ಕಡಿಮೆ ಬೆಲೆಗೆ ಉತ್ತಮ ಫೋನ್

ಒಪ್ಪೊ ಕಂಪೆನಿಯ ಸಬ್-ಬ್ರ್ಯಾಂಡ್ ಆಗಿ ಬಂದ ರಿಯಲ್‌ಮಿ ಈಗ ಸ್ವಂತ ಕಂಪೆನಿಯಾಗಿದೆ. ರಿಯಲ್‌ಮಿಯವರು ಅತಿ ಕಡಿಮೆ ಹಣಕ್ಕೆ ಉತ್ತಮ ಗುಣವೈಶಿಷ್ಟ್ಯಗಳ ಫೋನ್ ತಯಾರಿಸಿ ಶಿಯೋಮಿಯವರ ಜೊತೆ ನೇರ ಸ್ಪರ್ಧೆಗೆ ಇಳಿದಿದ್ದಾರೆ. ರಿಯಲ್‌ಮಿ1 ಮತ್ತು ರಿಯಲ್‌ಮಿ 2 ಪ್ರೊ ಎಂಬ ಎರಡು ಫೋನ್‌ಗಳ ವಿಮರ್ಶೆಯನ್ನು ಗ್ಯಾಜೆಟ್‌ಲೋಕ ಅಂಕಣದಲ್ಲಿ ಈ ಹಿಂದೆ ನೀಡಲಾಗಿತ್ತು. ನೀಡುವ ಹಣಕ್ಕೆ ನಿಜಕ್ಕೂ ಉತ್ತಮ ಉತ್ಪನ್ನಗಳು ಎಂದು ಅವುಗಳ ಬಗ್ಗೆ ಬರೆಯಲಾಗಿತ್ತು. ಈ ಸಲ ವಿಮರ್ಶೆ ಮಾಡುತ್ತಿರುವುದು ರಿಯಲ್‌ಮಿ ಸಿ1 (RealMe 1) ಎಂಬ ಕಡಿಮೆ ಬೆಲೆಯ ಫೋನನ್ನು.

ಗುಣವೈಶಿಷ್ಟ್ಯಗಳು

ರಚನೆ ಮತ್ತು ವಿನ್ಯಾಸ

ಈ ಫೋನಿನ ರಚನೆ ಮತ್ತು ವಿನ್ಯಾಸವೂ ಇತರೆ ರಿಯಲ್‌ಮಿ ಫೋನ್‌ಗಳಂತೆ ಅತ್ಯುತ್ತಮವಾಗಿದೆ. ಕಡಿಮೆ ಬೆಲೆಗೆ ಇಷ್ಟು ಉತ್ತಮ ರಚನೆ ಮತ್ತು ವಿನ್ಯಾಸದ ಫೋನ್ ಸದ್ಯಕ್ಕೆ ಬೇರೆ ಯಾವುದೂ ಮಾರುಕಟ್ಟೆಯಲ್ಲಿ ಇಲ್ಲ ಎಂದೇ ಹೇಳಬಹುದು. ರಿಯಲ್‌ಮಿ ಪ್ರತ್ಯೇಕ ಕಂಪೆನಿಯಾದರೂ ಇನ್ನೂ ಒಪ್ಪೋದ ಫ್ಯಾಕ್ಟರಿಯಲ್ಲೇ ಅವರ ಫೋನ್‌ಗಳ ತಯಾರಾಗುತ್ತಿವೆ. ಈ ಫೋನಿನ ಜೊತೆ ಅವರು ನೀಡುತ್ತಿರುವ ಚಾರ್ಜರ್‌ನಲ್ಲಿ ಒಪ್ಪೊ ಎಂದೇ ಬರೆದಿದೆ. ಮೊದಲ ನೋಟಕ್ಕೇ ನೀವು ಇದಕ್ಕೆ ಮಾರುಹೋಗುತ್ತೀರಿ ಎಂಬುದರಲ್ಲಿ ಅನುಮಾನವೇ ಇಲ್ಲ. ಬಲ ಭಾಗದಲ್ಲಿ ಆನ್/ಆಫ್ ಸ್ವಿಚ್ ಇದೆ. ಎಡ ಭಾಗದಲ್ಲಿ ವಾಲ್ಯೂಮ್ ಬಟನ್ ಮತ್ತು ಸಿಮ್ ಹಾಗೂ ಮೆಮೊರಿ ಕಾರ್ಡ್ ಹಾಕುವ ಟ್ರೇ ಇವೆ. ಇದರಲ್ಲಿ ಎರಡು ನ್ಯಾನೋ ಸಿಮ್ ಮತ್ತು ಮೆಮೊರಿ ಕಾರ್ಡ್ ಹಾಕಬಹುದು. ಕೆಳಭಾಗದಲ್ಲಿ ಯುಎಸ್‌ಬಿ ಕಿಂಡಿ ಮತ್ತು 3.5 ಮಿ. ಮೀ. ಇಯರ್‌ಫೋನ್ ಕಿಂಡಿಗಳಿವೆ.  ಹಿಂದುಗಡೆ ಬಲಮೂಲೆಯಲ್ಲಿ ಕ್ಯಾಮರಗಳು ಮತ್ತು ಪಕ್ಕದಲ್ಲಿ ಫ್ಲಾಶ್ ಇವೆ. ಇದರ ಒಂದು ಪ್ರಮುಖ ಕೊರತೆಯೆಂದರೆ ಇದರಲ್ಲಿ ಬೆರಳಚ್ಚು ಸ್ಕ್ಯಾನರ್ ಇಲ್ಲ ಎಂಬುದು. ಹಿಂಭಾಗದ ಕವಚದ ವಿನ್ಯಾಸ ಸುಂದರವಾಗಿದೆ. ಕವಚ ತುಂಬ ನಯವಾಗಿದೆ. ಕೈಯಿಂದ ಜಾರಿ ಬೀಳಬಾರದು ಎಂದಿದ್ದರೆ ಅಧಿಕ ಕವಚ ಹಾಕಿಕೊಳ್ಳಬೇಕು. ಒಂದು ಪ್ಲಾಸ್ಟಿಕ್ ಕವಚವನ್ನು ಅವರೇ ನೀಡಿದ್ದಾರೆ. ಮುಂಭಾಗದ ಪರದೆಯ ಮೇಲೂ ಅವರೇ ಒಂದು ಸ್ಕ್ರೀನ್ ಪ್ರೊಟೆಕ್ಟರ್ ಅಂಟಿಸಿದ್ದಾರೆ. ಎರಡು ಬಣ್ಣಗಳಲ್ಲಿ ಲಭ್ಯ. ಒಟ್ಟಿನಲ್ಲಿ ರಚನೆ ಮತ್ತು ವಿನ್ಯಾಸದಲ್ಲಿ ಇದು ಅತ್ಯುತ್ತಮ ಎಂದು ನಿರ್ದಾಕ್ಷಿಣ್ಯವಾಗಿ ಹೇಳಬಹುದು.

ಕೆಲಸದ ವೇಗ

ರಿಯಲ್‌ಮಿ ಸಿ1 ಫೋನಿನಲ್ಲಿ ಬಳಸಿರುವುದು ಸ್ನಾಪ್‌ಡ್ರಾಗನ್ 450 ಪ್ರೋಸೆಸರ್. ಅಂದರೆ ಇದು ಕಡಿಮೆ ಶಕ್ತಿಯ ಪ್ರೋಸೆಸರ್. ಕಡಿಮೆ ಬೆಲೆಯ ಫೋನ್ ಅಂದ ಮೇಲೆ ಕಡಿಮೆ ಬೆಲೆಯ ಪ್ರೋಸೆಸರ್ ಇರುವುದರಲ್ಲಿ ಆಶ್ಚರ್ಯವಿಲ್ಲ. ಅದು ಸಹಜ ತಾನೆ? ಹಾಗೆಂದು ಹೇಳಿ ಇದರ ಕೆಲಸದ ವೇಗ ತುಂಬ ಕಡಿಮೆಯೇನಿಲ್ಲ. ಇದರ ಅಂಟುಟು ಬೆಂಚ್‌ಮಾರ್ಕ್ 73,888 ಇದೆ. ಅಂದರೆ ಇದು ಮಧ್ಯಮ ಕಡಿಮೆ ವೇಗದ್ದು ಎನ್ನಬಹುದು. ಬಳಸುವಾಗ ಇದು ವೇದ್ಯವಾಗುತ್ತದೆ. ಕಡಿಮೆ ಶಕ್ತಿಯನ್ನು ಬೇಡುವ ಆಟಗಳನ್ನು ಆಡಬಹುದು. ಆದರೆ ಅಧಿಕ ಶಕ್ತಿಯನ್ನು ಬೇಡುವ ಮೂರು ಆಯಾಮದ ಆಟಗಳನ್ನು ಇದರಲ್ಲಿ ತೃಪ್ತಿದಾಯಕವಾಗಿ ಆಡವುದು ಸ್ವಲ್ಪ ಕಷ್ಟ. ಅತಿ ವೇಗದ ಫೋನ್ ಬೇಕು ಎನ್ನುವವರಿಗೆ ಇದು ಹೇಳಿದ್ದಲ್ಲ. ಆದರೂ ಇದರಲ್ಲಿರುವುದು ಕೇವಲ 2 ಗಿಗಾಬೈಟ್ ಮೆಮೊರಿ ಎಂಬುದನ್ನು ಗಮನಿಸಿದರೆ ಇದು ನಿಜಕ್ಕೂ ನೀಡುವ ಹಣಕ್ಕೆ ಉತ್ತಮ ಫೋನ್ ಎಂದೇ ಹೇಳಬಹುದು.

ಈ ಫೋನಿನಲ್ಲಿ ಬೆರಳಚ್ಚು ಸ್ಕ್ಯಾನರ್ ಇಲ್ಲ. ಆದರೆ ಮುಖವನ್ನು ಗುರುತಿಸುವ ಹಾಗೂ ಅದನ್ನೇ ಪ್ರವೇಶಕ್ಕೆ ಅಂಗೀಕಾರವಾಗಿ (face recognition & unlock) ಮಾಡಿಟ್ಟುಕೊಳ್ಳುವ ಸವಲತ್ತಿದೆ. ಈ ಸವಲತ್ತು ಮಾತ್ರ ಅಷ್ಟೇನೂ ತೃಪ್ತಿದಾಯಕವಾಗಿ ಕೆಲಸ ಮಾಡುತ್ತಿಲ್ಲ.

ಪರದೆ ಹಾಗೂ ಆಡಿಯೋ

ಈ ಫೋನಿನ ಪರದೆಯಲ್ಲಿ ಹೇಳಿಕೊಳ್ಳುವಂಥದ್ದೇನೂ ಇಲ್ಲ. ರೆಸೊಲೂಶನ್ ತುಂಬ ಏನಿಲ್ಲ. ಹೈಡೆಫಿನಿಶನ್ ವಿಡಿಯೋ ಪ್ಲೇ ಆಗುತ್ತದೆ. ವಿಡಿಯೋ ವೀಕ್ಷಣೆಯ ಅನುಭವ ತೃಪ್ತಿದಾಯಕವಾಗಿದೆ. ಆದರೆ 4k ವಿಡಿಯೋ ಪ್ಲೇ ಆಗುವುದಿಲ್ಲ. ಈ ಫೋನಿನ ಆಡಿಯೋ ಇಂಜಿನ್ ಚೆನ್ನಾಗಿದೆ. ಫೋನಿನ ಬೆಲೆಗೆ ಹೋಲಿಸಿದರೆ ಆಡಿಯೋ ಚೆನ್ನಾಗಿದೆ ಎಂದೇ ಹೇಳಬಹುದು. ಫೋನಿನ ಜೊತೆ ಇಯರ್‌ಫೋನ್ ನೀಡಿಲ್ಲ. ನಿಮ್ಮಲ್ಲಿ ಉತ್ತಮ ಇಯರ್‌ಫೋನ್ ಇದ್ದರೆ ಅದನ್ನು ಜೋಡಿಸಿ ಉತ್ತಮ ಸಂಗೀತ ಆಲಿಸುವ ಅನುಭವ ಪಡೆಯಬಹುದು. ಇದರಲ್ಲಿರುವ ಎಫ್‌ಎಂ ರೇಡಿಯೋದ ಗ್ರಾಹಕ ಶಕ್ತಿ ಚೆನ್ನಾಗಿದೆ. ಉತ್ತಮ ರೇಡಿಯೋ ಬೇಕು ಎನ್ನುವವರು ಈ ಫೋನನ್ನು ಖಂಡಿತ ಕೊಳ್ಳಬಹುದು.

ಕ್ಯಾಮರ

ಈ ಫೋನಿನಲ್ಲಿ ಹೆಸರಿಗೆ ಎರಡು ಪ್ರಾಥಮಿಕ ಕ್ಯಾಮರಗಳಿವೆ. ಅವುಗಳ ರೆಸೊಲೂಶನ್ 13 ಮತ್ತು 2 ಮೆಗಾಪಿಕ್ಸೆಲ್. ಕ್ಯಾಮರದ ಫಲಿತಾಂಶ ಅಂತಹ ಹೇಳಿಕೊಳ್ಳವ ಹಾಗೇನೂ ಇಲ್ಲ. ಸಂಪೂರ್ಣ ಕಳಪೆಯೂ ಅಲ್ಲ. ಉತ್ತಮ ಬೆಳಕಿನ ಸಂದರ್ಭಗಳಲ್ಲಿ ಉತ್ತಮ ಫೋಟೋ ಮೂಡಿಬರುತ್ತದೆ. ಹತ್ತಿರದ ವಸ್ತುಗಳ ಫೋಟೋ ಚೆನ್ನಾಗಿ ಬರುತ್ತದೆ. ಪ್ರಕೃತಿ ದೃಶ್ಯಗಳ ಮತ್ತು ಎಚ್‌ಡಿಆರ್ ಫೋಟೋಗಳು ಅಷ್ಟಕ್ಕಷ್ಟೆ. ಅತಿ ಕಡಿಮೆ ಬೆಳಕಿನಲ್ಲಂತೂ ಫೋಟೋ ನಿರಾಶಾದಾಯಕವಾಗಿದೆ. ವಿಡಿಯೋ ಚಿತ್ರೀಕರಣವೂ ಅಷ್ಟಕ್ಕಷ್ಟೆ. ನೀವು ಉತ್ತಮ ಛಾಯಾಗ್ರಾಹಕರಾಗಿದ್ದಲ್ಲಿ ಹಾಗೂ ಉತ್ತಮ ಕ್ಯಾಮರ ಫೋನ್ ಬೇಕು ಎಂಬುದು ನಿಮ್ಮ ಇರಾದೆಯಾಗಿದ್ದಲ್ಲಿ ಈ ಫೋನ್ ನಿಮಗಲ್ಲ. ಹಾಗೆಂದು ಹೇಳಿ ತುಂಬ ಕಳಪೆ ಕ್ಯಾಮರದ ಫೋನೇನೂ ಇದಲ್ಲ. ನೀಡುವ ಹಣಕ್ಕೆ ಹೋಲಿಸಿದರೆ ಕ್ಯಾಮರಕ್ಕೆ ಅಲ್ಲಿಂದಲ್ಲಿಗೆ ಪಾಸ್ ಮಾರ್ಕು ನೀಡಬಹುದು.

</tr

ಬ್ಯಾಟರಿ

ತುಂಬ ಶಕ್ತಿಯ ಬ್ಯಾಟರಿ ಇರುವುದು ಈ ಫೋನಿನ ಒಂದು ಪ್ರಮುಖ ಹೆಗ್ಗಳಿಕೆ ಎನ್ನಬಹುದು. 4230 mAh ಎಂಬುದು ಒಂದೂವರೆ – ಎರಡು ದಿನಗಳಿಗೆ ಧಾರಾಳ ಸಾಕು. ಆದರೆ ರಿಯಲ್‌ಮಿಯವರು ವೇಗವಾಗಿ ಚಾರ್ಜ್ ಮಾಡುವ ಸವಲತ್ತನ್ನು ನೀಡಿಲ್ಲ.

ತೀರ್ಮಾನ

ಯಾವುದೇ ಉತ್ಪನ್ನ ಚೆನ್ನಾಗಿದೆಯೋ ಇಲ್ಲವೋ ಎನ್ನುವುದಕ್ಕಿಂತಲೂ ನಾವು ನೀಡುವ ಹಣಕ್ಕೆ ಅದು ತಕ್ಕುದಾಗಿದೆಯೇ ಎಂಬುದೇ ಪ್ರಾಮುಖ್ಯವಾಗಿದೆ. ಈ ಫೋನ್ ನೀಡುವ ಹಣಕ್ಕೆ ತಕ್ಕುದಾಗಿದೆ ಎಂದು ಹೇಳಬಹುದು.

–ಡಾ| ಯು.ಬಿ. ಪವನಜ

gadgetloka @ gmail . com

The post ಗ್ಯಾಜೆಟ್ ಲೋಕ ೩೫೬ (ನವಂಬರ್ ೨೪, ೨೦೧೮) ರಿಯಲ್‌ಮಿ ಸಿ1 first appeared on Vishva Kannada.

ದೊಡ್ಡ ಬ್ಯಾಟರಿ, ಚಿಕ್ಕ ಗಾತ್ರ ಹಾಗೂ ಕಡಿಮೆ ತೂಕ

ತೈವಾನ್ ದೇಶದ ಏಸುಸ್ ಕಂಪೆನಿ ಭಾರತದ ಗಣಕ, ಲ್ಯಾಪ್‌ಟಾಪ್, ಟ್ಯಾಬ್ಲೆಟ್ ಮತ್ತು ಸ್ಮಾರ್ಟ್‌ಫೋನ್ ಮಾರುಕಟ್ಟೆಯಲ್ಲಿ ಒಂದು ಗಮನಾರ್ಹ ಹೆಸರು. ಈ ಕಂಪೆನಿಯ ಹಲವು ಉತ್ಪನ್ನಗಳನ್ನು ಇದೇ ಅಂಕಣದಲ್ಲಿ ವಿಮರ್ಶಿಸಲಾಗಿತ್ತು. ಏಸುಸ್ ಇತ್ತೀಚೆಗೆ ಕೆಲವು ಆಯ್ದ ಕ್ಷೇತ್ರಗಳಲ್ಲಿ ಈಗಾಗಲೇ ಸ್ಥಾಪಿತರಾದವರನ್ನು ಗುರಿಯಾಗಿಟ್ಟುಕೊಂಡು ಫೋನ್‌ಗಳನ್ನು ಮಾರುಕಟ್ಟೆಗೆ ಬಿಡಲು ಪ್ರಾರಂಭಿಸಿದೆ. ಮೇಲ್ದರ್ಜೆಯ ಫೋನ್‌ಗಳಲ್ಲಿ ವನ್‌ಪ್ಲಸ್‌ಗೆ ಪ್ರತಿಸ್ಪರ್ಧಿಯಾಗಿ ಙೆನ್‌ಫೋನ್ ೫ ಝಡ್ ಅನ್ನು ತಯಾರಿಸಿದೆ. ಕಡಿಮೆ ಬೆಲೆಯ ಫೋನ್‌ಗಳಲ್ಲಿ ಶಿಯೋಮಿಗೆ ಪ್ರತಿಸ್ಪರ್ಧಿಯಾಗಲು ಹೊರಟಿದೆ. ಕಡಿಮೆ ಬೆಲೆಯ ಫೋನ್‌ಗಳಲ್ಲಿ ಬಹುಮಂದಿ ನೋಡುವುದು ಬ್ಯಾಟರಿ ಎಷ್ಟು ಸಮಯ ಬರುತ್ತದೆ ಎಂದು. ಅಂತಹವರಿಗಾಗಿಯೇ ಏಸುಸ್ ಝೆನ್‌ಫೋನ್ ಮ್ಯಾಕ್ಸ್ ಪ್ರೊ ಎಂ1 ಎಂಬ ಫೋನನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಿತ್ತು. ಈಗ ಸ್ವಲ್ಪ ಕಡಿಮೆ ಬೆಲೆಯ ಏಸುಸ್ ಝೆನ್‌ಫೋನ್ ಮ್ಯಾಕ್ಸ್ ಎಂ1 (Asus Zenfone Max M1) ಫೋನನ್ನು ತಂದಿದೆ. ಇದರ ವಿಮರ್ಶೆಯನ್ನು ನೋಡೋಣ.

ಗುಣವೈಶಿಷ್ಟ್ಯಗಳು

ರಚನೆ ಮತ್ತು ವಿನ್ಯಾಸ

ಏಸುಸ್‌ನವರ ಫೋನ್‌ಗಳು ತುಂಬ ದೊಡ್ಡದಾಗಿರುತ್ತಿದ್ದವು. ಅಂದರೆ ಅವುಗಳ ಪರದೆ ಮತ್ತು ದೇಹದ ಗಾತ್ರಗಳ ಅನುಪಾತ 70-75% ಗಳಷ್ಟು ಮಾತ್ರ ಇರುತ್ತಿದ್ದವು. ಅದು ಸುಮಾರು ಎರಡು ವರ್ಷಗಳ ಹಿಂದಿನ ಮಾತು. ಆದರೆ ಏಸುಸ್‌ನವರು ತುಂಬ ಕಲಿತಿದ್ದಾರೆ. ಇತ್ತೀಚೆಗೆ ಬರುತ್ತಿರುವ ಏಸುಸ್ ಫೊನ್‌ಗಳು ಉತ್ತಮವಾದ ಪರದೆ-ದೇಹ ಅನುಪಾತವನ್ನು ಒಳಗೊಂಡಿವೆ. ಈ ಫೋನ್‌ನ ದೇಹ ಪ್ಲಾಸ್ಟಿಕ್ಕಿನದು. ಹಿಂಭಾಗ ಬಹಮಟ್ಟಿಗೆ ಚಿನ್ನದ ಬಣ್ಣದ್ದು. ಇದರಲ್ಲಿರುವುದು ತುಂಬ ಶಕ್ತಿಯ ಬ್ಯಾಟರಿ. ಆದರೂ ಈ ಫೋನಿನ ತೂಕ ಕೇವಲ 150 ಗ್ರಾಂ. ತುಂಬ ದೊಡ್ಡ ಬ್ಯಾಟರಿ ಇದ್ದೂ ಕಡಿಮೆ ತೂಕದ ಫೋನ್ ಎಂಬುದು ಈ ಫೋನಿನ ಪ್ರಧಾನ ಹೆಗ್ಗಳಿಕೆ ಎನ್ನಬಹುದು.

ಇದು ಅಂಚುರಹಿತ (bezelless) ಫೋನ್. ಆದರೆ ಪರದೆಯ ಕಚ್ಚು (notch) ಇಲ್ಲ. ಬೆರಳಚ್ಚು ಸ್ಕ್ಯಾನರ್ ಹಿಂದುಗಡೆ ಇದೆ. ಪ್ರಾಥಮಿಕ ಕ್ಯಾಮರ ಹಿಂದುಗಡೆ ಬಲಗಡೆ ಮೂಲೆಯಲ್ಲಿ ಇದೆ. ಅದರ ಕೆಳಗೆ ಫ್ಲಾಶ್ ಇದೆ. ಹಿಂಭಾಗದಲ್ಲಿ ಮಧ್ಯಭಾಗದಲ್ಲಿ ಸ್ವಲ್ಪ ಮೇಲುಗಡೆ ಬೆರಳಚ್ಚು ಸ್ಕ್ಯಾನರ್ ಇದೆ. ಫೋನ್ ಹಿಡಿದಾಗ ತೋರುಬೆರಳು ಸಹಜವಾಗಿ ಈ ಸ್ಕ್ಯಾನರ್ ಮೇಲೆ ಹೋಗುತ್ತದೆ. ಹಿಂಬದಿಯ ಕವಚ ಸ್ವಲ್ಪ ದೊರಗು ಎನ್ನಬಹುದು. ನಯವಾಗಿಯಂತೂ ಇಲ್ಲ. ಯುಎಸ್‌ಬಿ ಕಿಂಡಿ ಕೆಳಗಡೆ ಇದೆ. ಇದು ಯುಎಸ್‌ಬಿ-ಸಿ ಅಲ್ಲ. 3.5 ಮಿ.ಮೀ. ಇಯರ್‌ಫೋನ್ ಕಿಂಡಿ ಮೇಲುಗಡೆ ಇದೆ. ಆನ್/ಆಫ್ ಮತ್ತು ವಾಲ್ಯೂಮ್ ಬಟನ್‌ಗಳು ಬಲಗಡೆ, ಸಿಮ್ ಮತ್ತು ಮೆಮೊರಿ ಹಾಕುವ ಟ್ರೇ ಎಡಗಡೆ ಇವೆ. ಕಪ್ಪು ಮತ್ತು ಚಿನ್ನ ಎರಡು ಬಣ್ಣಗಳಲ್ಲಿ ಲಭ್ಯ.

ಕೆಲಸದ ವೇಗ

ಏಸುಸ್‌ನವರ ಫೋನ್‌ಗಳ ಬಗ್ಗೆ ಇದ್ದ ಇನ್ನೊಂದು ಆರೋಪವೆಂದರೆ ಹಲವು ಅನವಶ್ಯಕ ಕಿರುತಂತ್ರಾಂಶಗಳನ್ನು (ಆಪ್‌) ಮೊದಲೇ ಸೇರಿಸಿ ನೀಡುತ್ತಿದ್ದುದು. ಆದರೆ ಇತ್ತೀಚೆಗಿನ ಫೋನ್‌ಗಳಲ್ಲಿ ಈ ತೊಂದರೆ ಇಲ್ಲ. ಈ ಫೋನ್‌ನಲ್ಲೂ ಅಷ್ಟೆ. ಝೆನ್‌ಫೋನ್ ಮ್ಯಾಕ್ಸ್ ಪ್ರೊ ಎಂ1 ಫೋನಿನಲ್ಲಿದ್ದುದು ಶುದ್ಧ ಆಂಡ್ರೋಯಿಡ್. ಆದರೆ ಇದರಲ್ಲಿರುವುದು ಶುದ್ಧ ಆಂಡ್ರೋಯಿಡ್ ಅಲ್ಲ. ಇದು ಇನ್ನೂ ಆಂಡ್ರೋಯಿಡ್ 8.0ಯಲ್ಲೇ ಇದೆ. ಆಂಡ್ರೋಯಿಡ್ 9.0 ಕ್ಕೆ ಯಾವಾಗ ನವೀಕರಣ ನೀಡುತ್ತಾರೆ ಎಂಬುದು ಗೊತ್ತಿಲ್ಲ.

ಇದರಲ್ಲಿರುವುದು ಕಡಿಮೆ ದರ್ಜೆಯ ಪ್ರೋಸೆಸರ್. ಇದರ ಅಂಟುಟು ಬೆಂಚ್‌ಮಾರ್ಕ್ 54010 ಇದೆ. ಅಂದರೆ ಇದು ಕಡಿಮೆ ವೇಗದ ಫೋನ್ ಎನ್ನಬಹುದು. ಕಡಿಮೆ ಶಕ್ತಿಯನ್ನು ಬೇಡುವ ಆಟಗಳನ್ನು ಒಂದು ಮಟ್ಟಿಗೆ ತೃಪ್ತಿದಾಯಕವಗಿ ಆಡಬಹುದು. ಆದರೆ ಅತಿ ಶಕ್ತಿಯನ್ನು ಬೇಡುವ ಮೂರು ಆಯಾಮದ ಮೇಲ್ದರ್ಜೆಯ ಆಟಗಳನ್ನು ಆಡಲು ಈ ಫೋನ್ ಹೇಳಿದ್ದಲ್ಲ. ಫೋನ್ ಪ್ರಾರಂಭಿಸಿದಾಗ ಸ್ವಲ್ಪ ನಿಧಾನವಾಗಿ ತೆರೆದುಕೊಳ್ಳುತ್ತದೆ. ಕೆಲವು ಕಿರುತಂತ್ರಾಂಶಗಳನ್ನು ಇನ್‌ಸ್ಟಾಲ್ ಮಾಡುವಾಗ ಕೆಲವು ಸಲ ಸ್ವಲ್ಪ ನಿಧಾನವಾಗಿ ಕೆಲಸ ಮಾಡುತ್ತದೆ.

ಪರದೆ ಹಾಗೂ ಆಡಿಯೋ

ವಿಡಿಯೋ ವೀಕ್ಷಣೆಯ ಅನುಭವ ತೃಪ್ತಿದಾಯಕವಾಗಿದೆ. ಇದು ಹೈಡೆಫಿನಿಶನ್ ವಿಡಿಯೋ ಪ್ಲೇ ಮಾಡುತ್ತದೆ. ಆದರೆ 4k ವಿಡಿಯೋ ಪ್ಲೇ ಸರಿಯಾಗಿ ಆಗುವುದಿಲ್ಲ. ತಡೆತಡೆದು ಪ್ಲೇ ಮಾಡುತ್ತದೆ. ಈ ಫೋನಿನ ಆಡಿಯೋ ಒಂದು ಮಟ್ಟಿಗೆ ತೃಪ್ತಿದಾಯಕವಾಗಿದೆ. ಅತಿ ಕಡಿಮೆ ಕಂಪನಾಂಕದ (bass) ಮತ್ತು ಅತಿ ಹೆಚ್ಚು ಕಂಪನಾಂಕದ (treble) ಧ್ವನಿಯ ಪುನರುತ್ಪತ್ತಿ ಸ್ವಲ್ಪ ಕಡಿಮೆ ಗುಣಮಟ್ಟದಲ್ಲಿದೆ. ಮಾನವ ಧ್ವನಿಯ ಪುನರುತ್ಪತ್ತಿ ಚೆನ್ನಾಗಿದೆ. ಫೋನಿನ ಜೊತೆ ಇಯರ್‌ಫೋನ್ ನೀಡಿಲ್ಲ. ಇದರಲ್ಲಿರುವ ಎಫ್‌ಎಂ ರೇಡಿಯೋದ ಗ್ರಾಹಕ ಶಕ್ತಿ ಚೆನ್ನಾಗಿದೆ. ಮನೆಯೊಳಗೆ ಎಲ್ಲ ಕೇಂದ್ರಗಳು ಸರಿಯಾಗಿ ಕೇಳಿಬರುತ್ತವೆ. ಸ್ಪೀಕರಿನ ಧ್ವನಿಯೂ ಪರವಾಗಿಲ್ಲ.

ಕ್ಯಾಮರ

ಇದರಲ್ಲಿರುವುದು 13 ಮೆಗಾಪಿಕ್ಸೆಲ್‌ನ ಪ್ರಾಥಮಿಕ ಕ್ಯಾಮರ. ಕ್ಯಾಮರದ ಗುಣಮಟ್ಟ ಅಂತಹ ಹೇಳಿಕೊಳ್ಳುವಂತೇನೂ ಇಲ್ಲ. ಜೊತೆಗೆ ಕ್ಯಾಮರದ ಕಿರುತಂತ್ರಾಂಶ (ಆಪ್) ಕೂಡ ಅಷ್ಟಕ್ಕಷ್ಟೆ. ಮ್ಯಾನ್ಯುವಲ್ ಆಯ್ಕೆ ಇಲ್ಲ. ಓಪನ್ ಕ್ಯಾಮರ ಕಿರುತಂತ್ರಾಂಶ ಹಾಕಿಕೊಂಡರೂ ಕ್ಯಾಮರದ ಯಂತ್ರಾಂಶದ ಬೆಂಬಲವಿಲ್ಲದ ಕಾರಣ ಮ್ಯಾನ್ಯುವಲ್ ಆಯ್ಕೆ ಬರುವುದಿಲ್ಲ. ಚೆನ್ನಾಗಿ ಬೆಳಕಿದ್ದಾಗ, ಹತ್ತಿರದ ವಸ್ತುಗಳನ್ನು ಉದಾಹರಣೆಗೆ ಹೂವುಗಳ ಫೋಟೋ, ಚೆನ್ನಾಗಿ ತೆಗೆಯುತ್ತದೆ. ಪ್ರಕೃತಿ ದೃಶ್ಯಗಳ ಫೋಟೋ ಚೆನ್ನಾಗಿ ಮೂಡಿಬರುತ್ತದೆ. ಅತಿ ಕಡಿಮೆ ಬೆಳಕಿನಲ್ಲಿ ಫೋಟೋ ಚೆನ್ನಾಗಿ ಮೂಡಿಬರುವುದಿಲ್ಲ. ವಿಡಿಯೋ ಚಿತ್ರೀಕರಣ ಅಷ್ಟಕ್ಕಷ್ಟೆ. ಯಾಕೆಂದರೆ ಇದರಲ್ಲಿ ಇಮೇಜ್ ಸ್ಟೆಬಿಲೈಸೇಶನ್ ಇಲ್ಲ. ಈ ಫೋನಿನ ಬೆಲೆಗೆ ಹೋಲಿಸಿದರೆ ಕ್ಯಾಮರ ತೃಪ್ತಿದಾಯಕ ಎಂದೇ ಹೇಳಬಹುದು.

ಬ್ಯಾಟರಿ

ಈ ಫೋನಿನ ಪ್ರಮುಖ ಹೆಚ್ಚುಗಾರಿಕೆಯಿರುವುದು ಇದರ ಬ್ಯಾಟರಿಯಲ್ಲಿ. 4000 mAh ಎಂದರೆ ಶಕ್ತಿಶಾಲಿ ಎನ್ನಬಹುದು. ಅವರದೇ ಚಾರ್ಜರ್ ಮತ್ತು ಕೇಬಲ್ ಬಳಸಿದರೆ ಸುಮಾರು ಎರಡೂವರೆ ಗಂಟಗಳಲ್ಲಿ ಪೂರ್ತಿ ಚಾರ್ಜ್ ಆಗುತ್ತದೆ. ಈ ಫೋನಿನಿಂದ ಇನ್ನೊಂದು ಸಾಧನಕ್ಕೆ ಯುಎಸ್‌ಬಿ ಓಟಿಜಿ ಕೇಬಲ್ ಬಳಸಿ ಚಾರ್ಜ್ ಮಾಡುವ ಸವಲತ್ತನ್ನೂ ನೀಡಿದ್ದಾರೆ.

ಅಂತಿಮ ತೀರ್ಮಾನ

ಒಟ್ಟಿನಲ್ಲಿ ಹೇಳುವುದಾದರೆ ನೀಡುವ ಹಣಕ್ಕೆ ತೃಪ್ತಿದಾಯಕ ಫೋನ್ ಎನ್ನಬಹುದು.

-ಡಾ| ಯು.ಬಿ. ಪವನಜ
gadgetloka @ gmail . com

The post ಗ್ಯಾಜೆಟ್ ಲೋಕ ೩೫೫ (ನವಂಬರ್ ೨೦, ೨೦೧೮) ಏಸುಸ್ ಝೆನ್‌ಫೋನ್ ಮ್ಯಾಕ್ಸ್ ಎಂ1 first appeared on Vishva Kannada.

ಮಧ್ಯಮ ಬೆಲೆಗೆ ಅತ್ಯುತ್ತಮ ಫೋನ್

ರಿಯಲ್‌ಮಿ ಎಂಬುದು ಒಪ್ಪೊ ಕಂಪೆನಿಯದೇ ಸಬ್‌ಬ್ರ್ಯಾಂಡ್. ಸ್ವಲ್ಪ ಜಾಸ್ತಿ ಬೆಲೆಯ ಫೋನ್‌ಗಳನ್ನು ಒಪ್ಪೊ ಹೆಸರಿನಲ್ಲಿ ಮಾರಾಟ ಮಾಡುತ್ತಿದೆ. ₹ 20 ಸಾವಿರಕ್ಕಿಂತ ಕಡಿಮೆ ಬೆಲೆಯ ಫೋನ್‌ಗಳನ್ನು ರಿಯಲ್‌ಮಿ ಹೆಸರಿನಲ್ಲಿ ಮಾರಾಟ ಮಾಡುತ್ತಿದೆ. ಇತ್ತೀಚೆಗೆ ಹಲವು ಕಂಪೆನಿಗಳು ಇದೇ ರೀತಿ ಎರಡು ಹೆಸರಿನಲ್ಲಿ ಫೋನ್‌ಗಳನ್ನು ಮಾರಾಟ ಮಾಡುತ್ತಿವೆ. ಉದಾಹರಣೆಗೆ ಹುವಾವೇ ಮತ್ತು ಹೋನರ್. ಒಪ್ಪೊ ಮತ್ತು ರಿಯಲ್‌ಮಿ ಈ ಸಾಲಿಗೆ ಹೊಸದಾಗಿ ಸೇರ್ಪಡೆಯಾಗಿವೆ. ರಿಯಲ್‌ಮಿ 1 ಫೊನಿನ ವಿಮರ್ಶೆಯನ್ನು ಇದೇ ಅಂಕಣದಲ್ಲಿ ಮಾಡಲಾಗಿತ್ತು. ಈ ಸಲ ರಿಯಲ್‌ಮಿ 2 ಪ್ರೊ (Realme 2 Pro) ಫೋನಿನ ವಿಮರ್ಶೆ.

ಗುಣವೈಶಿಷ್ಟ್ಯಗಳು

ರಚನೆ ಮತ್ತು ವಿನ್ಯಾಸ

ಈ ಫೋನ್ 4+64, 6+64 ಮತ್ತು 8+128 ಗಿಗಾಬೈಟ್ ಮಾದರಿಗಳಲ್ಲಿ ಲಭ್ಯ. ಬ್ಲೂ ಓಶಿಯನ್, ಬ್ಲ್ಯಾಕ್ ಸೀ ಮತ್ತು ಐಸ್ ಲೇಕ್ ಎಂಬ ಮೂರು ಬಣ್ಣಗಳಲ್ಲಿ ಲಭ್ಯ. ರಿಯಲ್‌ಮಿ 1 ಫೋನಿನಂತೆ ಇದರ ರಚನೆ ಮತ್ತು ವಿನ್ಯಾಸ ಕೂಡ ಅತ್ಯುತ್ತಮವಾಗಿದೆ. ಅದರಲ್ಲೂ ನೀಲಿ ಬಣ್ಣದ ಫೋನ್‌ ಅನ್ನು ನೀವು ನೋಡಿದರೆ ನೀವು ಇದಕ್ಕೆ ಮರುಳಾಗುತ್ತೀರಿ ಎಂಬುದರಲ್ಲಿ ಅನುಮಾನವೇ ಇಲ್ಲ. ಬಲ ಭಾಗದಲ್ಲಿ ಆನ್/ಆಫ್ ಸ್ವಿಚ್ ಇದೆ. ಎಡಭಾಗದಲ್ಲಿ ವಾಲ್ಯೂಮ್ ಸ್ವಿಚ್ ಮತ್ತು ಸಿಮ್ ಹಾಗೂ ಮೆಮೊರಿ ಕಾರ್ಡ್ ಹಾಕುವ ಟ್ರೇ ಇವೆ. ಇದರಲ್ಲಿ ಎರಡು ನ್ಯಾನೋ ಸಿಮ್ ಮತ್ತು ಮೆಮೊರಿ ಕಾರ್ಡ್ ಹಾಕಬಹುದು. ಕೆಳಭಾಗದಲ್ಲಿ ಯುಎಸ್‌ಬಿ ಕಿಂಡಿ ಮತ್ತು 3.5 ಮಿ. ಮೀ. ಇಯರ್‌ಫೋನ್ ಕಿಂಡಿಗಳಿವೆ.  ಹಿಂದುಗಡೆ ಬಲಮೂಲೆಯಲ್ಲಿ ಕ್ಯಾಮರ ಮತ್ತು ಪಕ್ಕದಲ್ಲಿ ಫ್ಲಾಶ್ ಇವೆ. ಹಿಂಭಾಗದ ಮಧ್ಯಭಾಗದಲ್ಲಿ ಸ್ವಲ್ಪ ಮೇಲುಗಡೆ ಬೆರಳಚ್ಚು ಸ್ಕ್ಯಾನರ್ ಇದೆ. ಹಿಂಭಾಗದ ಕವಚದ ವಿನ್ಯಾಸ ನೋಡಲು ಸುಂದರವಾಗಿದೆ. ಕವಚ ತುಂಬ ನಯವಾಗಿದೆ. ಕೈಯಿಂದ ಜಾರಿ ಬೀಳಬಾರದು ಎಂದಿದ್ದರೆ ಅಧಿಕ ಕವಚ ಹಾಕಿಕೊಳ್ಳಬೇಕು. ಒಂದು ಪ್ಲಾಸ್ಟಿಕ್ ಕವಚವನ್ನು ಅವರೇ ನೀಡಿದ್ದಾರೆ.

ಕೆಲಸದ ವೇಗ

ಇದರಲ್ಲಿ ಬಳಸಿರುವುದು ಸ್ನ್ಯಾಪ್‌ಡ್ರಾಗನ್ 660 ಪ್ರೋಸೆಸರ್. ಇದನ್ನು ಸಾಮನ್ಯವಾಗಿ ಮಧ್ಯಮ ದರ್ಜೆಯ ಫೋನ್‌ಗಳಲ್ಲಿ ಬಳಸುತ್ತಾರೆ. ಈ ಫೋನಿನ ಅಂಟುಟು ಬೆಂಚ್‌ಮಾರ್ಕ್ 1,32,635 ಇದೆ. ಅಂದರೆ ಇದು ಒಂದು ಮಟ್ಟಿಗೆ ವೇಗದ ಫೋನ್ ಎನ್ನಬಹುದು. ಬಳಸುವಾಗ ಇದು ವೇದ್ಯವಾಗುತ್ತದೆ. ಮೂರು ಆಯಾಮದ ಆಟಗಳನ್ನು ಕೂಡ ತೃಪ್ತಿದಾಯಕವಾಗಿ ಆಡಬಹುದು. ಹಲವು ತಂತ್ರಾಂಶಗಳನ್ನು ಏಕಕಾಲಕ್ಕೆ ತೆರೆದರೂ ಇದು  ತಡೆತಡೆದು ಕೆಲಸ ಮಾಡುವುದಿಲ್ಲ. ವಿಮಾನ ಹಾರಾಟದಂತಹ ಪ್ರತ್ಯನುಕರಣೆಯ (simulation) ಆಟಗಳನ್ನು ಆಡುವ ಅನುಭವ ಉತ್ತಮವಾಗಿದೆ.

ಈ ಫೋನಿನ ಪರದೆ ಚೆನ್ನಾಗಿದೆ. ಇದು 1080 x 2340 ಪಿಕ್ಸೆಲ್ ರೆಸೊಲೂಶನ್‌ನ ಪರದೆ. ಅಂದರೆ ಹೈಡೆಫಿನಿಶನ್‌ಗಿಂತ ಹೆಚ್ಚು. ಅಂತೆಯೇ ವಿಡಿಯೋ ವೀಕ್ಷಣೆಯ ಅನುಭವ ಉತ್ತಮವಾಗಿದೆ. ಹೈಡೆಫಿನಿಶನ್ ಮತ್ತು ಅಲ್ಟ್ರಾಹೈಡೆಫಿನಿಶನ್ (4k) ವಿಡಿಯೋ ವೀಕ್ಷಣೆ ಮಾಡಬಹುದು. ಇವರು ಡ್ಯೂಡ್ರಾಪ್ ವಿನ್ಯಾಸವನ್ನು ಬಳಸಿದ್ದಾರೆ. ಅಂದರೆ ಅಂಚುರಹಿತ (bezelless) ಪರದೆಯಲ್ಲಿ ಪರದೆಯ ಕಚ್ಚು (notch) ಕೂಡ ಇದೆ ಮಾತ್ರವಲ್ಲ ಈ ಕಚ್ಚು ಅತಿ ಚಿಕ್ಕದಾಗಿದ್ದು ನೀರಿನ ಹನಿಯಂತೆ ಇದೆ. ಈ ಫೋನಿನ ಆಡಿಯೋ ಇಂಜಿನ್ ನಿಜಕ್ಕೂ ಚೆನ್ನಾಗಿದೆ. ಫೋನಿನ ಜೊತೆ ಇಯರ್‌ಫೋನ್ ನೀಡಿಲ್ಲ. ನಿಮ್ಮಲ್ಲಿ ಉತ್ತಮ ಇಯರ್‌ಫೋನ್ ಇದ್ದರೆ ಅದನ್ನು ಜೋಡಿಸಿ ಉತ್ತಮ ಸಂಗೀತ ಆಲಿಸುವ ಅನುಭವ ಪಡೆಯಬಹುದು.

ಕ್ಯಾಮರ

ಈ ರಿಯಲ್‌ಮಿ 2 ಪ್ರೊ ಫೋನಿನಲ್ಲಿರುವುದು  16 ಮೆಗಾಪಿಕ್ಸೆಲ್‌ ಮತ್ತು 2 ಮೆಗಾಪಿಕ್ಸೆಲ್‌ನ ಪ್ರಾಥಮಿಕ ಕ್ಯಾಮರಗಳು. ನೀಡುವ ಹಣಕ್ಕೆ ಹೋಲಿಸಿದರೆ ಕ್ಯಾಮರದ ಗುಣಮಟ್ಟ ನಿಜಕ್ಕೂ ಚೆನ್ನಾಗಿದೆ ಎನ್ನಬಹುದು. ಕ್ಯಾಮರದ ಕಿರುತಂತ್ರಾಂಶದಲ್ಲಿ ಮ್ಯಾನ್ಯುವಲ್ ಆಯ್ಕೆ ಕೂಡ ಇದೆ. ಬಹುತೇಕ ಸಂದರ್ಭಗಳಲ್ಲಿ ಉತ್ತಮ ಫೋಟೋ ತೆಗೆಯುತ್ತದೆ. ಕಡಿಮೆ ಬೆಳಕಿನಲ್ಲೂ ಒಂದು ಮಟ್ಟಿಗೆ ತೃಪ್ತಿದಾಯಕವಾಗಿ ಫೋಟೋ ತೆಗೆಯುತ್ತದೆ. ನನಗಂತೂ ಇದರ ಮ್ಯಾಣ್ಯುವಲ್ ಮೋಡ್ ತುಂಬ ಇಷ್ಟವಾಯಿತು. ನಿಮ್ಮಲ್ಲಿ ಒಬ್ಬ ಪರಿಣತ ಫೋಟೋಗ್ರಾಫರ್ ಇದ್ದಲ್ಲಿ ಈ ಫೋನ್ ತೆಗೆದುಕೊಂಡು ನೀವು ಒಂದು ಮಟ್ಟಿಗೆ ಉತ್ತಮ ಫೋಟೋ ತೆಗೆಯಬಹುದು. ಬಣ್ಣಗಳೂ ಸರಿಯಾಗಿಯೇ ಮೂಡಿ ಬರುತ್ತವೆ. ನೀಡುವ ಹಣಕ್ಕೆ ಉತ್ತಮ ಕ್ಯಾಮರ ಫೋನ್‌ಬೇಕು ಎನ್ನುವವರಿಗೆ ಇದು ಆಗಬಹುದು.

ಬ್ಯಾಟರಿಯ ಶಕ್ತಿ 3500 mAh ಎಂದರೆ ಸಾಕಷ್ಟಾಯಿತು. ಒಂದು ಒಂದೂವರೆ ದಿನಕ್ಕೆ ಧಾರಾಳ ಸಾಕು. ಪೂರ್ತಿ ಚಾರ್ಜ್ ಆಗಲು ಸುಮಾರು ಎರಡೂವರೆ ಗಂಟೆ ಬೇಕು.

ಅಂತಿಮ ತೀರ್ಮಾನ

ಈ ಫೋನಿನ ಹೆಚ್ಚುಗಾರಿಕೆಯಿರುವುದು ಕಡಿಮೆ ಬೆಲೆಗೆ 8+128 ಗಿಗಾಬೈಟ್ ಮೆಮೊರಿ, ಉತ್ತಮ ವೇಗ, ತೃಪ್ತಿ ನೀಡುವ ಕ್ಯಾಮರ ಮತ್ತು ಉತ್ತಮ ವಿನ್ಯಾಸ. ಒಟ್ಟಿನಲ್ಲಿ ಹೇಳುವುದಾದರೆ ನಿಜಕ್ಕೂ ನೀಡುವ ಹಣಕ್ಕೆ ಅತ್ಯುತ್ತಮ ಖರೀದಿ ಎನ್ನಬಹುದು.

-ಡಾ| ಯು.ಬಿ. ಪವನಜ

The post ಗ್ಯಾಜೆಟ್ ಲೋಕ ೩೫೪ (ನವಂಬರ್ ೧೪, ೨೦೧೮) – ರಿಯಲ್‌ಮಿ 2 ಪ್ರೊ first appeared on Vishva Kannada.

ಉತ್ತಮ ವಿನ್ಯಾಸ ಮತ್ತು ಕ್ಯಾಮರ ಇರುವ ಫೋನ್

ಇಲೆಕ್ಟ್ರಾನಿಕ್ಸ್ ಕ್ಷೇತ್ರದಲ್ಲಿ ಪ್ರಸಿದ್ಧ ಹೆಸರು ಹುವಾವೇ (Huawei). ಹುವಾವೇಯವರದೇ ಇನ್ನೊಂದು ಬ್ರ್ಯಾಂಡ್ ಹೋನರ್ (ಆನರ್?). ಈ ಕಂಪೆನಿಯ ಕೆಲವು ಸ್ಮಾರ್ಟ್‌ಫೋನ್‌ಗಳ ವಿಮರ್ಶೆಯನ್ನು ಗ್ಯಾಜೆಟ್‌ಲೋಕ ಅಂಕಣದಲ್ಲಿ ನೀಡಲಾಗಿತ್ತು. ಹುವಾವೇ ಕಂಪೆನಿಯು ಸ್ವಲ್ಪ ಮೇಲ್ದರ್ಜೆಯ ಫೋನ್‌ಗಳನ್ನು ತಯಾರಿಸುತ್ತಿದೆ. ಇತ್ತೀಚೆಗಷ್ಟೆ ಅವರು ಭಾರತದಲ್ಲೂ ತಮ್ಮ ಫೋನ್‌ಗಳನ್ನು ಮಾರಾಟ ಮಾಡಲು ಪ್ರಾರಂಬಿಸಿದ್ದಾರೆ. ಈ ಸಲ ನಾವು ವಿಮರ್ಶಿಸುತ್ತಿರುವ ಗ್ಯಾಜೆಟ್ ಹುವಾವೇ ನೋವಾ 3 (Huawei Nova 3)

ಗುಣವೈಶಿಷ್ಟ್ಯಗಳು

ರಚನೆ ಮತ್ತು ವಿನ್ಯಾಸ

ಇದರ ರಚನೆ ಮತ್ತು ವಿನ್ಯಾಸ ನಿಜಕ್ಕೂ ಸುಂದರವಾಗಿದೆ. ಇದರ ಹಿಂಭಾಗ ಮತ್ತು ಇತ್ತೀಚೆಗೆ ಮಾರುಕಟ್ಟೆಗೆ ಬಂದ ಹೋನರ್ 8ಎಕ್ಸ್ ಫೋನ್‌ನ ಹಿಂಭಾಗ ಬಹುತೇಕ ಒಂದೇ ರೀತಿ ಇವೆ. ಈ ಫೋನಿನಲ್ಲಿ ಹುವಾವೇ ಎಂದು ಬರೆದ ಜಾಗದಲ್ಲಿ ಆ ಫೋನಿನಲ್ಲಿ ಹೋನರ್ ಎಂದು ಬರೆದಿದ್ದಾರೆ. ಇದು 6.3 ಇಂಚು ಗಾತ್ರದ ಪರದೆಯನ್ನು ಒಳಗೊಂಡಿದೆ. ದಪ್ಪವೂ ಕಡಿಮೆ ಇದೆ. 5.0 – 5.5 ಇಂಚು ಗಾತ್ರದ ಪರದೆ ಸಾಲದು ಎನ್ನುವವರಿಗೆ ಇದು ಉತ್ತಮ ಆಯ್ಕೆ. ಇತ್ತೀಚೆಗೆ ಬರುತ್ತಿರುವ ಬಹುತೇಕ ಮೇಲ್ದರ್ಜೆ ಫೋನ್‌ಗಳಂತೆ ಇದು ಕೂಡ ಅಂಚುರಹಿತ (bezelless) ಫೋನ್. ಅಂದರೆ ಇದರ ಪರದೆ ಮತ್ತು ದೇಹದ ಗಾತ್ರಗಳ ಅನುಪಾತ ಉತ್ತಮವಾಗಿದೆ ಎಂದು ಅರ್ಥ. ಜೊತೆಗೆ ಪರದೆಯ ಕಚ್ಚು (notch) ಕೂಡ ಇದೆ. ಇದನ್ನು ಕೈಯಲ್ಲಿ ಹಿಡಿದಾಗ ಒಂದು ಉತ್ತಮ ಮೇಲ್ದರ್ಜೆಯ ಫೋನನ್ನು ಹಿಡಿದ ಭಾವನೆ ಬರುತ್ತದೆ. ಇದರ ಹಿಂಭಾಗ ತುಂಬ ನುಣುಪಾಗಿದೆ. ಬದಿಗಳಲ್ಲಿ ವಕ್ರವಾಗಿದ್ದು ತಲೆದಿಂಬಿನಂತಿದೆ. ಗಾತ್ರ ದೊಡ್ಡದಾಗಿರುವುದರಿಂದ ಮತ್ತು ದೇಹ ಸ್ವಲ್ಪ ನುಣುಪಾಗಿರುವುದುರಿಂದ ಕೈಯಿಂದ ಜಾರಿ ಬೀಳುವ ಭಯವಿದೆ. ಹಾಗೆ ಬೀಳಬಾರದು ಎಂದು ಅವರೇ ಒಂದು ಅಧಿಕ ಪ್ಲಾಸ್ಟಿಕ್ ಕವಚ ನೀಡಿದ್ದಾರೆ. ಆದರೆ ಈ ಕವಚದ ತಯಾರಿಯಲ್ಲಿ ಸ್ವಲ್ಪ ದೋಷವಿದೆ. ಅದನ್ನು ಹಾಕಿದಾಗ ಕಾಲುಭಾಗ ಫ್ಲಾಶ್ ಮುಚ್ಚಿಹೋಗುತ್ತದೆ.

ಬಲಭಾಗದಲ್ಲಿ ಆನ್/ಆಫ್ ಮತ್ತು ವಾಲ್ಯೂಮ್ ಬಟನ್‌ಗಳಿವೆ. ಕೆಳಭಾಗದಲ್ಲಿ 3.5 ಮಿ.ಮೀ. ಇಯರ್‌ಫೋನ್ ಕಿಂಡಿ ಮತ್ತು ಯುಎಸ್‌ಬಿ-ಸಿ ನಮೂನೆಯ ಕಿಂಡಿಗಳಿವೆ. ಎಡಭಾಗದಲ್ಲಿ ಚಿಕ್ಕ ಪಿನ್ ತೂರಿಸಿದಾಗ ಹೊರಬರುವ ಟ್ರೇ ಇದೆ. ಇದನ್ನು ಒಂದು ನ್ಯಾನೋಸಿಮ್ ಮತ್ತು ಮೈಕ್ರೊಎಸ್‌ಡಿ ಮೆಮೊರಿ ಕಾರ್ಡ್ ಅಥವಾ ಎರಡು ನ್ಯಾನೋ ಸಿಮ್ ಹಾಕಲು ಬಳಸಲಾಗುತ್ತದೆ. ಯುಎಸ್‌ಬಿ ಓಟಿಜಿ ಸವಲತ್ತು ಇದೆ. ಇದನ್ನು ಬಳಸಲು ನೀವು ಯುಎಸ್‌ಬಿ-ಸಿ ನಮೂನೆಯ ಓಟಿಜಿ ಕೇಬಲ್ ಅಥವಾ ಅಡಾಪ್ಟರ್ ಕೊಳ್ಳಬೇಕು. ಫ್ರೇಂನ ಕೆಳಭಾಗದಲ್ಲಿ ಒಂದು ಗ್ರಿಲ್‌ ಇದ್ದು ಸ್ಪೀಕರ್ ಅದರೊಳಗಿದೆ. ಹಿಂಭಾಗದ ಮೂಲೆಯಲ್ಲಿ ಕ್ಯಾಮೆರ ಇದೆ. ಹಿಂಭಾಗದ ಮಧ್ಯದಲ್ಲಿ ಸ್ವಲ್ಪ ಮೇಲುಗಡೆ ಬೆರಳಚ್ಚು ಸ್ಕ್ಯಾನರ್ ಇದೆ. ನನ್ನ ಪ್ರಕಾರ ಇದು ಬೆರಳಚ್ಚು ಸ್ಕ್ಯಾನರ್‌ಗೆ ಉತ್ತಮ ಜಾಗ. ಕೈಯಲ್ಲಿ ಫೋನ್ ಹಿಡಿದಾಗ ಸಹಜವಾಗಿ ತೋರುಬೆರಳು ಈ ಸ್ಕ್ಯಾನರ್ ಮೇಲೆ ಬರುತ್ತದೆ. ಒಟ್ಟಿನಲ್ಲಿ ರಚನೆ ಮತ್ತು ವಿನ್ಯಾಸಕ್ಕೆ ಪೂರ್ತಿ ಮಾರ್ಕು ನೀಡಬಹುದು. ಈ ಫೋನ್ ಐದು ಬಣ್ಣಗಳಲ್ಲಿ ಲಭ್ಯ. ಒಂದು ಸುಂದರ ಫೋನ್ ಬೇಕು ಎಂದು ನೀವು ಹುಡುಕಾಡುತ್ತಿದ್ದರೆ ಈ ಫೋನನ್ನು ನೀವು ಕೊಳ್ಳಬಹುದು.

ಕೆಲಸದ ವೇಗ

ಕೆಲಸದ ವೇಗ ಚೆನ್ನಾಗಿದೆ. ಇದರಲ್ಲಿ ಬಳಸಿರುವುದು ಹುವಾವೇಯವರದೇ ಕಿರಿನ್ ಪ್ರೋಸೆಸರ್. ಈ ಪ್ರೋಸೆಸರ್ ಅನ್ನು ಹುವಾವೇ ಮತ್ತು ಹೋನರ್ ಫೋನ್‌ಗಳು ಮಾತ್ರ ಬಳಸುತ್ತಿವೆ. ಇದರ ಅಂಟುಟು ಬೆಂಚ್‌ಮಾರ್ಕ್ 2,06,904 ಇದೆ. ಅಂದರೆ ಇದು ಉತ್ತಮ ವೇಗದ ಫೋನ್. ಎಲ್ಲ ನಮೂನೆಯ ಆಟಗಳನ್ನು ಆಡುವ ಅನುಭವ ತೃಪ್ತಿದಾಯಕವಾಗಿದೆ. ಮೂರು ಆಯಾಮಗಳ ಆಟಗಳನ್ನು ಆಡುವ ಅನುಭವವೂ ಚೆನ್ನಾಗಿದೆ. ಸಾಮಾನ್ಯ ಮತ್ತು ಹೈಡೆಫಿನಿಶನ್ ವಿಡಿಯೋಗಳು ಚೆನ್ನಾಗಿ ಪ್ಲೇ ಆಗುತ್ತವೆ. 4k ವೀಡಿಯೋ ಕೂಡ ಸರಿಯಾಗಿ ಪ್ಲೇ ಆಗುತ್ತದೆ. ಇದರ ಆಡಿಯೋ ಇಂಜಿನ್ ಪರವಾಗಿಲ್ಲ. ಇಯರ್‌ಫೋನ್ ನೀಡಿದ್ದಾರೆ. ಈ ಇಯರ್‌ಫೋನಿನ ವಿನ್ಯಾಸ ಸ್ವಲ್ಪ ವಿಚಿತ್ರವಾಗಿದೆ. ಅದಕ್ಕೆ ಕುಶನ್ ಹಾಕಲು ಸಾಧ್ಯವಿಲ್ಲ. ಕಿವಿ ಕಾಲುವೆಯೊಳಗೆ ಹೋಗುವುದಿಲ್ಲ. ಅದರ ಗುಣಮ್ಟ ಮಾತ್ರ ತೃಪತಿದಾಯಕವಾಗಿಲ್ಲ. ಅತಿ ಕಡಿಮೆ (bass) ಮತ್ತು ಅತಿ ಹೆಚ್ಚಿನ (treble) ಕಂಪನಾಂಕದ ಧ್ವನಿಯ ಪುನರುತ್ಪತ್ತಿ ತೃಪ್ತಿದಾಯಕವಗಿಲ್ಲ.  ನಿಮ್ಮಲ್ಲಿ ಉತ್ತಮ ಇಯರ್‌ಫೋನ್ ಇದ್ದರೆ ಅದನ್ನು ಜೋಡಿಸಿ ಒಂದು ಮಟ್ಟಿಗೆ ತೃಪ್ತಿದಾಯಕವಾಗಿ ಸಂಗೀತವನ್ನು ಆಲಿಸಬಹುದು. ಆದರೂ ನೀಡುವ ಬೆಲೆಗ ಹೋಲಿಸಿದರೆ ಇನ್ನೂ ಉತ್ತಮ ಆಡಿಯೋ ಇಂಜಿನ್ ನೀಡಬಹುದಿತ್ತು ಎಂಬುದು ನನ್ನ ಅಭಿಪ್ರಾಯ.

ಕ್ಯಾಮರ

ಇದರಲ್ಲಿ 16 ಮತ್ತು 24 ಮೆಗಾಪಿಕ್ಸೆಲ್‌ಗಳ ಎರಡು ಪ್ರಾಥಮಿಕ ಕ್ಯಾಮರಗಳಿವೆ. ಈ ಕ್ಯಾಮರದ ಕಿರುತಂತ್ರಾಂಶದಲ್ಲಿ (ಆಪ್) ಕೃತಕ ಬುದ್ಧಿಮತ್ತೆ (Artificial Intelligence) ಅಳವಡಿಸಿದ್ದಾರೆ. ಇತ್ತೀಚೆಗೆ ಮಾರುಕಟ್ಟೆಗೆ ಬರುತ್ತಿರುವ ಬಹುತೇಕ ಫೋನ್‌ಗಳು ಈ ಕೃತಕ ಬುದ್ಧಿಮತ್ತೆಯನ್ನು ಅಳವಡಿಸಿಕೊಳ್ಳುತ್ತಿದ್ದಾರೆ. ಈ ಫೋನ್ ಕೂಡ ಅವುಗಳ ಸಾಲಿಗೆ ಸೇರುತ್ತದೆ.  ಕ್ಯಾಮರದ ಕಿರುತಂತ್ರಾಶದಲ್ಲಿ ಮ್ಯಾನ್ಯುವಲ್ ಮೋಡ್ ಆಯ್ಕೆ ಕೂಡ ಇದೆ. ಫೋಟೋಗಳು ನಿಜಕ್ಕೂ ಚೆನ್ನಾಗಿಯೇ ಮೂಡಿಬರುತ್ತವೆ. ಹೋನರ್ ಮತ್ತು ಹುವಾವೇಯವರ ಫೋನ್‌ಗಳು ಕ್ಯಾಮರದ ವಿಷಯದಲ್ಲಿ ಬಹುತೇಕ ಒಂದೇ ರೀತಿ ಇವೆ. ಹೋನರ್ ಫೋನ್‌ಗಳ ಕ್ಯಾಮರದಂತೆ ಇದರ ಕ್ಯಾಮರ ಕೂಡ ಬಣ್ಣಗಳನ್ನು ಸ್ವಲ್ಪ ಜಾಸ್ತಿಯೇ ಗಾಢವಾಗಿ ಮೂಡಿಸುವುದು. ಸ್ವಂತೀಯಲ್ಲಿ ನಿಮ್ಮನ್ನು ಸ್ವಲ್ಪ ಜಾಸ್ತಿಯೇ ಸುಂದರವಾಗಿ ಮಾಡುತ್ತದೆ!

ಬೆರಳಚ್ಚು ಸ್ಕ್ಯಾನರ್ ಚೆನ್ನಾಗಿಯೇ ಕೆಲಸ ಮಾಡುತ್ತದೆ. ಮುಖವನ್ನು ಗುರುತುಹಿಡಿಯುವ ಸವಲತ್ತು ಕೂಡ ತೃಪ್ತಿದಾಯಕವಾಗಿ ಹಾಗೂ ವೇಗವಾಗಿ ಕೆಲಸ ಮಾಡುತ್ತದೆ. ಬ್ಯಾಟರಿ ಬಾಳಿಕೆ ಚೆನ್ನಾಗಿದೆ. ವೇಗವಾಗಿ ಚಾರ್ಜ್ ಆಗುತ್ತದೆ.

ಅಂತಿಮ ತೀರ್ಮಾನ

ಉತ್ತಮ ರಚನೆ, ಮತ್ತು ವಿನ್ಯಾಸವಿರುವ, ನೋಡಲು ಸುಂದರವಾದ ಫೋನ್. ಶಕ್ತಿಶಾಲಿಯಾದ ಪ್ರೋಸೆಸರ್ , 6+128 ಗಿಗಾಬೈಟ್ ಮೆಮೊರಿ ಇದೆ. ಉತ್ತಮ ಕ್ಯಾಮರ ಇದೆ. ಒಟ್ಟಿನಲ್ಲಿ  ನೀಡುವ ಬೆಲೆಗೆ ತಕ್ಕ ಫೋನ್ ಎನ್ನಬಹುದು.

The post ಗ್ಯಾಜೆಟ್ ಲೋಕ ೩೫೩ (ನವಂಬರ್ ೦೩, ೨೦೧೮) – ಹುವಾವೇ ನೋವಾ 3 first appeared on Vishva Kannada.

ಅತ್ಯಂತ ಕಡಿಮೆ ಬೆಲೆಯಲ್ಲಿ ನೀವು ನಾವು ಆಶಿಸುವ ಬಹುತೇಕ ಎಲ್ಲ ಗುಣವೈಶಿಷ್ಟ್ಯಗಳನ್ನು ಒಳಗೊಂಡ ಫೋನ್ ನೋಕಿಯ ಸಿ೨-೦೦. ಈ ಸಲ ಅದರ ಗುಣಾವಗುಣಗಳನ್ನು ಪರಿಶೀಲಿಸೋಣ.

ಫೋನ್ ಇಲ್ಲದವರ‍್ಯಾರು? ಫೋನ್ ಯಾರಿಗೆ ಬೇಡ ಹೇಳಿ? ಎಲ್ಲರಿಗೂ ಬೇಕು ಫೋನ್. ಫೋನ್ ಅಂದರೆ ಮಾಮೂಲಿ ಸ್ಥಿರವಾಣಿ ಅಲ್ಲ, ನಾನು ಇಲ್ಲಿ ಹೇಳಹೊರಟಿರುವುದು ಚರವಾಣಿ ಅರ್ಥಾತ್ ಮೊಬೈಲ್ ಫೋನ್ ಬಗ್ಗೆ. ಫೋನಂತೂ ಎಲ್ಲರಿಗೂ ಬೇಕು. ಅದಕ್ಕೆ ಸರಿಯಾಗಿ ಹಲವಾರು ಟೆಲಿಫೋನ್ ಕಂಪೆನಿಗಳವರು ಏನೇನೋ ಸ್ಕೀಂಗಳನ್ನು ಘೋಷಿಸುತ್ತಲೇ ಇರುತ್ತವೆ. ಒಂದು ರಾತ್ರಿ ಮಾತನಾಡಲು, ಹಗಲು ಮಾತನಾಡಲು ಮತ್ತೊಂದು, ಕರ್ನಾಟಕದ ಒಳಗೆ ಮಾತನಾಡಲೊಂದು, ಕುಟುಂಬದವರೊಂದಿಗೆ ಮಾತನಾಡಲು ಇನ್ನೊಂದು -ಹೀಗೆ ನಿಮ್ಮ ಕೈಯಲ್ಲಿ ಅಥವಾ ಕಿಸೆಯಲ್ಲಿ ಇರುವ ಸಿಮ್ ಕಾರ್ಡ್‌ಗಳ ಸಂಖ್ಯೆಯೂ ಒಂದಕ್ಕಿಂತ ಹೆಚ್ಚು. ಅಂದರೆ ನಿಮಗೆ ಒಂದಕ್ಕಿಂತ ಹೆಚ್ಚು ಫೋನ್‌ಗಳು ಬೇಕು ಎಂದಾಯಿತು. ಸಾಮಾನ್ಯವಾಗಿ ಎರಡು ಸಿಮ್ ಕಾರ್ಡ್ ಬಳಸುವವರ ಸಂಖ್ಯೆ ಗಣನೀಯವಾಗಿ ಹೆಚ್ಚಾಗಿದೆ. ಕೈಯಲ್ಲಿಎರಡೆರಡು ಫೋನ್ ಇಟ್ಟುಕೊಳ್ಳುವುದು ದೊಡ್ಡ ರಗಳೆ. ಲಲನಾಮಣಿಯರಿಗಂತೂ ದೊಡ್ಡ ತಲೆನೋವಿನ ಸಂಗತಿ. ಅಂತಹವರಿಗಾಗಿಯೇ ಬಂದಿವೆ -ಎರಡು ಸಿಮ್ ಅರ್ಥಾತ್ ಡ್ಯುಯಲ್ ಸಿಮ್ ಫೋನ್‌ಗಳು. ಅಂತಹ ಒಂದು ಫೋನನ್ನು ಈ ಸಲ ಗಮನಿಸೋಣ.

ನೋಕಿಯ C2-00 ಒಂದು ಅಗ್ಗದ ಫೋನ್. ಸದ್ಯದ ಬೆಲೆ ಕೇವಲ 2400ರೂ (flipkart.com). ಮೊದಲು ಇದರ ಗುಣವೈಶಿಷ್ಟ್ಯಗಳ ಕಡೆ ಕಣ್ಣು ಹಾಯಿಸೋಣ. ಎರಡು ಸಿಮ್ ಕಾರ್ಡ್ ಬಳಸುವ ಸೌಲಭ್ಯ, ಸಿಂಬಿಯನ್ S-40 ಕಾರ್ಯಾಚರಣ ವ್ಯವಸ್ಥೆ, 16 ಮೆಗಾಬೈಟ್ ಪ್ರಾಥಮಿಕ ಮೆಮೊರಿ, 32 ಗಿಗಾಬೈಟ್ ತನಕ ಎಸ್‌ಡಿ ಕಾರ್ಡ್ ಹೆಚ್ಚುವರಿ ಮೆಮೊರಿ ಸೌಲಭ್ಯ, ಯುಎಸ್‌ಬಿ ಸಂಪರ್ಕ ಕಿಂಡಿ, ಬ್ಲೂಟೂತ್, ಜಿಪಿಆರ್‌ಎಸ್ ಅಂತರಜಾಲ ಸಂಪರ್ಕ, 1020mAh ಬ್ಯಾಟರಿ, ಇಮೈಲ್ ಸೌಲಭ್ಯ, ಎಫ್‌ಎಂ ರೇಡಿಯೋ, ಎಂಪಿ3 ಸಂಗೀತ, 640×480 ಪಿಕ್ಸೆಲ್ ರೆಸೊಲೂಶನ್‌ನ ಕ್ಯಾಮರ, ಬಣ್ಣದ ಪರದೆ, ಕ್ಯಾಮರದಲ್ಲಿ 4x ಡಿಜಿಟಲ್ ಝೂಮ್, 108x48x15 ಮಿಮಿ ಗಾತ್ರ, 74 ಗ್ರಾಂ ತೂಕ. ಒಟ್ಟಿನಲ್ಲಿ ಒಂದು ಚಿಕ್ಕ ಫೋನ್. ಆದರೆ ಸೌಲಭ್ಯಗಳ ಸಂಖ್ಯೆ ಅಪಾರ.

ಇದರ ಬಹಳ ಮುಖ್ಯ ಆಕರ್ಷಣೆ -ಎರಡು ಸಿಮ್ ಕಾರ್ಡ್‌ಗಳ ಸೌಲಭ್ಯ. ಒಂದು ಸಿಮ್‌ನಲ್ಲಿ ಮಾತನಾಡುತ್ತ ಇರುವಾಗ ಇನ್ನೊಂದಕ್ಕೆ ಕರೆ ಬಂದರೆ ಅದು ತೋರಿಸುತ್ತದೆ. ಸಿಮ್ ಕಾರ್ಡ್‌ಗಳ ಜಾಗ (ಸ್ಲಾಟ್) ಬದಲಾಯಿಸಬಹುದು. ಎಫ್‌ಎಂ ರೇಡಿಯೋ ಇದೆ. ಎಂಪಿ3 ಸಂಗೀತವನ್ನೂ ಆಲಿಸಬಹುದು. ನಿಮಗಿಷ್ಟವಾದ ಸಂಗೀತವನ್ನು ಕರೆ ಬಂದಾಗ ಉಲಿಯುವ ಧ್ವನಿಯನ್ನಾಗಿಸಿಕೊಳ್ಳಬಹುದು (ರಿಂಗ್ ಟೋನ್). ಧ್ವನಿ ಮುದ್ರಣ ಮಾಡಿಕೊಳ್ಳುವ ಸವಲತ್ತೂ ಇದೆ. ಇದು ರೇಡಿಯೋದಿಂದಲೂ ಆಗುತ್ತದೆ ಅಥವಾ ಹೊರಗಿನಿಂದ ಕೇಳಿಬಂದ ಧ್ವನಿಯೂ ಆಗುತ್ತದೆ. ಆದರೆ ಸಂಗೀತದ ಗುಣಮಟ್ಟ ಅಷ್ಟಕ್ಕಷ್ಟೆ. ಫೋನ್‌ನ ಬೆಲೆ ತುಂಬ ಕಡಿಮೆ ಎಂಬುದನ್ನು ಇಲ್ಲಿ ಗಮನದಲ್ಲಿಟ್ಟುಕೊಳ್ಳಬೇಕು. ಬಹಳ ಕಡಿಮೆ ಗುಣಮಟ್ಟದ ಕ್ಯಾಮರ ಇದೆ. ಕ್ಯಾಮರ ಇದ್ದೂ ಇಲ್ಲದಂತೆಯೇ. ಅದರಿಂದ ಮೂಡುವ ಚಿತ್ರಗಳ ಗುಣಮಟ್ಟ ಚೆನ್ನಾಗಿಲ್ಲ. 640×480 ಪಿಕ್ಸೆಲ್ ರೆಸೊಲೂಶನ್‌ನ ಕ್ಯಾಮರದಲ್ಲಿ ಇನ್ನೇನು ತಾನೆ ಮೂಡಿಬರಲು ಸಾಧ್ಯ? ವೀಡಿಯೋ ಮುದ್ರಣ ಸವಲತ್ತೂ ಇದೆ. ಆದರೆ ಅದರ ಗುಣಮಟ್ಟವೂ ಚೆನ್ನಾಗಿಲ್ಲ.

ಫೋನ್‌ನಲ್ಲಿ ಬ್ಲೂಟೂತ್ ಸೌಲಭ್ಯ ಇದೆ. ಇದನ್ನು ಬಳಸಿ ಬ್ಲೂಟೂತ್ ಹೆಡ್‌ಸೆಟ್ ಬಳಸಬಹುದು. ಇದರಿಂದ ಮಾತನಾಡುವಾಗ ಕೈ ಫ್ರೀ ಆಗುತ್ತದೆ. ಇದರಲ್ಲಿ ಜಿಪಿಆರ್‌ಎಸ್ (GPRS) ಅಥವಾ ಇಜಿಡಿಇ (EGDE) ಮೂಲಕ ಅಂತರಜಾಲ ಸಂಪರ್ಕ ಪಡೆಯಬಹುದು. ಈ ವೇಗ ಕೇವಲ ಇಮೈಲ್‌ಗಳಿಗೆ ಮಾತ್ರ ಸಾಕು. ಅಂತರಜಾಲತಾಣಗಳನ್ನು ನೋಡುತ್ತೇನೆಂದರೆ ಈ ವೇಗ ಏನೇನೂ ಸಾಲದು. 3ಜಿ ಮತ್ತು ವೈಫೈ ಸೌಲಭ್ಯಗಳಿಲ್ಲ. ಕೊಡುವ ಹಣಕ್ಕೆ ಇನ್ನೇನೂ ತಾನೆ ದೊರೆಯಲು ಸಾಧ್ಯ?

ಇದಕ್ಕೆ ಯುಎಸ್‌ಬಿ ಕಿಂಡಿ ಇದೆ. ಅಂದರೆ ಗಣಕಕ್ಕೆ ಸಂಪರ್ಕ ಮಾಡಬಹುದು. ಹೀಗೆ ಸಂಪರ್ಕ ಮಾಡಿ ಗಣಕ ಮತ್ತು ಫೋನ್ ಮಧ್ಯೆ ಸಂಗೀತ, ಚಿತ್ರಗಳ ಫೈಲುಗಳನ್ನು ವರ್ಗಾವಣೆ ಮಾಡಿಕೊಳ್ಳಬಹುದು. ಆದರೆ ಈ ಯುಎಸ್‌ಬಿ ಕಿಂಡಿ ಮೂಲಕ ಫೋನ್ ಚಾರ್ಜ್ ಮಾಡಿಕೊಳ್ಳಲು ಸಾಧ್ಯವಿಲ್ಲ. ಫೋನ್ ಮಾಡುವಾಗ ಕೆಲವೊಮ್ಮೆ ಪ್ರಮುಖ ಸಂಖ್ಯೆಗಳಿಗೆ ಆಗಾಗ ಕರೆ ಮಾಡಲು ಹಲವು ಫೋನ್‌ಗಳು ಸ್ಮಾರ್ಟ್ ಡಯಲಿಂಗ್ ಎಂಬ ವ್ಯವಸ್ಥೆ ನೀಡುತ್ತಾರೆ. ಈ ಫೋನಿನಲ್ಲಿ ಅಂತಹ ಸವಲತ್ತು ಇಲ್ಲ. ಇದರ ಪರದೆಯೂ ಅಷ್ಟಕ್ಕಷ್ಟೆ. ನೋಡುವಾಗ ನೇರವಾಗಿ ನೋಡತಕ್ಕದ್ದು. ಪಕ್ಕದಿಂದ ನೋಡಿದರೆ ಸರಿಯಾಗಿ ಕಾಣುವುದಿಲ್ಲ.

ಈ ಫೋನ್‌ಗೆ ನೆಟ್‌ವರ್ಕ್ ಸಮಸ್ಯೆ ಇದೆ. ಕೆಲವೊಮ್ಮೆ ಸಿಗ್ನಲ್ ಸರಿಯಾಗಿ ಬರುವುದಿಲ್ಲ. ಎಲ್ಲ ಐದು ಕಡ್ಡಿಗಳನ್ನು ತೋರಿಸಿದರೂ ಕರೆ ಮಾತ್ರ ಹೋಗುವುದಿಲ್ಲ. ಆಗ ಫೋನನ್ನು ಒಮ್ಮೆ ಸ್ವಿಚ್ ಆಫ್ ಮಾಡಿ ಪುನಃ ಆನ್ ಮಾಡಿದರೆ ಸರಿಯಾಗುತ್ತದೆ. ಫೋನಿನಲ್ಲಿ ಅತಿ ವೇಗವಾಗಿ ಕೆಲಸ ಮಾಡಲು ಹೋದರೆ (ಉದಾ – ವೇಗವಾಗಿ ಎಸ್‌ಎಂಎಸ್ ಟೈಪ್ ಮಾಡುವುದು) ಫೋನ್ ತಟಸ್ಥವಾಗುತ್ತದೆ. ಆಗಲೂ ಫೋನನ್ನು ಒಮ್ಮೆ ಸ್ವಿಚ್ ಆಫ್ ಮಾಡಿ ಪುನಃ ಆನ್ ಮಾಡಿದರೆ ಸರಿಯಾಗುತ್ತದೆ.

ಒಟ್ಟಿನಲ್ಲಿ ಹೇಳುವುದಾದರೆ ಒಂದು ಅದ್ಭುತ ಫೋನಲ್ಲ. ಅತಿ ಕಡಿಮೆ ಬೆಲೆಯಲ್ಲಿ ಅತಿ ಹೆಚ್ಚು ಗುಣವೈಶಿಷ್ಟ್ಯಗಳನ್ನು ನೀಡುವ ಫೋನ್ ಎನ್ನಬಹುದು. ಕೊಟ್ಟ ಹಣಕ್ಕೆ ಮೋಸವಿಲ್ಲ (value for money).

ಗ್ಯಾಜೆಟ್ ಸಲಹೆ

ಗಂಗಾವತಿಯ ರಾಚಪ್ಪ ಅವರ ಪ್ರಶ್ನೆ: ಉಪಕರಣಗಳ (ಉದಾ – ಫೋನ್) ಚಾರ್ಜರುಗಳನ್ನು ವಿದ್ಯುತ್ ಸಂಪರ್ಕದಲ್ಲೇ ಇಡುವುದು, ಅಂದರೆ ಚಾರ್ಜ್ ಮಾಡದಿದ್ದಾಗಲೂ ಅದನ್ನು ಆನ್ ಇಡುವುದರಿಂದ ಅವುಗಳು ಬೇಗ ಹಾಳಾಗುತ್ತವೆ ಎನ್ನುತ್ತಾರೆ. ಇದು ಸತ್ಯವೇ?

ಉ: ಕೆಲವು ಸಂದರ್ಭಗಳಲ್ಲಿ ಇದು ಸತ್ಯ. ಅದರಲ್ಲೂ ಮುಖ್ಯವಾಗಿ ನಿಮ್ಮ ಮನೆಯ ವಿದ್ಯುತ್ ಸಂಪರ್ಕ ಚೆನ್ನಾಗಿಲ್ಲದಿದ್ದಂತಹ ಸಂದರ್ಭಗಳಲ್ಲಿ ಇದು ಖಂಡಿತ ಸತ್ಯ. ಯಾಕೆ ರಿಸ್ಕ್? ಅಗತ್ಯ ಇಲ್ಲದಿದ್ದಾಗ ಚಾರ್ಜರನ್ನು ಡಿಸ್‌ಕನೆಕ್ಟ್ ಮಾಡಿ ಇಡುವುದೇ ಒಳ್ಳೆಯದು.

ಗ್ಯಾಜೆಟ್ ತರ್ಲೆ

ಸಿಮ್ ಕಾರ್ಡ್‌ಗೆ ಕನ್ನಡದಲ್ಲಿ ಏನೆಂದು ಕರೆಯಬಹುದು? ಸಿಮ್ ಕಾರ್ಡ್ ಎಂದರೆ ಮೊಬೈಲ್ ಚಂದಾದಾರರ ವಿವರಗಳನ್ನು ಒಳಗೊಂಡ ಒಂದು ಚಿಕ್ಕ ಬಿಲ್ಲೆ. ಇದನ್ನು ಇಂಗ್ಲಿಶ್‌ನಲ್ಲಿ Subscriber Identity Module ಎನ್ನುತ್ತಾರೆ. ಅದನ್ನೆ ಕನ್ನಡಕ್ಕೆ ಶಬ್ದಶಃ ಅನುವಾದ ಮಾಡಿದರೆ ಚಂದಾದಾರ ಗುರುತು ಲಾಂಛನ ಬಿಲ್ಲೆ (ಚಂಗುಲಾಬಿ) ಎಂದಾಗುತ್ತದೆ!

-ಡಾ| ಯು. ಬಿ. ಪವನಜ

The post ಗ್ಯಾಜೆಟ್ ಲೋಕ – ೦೨೮ (ಜುಲೈ ೧೨, ೨೦೧೨) first appeared on Vishva Kannada.

ಏಮ್ ಆಂಡ್ ಶೂಟ್ ಕ್ಯಾಮರಾಗಳಲ್ಲೂ ಲೆನ್ಸ್ ಬದಲಾಯಿಸುವ ಸವಲತ್ತಿನ ಹೊಸ ಮಾದರಿಯ ಕ್ಯಾಮರಾವನ್ನು ನಿಕಾನ್ ತಯಾರಿಸಿದೆ. ಅಂತಹ ಕ್ಯಾಮರಾದ ಬಗ್ಗೆ ಈ ಸಲ ತಿಳಿದುಕೊಳ್ಳೋಣ.

ಮೈಕ್ರೋ ಫೋರ್ ಥರ್ಡ್

ಏಮ್ ಆಂಡ್ ಶೂಟ್ ಕ್ಯಾಮರಾಗಳಲ್ಲಿ ಲೆನ್ಸ್ ಬದಲಾಯಿಸಲು ಆಗುವುದಿಲ್ಲ. ಅದು ಏನಿದ್ದರೂ ಎಸ್‌ಎಲ್‌ಆರ್ ಕ್ಯಾಮರಾಗಳ ಸವಲತ್ತು. ಆದರೆ ಎಂದೆಂದಿಗೂ ಹಾಗೆಯೇ ಆಗಬೇಕಾಗಿಲ್ಲ. ಕೆಲವು ಕ್ಯಾಮರಾ ತಯಾರಕರು ಏಮ್ ಆಂಡ್ ಶೂಟ್ ಕ್ಯಾಮರಾಗಳಲ್ಲೂ ಲೆನ್ಸ್ ಬದಲಾಯಿಸುವ ಸವಲತ್ತನ್ನು ನೀಡಲು ತೊಡಗಿದ್ದಾರೆ. ಇಂತಹ ಕ್ಯಾಮರಾಗಳಿಗೆ ಮೈಕ್ರೋ ಫೋರ್ ಥರ್ಡ್ (Micro Four Thirds system) ಎಂಬ ಹೆಸರಿದೆ. ಇದನ್ನು ಒಲಿಂಪಸ್ ಮತ್ತು ಪಾನಾಸೋನಿಕ್ ಕಂಪೆನಿಗಳವರು ಜೊತೆ ಸೇರಿ ಪ್ರಾರಂಭಿಸಿದರು. ಇದನ್ನು ಜಾಗತಿಕ ಶಿಷ್ಟತೆ ಎಂದು ಎಲ್ಲರೂ ಬಳಸುವಂತಾಗಲಿ ಎಂಬುದು ಅವರ ಆಶೆಯಾಗಿತ್ತು. ಆದರೆ ಹಾಗಾಗಲಿಲ್ಲ. ಏನಿದು ಮೈಕ್ರೋ ಫೋರ್ ಥರ್ಡ್ ಎಂದರೆ?

ಫೋರ್ ಥರ್ಡ್ ಅಂದರೆ 4:3 ರ ಅನುಪಾತ ಎಂದು. 35ಮಿಮಿ ಫಿಲ್ಮಿನಲ್ಲಿ ಫಿಲ್ಮಿನ ಅಗಲ ಮತ್ತು ಎತ್ತರದ ಅನುಪಾತ 3:2 ಇತ್ತು ಡಿಎಸ್‌ಎಲ್‌ಆರ್ ಕ್ಯಾಮರಾಗಳಿಗೆ ಬಂದಾಗ ಅದು 4:3 ಆಯಿತು ಅದನ್ನೇ ಫೋರ್ ಥರ್ಡ್ ಎಂದು ಕರೆದರು. ಈ ನಮೂನೆಯ ಕ್ಯಾಮರಾಗಳಲ್ಲಿ ಕನ್ನಡಿ, ಪೆಂಟಾಪ್ರಿಸಂ ಎಲ್ಲ ಇರುತ್ತವೆ. ಆದುದರಿಂದ ಇವುಗಳ ಗಾತ್ರ ದೊಡ್ಡದಾಗಿರುತ್ತದೆ. ಇವುಗಳ ಬಗ್ಗೆ ಈ ಹಿಂದೆಯೇ ನಾವು ಗಮನಿಸಿದ್ದೇವೆ (ಗ್ಯಾಜೆಟ್‌ಲೋಕದ ಹಳೆಯ ಸಂಚಿಕೆಗಳನ್ನು vishvakannada.com/gadgetloka ಜಾಲತಾಣದಲ್ಲಿ ಓದಬಹುದು). ಮೈಕ್ರೋ ಫೋರ್ ಥರ್ಡ್‌ಗಳಲ್ಲಿ ಬೆಳಕನ್ನು ಮೇಲಕ್ಕೆ ಕಳುಹಿಸಿ ಅಲ್ಲಿಂದ ಪೆಂಟಾಪ್ರಿಸಂ ಮೂಲಕ ಐಪೀಸ್‌ನಲ್ಲಿ ನೋಡುವ ವ್ಯವಸ್ಥೆ ಇರುವುದಿಲ್ಲ. ಬೆಳಕು ನೇರವಾಗಿ ಸಂವೇದಕ (ಸೆನ್ಸರ್) ಮೇಲೆ ಬೀಳುತ್ತದೆ. ಎಸ್‌ಎಲ್‌ಆರ್‌ಗಳಂತೆ ಇಲ್ಲೂ ಲೆನ್ಸ್ ಬದಲಾಯಿಸಬಹುದು. ಫೋರ್ ಥರ್ಡ್ ಕ್ಯಾಮರಾಗಳಲ್ಲಿ 4:3ರ ಅನುಪಾತ ಇರುತ್ತದೆ. ಆದರೆ ಮೈಕ್ರೋ ಫೋರ್ ಥರ್ಡ್ ಕ್ಯಾಮರಾಗಳಲ್ಲಿ ಈ ಅನುಪಾತವಲ್ಲದೆ ಹೈಡೆಫಿನಿಶನ್ ಅಂದರೆ 16:9ರ ಅನುಪಾತವೂ ಇರುತ್ತದೆ. ಆದುದರಿಂದಲೇ ಈ ಮೈಕ್ರೋ ಎಂಬ ಹೆಚ್ಚಿಗೆ ಪದ ಜೋಡಿಕೊಂಡಿದೆ. ಇವುಗಳಲ್ಲೂ ಲೆನ್ಸ್ ಬದಲಾಯಿಸಬಹುದು. ಸರಿಯಾದ ಅಡಾಪ್ಟರ್ ಇದ್ದಲ್ಲಿ ಯಾವ ಲೆನ್ಸ್ ಬೇಕಿದ್ದರೂ ಬಳಸಬಹುದು. ಹೀಗಿದ್ದರೂ ಇದು ಜಾಗತಿಕ ಶಿಷ್ಟತೆಯಾಗಿಲ್ಲ.

ಈ ಮಾದರಿಯ ಕ್ಯಾಮರಾಗಳಲ್ಲಿ ಸಂವೇದಕದ ಗಾತ್ರ ಡಿಎಸ್‌ಎಲ್‌ಆರ್ ಕ್ಯಾಮರಾಗಳ ಸಂವೇದಕಕ್ಕಿಂತ ಕಡಿಮೆ ಇರುತ್ತದೆ. ಅಂತೆಯೇ ಲೆನ್ಸ್‌ನ ವ್ಯಾಸವೂ ಕಡಿಮೆ ಇರುತ್ತದೆ. ಹೆಚ್ಚು ಮೆಗಾಪಿಕ್ಸೆಲ್ ಎಂದು ಬರೆದಿದ್ದರೂ ಸಂವೇದಕದ ಒಟ್ಟು ಗಾತ್ರವೇ ಕಡಿಮೆ ಇರುವುದಿರಿಂದ ಹಾಗೂ ಲೆನ್ಸ್‌ನ ವ್ಯಾಸ ಕಡಿಮೆ ಇರುವುದರಿಂದ ಇವು ಡಿಎಸ್‌ಎಲ್‌ಆರ್ ಕ್ಯಾಮರಾಗಳ ಗುಣಮಟ್ಟವನ್ನು ತಲುಪುವುದಿಲ್ಲ. ಆದರೆ ಕನ್ನಡಿ, ಪೆಂಟಾಪ್ರಿಸಂ ಇಲ್ಲದಿರುವುದರಿಂದ ಕ್ಯಾಮರಾದ ಗಾತ್ರ ಕಡಿಮೆಯಾಗಿರುತ್ತದೆ. ಏಮ್ ಆಂಡ್ ಶೂಟ್ ಕ್ಯಾಮರಾ ಆಗಿದ್ದೂ ಲೆನ್ಸ್ ಬದಲಾಯಿಸಬಲ್ಲ ಸವಲತ್ತು ಈ ಕ್ಯಾಮರಾಗಳಿಗಿವೆ.

ಈಗ ಇದೇ ಮಾದರಿಯ ಎರಡು ಕ್ಯಾಮರಾಗಳನ್ನು ನಿಕಾನ್ ಕಂಪೆನಿ ಮಾರುಕಟ್ಟೆಗೆ ಬಿಡುಗಡೆ ಮಾಡಿದೆ. ಅವುಗಳೇ ನಿಕಾನ್ 1 J1 ಮತ್ತು V1. ಇಲ್ಲಿ ನಿಕಾನ್ 1 ಎಂಬುದು ಈ ಹೊಸ ಮಾದರಿಯ ಶ್ರೇಣಿ ಆಗಿದೆ. ಅಂದರೆ ಇನ್ನು ಮುಂದೆ ನಿಕಾನ್ 1 ಎಂಬ ಹೆಸರಿನ ಹಲವಾರು ಕ್ಯಾಮಾರಾಗಳು ಮಾರುಕಟ್ಟೆಗೆ ಬರಲಿವೆ. ಈಗ ನಿಕಾನ್ ೧ ಜೆ೧ ಕ್ಯಾಮರಾ ಬಗ್ಗೆ ಸ್ವಲ್ಪ ತಿಳಿಯಲು ಪ್ರಯತ್ನಿಸೋಣ.

ನಿಕಾನ್ 1 J1

ಈಗಾಗಲೇ ತಿಳಿಸಿದಂತೆ ಇದು ಬಹುಮಟ್ಟಿಗೆ ಏಮ್ ಆಂಡ್ ಶೂಟ್ ಕ್ಯಾಮರಾ. ಆದರೆ ಲೆನ್ಸ್ ಬದಲಾಯಿಸಬಹುದು. ನನಗೆ ಬಂದ ಕ್ಯಾಮರಾದಲ್ಲಿ 10-30ಮಿಮಿ ಲೆನ್ಸ್ ಇತ್ತು. ಕಂಪೆನಿಯ ಕ್ಯಾಟಲಾಗ್‌ನಲ್ಲಿ ಇನ್ನೂ ಹಲವಾರು ಲೆನ್ಸ್‌ಗಳಿವೆ. ಆದರೆ ನನಗೆ ಬರಲಿಲ್ಲ. ಕೇಳಿದಾಗ ಅವು ಇನ್ನೂ ಮಾರುಕಟ್ಟೆಯಲ್ಲಿ ಲಭ್ಯವಿಲ್ಲ ಎಂಬ ಉತ್ತರ ಬಂತು. ಆದುರಿಂದ ಎಲ್ಲ ಪರೀಕ್ಷೆಗಳೂ, ಫಲಿತಾಂಶಗಳೂ, ನನ್ನ ಅಭಿಪ್ರಾಯಗಳೂ ಈ ಕಿಟ್ ಲೆನ್ಸ್ ಆಧರಿಸಿ ಆಗಿವೆ. ಸಾಮಾನ್ಯವಾಗಿ ಡಿಎಸ್‌ಎಲ್‌ಆರ್ ಕ್ಯಾಮರಾಗಳಲ್ಲಿ ಕಿಟ್ ಲೆನ್ಸ್ ಅಷ್ಟೇನೂ ಚೆನ್ನಾಗಿರುವುದಿಲ್ಲ. ಇಲ್ಲೂ ಹಾಗೆಯೇ ಇರಬಹುದು ಅಂದುಕೊಂಡಿದ್ದೇನೆ. ಯಾಕೆಂದರೆ ಕಿಟ್ ಲೆನ್ಸ್ ಫಲಿತಾಂಶ ನನಗೇನೂ ಅತಿದೊಡ್ಡ ತೃಪ್ತಿ ನೀಡಿಲ್ಲ.

ಮೊದಲಿಗೆ ಕ್ಯಾಮರಾದ ಗುಣವೈಶಿಷ್ಟ್ಯಗಳ ಕಡೆ ಗಮನ ಹರಿಸೋಣ. 10 ಮೆಗಾಪಿಕ್ಸೆಲ್, 13.2 x 8.8 mm CMOS sensor, JPEG ಮತ್ತು RAW ಫೈಲ್ ವಿಧಾನಗಳು, ಹಲವು ನಮೂನೆಗಳಲ್ಲಿ ಫೋಟೋ ತೆಗೆಯುವುದು, 3:2 ಸ್ಥಿರ ಚಿತ್ರ, 16:9 ವೀಡಿಯೋ, ಹೈಡೆಫಿನಿಶನ್ ವೀಡಿಯೋ, 1/16,000-30 ಷಟರ್ ವೇಗ. ಷಟರ್ ಪ್ರಯಾರಿಟಿ, ಅಪೆರ್ಚರ್ ಪ್ರಯಾರಿಟಿ, ಸಂಪೂರ್ಣ ಮ್ಯಾನ್ಯುವಲ್ ವಿಧಾನಗಳು, 100 ರಿಂದ 6400 ತನಕ ಐಎಸ್‌ಓ ಆಯ್ಕೆಗಳು, ಕೈ ಅಲ್ಲಾಡಿದಿರೂ ಚಿತ್ರ ಚೆನ್ನಾಗಿ ಬರಲು ವೈಬ್ರೇಶನ್ ರಿಡಕ್ಷನ್, ತಮ್ಮದೇ ಫೋಟೋ ತೆಗೆಯಲು ಸೆಲ್ಫ್ ಟೈಮರ್, ಫ್ಲಾಶ್ ಇದೆ (ವಿ1 ಮಾದರಿಯಲ್ಲಿ ಫ್ಲಾಶ್ ಇಲ್ಲ). ಹಲವು ವಿಧಾನಗಳ ಆಟೋಫೋಕಸ್, ಸಂಪೂರ್ಣ ಮ್ಯಾನ್ಯುವಲ್ ಫೋಕಸ್, ಯುಎಸ್‌ಬಿ ಮತ್ತು ಎಚ್‌ಡಿಎಂಐ ಸಂಪರ್ಕ ಕಿಂಡಿಗಳು, ಇತ್ಯಾದಿ. ಒಂದು ಪರಿಣತರ ಕ್ಯಾಮರಾದಲ್ಲಿರಬೇಕಾದ ಎಲ್ಲ ಸವಲತ್ಯುಗಳೂ ಇವೆ.

ಇದರ ಬೆಲೆ ಸುಮಾರು 29 ಸಾವಿರ ರೂ. ಇದೇ ಬೆಲೆಗೆ ಡಿಎಸ್‌ಎಲ್‌ಆರ್ ಕ್ಯಾಮರ ಕೂಡ ದೊರೆಯುತ್ತದೆ ಎಂಬುದನ್ನು ಮನಸ್ಸಿಲ್ಲಿಟ್ಟುಕೊಳ್ಳಬೇಕು. ಡಿಎಸ್‌ಎಲ್‌ಆರ್ ಉತ್ತಮ ಗುಣಮಟ್ಟದ ಚಿತ್ರಗಳನ್ನೇನೋ ನೀಡುತ್ತದೆ ಆದರೆ ಗಾತ್ರದಲ್ಲಿ ದೊಡ್ಡದಾಗಿದೆ. ಸರಿಸುಮಾರು ಡಿಎಸ್‌ಎಲ್‌ಆರ್‌ನ ಎಲ್ಲ ಗುಣವೈಶಿಷ್ಟ್ಯಗಳನ್ನು ಹೊಂದಿ ಆದರೆ ಗಾತ್ರದಲ್ಲಿ ಚಿಕ್ಕದಾಗಿರುವ ಕ್ಯಾಮರಾ ನಿಕಾನ್ 1 ಜೆ1 (ಮತ್ತು ವಿ1). ಲೆನ್ಸ್ ಚಿಕ್ಕದಾಗಿದೆ. ಚಿಕ್ಕ ಕೈಚೀಲದಲ್ಲಿ ಅಥವಾ ಹೆಂಗಸರ ಜಂಬದ ಚೀಲದಲ್ಲಿ ಕ್ಯಾಮರಾ ಇಟ್ಟುಕೊಳ್ಳಬಹುದು. ಲೆನ್ಸ್‌ನಲ್ಲಿ ಒಂದು ಗುಂಡಿ (ಬಟನ್) ಇದೆ. ಅದನ್ನು ಬಳಸಿ ಲೆನ್ಸ್ ಅನ್ನು ಅತಿ ಚಿಕ್ಕದಾಗಿ ಮಾಡಬಹುದು. ಚೀಲದೊಳಗೆ ಇಡಲು ಇದು ಉತ್ತಮ ಸೌಲಭ್ಯ.

ಕ್ಯಾಮರಾ ಪರವಾಗಿಲ್ಲ. ಏಮ್ ಆಂಡ್ ಶೂಟ್ ಕ್ಯಾಮರಾದ ಗಾತ್ರದಲ್ಲಿ ಡಿಎಸ್‌ಎಲ್‌ಆರ್ ಕ್ಯಾಮರಾದ ಎಲ್ಲ ಗುಣವೈಶಿಷ್ಟ್ಯಗಳನ್ನು ನೀಡಿದ್ದಾರೆ. ನಾನು ತೆಗೆದ ಫೋಟೋಗಳು ಪರವಾಗಿಲ್ಲ. ನೀವೇ ನೋಡಿ ತೀರ್ಮಾನಿಸಿ. ವೀಡಿಯೋ ಚೆನ್ನಾಗಿ ಏನೋ ಬರುತ್ತದೆ. ಆದರೆ ಕೈ ಸ್ವಲ್ಪವೂ ಅಲ್ಲಾಡಬಾರದು. ವೀಡಿಯೋ ತೆಗೆಯುವಾಗ ಕ್ಯಾಮರಾ ಸ್ಟ್ಯಾಂಡ್ ಬಳಸಿದರೆ ಒಳ್ಳೆಯದು.

ಗ್ಯಾಜೆಟ್ ಸಲಹೆ

ಪ್ರಭುರಾಜ ಸ್ವಾಮಿ ಅವರ ಪ್ರಶ್ನೆ: ನನಗೆ ಮೊಬೈಲ್ ಸಿಮ್ ಕಾರ್ಡ್ ಬಳಸುವಂತಹ ಡಾಟಾ ಕಾರ್ಡ್ ಕೊಳ್ಳಬೇಕು. ಅಂತಹವುಗಳು ಮಾರುಕಟ್ಟೆಯಲ್ಲಿ ಇವೆಯೇ?

ಉ: ಖಂಡಿತ ಇವೆ. ಬೀಟೆಲ್, ಹುವೇ, ಟೆರ್ರಾಕಾಂ ಇತ್ಯಾದಿ ಕಂಪೆನಿಗಳ ಡಾಟಾ ಕಾರ್ಡ್‌ಗಳು ಇವೆ. ನಾನು ಹುವೇಯವರದನ್ನು ಕಳೆದ ಮೂರು ವರ್ಷಗಳಿಂದ ಬಳಸುತ್ತಿದ್ದೇನೆ.

ನಿಕಾನ್ ಜ೧ ಕ್ಯಾಮರಾದಲ್ಲಿ ತೆಗೆದ ಕೆಲವು ಫೋಟೋಗಳು:

ಸಕಲೇಶಪುರದಿಂದ ಸುಬ್ರಹ್ಮಣ್ಯಕ್ಕೆ ಹೋಗುವ ರೈಲು ಮಾರ್ಗದಲ್ಲಿ ಕಂಡುಬರುವ ಪಶ್ಚಿಮ ಘಟ್ಟದ ಅದ್ಭುತ ದೃಶ್ಯಗಳನ್ನು ನಿಕಾನ್ ಜೆ೧ ಕ್ಯಾಮರಾದಲ್ಲಿ ಸೆರೆಹಿಡಿದ ಚಿತ್ರಗಳು ಇಲ್ಲಿವೆ.

-ಡಾ| ಯು. ಬಿ. ಪವನಜ

The post ಗ್ಯಾಜೆಟ್ ಲೋಕ – ೦೨೭ (ಜುಲೈ ೦೫, ೨೦೧೨) first appeared on Vishva Kannada.

ಸ್ಮಾರ್ಟ್‌ಫೋನ್‌ಗಳಲ್ಲಿ ಅತ್ಯಂತ ಜನಪಿಯವಾಗಿರುವ ಆಂಡ್ರೋಯಿಡ್ ಫೋನ್‌ಗಳಿಗೆ ಇರುವ ಲಕ್ಷಗಟ್ಟಲೆ ತಂತ್ರಾಂಶಗಳಲ್ಲಿ ಇನ್ನೊಂದಿಷ್ಟು ಉಪಯುಕ್ತವಾದವುಗಳ ಕಡೆ ಗಮನ ಹರಿಸೋಣ.

ಜನಪ್ರಿಯತೆಯಲ್ಲಿ ಮೊದಲ ಸ್ಥಾನದಲ್ಲಿರುವ ಆಂಡ್ರೋಯಿಡ್ ಸ್ಮಾರ್ಟ್‌ಫೋನ್‌ಗಳಿಗೆ ಹಲವು ಕಿರುತಂತ್ರಾಂಶಗಳು ಲಭ್ಯವಿವೆ. ಇವುಗಳಿಗೆ ಆಪ್ (app) ಎನ್ನುತ್ತಾರೆ. ಇಂತಹ ಕೆಲವು ಉಪಯುಕ್ತ ಕಿರುತಂತ್ರಾಂಶಗಳನ್ನು ಮೇ ೧೭ರ ಸಂಚಿಕೆಯಲ್ಲಿ ಗಮನಿಸಿದ್ದೆವು. ಇವುಗಳನ್ನು play.google.com ಜಾಲತಾಣದಿಂದ ಅಥವಾ ಗೂಗ್ಲ್ ಪ್ಲೇ ಆಪ್ ಮೂಲಕ ನಿಮ್ಮ ಸ್ಮಾರ್ಟ್‌ಫೋನ್ ಬಳಸಿ ಡೌನ್‌ಲೋಡ್ ಮಾಡಿಕೊಂಡು ಬಳಸಬಹುದು. ಸುಮಾರು ಆರು ಲಕ್ಷ ಚಿಲ್ಲರೆ ಇರುವ ಇಂತಹ ಕಿರುತಂತ್ರಾಂಶಗಳಲ್ಲಿ ಉಪಯುಕ್ತವಾದ ಇನ್ನೊಂದಿಷ್ಟನ್ನು ಈಗ ನೋಡೋಣ.

ಅವಸ್ತ್ ಸುರಕ್ಷೆ (avast! Mobile Security)

ನಿಮ್ಮ ಮೊಬೈಲ್ ಫೋನಿಗೆ ಸುರಕ್ಷ ಕವಚವಾಗಿ ಈ ಕಿರುತಂತ್ರಾಶ ಕೆಲಸ ಮಾಡುತ್ತದೆ. ಮೊಬೈಲ್ ಕಳೆದು ಹೋದರೆ, ಕದ್ದವರು ಅದರ ಸಿಮ್ ಕಾರ್ಡ್ ಬದಲಿಸಿದಾಗ ಇದು ನೀವು ಮೊದಲೇ ದಾಖಲಿಸಿದ ಒಂದು ಮೊಬೈಲ್ ಸಂಖ್ಯೆಗೆ ಸಂದೇಶ ಕಳುಹಿಸುತ್ತದೆ. ಮಾತ್ರವಲ್ಲ, ಆ ಮೊಬೈಲ್‌ನಿಂದ ಸಂದೇಶ ಕಳುಹಿಸಿ ಕಳೆದು ಹೋದ ಮೊಬೈಲ್ ಫೋನನ್ನು ಸಂಪೂರ್ಣ ನಿಯಂತ್ರಣಕ್ಕೆ ತೆಗೆದುಕೊಳ್ಳಬಹುದು. ಜಿಪಿಎಸ್ ಚಾಲನೆಗೊಳಿಸಿ ಮೊಬೈಲ್ ಫೋನ್ ಎಲ್ಲಿಗೆ ಹೋಗುತ್ತಿದೆ ಎಂದು ತಿಳಿಯಬಹುದು. ಫೋನಿನಲ್ಲಿರುವ ಎಲ್ಲ ಮಾಹಿತಿಯನ್ನು ಅಳಿಸಿಹಾಕಬಹುದು. ಇದರಲ್ಲಿ ವೈರಸ್ ನಿರೋಧಕ ತಂತ್ರಾಂಶವೂ ಇದೆ. ಗೊತ್ತಿಲ್ಲದ ಸಂಖ್ಯೆಯಿಂದ ಎಸ್‌ಎಂಎಸ್ ಬರದಂತೆಯೂ ಮಾಡಬಹುದು.

ಗೂಗ್ಲ್ ಅಂತರಿಕ್ಷ ನಕ್ಷೆ (Sky Map)

ಗೂಗ್ಲ್‌ನವರು ಮುಕ್ತ ತಂತ್ರಾಂಶ ವಿಧಾನದಲ್ಲಿ ಇದ್ದ ತಂತ್ರಾಂಶವನ್ನು ಉಚಿತವಾಗಿ ನೀಡುತ್ತಿದ್ದಾರೆ. ಇದು ಅಂತರಿಕ್ಷಕ್ಕೆ ಒಂದು ಕಿಟಿಕಿಯಾಗಿ ಕೆಲಸ ಮಾಡುತ್ತದೆ. ಒಂದು ಸ್ಥಳದಲ್ಲಿ ನಿಂತುಕೊಂಡು ಆಕಾಶವನ್ನು ಒಂದು ದಿಕ್ಕಿನಲ್ಲಿ ವೀಕ್ಷಿಸಿದರೆ ಯಾವ ಯಾವ ನಕ್ಷತ್ರ, ಗ್ರಹಗಳು ಕಾಣಸಿಗುತ್ತವೆ ಎಂಬುದನ್ನು ಇದು ತೋರಿಸುತ್ತದೆ. ಹವ್ಯಾಸಿ ಖಗೋಳಶಾಸ್ತ್ರಜ್ಞರುಗಳಿಗೆ ತುಂಬ ಉಪಯುಕ್ತ ತಂತ್ರಾಂಶ. ತಲೆ ಎತ್ತಿ ಆಕಾಶ ವೀಕ್ಷಣೆ ಮಾಡಿದರೆ ಹೊಳೆಯುವ ಆಕಾಶಕಾಯ ಯಾವುದು ಎಂದು ತಿಳಿಯಬೇಕಾದರೆ ಈ ತಂತ್ರಾಂಶವನ್ನು ಚಾಲೂಗೊಳಿಸಿ ಆ ಆಕಾಶಕಾಯದ ಕಡೆಗೆ ತಿರುಗಿಸಿದರೆ ಸಾಕು. ಅದರ ಹೆಸರು ಮೂಡಿಬರುತ್ತದೆ. ಇದು ಕೆಲಸ ಮಾಡಬೇಕಾದರೆ ಫೋನಿನಲ್ಲಿ ಅಕ್ಸಲೆರೋಮೀಟರ್ ಮತ್ತು ಮ್ಯಾಗ್ನೆಟೋಮೀಟರ್ ಇರತಕ್ಕದ್ದು.

ಮಾತನಾಡುವ ಬೆಕ್ಕು (Talking Tom Cat Free)

ನಿಮ್ಮ ಮಾತನ್ನು ಅಣಕಿಸಿ ಅದನ್ನೇ ಸ್ವಲ್ಪ ಶ್ರುತಿ ಬದಲಿಸಿ ಹೇಳಿದರೆ ಹೇಗಿರುತ್ತದೆ? ಈ ಕಿರುತಂತ್ರಾಂಶ ಅದನ್ನೇ ಮಾಡುತ್ತದೆ. ಇದಕ್ಕೆ ಒಂದು ಬೆಕ್ಕಿನ ರೂಪ ನೀಡಲಾಗಿದೆ. ಸುಮಾರು ಮುವತ್ತು ಸೆಕೆಂಡು ಆಲಿಸಿ ನಂತರ ಅದನ್ನೇ ಸ್ವರ ಬದಲಿಸಿ ಪುನರುತ್ಪತ್ತಿ ಮಾಡುತ್ತದೆ. ಮಕ್ಕಳಿಗೆ ಮಾತ್ರವಲ್ಲ ದೊಡ್ಡವರಿಗೂ ಉತ್ತಮ ಮನನರಂಜನೆ ನೀಡುವ ಕಿರುತಂತ್ರಾಂಶ. ಹಾಡನ್ನು ಧ್ವನಿ ಮುದ್ರಿಸಿಕೊಳ್ಳುವ ಸವಲತ್ತೂ ಇದೆ. ಜನಪ್ರಿಯ ಹಾಡುಗಳನ್ನು ಈ ಮಾದರಿಯಲ್ಲಿ ಸ್ವರ ಬದಲಿಸಿ ಧ್ವನಿಮುದ್ರಿಸಿದ ಹಾಡುಗಳು ಅಂತರಜಾಲದಲ್ಲಿ ಲಭ್ಯವಿವೆ. ಇನ್ನು ತಡವೇಕೆ? ಬಣ್ಣದ ತಗಡಿನ ತುತ್ತೂರಿಯನ್ನು ಹಾಡಿ!

ತಂಬೂರಿ (Tanpura Droid)

ಸಂಗೀತಗಾರರಿಗೆ ತಂಬೂರಿ ಅತೀ ಅಗತ್ಯ. ಇತ್ತೀಚೆಗಂತು ಬಹುಪಾಲು ಸಂಗೀತಗಾರರು ನಿಜವಾದ ತಂಬೂರಿ ಬದಲಿಗೆ ಇಲೆಕ್ಟ್ರಾನಿಕ್ ತಂಬೂರಿ ಬಳಸುತ್ತಿದ್ದಾರೆ. ಈಗ ಅದನ್ನೇ ಕಿರುತಂತ್ರಾಂಶವಾಗಿ ನೀಡಲಾಗಿದೆ. ಇದನ್ನು ನಿಮ್ಮ ಮೊಬೈಲ್ ಫೋನಿನಲ್ಲಿ ಇನ್‌ಸ್ಟಾಲ್ ಮಾಡಿಕೊಳ್ಳಿ. ನಿಮಗೊಂದು ತಂಬೂರಿ ಸಿದ್ಧ. ಸಂಗೀತದ ಶ್ರುತಿ, ಸ್ವರ ಎಲ್ಲ ನಿಮಗೆ ಬೇಕಾದಂತೆ ಆಯ್ಕೆ ಮಾಡಿಕೊಳ್ಳಬಹುದು. ಸಂಗೀತಕ್ಕೇ ಆಗಬೇಕಾಗಿಲ್ಲ, ಧ್ಯಾನಕ್ಕೂ ಹಿನ್ನೆಲೆ ಸಂಗೀತವಾಗಿಯೂ ಬಳಸಬಹುದು.

ಖರ್ಚುವೆಚ್ಚ ಲೆಕ್ಕ (Expense Manager)

ಈ ಕಿರುತಂತ್ರಾಂಶ ದಿನನಿತ್ಯದ ಆಯವ್ಯಯಗಳನ್ನು ದಾಖಲಿಸಲು ಸಹಾಯ ಮಾಡುತ್ತದೆ. ಬೇರೆಬೇರೆ ಖಾತೆಗಳನ್ನು ತೆರೆದು ಆಯಾ ಖಾತೆಗಳಲ್ಲಿ ಆದ ಖರ್ಚುಗಳನ್ನು ದಾಖಲಿಸಬಹುದು. ತಿಂಗಳ ಕೊನೆಗೆ ಆದ ಎಲ್ಲ ಖರ್ಚನ್ನು ಕೋಷ್ಟಕ ಮಾದರಿಯಲ್ಲಿ ನೀಡುತ್ತದೆ. ಕಂಪೆನಿ ಪರವಾಗಿ ಪ್ರವಾಸ ಹೋದಾಗ ಆದ ಖರ್ಚುಗಳನ್ನು ಅಲ್ಲಲ್ಲೇ ದಾಖಲಿಸಿ ಕೊನೆಗೆ ಕೋಷ್ಟಕ ಮಾದರಿಯಲ್ಲಿ ಪಡೆಯಬಹುದು. ತುಂಬ ಉಪಯುಕ್ತ ತಂತ್ರಾಂಶ.

ವಿದೇಶಿ ವಿನಿಮಯ (XE Currency)

ನಮ್ಮ ದೇಶದ ಹಣ ಪ್ರಪಂಚದ ಇತರೆ ದುಡ್ಡುಗಳ ಜೊತೆ ಯಾವ ಬೆಲೆಯಲ್ಲಿ ಮಾರಾಟವಾಗುತ್ತಿದೆ ಎಂದು ತಿಳಿಯಬೇಕೆ? ಹೌದಾದಲ್ಲಿ ನಿಮಗೆ ಈ ಕಿರುತಂತ್ರಾಂಶ ಬೇಕು. ಆಯಾ ಸಮಯದಲ್ಲಿ ರುಪಾಯಿಯ ಬೆಲೆಯನ್ನು ಪ್ರಪಂಚದ ಇತರೆ ಹಣಗಳ ಜೊತೆ ಹೋಲಿಸಿ ತೋರಿಸುತ್ತದೆ. ಒಂಡು ಡಾಲರಿಗೆ ಎಷ್ಟು ರುಪಾಯಿ, ಒಂದು ಯೂರೋಗೆ ಎಷ್ಟು ರುಪಾಯಿ ಎಂದೆಲ್ಲ ತಿಳಿಯಬಹುದು. ವಿವಿಧ ದೇಶಗಳ ಕರೆನ್ಸಿಗಳ ನಡುವೆ ಪರಿವರ್ತಿಸುವ ಕ್ಯಾಲ್ಕುಲೇಟರ್ ಕೂಡ ಇದೆ. ಯಾವುದೋ ಒಂದು ಜಾಲತಾಣದಲ್ಲಿ ಯಾವುದೋ ಒಂದು ಪದಾರ್ಥದ ಬೆಲೆಯನ್ನು ಡಾಲರಿನಲ್ಲಿ ನಮೂದಿಸಿದ್ದರೆ ಅದನ್ನೂ ಈ ಕಿರುತಂತ್ರಾಂಶ ಬಳಸಿ ರುಪಾಯಿಗೆ ಬದಲಾಯಿಸಿ ಇಲ್ಲಿಯ ಬೆಲೆಯನ್ನು ತಿಳಿದುಕೊಳ್ಳಬಹುದು.

ಕ್ಯೂಆರ್ ಬಾರ್‌ಕೋಡ್ ಸ್ಕ್ಯಾನರ್ (Qr Barcode Scanner)

ಹಲವು ಪದಾರ್ಥಗಳಿಗೆ ಅದರ ವಿವರಗಳನ್ನು ಬಾರ್‌ಕೋಡ್ ಮೂಲಕ ದಾಖಲಿಸಿರುವುದನ್ನು ಗಮನಿಸಿರುತ್ತೀರಾ. ಸೂಪರ್‌ಮಾರ್ಕೆಟ್‌ಗಳಲ್ಲಿ ಪದಾರ್ಥಗಳ ಬಾರ್‌ಕೋಡನ್ನು ಸ್ಕ್ಯಾನರ್ ಮುಂದೆ ಹಿಡಿದರೆ ಸಾಕು ಅದರ ಬೆಲೆ ರಶೀದಿಯಲ್ಲಿ ಸೇರಿಕೊಳ್ಳುತ್ತದೆ. ನೀವೊಂದು ಸೂಪರ್ ಮಾರ್ಕೆಟಿಗೆ ಹೋಗಿದ್ದೀರಾ. ಅಲ್ಲೊಂದು ಕ್ಯಾಮರಾದ ಪೆಟ್ಟಿಗೆಯಲ್ಲಿ ಬಾರ್‌ಕೋಡ್ ಗಮನಿಸಿದ್ದೀರಾ. ನಿಮಗೆ ಅದರ ಬೆಲೆ ರುಪಾಯಿಯಲ್ಲಿ ಪ್ರತ್ಯೇಕ ಬರೆದಿರುವುದೂ ಕಣ್ಣಿಗೆ ಬಿದ್ದಿದೆ. ಆದರೆ ಆ ಕ್ಯಾಮರಾದ ಮೂಲ ಬೆಲೆ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಎಷ್ಟು ಎಂದು ತಿಳಿಯಬೇಕೇ? ಹಾಗಿದ್ದಲ್ಲಿ ನೀವು ಈ ಕಿರುತಂತ್ರಾಂಶವನ್ನು ಬಳಸಬಹುದು. ಅದು ಬಾರ್‌ಕೋಡ್ ಅನ್ನು ಸ್ಕ್ಯಾನ್ ಮಾಡಿ ಆ ಪದಾರ್ಥ ಏನು ಎಂದು ತಿಳಿಸುತ್ತದೆ. ಹಾಗೆಯೇ ಅಂತರಜಾಲದ ಮೂಲಕ ಅದರ ಬೆಲೆಯನ್ನೂ ತಿಳಿಯಲು ಸಹಾಯ ಮಾಡುತ್ತದೆ. ಅಂತರಜಾಲತಾಣಗಳಲ್ಲಿ ಜಾಲತಾಣದ ವಿಳಾಸವನ್ನು ಮೊಬೈಲ್ ಫೋನ್ ಆವೃತ್ತಿಯನ್ನು ಕ್ಯೂಆರ್ ಕೋಡ್ ಮೂಲಕ ದಾಖಲಿಸಿರುತ್ತಾರೆ. ಈ ಕಿರುತಂತ್ರಾಂಶವನ್ನು ಬಳಸಿ ಜಾಲತಾಣಗಳ ಮೊಬೈಲ್ ಆವೃತ್ತಿಯನ್ನು ತಿಳಿದುಕೊಳ್ಳಬಹುದು.

ಆಂಡ್ರೋಯಿಡ್ ಮಾರುಕಟ್ಟೆಯಲ್ಲಿ ಆರು ಲಕ್ಷಕ್ಕಿಂತ ಅಧಿಕ ಕಿರುತಂತ್ರಾಂಶಗಳಿವೆ. ಅವುಗಳಲ್ಲಿ ಕೆಲವನ್ನು ಮಾತ್ರ ಇಲ್ಲಿ ನೀಡಲಾಗಿದೆ. ಅಂದ ಮಾತ್ರಕ್ಕೆ ಉಳಿದವು ಚೆನ್ನಾಗಿಲ್ಲ ಎಂದಾಗಲಿ ಇವೇ ಸರ್ವಶ್ರೇಷ್ಠ ಎಂದಾಗಲಿ ತೀರ್ಮಾನಿಸಬಾರದು. ಈ ಕಿರುತಂತ್ರಾಂಶಗಳನ್ನು ಆಂಡ್ರೋಯಿಡ್ ಆಧಾರಿತ ಟ್ಯಾಬ್ಲೆಟ್‌ಗಳಲ್ಲೂ ಬಳಸಬಹುದು.

ಗ್ಯಾಜೆಟ್ ಸಲಹೆ

ರಾಣಿಬೆನ್ನೂರಿನ ಶಶಿ ಅವರ ಪ್ರಶ್ನೆ: ಯಾವ 3ಜಿ ಡಾಟಾ ಕಾರ್ಡ್ ಚೆನ್ನಾಗಿದೆ?

ಉ: ನಾನು ಹುವೇಯವರ ಡಾಟಾ ಕಾರ್ಡ್ ಬಳಸುತ್ತಿದ್ದೇನೆ. ಚೆನ್ನಾಗಿದೆ. ಇತರೆ ಮಾದರಿಗಳ ಬಗ್ಗೆ ಅಷ್ಟು ಮಾಹಿತಿ ಇಲ್ಲ.

-ಡಾ| ಯು. ಬಿ. ಪವನಜ

The post ಗ್ಯಾಜೆಟ್ ಲೋಕ – ೦೨೬ (ಜೂನ್ ೨೮, ೨೦೧೨) first appeared on Vishva Kannada.

ನಿಮ್ಮ ಐಪ್ಯಾಡ್‌ಗೆ ಸಿಮ್ ಕಾರ್ಡ್ ಸೌಲಭ್ಯ ಇಲ್ಲ. ಮೊಬೈಲಲ್ಲೂ ಇಲ್ಲ. ಆದರೆ ನಿಮ್ಮಲ್ಲಿ ೩ಜಿ ಸಿಮ್ ಕಾರ್ಡ್ ಇದೆ. ಇಂತಹ ಸಂದರ್ಭದಲ್ಲಿ ಬಳಕೆಯಾಗುವುದು ಹುವೇಯವರ ವೈಫೈ ಡಾಟಾ ಕಾರ್ಡ್

ಬಸ್ಸಿನಲ್ಲಿ ಕುಳಿತಾಗಿದೆ. ಅಷ್ಟರಲ್ಲಿ ನಿಮ್ಮ ಸಹೋದ್ಯೋಗಿಯ ಫೋನ್ ಬರುತ್ತದೆ. ತಾನು ಒಂದು ಇಮೈಲ್ ಮಾಡಿದ್ದೇನೆ. ತುಂಬ ಅರ್ಜೆಂಟ್. ಯಾವುದೋ ಒಂದು ಕೆಲಸಕ್ಕೆ ನಿಮ್ಮ ಒಪ್ಪಿಗೆ ಆತನಿಗೆ ಇಮೈಲ್ ಮೂಲಕ ಬೇಕಾಗಿದೆ. ನಿಮ್ಮ ಮೊಬೈಲ್‌ನಲ್ಲಿರುವ ಸಿಮ್‌ಗೆ ಅಂತರಜಾಲ ಸಂಪರ್ಕ ಇಲ್ಲ. ಚಿಂತೆ ಇಲ್ಲ. ನಿಮ್ಮಲ್ಲಿ ಹುವೇಯವರ ವೈಫೈ ಡಾಟಾ ಕಾರ್ಡ್ ಇದ್ದಲ್ಲಿ ಅದು ಈಗ ಬಳಕೆಗೆ ಬರುತ್ತದೆ.

ಹುವೇಯವರು E560 ಎಂಬ ವೈಫೈ ಡಾಟಾ ಕಾರ್ಡ್ ತಯಾರಿಸಿದ್ದಾರೆ. ಇದರಲ್ಲಿ ಮಾಮೂಲಿ 3ಜಿ ಸಿಮ್ ಕಾರ್ಡ್ ಹಾಕಬಹುದು. ಬಿಎಸ್‌ಎನ್‌ಎಲ್‌ನವರು ಡಾಟಾ ಕಾರ್ಡ್ ಒಳಗೆ ಹಾಕಲು 3ಜಿ ಸಿಮ್ ಕಾರ್ಡ್ ನೀಡುತ್ತಾರೆ. ಅದನ್ನು ಈ ವೈಫೈ ಡಾಟಾ ಕಾರ್ಡ್ ಜೊತೆ ಬಳಸಬಹುದು. ಇದರಲ್ಲಿ ಸಿಮ್ ಕಾರ್ಡ್ ಮಾತ್ರವಲ್ಲ, ಮೈಕ್ರೋಎಸ್‌ಡಿ ಕಾರ್ಡ್ ಹಾಕಿ ಇದನ್ನು ಯುಎಸ್‌ಬಿ ಡ್ರೈವ್ ಆಗಿಯೂ ಬಳಸಿಕೊಳ್ಳಬಹುದು. ಇದು ಗಾತ್ರದಲ್ಲಿ ಚಿಕ್ಕದಾಗಿದೆ – 95 x 50 x 12 ಮಿಮಿ. ಅಂದರೆ ಅಂಗಿ ಕಿಸೆಯಲ್ಲಿ ಆರಾಮವಾಗಿ ಇಟ್ಟುಕೊಳ್ಳಬಹುದು. ಲಲನಾಮಣಿಯರು ತಮ್ಮ ಜಂಬದಚೀಲದಲ್ಲಿ ಇಟ್ಟುಕೊಳ್ಳಬಹುದು.

ವೈಫೈ ಡಾಟಾ ಕಾರ್ಡ್ ಎಂದರೇನು? ಅಂತರಜಾಲ ಸಂಪರ್ಕಕ್ಕೆ ಬಳಸುವ 3ಜಿ ಡಾಟಾ ಕಾರ್ಡ್ ಗೊತ್ತಿರಬಹುದು. ಅದನ್ನು ಯುಎಸ್‌ಬಿ ಕಿಂಡಿ ಮೂಲಕ ಗಣಕಕ್ಕೆ ಜೋಡಿಸಲಾಗುತ್ತದೆ. ಅಂದರೆ ಒಂದು ಸಲಕ್ಕೆ ಒಂದು ಗಣಕಕ್ಕೆ ಅಂತರಜಾಲ ಸಂಪರ್ಕ ಸಾಧ್ಯ. ಹುವೇ E560 ಡಾಟಾ ಕಾರ್ಡ್‌ನಲ್ಲಿ ವೈಫೈ ಸೌಕರ್ಯ ಇದೆ. ಇದರಲ್ಲಿ 3ಜಿ ಸಿಮ್ ಕಾರ್ಡ್ ಹಾಕಬೇಕು. ಸ್ವಿಚ್ ಆನ್ ಮಾಡಿದರೆ ಸಾಕು. ಇದು ವೈಫೈ ಹಾಟ್‌ಸ್ಪಾಟ್ ಆಗಿ ಕೆಲಸ ಮಾಡುತ್ತದೆ. ಏಕಕಾಲದಲ್ಲಿ ಗರಿಷ್ಠ ಐದು ಸಾಧನಗಳಿಗೆ ಅಂತರಜಾಲ ಸಂಪರ್ಕ ನೀಡಬಲ್ಲುದು. ಮನೆಯಲ್ಲಿರುವ ಐಪ್ಯಾಡ್, ಟ್ಯಾಬ್ಲೆಟ್, ಮೊಬೈಲ್ ಫೋನ್, ಲ್ಯಾಪ್‌ಟಾಪ್ ಇವುಗಳಿಗೆ ಏಕಕಾಲಕ್ಕೆ ಅಂತರಜಾಲ ಸಂಪರ್ಕ ಸಿಕ್ಕಂತೆ. ಡೆಸ್ಕ್‌ಟಾಪ್ ಗಣಕಕ್ಕೆ ಮಾತ್ರ ನೇರವಾಗಿ ಯುಎಸ್‌ಬಿ ಕೇಬಲ್ ಮೂಲಕ ಜೋಡಿಸಬೇಕು. ಅದಕ್ಕೂ ಸವಲತ್ತು ಈ ಸಾಧನದಲ್ಲಿದೆ. ಒಂದು ಗಣಕಕ್ಕೆ ಯುಎಸ್‌ಬಿ ಮೂಲಕ ಜೋಡಿಸಬಹುದು.

ಹುವೇ E560 ಡಾಟಾ ಕಾರ್ಡ್‌ನ ಗುಣವೈಶಿಷ್ಟ್ಯಗಳು: ಜಿಎಸ್‌ಎಂ 3ಜಿ ಸಿಮ್ ಕಾರ್ಡ್, ಡೌನ್‌ಲೋಡ್ ವೇಗ – 7.2, ಹಾಗೂ ಅಪ್‌ಲೋಡ್ ವೇಗ 5.76 ಎಂಬಿಪಿಎಸ್. 1500mAh  ಬ್ಯಾಟರಿ. ಒಮ್ಮೆ ಪೂರ್ತಿ ಚಾರ್ಜ್ ಮಾಡಿದ ನಂತರ ಕೆಲಸ ಮಾಡುವ ಅವಧಿ 5 ಗಂಟೆ. ಚಾರ್ಜಿಂಗ್ ಅವಧಿ 2.5 ಗಂಟೆ. ವೈಫೈ ಆವೃತ್ತಿ – 802.11n. ಓಎಲ್‌ಇಡಿ ಪರದೆ.

ನಾನು ಇದನ್ನು ಎರಡು ವಾರಗಳಿಂದ ಬಳಸುತ್ತಿದ್ದೇನೆ. ಗುಣಮಟ್ಟ ಚೆನ್ನಾಗಿದೆ. ಬೆಲೆ ರೂ.4500 (flipkart.com). ಮೈಕ್ರೋಮ್ಯಾಕ್ಸ್‌ನವರು ಇದೇ ಮಾದರಿಯ ಸಾಧನ ತಯಾರಿಸಿದ್ದಾರೆ. ಬೆಲೆ ಸುಮಾರು 3000ರೂ. ಅದೂ ಕೂಡ ಚೆನ್ನಾಗಿದೆ ಎಂದು ಅದನ್ನು ಕೊಂಡು ಬಳಸುತ್ತಿರುವ ನನ್ನ ಸ್ನೇಹಿತ ಹೇಳಿದ್ದಾನೆ. ಎರಡನ್ನು ಹೋಲಿಸಿ ನೋಡಬೇಕು ಎಂಬ ನನ್ನ ಆಸೆ ಪೂರೈಸಿಲ್ಲ.

ಹೆಚ್ಚಿಗೆ ಪವರ್

ನೀವು ಕೊಡಚಾದ್ರಿಗೆ ಚಾರಣಕ್ಕೆ ಹೋಗುತ್ತಿದ್ದೀರಿ. ಎರಡು ಮೂರು ದಿನಗಳ ಕಾಲ ವಿದ್ಯುತ್ ಸಂಪರ್ಕ ಇಲ್ಲದ ಕಾಡಿನಲ್ಲಿ ಗುಡಾರಗಳಲ್ಲಿ ವಾಸ. ಊಟ, ನೀರು ಎಲ್ಲ ಇದೆ. ಆದರೆ ಮೊಬೈಲಿಗೆ ಪವರ್? ಕೆಲವು ಫೋನ್‌ಗಳು ಮೂರು ದಿನಗಳ ಕಾಲ ಪವರ್ ಉಳಿಸಿಕೊಳ್ಳುತ್ತವೆ. ಆದರೆ ಈ ಸ್ಮಾರ್ಟ್‌ಫೋನ್‌ಗಳು ಇದ್ದಾವಲ್ಲ, ಅವು ಒಂದು ದಿನ ಪವರ್ ಇಟ್ಟುಕೊಂಡರೆ ಅದೇ ಹೆಚ್ಚು. ಸಾಯಂಕಾಲ ಇನ್ನೊಮ್ಮೆ ಚಾರ್ಜ್ ಮಾಡಬೇಕಾಗುತ್ತದೆ. ಅಂತಹದ್ದರಲ್ಲಿ ಮೂರುದಿನಕ್ಕೆ ಖಂಡಿತ ಅವುಗಳಲ್ಲಿ ಶಕ್ತಿ ಉಳಿದಿರುವುದಿಲ್ಲ. ನೀವು ಸ್ಮಾರ್ಟ್‌ಫೋನ್ ಬಳಸುವವರಾದಲ್ಲಿ ಕೆಲವೊಮ್ಮೆ ಸಾಯಂಕಾಲದ ಹೊತ್ತಿಗೆ ಚಾರ್ಜ್ ಮುಗಿದಿರುತ್ತದೆ ಹಾಗೂ ಚಾರ್ಜ್ ಮಾಡಲು ನಿಮ್ಮ ಕೈಯಲ್ಲಿ ಚಾರ್ಜರ್ ಇಲ್ಲ ಅಥವಾ ಚಾರ್ಜ್ ಪಾಯಿಂಟ್ ಸಿಕ್ಕಿಲ್ಲ. ಹೀಗೂ ಆಗುವುದಿದೆ. ಇಂತಹ ಸಂದರ್ಭಗಳಿಗೆ ಬೇಕು ಹೆಚ್ಚಿಗೆ ಪವರ್.

ಚಾಯಿಕ್ಸ್ ಕಂಪೆನಿಯವರು ಇಂತಹ ಬೇಕಾದಾಗ ಬೇಕಿದ್ದಲ್ಲಿ ಪವರ್ ನೀಡಬಲ್ಲ ಸಾಧನಗಳನ್ನು ತಯಾರಿಸಿದ್ದಾರೆ. ಅವರ Cooler Master Choiix Charger C-2021-K1S0 ಮಾದರಿ ನನ್ನಲ್ಲಿದೆ. ಕೆಲವು ಸಮಯಗಳಿಂದ ಬಳಸುತ್ತಿದ್ದೇನೆ. ಬೆಲೆ ರೂ.3220 (flipkart.com).  ಕೊಟ್ಟ ಹಣಕ್ಕೆ ಮೋಸವಿಲ್ಲ. ಇದರ ಶಕ್ತಿ 5600 mAh . ನನ್ನ ಮೊಬೈಲ್ ಫೋನ್‌ನ ಬ್ಯಾಟರಿ 2500 mAh. ಸಾಮಾನ್ಯ ಫೋನ್‌ಗಳ ಬ್ಯಾಟರಿಗಳು 1500 mAh ಇರುತ್ತವೆ. ಅಂದರೆ ಇದನ್ನು ಬಳಸಿ ಸಾಮಾನ್ಯ ಫೋನನನ್ನು 3-4 ಸಲ ಚಾರ್ಜ್ ಮಾಡಬಹುದು. ಇದರ ಗಾತ್ರ 80 x 60 x 25 ಮಿಮಿ. ಕಪ್ಪು ಮತ್ತು ಬಿಳಿ ಬಣ್ಣಗಳಲ್ಲಿ ಲಭ್ಯ. ಜೊತೆ ಎರಡು ಯುಎಸ್‌ಬಿ ಕೇಬಲ್‌ಗಳಿವೆ. ಒಂದು ಇದನ್ನು ಚಾರ್ಜ್ ಮಾಡಲು ಮತ್ತು ಇನ್ನೊಂದು ಇದನ್ನು ಬಳಸಿ ಚಾರ್ಜ್ ಮಾಡಲು. ಫೋನ್ ಮಾತ್ರವಲ್ಲ, ಯುಎಸ್‌ಬಿ ಮೂಲಕ ಚಾರ್ಜ್ ಮಾಡಬಲ್ಲ ಟ್ಯಾಬ್ಲೆಟ್, ಬ್ಲೂಟೂತ್, ಇತ್ಯಾದಿ ಸಾಧನಗಳನ್ನು ಚಾರ್ಜ್ ಮಾಡಲು ಇದನ್ನು ಬಳಸಬಹುದು. ಇದನ್ನು ಪೂರ್ತಿ ಚಾರ್ಜ್ ಮಾಡಲು ಸುಮಾರು 6 ರಿಂದ 8  ಗಂಟೆ ಬೇಕು.

ಗ್ಯಾಜೆಟ್ ಸಲಹೆ

ಕಿರಣ್ ಅವರ ಪ್ರಶ್ನೆ: ನನಗೆ ಒಂದು ಲ್ಯಾಪ್‌ಟಾಪ್ ಕೊಳ್ಳಬೇಕಾಗಿದೆ. ಅದರಲ್ಲಿ i5, 500 ಗಿಗಾಬೈಟ್ ಹಾರ್ಡ್ ಡಿಸ್ಕ್, 1 ಗಿಗಾಬೈಟ್ ಗ್ರಾಫಿಕ್ಸ್, 4 ಗಿಗಾಬೈಟ್ RAM, 15.6 ಇಂಚು ಪರದೆ ಎಲ್ಲ ಇರಬೇಕು. ನನ್ನ ಬಜೆಟ್ 45 ಸಾವಿರ ರೂ. ಯಾವುದನ್ನು ಕೊಳ್ಳಬಹುದು?

ಉ: ನೀವು ಲಿನೊವೊ ಕಂಪೆನಿಯ ಐಡಿಯಾಪ್ಯಾಡ್ Z570 ಕೊಳ್ಳಬಹುದು.

-ಡಾ| ಯು. ಬಿ. ಪವನಜ

The post ಗ್ಯಾಜೆಟ್ ಲೋಕ – ೦೨೫ (ಜೂನ್ ೨೧, ೨೦೧೨) first appeared on Vishva Kannada.

ಡಿಎಸ್‌ಎಲ್‌ಆರ್ ಕ್ಯಾಮರ ಕೊಳ್ಳುವ ಮುನ್ನ ಏನೇನೆಲ್ಲ ಗಮನಿಸಬೇಕು ಎಂಬುದನ್ನ ಎರಡು ವಾರಗಳ ಹಿಂದೆ ನೋಡಿದೆವು. ಈಗ ಆ ಕ್ಯಾಮರಾಕ್ಕೆ ಲೆನ್ಸ್ ಕೊಳ್ಳುವ ಮುನ್ನ ಏನೇನೆಲ್ಲ ಗಮನಿಸಬೇಕು ಎಂದು ನೋಡೋಣ.

ಎಲ್‌ಎಲ್‌ಆರ್ ಕ್ಯಾಮರಾಗಳು ದೇಹ ಮತ್ತು ಲೆನ್ಸ್ ಪ್ರತ್ಯೇಕವಾಗಿ ದೊರೆಯುತ್ತವೆ. ಕ್ಯಾಮರಾ ಕೊಳ್ಳುವುದು ಹೇಗೆ ಎಂಬುದನ್ನು ನೋಡಿ ಆಯಿತು. ಈಗ ಲೆನ್ಸ್ ಕಡೆ ಗಮನ ಹರಿಸೋಣ.

ಭಾರತದಲ್ಲಿ ಸಾಮಾನ್ಯವಾಗಿ ಕ್ಯಾಮರ ಜೊತೆ ಒಂದು ಲೆನ್ಸ್ ಉಚಿತವಾಗಿ ನೀಡುತ್ತಿದ್ದಾರೆ. ಇದನ್ನು ಕಿಟ್ ಲೆನ್ಸ್ ಎಂದು ಕರೆಯುತ್ತಾರೆ. ಬಹುತೇಕ ಸಂದರ್ಭಗಳಲ್ಲಿ ಇದು ೧೮-೫೫ಮಿಮಿ ಝೂಮ್ ಲೆನ್ಸ್ ಆಗಿರುತ್ತದೆ. ಇತರೆ ಲೆನ್ಸ್ ಕೊಳ್ಳುವುದು ಹೇಗೆ? ಲೆನ್ಸ್‌ಗಳು ಹಲವು ನಮೂನೆಗಳಲ್ಲಿ ದೊರೆಯುತ್ತವೆ. ಬೇರೆ ಬೇರೆ ಸಂದರ್ಭಗಳಿಗೆ ಬೇರೆ ಬೇರೆ ಲೆನ್ಸ್ ಬಳಕೆಯಾಗುತ್ತದೆ. ವಿಧಾನಸೌಧದಂತಹ ಒಂದು ವಿಶಾಲವಾದ ಕಟ್ಟಡವನ್ನು ಹತ್ತಿರದಿಂದ ಇಡಿಯ ಕಟ್ಟಡ ಬರುವಂತೆ ಫೋಟೋ ತೆಗೆಯಲು ವೈಡ್ ಆಂಗಲ್ ಲೆನ್ಸ್. ದೂರದ ಮರದ ಮೇಲೆ ಕುಳಿತಿರುವ ಹಕ್ಕಿಯ ಫೋಟೋ ತೆಗೆಯಲು ಟೆಲಿಫೋಟೋ ಲೆನ್ಸ್. ಚಿಕ್ಕ ಸೊಳ್ಳೆಯ ಫೋಟೋ ತೆಗೆಯಲು ಮ್ಯಾಕ್ರೋ ಲೆನ್ಸ್. ಹೀಗೆ ಹಲವು ನಮೂನೆಯ ಲೆನ್ಸ್ ಕೊಳ್ಳಬೇಕಾಗುತ್ತದೆ. ಇವುಗಳನ್ನು ಇಟ್ಟುಕೊಳ್ಳಲು ಒಂದು ಬ್ಯಾಗ್ ಬೇಕು. ಕೆಲವು ಸಂದರ್ಭಗಳಲ್ಲಿ ಅತಿ ಕಡಿಮೆ ಷಟರ್ ವೇಗದಲ್ಲಿ ಫೋಟೋ ತೆಗೆಯಲು ಕ್ಯಾಮರಾ ಅಳ್ಳಾಡದಂತೆ ಇಡಲು ಕ್ಯಾಮರಾ ಸ್ಟ್ಯಾಂಡ್ ಬೇಕು. ಹೀಗೆ ಡಿಎಸ್‌ಎಲ್‌ಆರ್ ಎಂದರೆ ಖರ್ಚಿನ ದಾರಿ. ಕೇವಲ ಕಿಟ್ ಲೆನ್ಸ್ ಜೊತೆ ಒಂದು ಕ್ಯಾಮರಾ ಕೊಳ್ಳುತ್ತೇನೆ, ಉಳಿದವು ಯಾವುವೂ ಬೇಡ ಎನ್ನುವವರು ಒಂದು ಉತ್ತಮ ಏಮ್-ಆಂಡ್-ಶೂಟ್ ಅಥವಾ ಮೆಗಾಝೂಮ್ ಕ್ಯಾಮರ ಕೊಳ್ಳುವುದು ಒಳಿತು. ಲೆನ್ಸ್ ಕೊಳ್ಳುವಾಗ ಗಮನ ಹರಿಸಬೇಕಾದ ಕೆಲವು ಗುಣವೈಶಿಷ್ಟ್ಯಗಳನ್ನು ನೋಡೋಣ.

ನಾಭಿದೂರ (ಫೋಕಲ್ ಲೆಂತ್ – focal length)

ವೈಜ್ಞಾನಿಕವಾಗಿ ನೋಡಿದರೆ ಫೋಕಲ್ ಲೆಂತ್ ಎನ್ನುವುದು ಮಸೂರದ (ಲೆನ್ಸ್‌ನ) ಸಮತಲದಿಂದ ಅದರ ನಾಭಿಕೇಂದ್ರಕ್ಕೆ (ಫೋಕಲ್ ಪಾಯಿಂಟ್) ಇರುವ ದೂರ. ಇದು ಜಾಸ್ತಿ ಇದ್ದರೆ ವಸ್ತುವಿನ ಮೂಡಿಬರುವ ಚಿತ್ರ ದೊಡ್ಡದಾಗಿರುತ್ತದೆ. ಚಿಕ್ಕದಿದ್ದರೆ ಸಣ್ಣ ಚಿತ್ರ ಮೂಡಿಬರುತ್ತದೆ. ಅಂದರೆ ಚಿಕ್ಕ ಫೋಕಲ್ ಲೆಂತ್ ಇರುವ ಲೆನ್ಸ್ ಅನ್ನು ಬಳಸಿ ದೊಡ್ಡ ವಸ್ತುವಿನ (ಉದಾ – ದೊಡ್ಡ ಕಟ್ಟಡ, ಪಶ್ಚಿಮ ಘಟ್ಟ ಶ್ರೇಣಿ) ಫೋಟೋ ತೆಗೆಯಬಹದು. ಇದನ್ನೇ ವೈಡ್ ಆಂಗಲ್ ಲೆನ್ಸ್ ಎನ್ನುವುದು. ಸಾಮಾನ್ಯವಾಗಿ ವೈಡ್ ಆಂಗಲ್ ಲೆನ್ಸ್‌ಗಳ ಫೋಕಲ್ ಲೆಂತ್ ೧೮ ರಿಂದ ೩೫ ಮಿಮಿ ಇರುತ್ತದೆ. ದೊಡ್ಡ ಫೋಕಲ್ ಲೆಂತ್‌ನ ಲೆನ್ಸ್ ಬಳಸಿ ದೂರದಲ್ಲಿರುವ ಹಕ್ಕಿಯ ಚಿತ್ರ ತೆಗೆಯಬಹುದು. ಇದನ್ನೇ ಟೆಲಿಫೋಟೋ ಲೆನ್ಸ್ ಎನ್ನುತ್ತಾರೆ. ಇವುಗಳ ಫೋಕಲ್ ಲೆಂತ್ ೧೦೦ಮಿಮಿ ಮತ್ತು ಅಧಿಕ. ಫೋಕಲ್ ಲೆಂತ್ ಅನ್ನು ಹೆಚ್ಚು ಕಡಿಮೆ ಮಾಡಬಹುದಾದ ಲೆನ್ಸ್‌ಗಳಿಗೆ ಝೂಮ್ ಲೆನ್ಸ್ ಎನ್ನುತ್ತಾರೆ. ಈಗ ಮಾರುಕಟ್ಟೆಯಲ್ಲಿ ದೊರೆಯುವ ಬಹುಪಾಲು ಲೆನ್ಸ್‌ಗಳು ಝೂಮ್ ಲೆನ್ಸ್‌ಗಳೇ. ಝೂಮ್ ಲೆನ್ಸ್‌ಗಳು ಹಲವು ಶ್ರೇಣಿಗಳಲ್ಲಿ ದೊರೆಯುತ್ತವೆ. ಉದಾ – ೧೮-೫೫ಮಿಮಿ, ೫೫-೨೫೦ ಮಿಮಿ, ೧೮-೨೦೦ಮಿಮಿ, ೭೦-೩೦೦ಮಿಮಿ ಇತ್ಯಾದಿ.

ಧ್ಯುತಿರಂಧ್ರ (ಅಪೆರ್ಚರ್ – aperture)

ಕ್ಯಾಮರಾದ ಲೆನ್ಸ್ ಅನ್ನು ಸಾಮಾನ್ಯವಾಗಿ ಸಂಪೂರ್ಣವಾಗಿ ತೆರೆಯಲಾಗುವುದಿಲ್ಲ. ಬೆಳಕಿನ ಪ್ರಖರತೆಯನ್ನು ಅವಲಂಬಿಸಿ ಹೆಚ್ಚು ಯಾ ಕಡಿಮೆ ಮಾಡಲಾಗುತ್ತದೆ. ಇದನ್ನೇ ಅಪೆರ್ಚರ್ ಎನ್ನುತ್ತಾರೆ. ಈ ತೆರೆಯುವಿಕೆ ಅರ್ಥಾತ್  ವ್ಯಾಸವನ್ನು ಮಸೂರದ ನಾಭಿದೂರಕ್ಕೆ  ಅನುಪಾತ ಮೂಲಕ ಬರೆಯಲಾಗುತ್ತದೆ. ಉದಾ – F/2.8, F/5.6, F/18, ಇತ್ಯಾದಿ. ಮಸೂರದ ನಾಭಿದೂರ ೫೦ಮಿ.ಮೀ. ಇದೆ ಮತ್ತು ಅಪೆರ್ಚರ್ ಸಂಖ್ಯೆ f/5.6 ಎಂದಾದಲ್ಲಿ ಮಸೂರದ ತೆರೆಯುವಿಕೆಯ ವ್ಯಾಸ ಸುಮಾರು ೯ಮಿಮೀ ಎಂದು ಲೆಕ್ಕ ಹಾಕಬಹುದು. ಜಾಸ್ತಿ ಬೆಳಕಿದ್ದಲ್ಲಿ ಕಡಿಮೆ ಅಪೆರ್ಚರ್ ಬಳಸಬೇಕಾಗುತ್ತದೆ. ಲೆನ್ಸ್‌ನ F ಸಂಖ್ಯೆ ಚಿಕ್ಕದಿದ್ದಷ್ಟು ಹೆಚ್ಚು ಬೆಳಕನ್ನು ಗ್ರಹಿಸುವ ಶಕ್ತಿ ಇದೆ ಎಂದು ತಿಳಿಯಬೇಕು. ಉದಾಹರಣೆಗೆ F/1.8 ಲೆನ್ಸ್ F/5.6 ಲೆನ್ಸ್‌ಗಿಂತ ಒಳ್ಳೆಯದು. ಝೂಮ್ ಲೆನ್ಸ್‌ಗಳಲ್ಲಿ ಇದನ್ನು ಒಂದು ಶ್ರೇಣಿಯಾಗಿ ಸೂಚಿಸಲಾಗುತ್ತದೆ. ಅಂತೆಯೇ 1:4 – 1:5.6 ಎಂದು ಬರೆದಿರುವ ಲೆನ್ಸ್ 1:5.6 – 1:8 ಎಂದು ಬರೆದಿರುವ ಲೆನ್ಸ್‌ಗಿಂತ ಒಳ್ಳೆಯದು. ಲೆನ್ಸ್‌ನ ಅತಿ ಹೆಚ್ಚಿನ ಮತ್ತು ಅತಿ ಕಡಿಮೆಯ ಅಪೆರ್ಚರ್ ಎಷ್ಟಿದೆ ಎಂಬುದನ್ನು ಗಮನಿಸಬೇಕು. ಈ ವ್ಯಾಪ್ತಿ ದೊಡ್ಡದಿದ್ದಷ್ಟೂ ಒಳ್ಳೆಯದೆ. ಉದಾಹರಣೆಗೆ ೫೦ಮಿಮಿ ಪ್ರೈಮ್ ಲೆನ್ಸ್‌ನ ಅತಿ ಹೆಚ್ಚಿನ ಅಪೆರ್ಚ್‌ರ್ F/1.8 ಮತ್ತು ಅತಿ ಕಡಿಮೆಯ ಅಪೆರ್ಚರ್ F/32 ಇರುತ್ತದೆ. ಇದು ಉತ್ತಮ ಲೆನ್ಸ್. ಆದರೆ ಇಷ್ಟು ದೊಡ್ಡ ವ್ಯಾಪ್ತಿ ಝೂಮ್ ಲೆನ್ಸ್‌ಗಳಲ್ಲಿ ಇರುವ ಸಾಧ್ಯತೆಯಿಲ್ಲ.

ಚಿತ್ರ ಸ್ಥಿರೀಕರಣ

ಇಮೇಜ್ ಸ್ಟೆಬಿಲೈಸೇಶನ್ ಎಂಬ ಸವಲತ್ತೂ ಕೆಲವು ಲೆನ್ಸ್‌ಗಳಲ್ಲಿ  ಅಳವಡಿಸಲ್ಪಟ್ಟಿರುತ್ತದೆ. ಇದು ಇದ್ದಲ್ಲಿ ಫೋಟೋ ತೆಗೆಯುವಾಗ ಕೈ ಅಲ್ಪಸ್ವಲ್ಪ ಅಳ್ಳಾಡಿದರೂ ಚಿತ್ರ ಸ್ಪಷ್ಟವಾಗಿಯೇ ಮೂಡಿಬರುತ್ತದೆ. ಆದುದರಿಂದ ಈ ಸವಲತ್ತು ಇದ್ದರೆ ಒಳ್ಳೆಯದು. ಕ್ಯಾನನ್ ಕಂಪೆನಿ ಇದಕ್ಕೆ IS (Image Stabilisation) ಎಂದೂ ನಿಕಾನ್ ಇದಕ್ಕೆ VR (Vibration Resistent)  ಎಂದೂ ಹೆಸರಿಟ್ಟಿದೆ. ಅಂತೆಯೇ ಕ್ಯಾನನ್ 55-250mm IS ಝೂಮ್ ಲೆನ್ಸ್ ಮಾಮೂಲಿ 55-250mm ಝೂಮ್ ಲೆನ್ಸ್‌ಗಿಂತ ದುಬಾರಿ.

ಗ್ಯಾಜೆಟ್ ಸಲಹೆ

ಅನಿಲ್ ಅವರ ಪ್ರಶ್ನೆ: ಮೋಡೆಮ್ ಎಂದರೆ ಏನು ಎಂದು ಸ್ವಲ್ಪ ಚಿಕ್ಕದಾಗಿ ಕನ್ನಡದಲ್ಲಿ ವಿವರಿಸುತ್ತೀರಾ?

ಉ: ಮೋಡೆಮ್ (Modem) ಎಂಬುದು modulation ಮತ್ತು demodulation ಎಂಬುದನ್ನು ಸೂಚಿಸುತ್ತದೆ. ಇದು ದೂರವಾಣಿ ತಂತಿಗಳ ಮೂಲಕ ಅಂತರಜಾಲ ಸಂಪರ್ಕ ನೀಡುತ್ತಿದ್ದ ಕಾಲದಲ್ಲಿ ಬಳಕೆಗೆ ಬಂತು. ದೂರವಾಣಿ ತಂತಿಗಳಲ್ಲಿ ಅಂತರಜಾಲದ ಸಂಪರ್ಕವನ್ನು ಬದಲಾವಣೆ ಮಾಡಿ ಕಳುಹಿಸಲಾಗುತ್ತಿತ್ತು. ಮೋಡೆಮ್ ಅದನ್ನು ಪುನಃ ಬದಲಾಯಿಸಿ ಗಣಕಕ್ಕೆ ಕಳುಹಿಸುತ್ತಿತ್ತು. ಈಗ ಗಣಕವನ್ನು ಅಂತರಜಾಲಕ್ಕೆ ಸಂಪರ್ಕಿಸುವ ೩ಜಿ ಸಿಮ್ ಕಾರ್ಡ್ ಬಳಸುವ ಸಾಧನಗಳಿಗೂ ಈ ಹೆಸರು ಬಳಕೆಯಾಗುತ್ತಿದೆ.

ಒಂದೇ ದೂರದಿಂದ ಒಂದೇ ವಸ್ತುವನ್ನು ವಿವಿಧ ಫೋಕಲ್ ಲೆಂತ್‌ಗಳಲ್ಲಿ ಫೊಟೋ ತೆಗೆದಾಗ ಚಿತ್ರ ಯಾವ ರೀತಿ ಮೂಡಿ ಬರುತ್ತದೆ ಎಂಬುದಕ್ಕೆ ಉದಾಹರಣೆಗಳು-

The post ಗ್ಯಾಜೆಟ್ ಲೋಕ – ೦೨೪ (ಜೂನ್ ೧೪, ೨೦೧೨) first appeared on Vishva Kannada.

ಬೆಂಗಳೂರಿನಿಂದ ಕೇವಲ ೫ ಕಿ.ಮೀ. ಹೊರಗಡೆ ಹೋದರೆ ಸಾಕು ಮೊಬೈಲ್, ಅಂತರಜಾಲ, ೩ಜಿ, ಎಲ್ಲ ಸಿಗ್ನಲ್‌ಗಳೂ ಅಂಬೆಗಾಲಿಡುತ್ತವೆ. ಇಂತಹ ಸಂದರ್ಭಗಳಲ್ಲಿ ೩ಜಿ ಡಾಟಾಕಾರ್ಡ್ ಜೊತೆ ಗುದ್ದಾಡಿ ಅದಕ್ಕೊಂದು ಸಿಗ್ನಲ್ ಬೂಸ್ಟರ್ ಅನ್ನು ಮನೆಯಲ್ಲೆ ತಯಾರಿಸಿ ಬಳಸಿದರೆ ಹೇಗೆ?

ಅಂತರಜಾಲಕ್ಕೆ ಮಾಹಿತಿಹೆದ್ದಾರಿ (information superhighway) ಎಂಬ ಹೆಸರಿದೆ. ಈ ಹೆಸರು ಬೆಂಗಳೂರಿನಂತಹ ಮಾಹಾನಗರಕ್ಕೆ ಮಾತ್ರ ಅನ್ವಯ. ಬೆಂಗಳೂರಿನಿಂದ ಹೊರಗೆ ಕಾಲಿಟ್ಟೊಡನೆ ಅದು ಮಾಹಿತಿಯ ಕಾಲುದಾರಿ ಆಗುತ್ತದೆ. ಬೆಂಗಳೂರಿನ ಹೊರವರ್ತುಲ ರಸ್ತೆಯಿಂದ ಕೇವಲ ಒಂದೂವರೆ ಕಿ.ಮೀ. ದೂರದಲ್ಲಿರುವ ಶ್ರೀಗಂಧದ ಕಾವಲು ಎನ್ನುವ ಬಡಾವಣೆಗೆ ಮೂರು ವಾರಗಳ ಹಿಂದೆ ಮನೆ ಬದಲಾಯಿಸಿದೆ. ಇಲ್ಲಿ ಬಿಎಸ್‌ಎನ್‌ಎಲ್‌ನವರ ಸ್ಥಿರವಾಣಿ ಸಂಪರ್ಕ ಇಲ್ಲ. ಮೊಬೈಲ್ ಸಿಗ್ನಲ್ ಬೇಕಿದ್ದರೆ ಮನೆಯಿಂದ ಹೊರಗೆ ಹೋಗಬೇಕು. ೩ಜಿ ಡಾಟಾಕಾರ್ಡ್‌ಗೂ ಅದೇ ಗತಿ. ಮನೆಯೊಳಗೆ ಅದು ಕೇವಲ ೧ಜಿ ಅರ್ಥಾತ್ ಜಿಪಿಆರ್‌ಎಸ್ ವೇಗದಲ್ಲಿ ಕೆಲಸ (?) ಮಾಡುತ್ತದೆ. ಈ ವೇಗದಲ್ಲಿ ಸರಿಯಾಗಿ ಇಮೈಲ್ ಕೂಡ ಬರುವುದಿಲ್ಲ. ಬಿಎಸ್‌ಎನ್‌ಎಲ್ ಕಚೇರಿಗೆ ಹೋಗಿ ಇಂಜಿನಿಯರ್ ಅವರನ್ನು ಕಂಡು ಬಂದೆ. ನಿಮ್ಮ ಊರಿಗೆ ಸಂಪರ್ಕ ನಿಡಲು ಕೇಬಲ್ ಇಲ್ಲ. ಮೇಲಿನವರು ಕೇಬಲ್ ನೀಡಿದರೆ ಸಂಪರ್ಕ ನೀಡುತ್ತೇವೆ ಎಂಬ ವಾಗ್ದಾನ ಮಾತ್ರ ನೀಡಿ ಕಳುಹಿಸಿದರು (ದಾನಗಳಲ್ಲಿ ಅತಿ ಸುಲಭ ದಾನ -ವಾಗ್ದಾನ!). ಈಗ ಸದ್ಯಕ್ಕಂತೂ ಸ್ಥಿರವಾಣಿ ಇಲ್ಲ, ಆದುದರಿಂದ ಬ್ರಾಡ್‌ಬ್ಯಾಂಡೂ ಇಲ್ಲ. ಬಿಎಸ್‌ಎನ್‌ಎಲ್‌ನವರ ೩ಜಿ ಡಾಟಾಕಾರ್ಡ್ ಮೂಲಕ ಅಂತರಜಾಲ ಸಂಪರ್ಕ ಮಾಡೋಣವೆಂದರೆ ಅದು ಮನೆಯೊಳಗೆ ಕೇವಲ ೧ಜಿ, ಕಿಟಿಕಿಯಲ್ಲಿ ಇಟ್ಟಾಗ ಮಾತ್ರ ೩ಜಿ. ಬಿಎಸ್‌ಎನ್‌ಎಲ್‌ನ ಮೇಲಧಿಕಾರಿಗಳು ಬಹುಶಃ ಬಿಎಸ್‌ಎನ್‌ಎಲ್‌ನ ಹೆಸರು ಕೆಡಿಸಿ ಕೊನೆಗೆ ವಿಎಸ್‌ಎನ್‌ಎಲ್ ಅನ್ನು ಟಾಟಾದವರಿಗೆ ಮಾರಿದಂತೆ ಇದನ್ನೂ ಖಾಸಗಿಯವರಿಗೆ ಮಾರಿ ಕೈತೊಳೆದುಕೊಳ್ಳಲು ಕಿತಾಪತಿ ನಡೆಸುತ್ತಿರುವಂತೆ ನನಗೇನೋ ಅನುಮಾನ ಬರುತ್ತಿದೆ.

ರಿಲಯನ್ಸ್ ನೆಟ್‌ಕನೆಕ್ಟ್ ಮತ್ತು ಟಾಟಾ ಫೋಟೋನ್ ಮ್ಯಾಕ್ಸ್‌ಗಳನ್ನು ಕೂಡ ಬಳಸಿ ನೋಡಿದೆ. ಅವೆರಡರಲ್ಲಿ ಟಾಟಾ ಫೋಟೋನ್ ಮ್ಯಾಕ್ಸ್ ಮಾತ್ರ ಮನೆಯ ಯಾವ ಮೂಲೆಗೆ ಹೋದರೂ ಒಂದೇ ವೇಗವನ್ನು ನೀಡಿತು. ಟಾಟಾ ಫೋಟೋನ್ ಮ್ಯಾಕ್ಸ್ ಬಗ್ಗೆ ಎರಡು ವಾರ ಹಿಂದೆ ಗ್ಯಾಜೆಟ್ ಲೋಕ ಅಂಕಣದಲ್ಲಿ ಬರೆಯಲಾಗಿತ್ತು.

ಅಂತರಜಾಲ ಸಂಪರ್ಕ ಇಲ್ಲದಿದ್ದರೆ ನನ್ನಂತಹ ಜಾಲಿಗ ಬದುಕುವುದು ಹೇಗೆ? ನಾಗೇಶ ಹೆಗಡೆಯವರು ಒಂದು ಕಡೆ ಬರೆದುಕೊಂಡಂತೆ ಅಂತರಜಾಲ ಬಟ್ಟು ಜೀವಜಾಲದ ಕಡೆ ಗಮನ ಹರಿಸಲೇ? ಆದರೆ ನನಗೂ ಜೀವಶಾಸ್ತ್ರಕ್ಕೂ ಮೊದಲಿನಿಂದಲೇ ಎಣ್ಣೆ-ಸೀಗೆ ಸಂಬಂಧ. ಈ ಮಾಹಿತಿಯ ಕಾಲುದಾರಿಯನ್ನೇ ಹೆದ್ದಾರಿಯನ್ನಾಗಿ ಪರಿವರ್ತಿಸಿದರೆ ಹೇಗೆ? ಅದು ಸಾಧ್ಯವೇ? ಒಂದಾನೊಂದು ಕಾಲದಲ್ಲಿ ನಾನು ವೃತ್ತಿನಿರತ ವಿಜ್ಞಾನಿಯಾಗಿದ್ದೆ. ಈಗಲೂ ಪ್ರವೃತ್ತಿಯಿಂದ ವಿಜ್ಞಾನಿಯೇ. ನನ್ನೊಳಗೆ ಕುಳಿತಿದ್ದ ಭೌತಶಾಸ್ತ್ರ, ಇಂಜಿನಿಯಿರಿಂಗ್, ಆಂಟೆನಾಶಾಸ್ತ್ರಗಳೆಲ್ಲ ಹೊರಗೆ ಬಂದವು. ಸಿಗ್ನಲಿಗೆ ಒಂದು ಸಿಗ್ನಲ್ ಬೂಸ್ಟರ್ ಅಂದರೆ ಸಿಗ್ನಲನ್ನು ಹೆಚ್ಚು ಮಾಡುವಂತಹದು ತಯಾರಿಸಿದರೆ ಹೇಗೆ ಎಂದು ಆಲೋಚನೆ ಮಾಡಿದೆ. ಮನೆಯಲ್ಲಿ ಹುಡುಕಿದಾಗ ಹಳೆಯ ಡಬ್ಬ ಒಂದು ದೊರೆಯಿತು. ಅದನ್ನೇ ಕತ್ತರಿಸಿ ಪ್ರತಿಫಲನಾತ್ಮಕ ಸಿಗ್ನಲ್ ಬೂಸ್ಟರ್ ಮಾಡಿದೆ. ವಿವರಗಳು ಮಂದಿನ ಪ್ಯಾರಾಗಳಲ್ಲಿ.

ಸಿಗ್ನಲ್ ಬೂಸ್ಟರ್ ಮಾಡುವ ವಿಧಾನ

ಒಂದು ಹಳೆಯ ಡಬ್ಬ ತೆಗೆದುಕೊಳ್ಳಿ. ಅದು ಸಿಲಿಂಡರಿನಾಕೃತಿಯಲ್ಲಿರಬೇಕು ಹಾಗೂ ಅದು ಲೋಹದಿಂದ ಮಾಡಿರಬೇಕು. ಅಮುಲ್ ಅಥವಾ ಬೋರ್ನ್‌ವಿಟಾ ಡಬ್ಬ ಈ ಕೆಲಸಕ್ಕೆ ಹೇಳಿ ಮಾಡಿಸಿದಂತಿದೆ. ಅದರ ಮುಚ್ಚಳ ನಮ್ಮ ಕೆಲಸಕ್ಕೆ ನಿರುಪಯುಕ್ತ. ಉಳಿದ ಡಬ್ಬವನ್ನು ಉದ್ದಕ್ಕೆ ಕತ್ತರಿಸಿ. ಡಬ್ಬ ಕತ್ತರಿಸಲೆಂದೇ ಮಾರುಕಟ್ಟೆಯಲ್ಲಿ ವಿಶೇಷ ಕತ್ತರಿ ಸಿಗುತ್ತದೆ. ಅದನ್ನು ಬಳಸಿದರೆ ಕೆಲಸ ಸುಗಮ. ಚಿಕ್ಕ ಗರಗಸವನ್ನು ಕೂಡ ಬಳಸಬಹುದು. ಕತ್ತರಿಸಿದ ನಂತರ ನಿಮಗೆ ಅರ್ಧ ಸಿಲಿಂಡರಾಕೃತಿಯ ಡಬ್ಬ ದೊರೆಯುತ್ತದೆ. ಅದರ ತಳವನ್ನೂ ಅರಿಯಾಗಿ ಅರ್ಧಕ್ಕೆ ಕತ್ತರಿಸಬೇಕು. ಈಗ ಅದರ ತಳದ ಮಧ್ಯಭಾಗದಲ್ಲಿ ಸುಮಾರು ಒಂದು ಸೆ.ಮೀ. ಉದ್ದ ಮತ್ತು ಸುಮಾರು ಅರ್ಧ ಸೆ.ಮೀ. ಅಗಲಕ್ಕೆ ಕತ್ತರಿಸಬೇಕು. ಇದು ಮುಂದಕ್ಕೆ ಉಪಯೋಗಕ್ಕೆ ಬರುತ್ತದೆ.

೩ಜಿ ಡಾಟಾಕಾರ್ಡ್ ಜೊತೆ ಯುಎಸ್‌ಬಿ ಕೇಬಲ್ ಒಂದು ದೊರೆಯುತ್ತದೆ. ಅದು ಈಗ ಕೆಲಸಕ್ಕೆ ಬರುತ್ತದೆ. ಅದನ್ನು ಬಳಸಿ ಡಾಟಾಕಾರ್ಡ್ ಅನ್ನು ಗಣಕಕ್ಕೆ ಸಂಪರ್ಕಿಸಿ. ಈಗ ನೀವು ತಯಾರಿಸಿದ ಅರ್ಧಡಬ್ಬವನ್ನು ತಲೆಕೆಳಗಾಗಿ ನೇತು ಹಾಕಬೇಕು. ಅದರ ಮಧ್ಯಭಾಗದಲ್ಲಿ ಮಾಡಿದ ಚಿಕ್ಕ (ಒಂದು ಸೆ.ಮೀ ಉದ್ದ ಅರ್ಧ ಸೆ.ಮೀ. ಅಗಲ) ಸೀಳು ಈಗ ಕೆಲಸಕ್ಕೆ ಬರುತ್ತದೆ. ಡಾಟಾಕಾರ್ಡನ್ನು ಸರಿಯಾಗಿ ಅದರಲ್ಲಿ ಕೂರಿಸಿ. ಈಗ ನಿಮ್ಮ ಸಿಗ್ನಲ್ ಬೂಸ್ಟರ್ ತಯಾರು ಎಂದು ತಿಳಿದುಕೊಳ್ಳಬಹುದು (ಚಿತ್ರಗಳನ್ನು ನೋಡಿ).

ಇದು ನಿಜವಾಗಿಯೂ ಕೆಲಸ ಮಾಡುತ್ತದೆಯೇ ಎಂದು ವೈಜ್ಞಾನಿಕವಾಗಿ ಪರೀಕ್ಷೆ ಮಾಡಬೇಕಲ್ಲ? ಅದಕ್ಕಂದೇ ಹಲವು ತಂತ್ರಾಂಶಗಳೂ ಜಾಲತಾಣಗಳೂ ಲಭ್ಯವಿವೆ. ಅಂತಹ ಒಂದು ಜಾಲತಾಣ www.broadbandspeedchecker.co.uk. ಈ ಜಾಲತಾಣವನ್ನು ಬಳಸಿ ಪರೀಕ್ಷಿಸಿದೆ. ಸಿಗ್ನಲ್ ಬೂಸ್ಟರ್ ಬಳಸದೆ ಮೊದಲ ಪರೀಕ್ಷೆ. ಡೌನ್‌ಲೋಡ್ ವೇಗ ೧.೩ ಎಂಬಿಪಿಎಸ್ ಬಂತು. ಸಿಗ್ನಲ್ ಬೂಸ್ಟರ್ ಬಳಸಿ ಇನ್ನೊಮ್ಮೆ ಪರೀಕ್ಷೆ ಮಾಡಿದೆ.  ಆಗ ವೇಗ ೩.೫ ಎಂಬಿಪಿಎಸ್ ಬಂತು. ಅಂದರೆ  ಸಿಗ್ನಲ್ ಬೂಸ್ಟರ್ ಬಳಸಿದರೆ ಸುಮಾರು ಮೂರು ಪಟ್ಟು ಹೆಚ್ಚು ವೇಗದಲ್ಲಿ ಡೌನ್‌ಲೋಡ್ ಮಾಡಬಹುದು. ಇಲ್ಲಿ ಏನಾಗುತ್ತಿದೆಯಂದರೆ ಅರ್ಧ ಸಿಲಿಂಡರಿನಾಕೃತಿಯ ಲೋಹದ ಡಬ್ಬವು ತನ್ನ ಮೈಮೇಲೆ ಬಿದ್ದ ಕಿರಣಗಳನ್ನು ತನ್ನ ಕೇಂದ್ರ ಭಾಗಕ್ಕೆ ಪ್ರತಿಫಲಿಸಿ ಅಲ್ಲಿ ಕೇಂದ್ರೀಕರಣಗೊಳ್ಳುವಂತೆ ಮಾಡುತ್ತದೆ. ಈ ಎಲ್ಲ ಪರೀಕ್ಷೆಗಳನ್ನು ಡಾಟಾಕಾರ್ಡನ್ನು ಕಿಟಿಕಿಗೆ ನೇತುಹಾಕಿ ಮಾಡಲಾಗಿತ್ತು.

ಡಬ್ಬದಿಂದ ಬಾಣಲೆಗೆ

ಏನಿದು ಡಬ್ಬದಿಂದ ಬಾಣಲೆಗೆ? ಹಳೆಯ ಗಾದೆ ಬೆಂಕಿಯಿಂದ ಬಾಣಲೆಗೆ ಇಲ್ಲೇಕೆ ಬಂತು ಅಂದುಕೊಳ್ಳುತ್ತಿದ್ದೀರಾ? ಆ ಗಾದೆಗೂ ನಾನು ಈಗ ಬರೆಯಹೊರಟಿರುವುದಕ್ಕೂ ಏನೇನೂ ಸಂಬಂಧವಿಲ್ಲ. ಬಾಣಲೆಯ ಆಕಾರ ನೆನಪು ಮಾಡಿಕೊಳ್ಳಿ. ಅದು ಅರ್ಧಗೋಲಾಕಾರ, ಆರ್ಧ ಪ್ಯಾರಾಬೋಲ ಅಥವಾ ಅರ್ಧ ಹೈಪರ್‌ಬೋಲ. ಇವುಗಳೆಲ್ಲದರ ಗುಣ ಬಹುಮಟ್ಟಿಗೆ ಒಂದೆ. ಇವು ತಮ್ಮ ಮೇಲೆ ಬಿದ್ದ ಕಿರಣಗಳನ್ನು ತಮ್ಮ ಕೇಂದ್ರ ಬಿಂದುವಿನಲ್ಲಿ ಕೇಂದ್ರೀಕರಿಸುತ್ತವೆ. ಹಾಗಿದ್ದರೆ ಇದನ್ನು ಅಂತರಜಾಲ ಸಿಗ್ನಲ್ ಕೇಂದ್ರೀಕರಿಸಲೂ ಬಳಸಬಹುದಲ್ಲ ಎಂದು ಚಿಂತಿಸಿದೆ. ನೋಡಿಯೋ ಬಿಡೋಣ ಎಂದುಕೊಂಡು ಒಂದು ಅಲ್ಯೂಮಿನಿಯಂ ಬಾಣಲೆಯ ಮಧ್ಯದಲ್ಲಿ ಬಿಎಸ್‌ಎನ್‌ಎಲ್‌ನವರ ೩ಜಿ ಡಾಟಾಕಾರ್ಡ್ ಇಟ್ಟು ವೇಗದ ಪರೀಕ್ಷೆ ಮಾಡಿದೆ. ಬಾಣಲೆ ಇಲ್ಲದಿದ್ದಾಗ (ಮನೆಯೊಳಗೆ) ೦.೩೭೫ ಎಂಬಿಪಿಎಸ್ ವೇಗ ಬಂತು. ಬಾಣಲೆಯೊಳಗೆ ಇಟ್ಟಾಗ ೦.೭೨೭ ಎಂಬಿಪಿಎಸ್ ವೇಗ ಬಂತು. ಅರ್ಥಾತ್ ಬಾಣಲೆಯೊಳಗೆ ಇಟ್ಟಾಗ ವೇಗ ದುಪ್ಪಟ್ಟು ಆಯಿತು.

ಗ್ಯಾಜೆಟ್ ಸಲಹೆ

ಕೆ.ಜೆ. ಕುಮಾರ್ ಅವರ ಪ್ರಶ್ನೆ: ನಾನು ಡೆಲ್ ಸ್ಟ್ರೀಕ್ ಫೋನ್ ತೆಗೆದುಕೊಂಡಿದ್ದೇನೆ. ಇದರಲ್ಲಿ ಶ್ರೀಲಿಪಿಯವರ ಕನ್ನಡ  ತಂತ್ರಾಂಶವನ್ನು  ಬಳಸುವುದು ಹೇಗೆ?

ಉ: ನೀವು ಹೇಳುವ ತಂತ್ರಾಂಶ ಗಣಕದಲ್ಲಿ ಬಳಸುವಂತದ್ದು. ಅದನ್ನು ಫೋನಿನಲ್ಲಿ ಬಳಸಲು ಸಾಧ್ಯವಿಲ್ಲ. ಇದೇ ಮಾತು ಬರಹ ಮತ್ತು ನುಡಿ ತಂತ್ರಾಂಶಗಳಿಗೂ ಅನ್ವಯಿಸುತ್ತದೆ.

-ಡಾ| ಯು. ಬಿ. ಪವನಜ

— *** —

The post ಗ್ಯಾಜೆಟ್ ಲೋಕ – ೦೨೩ (ಜೂನ್ ೦೭, ೨೦೧೨) first appeared on Vishva Kannada.