇದನ್ನು ಸ್ವಲ್ಪ ವಿಶದೀಕರಿಸೋಣ. 10 ಮೆಗಾಪಿಕ್ಸೆಲ್ ಚಿತ್ರದ ಗಾತ್ರ 3888 x 2592 ಆಗಿರುತ್ತದೆ. 5 ಮೆಗಾಪಿಕ್ಸೆಲ್‌ನ ಚಿತ್ರದ ಗಾತ್ರ 2816 x 1880 ಆಗಿರುತ್ತದೆ. ಉದ್ದವನ್ನು ಮಾತ್ರ ಗಣನೆಗೆ ತೆಗೆದುಕೊಂಡರೆ 3888 ಅನ್ನುವುದು 2816 ಕ್ಕಿಂತ ಕೇವಲ 38% ಜಾಸ್ತಿಯಾಗಿರುತ್ತದೆ, ದುಪ್ಪಟ್ಟು ಆಗಿರುವುದಿಲ್ಲ!

ಈ ಮೆಗಾಪಿಕ್ಸೆಲ್ ಮತ್ತು ರೆಸೊಲೂಶನ್ ಕೊನೆಗೊಳ್ಳುವುದು ಮುದ್ರಣದಲ್ಲಿ. ಅಲ್ಲಿ ಅದು ಇಂಚಿಗೆ ಸಾಮಾನ್ಯವಾಗಿ 300 ಇರುತ್ತದೆ. ನಾವು ಯಾವ ಗಾತ್ರದಲ್ಲಿ ಫೋಟೋವನ್ನು ಮುದ್ರಿಸುತ್ತೇವೆ ಎಂಬುದು ನಮಗೆ ಯಾವ ರೆಸೊಲೂಶನ್ ಬೇಕು ಎಂಬುದನ್ನು ನಿರ್ಧರಿಸುತ್ತದೆ. ಇಂಚಿಗೆ 300 ಚುಕ್ಕಿ ಅಂದರೆ 6 x 4 ಇಂಚಿನ ಫೋಟೋದ ರೆಸೊಲೂಶನ್ 1600 x 1200 ಆಗುತ್ತೆ. ಇದು 2 ಮೆಗಾಪಿಕ್ಸೆಲ್‌ಗಳಿಗೀಮತಲೂ ಸ್ವಲ್ಪ ಕಡಿಮೆಯೇ. ಹಾಗಿದ್ದರೆ ನಿಮಗೆ 10, 18, ಮೆಗಾಪಿಕ್ಸೆಲ್‌ಗಳು ನಿಜವಾಗಿಯೂ ಬೇಕೇ? 12 ಮೆಗಾಪಿಕ್ಸೆಲ್ ರೆಸೊಲೂಶನ್‌ನಲ್ಲಿತೆಗೆದ ಚಿತ್ರವನ್ನು ನೀವು ಸಿನಿಮಾ ಪೋಸ್ಟರ್‌ಗಳ ಗಾತರದಲ್ಲಿ ಮೆಜೆಸ್ಟಿಕ್ ಬಸ್‌ಸ್ಟ್ಯಾಂಡ್‌ನಲ್ಲಿ ತೂಗುಹಾಕುವಷ್ಟು ದೊಡ್ಡ ಗಾತ್ರದಲ್ಲಿ ಮುದ್ರಿಸಬಹುದು.

ಇಷ್ಟೆಲ್ಲ ಹೇಳಿದ ಮೇಲೂ ಈ ಮೆಗಾಪಿಕ್ಸೆಲ್ ರೆಸೊಲೂಶನ್ ಕೆಲವೊಮ್ಮೆ ಮಹತ್ವ ಪಡೆಯುತ್ತದೆ. ಅದು ಅತ್ಯುತ್ತಮ ಗುಣಮಟ್ಟದ ಚಿತ್ರ ಬೇಕಾದಾಗ. ಪೋಸ್ಟ್‌ಕಾರ್ಡ್ ಗಾತ್ರದ (6 x 4 ಇಂಚು) ಫೋಟೋದಲ್ಲಿ ಒಂದು ಹೂವಿನ ಪರಾಗ ರೇಣುಗಳು ಸ್ಪಷ್ಟವಾಗಿ ಮೂಡಿ ಬರಬೇಕಾದರೆ ನೀವು ಮೇಲೆ ನೀಡಿದ ಲೆಕ್ಕಾಚಾರದಂತೆ ಎರಡು ಮೆಗಾಪಿಕ್ಸೆಲ್‌ನಲ್ಲಿ ಫೊಟೋ ತೆಗೆದರೆ ಅದು ಅಷ್ಟು ಚೆನ್ನಾಗಿ ಮೂಡಿಬರುವುದಿಲ್ಲ. ಅದರ ಬದಲು ಹತ್ತು ಮೆಗಾಪಿಕ್ಸೆಲ್‌ನಲ್ಲಿ ತೆಗೆದು ನಂತರ ಫೋಟೋಶಾಪ್‌ನಲ್ಲಿ ಅದನ್ನು 6 x 4 ಇಂಚಿನ ಗಾತ್ರಕ್ಕೆ ಕುಗ್ಗಿಸಿದರೆ ಚಿತ್ರ ತುಂಬ ಚೆನ್ನಾಗಿ ಮೂಡಿಬರುತ್ತದೆ. ಇದು ಎಲ್ಲ ವೃತ್ತಿನಿರತ ಛಾಯಾಗ್ರಾಹಕರಿಗೆ ಗೊತ್ತಿರುವ ಸತ್ಯ.

ಈ ಮೆಗಾಪಿಕ್ಸೆಲ್‌ನ ಜೊತೆ ಕ್ಯಾಮರಾದ ಸಂವೇದಕ (sensor) ಎಷ್ಟು ದೊಡ್ಡದಿದೆ ಮತ್ತು ಯಾವ ಗುಣಮಟ್ಟದ್ದು ಎನ್ನುವುದು ಅಷ್ಟೇ ಮುಖ್ಯವಾಗುತ್ತದೆ. ಈ ಸಂವೇದಕಗಳು ದೊಡ್ಡದಿದ್ದಷ್ಟೂ ಒಳ್ಳೆಯದು. ಆದುದರಿಂದಲೇ ಡಿಜಿಟಲ್ ಕ್ಯಾಮರಾದ 8 ಮೆಗಾಪಿಕ್ಸೆಲ್ ಮೊಬೈಲ್ ಫೋನಿನ 8 ಮೆಗಾಪಿಕ್ಸೆಲ್‌ಗಿಂತ ಎಷ್ಟೋ ಪಾಲು ಉತ್ತಮ ಚಿತ್ರ ನೀಡುವುದು. ಯಾಕೆಂದರೆ ಡಿಜಿಟಲ್ ಕ್ಯಾಮರಾದ ಸಂವೇದಕ ದೊಡ್ಡದಿರುತ್ತದೆ. ಇದೇ ಕಾರಣಕ್ಕೆ ಎಸ್‌ಎಲ್‌ಆರ್ ಕ್ಯಾಮರಾಗಳ ಚಿತ್ರಗಳ ಗುಣಮಟ್ಟ ಏಮ್ ಆಂಡ್ ಶೂಟ್ ಕ್ಯಾಮರಾಗಳ ಗುಣಮಟ್ಟಕ್ಕಿಂತ ಚೆನ್ನಾಗಿರುವುದು. ಇನ್ನೂ ಒಂದು ಮಹತ್ವದ ವಿಷಯವೆಂದರೆ ಕ್ಯಾಮರಾದ ಲೆನ್ಸ್‌ನ ಗುಣಮಟ್ಟ. ಅದು ಚೆನ್ನಾಗಿಲ್ಲದಿದ್ದಲ್ಲಿ ಎಷ್ಟು ಮೆಗಾಪಿಕ್ಸೆಲ್ ಇದ್ದರೂ ಪ್ರಯೋಜನವಿಲ್ಲ. ಸಾಮಾನ್ಯವಾಗಿ ಎಸ್‌ಎಲ್‌ಆರ್ ಕ್ಯಾಮರಾಗಳ ಲೆನ್ಸ್‌ಗಳ ಗುಣಮಟ್ಟ ಏಮ್ ಆಂಡ್ ಶೂಟ್ ಕ್ಯಾಮರಾಗಳ ಲೆನ್ಸ್‌ಗಳ ಗುಣಮಟ್ಟಕ್ಕಿಂತ ಹೆಚ್ಚಾಗಿರುತ್ತದೆ. ಅಷ್ಟು ಮಾತ್ರವಲ್ಲ ಅವುಗಳ ವ್ಯಾಸವೂ ಜಾಸ್ತಿ ಇರುತ್ತದೆ. ಇದರಿಂದಾಗಿ ಅವುಗಳ ಬೆಳಕು ಗ್ರಹಿಸುವ ಶಕ್ತಿ ಜಾಸ್ತಿ ಇರುತ್ತದೆ. ಹೆಚ್ಚು ಬೆಳಕನ್ನು ಸಂಗ್ರಹಿಸಬಲ್ಲುದು ಎಂದರೆ ಕಡಿಮೆ ಬೆಳಕಿನಲ್ಲೂ ಉತ್ತಮ ಚಿತ್ರ ಪಡೆಯಬಹುದು ಎಂದು ಅರ್ಥೈಸಬೇಕು.

(5 ಮೆಗಾಪಿಕ್ಸೆಲ್‌ನಲ್ಲಿ ತೆಗೆದ ಫೋಟೋ)

(10 ಮೆಗಾಪಿಕ್ಸೆಲ್‌ನಲ್ಲಿ ತೆಗೆದ ಫೋಟೋ)

ಒಟ್ಟಿನಲ್ಲಿ ಹೇಳಬೇಕಾದರೆ ಕ್ಯಾಮರಾದ ಮೆಗಾಪಿಕ್ಸೆಲ್ ಒಂದೇ ಅದರ ಗುಣಮಟ್ಟವನ್ನು ನಿರ್ಧರಿಸಲು ಸಾಧ್ಯವಿಲ್ಲ. ಲೆನ್ಸ್, ಸಂವೇದಕ, ಎಲ್ಲ ಗಣನೆಗೆ ತೆಗೆದುಕೊಳ್ಳಬೇಕಾಗುತ್ತದೆ.

ಗ್ಯಾಜೆಟ್ ಸಲಹೆ

ಅವಿನಾಶ್ ಅವರ ಪ್ರಶ್ನೆ: ನನಗೆ ಐಫೋನ್ ೪ ಎಸ್ ಕೊಳ್ಳಬೇಕೆಂಬಾಸೆ. ಸದ್ಯದಲ್ಲೇ ನನ್ನ ಸಂಬಂಧಿಕರೊಬ್ಬರು ಅಮೇರಿಕಾದಿಂದ ಬರುವವರಿದ್ದಾರೆ. ಅವರ ಜೊತೆ ಅಲ್ಲಿಂದ ತರಿಸಲೇ ಅಥವಾ ಭಾರತದಲ್ಲೇ ಕೊಂಡುಕೊಳ್ಳಲೇ?

ಉ: ಅಮೇರಿಕಾದಿಂದ ಕೊಂಡುಕೊಂಡರೆ ಭಾರತದಲ್ಲಿ ಕೊಳ್ಳುವುದಕ್ಕಿಂತ ತುಂಬ ಕಡಿಮೆ ಬೆಲೆಯಲ್ಲಿ ಸಿಗುತ್ತದೆ ಎಂಬುದೇನೋ ನಿಜ. ಆದರೆ ಅವರು ಅಲ್ಲಿ ನೀಡುವ ಗ್ಯಾರಂಟಿ ಭಾರತಕ್ಕೂ ಅನ್ವಯವಾಗುತ್ತದೆಯೇ ಎಂದು ನೋಡಿಕೊಳ್ಳಬೇಕು. ಅಲ್ಲಿ ಸಾಮಾನ್ಯವಾಗಿ ಫೋನನ್ನು ಯಾವುದಾದರೂ ಮೊಬೈಲ್ ಸಂಪರ್ಕ ಸೇವೆ ನೀಡುವ ಕಂಪೆನಿಯ ಯಾವುದಾದರೂ ಸ್ಕೀಂ ಜೊತೆ ನೀಡುತ್ತಾರೆ. ಇದು ಒಂದು ಕಿರಿಕಿರಿ. ಫೋನ್ ಲಾಕ್ ಆಗಿದ್ದಲ್ಲಿ ಅದನ್ನು ಇಲ್ಲಿ ತಂದು ಇಲ್ಲಿಯ ಸಿಮ್ ಹಾಕಿ ಬಳಸಲು ಆಗುವುದಿಲ್ಲ. ಆದರೆ ಇಪ್ಪತ್ತು ಡಾಲರ್ ಖರ್ಚು ಮಾಡಿ ಅದನ್ನು ಅನ್‌ಲಾಕ್ ಮಾಡಿಸಿ ತಂದರೆ ಅಡ್ಡಿಯಿಲ್ಲ.

ಈ ಸಲ ಒಂದು ಆಂಡ್ರೋಯಿಡ್ ಮತ್ತು ಒಂದು ವಿಂಡೋಸ್ ಫೋನ್ ಕಡೆ ಗಮನ ಹರಿಸೋಣ

ಎಲ್‌ಜಿ ಒಪ್ಟಿಮಸ್ ಸೋಲ್

LG Optimus Sol E730 ಒಂದು ಆಂಡ್ರೋಯಿಡ್ ತಂತ್ರಾಂಶಾಧಾರಿತ ಫೋನ್. ಅಂದ ಮೇಲೆ ಆಂಡ್ರೋಯಿಡ್ ಫೋನಿನ ಎಲ್ಲ ವೈಶಿಷ್ಟ್ಯಗಳೂ ಇವೆ. ಮೊದಲು ಇದರ ಯಂತ್ರಾಂಶಗಳ ಅರ್ಥಾತ್ ಗುಣವೈಶಿಷ್ಟ್ಯಗಳ ಕಡೆ ಗಮನ ಹರಿಸೋಣ.

ಗುಣವೈಶಿಷ್ಟ್ಯಗಳು: 1 ಗಿಗಾಹರ್ಟ್ಸ್ ಕ್ವಾಲ್‌ಕಂ ಪ್ರೋಸೆಸರ್, 512 ಮೆಗಾಬೈಟ್ ಪ್ರಾಥಮಿಕ ಮೆಮೊರಿ (RAM), 1 ಗಿಗಾಬೈಟ್ ROM, 32 ಗಿಗಾಬೈಟ್ ತನಕ ಹೆಚ್ಚುವರಿ ಮೆಮೊರಿಯನ್ನು ಎಸ್‌ಡಿ ಕಾರ್ಡ್ ಮೂಲಕ ಹಾಕಿಕೊಳ್ಳಬಹುದು, 9.7 ಸೆಮಿ ಗಾತ್ರದ ಅಲ್ಟ್ರ ಅಮೋಲೆಡ್ (Ultra AMOLED) ಪರದೆ, 5 ಮೆಗಾಪಿಕ್ಸೆಲ್ ಪ್ರಾಥಮಿಕ ಕ್ಯಾಮರ ಮತ್ತು ವಿಜಿಎ ಫ್ರಂಟ್ ಕ್ಯಾಮರ, ಕೆಪಾಸಿಟಿವ್ ಸ್ಪರ್ಶಸಂವೇದಿ ಪರದೆ, 3 ಜಿ ಅಂತರಜಾಲ ಸಂಪರ್ಕ, ಸ್ಟೀರಿಯೋ ಎಫ್‌ಎಂ ರೇಡಿಯೋ ಮತ್ತು ಎಂಪಿ೩ ಪ್ಲೇಯರ್, ವೈಫೈ ಮತ್ತು ಬ್ಲೂಟೂತ್ ನಿಸ್ತಂತು ಸಂಪರ್ಕ ಸೌಲಭ್ಯ, ಜಿಪಿಎಸ್ ಸೌಲಭ್ಯ, ಇತ್ಯಾದಿ. ಅಂದರೆ ಮೇಲ್ಮಟ್ಟದ ಫೋನಿನಲ್ಲಿರುವ ಎಲ್ಲ ಗುಣವೈಶಿಷ್ಟ್ಯಗಳು ಇದರಲ್ಲಿವೆ. ಇದರ ಬೆಲೆ ಸುಮಾರು 17 ಸಾವಿರ ರೂ.

ಇದರ ಬೆಲೆಗೆ ಹೋಲಿಸಿದರೆ ಇದರ ಗುಣವೈಶಿಷ್ಟ್ಯಗಳು ಮತ್ತು  ನಿಜವಾದ ಮೌಲ್ಯಗಳ ಹೋಲಿಕೆ ಚೆನ್ನಾಗಿಯೇ ಇವೆ. ಅಂದರೆ ಕೊಡುವ ಹಣಕ್ಕೆ ಮೋಸವಿಲ್ಲ. ಇದರಲ್ಲಿ ಆಂಡ್ರೋಯಿಡ್ ಆವೃತ್ತಿ 2.3 ಇದೆ. ಪರದೆಯ ರೆಸೊಲೂಶನ್ ಚೆನ್ನಾಗಿದೆ. ಬಣ್ಣಗಳ ಗುಣಮಟ್ಟವೂ ಚೆನ್ನಾಗಿದೆ. ಪರದೆಯ ಸಂವೇದನೆ ಚೆನ್ನಾಗಿದೆ. ಅಂದರೆ ಯಾವುದೇ ಕೆಲಸಕ್ಕೂ ಪರದೆಯನ್ನು ಅತಿಯಾಗಿ ಒತ್ತಬೇಕಾಗಿಲ್ಲ. ಎಲ್ಲ ಬಹಳ ಮೃದು. ಪರದೆಯ ಬೆಳಕು ಉತ್ತಮವಾಗಿದೆ. ಹೊರಗಿನ ಬೆಳಕಿನಿಂದ ಕೋಣೆಯ ಒಳಗೆ ಬಂದಾಗ ಅಂದರೆ ಬೆಳಕು ಹೆಚ್ಚು ಕಡಿಮೆಯಾದಾಗ ಪರದೆಯ ಬೆಳಕಿನ ತೀಕ್ಷ್ಣತೆಯನ್ನು ತನ್ನಿಂದತಾನೆ ಅದು ಹೆಚ್ಚು ಕಡಿಮೆ ಮಾಡಿಕೊಳ್ಳುವುದಿಲ್ಲ. ಇದು ಒಂದು ದೊಡ್ಡ ಕೊರತೆಯೇ. ಫೋನು ಕೈಯಲ್ಲಿ ಹಿಡಿದುಕೊಂಡಾಗ ಅತಿ ತೂಕ ಅನ್ನಿಸುವುದಿಲ್ಲ. ರೇಡಿಯೋ ಮತ್ತು ಸಂಗೀತ ಗುಣಮಟ್ಟ ಉತ್ತಮವಾಗಿದೆ. ಆದರೆ ಇದರ ಜೊತೆ ನೀಡಿರುವ ಇಯರ್‌ಫೋನ್ ಅಷ್ಟಕ್ಕಷ್ಟೆ. ಉತ್ತಮ ಇಯರ್‌ಫೋನ್ ಜೋಡಿಸಿದರೆ ಉತ್ತಮ ಸಂಗೀತ ಆಲಿಸಬಹುದು. ಗ್ರಾಫಿಕಲ್ ಪ್ರೋಸೆಸರ್ ಇದೆ. ಈ ಗ್ರಾಫಿಕಲ್ ಪ್ರೋಸೆಸರ್ ಆಂಡ್ರೋಯಿಡ್ ಫೋನ್‌ಗಳಿಗೆ ಅತಿ ಮುಖ್ಯ. ಇದು ಇದ್ದರೆ ಮ್ಯಾಪ್, ಫೋಟೋ ಮತ್ತು ವೀಡಿಯೋ ವೀಕ್ಷಣೆ, ಗ್ರಾಫಿಕ್ಸ್, ಇತ್ಯಾದಿಗಳು ವೇಗವಾಗಿ ಕೆಲಸ ಮಾಡುತ್ತವೆ. ಇಲ್ಲವಾದಲ್ಲಿ ಎತ್ತಿನಗಾಡಿಯಂತೆ ಚಲಿಸುತ್ತವೆ.

ಈ ಫೋನಿನ ಕರೆಗಳ ಗುಣಮಟ್ಟ ಚೆನ್ನಾಗಿವೆ. ಸಂಗೀತವೂ ಚೆನ್ನಾಗಿವೆ. ಆದರೆ ಕ್ಯಾಮರದ ಗುಣಮಟ್ಟ ಚೆನ್ನಾಗಿಲ್ಲ. ಕ್ಯಾಮರಾಕ್ಕೆ ಫ್ಲಾಶ್ ಇಲ್ಲ. ಹೈಡೆಫಿನಿಶನ್ ವೀಡಿಯೋ ಚಿತ್ರೀಕರಣವೂ ಅಷ್ಟಕ್ಕಷ್ಟೆ. ಬ್ಯಾಟರಿ ಪರವಾಗಿಲ್ಲ (1500 mAH).

ಕನ್ನಡಿಗರು ಚಿಂತಿಸಬೇಕಾದ ಒಂದು ಪ್ರಮುಖ ಕೊರತೆ ಕನ್ನಡ ಭಾಷೆಯ ಸೌಕರ್ಯ ನೀಡಿಲ್ಲ ಎಂಬುದು. ಭಾರತೀಯ ಭಾಷೆಗಳನ್ನೇ ನೀಡಿಲ್ಲ ಎಂದಾಗಿದ್ದರೆ ಸುಮ್ಮನಿರಬಹುದಿತ್ತೇನೋ? ಆದರೆ ಇದರಲ್ಲಿ ಹಿಂದಿ, ತಮಿಳು, ತೆಲುಗು, ಬಾಂಗ್ಲಾ ಮತ್ತು ಮರಾಠಿ ಭಾಷೆಗಳನ್ನು ನೀಡಲಾಗಿದೆ. ಕನ್ನಡವನ್ನೇಕೆ ಮರೆತರು ಎಂಬುದು ಯಕ್ಷಪ್ರಶ್ನೆ.

ಎಚ್‌ಟಿಸಿ ರಾಡಾರ್

HTC Radar ಒಂದು ವಿಂಡೋಸ್ ಫೋನ್. ಅಂದರೆ ವಿಂಡೋಸ್ ಫೋನಿನ ಎಲ್ಲ ಗುಣವೈಶಿಷ್ಟ್ಯಗಳೂ ಜೊತೆಗೇ ಕೆಲವು ಚಿಕ್ಕಪುಟ್ಟ ಕಿರಿಕಿರಿಗಳೂ ಇದರಲ್ಲಿ ಅಡಕವಾಗಿವೆ.

ಗುಣವೈಶಿಷ್ಟ್ಯಗಳು:  1 ಗಿಗಾಹರ್ಟ್ಸ್ ಪ್ರೋಸೆಸರ್, ಗ್ರಾಫಿಕಲ್ ಪ್ರೋಸೆಸರ್, 9.5 ಸೆಮಿ ಕೆಪಾಸಿಟಿವ್ ಸ್ಪರ್ಶಸಂವೇದಿ ಪರದೆ, 800 x 480 ಪಿಕ್ಸೆಲ್ ರೆಸೊಲೂಶನ್, 512MB RAM, 512MB ROM, 8 ಗಿಗಾಬೈಟ್ ಮೆಮೊರಿ, 5 ಮೆಗಾಪಿಕ್ಸೆಲ್ ಪ್ರಾಥಮಿಕ ಕ್ಯಾಮರ ಮತ್ತು ವಿಜಿಎ ಫ್ರಂಟ್ ಕ್ಯಾಮರ, 3ಜಿ ಅಂತರಜಾಲ ಸಂಪರ್ಕ, ಸ್ಟೀರಿಯೋ ಎಫ್‌ಎಂ ರೇಡಿಯೋ ಮತ್ತು ಎಂಪಿ3 ಪ್ಲೇಯರ್, ವೈಫೈ ಮತ್ತು ಬ್ಲೂಟೂತ್ ನಿಸ್ತಂತು ಸಂಪರ್ಕ ಸೌಲಭ್ಯ, ಜಿಪಿಎಸ್ ಸೌಲಭ್ಯ, ಇತ್ಯಾದಿ. ಬೆಲೆ ಸುಮಾರು 19 ಸಾವಿರ ರೂ.

ಈಗಾಗಲೇ ತಿಳಿಸಿದಂತೆ ಇದೊಂದು ವಿಂಡೋಸ್ ಫೋನ್ ಆಗಿದೆ. ಆದುದರಿಂದ ಇದರ ಬಳಕೆಯ ಅನುಭವ ಉತ್ತಮವಾಗಿದೆ. ಪರದೆಯ ಮೇಲೆ ಐಕಾನ್‌ಗಳನ್ನು ಅಥವಾ ಚಿತ್ರಿಕೆಗಳನ್ನು ಜಾರಿಸಿ ಬಳಸುವ ಅನುಭವವನ್ನು ಬಳಸಿಯೇ ನೋಡಬೇಕು. ಹಲವು ರೀತಿಯಲ್ಲಿ ಇದರ ಅನುಭವ ನೋಕಿಯ ಲುಮಿಯ ಫೋನನ್ನು ಹೋಲುತ್ತದೆ.  ಇದರಲ್ಲಿ ವಿಂಡೋಸ್ ಫೋನ್ ಕಾರ್ಯಾಚರಣ ವ್ಯವಸ್ಥೆಯ ಆವೃತ್ತಿ 7.5 ಅಳವಡಿಸಲಾಗಿದೆ. ಕೈಯಲ್ಲಿ ಹಿಡಿಯಲು ಗಾತ್ರವೂ ಚೆನ್ನಾಗಿದೆ. ಆದರೂ ಇದರ ಬಳಕೆಯ ಅನುಭವ ನೋಕಿಯ ಲುಮಿಯದಷ್ಟು ಅದ್ಭುತವಾಗಿಲ್ಲ. ಹಾಗೆಂದು ತೆಗೆದುಹಾಕುವಂತೆಯೂ ಇಲ್ಲ.

ಇದರ ಧ್ವನಿ ಗುಣಮಟ್ಟ ಚೆನ್ನಾಗಿದೆ. ಇದು ಕೇವಲ ಕರೆಗಳಿಗೆ ಮಾತ್ರವಲ್ಲ, ಎಫ್‌ಎಂ ರೇಡಿಯೋ ಮತ್ತು ಎಂಪಿ3 ಪ್ಲೇಯರ್‌ಗಳಿಗೂ ಅನ್ವಯಿಸುತ್ತದೆ. 3.5 ಮಿಮಿ ಆಡಿಯೋ ಜ್ಯಾಕ್ ಇರುವುದರಿಂದ ನಿಮಗಿಷ್ಟವಾದ ಇಯರ್‌ಫೋನ್ ಬಳಸಬಹುದು. ಇದರ ಜೊತೆ ಸಿಗುವ ಇಯರ್‌ಫೋನ್ ಅಷ್ಟಕ್ಕಷ್ಟೆ. ಆದರೆ ಹಲವು ಆಡಿಯೋ ಸೆಟ್ಟಿಂಗ್‌ಗಳ ಆಯ್ಕೆ ನೀಡಿರುವುದರಿಂದ ಮತ್ತು ಇಕ್ವಲೈಸರ್ ಇರುವುರಿಂದ ಸಂಗೀತ ಆಲಿಸಲು ಪರವಾಗಿಲ್ಲ.

ಇದರ ಕ್ಯಾಮರ ಹೆಸರಿಗೆ 5 ಮೆಗಾಪಿಕ್ಸೆಲ್ ಇದ್ದರೂ ಗುಣಮಟ್ಟ ಮಾತ್ರ ಸಾಲದು. ಇದು ಸ್ಥಿರಚಿತ್ರ ಮತ್ತು ವೀಡಿಯೋ ಎರಡಕ್ಕೂ ಅನ್ವಯಿಸುತ್ತದೆ.

ಇದು ವಿಂಡೋಸ್ ಫೋನ್ ಆಗಿರುವುದರಿಂದ ಔಟ್‌ಲುಕ್ ಜೊತೆ ತುಂಬ ಚೆನ್ನಾಗಿ ಹೊಂದಾಣಿಕೆಯಾಗುತ್ತದೆ. ಸಿಂಕಿಂಗ್ ಬಹಳ ಚೆನ್ನಾಗಿ ಯಾವುದೇ ತಾಪತ್ರಯವಿಲ್ಲದೆ ಆಗುತ್ತದೆ. ಆಫೀಸ್ 365, ಸ್ಕೈಡ್ರೈವ್, ಲಿಂಕ್‌ಡ್‌ಇನ್, ಫೇಸ್‌ಬುಕ್, ಟ್ವಿಟ್ಟರ್ ಇತ್ಯಾದಿ ಬಳಸಲು ಪ್ರತ್ಯೇಕ ಸವಲತ್ತುಗಳಿವೆ. ಇಮೈಲ್ ಬಳಸುವುದೂ ಬಹು ಸರಳ. ಮೈಕ್ರೋಸಾಫ್ಟ್ ಆಫೀಸ್ ಕಡತಗಳನ್ನು ತೆರೆಯಬಹುದು.

ವಿಂಡೋಸ್ ಫೋನ್ ಕಾರ್ಯಾಚರಣ ವ್ಯವಸ್ಥೆಯ ಕಿರಿಕಿರಿಗಳು ಇದರಲ್ಲೂ ಇವೆ. ಇದಕ್ಕೆ ಮೆಮೊರಿ ಕಾರ್ಡ್ ಸೇರಿಸಲು ಆಗುವುದಿಲ್ಲ. ಬ್ಲೂಟೂತ್ ಮೂಲಕ ಫೈಲ್ ಕಳುಹಿಸಲು ಮತ್ತು ಸ್ವೀಕರಿಸಲು ಸಾಧ್ಯವಿಲ್ಲ. ಇದನ್ನು ಯುಎಸ್‌ಬಿ ಡ್ರೈವ್ ಆಗಿ ಬಳಸುವುದೂ ಅಸಾಧ್ಯ. ಗಣಕ ಮತ್ತು ಫೋನ್ ಮಧ್ಯೆ ಫೈಲುಗಳ ವರ್ಗಾವಣೆ ಝೂನ್ ತಂತ್ರಾಂಶ ಮೂಲಕ ಮಾತ್ರ ಸಾಧ್ಯ. ಈ ಎಲ್ಲ ಕಿರಿಕಿರಿ ಗುಣವೈಶಿಷ್ಟ್ಯಗಳನ್ನು ಮೈಕ್ರೋಸಾಫ್ಟ್‌ನವರು ಆಪಲ್ ಐಫೋನ್‌ನಿಂದ ನಕಲು ಮಾಡಿದ್ದಾರೆ. ನಕಲು ಮಾಡುವಾಗ ಒಳ್ಳೆಯ ಗುಣಗಳನ್ನು ನಕಲು ಮಾಡುವುದು ಲೋಕರೀತಿ. ಆದರೆ ಮೈಕ್ರೋಸಾಫ್ಟ್‌ನವರು ಇದಕ್ಕೆ ಅಪವಾದವಾಗಿದ್ದಾರೆ.

ಇನ್ನೊಂದು ಬಹುದೊಡ್ಡ ಕೊರತೆಯೆಂದರೆ ಭಾರತೀಯ ಭಾಷೆಗಳ ಬೆಂಬಲ ನೀಡಿಲ್ಲ ಎನ್ನುವುದು.

ಗ್ಯಾಜೆಟ್ ಸಲಹೆ

ಸಂಜಯ ಬಾಬು ಅವರ ಪ್ರಶ್ನೆ: ನಾನು ಲ್ಯಾಪ್‌ಟಾಪ್ ಕೊಂಡುಕೊಳ್ಳಲೇ ಅಥವಾ ವಿಂಡೋಸ್ ೮ ಟ್ಯಾಬ್ಲೆಟ್ ಕೊಂಡುಕೊಳ್ಳಲೇ?

ಉ: ಗಣಕ ಅಥವಾ ಲ್ಯಾಪ್‌ಟಾಪ್ ಮತ್ತು ಟ್ಯಾಬ್ಲೆಟ್‌ಗಳ ಉಪಯೋಗ ಒಂದೇ ಕೆಲಸಗಳಿಗೆ ಅಲ್ಲ. ಗಣಕ ಮಾಡಬಲ್ಲ ಹಲವು ಕಾರ್ಯಗಳನ್ನು, ಉದಾಹರಣೆಗೆ ಪ್ರೋಗ್ರಾಮ್ಮಿಂಗ್, ಗ್ರಾಫಿಕ್ಸ್, ವಿಡಿಯೋ ಎಡಿಟಿಂಗ್, ಇತ್ಯಾದಿ, ಟ್ಯಾಬ್ಲೆಟ್‌ಗಳಲ್ಲಿ ಮಾಡಲು ಸಾಧ್ಯವಿಲ್ಲ. ಗಣಕ ಬೇಕೇ ಬೇಕಿದ್ದವರು ಟ್ಯಾಬ್ಲೆಟ್ ಕೊಳ್ಳಬೇಡಿ. ಗಣಕ ಕೊಂಡ ನಂತರವೂ ಬೇಕಾದಷ್ಟು ಹಣವಿದ್ದಲ್ಲಿ ಟ್ಯಾಬ್ಲೆಟ್ ಕೊಳ್ಳಬಹುದು

-ಡಾ| ಯು. ಬಿ. ಪವನಜ

— *** —

ಕೆಲವು ವಾರಗಳಿಂದ ಅವ್ಯಾಹತವಾಗಿ ಬೇರೆ ಬೇರೆ ಗ್ಯಾಜೆಟ್‌ಗಳ ವಿಮರ್ಶೆ ಓದಿ ಸ್ವಲ್ಪ ಮಂಡೆಬಿಸಿಯಗಿದೆಯೇ? ಯಾಕೆ ಈ ವಾರ ಹೀಗೆ ಸುಮ್ನೆ ಒಂದಿಷ್ಟು ಮಸಾಲಾ ಗ್ಯಾಜೆಟ್‌ಗಳ ಕಡೆ ಗಮನಹರಿಸಬಾರದು? ಇಷ್ಟೆಲ್ಲ ಗ್ಯಾಜೆಟ್ ಕೊಳ್ಳಲು ನಮ್ಮಲ್ಲಿ ಹಣವಿಲ್ಲ ಎನ್ನುತ್ತೀರಾ? ಚಿಂತಿಸಬೇಡಿ. ಇವು ಯಾವುವೂ ಭಾರತದಲ್ಲಿ ಲಭ್ಯವಿಲ್ಲ!

ಗೋಡೆಯಲ್ಲಿ ಯುಎಸ್‌ಬಿ ಚಾರ್ಜರ್

ಮೊಬೈಲ್ ಫೋನ್, ಟ್ಯಾಬ್ಲೆಟ್, ಎಂಪಿ೩ ಪ್ಲೇಯರ್, ಬ್ಲೂಟೂತ್ ಹೆಡ್‌ಸೆಟ್ -ಹೀಗೆ ಹಲವಾರು ಗ್ಯಾಜೆಟ್‌ಗಳಿಗೆ ಚಾರ್ಜ್ ಮಾಡಲು ಬಳಕೆಯಾಗುವುದು ಯುಎಸ್‌ಬಿ ಚಾರ್ಜರ್. ಈ ಚಾರ್ಜರ್‌ಗಳನ್ನು ಮನೆ ತುಂಬ ಹರಡಿಕೊಂಡು ಖಾಲಿ ಸಿಕ್ಕ ಪ್ಲಗ್ ಪಾಯಿಂಟ್‌ಗೆ ತುರುಕಿಸಿ ಗ್ಯಾಜೆಟ್‌ಗೆ ಚಾರ್ಜ್ ಮಾಡುವುದು ಎಲ್ಲರೂ ಅನುಸರಿಸುವ ವಿಧಾನ. ಮನೆಯ ಸ್ವಿಚ್‌ಬೋರ್ಡ್‌ನಲ್ಲೇ ವಿದ್ಯುತ್ ಪ್ಲಗ್ ಪಾಯಿಂಟ್ ಪಕ್ಕ ಇನ್ನೊಂದು ಯುಎಸ್‌ಬಿ ಚಾರ್ಜ್ ಪಾಯಿಂಟ್ ಇದ್ದರೆ ಒಳ್ಳೆಯದಲ್ಲವೇ? ಹೌದು. ಅದೂ ಈಗ ಲಭ್ಯವಿದೆ. ಆದರೆ ಸದ್ಯ ಇದು ಅಮೆರಿಕದಲ್ಲಿ ದೊರೆಯುತ್ತಿದೆ. Ctrl-C ಮತ್ತು Ctrl-V ಯಲ್ಲಿ ಪರಿಣತರಾದ ನಮ್ಮವರು ಯಾರಾದರೂ ಇದನ್ನು ನಕಲು ಮಾಡುವ ತನಕ ಕಾಯಬೇಕು!

ಸಂಗೀತ ಅಂಗಿ

ದಿನನಿತ್ಯದ ಕೆಲಸಗಳನ್ನು ಮಾಡಿ ಮಾಡಿ ಬೋರ್ ಆಗಿದೆಯೇ? ಸ್ವಲ್ಪ ಸಂಗೀತ ಆಲಿಸೋಣವೇ? ಅದರಲ್ಲೇನು ವಿಶೇಷ ಅಂತೀರಾ? ಸಂಗೀತ ಆಲಿಸಲು ಚಿತ್ರವಿಚಿತ್ರ ಎಂಪಿ೩ ಪ್ಲೇಯರ್‌ಗಳು ಇರುವುದು ಗೊತ್ತೇ ಇರಬಹುದು. ಉದಾಹರಣೆಗೆ ಎಂಪಿ೩ ಪ್ಲೇಯರ್ ಇರುವ ತಂಪುಕನ್ನಡಕ, ಸರ ಮತ್ತು ಪೆಂಡೆಂಟ್, ವಾಚ್, ಪೆನ್, ಇತ್ಯಾದಿ. ಆದರೆ ಇದು ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ ಸಂಗೀತ ಹೊರಡಿಸುವ ಅಂಗಿ ಕೇಳಿದ್ದೀರಾ? ಈಗ ಅದೂ ಲಭ್ಯ. ಈ ಅಂಗಿಯ ಒಳಗೆ ಸ್ಪೀಕರ್, ಎಂಪಿ೩ ಪ್ಲೇಯರ್, ದೂರನಿಯಂತ್ರಕ ಎಲ್ಲ ಇವೆ. ಅದರ ಜೊತೆಗೆ ಸಿಗುವ ಸಂಗೀತಗಳನ್ನು ಆಯ್ಕೆ ಮಾಡಿಕೊಂಡು ಆಲಿಸಬಹುದು. ಅಥವಾ ನಿಮ್ಮದೇ ಮೈಕ್ರೋಎಸ್‌ಡಿ ಕಾರ್ಡ್‌ನಲ್ಲಿ ಎಂಪಿ೩ ಹಾಡುಗಳನ್ನು ಸೇರಿಸಿ ಅವನ್ನೂ ಆಲಿಸಬಹುದು. ಅಂಗಿ ತೊಳೆಯುವಾಗ ಮಾತ್ರ ಸ್ಪೀಕರ್, ಬ್ಯಾಟರಿ ಎಲ್ಲ ಎಚ್ಚರಿಕೆಯಿಂದ ತೆಗೆಯತಕ್ಕದ್ದು. ವಿಜಯನಗರದ ವಿಜಯವಿಠ್ಠಲ ದೇವಸ್ಥಾನದಲ್ಲಿ ಸಂಗೀತ ಹೊರಡಿಸುವ ಕಂಬಗಳಿದ್ದವು (ಈಗಲೂ ಇವೆ, ಆದರೆ ಹಾಳಾಗಿವೆ). ಈಗ ಸಂಗೀತ ಹೊರಡಿಸುವ ಅಂಗಿ ಬಂದಿದೆ.

ಗುಪ್ತಚರ ಕೈಗಡಿಯಾರ

ಪೆನ್ನಿನಲ್ಲಿ ಗುಪ್ತ ಕ್ಯಾಮರ ಇಟ್ಟುಕೊಂಡು ಕುಟುಕು ಕಾರ್ಯಾಚರಣೆ ನಡೆಸುವುದು ಓದಿರಬಹುದು. ಈ ರೀತಿ ಮಾಡಲು ಸಹಾಯ ಮಾಡುವ ಕೈಗಡಿಯಾರ ತಯರಾಗಿದೆ. ಇದು ನೋಡಲು ಮಾಮೂಲಿ ವಾಚಿನಂತಿರುತ್ತದೆ. ಆದರೆ ಇದು ಧ್ವನಿ, ವೀಡಿಯೋ, ಸ್ಥಿರಚಿತ್ರ ಎಲ್ಲ ರೆಕಾರ್ಡ್ ಮಾಡಿಕೊಳ್ಳಬಲ್ಲುದು. ಇದಕ್ಕೆ ಯುಎಸ್‌ಬಿ ಕೇಬಲ್ ಮತ್ತು ಬ್ಲೂಟೂತ್ ಸೌಲಭ್ಯವೂ ಇದೆ. ಇದಕ್ಕೆ ಆಟ ಮತ್ತು ಇತರೆ ಉಪಯುಕ್ತ ತಂತ್ರಾಂಶಗಳನ್ನು (ಆಪ್‌ಗಳನ್ನು) ಅಂತರಜಾಲದಿಂದ ಡೌನ್‌ಲೋಡ್ ಮಾಡಿಕೊಂಡು ಹಾಕಿಕೊಳ್ಳಲೂಬಹುದು. ಅಂದ ಹಾಗೆ ಈ ಕೈಗಡಿಯಾರ ಬಳಸಿ ಗಂಟೆ ನೋಡಲೂ ಸಾಧ್ಯ.

ಏಳಲೇ ಬೇಕೆನ್ನುವ ಅಲಾರ್ಮ್ ಗಡಿಯಾರ

ಬೇಗ ಏಳಬೇಕೆಂದು ಅಲಾರ್ಮ್ ಇಟ್ಟು ಅದು ಕಿರುಚಿದೊಡನೆ ಅದರ ತಲೆ ಮೇಲೆ ಕುಕ್ಕಿ ಮತ್ತೆ ನಿದ್ದೆಹೋಗುವವರೇ ಎಲ್ಲರೂ. ಇಂತಹವರಿಗೆಂದೇ ಹಲವು ನಮೂನೆಯೆ ಅಲಾರ್ಮ್ ಗಡಿಯಾರಗಳು ಮಾರುಕಟ್ಟೆಗೆ ಬಂದಿವೆ. ಅವೆಲ್ಲ ಬೇರೆ ಬೇರೆ ನಮೂನೆಯಲ್ಲಿ ಮತ್ತು ಅತ್ಯಂತ ಹೆಚ್ಚು ವಾಲ್ಯೂಮ್‌ನಲ್ಲಿ ಗದ್ದಲ ಮಾಡುತ್ತವೆ, ಮತ್ತೆ ಮತ್ತೆ ಕಿರುಚುತ್ತವೆ, ಇತ್ಯಾದಿ. ಎಷ್ಟೇ ಕಿರುಚಿದರೂ ನಾವು ಅಜಗರದಂದದಿ ನಿದ್ದೆಯ ಭಜಕರು ಎನ್ನುವವರಿಗಾಗಿಯೇ ಹೊಸ ನಮೂನೆಯ ಅಲಾರ್ಮ್ ಗಡಿಯಾರ ಬಂದಿದೆ. ಇದು ಇತರೆ ಗಡಿಯಾರಗಳಂತೆ ಅತಿ ಹೆಚ್ಚು ಧ್ವನಿಯಲ್ಲಿ ಕಿರುಚುತ್ತದೆ. ಇದರ ಜೊತೆ ಒಂದು ಪ್ಯಾಡ್ ದೊರೆಯುತ್ತದೆ. ಅದು ಗಡಿಯಾರಕ್ಕೆ ಸಂಪರ್ಕದಲ್ಲಿರುತ್ತದೆ. ಈ ಪ್ಯಾಡನ್ನು ನಿಮ್ಮ ಹಾಸಿಗೆಯಲ್ಲಿ ಬೆಡ್‌ಶೀಟ್ ಕೆಳಗೆ ಇಟ್ಟುಕೊಳ್ಳತಕ್ಕದ್ದು. ಸರಿಯಾದ ಸಮಯಕ್ಕೆ ಅದು ಜೋರಾಗಿ ಅಲುಗಾಡಿ ನಿಮ್ಮನ್ನು ಎಬ್ಬಿಸಿಯೇ ಬಿಡುತ್ತದೆ.

ಭಾಷಣ ನಿಲ್ಲಿಸದವರ  ಬಾಯಿ ಮುಚ್ಚಿ

ನಮ್ಮಲ್ಲಿ ಕೆಲವರಿದ್ದಾರೆ. ಎಷ್ಟು ಸೂಚನೆ ನೀಡಿದರೂ ಭಾಷಣ ನಿಲ್ಲಿಸುವುದೇ ಇಲ್ಲ. ಇನ್ನು ಕೆಲವರಿದ್ದಾರೆ. ನಿಶ್ಶಬ್ದದ ಪ್ರದೇಶ, ಉದಾ -ಗ್ರಂಥಾಲಯ, ಎಂದು ಸೂಚನಾಫಲಕಗಳಿದ್ದರೂ ಮಾತನಾಡುತ್ತಲೇ ಇರುತ್ತಾರೆ. ಇಂತಹವರ ಮಾತು ನಿಲ್ಲಿಸಲೆಂದೇ ಒಂದು ಗ್ಯಾಜೆಟನ್ನು ಜಪಾನಿ ವಿಜ್ಞಾನಿಗಳು ಸಂಶೋಧಿಸಿದ್ದಾರೆ. ಇದರಲ್ಲಿ ಒಂದು ದಿಕ್ಕಿನಿಂದ ಬಂದ ಧ್ವನಿಯನ್ನು ಮಾತ್ರವೇ ಗ್ರಹಿಸಬಲ್ಲ ಮೈಕ್ರೋಫೋನ್ ಇದೆ. ಅದು ಧ್ವನಿಯನ್ನು ರೆಕಾರ್ಡ್ ಮಾಡಿ ಅದನ್ನೇ 0.2 ಸೆಕೆಂಡುಗಳ ನಂತರ ಒಂದು ದಿಕ್ಕಿಗೆ ಮಾತ್ರವೇ ಧ್ವನಿಯನ್ನು ಬೀರಬಲ್ಲ ಸ್ಪೀಕರ್ ಮುಖಾಂತರ ಮಾತನಾಡುತ್ತಿರುವವರ ದಿಕ್ಕಿನಲ್ಲಿ ಪುನರುತ್ಪತ್ತಿ ಮಾಡುತ್ತಾರೆ. ಆಗ ಮಾತನಾಡುವವರಿಗೆ ತುಂಬ ಕಿರಿಕಿರಿಯಾಗಿ ಮಾತು ನಿಲ್ಲಿಸುತ್ತಾರೆ. ತಮ್ಮ ಅಳುವಿನ ರೆಕಾರ್ಡಿಂಗ್ ಅನ್ನೇ ಪ್ಲೇ ಮಾಡಿ ಕೇಳಿಸಿದರೆ ಮಕ್ಕಳು ಅಳು ನಿಲ್ಲಿಸುವ ತಂತ್ರ ಗೊತ್ತು ತಾನೆ? ಇದು ಸುಮಾರಾಗಿ ಅದೇ ರೀತಿಯಲ್ಲಿ ಕೆಲಸ ಮಾಡುತ್ತದೆ.

ಕಣ್ಣುಹೊಡೆಯಲು ಜ್ಞಾಪಿಸುವ ಕನ್ನಡಕ

ಗಂಟೆಗಟ್ಟಲೆ ಗಣಕ ಪರದೆಯನ್ನು ಕಣ್ಣು ಮಿಟುಕಿಸದೆ ದಿಟ್ಟಿಸಿ ನೋಡುವವರಿಗೆ ಒಂದು ರೀತಿಯ ಖಾಯಿಲೆ ಬರುತ್ತದೆ. ಇದಕ್ಕೆ ವೈದ್ಯಕೀಯ ಪರಿಭಾಷೆಯಲ್ಲಿ computer vision syndrome ಎನ್ನುತ್ತಾರೆ. ಕಣ್ಣಿನ ಮುಂದಿನ ಕಪ್ಪು ಭಾಗ ಯಾವಾಗಲೂ ತೇವ ಭರಿತವಾಗಿರತಕ್ಕದ್ದು. ಕಣ್ಣೀರು ಇದಕ್ಕೆ ಸಹಾಯಕಾರಿ. ಕಣ್ಣೀರನ್ನು ಕಣ್ಣಿನ ಎಲ್ಲ ಭಾಗಗಳಿಗೆ ತಲುಪಿಸಬೇಕಾದರೆ ಆಗಾಗ ಕಣ್ಣು ಮುಚ್ಚಿ ತೆರೆದು ಮಾಡುತ್ತಿರಬೇಕು. ಹೀಗೆ ಮಾಡದಿದ್ದಲ್ಲಿ ಕಣ್ಣು ಒಣಗಿ ಕೆಂಪಾಗಿ ಉರಿಯಲು ತೊಡಗುತ್ತದೆ. ಹೀಗೆ ಆಗಬಾರದಾದರೆ ಆಗಾಗ ಕಣ್ಣು ಮಿಟುಕಿಸುತ್ತಿರಬೇಕು. ಪ್ರಯತ್ನ ಪೂರ್ವಕವಾಗಿ ಕಣ್ಣುಮಿಟುಕಿಸಬೇಕು ಎಂದು ಹೇಳುವುದೇನೋ ಸುಲಭ. ಆದರೆ ಗ್ರಾಫಿಕ್ಸ್ ಕೆಲಸಗಾರರು ಅದನ್ನ ಬೇಗ ಮರೆಯುತ್ತಾರೆ. ಅಂತಹವರಿಗಾಗಿಯೇ ಒಂದು ವಿಶೇಷ ಕನ್ನಡಕ ತಯಾರಾಗಿದೆ. ಅದನ್ನು ಧರಿಸಿ ಕೆಲಸ ಮಾಡುತ್ತಿರಬೇಕು. ಅದು ನೀವು ಕಡಿಮೆ ಕಣ್ಣು ಮಿಟುಕಿಸಿದರೆ ಅದರ ಗಾಜನ್ನು ಮಂಜು ಮಂಜಾಗಿಸುತ್ತದೆ. ಕಣ್ಣು ಮಿಟುಕಿಸಿದರೆ ಅದು ಸರಿಯಾಗುತ್ತದೆ.

ಗ್ಯಾಜೆಟ್ ಸಲಹೆ

ಈ ಪ್ರಶ್ನೆ ಮತ್ತೆ ಮತ್ತೆ ಬರುತ್ತಿದೆ – “ನನಗೆ ಇಂತಿಷ್ಟು ಬಜೆಟ್‌ನಲ್ಲಿ ಇಂತಿಂತಹ ಗುಣವೈಶಿಷ್ಟ್ಯಗಳಿರುವ ಫೋನ್ ಬೇಕು. ಯಾವುದು ಕೊಂಡುಕೊಳ್ಳಲಿ”. ಇಂತಹ ಎಲ್ಲ ಪ್ರಶ್ನೆಗಳಿಗೆ ಉತ್ತರಿಸುವುದು ಕಷ್ಟಸಾಧ್ಯ. ಈ ಹಿಂದೆಯೇ ನಾನು ಈ ಬಗ್ಗೆ ಬರೆದಿದ್ದೆ. ಇನ್ನೊಮ್ಮೆ ಹೇಳುತ್ತಿದ್ದೇನೆ. ಇಂತಹವರಿಗೆ ಸಹಾಯ ಮಾಡಲೆಂದೇ ಹಲವು ಜಾಲತಾಣಗಳಿವೆ. ಉದಾಹರಣೆ – www.fonearena.com, www.gsmarena.com. ದಯವಿಟ್ಟು ಈ ಜಾಲತಾಣಗಳಿಗೆ ಭೇಟಿ ನೀಡಿ ನಿಮಗೆ ಬೇಕಾದ ಫೋನನ್ನು ಆಯ್ಕೆ ಮಾಡಿಕೊಳ್ಳಿ. ಈ ಪ್ರಶ್ನೆ ಇನ್ನೊಮ್ಮೆ ಬಂದರೆ ಖಂಡಿತ ಉತ್ತರಿಸಲಾಗುವುದಿಲ್ಲ.

ಫೋಟೋಗ್ರಾಫಿ ಎಂದರೆ ಎಸ್‌ಎಲ್‌ಆರ್ ಕ್ಯಾಮರ ಬಳಸಿ ಫೊಟೋ ತೆಗೆಯುವುದು. ಏಮ್ ಆಂಡ್ ಶೂಟ್ ಕ್ಯಾಮರ ಬಳಸಿ ತೆಗೆಯುವುದು ಏನಿದ್ದರೂ ಮಕ್ಕಳಾಟ, ವೃತ್ತಿನಿರತರಿಗೆ ಎಸ್‌ಎಲ್‌ಆರ್ ಕ್ಯಾಮರವೇ ಎಂದು ಯಾವುದೇ ವೃತ್ತಿನಿರತ ಛಾಯಾಗ್ರಾಹಕ ಹೇಳುತ್ತಾರೆ. ಈ ಲೋಕಕ್ಕೆ ಪ್ರವೇಶಿಸಬಯಸುವವರಿಗೆ ಒಂದು ಎಂಟ್ರಿ ಲೆವೆಲ್ ಎಸ್‌ಎಲ್‌ಆರ್ ಕ್ಯಾಮರ.

ಕೆಲವೇ ವರ್ಷಗಳ ಹಿಂದೆ ಎಸ್‌ಎಲ್‌ಆರ್ ಕ್ಯಾಮರಗಳ ಬೆಲೆ ಅತಿ ಕನಿಷ್ಠ ಎಂದರೂ ರೂ.80 ಸಾವಿರದಿಂದ ಒಂದು ಲಕ್ಷದ ತನಕ ಇರುತಿದ್ದವು. ಆ ಸಂದರ್ಭದಲ್ಲಿ ಕ್ಯಾನನ್ ಕಂಪೆನಿ ಒಂದು ಕ್ರಾಂತಿಯನ್ನೆ ಮಾಡಿತು. ತನ್ನ ಎಸ್‌ಎಲ್‌ಆರ್ ಕ್ಯಾಮರಗಳ ಬೆಲೆಯನ್ನು ಕಡಿಮೆ ಮಾಡತೊಡಗಿತು. ಕೊನೆಗೆ ಅದು ಸಾಮಾನ್ಯರ ಕೈಗೆಟುಕುವ ಮಟ್ಟಕ್ಕೆ ಇಳಿಯಿತು. ಈ ಸಲ ಅಂತಹ ಒಂದು ಕ್ಯಾಮರದ ಪರಿಚಯ ಮಾಡುಕೊಳ್ಳೋಣ. ಅದುವೇ ಕ್ಯಾನನ್ ಕಂಪೆನಿಯ 1000D ಡಿಜಿಟಲ್ ಎಸ್‌ಎಲ್‌ಆರ್ ಕ್ಯಾಮರ. ಈಗ ಅದರ ಮುಖಬೆಲೆ ಸುಮಾರು ರೂ.25 ಸಾವಿರ. ಆದರೆ ಹಲವು ಜಾಲತಾಣಗಳಲ್ಲಿ ಹಾಗೂ ಅಂಗಡಿಗಳಲ್ಲಿ ಸುಮಾರು ರೂ.22 ಸಾವಿರಕ್ಕೆ ಅದು ದೊರೆಯುತ್ತದೆ.

ಈಗಾಗಲೆ ತಿಳಿಸಿದಂತೆ ಕ್ಯಾನನ್ 1000D ಒಂದು ಎಂಟ್ರಿ ಲೆವೆಲ್ ಎಸ್‌ಎಲ್‌ಆರ್ ಕ್ಯಾಮರ. ಅಂದರೆ ಎಸ್‌ಎಲ್‌ಆರ್ ಫೋಟೋಗ್ರಫಿ ಮಾಡುತ್ತೇನೆ ಅಂತ ಹೊರಡುವವರಿಗೆ ಪ್ರಾರಂಭದ ಹಂತಕ್ಕೆ ಒಳ್ಳೆಯ ಕ್ಯಾಮರ. ಬೆಲೆ ಕಡಿಮೆ ಎಂದು ಗುಣಮಟ್ಟದಲ್ಲಿ ವಿಶೇಷ ರಾಜಿ ಮಾಡಿಕೊಂಡಿಲ್ಲ. ಎಸ್‌ಎಲ್‌ಆರ್ ಕ್ಯಾಮರಾಗಳಲ್ಲಿರುವ ಮತ್ತು ಇರಬೇಕಾದ ಬಹುತೇಕ ಸವಲತ್ತುಗಳು ಇದರಲ್ಲಿವೆ. ತೆಗೆದ ಫೋಟೋಗಳ ಗುಣಮಟ್ಟವೂ ಚೆನ್ನಾಗಿಯೇ ಇವೆ. ಇದು ಕ್ಯಾಮರಾ ಬಾಡಿ ಮತ್ತು 18ಮಿಮಿ ಯಿಂದ 55ಮಿಮಿ ತನಕ ಫೋಕಲ್ ಲೆಂತ್ ಹೆಚ್ಚು ಕಡಿಮೆ ಮಾಡಬಹುದಾದ ಝೂಮ್ ಲೆನ್ಸ್ ಜೊತೆ ಸಿಗುತ್ತದೆ. ಉತ್ತಮ ಛಾಯಾಚಿತ್ರ ಬೇಕು ಎನ್ನುವವರಿಗೆ ಈ ಲೆನ್ಸ್ ಅಷ್ಟಕ್ಕಷ್ಟೆ. ಬೇರೆ ಲೆನ್ಸ್ ಕೊಂಡುಕೊಂಡರೆ ಒಳ್ಳೆಯದು.

ಮೊದಲು ಕ್ಯಾಮರದ ಗುಣವೈಶಿಷ್ಟ್ಯಗಳ (specifications) ಕಡೆ ಗಮನ ಹರಿಸೋಣ:  10.1 ಮೆಗಾಪಿಕ್ಸೆಲ್, ಐಎಸ್‌ಒ 100 ರಿಂದ 1600, ಅತ್ಯಧಿಕ ರೆಸೊಲೂಶನ್ 3888 x 2592, ಶಟ್ಟರ್ ಸ್ಪೀಡ್ 30 ಸೆಕೆಂಡಿನಿಂದ  1/4000 ಸೆಕೆಂಡ್ ಮತ್ತು Bulb, 12 ಶೂಟಿಂಗ್ ವಿಧಾನಗಳು, ಲೈವ್ ವ್ಯೂ, ಸೆಲ್ಫ್ ಟೈಮರ್, ಇತ್ಯಾದಿ.

ಎಸ್‌ಎಲ್‌ಆರ್‌ಗಳಲ್ಲಿ ಇದರ ಮೆಗಾಫಿಕ್ಸೆಲ್ ಸ್ವಲ್ಪ ಕಡಿಮೆಯೇ ಅನ್ನಬಹುದೇನೋ? ಆದರೆ ಚಿತ್ರದ ಗುಣಮಟ್ಟ ನೋಡಿದ ಮೇಲೆ ಇದೊಂದು ಕೊರತೆ ಎಂದು ಅನ್ನಿಸುವುದೇ ಇಲ್ಲ. ಬೆಳಕು ಬೇಕಾದಷ್ಟಿದ್ದಾಗ ಐಎಸ್‌ಒ 100 ಅಥವಾ 200 ಇಟ್ಟುಕೊಂಡು ಸೂಕ್ತ ಶಟ್ಟರ್ ಸ್ಪೀಡ್ ಆಯ್ಕೆ ಮಾಡಿಕೊಂಡು ಫೋಟೋ ತೆಗೆಯಬಹುದು. ಅತಿ ಕಡಿಮೆ ಬೆಳಕಿದ್ದಾಗ ಫ್ಲಾಶ್ ಬಳಸದೆ ಫೋಟೋ ತೆಗೆಯಬೇಕೆನ್ನುವವರು ಐಎಸ್‌ಒ 800 ಅಥವಾ 1600 ಬಳಸಬಹುದು. ಐಎಸ್‌ಒ 1600 ಆಯ್ಕೆ ಮಾಡಿಕೊಂಡರೆ ಚಿತ್ರ ಸ್ವಲ್ಪ ಕಾಳು ಕಾಳಾಗಿ (grainy) ಮೂಡಿಬರುತ್ತದೆ ಎಂದು ಕೆಲವರು ದೂರುತ್ತಾರೆ. ಇದು ಈ ಕ್ಯಾಮರಾ ಬಗ್ಗೆ ಮಾತ್ರವಲ್ಲ. ಯಾವುದೇ ಕ್ಯಾಮರಾದಲ್ಲೂ ಅದರಲ್ಲಿ ನೀಡಿರುವ ಐಎಸ್‌ಒ ಆಯ್ಕೆಯಲ್ಲಿ ಕೊನೆಯ ಸಂಖ್ಯೆಯನ್ನು ಆಯ್ಕೆ ಮಾಡಿಕೊಂಡರೆ ಹೀಗೆ ಆಗುವ ಸಾಧ್ಯತೆ ಹೆಚ್ಚು. ನಾನೂ ಹಲವು ಬಾರಿ ಕಡಿಮೆ ಬೆಳಕಿನಲ್ಲಿ ಐಎಸ್‌ಒ 800 ಇಟ್ಟುಕೊಂಡು ಫೋಟೋ ತೆಗೆದಿದ್ದೇನೆ. ಫೋಟೋ ಚೆನ್ನಾಗಿಯೇ ಬಂದಿದೆ.

ಶಟ್ಟರ್ ಸ್ಪೀಡ್ 30 ಸೆಕೆಂಡಿನಿಂದ ಹಿಡಿದು ಸೆಕೆಂಡಿನ 4000ನೆಯ ಒಂದು ಭಾಗದಷ್ಟರ ತನಕ ಇದೆ. ಅಂದ ಮೇಲೆ ಅತ್ಯಾಧುನಿಕ ವೃತ್ತಿನಿರತ ಛಾಯಾಗ್ರಾಹಕರು ಬಳಸುವ ಕ್ಯಾಮರಕ್ಕೆ ಏನೂ ಕಡಿಮೆಯಿಲ್ಲ ಅನ್ನಬಹುದು. ನಿಮ್ಮ ಕೈ ಅಷ್ಟು ಸ್ಥಿರವಲ್ಲ ಎಂದಾದಲ್ಲಿ ಶಟ್ಟರ್ ಸ್ಪೀಡ್ 30ಕ್ಕಿಂತ ಕೆಳಗಿನ ವೇಗದಲ್ಲಿ ಫೋಟೋ ತೆಗೆಯುವಾಗ ಕ್ಯಾಮರ ಸ್ಟ್ಯಾಂಡ್ ಬಳಸುವುದು ಒಳ್ಳೆಯದು. ಹಾರುವ ಹಕ್ಕಿಯ ಫೋಟೋ ತೆಗೆಯಬೇಕಿದ್ದಲ್ಲಿ ಶಟ್ಟರ್ ಸ್ಪೀಡ್ 250ಕ್ಕಿಂತ ಹೆಚ್ಚು ಇಟ್ಟುಕೊಂಡಲ್ಲಿ ಒಳ್ಳೆಯದು.

ಅಪೆರ್ಚರ್ ಸಂಖ್ಯೆ ಎಷ್ಟಿದೆಯೆಂಬುದು ಲೆನ್ಸ್ ಅನ್ನು ಹೊಂದಿಕೊಂಡಿರುತ್ತದೆ. ಕ್ಯಾಮರಾ ಜೊತೆ ಬರುವ ಕಿಟ್ ಲೆನ್ಸ್ ಈಗಾಗಲೆ ತಿಳಿಸಿದಂತೆ 18-55ಮಿಮಿ ಝೂಮ್ ಆಗಿದೆ. ಅದರ ಅಪೆರ್ಚರ್ ಸಂಖ್ಯೆ F/4.5 ರಿಂದ F/29 ರ ತನಕ ಇದೆ. ಲೆನ್ಸ್‌ನ F ಸಂಖ್ಯೆ 3.5 ರಿಂದ 5.6 ತನಕ ಇದೆ. ಇದು ಕ್ಯಾನನ್ ತುಂಬ ಖ್ಯಾತವಾಗಿರುವ ಐಎಸ್ (IS = Image Stabilisation) ಲೆನ್ಸ್ ಕೂಡ ಅಲ್ಲ. ಅಂದರೆ ಇದು ಅತ್ಯುತ್ತಮ ಲೆನ್ಸ್ ಏನಲ್ಲ.

ಇದರ ಆಟೋಫೋಕಸ್ ವ್ಯವಸ್ಥೆಯನ್ನು ಏಳು ಬಿಂದುಗಳಲ್ಲಿ ಆಯ್ಕೆ ಮಾಡಿಕೊಳ್ಳಬಹುದಾಗಿದೆ. ಉದಾಹರಣೆಗೆ ಫೋಟೋ ತೆಗೆಯಬೇಕಾದ ವಸ್ತು ಫ್ರೇಮಿನ ಕೇಂದ್ರದ ಬದಲಿಗೆ ಒಂದು ಪಕ್ಕದಲ್ಲಿದೆ ಎಂದಾದಲ್ಲಿ ಫೋಕಸ್ ಬಿಂದುವನ್ನು ಪಕ್ಕಕ್ಕೆ ಆಯ್ಕೆ ಮಾಡಿಕೊಳ್ಳಬಹುದು. ಹೀಗೆ ಮಾಡಿಕೊಳ್ಳುವುದರಿಂದ ವಸ್ತುವನ್ನು ಸ್ಪಷ್ಟವಾಗಿ ಫೋಕಸ್ ಮಾಡಿಕೊಳ್ಳಬಹುದುದು ಮಾತ್ರವಲ್ಲ, ಅದರ ಮೇಲೆ ಇರುವ ಬೆಳಕಿಗನುಗುಣವಾಗಿ ಶಟ್ಟರ್ ಸ್ಪೀಡ್ ಮತ್ತು ಅಪೆರ್ಚರ್ ಅಳವಡಿಸಕೊಳ್ಳಬಹುದು.

12 ಶೂಟಿಂಗ್ ವಿಧಾನಗಳಿವೆ. ಅವುಗಳೆಂದರೆ ಪೋರ್ಟ್ರೈಟ್, ಸೀನರಿ, ಮ್ಯಾಕ್ರೊ, ಶಟ್ಟರ್ ಪ್ರಯಾರಿಟಿ, ಅಪೆರ್ಚ್‌ರ್ ಪ್ರಯಾರಿಟಿ, ಪೂರ್ತಿ ಮ್ಯಾನ್ಯುವಲ್, ಪೂರ್ತಿ ಆಟೋಮ್ಯಾಟಿಕ್, ಇತ್ಯಾದಿ. ರಂಗನತಿಟ್ಟಿಗೆ ಹೋಗಿದ್ದೀರೆಂದಿಟ್ಟುಕೊಳ್ಳಿ. ಹಕ್ಕಿಗಳು ಹಾರಾಡುತ್ತಿರುತ್ತವೆ. ಅವುಗಳ ಫೋಟೋ ತೆಗೆಯಬೇಕಾದರೆ ಶಟ್ಟರ್ ಸ್ಪೀಡ್ 250ಕ್ಕಿಂತ ಅಧಿಕ ಇಟ್ಟುಕೊಳ್ಳಬೇಕು. ಆಗ ಬಳಸುವುದು ಶಟ್ಟರ್ ಪ್ರಯಾರಿಟಿ. ಈ ವಿಧಾನದಲ್ಲಿ ನಾವು ಆಯ್ಕೆ ಮಾಡಿಕೊಂಡ ಶಟ್ಟರ್ ಸ್ಪೀಡಿನಲ್ಲಿ ಸರಿಯಾಗಿ ಫೊಟೋ ತೆಗೆಯಬೇಕಾದರೆ ಲಭ್ಯಬೆಳಕಿನಲ್ಲಿ ಎಷ್ಟು ಅಪೆರ್ಚರ್ ಬೇಕೋ ಅದನ್ನು ಕ್ಯಾಮರಾವೇ ಆಯ್ಕೆ ಮಾಡಿಕೊಳ್ಳುತ್ತದೆ. ಅದೇ ರೀತಿ ಅಪೆರ್ಚರ್ ಪ್ರಯಾರಿಟಿಯಲ್ಲಿ ನಾವು ಆಯ್ಕೆ ಮಾಡಿಕೊಂಡ ಅಪೆರ್ಚರ್‌ಗೆ (ಲೆನ್ಸ್ ತೆರೆಯುವಿಕೆ) ಎಷ್ಟು ಬೇಕೋ ಅಷ್ಟು ಶಟ್ಟರ್ ಸ್ಪೀಡನ್ನು ಕ್ಯಾಮರಾವೇ ಆಯ್ಕೆ ಮಾಡಿಕೊಳ್ಳುತ್ತದೆ.  ಪೂರ್ತಿ ಮ್ಯಾನುವಲ್ ವಿಧಾನದಲ್ಲಿ ಶಟ್ಟರ್ ಸ್ಪೀಡ್ ಮತ್ತು ಅಪೆರ್ಚರ್ ಎರಡನ್ನೂ ನಾವೇ ಆಯ್ಕೆ ಮಾಡಿಕೊಳ್ಳಬಹುದು. ವೃತ್ತಿನಿರತರು ಬಳಸುವುದು ಈ ವಿಧಾನವನ್ನು.  ಹೆಚ್ಚಿನ ವಿವರಗಳನ್ನು www.canon.co.in ಜಾಲತಾಣದಲ್ಲಿ ನೋಡಬಹುದು.

ಈ ಕ್ಯಾಮರಾದ ಬೆಲೆಗೆ ಇನ್ನೂ 4 ಸಾವಿರ ಸೇರಿಸಿದರೆ ಅಂದರೆ ರೂ.29 ಸಾವಿರಕ್ಕೆ ಕ್ಯಾನನ್ 1100D ಸಿಗುತ್ತದೆ. ಇದು ಕೆಲವು ವಿಷಯಗಳಲ್ಲಿ 1000D ಗಿಂತ ಉತ್ತಮ – ಕಿಟ್ ಲೆನ್ಸ್ ಐಎಸ್ ಆಗಿದೆ, ಐಎಸ್‌ಒ 6400 ತನಕ ಹೋಗಬಹುದು, 12 ಮೆಗಾಪಿಕ್ಸೆಲ್ ಇದೆ, ಇತ್ಯಾದಿ.

ಐಎಸ್‌ಒ (ISO) ಫಿಲ್ಮ್ ಸ್ಪೀಡ್ – ಫೋಟೋಗ್ರಫಿಯಲ್ಲಿ ಬಲಸುವ ಫಿಲ್ಮಿನ ವೇಗವನ್ನು ಅಳೆಯುವ ಮಾನಕ. ಈಗ ಡಿಜಿಟಲ್ ಯುಗದಲ್ಲಿ ಫಿಲ್ಮ್ ಇಲ್ಲ. ಆದರೂ ಈ ಮಾನಕ ಉಳಿದುಕೊಂಡಿದೆ. ಐಎಸ್‌ಒ ಜಾಸ್ತಿಯಿದ್ದಷ್ಟು ಅದು ಅತಿ ಕಡಿಮೆ ಬೆಳಕಿನಲ್ಲೂ ಕೆಲಸ ಮಾಡುತ್ತದೆ ಎಂದು ತಿಳಿಯತಕ್ಕದ್ದು. ಸಾಮಾನ್ಯವಾಗಿ ಇದರ ಸಂಖ್ಯೆ 100ರಿಂದ ಪ್ರಾರಂಭವಾಗುತ್ತದೆ. ಕೊನೆಯ ಸಂಖ್ಯೆ ಹೆಚ್ಚಿದ್ದಷ್ಟು ಕ್ಯಾಮರ ಉತ್ತಮವಾದುದು ಎಂದು ತಿಳಿಯಬಹುದು.

ಗ್ಯಾಜೆಟ್ ಸಲಹೆ

ಶಿವಮೊಗ್ಗದ ಎಸ್. ಅಶೋಕ ಅವರ ಪ್ರಶ್ನೆ:  ನನಗೆ, ಮೊಬೈಲ್‌ನ ಪವರ್ ಪಾಯಿಂಟ್‌ನಲ್ಲಿ ಕನ್ನಡ ಉಪಯೋಗಿಸಿ ಸ್ಲೈಡ್ ತಯಾರಿಸಬಹುದೇ? ಇದ್ದರೆ ದಯವಿಟ್ಟು ಯಾವ ಕಂಪನಿಯ ಮೊಬೈಲ್ ತೆಗೆದುಕೊಳ್ಳಬೇಕು ತಿಳಿಸಿ.

ಉ: ನನಗೆ ತಿಳಿದಂತೆ ಸದ್ಯಕ್ಕೆ ಯಾವ ಮೊಬೈಲ್‌ನಲ್ಲೂ ಇದು ಸಾಧ್ಯವಿಲ್ಲ.

-ಡಾ| ಯು. ಬಿ. ಪವನಜ

ಸಂಗೀತ ಹೊರಡಿಸುವ ಯಾವುದೇ ವಿದ್ಯುನ್ಮಾನ ಉಪಕರಣದ ಕೊನೆಯ ಕೊಂಡಿ ಅಥವಾ ಸಾಧನ ಸ್ಪೀಕರ್ ಅಥವಾ ಇಯರ್‌ಫೋನ್ (ಹೆಡ್‌ಸೆಟ್). ಅದು ಉತ್ತಮವಾಗಿದ್ದಷ್ಟೂ ಧ್ವನಿ ಉತ್ತಮವಾಗಿರುತ್ತದೆ. ಈ ಸಾಧನವನ್ನು ತಂತಿ ಅಥವಾ ನಿಸ್ತಂತು (ವಯರ್‌ಲೆಸ್) ವಿಧಾನದಲ್ಲಿ ಜೋಡಿಸಬಹುದು. ಈ ಸಲ ಅಂತಹ ಎರಡು ನಿಸ್ತಂತು ಸಾಧನಗಳ ಪರಿಚಯ ಮಾಡಿಕೊಳ್ಳೋಣ.

ಆಡಿಯೋ ಕ್ಷೇತ್ರದಲ್ಲಿ ಕ್ರಿಯೇಟಿವ್ ಕಂಪೆನಿ ದೊಡ್ಡ ಹೆಸರು. ಅವರ ಉತ್ಪನ್ನಗಳು ಸಾಮಾನ್ಯವಾಗಿ ಚೆನ್ನಾಗಿರುತ್ತವೆ. ಗಣಕಗಳ ಜೊತೆ ಬಳಸುವ ಕ್ರಿಯೇಟಿವ್ ಸ್ಪೀಕರ್‌ಗಳನ್ನು ನಿಮ್ಮಲ್ಲಿ ಬಹುಮಂದಿ ನೋಡಿಯೇ ಇರುತ್ತೀರಾ. ಕೆಲವರಂತೂ ಬಳಸಿಯೂ ಇರುತ್ತೀರಿ. ನನ್ನಲ್ಲಿ ಕ್ರಿಯೇಟಿವ್ ಕಂಪೆನಿಯ ಎರಡು ಜೊತೆ ಸ್ಪೀಕರ್‌ಗಳಿವೆ. ಅವುಗಳನ್ನು ಗಣಕ ಅಥವಾ ಎಂಪಿ3 ಪ್ಲೇಯರ್ (ಐಪೋಡ್) ಜೊತೆ ಬಳಸುತ್ತೇನೆ. ಇವುಗಳಲ್ಲಿ ಹಲವು ನಮೂನೆ. 2.1 ಎಂಬ ಹೆರಿನ ಸ್ಪೀಕರ್‌ಗಳು ಸಾಮಾನ್ಯವಾಗಿ ಉತ್ತಮ ಧ್ವನಿಯನ್ನು ಪುನರುತ್ಪತ್ತಿ ಮಾಡುತ್ತವೆ. ಇದಕ್ಕೆ ಪ್ರಮುಖ ಕಾರಣ ಇವು 3 ಸ್ಪೀಕರುಗಳನ್ನು ಹೊಂದಿರುತ್ತವೆ. ಅತಿ ಕಡಿಮೆ ಕಂಪನಾಂಕದ (frequency) ಧ್ವನಿತರಂಗಗಳನ್ನು ಹೊರಡಿಸಲು ಸಬ್‌ವೂಫರ್ ಹೆಸರಿನ ದೊಡ್ಡ ಪೆಟ್ಟಿಗೆ ಮತ್ತು ಉಳಿದ ಕಂಪನಾಂಕಗಳ ಧ್ವನಿಯನ್ನು ಉತ್ಪತ್ತಿ ಮಾಡಲು ಎರಡು ಚಿಕ್ಕ ಸ್ಪೀಕರುಗಳಿರುತ್ತವೆ. ನನ್ನಲ್ಲಿರುವ ಮಾದರಿಗಳು ಕ್ರಿಯೇಟಿವ್ SBS A300 ಮತ್ತು SBS A370 ಆಗಿವೆ. ಎರಡೂ ಚೆನ್ನಾಗಿವೆ. ಇವನ್ನು ವಯರ್ ಮೂಲಕ ಗಣಕ, ಫೋನ್ ಅಥವಾ ಎಂಪಿ3 ಪ್ಲೇಯರ್‌ಗೆ ಜೋಡಿಸಬೇಕು.

ಕ್ರಿಯೇಟಿವ್‌ನವರದೇ ಆದ ಕಿವಿಯೊಳಗೆ ಅವಿತು ಕುಳಿತುಕೊಳ್ಳುವ ಇಪಿ630 ಇಯರ್‌ಬಡ್ ಬಗ್ಗೆ ಇದೇ ಅಂಕಣದಲ್ಲಿ ಈ ಹಿಂದೆ ಬರೆಯಲಾಗಿತ್ತು (ನೋಡಿ: bit.ly/gadgetloka4). ಅದೂ ಚೆನ್ನಾಗಿದೆ. ಈ ಇಯರ್‌ಫೋನ್ ಆಗಲೀ ಸ್ಪೀಕರ್‌ಗಳಾಗಲಿ ಸಂಗೀತ ಉಪಕರಣದ ಜೊತೆ ಸಂಪರ್ಕಗೊಳ್ಳುವುದು ವಯರ್ (ತಂತಿ) ಮೂಲಕ. ಕೆಲವೊಮ್ಮೆ ಈ ತಂತಿ ಕಿರಿಕಿರಿ ಮಾಡುತ್ತದೆ. ಕಿವಿಗೆ ಇಯರ್‌ಫೋನ್ ಇಟ್ಟಿರುವಾಗ ಇದ್ದಕ್ಕಿದ್ದಂತೆ ಎದ್ದು ಹೋಗಬೇಕಾದರೆ ಸ್ವಲ್ಪ ಎಚ್ಚರ ಬೇಕು. ಇಲ್ಲವಾದಲ್ಲಿ ಇಯರ್‌ಫೋನ್‌ನ ತಂತಿ ತುಂಡಾಗುವ ಸಾದ್ಯತೆ ಇರುತ್ತದೆ. ಈ ವಯರ್ ಇಲ್ಲದಿದ್ದರೆ?

ನಿಸ್ತಂತು ಸ್ಪೀಕರ್ ಮತ್ತು ಇಯರ್‌ಫೋನ್‌ಗಳು

ಸ್ಪೀಕರ್ ಮತ್ತು ಇಯರ್‌ಫೋನ್‌ಗಳನ್ನು ಗಣಕ, ಮೊಬೈಲ್ ಫೋನ್ ಅಥವಾ ಸಂಗೀತ ಉಪಕರಣಗಳ ಜೊತೆ ತಂತಿ ಇಲ್ಲದೆ ನಿಸ್ತಂತು ವಿಧಾನದಲ್ಲಿ (ವಯರ್‌ಲೆಸ್) ಸಂಪರ್ಕಗೊಳಿಸುವ ವಿಧಾನ ಈಗೀಗ ಜನಪ್ರಿಯವಾಗುತ್ತಿದೆ. ಇದಕ್ಕಾಗಿ ಸಾಮಾನ್ಯವಾಗಿ ಬಳಸುವುದು ಬ್ಲೂಟೂತ್ ವಿಧಾನವನ್ನು. ವೈಫೈ ವಿಧಾನವನ್ನು ಬಳಸಬಹುದಾದರೂ ಅದಿನ್ನು ಪೂರ್ತಿ ಸುಧಾರಣೆಯಾಗಿಲ್ಲ. ಬ್ಲೂಟೂತ್‌ನಲ್ಲಾದರೋ ಸಂಗೀತ ಕೇಳಲಿಕ್ಕೆಂದೇ A2DP (Advanced Audio Distribution Profile) ಮತ್ತು AVRCP (Audio/Video Remote Control Profile) ಪ್ರೊಟೋಕಾಲ್‌ಗಳಿವೆ. ಈ ಬಗ್ಗೆ ಗ್ಯಾಜೆಟ್‌ಲೋಕದ ಹಿಂದಿನ ಸಂಚಿಕೆಗಳಲ್ಲಿ ವಿವರಿಸಲಾಗಿದೆ (ನೋಡಿ: bit.ly/gadgetloka10). ಬ್ಲೂಟೂತ್ ಸ್ಪೀಕರ್ ಹಾಗೂ ಇಯರ್‌ಫೋನ್‌ಗಳು ಇವುಗಳನ್ನು ಬಳಸುತ್ತವೆ. ಕ್ರಿಯೇಟಿವ್ ಕಂಪನಿಯ ಇಂತಹ ಎರಡು ಉತ್ಪನ್ನಗಳನ್ನು ಈ ಸಲ ಗಮನಿಸೋಣ.

ಕ್ರಿಯೇಟಿವ್ WP-350 ಬ್ಲೂಟೂತ್ ವಯರ್‌ಲೆಸ್ ಹೆಡ್‌ಸೆಟ್

ಇದು ಬ್ಲೂಟೂತ್ ವಿಧಾನದಲ್ಲಿ ಸಂಪರ್ಕಗೊಳ್ಳುತ್ತದೆ. ಬ್ಲೂಟೂತ್ ಇರುವ ಗಣಕ ಅಥವಾ ಮೊಬೈಲ್ ಫೋನ್ ಜೊತೆ ಬಳಸಬಹುದು. ಇದು ಇಯರ್‌ಫೊನ್ ಅಲ್ಲ. ಪೂರ್ತಿಪ್ರಮಾಣದ ಹೆಡ್‌ಸೆಟ್. ಇದು ಕಿವಿಯ ಒಳಗೆ ಕುಳಿತುಕೊಳ್ಳುವಂತಹದ್ದಲ್ಲ. ಕಿವಿಯ ಮೇಲೆ ಕುಳಿತುಕೊಳ್ಳುತ್ತದೆ. ಇಯರ್‌ಬಡ್‌ಗಳಲ್ಲಿ ಕಿವಿಗೆ ಗಾಳಿ ಓಡಾಟ ಇಲ್ಲದೆ ಒಂದು ರೀತಿಯ ಹಿಂಸೆ ಆಗುತ್ತದೆ. ಇದರಲ್ಲಿ ಹಾಗೆ ಆಗುವುದಿಲ್ಲ. ಇದರಲ್ಲಿ ಚಿಕ್ಕದಾದ ಆದರೆ ಅದಕ್ಕೆಂದೆ ಪ್ರತ್ಯೇಕ ಬಾಲ ಇಲ್ಲದ ಮೈಕ್ರೋಫೋನ್ ಇದೆ. ಈ ಮೈಕ್ರೋಫೋನ್ ಇರುವುದು ಗೊತ್ತೇ ಆಗುವುದಿಲ್ಲ. ಮೈಕ್ರೋಫೋನ್ ಹೆಡ್‌ಸೆಟ್‌ನಲ್ಲೇ ಅಡಕವಾಗಿರುವುದರಿಂದ ಅದು ಬಾಯಿಯಿಂದ ದೂರ ಇರುತ್ತದೆ. ಆದರೆ ಇದರಿಂದ ಧ್ವನಿಯನ್ನು ಗ್ರಹಿಸಲು ಅದಕ್ಕೆ ಏನೇನೂ ತೊಂದರೆ ಆಗದೆ ಧ್ವನಿ ಸ್ಪಷ್ಟವಾಗಿ ಕೇಳುಗರಿಗೆ ಕೇಳಿಸುತ್ತದೆ. ಇದನ್ನು ಮೊಬೈಲ್ ಫೋನ್‌ಗಳ ಜೊತೆ ಹ್ಯಾಂಡ್ಸ್‌ಫ್ರೀ ಆಗಿ ಬಳಸಬಹುದು. ಜೊತೆಗೆ ಸಂಗೀತವನ್ನೂ ಆಲಿಸಬಹುದು. ಇದರಲ್ಲಿ ರಿಚಾರ್ಜೇಬಲ್ ಬ್ಯಾಟರಿ  ಇದೆ. ಅದನ್ನು ಚಾರ್ಜ್ ಮಾಡಲು ಯುಎಸ್‌ಬಿ ಕೇಬಲ್ ಕೊಟ್ಟಿದ್ದಾರೆ. ಪ್ರತ್ಯೇಕ ಚಾರ್ಜರ್ ನೀಡಿಲ್ಲ. ಮನೆಯಲ್ಲಿರುವ ಯಾವುದೇ ಯುಎಸ್‌ಬಿ ಚಾರ್ಜರ್ ಅಥವಾ ಗಣಕದ ಯುಎಸ್‌ಬಿ ಕಿಂಡಿ ಬಳಸಿ ಚಾರ್ಜ್ ಮಾಡಬಹುದು. ಪೂರ್ತಿ ಚಾರ್ಜ್ ಮಾಡಲು ಒಂದು ಗಂಟೆ ಕಾಲ ಬೇಕು. ಒಮ್ಮೆ ಚಾರ್ಜ್ ಮಾಡಿದರೆ 9 ಗಂಟೆ ಬಳಸಬಹುದು.

ಇದರಲ್ಲಿ A2DP ಮತ್ತು AVRCP ಅಡಕವಾಗಿವೆ. ಗಣಕದ ಅಥವಾ ಮೊಬೈಲ್ ಫೋನಿನ ಸಂಗೀತ ಪ್ಲೇಯರ್ ಮೂಲಕ ಹಾಡು ಆಲಿಸುತ್ತಿರುವಾಗ ಮುಂದಿನ ಹಾಡು ಅಥವಾ ಹಿಂದಿನ ಹಾಡಿಗೆ ಹೋಗಲು ಇದರಲ್ಲೇ ಬಟನ್‌ಗಳಿವೆ. ಹಾಗೆಯೇ ಹಾಡನ್ನು ತಾತ್ಕಾಲಿಕವಾಗಿ ನಿಲ್ಲಿಸಲು ಮತ್ತು ಪುನಃ ಪ್ರಾರಂಭಿಸಲೂ ಬಟನ್ ಇದೆ. ವಾಲ್ಯೂಮ್ ಹೆಚ್ಚು ಕಡಿಮೆ ಮಾಡಲೂ ಬಟನ್‌ಗಳಿವೆ.

ಫೋನ್ ಬಂದಾಗ ಕರೆಯನ್ನು ಸ್ವೀಕರಿಸಲು ಬಳಸುವ ಬಟನ್ ಇದರಲ್ಲಿ ಬಹು ಮುಖ್ಯ ಪಾತ್ರವಹಿಸುತ್ತದೆ. ಹಲವು ಕಾರ್ಯಗಳಿಗೆ ಇದೊಂದೆ ಬಟನ್ ನೀಡಲಾಗಿದೆ. ಆನ್ ಆಫ್ ಮಾಡುವುದು, ಗಣಕ ಅಥವಾ ಮೊಬೈಲ್ ಫೋನ್ ಜೊತೆ ಸಂಪರ್ಕ ಸಾಧಿಸುವುದು, ಇತ್ಯಾದಿ ಎಲ್ಲ ಇದೊಂದೆ ಮಾಡುತ್ತದೆ. ಇದರ ಪಕ್ಕದಲ್ಲಿರುವ ಎಲ್‌ಇಡಿ ಕೂಡ ಅದೇ ರೀತಿ. ನೀಲಿ ಬಣ್ಣದಲ್ಲಿ ಮಿನುಗುತ್ತಿದ್ದರೆ ಒಂದು ಕಾರ್ಯ, ಕೆಂಪು ಬಣ್ಣದಲ್ಲಿದ್ದರೆ ಇನ್ನೊಂದು, ಹಸಿರು ಬಣ್ಣದಲ್ಲಿದ್ದರೆ ಮತ್ತಿನ್ನೊಂದು, ವೇಗವಾಗಿ ಮಿನುಗಿದರೆ ಬೇರೆಯೇ ಅರ್ಥ -ಹೀಗೆ ಎಲ್ಲ ಕಾರ್ಯಗಳಿಗೆ ಒಂದೇ ಎಲ್‌ಇಡಿ. ಎಲ್ಲ ಸರಿಯಾಗಿ ಕೈಪಿಡಿ ನೋಡಿ ತಿಳಿದಿರತಕ್ಕದ್ದು. ಲ್ಯಾಪ್‌ಟಾಪ್‌ಗಳಲ್ಲಿ ಸಾಮಾನ್ಯವಾಗಿ ಬ್ಲೂಟೂತ್ ಇರುತ್ತದೆ. ಆದರೆ ಡೆಸ್ಕ್‌ಟಾಪ್‌ಗಳಲ್ಲಿ ಇರುವುದಿಲ್ಲ. ಅಂತಹ ಸಂದರ್ಭಕ್ಕೆಂದೆ ಪ್ರತ್ಯೇಕ ಬ್ಲೂಟೂತ್ ಡಾಂಗಲ್ ಕೊಂಡುಕೊಳ್ಳಲು ಲಭ್ಯವಿದೆ. ಯಾವುದೋ ಒಂದು ಬ್ಲೂಟೂತ್ ಹೆಡ್‌ಸೆಟ್‌ನಲ್ಲಿ, ಬಹುಶಃ ನೋಕಿಯಾ ಇರಬೇಕು, ಇಂತಹ ಸಂದರ್ಭಕ್ಕೆಂದು ವಯರ್ ಮೂಲಕವೂ ಸಂಪರ್ಕ ಮಾಡಬಹುದಾದ ಸೌಲಭ್ಯ ನೀಡಿದ್ದಾರೆ.

ಇದರ ಧ್ವನಿ ಗುಣಮಟ್ಟ ತುಂಬ ಚೆನ್ನಾಗಿದೆ. ಇದರ ಮುಖಬೆಲೆ ಸುಮಾರು ರೂ.6000 ಇದೆ. ಹೆಚ್ಚಿನ ವಿವರಗಳಿಗೆ ಕಂಪೆನಿಯವರ ಜಾಲತಾಣ (in.creative.com) ನೋಡಬಹುದು.

ಕ್ರಿಯೇಟಿವ್ D80 ಬ್ಲೂಟೂತ್ ವಯರ್‌ಲೆಸ್ ಸ್ಪೀಕರ್

ಇದು ಕೂಡ ಬ್ಲೂಟೂತ್ ವಿಧಾನದಲ್ಲಿ ಸಂಪರ್ಕಗೊಳ್ಳುತ್ತದೆ. ಇದು ಸ್ಟೀರಿಯೋ ಸ್ಪೀಕರ್ ಆಗಿದೆ. ಅಂದರೆ ಎರಡು ಸ್ಪೀಕರ್ ಇರಬೇಕು. ಇವೆ ಕೂಡ. ಆದರೆ ಎರಡು ಸ್ಪೀಕರ್‌ಗಳೂ ಒಂದೆ ಪೆಟ್ಟಿಗೆಯಲ್ಲಿವೆ. ಸ್ಪೀಕರ್‌ಗಳನ್ನು ಸ್ವಲ್ಪ ದೂರ ಇಟ್ಟರೆ ಸ್ಟೀರಿಯೋ ಅನುಭವ ಚೆನ್ನಾಗಿ ಆಗುತ್ತದೆ. ಆದರೆ ಅದು ಇದರಲ್ಲಿ ಸಾಧ್ಯವಿಲ್ಲ. ಬ್ಲೂಟೂತ್ ವಿಧಾನದಲ್ಲಿ ಸಂಪರ್ಕಗೊಳ್ಳುವ ನಿಸ್ತಂತು ವ್ಯವಸ್ಥೆ ಇದ್ದರೂ ವಯರ್ ಮೂಲಕವೂ ಜೋಡಿಸಬಹುದಾದ ಸೌಲಭ್ಯ ನೀಡಿದ್ದಾರೆ. ಇದು ನಿಸ್ತಂತು ಆಗಿರುವುದರಿಂದ ಇದರ ಒಳಗಡೆಯೇ ಬ್ಯಾಟರಿ ಇದ್ದರೆ ಒಳ್ಳೆಯದಲ್ಲವೇ? ಆದರೆ ಇದಕ್ಕೆ ಎ.ಸಿ. ವಿದ್ಯುತ್ ಕೇಬಲ್ ಮಾತ್ರ ನೀಡಿದ್ದಾರೆ. ಅಂದರೆ ವಯರ್‌ಲೆಸ್ ಎಂದರೂ ವಿದ್ಯುತ್ ಪ್ಲಗ್ ಹಾಕಲು ಜಾಗ ಹುಡುಕುತ್ತಿರಬೇಕು. ಪಿಕ್‌ನಿಕ್‌ಗೆ ಹೋದಾಗ ಬಳಸಲು ಅಸಾಧ್ಯ. ಇದರ ಗುಣಮಟ್ಟವೂ ಅಷ್ಟಕ್ಕಷ್ಟೆ. ಅತ್ಯುತ್ತಮ ಗುಣಮಟ್ಟಕ್ಕೆ ಹೆಸರಾದ ಕ್ರಿಯೇಟಿವ್ ಕಂಪೆನಿಯಿಂದ ಇಂತಹ ಸಾಧಾರಣ ಸ್ಪೀಕರ್ ಹೊರಬಂದಿದೆ ಎಂದರೆ ನಂಬಲಿಕ್ಕೆ ಆಗುವುದಿಲ್ಲ.

ಗ್ಯಾಜೆಟ್ ಸಲಹೆ

ಬಾಲಮುರಳಿ ಪಾರ್ಥಸಾರಥಿ ಅವರ ಪ್ರಶ್ನೆ: ನನಗೆ ವನ್ಯಜೀವಿ ಛಾಯಾಗ್ರಾಹಕ ಆಗಬೇಕೆಂಬ ಆಸೆ. ಸುಮಾರು 60-70 ಸಾವಿರ ರೂ.ಗಳಲ್ಲಿ ಇದಕ್ಕೆ ಅನುವು ಮಾಡಿಕೊಡುವ ಕ್ಯಾಮರ ಮತ್ತು ಲೆನ್ಸ್ ಕೊಳ್ಳಬೇಕಾಗಿದೆ. ಸಲಹೆ ನೀಡಿ.

ಉ: ಬಜೆಟ್ ಜಾಸ್ತಿ ಮಾಡಿಕೊಂಡರೆ ಒಳ್ಳೆಯದು. ಕ್ಯಾನನ್ 550D ಕ್ಯಾಮರ ಕೊಳ್ಳಬಹುದು (ರೂ.35 ಸಾವಿರ). ಉತ್ತಮ ಟೆಲಿಫೋಟೋ ಲೆನ್ಸ್ ಕೊಂಡುಕೊಳ್ಳಬೇಕು. ಕನಿಷ್ಠ 300ಮಿಮಿ ಫೋಕಲ್ ಲೆನ್ತ್ ಇದ್ದರೆ ಒಳ್ಳೆಯದು. 400ಮಿಮಿ, 500ಮಿಮಿ -ಹೀಗೆ ಫೋಕಲ್ ಲೆನ್ತ್ (ನಾಭಿಬಿಂದು) ಹೆಚ್ಚಾದಷ್ಟು ಒಳ್ಳೆಯದು. ಆದರೆ ಇಂತಹ ಲೆನ್ಸ್‌ಗಳು ತುಂಬ ದುಬಾರಿ. ಜೊತೆಗೆ ಒಳ್ಳೆಯ ಕ್ಯಾಮರ ಸ್ಟ್ಯಾಂಡ್ ಕೂಡ ಕೊಳ್ಳತಕ್ಕದ್ದು.

-ಡಾ| ಯು. ಬಿ. ಪವನಜ

—- —-

ಗುರುತ್ತ್ವಾಕರ್ಷಣೆಯ ತತ್ತ್ವ ನ್ಯೂಟನ್‌ಗಿಂತ ಮೊದಲೇ ಭಾರತೀಯರಿಗೆ ಗೊತ್ತಿತ್ತು. ಅದು ಯಾವ ರೀತಿ ಎಂದರೆ “ನ್ಯೂಟನ್‌ನ ತಲೆಯ ಮೇಲೆ ಸೇಬಿನಹಣ್ಣು ಬಿದ್ದದ್ದರಿಂದ ಗುರುತ್ತ್ವಾಕರ್ಷಣ ತತ್ತ್ವದ ಜ್ಞಾನೋದಯವಾಯಿತೆಂಬುದು ಎಲ್ಲರಿಗೂ ತಿಳಿದ ವಿಷಯ. ನ್ಯೂಟನ್‌ಗೂ ಮುಂಚೆಯೇ ಭಾರತದ ಜ್ಞಾನಿಗಳಿಗೂ ಈ ಬಗ್ಗೆ ಜ್ಞಾನೋದಯವಾಗಿತ್ತು. ಭಾರತದ ಪಶ್ಟಿಮ ತೀರಗಳಲ್ಲಿ (ಕೇರಳ, ಗೋವಾ) ಸೇಬಿನ ಮರಗಳಿಲ್ಲ. ಜ್ಞಾನಿಗಳಿದ್ದರು. ಅವರಲ್ಲೊಬ್ಬನ (ಈ ಜ್ಞಾನಿಗೆ ಸ್ವಾಮೀ ಗುರುತ್ವಾನಂದ ಎಂದು ವಿಜ್ಞಾನಿ ಜಯಂತ್ ನಾರ್ಳಿಕರ್ ನಾಮಕರಣ ಮಾಡಿದ್ದಾರೆ.) ತಲೆಯ ಮೇಲೆ ಸೇಬಿನ ಬದಲು (ಅಲ್ಲಿ ಯಥೇಚ್ಛವಾಗಿ ಸಿಗುವ) ತೆಂಗಿನಕಾಯಿ ಬಿದ್ದಿತು. ಜ್ಞಾನೋದಯವೇನೋ ಆಯಿತು. ಆದರೆ ಅದನ್ನು ಇತರರಿಗೆ ತಿಳಿಸಿಕೊಡಲು ಆತ ಉಳಿಯಲಿಲ್ಲ……”

—- —-

ಅಧ್ಯಾಪಕ: ಆಮ್ಲಜನಕ ನಮಗೆ ಉಸಿರಾಡಲು ಬಹು ಮುಖ್ಯ. ಇದು ಇಲ್ಲದೆ ನಮಗೆ ಬದುಕಲು ಅಸಾಧ್ಯ. ಆಮ್ಲಜನಕವನ್ನು ೧೮ನೆಯ ಶತಮಾನದ ಕೊನೆಗೆ ಪ್ರಿಸ್ಲಿ ಎಂಬ ವಿಜ್ಞಾನಿಯು ಕಂಡುಹಿಡಿದನು.

ವಿದ್ಯಾರ್ಥಿ: ಸಾರ್, ಅದಕ್ಕಿಂತ ಮೊದಲು ಜನರು ಹೇಗೆ ಬದುಕಿದ್ದರು?

—- —-

ಅಧ್ಯಾಪಕ: ನೀರಿನ ರಾಸಾಯನಿಕ ಸೂತ್ರ ಹೇಳು.

ವಿದ್ಯಾರ್ಥಿ: H I J K L M N O

ಅಧ್ಯಾಪಕ: ಏನೋ ಅದು ನೀನು ಹೇಳುತ್ತಿರುವುದು?

ವಿದ್ಯಾರ್ಥಿ: ನೀವೇ ಹೇಳಿದ್ದಲ್ಲವೇ ಸಾರ್, ನೀರಿನ ರಾಸಾಯನಿಕ ಸೂತ್ರ ಎಚ್ ಟು ಒ (H to O) ಎಂದು?

—- —–

ವಿದ್ಯಾರ್ಥಿ: ಸಾರ್, ನೀವು ಹೇಳಿದ್ದಿರಿ, ಬೆಳಕು ಶಬ್ದಕ್ಕಿಂತ ವೇಗವಾಗಿ ಚಲಿಸುತ್ತದೆ ಎಂದು.

ಅಧ್ಯಾಪಕ: ಹೌದು, ಯಾಕೆ?

ವಿದ್ಯಾರ್ಥಿ: ಅಂದರೆ ನಮ್ಮಿಂದ ಸ್ವಲ್ಪ ದೂರದಲ್ಲಿ ಒಂದು ಘಟನೆ ನಡೆದರೆ ಅದರ ದೃಶ್ಯ ಮೊದಲು ಕಾಣಿಸುತ್ತದೆ, ಶಬ್ದ ನಂತರ ಕೇಳಿಸುತ್ತದೆ ಎಂದು ಅರ್ಥ ಅಲ್ಲವೇ ಸಾರ್?

ಅಧ್ಯಾಪಕ: ಹೌದು. ಚೆನ್ನಾಗಿಯೇ ತಿಳಿದುಕೊಂಡಿದ್ದೀಯ.

ವಿದ್ಯಾರ್ಥಿ: ಆದರೆ ನಮ್ಮ ಮನೆಯಲ್ಲಿ ಇದಕ್ಕೆ ವಿರುದ್ಧವಾಗಿ ನಡೆಯುತ್ತಿದೆ.

ಅಧ್ಯಾಪಕ: ಹೌದೇ? ಅದು ಹೇಗೆ?

ವಿದ್ಯಾರ್ಥಿ: ನಾನು ಟಿ.ವಿ.ಯ ಸ್ವಿಚ್ ಹಾಕಿದಾಗ ಶಬ್ದ ಮೊದಲು ಬರುತ್ತದೆ, ಸ್ವಲ್ಪ ಸಮಯದ ನಂತರ ಚಿತ್ರ ಮೂಡಿಬರುತ್ತದೆ!

—- —–

ಅಧ್ಯಾಪಕ: ಸೂರ್ಯ ಮತ್ತು ಚಂದ್ರ -ಇವುಗಳಲ್ಲಿ ಯಾವುದು ನಮ್ಮಿಂದ ದೂರ ಇದೆ? ಯಾವುದು ಹತ್ತಿರ ಇದೆ?

ವಿದ್ಯಾರ್ಥಿ: ಸೂರ್ಯ ಹತ್ತಿರ, ಚಂದ್ರ ದೂರ ಸಾರ್.

ಅಧ್ಯಾಪಕ: ಅದು ಹೇಗೋ?

ವಿದ್ಯಾರ್ಥಿ: ಸೂರ್ಯನ ಬೆಳಕು ತುಂಬ ಬಿಸಿ. ಚಂದ್ರನದು ತಂಪು. ಆದುದರಿಂದ ಸೂರ್ಯ ಹತ್ತಿರ ಚಂದ್ರ ದೂರ ಎಂದು ನಾವು ತೀರ್ಮಾನಿಸಬಹುದು.

—- —–

ಅಧ್ಯಾಪಕ: ಆಂಟಿಮನಿ ಎಂದರೇನು?

ವಿದ್ಯಾರ್ಥಿ: ನಮ್ಮ ಮನೆಗೆ ಭೇಟಿ ಇತ್ತ ಆಂಟಿ ಕೊಟ್ಟ ಹಣ ಸಾರ್.

—- —-

ಅಧ್ಯಾಪಕ: ಅಮೋನಿಯಾ ಮತ್ತು ನ್ಯುಮೋನಿಯಾ ಬಗ್ಗೆ ಚುಟುಕಾಗಿ ಹೇಳು.

ವಿದ್ಯಾರ್ಥಿ: ಅಮೋನಿಯಾ ಒಂದು ಅನಿಲ. ಅದನ್ನು ನೀರಿನಲ್ಲಿ ಕರಗಿಸಿದರೆ ಕ್ಷಾರವಾಗುತ್ತದೆ. ಆ ನೀರನ್ನು ಕುಡಿದರೆ ನ್ಯುಮೋನಿಯಾ ಬರುತ್ತದೆ.

—- —-

ಅಧ್ಯಾಪಕ: ಹುಳಿಮಳೆ ಎಂದರೇನು?

ವಿದ್ಯಾರ್ಥಿ: ನಾವು ಶಾಲೆ ಬಿಡುವ ಹೊತ್ತಿಗೆ ಸರಿಯಾಗಿ ಮನೆಗೆ ಹೋಗುವಾಗ ಮಳೆಯಲ್ಲಿ ನೆನಯುವಂತೆ ಮಾಡಲು ಹುಳಿಬುದ್ಧಿಯಿಂದ ವರುಣದೇವ ಸುರಿಸುವ ಮಳೆ.

—- —-

ಅಧ್ಯಾಪಕ: ಅಲೆಕ್ಸಾಂಡರ್ ಗ್ರಹಾಂ ಬೆಲ್ ಟೆಲಿಫೋನ್ ಕಂಡುಹಿಡಿಯದಿದ್ದರೆ ಏನಾಗುತ್ತಿತ್ತು?

ವಿದ್ಯಾರ್ಥಿ: ರಾಮಕೃಷ್ಣ ಹೆಗಡೆಯವರು ಮುಖ್ಯಮಂತ್ರಿ ಪದವಿ ಕಳೆದುಕೊಳುತ್ತಿರಲಿಲ್ಲ.

—- —–

ಅಧ್ಯಾಪಕ: ಜೇಮ್ಸ್ ವ್ಯಾಟ್ ಉಗಿಯಂತ್ರ ಕಂಡುಹಿಡಿಯದ್ದರೆ ಏನಾಗುತ್ತಿತ್ತು?

ವಿದ್ಯಾರ್ಥಿ: ಹಲವಾರು ರೈಲು ಅಪಘಾತಗಳಲ್ಲಿ ಸಾವಿರಾರು ಜನರು ಪ್ರಾಣ ಕಳೆದುಕೊಳ್ಳುತ್ತಿರಲಿಲ್ಲ.

—– —–

ಅಧ್ಯಾಪಕ: ಮೈಕೆಲ್ ಫಾರಡೆ ವಿದ್ಯುಚ್ಛಕ್ತಿ ಕಂಡುಹಿಡಿಯದಿದ್ದರೆ ಏನಾಗುತ್ತಿತ್ತು?

ವಿದ್ಯಾರ್ಥಿ: ನಮಗೆ ಪರೀಕ್ಷೆಗೆ ಒಂದು ಪ್ರಶ್ನೆ ಕಡಿಮೆಯಾಗುತ್ತಿತ್ತು.

—- *** —

ಹಿಂದಿನ ಸಂಚಿಕೆಯಲ್ಲಿ ನಾವು ಮೊಬೈಲ್ ಯಂತ್ರಾಂಶವನ್ನು ಮತ್ತು ಅದರ ಅಂಗಾಂಗಳನ್ನು ನೋಡಿದೆವು. ಈ ಸಲ ಮೊಬೈಲ್ ಫೋನುಗಳಲ್ಲಿ ಬಳಕೆಯಾಗುವ ಹಲವು ವಿಧದ ತಂತ್ರಾಂಶಗಳನ್ನು ಮತ್ತು ಅವುಗಳ ಗುಣವೈಶಿಷ್ಟ್ಯಗಳನ್ನು ತಿಳಿಯೋಣ.

ಮೊಬೈಲ್ ಒಂದು ಕಿಸೆಗಣಕವೇ ಸರಿ. ಅಂತೆಯೇ ಅದರಲ್ಲೂ ಕಾರ್ಯಾಚರಣೆಯ ವ್ಯವಸ್ಥೆ ಇರುತ್ತದೆ. ಸ್ಮಾರ್ಟ್‌ಫೋನ್ ಕಾರ್ಯಾಚರಣ ವ್ಯವಸ್ಥೆಗಳು ಹಲವಿವೆ. ಅವು ಆಪಲ್‌ನ ಐಓಎಸ್, ಆಂಡ್ರೋಯಿಡ್, ಬ್ಲ್ಯಾಕ್‌ಬೆರ್ರಿ ಮತ್ತು ವಿಂಡೋಸ್ ಫೋನ್. ಐಓಎಸ್ ಆಪಲ್ ಫೋನ್‌ಗಳಲ್ಲಿ ಮಾತ್ರ ಬಳಕೆಯಾಗುತ್ತವೆ. ಅಂದರೆ ಐಫೋನ್ ಕೊಳ್ಳುವಾಗ ಯಾವ ಕಾರ್ಯಾಚರಣ ವ್ಯವಸ್ಥೆ ಎಂದು ಹೆಚ್ಚು ತಲೆಕೆಡಿಸಿಕೊಳ್ಳಬೇಕಾಗಿಲ್ಲ. ಆದರೂ ಯಾವ ಆವೃತ್ತಿ ಎಂಬುದರ ಕಡೆಗೆ ಗಮನ ಕೊಡಬೇಕು. ಈಗ ಆವೃತ್ತಿ 4 ಚಾಲ್ತಿಯಲ್ಲಿದೆ. ಕೊಳ್ಳುವ ಮೊದಲು ಅಂತರಜಾಲದಲ್ಲಿ ಸ್ವಲ್ಪ ಹುಡುಕಾಡಿ ಯಾವುದು ಇತ್ತೀಚೆಗಿನ ಆವೃತ್ತಿ ಎಂದು ತಿಳಿದುಕೊಳ್ಳುವುದು ಒಳ್ಳೆಯದು. ಇದೇ ಮಾತು ಇತರೆ ಕಾರ್ಯಾಚರಣ ವ್ಯವಸ್ಥೆಗಳಿಗೂ ಅನ್ವಯಿಸುತ್ತದೆ. ಹಾಗೆಯೇ ಬ್ಲ್ಯಾಕ್‌ಬೆರ್ರಿ ಕೂಡ. ಆಂಡ್ರೋಯಿಡ್ ಮಾತ್ರ ಹಾಗಲ್ಲ. ಆಂಡ್ರೋಯಿಡ್ ಕಾರ್ಯಾಚರಣ ವ್ಯವಸ್ಥೆಯನ್ನೊ ಒಳಗೊಂಡ ಫೋನ್‌ಗಳು ಹಲವಾರಿವೆ. ಹಲವು ಕಂಪೆನಿಗಳು ಈ ಫೋನ್‌ಗಳನ್ನು ತಯಾರಿಸುತ್ತಿವೆ. ಒಂದೊಂದೂ ಬೇರೆ ಬೇರೆ ಆವೃತ್ತಿಯನ್ನು ಒಳಗೊಂಡಿವೆ.

ಆಪಲ್ ಐಓಎಸ್

ಇವು ಆಪಲ್ ಕಂಪೆನಿಯ ಐಫೋನ್‌ಗಳಲ್ಲಿ ಮಾತ್ರ ಬಳಕೆಯಾಗುತ್ತವೆ. ಇವು ಸಂಪೂರ್ಣ ಮುಚ್ಚಿದ ಅರ್ಥಾತ್ ಏಕಸ್ವಾಮ್ಯಕ್ಕೊಳಪಟ್ಟ ತಂತ್ರಾಂಶ. ಐಫೋನ್ ಕೂಡ ಇದೇ ಜಾತಿಯದು. ಅದಕ್ಕೆ ಏನನ್ನು ಸೇರಿಸಬೇಕಾದರೂ ಆಪಲ್ ಕಂಪೆನಿಯದೇ ಆದ ಐಟ್ಯೂನ್ ಎಂಬ ಕಿರಿಕಿರಿ ತಂತ್ರಾಂಶದ ಮೂಲಕವೇ ಸೇರಿಸಬೇಕು. ಫೋನಿನಲ್ಲಿ ಏನನ್ನು ಬೇಕಾದರೂ ತುಂಬಿಸಲು ಅದು ಬಿಡುವುದಿಲ್ಲ. ನಿಮ್ಮ ಸ್ನೇಹಿತರ ಫೋನಿನಿಂದ ನಿಮ್ಮ ಫೋನಿಗೆ ಸಂಗೀತ, ಚಿತ್ರ, ಅಥವಾ ಯಾವುದೇ ಫೈಲುಗಳನ್ನು ಅದು ಪರಸ್ಪರ ವರ್ಗಾವಣೆ ಮಾಡಿಕೊಳ್ಳಲು ಬಿಡುವುದಿಲ್ಲ. ಎಲ್ಲವೂ ಐಟ್ಯೂನ್ ಮುಖಾಂತರವೇ ನಡೆಯಬೇಕು. ಐಫೋನ್ ಬರುವ ಮೊದಲೂ ಸ್ಮಾರ್ಟ್‌ಫೋನ್‌ಗಳಿದ್ದವು. ಆದರೆ ಐಫೋನ್ ಬಳಕೆಯ ಅನುಭವದಲ್ಲಿ ಒಂದು ಹೊಸ ಕ್ರಾಂತಿಯನ್ನೇ ಮಾಡಿತು. ಎಲ್ಲ ಸ್ಮಾರ್ಟ್‌ಫೋನ್‌ಗಳಂತೆ ಇವು ಕೂಡ ಸ್ಪರ್ಶ ಪರದೆಯನ್ನು ಹೊಂದಿವೆ. ಇವುಗಳನ್ನು ಬಳಸಲು ಪ್ಲಾಸ್ಟಿಕ್ ಕಡ್ಡಿ ಬೇಕಾಗಿಲ್ಲ. ಬೆರಳು ಸಾಕು. ಎರಡು ಬೆರಳುಗಳನ್ನು ಬಳಸಿ ಚಿತ್ರವನ್ನು ಹಾಗೂ ಪಠ್ಯವನ್ನು ಹಿಗ್ಗಿಸುವ ಕುಗ್ಗಿಸುವ ಸವಲತ್ತನ್ನು ಬಹುಶಃ ಮೊದಲ ಬಾರಿಗೆ ನೀಡಿದ್ದು ಐಫೋನ್. ಉತ್ತಮ ಮಟ್ಟದ ಪರದೆ, ಗ್ರಾಫಿಕ್ಸ್, ಸ್ಪರ್ಶದ ಮೂಲಕವೇ ಬಳಸುವ ಕೀಲಿಮಣೆ, ಜಿಪಿಎಸ್ ತಂತ್ರಜ್ಞಾನದ ಮೂಲಕ ತಾನಿರುವ ಸ್ಥಳದ ಪತ್ತೆ, ಕಡತಗಳನ್ನು ತೆರೆಯುವ ಸವಲತ್ತು, ಸಾವಿರಾರು ತಂತ್ರಾಂಶಗಳ ಲಭ್ಯತೆ, ಕ್ಯಾಮರಾ, ಸಂಗೀತ ಮತ್ತು ಚಲನಚಿತ್ರ ವೀಕ್ಷಣೆ, ಅಂತರಜಾಲ ಸಂಪರ್ಕ, ಜಾಲತಾಣ ವೀಕ್ಷಣೆ, ಇಮೈಲ್ -ಇನ್ನೂ ಹಲವಾರು ಸವಲತ್ತುಗಳು ಎಲ್ಲ ಸ್ಮಾರ್ಟ್‌ಫೋನ್‌ಗಳಲ್ಲಿರುವಂತೆ ಐಫೋನ್‌ನಲ್ಲೂ ಇವೆ. ಐಫೋನ್‌ಗೆ ಯಾವುದೇ ತಂತ್ರಾಂಶ ಹಾಕಬೇಕಿದ್ದರೂ ಅವರದೇ ಜಾಲತಾಣದಿಂದ ಹಣಕೊಟ್ಟು ಡೌನ್‌ಲೋಡ್ ಮಾಡಿ ಅವರದೇ ಐಟ್ಯೂನ್ ಎಂಬ ತಂತ್ರಾಂಶದ ಮೂಲಕ ಮಾತ್ರ ತಂತ್ರಾಂಶ ಸೇರಿಸಲು ಸಾಧ್ಯ. ಉಚಿತ ತಂತ್ರಾಂಶವಾದರೂ ಇದೇ ವಿಧಾನವನ್ನು ಬಳಸಬೇಕು. ಅತಿ ದುಬಾರಿ ಐಫೋನ್‌ಗಳಲ್ಲಿ ಬಳಕೆಯಾಗುವ ಐಓಎಸ್ ಕಾರ್ಯಾಚರಣೆಯ ವ್ಯವಸ್ಥೆಯಲ್ಲಿ ಕನ್ನಡದ ಬೆಂಬಲ ಇದೆ.

ಆಂಡ್ರೋಯಿಡ್

ಸದ್ಯ ಸ್ಮಾರ್ಟ್‌ಫೋನ್ ಕಾರ್ಯಾಚರಣೆಯ ವ್ಯವಸ್ಥೆಗಳಲ್ಲಿ ನಂ.1 ಸ್ಥಾನದಲ್ಲಿ ಆಂಡ್ರೋಯಿಡ್ ಇದೆ. ಆಂಡ್ರೋಯಿಡ್ ಬಹುಮಟ್ಟಿಗೆ ತೆರೆದ ವಿನ್ಯಾಸ. ಇದು ಮುಕ್ತ ತಂತ್ರಾಂಶಗಳನ್ನು ಆಧರಿಸಿವೆ. ಮೂಲಭೂತವಾಗಿ ಇದು ಲೈನಕ್ಸ್ ಮೇಲೆ ಕಟ್ಟಲ್ಪಟ್ಟಿದೆ. ಹಲವು ಕಡೆ ಜಾವಾ ಬಳಸಲಾಗಿದೆ. ಫೋನ್ ತಯಾರಕರು ತಮಗಿಷ್ಟಬಂದಂತೆ ಅಲ್ಲಲ್ಲಿ ಬದಲಾವಣೆಗಳನ್ನು ಮಾಡಿ ತಮ್ಮ ಫೋನ್‌ಗಳಲ್ಲಿ ಅಳವಡಿಸಿರುತ್ತಾರೆ. ಆಂಡ್ರೋಯಿಡ್ ಫೋನ್‌ಗಳನ್ನು ಯಾವುದೇ ಒಂದು ಕಂಪೆನಿ ಮಾತ್ರ ತಯಾರಿಸುತ್ತಿಲ್ಲ. ಸ್ಯಾಮ್‌ಸಂಗ್, ಎಚ್‌ಟಿಸಿ, ಎಲ್‌ಜಿ, ಮೋಟೊರೋಲ ಮತ್ತು ಇನ್ನೂ ಹಲವಾರು ಕಂಪೆನಿಗಳು ಆಂಡ್ರೋಯಿಡ್ ಫೋನ್ ತಯಾರಿಸುತ್ತಿವೆ. ಆಂಡ್ರೋಯಿಡ್ ಆವೃತ್ತಿಗಳಿಗೆ ವಿಚಿತ್ರವಾಗಿ ತಿಂಡಿಗಳ ಹೆಸರಿಟ್ಟಿದ್ದಾರೆ. ಉದಾಹರಣೆಗೆ – ಮೊಸರು (Forozen Yoghurt), ಬ್ರೆಡ್, ಐಸ್‌ಕ್ರೀಂ, ಇತ್ಯಾದಿ.

ಆಂಡ್ರೋಯಿಡ್‌ಗೆ ಆನ್ವಯಿಕ ತಂತ್ರಾಂಶಗಳು ಲಕ್ಷಕ್ಕಿಂತಲೂ ಅಧಿಕ ಸಂಖ್ಯೆಯಲ್ಲಿ ಲಭ್ಯವಿವೆ. ಇವುಗಳು ಆಂಡ್ರೋಯಿಡ್ ಮಾರುಕಟ್ಟೆಯಲ್ಲಿ (market.android.com) ದೊರೆಯುತ್ತವೆ. ಆಂಡ್ರೋಯಿಡ್ ಜನಪ್ರಿಯತೆಗೆ ಕೆಲವು ಮುಖ್ಯ ಕಾರಣಗಳು – ಅತಿ ದುಬಾರಿಯಲ್ಲ, ಅತಿ ಹೆಚ್ಚು ಶಕ್ತಿಶಾಲಿಯಾದ ಮತ್ತು ಕಡಿಮೆ ಶಕ್ತಿಶಾಲಿಯಾದ ಆದರೆ ಜನಸಾಮಾನ್ಯರ ಕೈಗೆಟುಕುವ ಬೆಲೆಯಲ್ಲೂ ಲಭ್ಯ ಮಾದರಿಗಳು, ಅತಿ ಹೆಚ್ಚಿನ ಸಂಖ್ಯೆಯಲ್ಲಿ ಉಚಿತ ತಂತ್ರಾಂಶಗಳು ದೊರೆಯುತ್ತಿವೆ, ಯಾರು ಬೇಕಾದರೂ ಸುಲಭವಾಗಿ ತಂತ್ರಾಂಶ ತಯಾರಿಸಿ ಇತರರಿಗೆ ಹಂಚಬಹುದು, ಇತ್ಯಾದಿ.

ಆದರೂ ಒಂದು ಪ್ರಮುಖ ವಿಷಯವನ್ನು ಆಂಡ್ರೋಯಿಡ್ ಫೋನ್ ಕೊಳ್ಳುವವರು ಗಮನಿಸಲೇಬೇಕು. ಆಂಡ್ರೋಯಿಡ್ ಇರುವ ಫೋನ್ ವೇಗವಾಗಿ ಕೆಲಸ ಮಾಡಬೇಕಾದರೆ ಕನಿಷ್ಠ ಒಂದು ಗಿಗಾಹರ್ಟ್ಝ್ ವೇಗದ ಪ್ರೋಸೆಸರ್ ಅಗತ್ಯ. ಎರಡು ಹೃದಯದ ಪ್ರೋಸೆಸರ್ (dual core) ಇದ್ದರೆ  ಇನ್ನೂ ಒಳ್ಳೆಯದು.

ಆಂಡ್ರೋಯಿಡ್‌ನಲ್ಲಿ ಕನ್ನಡದ ಬೆಂಬಲ ಇನ್ನೂ ಪೂರ್ತಿಯಾಗಿ ನೀಡಿಲ್ಲ. ಆದರೂ ಕೆಲವು ಫೋನ್ ತಯಾರಕರು ತಮ್ಮ ಆಂಡ್ರೋಯಿಡ್ ಫೋನ್‌ಗಳಲ್ಲಿ ಕನ್ನಡದ ಬೆಂಬಲ ನೀಡಿದ್ದಾರೆ. ಉದಾಹರಣೆಗೆ ಸ್ಯಾಮ್‌ಸಂಗ್ ಗ್ಯಾಲಕ್ಸಿ ಫೋನ್‌ಗಳು.

ಬ್ಲ್ಯಾಕ್‌ಬೆರ್ರಿ

ಆಪಲ್‌ನಂತೆಯೇ ಇದು ಕೂಡ ಸಂಪೂರ್ಣ ಏಕಸ್ವಾಮ್ಯದ ಫೋನ್ ಮತ್ತು ತನ್ನದೇ ತಂತ್ರಾಂಶ ವ್ಯವಸ್ಥೆಯನ್ನು ಹೊಂದಿದೆ. ಪ್ರಾರಂಭದಲ್ಲಿ ತಯಾರಾಗುತ್ತಿದ್ದ ಬ್ಲ್ಯಾಕ್‌ಬೆರ್ರಿ ಫೋನ್‌ಗಳಿಗೆ ಸಂಪೂರ್ಣ ಕೀಲಿಮಣೆ ಇರುತ್ತಿತ್ತು. ಈಗೀಗ ಮಾರುಕಟ್ಟೆಯಲ್ಲಿ ದೊರೆಯುತ್ತಿರುವ ಬ್ಲ್ಯಾಕ್‌ಬೆರ್ರಿ ಫೋನ್‌ಗಳಲ್ಲಿ ಸ್ಪರ್ಶಪರದೆ ಅಳವಡಿಸಲಾಗಿದೆ.

ಬ್ಲ್ಯಾಕ್‌ಬೆರ್ರಿ ಫೋನ್‌ಗಳು ತಮ್ಮದೇ ಆದ ಸರ್ವರ್ ಹೊಂದಿದ್ದು ಎಲ್ಲ ಇಮೈಲ್‌ಗಳು ಅದರ ಮೂಲಕವೇ ಬರುತ್ತವೆ. ಅಂದರೆ ಬ್ಲ್ಯಾಕ್‌ಬೆರ್ರಿ ಫೋನಿಗೆ ಹಣಕೊಟ್ಟು ಕೊಳ್ಳುವುದರ ಜೊತೆ ಈ ಸರ್ವರ್‌ಗೆ ಚಂದಾದಾರಗಬೇಕು. ಇಮೈಲ್ ಬಂದೊಡನೆ ಅದು ಇಮೈಲನ್ನು ಗ್ರಾಹಕರ ಫೋನಿಗೆ ತಳ್ಳುತ್ತದೆ. ಇದಕ್ಕೆ ಪುಶ್ ಟೆಟ್ಕ್ನಾಲಜಿ ಎಂಬ ಹೆಸರಿದೆ. ಬ್ಲ್ಯಾಕ್‌ಬೆರ್ರಿ ಮೆಸ್ಸೆಂಜರ್ ಸರ್ವಿಸ್ ಎಂಬ ಒಂದು ಸಂದೇಶ ಸೇವೆಯೂ ಬ್ಲ್ಯಾಕ್‌ಬೆರ್ರಿಗೆ ಮಾತ್ರ ಲಭ್ಯವಿರುವ ವಿಶಿಷ್ಟ ಸೇವೆಯಾಗಿದೆ.

ಈ ಫೋನ್‌ಗಳ ಗುಣ ವೈಶಿಷ್ಟ್ಯಗಳ ಕಡೆ ಗಮನ ಕೊಟ್ಟರೆ ಇತರೆ ಸ್ಮಾರ್ಟ್‌ಫೋನ್‌ಗಳಲ್ಲಿರುವ ಬಹುಪಾಲು ಗುಣಗಳನ್ನು ಇವುಗಳಲ್ಲಿ ಕಾಣಬಹುದು. ಆದರೆ ಐಫೋನ್ ಅಥವಾ ಆಂಡ್ರೋಯಿಡ್ ಫೋನ್‌ಗಳಿರುವಷ್ಟು ತಂತ್ರಾಂಶಗಳು ಇವುಗಳಿಗೆ ಲಭ್ಯವಿಲ್ಲ. ತಮ್ಮ ತಂತ್ರಾಂಶ, ಮಾರುಕಟ್ಟೆ, ತಂತ್ರಜ್ಞಾನ ಎಲ್ಲವನ್ನು ಬಿಗಿಯಾಗಿ ತಮ್ಮ ಮುಷ್ಟಿಯಲ್ಲಿಟ್ಟುಕೊಂಡಿದ್ದು ಇದರ ಹಿನ್ನಡೆಗೆ ಒಂದು ಕಾರಣವಾಗಿರಬಹುದು. ಜೊತೆಗೆ ಐಫೋನ್ ಮತ್ತು ಆಂಡ್ರೋಯಿಡ್ ಹೊಡೆತ.

ವಿಂಡೋಸ್ ಫೋನ್

ಮೈಕ್ರೋಸಾಫ್ಟ್ ಕಂಪೆನಿ ಮೊಬೈಲ್ ಫೋನ್‌ಗಳಿಗೋಸ್ಕರ ವಿಂಡೋಸ್ ಫೋನ್ ಎಂಬ ಕಾರ್ಯಾಚರಣೆಯ ವ್ಯವಸ್ಥೆಯನ್ನು ತಯಾರಿಸಿದೆ. ಸ್ಯಾಮ್‌ಸಂಗ್, ಎಚ್‌ಟಿಸಿ ಇತ್ಯಾದಿ ಕಂಪೆನಿಗಳು ಈ ಕಾರ್ಯಾಚರಣೆಯ ವ್ಯವಸ್ಥೆಯನ್ನು ಅಳವಡಿಸಿರುವ ಫೋನ್ ತಯಾರಿಸುತ್ತಿವೆ. ಐಫೋನ್ ಮಾರುಕಟ್ಟೆಯನ್ನು ಪ್ರವೇಶಿಸುವ ಮೊದಲು ಮೈಕ್ರೋಸಾಫ್ಟ್‌ನವರ ಮೊಬೈಲ್ ಫೋನ್ ತಂತ್ರಾಂಶವನ್ನು ಹೊಂದಿದ ಫೋನ್‌ಗಳು ಮಾರುಕಟ್ಟೆಯಲ್ಲಿ ಉತ್ತಮ ಸ್ಥಾನವನ್ನು ಹೊಂದಿದ್ದವು. ಅವು ಅದಕ್ಕೂ ಮೊದಲು ಪಿಡಿಎ ಕ್ಷೇತ್ರದಲ್ಲಿ ಮೊದಲ ಸ್ಥಾನದಲ್ಲಿದ್ದ ಪಾಮ್ (Palm) ಕಂಪೆನಿಯನ್ನು ಕೆಳಕ್ಕೆ ತಳ್ಳಿದ್ದವು. ಆದರೆ ಐಫೋನ್ ಎಲ್ಲವನ್ನು ತಲೆಕೆಳಗೆ ಮಾಡಿತ್ತು. ಇತ್ತೀಚೆಗೆ ಮೈಕ್ರೋಸಾಪ್ಟ್ ಪುನಃ ಈ ಕ್ಷೇತ್ರದಲ್ಲಿ ತನ್ನ ಸ್ಥಾನವನ್ನು ವಾಪಾಸು ಪಡೆಯಲು ವಿಂಡೋಸ್ ಫೋನ್ ಎಂಬ ಕಾರ್ಯಾಚರಣೆಯ ವ್ಯವಸ್ಥೆಯನ್ನು ಬಿಡುಗಡೆ ಮಾಡಿದೆ. ಇದು ತುಂಬ ಚೆನ್ನಾಗಿದೆ.

ಸಾಮಾನ್ಯ ಫೋನ್‌ಗಳಲ್ಲಿ ಪ್ರಪಂಚದಲ್ಲೇ ಮೊದಲ ಸ್ಥಾನದಲ್ಲಿರುವ ನೋಕಿಯಾ ಕಂಪೆನಿ ಸ್ಮಾರ್ಟ್‌ಫೋನ್ ಕ್ಷೇತ್ರದಲ್ಲಿ ಅಂತಹ ಹೆಸರನ್ನೇನೂ ಮಾಡಿಲ್ಲ. ಅದು ತನ್ನದೇ ಸ್ಮಾರ್ಟ್‌ಫೋನ್ ತಯಾರಿಸಿದೆ. ಆದರೆ ಅದು ಅಷ್ಟು ಮಾರಾಟವಾಗುತ್ತಿಲ್ಲ. ಇತ್ತೀಚೆಗೆ ನೋಕಿಯಾ ಕಂಪೆನಿ ಮೈಕ್ರೋಸಾಫ್ಟ್ ಜೊತೆ ಒಪ್ಪಂದ ಮಾಡಿಕೊಂಡಿದೆ. ಮೈಕ್ರೋಸಾಫ್ಟ್ ವಿಂಡೋಸ್ ಅಳವಡಿಸಿದ ನೋಕಿಯಾ ಲುಮಿಯ ಫೋನ್ ಮಾರುಟ್ಟೆಗೆ ಬಂದಿದೆ.

ಇವು ವಿಂಡೋಸ್ ಕಾರ್ಯಾಚರಣೆಯ ವ್ಯವಸ್ಥೆ ಹೊಂದಿರುವುದರಿಂದ ವಿಂಡೋಸ್ ಇರುವ ಗಣಕಗಳ ಜೊತೆ ಚೆನ್ನಾಗಿ ಹೊಂದಿಕೊಳ್ಳುತ್ತವೆ. ಗಣಕದಲ್ಲಿರುವ ವಿಳಾಸ ಪುಸ್ತಕ, ಇಮೈಲ್, ಫೋಟೋ, ಸಂಗೀತ, ಇತ್ಯಾದಿಗಳನ್ನು ಫೋನ್ ಜೊತೆ ಸರಿಹೊಂದಿಸುವುದು ಬಹಳ ಸುಲಭ ಮತ್ತು ಯಾವುದೇ ತಕರಾರು ಇಲ್ಲದೆ ಆಗುತ್ತದೆ. ಹಲವು ನಮೂನೆಯ ಆಟಗಳೂ ಲಭ್ಯವಿವೆ. ಮೈಕ್ರೋಸಾಫ್ಟ್ ತಂತ್ರಾಂಶ ತಯಾರಿಯ ಸವಲತ್ತುಗಳನ್ನೇ ಬಳಸಿ ಈ ಫೋನಿಗೆ ತಂತ್ರಾಂಶಗಳನ್ನು ತಯಾರಿಸಬಹುದಾದುರಿಂದ ಇದು ಪ್ರೋಗ್ರಾಮರ್‌ಗಳಿಗೆ ಅಚ್ಚುಮೆಚ್ಚು ಆಗುತ್ತಿದೆ. ವಿಂಡೋಸ್ ಫೋನಿಗೆ ತಂತ್ರಾಂಶ ತಯಾರಿಸಿ ಮಾರಲು ಮತ್ತು ಕೊಳ್ಳಲು ಒಂದು ಮಾರುಕಟ್ಟೆ ಇದೆ. ಮೈಕ್ರೋಸಾಫ್ಟ್ ತನ್ನ ಸ್ಥಾನವನ್ನು ವಾಪಾಸು ಪಡೆದುಕೊಳ್ಳುತ್ತದೋ ಎಂಬುದನ್ನು ಕಾದು ನೋಡಬೇಕಾಗಿದೆ.