ನಾನು ಹೇಳಲು ಹೊರಟಿರುವುದು ಕೃತಕ ಬುದ್ಧಿಮತ್ತೆಯ ಮೂಲಕ ಕೆಲವು ಕಾನೂನುಗಳ ಅನುವಾದ ಅಲ್ಲ. ಇದು ರೋಬೋಟ್ ಲಾಯರ್ ಕಥೆ. ಹಾಗೆಂದು ಹೇಳಿ ಸಿನಿಮಾಗಳಲ್ಲಿ ತೋರಿಸುವಂತೆ ಯಂತ್ರಮಾನವನೊಂದು ನ್ಯಾಯಾಲಯದಲ್ಲಿ ವಾದ ಮಾಡುವ ದೃಶ್ಯವನ್ನು ಊಹಿಸಿಕೊಳ್ಳಬೇಕಾಗಿಲ್ಲ. ಬದಲಿಗೆ ಕಾನೂನು ಕಲಿತು ಸಂದರ್ಭಕ್ಕೆ ಸರಿಯಾಗಿ ಸೂಕ್ತ ಕಾನೂನಿನ ಉಲ್ಲೇಖ ಮಾಡಿ ನ್ಯಾಯಾಲಯದಲ್ಲಿ ಕಕ್ಷಿದಾರನ ಪರವಾಗಿ ವಾದ ಮಂಡಿಸುವ ಕೃತಕ ಬುದ್ಧಿಮತ್ತೆಯ ಇಂಜಿನ್ ತಂತ್ರಾಂಶ ಎನ್ನಬಹುದು.

ಕೃತಕ ಬುದ್ಧಿಮತ್ತೆ (artificial intelligence) ಎನ್ನುವುದು ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಇತ್ತೀಚೆಗೆ ತುಂಬ ಸುದ್ದಿ ಮಾಡುತ್ತಿರುವ ವಿಷಯ. ಇದರಲ್ಲಿ ಯಂತ್ರಗಳು ತಾವೇ ವಿಷಯಗಳನ್ನು ಅರ್ಥಮಾಡಿಕೊಂಡು, ಅವುಗಳಿಗೆ ಸ್ಪಂದಿಸಿ, ತಾವೇ ತೀರ್ಮಾನ ತೆಗೆದುಕೊಂಡು ಕೆಲಸ ಮಾಡುತ್ತವೆ. ಕೆಲವು ಪ್ರಮುಖ ಉದಾಹರಣೆಗೆಳು – ಯಂತ್ರಾನುವಾದ, ಪಠ್ಯದಿಂದ ಧ್ವನಿಗೆ ಹಾಗೂ ಧ್ವನಿಯಿಂದ ಪಠ್ಯಕ್ಕೆ ಪರಿವರ್ತನೆ, ಚಿತ್ರದಿಂದ ಪಠ್ಯಕ್ಕೆ, ಇತ್ಯಾದಿ. ಈ ಬಗ್ಗೆ ಹಿಂದೊಮ್ಮೆ ಹೀಗೆಂದು ಇದೇ ಅಂಕಣದಲ್ಲಿ ಬರೆಯಲಾಗಿತ್ತು.

ಹಲವು ಕ್ಷೇತ್ರಗಳಂತೆ ಕಾನೂನು ಮತ್ತು ನ್ಯಾಯಾಲಯಗಳಿಗೂ ಕೃತಕ ಬುದ್ಧಿಮತ್ತೆ ಪ್ರವೇಶ ಮಾಡುತ್ತಿದೆ. ಅಮೆರಿಕದಲ್ಲಿ ಕೃತಕಬುದ್ಧಿಮತ್ತೆಯ ನ್ಯಾಯವಾದಿ ತಯಾರಾಗಿದೆ. ಇದನ್ನು ವ್ಯಾಪಕವಾಗಿ ರೋಬೋಟ್ ಲಾಯರ್ ಎಂದು ಕರೆಯಲಾಗುತ್ತಿದೆ. ಅಮೆರಿಕದಲ್ಲಿ 2015ರಲ್ಲಿ ಜೋಶುವ ಬ್ರೌಡರ್ ಎಂಬವರು ಡುನಾಟ್‌ಪೇ ಎಂಬ ಕಾನೂನು ಸಲಹೆಗಾರ ತಂತ್ರಾಂಶವನ್ನು ಬಿಡುಗಡೆ ಮಾಡಿದರು. ಅದು ಕೂಡ ಚಾಟ್‌ಜಿಪಿಟಿಯಂತೆ ಒಂದು ಚಾಟ್‌ಬೋಟ್ ಆಗಿತ್ತು. ಜೋಶುವ ಅದನ್ನು ಪ್ರಪಂಚದ ಮೊದಲ ರೋಬೋಟ್ ಲಾಯರ್ ಎಂದು ಕರೆದರು. ಅದಕ್ಕೆ ಕಾನೂನು ಸಂಬಂಧಿ ಪ್ರಶ್ನೆ ಕೇಳಿದರೆ ಅದು ಉತ್ತರಿಸುತ್ತಿತ್ತು. ಪ್ರಾರಂಭದಲ್ಲಿ ಕೆಲವು ಸರಳವಾದ ಸಂದರ್ಭಗಳಲ್ಲಿ ಏನೆಲ್ಲ ಸಾಧ್ಯತೆಗಳಿವೆ ಎಂಬುದನ್ನು ಅದು ವಿವರಿಸುತ್ತಿತ್ತು. ಉದಾಹರಣೆಗೆ ಹಣ ನೀಡಬೇಕಾಗಿತ್ತು, ಅವಧಿಯೊಳಗಡೆ ನೀಡಿಲ್ಲ, ಈಗ ನೋಟೀಸು ಬಂದಿದೆ – ಈ ಸಂದರ್ಭದಲ್ಲಿ ಏನೆಲ್ಲ ಮಾಡಬಹುದು ಎಂಬುದನ್ನು ಅದು ಹೇಳುತ್ತದೆ. ಈ ಕಿರುತಂತ್ರಾಂಶ (ಆಪ್) ಗೂಗ್ಲ್ ಪ್ಲೇ ಸ್ಟೋರಿನಲ್ಲಿದೆ. ನಾನು ಅದನ್ನು ನನ್ನ ಮೊಬೈಲಿನಲ್ಲಿ ಹಾಕಿಕೊಂಡು ಬಳಸಿ ನೋಡಲು ಪ್ರಯತ್ನಿಸಿದೆ. ಆದರೆ ಅದು ಅಮೆರಿಕ, ಆಸ್ಟ್ರೇಲಿಯ ಮತ್ತು ಕೆಲವು ಯುರೋಪಿನ ದೇಶಗಳಿಗೆ ಸೀಮಿತವಾಗಿತ್ತು. ಭಾರತ ಅದರ ಪಟ್ಟಿಯಲ್ಲಿರಲಿಲ್ಲ. ಆದುದರಿಂದ ಅದು ನಿಜವಾಗಿಯೂ ಹೇಗೆ ಕೆಲಸ ಮಾಡುತ್ತಿದೆ ಎಂದು ಪರಿಶೀಲಿಸಲು ನನಗೆ ಆಗಲಿಲ್ಲ.

ಈ ಡುನಾಟ್‌ಪೇ ಚಾಟ್‌ಬೋಟ್ ಅಥವಾ ರೋಬೋಟ್ ಲಾಯರ್ ಅನ್ನು ನಿಜವಾದ ನ್ಯಾಯಾಲಯದಲ್ಲಿ ಕಾನೂನು ಹೋರಾಟವೊಂದರಲ್ಲಿ ಬಳಸಲು ಸಿದ್ಧತೆ ಆಗಿತ್ತು. ಅತಿ ವೇಗವಾಗಿ ವಾಹನ ಚಾಲನೆ ಮಾಡಿದ್ದೀಯ ಎಂದೊಬ್ಬರಿಗೆ ಸಾರಿಗೆ ಪೋಲೀಸರಿಂದ ನೋಟೀಸು ಬಂದಿತ್ತು. ಅವರು ನ್ಯಾಯಾಲಯದಲ್ಲಿ ಹಾಜರಾಗಿ ತಮ್ಮ ವಾದವನ್ನು ಮಂಡಿಸಬೇಕಿತ್ತು. ಇಲ್ಲಿ ವಾದ ಮಂಡಿಸಲು ರೋಬೋಟ್ ಲಾಯರ್ ಸಹಾಯ ಪಡೆಯುವುದೆಂದು ತೀರ್ಮಾನ ಆಗಿತ್ತು. ಆ ಕೇಸು ಕೋರ್ಟಿನಲ್ಲಿ ಫೆಬ್ರವರಿ 22ಕ್ಕೆ ನ್ಯಾಯಾಧೀಶರ ಮುಂದೆ ಬರುವುದಿತ್ತು. ಆದರೆ ಜೋಶುವ ಅವರು ಒಂದು ಟ್ವೀಟ್ ಮೂಲಕ ರೋಬೋಟ್ ಲಾಯರ್ ಅನ್ನು ಕೋರ್ಟಿಗೆ ಕಳುಹಿಸುವ ತಮ್ಮ ನಿರ್ಧಾರದಿಂದ ಹಿಂದೆ ಸರಿದಿದ್ದೇನೆ ಎಂದು ತಿಳಿಸಿದ್ದಾರೆ. ಇದಕ್ಕೆ ಪ್ರಮುಖ ಕಾರಣ ಲಾಯರುಗಳ ಸಂಘದ ಪ್ರತಿಭಟನೆ ಹಾಗೂ ಎಚ್ಚರಿಕೆ. ರೋಬಾಟ್ ಲಾಯರ್ ತಂದರೆ ಜೋಶುವ ಅವರಿಗೆ 6 ತಿಂಗಳುಗಳ ಜೈಲು ಸಾಧ್ಯತೆಯಿದೆ ಎಂಬ ಭಯದಿಂದ ಅವರು ಈ ತೀರ್ಮಾನ ತೆಗೆದುಕೊಂಡುದುದಾಗಿ ತಮ್ಮ ಟ್ವೀಟ್‌ನಲ್ಲಿ ತಿಳಿದಿದ್ದಾರೆ.  ಕೋರ್ಟಿನಲ್ಲಿ ವಾದ ಮಾಡುವ ವ್ಯಕ್ತಿ ಇಯರ್‌ಫೋನ್ ಧರಿಸಿ ಅದು ಮೊಬೈಲಿನಲ್ಲಿರುವ ಡುನಾಟ್‌ಪೇ ತಂತ್ರಾಂಶಕ್ಕೆ ಸಂಪರ್ಕ ಹೊಂದುತ್ತದೆ. ಆ ತಂತ್ರಾಂಶವು ವಾದವನ್ನು ಆಲಿಸಿ ತನ್ನ ಉತ್ತರವನ್ನು ಇಯರ್‌ಫೋನ್ ಮೂಲಕ ತಿಳಿಸುತ್ತದೆ. ಕಕ್ಷಿದಾರ ಕೋರ್ಟಿನಲ್ಲಿ ರೋಬೋಟ್ ಲಾಯರ್ ತಿಳಸಿದಂತೆ ವಾದ ಮಾಡುತ್ತಾರೆ. ಇದು ಅವರ ಯೋಜನೆ ಆಗಿತ್ತು. ಮೊಬೈಲ್  ಫೋನ್ ಮತ್ತು ಇಯರ್‌ಫೋನ್‌ಗಳನ್ನು ಕೋರ್ಟಿನಲ್ಲಿ ಬಳಕೆ ಮಾಡುವಂತಿಲ್ಲ. ಆದುದರಿಂದ ಇಯರ್‌ಫೋನ್ ಅನ್ನು ಕಿವಿ ಕೇಳದವರು ಬಳಸುವ ಸಾಧನ ಎಂಬಂತೆ ಬಿಂಬಿಸುವ ಯೋಜನೆ ಅವರದಾಗಿತ್ತು. ಆದರೆ ಸದ್ಯಕ್ಕೆ ರೋಬೋಟ್ ಲಾಯರ್ ಕೇವಲ ಸಲಹೆಗೆಳಿಗೆ ಮಾತ್ರ ಸೀಮಿತ. ಕೋರ್ಟಿನಲ್ಲಿ ನಿಜವಾದ ವಾದ ಸದ್ಯಕ್ಕಿಲ್ಲ.

–ಡಾ| ಯು.ಬಿ. ಪವನಜ

gadgetloka @ gmail . com

The post ರೋಬೋಟ್ ಲಾಯರ್ first appeared on Vishva Kannada.

“ನನಗೆ ಬೋರ್ ಆಗಿದೆ, ಏನು ಮಾಡಲಿ?”

“ಇಡ್ಲಿ ಯಾಕೆ ಜಗತ್ತಿನ ಸರ್ವಶ್ರೇಷ್ಠ ತಿಂಡಿಯಾಗಿದೆ?”

“ನನಗೊಂದು ಕವನ ಸೃಷ್ಠಿಸಿ ಕೊಡು”

ಇವೆಲ್ಲ ಆದೇಶಗಳನ್ನು ನೀವು ನಿಮ್ಮ ಸಹಾಯಕನಿಗೆ ನೀಡುತ್ತಿಲ್ಲ. ಬದಲಿಗೆ ಕೃತಕ ಬುದ್ಧಿಮತ್ತೆಯ ಮೂಲಕ ಕೆಲಸ ಮಾಡುವ ಒಂದು ಅತ್ಯಾಧುನಿಕ ಚಾಟ್ ಇಂಜಿನ್‌ಗೆ ಹೇಳುತ್ತೀರಿ. ಅದು ಸಂದರ್ಭಕ್ಕೆ ಸರಿಯಾಗಿ ಬಹುಮಟ್ಟಿಗೆ ಸರಿಯೆನಿಸುವಂತಹ ಪ್ರತಿಕ್ರಿಯೆ ನೀಡುತ್ತದೆ. ಈ ಕೃತಕ ಬುದ್ಧಿಮತ್ತೆಯ ಚಾಟ್ ಇಂಜಿನ್ ಸದ್ಯಕ್ಕೆ ಅಂತರಜಾಲದಲ್ಲಿ ಬಹುದೊಡ್ಡ ಸುದ್ದಿಯಾಗಿದೆ. ಇದರ ಹೆಸರು ಚಾಟ್‌ಜಿಪಿಟಿ (ChatGPT). ಏನಿದು ಎಂದು ಈ ಸಂಚಿಕೆಯಲ್ಲಿ ತಿಳಿಯೋಣ.

ಆನ್‌ಲೈನ್ ಮೂಲಕ ಯಾವುದಾದರೂ ಉತ್ಪನ್ನ ಕೊಳ್ಳುವ ಮೊದಲು ಆ ಜಾಲಮಳಿಗೆಯಲ್ಲಿ ನಮ್ಮೊಡನೆ ಮಾತುಕತೆ ನಡೆಸಿ ಎಂದು ಒಂದು ಮೂಲೆಯಲ್ಲಿ ಬರೆದುದನ್ನು ಗಮನಿಸಿ ಅಲ್ಲಿ ಕ್ಲಿಕ್ ಮಾಡಿ ಮಾತುಕತೆ ನಡೆಸಿದ ನೆನಪಿರಬಹುದು. ಬಹುತೇಕ ಸಂದರ್ಭಗಳಲ್ಲಿ ಇದು ಜೀವಂತ ವ್ಯಕ್ತಿಯಾಗಿರದೆ ಒಂದು ಸ್ವಯಂಚಾಲಿತ ತಂತ್ರಾಂಶ ಆಗಿರುತ್ತದೆ. ಇಂತಹ ತಂತ್ರಾಂಶಗಳಿಗೆ ಚಾಟ್‌ಬೋಟ್ (chatbot) ಎನ್ನುತ್ತಾರೆ. ಇಲ್ಲಿ ಬೋಟ್ ಎನ್ನುವುದು ರೋಬೋಟ್ ಎನ್ನುವುದರ ಕಿರುರೂಪ. ಇಲ್ಲಿ ರೋಬೋಟ್ ಎನ್ನುವುದು ನೀವು ಅಂದುಕೊಂಡ ಯಂತ್ರಮಾನವ ಅಲ್ಲ. ಬದಲಿಗೆ ಒಂದು ತಂತ್ರಾಂಶ. ಚಿಕ್ಕದಾಗಿ ಹೇಳುವುದಾದರೆ ಸಾಫ್ಟ್‌ವೇರ್ ರೋಬೋಟ್‌ಗೆ ಬೋಟ್ ಎನ್ನುತ್ತಾರೆ. ಚಾಟ್ (ಮಾತುಕತೆ) ಮಾಡಲು ಬಳಸುವ ಸಾಫ್ಟ್‌ವೇರ್ ರೋಬೋಟ್‌ಗೆ ಚಾಟ್‌ಬೋಟ್ ಎನ್ನುತ್ತಾರೆ. ಈ ಚಾಟ್‌ಬೋಟ್‌ಗಳು ಅಷ್ಟೇನು ಬುದ್ಧಿವಂತವಾಗಿಲ್ಲ. ಬಹುತೇಕ ಸಂದರ್ಭಗಳಲ್ಲಿ ಎಲ್ಲೆಲ್ಲೋ ಸುತ್ತಿಸಿ ಕೊನೆಗೂ ನಮಗೆ ಬೇಕಾದ ಮಾಹಿತಿ ದೊರೆಯುವುದಿಲ್ಲ. ಈ ಸಮಸ್ಯೆಗೆ ಒಂದು ಮಟ್ಟಿನ ಪರಿಹಾರವಾಗಿ ಈ ಚಾಟ್‌ಜಿಪಿಟಿ ಬಂದಿದೆ. ಏನದು ಎಂದು ತಿಳಿಯೋಣ.

ಚಾಟ್‌ಜಿಪಿಟಿ ಎಂಬುದು ಒಂದು ಕೃತಕ ಬುದ್ಧಿಮತ್ತೆ ಮೂಲಕ ಮಾತುಕತೆ ನಡೆಸುವ ಒಂದು ತಂತ್ರಾಂಶ, ಅಥವಾ ಕೃತಕಬುದ್ಧಿವಂತ ಚಾಟ್‌ಬೋಟ್. ಕೃತಕ ಬುದ್ಧಿಮತ್ತೆ (artificial intelligence) ಎನ್ನುವುದು ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಇತ್ತೀಚೆಗೆ ತುಂಬ ಸುದ್ದಿ ಮಾಡುತ್ತಿರುವ ವಿಷಯ. ಇದರಲ್ಲಿ ಯಂತ್ರಗಳು ತಾವೇ ವಿಷಯಗಳನ್ನು ಅರ್ಥಮಾಡಿಕೊಂಡು, ಅವುಗಳಿಗೆ ಸ್ಪಂದಿಸಿ, ತಾವೇ ತೀರ್ಮಾನ ತೆಗೆದುಕೊಂಡು ಕೆಲಸ ಮಾಡುತ್ತವೆ. ಕೆಲವು ಪ್ರಮುಖ ಉದಾಹರಣೆಗೆಳು – ಯಂತ್ರಾನುವಾದ, ಪಠ್ಯದಿಂದ ಧ್ವನಿಗೆ ಹಾಗೂ ಧ್ವನಿಯಿಂದ ಪಠ್ಯಕ್ಕೆ ಪರಿವರ್ತನೆ, ಚಿತ್ರದಿಂದ ಪಠ್ಯಕ್ಕೆ, ಇತ್ಯಾದಿ.

ಚಾಟ್‌ಜಿಪಿಟಿಯಲ್ಲಿ ಜಿಪಿಟಿ ಎಂದರೆ Generative Pre-trained Transformer. ಇದೊಂದು ಚಾಟ್‌ಬೋಟ್ ಅಂದರೆ ಕೃತಕ ಬುದ್ಧಿಮತ್ತೆ ಮೂಲಕ ಮಾತುಕತೆ ನಡೆಸುವ ಒಂದು ತಂತ್ರಾಂಶ. ಇತರೆ ಚಾಟ್‌ಬೋಟ್‌ಗಳಿಗಿಂತ ಇದು ತುಂಬ ವಿಭಿನ್ನ. ಅವುಗಳೆಲ್ಲ ಮಾಮೂಲಿ ಪ್ರಶ್ನೆ – ಉತ್ತರ ಮಾದರಿಯಲ್ಲಿ ಕೆಲಸ ಮಾಡುತ್ತವೆ. ಅವುಗಳ ದತ್ತಾಂಶಸಂಗ್ರಹದಲ್ಲಿರುವ ಪ್ರಶ್ನೆಗಳಿಗೆ ಮಾತ್ರ ಅವು ಅಲ್ಲಿರುವ ಉತ್ತರಗಳ ಸಂಗ್ರಹದಿಂದ ಆರಿಸಿ ಉತ್ತರಿಸಬಲ್ಲವು. ಆದರೆ ಚಾಟ್‌ಜಿಪಿಟಿ ಹಾಗಲ್ಲ. ಅದರಲ್ಲಿ ಈಗಾಗಲೇ ಲಕ್ಷಾಂತರ ಮಾಹಿತಿ ಇರುವುದೇನೋ ಸರಿಯೇ. ಅದು ಅಲ್ಲಿಂದ ಮುಂದುವರೆದು ಪ್ರಶ್ನೆಗಳಿಗೆ ತಾನೇ ವಿಶ್ಲೇಷಿಸಿ ಬಹುಮಟ್ಟಿಗೆ ಮನುಷ್ಯರು ಉತ್ತರಿಸುವ ಮಾದರಿಯಲ್ಲೇ ಉತ್ತರಿಸಬಲ್ಲುದು.  

ಚಾಟ್‌ಜಿಪಿಟಿ ಮುಕ್ತ ಕೃತಕಬುದ್ಧಿಮತ್ತೆಯ ಒಕ್ಕೂಟದ ಉತ್ಪನ್ನ ಎನ್ನಬಹುದು. ಇದನ್ನು OpenAI ಎನ್ನುತ್ತಾರೆ. ಇದು ಬಹುಮಟ್ಟಿಗೆ ಮುಕ್ತ ತಂತ್ರಾಂಶ ಮತ್ತು ಮುಕ್ತಜ್ಞಾನದ ಸಮೀಪವರ್ತಿ ಎನ್ನಬಹುದು. ಮುಕ್ತಜ್ಞಾನದ ವಿಕಿಪೀಡಿಯ ನಿಮಗೆಲ್ಲರಿಗೂ ತಿಳಿದೇ ಇರಬಹುದು. ಈ ಓಪನ್‌ಏಐಗೆ ಹಲವರು ಹಣ ಹಾಕಿದ್ದಾರೆ. ಇದನ್ನು ಪ್ರಾರಂಭಿಸಿದವರಲ್ಲಿ ಎಲೊನ್ ಮಸ್ಕ್ ಕೂಡ ಒಬ್ಬರು. ಜಗತ್ತಿನ ಅತಿ ಶ್ರೀಮಂತರಲ್ಲೊಬ್ಬರಾದ ಎಲೊನ್ ಮಸ್ಕ್ ಗೊತ್ತಿರಬಹುದು. ಸ್ಪೇಸ್‌ಎಕ್ಸ್ ಮತ್ತು ಟೆಸ್ಲಾಗಳಿಂದ ಮತ್ತು ಇತ್ತೀಚೆಗೆ ಟ್ವಿಟ್ಟರ್ ಕೊಳ್ಳುವುದರ ಮೂಲಕ ಅವರ ಹೆಸರು ಪ್ರಖ್ಯಾತವಾಗಿದೆ. ಎಲೊನ್ ಮಸ್ಕ್ ಈಗ ಓಪನ್‌ಏಐಯ ನಿರ್ದೇಶಕ ಮಂಡಳಿಯಲ್ಲಿಲ್ಲ. ಆದರೆ ಅದಕ್ಕೆ ಹಣ ಹಾಕಿದ್ದಾರೆ. ಓಪನ್‌ಏಐಗೆ ಮೈಕ್ರೋಸಾಫ್ಟ್‌ನಂತಹ ದೈತ್ಯ ಕೂಡ ಹಣ ಹಾಕಿದೆ. ಇದು ಭವಿಷ್ಯದಲ್ಲಿ ದೊಡ್ಡ ಹೆಸರು ಮಾಡಲಿದೆ. ಚಾಟ್‌ಜಿಪಿಟಿ ಪ್ರಾರಂಭ ಎನ್ನಬಹುದು.

ಚಾಟ್‌ಜಿಪಿಟಿಯು ಮನುಷ್ಯರು ನಡೆಸುವ ಸಂಭಾಷಣೆಯನ್ನು ಅನುಕರಿಸಲು ತಯಾರಾದುದು. ಅದು ಬಹುಮಟ್ಟಿಗೆ ಇದರಲ್ಲಿ ಯಶಸ್ವಿಯೂ ಆಗಿದೆ. ಪತ್ರಕರ್ತರು ಇದನ್ನು ತಮಗೆ ತಿಳಿಯದ ಹಲವು ವಿಷಯಗಳನ್ನು ತಿಳಿಯಲು ಬಳಸುತ್ತಿದ್ದಾರೆ. ಇದು ಒಂದು ರೀತಿಯಲ್ಲಿ ಗೂಗ್ಲ್ ಅನುವಾದದಂತೆ. ಇದು ನೀಡುವ ಉತ್ತರಗಳು ಸಂಪೂರ್ಣ ಸತ್ಯವಾಗಿರಬೇಕಾಗಿಲ್ಲ. ಆದರೂ ಆ ಉತ್ತರಗಳನ್ನು ಪ್ರಾರಂಭದ ಹೆಜ್ಜೆಯಂತೆ ಬಳಸಬಹುದು. ಗೂಗ್ಲ್ ಅನುವಾದವೂ ಅಂತೆಯೇ. ಅದನ್ನು ಪ್ರಾರಂಭದ ಹಂತದಂತೆ ಬಳಸಬಹುದು. ಚಾಟ್‌ಜಿಪಿಟಿ ಬುದ್ಧಿವಂತ ಎಂದೆನಲ್ಲ. ಅದು ಮಾತುಕತೆ ನಡೆಸುತ್ತ ತನ್ನನ್ನು ತಾನೆ ಸುಧಾರಿಸಿಕೊಳ್ಳುತ್ತದೆ. ಈ ಒಂದು ಗುಣವೈಶಿಷ್ಟ್ಯವು ಚಾಟ್‌ಜಿಪಿಟಿಯನ್ನು ತುಂಬ ಉಪಯುಕ್ತ ಮಾಡಲಿದೆ. ಈಗಾಗಲೇ ಅದು ತುಂಬ ಕಲಿತಿದೆ. ಒಂದು ವಾರದ ಹಿಂದೆ ನಾನು ಅದಕ್ಕೆ ಕೇಳಿದ ಪ್ರಶ್ನೆಗಳಿಗೆ ಅದು ನೀಡಿದ ಉತ್ತರಗಳಿಗಿಂತ ಅದು ಈಗ ನೀಡುತ್ತಿರುವ ಉತ್ತರಗಳು ಹೆಚ್ಚು ಉಪಯುಕ್ತವಾಗಿವೆ.

ಚಾಟ್‌ಜಿಪಿಟಿಗೆ ನಾನು ಕೇಳಿದ ಕೆಲವು ಪ್ರಶ್ನೆಗಳು ಮತ್ತು ಅದು ನೀಡಿದ ಉತ್ತರಗಳು ಇಲ್ಲಿವೆ. ಅದು ಇನ್ನೂ ಕನ್ನಡ ಕಲಿತಿಲ್ಲ. ಇಂಗ್ಲಿಷಿನಲ್ಲಿ ನಡೆದ ಮಾತುಕತೆಗಳ ಸಾರಾಂಶವನ್ನು ಕನ್ನಡದಲ್ಲಿ ನೀಡುತ್ತಿದ್ದೇನೆ.

“ಇಡ್ಲಿ ಯಾಕೆ ಜಗತ್ತಿನ ಸರ್ವಶ್ರೇಷ್ಠ ತಿಂಡಿಯಾಗಿದೆ?”

“ಇಡ್ಲಿ ಒಂದು ದಕ್ಷಿಣಭಾರತೀಯ ಪಾರಂಪರಿಕ ತಿಂಡಿಯಾಗಿದೆ. ಇದು ತುಂಬ ಆರೋಗ್ಯದಾಯಕ ಮತ್ತು ಪೌಷ್ಠಿಕಾಂಶಗಳಿಂದ ಕೂಡಿದ್ದು ಎಂದು ಭಾವಿಸಲಾಗುತ್ತಿದೆ. ಯಾಕೆಂದರೆ ಅದರಲ್ಲಿ ಪ್ರೊಟೀನ್ ತುಂಬ ಇದೆ ಹಾಗೂ ಜಿಡ್ಡಿನ ಅಂಶಗಳಿಲ್ಲ. ಅದು ಸುಲಭವಾಗಿ ಜೀರ್ಣವಾಗುತ್ತದೆ. ಅದು ಸಂಪೂರ್ಣ ಸಸ್ಯಾಹಾರವಾಗಿದ್ದು ಯಾವುದೇ ಪ್ರಾಣಿಜನ್ಯ ಆಹಾರ ಅದರಲ್ಲಿಲ್ಲ.”

“ನ್ಯೂಟನ್‌ಗೆ ಯಾಕೆ ನೋಬೆಲ್ ಪುರಸ್ಕಾರ ದೊರೆಯಲಿಲ್ಲ?”

“ನೋಬೆಲ್ ಪುರಸ್ಕಾರವನ್ನು 1901ರಲ್ಲಿ ಸ್ಥಾಪಿಸಲಾಯಿತು. ನ್ಯೂಟನ್ 1727ರಲ್ಲೇ ಮರಣ ಹೊಂದಿದ್ದರು. ನ್ಯೂಟನ್ ಕಾಲದಲ್ಲಿ ನೋಬೆಲ್ ಪುರಸ್ಕಾರ ಇರಲಿಲ್ಲ.”

“5 ಶ್ರೇಷ್ಠ ದಕ್ಷಿಣಭಾರತೀಯ ಆಹಾರಗಳನ್ನು ಹೆಸರಿಸು”

 “ದೋಸೆ, ಇಡ್ಲಿ, ಒಡೆ, ಉಪ್ಪಿಟ್ಟು, ಸಾಂಬಾರು”. (lorazepam Canada)

ಕನ್ನಡದಲ್ಲೇ ಪ್ರಶ್ನೆ ಕೇಳಿದರೆ ಅದು ಅದನ್ನು ಗೂಗ್ಲ್ ಅನುವಾದ ಬಳಸಿ ಇಂಗ್ಲಿಷಿಗೆ ಅನುವಾದಿಸಿ ದೊರೆತ ಉತ್ತರವನ್ನು ಮತ್ತೆ ಕನ್ನಡಕ್ಕೆ ಅನುವಾದಿಸಿ ನೀಡುತ್ತದೆ. ಬಹುತೇಕ ಸಂದರ್ಭಗಳಲ್ಲಿ ಇದು ಅಸಂಬದ್ಧವಾಗಿರುತ್ತದೆ. ಅದು ಕನ್ನಡವನ್ನೂ ಕಲಿಯುವ ಕಾಲ ದೂರವಿಲ್ಲ.

–ಡಾ| ಯು.ಬಿ. ಪವನಜ

gadgetloka @ gmail . com

ದಿ : 07-01-2023

The post ಬುದ್ಧಿವಂತ ಮಾತುಗಾರ first appeared on Vishva Kannada.

ಅಕ್ಟೋಬರ್ 1 ರಂದು ನಮ್ಮ ದೇಶದ ಪ್ರಧಾನಿ ನರೇಂದ್ರ ಮೋದಿಯವರು ಭಾರತದಲ್ಲಿ 5ಜಿ ಮೊಬೈಲ್ ಅಂತರಜಾಲ ಸಂಪರ್ಕ ತಂತ್ರಜ್ಞಾನವನ್ನು ಉದ್ಘಾಟಿಸಿದರು. ಈ ತಂತ್ರಜ್ಞಾನವು ಭಾರತದ ಟೆಲಿಕಾಂ ಕ್ಷೇತ್ರದಲ್ಲಿ ಕ್ರಾಂತಿಯನ್ನೇ ಮಾಡಲಿದೆ ಎಂದು ನರೇಂದ್ರ ಮೋದಿಯವರು ಹೇಳಿದರು. ಏನಿದು 5ಜಿ ಅಂದರೆ? ಈ ಸಂಚಿಕೆಯಲ್ಲಿ ಅದರ ಬಗ್ಗೆ ಸ್ಥೂಲವಾಗಿ ತಿಳಿದುಕೊಳ್ಳೋಣ.

5ಜಿ (G=generation) ಅಂದರೆ ಐದನೇ ತಲೆಮಾರಿನ ತಂತ್ರಜ್ಞಾನ ಎಂದು ಅರ್ಥ. ಐದನೇ ತಲೆಮಾರು ಬರುವ ಮೊದಲು 1ನೆ, 2ನೆ, 3ನೇ ಮತ್ತು 4ನೇ ತಲೆಮಾರುಗಳು ಇದ್ದಿರಬೇಕಲ್ಲವೇ? ಹೌದು. ಅವುಗಳು ಕ್ರಮವಾಗಿ, 1G, 2G, 3G ಮತ್ತು 4G ತಂತ್ರಜ್ಞಾನಗಳು. ಇವು ಮೊಬೈಲ್ ಫೋನ್ ಕ್ಷೇತ್ರದಲ್ಲಿ ತಂತ್ರಜ್ಞಾನವು ಹಾದು ಬಂದ ಮಜಲುಗಳು ಎನ್ನಬಹುದು. ಅದನ್ನು ಕೋಷ್ಟಕ ರೂಪದಲ್ಲಿ ನೀಡಲಾಗಿದೆ-

5ಜಿ ಯಲ್ಲಿ 11 ಬ್ಯಾಂಡ್‌ಗಳಿವೆ. ಭಾರತದಲ್ಲಿ ಎಲ್ಲ ಮೊಬೈಲ್ ಸೇವೆ ನೀಡುವವರು ಎಲ್ಲ ಬ್ಯಾಂಡ್‌ಗಳಲ್ಲಿ 5ಜಿ ನೀಡುತ್ತಾರೆಂದಿಲ್ಲ. ಈಗಿನ ಮಾಹಿತಿಯಂತೆ ಜಿಯೋ 8, ಏರ್‌ಟೆಲ್ 5 ಮತ್ತು ವೊಡಾಫೋನ್ 5 ಬ್ಯಾಂಡ್‌ಗಳಲ್ಲಿ 5ಜಿ ಸೇವೆಗಳನ್ನು ನೀಡುತ್ತಾರೆ-

ಜಿಯೋ – 700 MHz, 800 MHz, 900 MHz, 1800 MHz, 2100 MHz, 2500 MHz, 3300 MHz ಮತ್ತು 26 GHz

ಏರ್‌ಟೆಲ್ – 900 MHz, 1800 MHz, 2100 MHz, 3300 MHz ಮತ್ತು 26 GHz

ವಿಐ – 1800 MHz, 2100 MHz, 2500 MHz, 3300 MHz and 26 GHz

ಸದ್ಯಕ್ಕೆ ಭಾರತದ ಕೆಲವೇ ಪ್ರಮುಖ ನಗರಗಳಲ್ಲಿ ಈ ಸೇವೆಯನ್ನು ಪ್ರಾರಂಭಿಸಲಾಗಿದೆ. ಆಯಾ ನಗರದಲ್ಲೂ ಕೆಲವು ಆಯ್ದ ಸ್ಥಳಗಳಲ್ಲಿ ಮಾತ್ರ ಈ ಸೇವೆ ಲಭ್ಯವಿದೆ.

5ಜಿ ಸಂಪರ್ಕವು ಅತಿ ವೇಗದ ಅಂತರಜಾಲ ಸಂಪರ್ಕವನ್ನು ಸಾಧ್ಯವಾಗಿಸುತ್ತದೆ. 4ಜಿ ಸಂಪರ್ಕಕ್ಕೆ ಹೋಲಿಸಿದರೆ ಅದು 10 ರಿಂದ 100 ಪಟ್ಟು ಹೆಚ್ಚಿನ ವೇಗವನ್ನು ಸಾಧಿಸಬಲ್ಲುದು. 4ಜಿ ಸಂಪರ್ಕದಲ್ಲಿ ಒಂದು ದೊಡ್ಡ ಗಾತ್ರದ ಫೈಲು ಡೌನ್‌ಲೋಡ್ ಆಗಲು ಸುಮಾರು 10 ಸೆಕೆಂಡು ಬೇಕಿದ್ದಲ್ಲಿ ಅದೇ ಫೈಲು 5 ಜಿ ಸಂಪರ್ಕದಲ್ಲಿ ಕೇವಲ 1 ಸೆಕೆಂಡಿನಲ್ಲಿ ಡೌನ್‌ಲೋಡ್ ಆಗಬಲ್ಲುದು. ಇದರಿಂದಾಗಿ ಹಲವು ಪ್ರಯೋಜನಗಳಾಗಲಿವೆ. ಮೊದಲನೆಯದಾಗಿ ಅಂತರಜಾಲದ ಮೂಲಕ ವಿಡಿಯೋ ನೋಡುವವರಿಗೆ ಉತ್ತಮ ಗುಣಮಟ್ಟದ ವಿಡಿಯೋ ವೀಕ್ಷಣೆಯನ್ನು ಸರಾಗವಾಗಿ ಮಾಡಬಹುದು. ಒಂದು ಸಿನಿಮಾವನ್ನು ಅಂತರಜಾಲದಲ್ಲಿ ಆಪ್‌ಗಳ ಮೂಲಕ ನೋಡುವವರಿಗೆ ಈ ಅನುಭವವಾಗಿರಬಹುದು.  ಹೈಡೆಫಿನಿಶನ್ ಎಂದು ಆಯ್ಕೆ ಮಾಡಿಕೊಂಡರೆ ಹಲವು ಸಲ ಸಿನಿಮಾವನ್ನು ಸರಾಗವಾಗಿ ನೋಡಲು ಆಗುವುದೇ ಇಲ್ಲ. ಅಗಾಗ ಅದು ನಿಲ್ಲುತ್ತದೆ. ಇದಕ್ಕೆ ಬಫರಿಂಗ್ ಎನ್ನುತ್ತಾರೆ. ಸಾಮಾನ್ಯವಾಗಿ ನಾವು ಅಂತಹ ಸಂದರ್ಭಗಳಲ್ಲಿ ಕಡಿಮೆ ಗುಣಮಟ್ಟಕ್ಕೆ ಆಯ್ಕೆಯನ್ನು ಬದಲಾಯಿಸಿಕೊಳ್ಳುತ್ತೇವೆ. 5ಜಿ ಬಂದಾಗ ಈ ಸಮಸ್ಯೆ ಇರುವುದಿಲ್ಲ. ಹೈಡೆಫಿನಿಶನ್ ಮಾತ್ರವಲ್ಲ 4k ವಿಡಿಯೋಗಳನ್ನು ಕೂಡ ಯಾವುದೇ ತಡೆಯಿಲ್ಲದೆ (ಬಫರಿಂಗ್ ಇಲ್ಲದೆ) ಅಂತರಜಾಲದಿಂದ ವೀಕ್ಷಿಸಬಹುದು.

ಅಂತರಜಾಲ ಸಂಪರ್ಕದಲ್ಲಿ ವೇಗ ಮಾತ್ರವಲ್ಲ. ಲಾಟೆನ್ಸ್ ಎಂಬ ಇನ್ನೊಂದು ಗುಣವೈಶಿಷ್ಟ್ಯವಿದೆ. ಒಂದು ಜಾಲತಾಣ ವೀಕ್ಷಣೆ, ಫೈಲು ಡೌನ್‌ಲೋಡ್, ಸ್ಟ್ರೀಮಿಂಗ್ ವಿಡಿಯೋದ ಪ್ರಾರಂಭವು ಕೂಡಲೇ ಆಗದೆ, ಒಂದು ಚಿಕ್ಕ ಸಮಯ ಕಳೆದ ನಂತರ ಪ್ರಾರಂಭವಾಗುವುದನ್ನು ಗಮನಿಸಿರಬಹುದು. ಇದನ್ನೇ ಲಾಟೆನ್ಸ್ ಎನ್ನುತ್ತಾರೆ. 4ಜಿ ಸಂಪರ್ಕದಲ್ಲಿ ಇದು ಸಾಮಾನ್ಯವಾಗಿ 20 ಮಿಲ್ಲಿ ಸೆಕೆಂಡಿನಿಂದ 100 ಮಿ.ಸೆ. ಕೂಡ ಇರಬಹುದು. ವಿಡಿಯೋ ಕಾಫೆರೆನ್ಸ್‌ಗಳಲ್ಲಿ ಈ ಲಾಟೆನ್ಸ್ ಕಡಿಮೆ ಇದ್ದಷ್ಟೂ ಉತ್ತಮ. ಇಲ್ಲವಾದಲ್ಲಿ ಮಾತನಾಡುತ್ತಿದ್ದಾಗ ವಿಡಿಯೋ ಅಲ್ಲಲ್ಲಿ ಸ್ವಲ್ಪ ಕಾಲ ನಿಲ್ಲುತ್ತದೆ. ಈ ನಿಲ್ಲುವ ಸಮಯ ಒಂದು ಸೆಕೆಂಡಿಗಿಂತಲೂ ಕಡಿಮೆ ಇರಬಹುದು. ಆದರೂ ಕೆಲವು ಸಂದರ್ಭಗಳಲ್ಲಿ ಸೆಕೆಂಡು ಮಾತ್ರವಲ್ಲ ಮಿಲ್ಲಿ ಸೆಕೆಂಡು ಕೂಡ ಮುಖ್ಯವಾಗುತ್ತದೆ. 3ಜಿಯಲ್ಲಿ ಇನ್ನೂ ಜಾಸ್ತಿ ಇರುತ್ತದೆ. ಬೆಂಗಳೂರಿನ ಆಸ್ಪತ್ರೆಯಲ್ಲಿ ರೋಗಿಗೆ ಶಸ್ತ್ರ ಚಿಕಿತ್ಸೆ ನಡೆಯುತ್ತಿದೆ. ಅಮೆರಿಕದಿಂದ ಕೆಲವು ಪರಿಣತ ವೈದ್ಯರು ವಿಡಿಯೋ ಮೂಲಕ ಶಸ್ತ್ರಚಿಕಿತ್ಸೆಯನ್ನು ವೀಕ್ಷಿಸುತ್ತಾ ಅಲ್ಲಿಂದ ಮಾರ್ಗದರ್ಶನ ಮಾಡುತ್ತಿದ್ದಾರೆ. ಈ ಸಂದರ್ಭದಲ್ಲಿ ವಿಡಿಯೋ ಮಿಲ್ಲಿಸೆಕೆಂಡಿನಷ್ಟು ಕಾಲವೂ ನಿಲ್ಲಬಾರದು. ಇದು ಒಂದು ಉದಾಹರಣೆ ಮಾತ್ರ. ಇಂತಹ ಹಲವು ಉದಾಹರಣೆಗಳಿವೆ.

5ಜಿ ತಂತ್ರಜ್ಞಾನವು ಭಾರತಕ್ಕೆ ಹಲವು ರೀತಿಯಲ್ಲಿ ವರದಾನವಾಗಲಿದೆ. ಕೆಲವು ಪ್ರಮುಖ ಸಂದರ್ಭಗಳನ್ನು ನೋಡೋಣ. ವಸ್ತುಗಳ ಅಂತರಜಾಲ (IoT = Internet of Things) ಕ್ಷೇತ್ರದಲ್ಲಿ ಗಣನೀಯ ಸುಧಾರಣೆ ಆಗಲಿದೆ. ಕೃಷಿ ಕ್ಷೇತ್ರದಲ್ಲಿ ಅತಿ ವೇಗದ ಅಂತರಜಾಲ ಮತ್ತು ಕಡಿಮೆ ಲಾಟೆನ್ಸ್‌ನಿಂದಾಗಿ ಲಾಭವಾಗಲಿದೆ. ಆರೋಗ್ಯ ಕ್ಷೇತ್ರದ ಒಂದು ಉದಾಹರಣೆಯನ್ನು ಈಗಾಗಲೇ ನೀಡಲಾಗಿದೆ. ಶಿಕ್ಷಣದ ವಿಷಯಕ್ಕೆ ಬಂದರೆ ಉತ್ತಮ ಗುಣಮಟ್ಟದ ವಿಡಿಯೋ ವೀಕ್ಷಣೆಯ ಸೌಲಭ್ಯದಿಂದಾಗಿ ಆನ್‌ಲೈನ್ ತರಗತಿಗಳಿಗೆ ತುಂಬ ಪ್ರಯೋಜನವಾಗಲಿದೆ. ಸಾರಿಗೆ ನಿಯಂತ್ರಣವನ್ನು ನಿಜಸಮಯದಲ್ಲಿ ಉತ್ತಮವಾಗಿ ಮಾಡಬಹುದು.  Accutane Uk    

ಎಲ್ಲರಿಗೂ ಈ 5ಜಿ ಸೌಲಭ್ಯ ದೊರಕಲಿದೆಯೇ ಎಂದು ಕೇಳಿದರೆ ಸದ್ಯಕ್ಕೆ ಇಲ್ಲ ಎಂಬುದೇ ಉತ್ತರ. ಎಲ್ಲರಿಗೂ ಲಭ್ಯವಾಗಲು ಬಹುಶಃ ಒಂದರಿಂದ ಎರಡು ವರ್ಷಗಳೇ ಬೇಕಾಗಬಹುದು. ಈಗಾಗಲೇ ಸ್ಮಾರ್ಟ್‌ಫೋನ್ ಇರುವವರು 5ಜಿ ಪಡೆಯಲು ಏನು ಮಾಡಬೇಕು? ನಿಮ್ಮ ಫೋನಿನಲ್ಲಿ 5ಜಿ ಸೌಲಭ್ಯ ಇದೆಯಾದಲ್ಲಿ ಅದನ್ನು ಚಾಲನೆ ಮಾಡಿಕೊಂಡರೆ ಸಾಕು. ನಿಮ್ಮ ಸ್ಥಳದಲ್ಲಿ 5ಜಿ ಸೇವೆ ಬಂದಾಗ ತಾನಾಗಿಯೇ ನಿಮಗೆ ಲಭ್ಯವಾಗುವುದು. ನಿಮ್ಮದು ಹಳೆಯ 5ಜಿ ಸೌಲಭ್ಯವಿಲ್ಲದ ಫೋನಾದರೆ ಹೊಸ ಫೋನ್ ಕೊಳ್ಳುವುದೇ ಪರಿಹಾರ. ಅಂತಹ ಫೋನ್‌ಗಳಿಗೆ ಸಾಫ್ಟ್‌ವೇರ್ ನವೀಕರಣ ಮೂಲಕ 5ಜಿ ಪಡೆಯಲು ಸಾಧ್ಯವಿಲ್ಲ.

–ಡಾ| ಯು.ಬಿ. ಪವನಜ

gadgetloka @ gmail . com

ದಿ : 01-10-2022

The post 5ಜಿ – ಅತಿ ವೇಗದ ಮೊಬೈಲ್ ಅಂತರಜಾಲ first appeared on Vishva Kannada.

ನೀವು ನಿಮ್ಮ ಆಂಡ್ರೋಯಿಡ್ ಮೊಬೈಲ್ ಫೋನ್ ಬಳಸಿ ಬ್ಯಾಂಕ್ ವ್ಯವಹಾರ ಮಾಡುವವರಾ? ಹಾಗಿದ್ದರೆ ನೀವು ಎಚ್ಚರವಾಗಿರಬೇಕು. ಸೋವಾ (SOVA) ಹೆಸರಿನ ಪೋಕರಿ ತಂತ್ರಾಂಶವೊಂದು (malware) ಭಾರತದಲ್ಲಿ ಆಂಡ್ರೋಯಿಡ್ ಫೋನ್ ಬಳಸುವವರನ್ನು ಗುರಿಯಾಗಿರಿಸಿ ಧಾಳಿ ಮಾಡಲು ಬರುತ್ತಿದೆ. ಸೋವಾ ಎಂದರೆ ರಷ್ಯನ್ ಭಾಷೆಯಲ್ಲಿ ಗೂಬೆ ಎಂದರ್ಥ. ಆದರೆ ಈ ಪೋಕರಿ ತಂತ್ರಾಂಶ ರಷ್ಯಾದಿಂದ ಬರುತ್ತಿಲ್ಲ. ಅಥವಾ ಅದು ಅಲ್ಲಿಂದ ಬರುತ್ತಿದೆ ಎಂದು ಸಿದ್ಧವಾಗಿಲ್ಲ. ಬಹುತೇಕ ಕೆಟ್ಟ ತಂತ್ರಾಂಶಗಳಂತೆ ಇದೂ ಚೈನಾ ದೇಶದಲ್ಲಿ ಹುಟ್ಟಿದ್ದಿರಲೂಬಹುದು. ಏನು ಈ ಪೋಕರಿ ತಂತ್ರಾಂಶ? ಅದು ಏನು ಮಾಡುತ್ತದೆ? ಈ ಸಂಚಿಕೆಯಲ್ಲಿ ಅದರ ಬಗ್ಗೆ ತಿಳಿದುಕೊಳ್ಳೋಣ.

ಸೋವಾ ಒಂದು ಟ್ರೋಜನ್ ತಂತ್ರಾಂಶ. ಏನು ಹಾಗಂದರೆ? ಈ ಹೆಸರಿನ ಮೂಲ ಗ್ರೀಕರು ಟ್ರೋಯ್ ನಗರವನ್ನು ಗೆದ್ದ ಟ್ರೋಜನ್ ಕುದುರೆಯಲ್ಲಿದೆ. ಟ್ರೋಯ್ ನಗರವನ್ನು ಎಷ್ಟೇ ಯುದ್ಧ ಮಾಡಿದರೂ ಗ್ರೀಕರಿಗೆ ಗೆಲ್ಲಲು ಆಗಲಿಲ್ಲ. ಕೊನೆಗೆ ಸೋತು ಹಿಂತೆಗೆವವರಂತೆ ನಟಿಸಿ ಒಂದು ದೊಡ್ಡ ಮರದ ಕುದುರೆಯನ್ನು ಗೆಲುವಿನ ಸಂಕೇತವಾಗಿ ನಗರದೊಳಕ್ಕೆ ಕಳುಹಿದರು. ಆ ಕುದರೆಯೊಳಗೆ ಕೆಲವು ಆಯ್ದ ಯೋಧರಿದ್ದರು. ಅವರು ರಾತ್ರಿ ಹೊತ್ತಿನಲ್ಲಿ ನಗರದ ಕೋಟೆ ಬಾಗಿಲನ್ನು ತೆರೆದು ಇತರೆ ಸೈನಿಕರನ್ನು ಒಳ ಸೇರಿಸಿ ಅಂತಿಮವಾಗಿ ಗ್ರೀಕರು ಯುದ್ಧವನ್ನು ಗೆದ್ದರು.

ಟ್ರೋಜನ್ ತಂತ್ರಾಂಶವು ಬಹುಮಟ್ಟಿಗೆ ಇದೇ ರೀತಿ ಕೆಲಸ ಮಾಡುತ್ತದೆ. ಸಾಮಾನ್ಯವಾಗಿ ಇಮೈಲ್ ಅಥವಾ ಸಾಮಾಜಿಕ ಮಾಧ್ಯಮದಲ್ಲಿ ಬಳಕೆದಾರರು ಇದನ್ನು ಆಹ್ವಾನಿಸುತ್ತಾರೆ ಅಥವಾ ಅದು ಆಹ್ವಾನಗೊಳ್ಳುತ್ತದೆ. ಉದಾಹರಣೆಗೆ ಇಮೈಲ್‌ಗೆ ಒಂದು ಲಗತ್ತು ಇರುತ್ತದೆ. ಅದನ್ನು ತೆರೆದರೆ ಈ ಪೋಕರಿ ತಂತ್ರಾಂಶವು ನಿಮ್ಮ ಗಣಕದೊಳಗೆ ಪ್ರವೇಶಿಸುತ್ತದೆ. ಇನ್ನೊಂದು ನಮೂನೆಯಲ್ಲಿ ನೀವು ಸಾಮಾಜಿಕ ಮಾಧ್ಯಮದಲ್ಲಿ (ಉದಾ – ಫೇಸ್‌ಬುಕ್) ಯಾವುದೋ ಒಂದು ಕೊಂಡಿಯನ್ನು ಒತ್ತುತ್ತೀರಿ. ಆಗ ಒಂದು ಪುಟ ತೆರೆದುಕೊಳ್ಳುತ್ತದೆ. ಅಲ್ಲಿ ನೀವು ಏನೇನೋ ಮಾಹಿತಿ ನೀಡಿ ನಂತರ ಯಾವುದೋ ಗುಂಡಿ ಒತ್ತಿದಾಗ ಆ ಪೋಕರಿ ತಂತ್ರಾಂಶವು ನಿಮ್ಮ ಗಣಕ ಅಥವಾ ಮೊಬೈಲನ್ನು ಪ್ರವೇಶಿಸುತ್ತದೆ. ಹಾಗೆ ಬಂದ ಕೂಡಲೆ ಅದು ನಿಮ್ಮ ಗಣಕ ಅಥವಾ ಮೊಬೈಲನ್ನು ಇತರೆ ವೈರಸ್‌ಗಳಂತೆ ಕೆಡಿಸುವುದಿಲ್ಲ. ಬದಲಿಗೆ  ಅದು ತನ್ನ ಒಡೆಯನಿಂದ ಅಪ್ಪಣೆಗಾಗಿ ಕಾಯುತ್ತಿರುತ್ತದೆ. ಸಾಮಾನ್ಯವಾಗಿ ಬಹುತೇಕ ಟ್ರೋಜನ್‌ಗಳು ಪಾಸ್‌ವರ್ಡ್ ಕದಿಯುವವಾಗಿರುತ್ತವೆ.

ಈಗ ಬರುತ್ತಿರುವ ಸೋವಾ ಕೂಡ ಒಂದು ಟ್ರೋಜನ್. ಅದು ಆಂಡ್ರೋಯಿಡ್ ಫೋನ್‌ಗಳಿಗೆ ಪ್ರವೇಶೀಸುತ್ತದೆ. ಪ್ರಮುಖವಾಗಿ ಬ್ಯಾಂಕಿಂಗ್ ಮಾಡುವವರನ್ನು ಅದು ತನ್ನ ಗುರಿಯನ್ನಾಗಿಸಿದೆ. ಮೊಬೈಲ್ ಮೂಲಕ ಬ್ಯಾಂಕಿಂಗ್ ಮಾಡುವಾಗ ಲಾಗಿನ್ ಹೆಸರು, ಪಾಸ್‌ವರ್ಡ್ ನೀಡಬೇಕು. ಈ ಟ್ರೋಜನ್ ತಂತ್ರಾಂಶವು ಅದನ್ನು ಕದ್ದು ತನ್ನನ್ನು ತಯಾರಿಸಿದವರಿಗೆ ಅಂತರಜಾಲದ ಮೂಲಕ ರವಾನಿಸುತ್ತದೆ. ನಂತರ ಒಂದು ದಿನ ಬ್ಯಾಂಕಿನಿಂದ ಹಣ ಕಳವಾಗಿರುತ್ತದೆ. ಮಾರ್ಚ್ 2022 ಮೊದಲು ಬಂದ ಸೋವಾ ಟ್ರೋಜನ್ ತಂತ್ರಾಂಶವು ಅಮೆರಿಕ, ರಷ್ಯಾ, ಸ್ಪೈನ್ ಮತ್ತು ಇತರೆ ಯುರೋಪಿನ ದೇಶಗಳನ್ನು ಗುರಿಯಾಗಿಸಿತ್ತು. ಜುಲೈ ತಿಂಗಳಲ್ಲಿ ಅದರ ಹೊಸ ಆವೃತ್ತಿ ಬಂತು. ಸಪ್ಟೆಂಬರ್ ತಿಂಗಳಲ್ಲಿ ಅದು ಭಾರತವನ್ನು ಗುರಿಯನ್ನಾಗಿಸಿದೆ ಎಂದು ಸಂಶೋಧಕರಿಗೆ ತಿಳಿದುಬಂತು. ಭಾರತ ಸರಕಾರವು ಆಂಡ್ರೋಯಿಡ್ ಮೊಬೈಲ್ ಫೋನ್ ಮೂಲಕ ಬ್ಯಾಂಕಿಂಗ್ ಮಾಡುವ ಎಲ್ಲರಿಗೆ ಈ ಬಗ್ಗೆ ಎಚ್ಚರಿಕೆ ನೀಡಿದೆ.

ಈ ಸೋವಾ ಟ್ರೋಜನ್ ಪೋಕರಿ ತಂತ್ರಾಂಶವು ತುಂಬ ಅಪಾಯಕಾರಿ. ಒಮ್ಮೆ ಬಂದರೆ ಅದನ್ನು ಅಳಿಸಲು ಆಗುವುದಿಲ್ಲ. ಫೋನಿನಲ್ಲಿರುವ ಎಲ್ಲ ಮಾಹಿತಿಗಳನ್ನು ಗೂಢಲಿಪೀಕರಿಸುವ ತಾಕತ್ತು ಅದಕ್ಕಿದೆ. ಒಮ್ಮೆ ಹಾಗೆ ಮಾಡಿದರೆ ಅದನ್ನು ವಾಪಸು ಪಡೆಯಬೇಕಿದ್ದರೆ ತಂತ್ರಾಂಶವನ್ನು ತಯಾರಿಸಿದವರಿಂದ ಮಾತ್ರ ಸಾಧ್ಯ. ಅಂತಹ ಸಂದರ್ಭದಲ್ಲಿ ಅವರು ಸಾಮಾನ್ಯವಾಗಿ ಇಂತಿಷ್ಟು ಹಣ ನೀಡು ಎಂದು ಬ್ಲ್ಯಾಕ್‌ಮೈಲ್ ಮಾಡುತ್ತಾರೆ. ಅಗತ್ಯ ಮತ್ತು ಸೂಕ್ಷ್ಮ ಮಾಹಿತಿಗಳನ್ನು ಈ ರೀತಿ ಕಳಕೊಳ್ಳುವ ಸಾಧ್ಯತೆಯಿದ್ದಾಗ ಅವರು ಹೇಳಿದಷ್ಟು ಹಣ ನೀಡಿದವರಿದ್ದಾರೆ. ಇಂತಹ ಕಳ್ಳರು ನೇರವಾಗಿ ಹಣ ಕೇಳುವುದಿಲ್ಲ. ಬದಲಿಗೆ ಗೂಢನಾಣ್ಯ (ಉದಾ – ಬಿಟ್‌ಕಾಯಿನ್) ಮೂಲಕ ಹಣ ಕೇಳುತ್ತಾರೆ.

ಈ ಪೋಕರಿ ತಂತ್ರಾಂಶವು ಹೆಚ್ಚಾಗಿ ಬಳಕೆಯಲ್ಲಿರುವ ಕ್ರೋಮ್ ಅಥವಾ ಅದೇ ರೀತಿಯ ತಂತ್ರಾಂಶಗಳ ಹಾಗೂ ಜನಪ್ರಿಯ ಬ್ಯಾಂಕಿಂಗ್ ತಂತ್ರಾಂಶಗಳ ರೂಪ ಮತ್ತು ಲಾಂಛನವನ್ನು ಬಳಸುತ್ತವೆ. ನನ್ನನ್ನು ಇನ್‌ಸ್ಟಾಲ್ ಮಾಡು ಎಂದು ಹೇಳುತ್ತದೆ. ಬಳಕೆದಾರರು ಇದು ನಿರುಪದ್ರವಿ, ನಂಬಿಕಸ್ತ, ಕ್ರೋಮ್ ಅಥವಾ ಬ್ಯಾಂಕಿಂಗ್ ತಂತ್ರಾಂಶ ಎಂದು ನಂಬಿ ಅದನ್ನು ಇನ್‌ಸ್ಟಾಲ್ ಮಾಡುತ್ತಾರೆ. ನಂತರ ಪೋಕರಿ ತಂತ್ರಾಂಶವು ನಿಯಂತ್ರಣವನ್ನು ತನ್ನ ಕೈಗೆ ತೆಗೆದುಕೊಳ್ಳುತ್ತದೆ.   

ಈ ಪೋಕರಿ ತಂತ್ರಾಂಶವು ಒಮ್ಮೆ ಪ್ರವೇಶಿಸಿದರೆ ತಂತ್ರಾಂಶಗಳ ಇನ್‌ಸ್ಟಾಲ್ ಮತ್ತು ಅನ್‌ಇನ್‌ಸ್ಟಾಲ್‌ಗಳನ್ನು ಮಾಡುವ ತಂತ್ರಾಂಶವನ್ನು ತನ್ನ ನಿಯಂತ್ರಣಕ್ಕೆ ತೆಗೆದುಕೊಳ್ಳುತ್ತದೆ. ಈ ತಂತ್ರಾಂಶವು ಇದೆ ಎಂದು ಗೊತ್ತಾಗಿ ಅದನ್ನು ಅಳಿಸಲು ಅಂದರೆ ಅನ್‌ಇನ್‌ಸ್ಟಾಲ್ ಮಾಡಲು ಹೋದರೆ ಅದು ಬಿಡುವುದಿಲ್ಲ. ಈ ತಂತ್ರಾಂಶವನ್ನು ಅಳಿಸಲು ಸಾಧ್ಯವಿಲ್ಲ ಎಂಬ ಸಂದೇಶವನ್ನು ತೋರಿಸುತ್ತದೆ.

ಇದರಿಂದ ಬಚಾವಾಗುವುದು ಹೇಗೆ? ಅಧಿಕೃತ ಗೂಗ್ಲ್ ಪ್ಲೇ ಸ್ಟೋರ್ ಹೊರತುಪಡಿಸಿ ಬೇರೆ ಎಲ್ಲಿಂದಲೂ ಯಾವುದೇ ತಂತ್ರಾಂಶವನ್ನು ಇನ್‌ಸ್ಟಾಲ್ ಮಾಡಬಾರದು. ಕೆಲವೊಮ್ಮೆ ತಂತ್ರಾಂಶವು ಇಮೈಲ್ ಅಥವಾ ವಾಟ್ಸ್‌ಆಪ್ ಮೂಲಕ ಬಂದಿರುತ್ತದೆ. ಆಗ ಅದನ್ನು ಇನ್‌ಸ್ಟಾಲ್ ಮಾಡಲು ನಂಬಿಕೆಗೆ ಅನರ್ಹವಾದ ಆಕರಗಳಿಂದ ಬಂದ ತಂತ್ರಾಂಶವನ್ನೂ ಇನ್‌ಸ್ಟಾಲ್ ಮಾಡು ಎಂಬ ಅಯ್ಕೆಯನ್ನು ಮಾಡಬೇಕಾಗುತ್ತದೆ. ಹೀಗೆ ಮಾಡಿದರೆ ಅದು ಇನ್‌ಸ್ಟಾಲ್ ಅಗುತ್ತದೆ. ಆದುದರಿಂದ ಪ್ಲೇ ಸ್ಟೋರಿನಿಂದ ಮಾತ್ರವೇ ಇನ್‌ಸ್ಟಾಲ್ ಮಾಡಬೇಕು. ಫೋನ್ ಕಂಪೆನಿಯವರು ಸಮಯ ಸಮಯಕ್ಕೆ ನೀಡುವ ನವೀಕರಣವನ್ನು ತಪ್ಪದೇ ಮಾಡುತ್ತಿರಬೇಕು.

–ಡಾ| ಯು.ಬಿ. ಪವನಜ

gadgetloka @ gmail . com

ದಿ : 17-09-2022

The post ರಷ್ಯಾದ ಗೂಬೆ ಬರುತ್ತಿದೆ ಎಚ್ಚರಿಕೆ first appeared on Vishva Kannada.

“ನೋವಾಗುತ್ತಿದೆ”

“ಎಲ್ಲಿ? ಹೇಗೆ?”

“ಬೆನ್ನಿನಲ್ಲಿ. ಕೆಲೊವೊಮ್ಮೆ ಎದೆನೋವು ಕೂಡ”

“ಎರಡೂ ಒಟ್ಟಿಗೆ ಆಗುತ್ತದೆಯಾ?

“ಕೆಲವೊಮ್ಮೆ ಆಗುತ್ತದೆ”

“ಹೊಟ್ಟೆನೋವು ಇದೆಯಾ?”

“ಕೆಲವೊಮ್ಮೆ ಇದೆ”

“ಅತಿಯಾಗಿ ಬೆವರುತ್ತದೆಯಾ?”

“ಇಲ್ಲ”

“ಊಟವಾದ ತಕ್ಷಣ ಅತಿಯಾಗಿ ಹೊಟ್ಟೆ ನೋವಾಗುತ್ತದೆಯಾ”

“ಆಗುತ್ತದೆ”

-ಇವು ಒಬ್ಬ ವೈದ್ಯ ಮತ್ತು ರೋಗಿಯ ನಡುವಿನ ಸಂಭಾಷಣೆಯಾಗಿದೆ. ಇದು ನಾನು ಬರೆದ ಕಾಲ್ಪನಿಕ ಸಂಭಾಷಣೆ. ನಿಜವಾದ ಸಂಭಾಷಣೆಯೂ ಬಹುತೇಕ ಹೀಗೆಯೇ ಇರಬಹುದು. ಈ ಪ್ರಶ್ನೋತ್ತರದ ನಂತರ ರೋಗಿಗೆ ಗ್ಯಾಸ್ ತೊಂದರೆ ಇದೆ ಎಂದು ವೈದ್ಯರು ತೀರ್ಮಾನಿಸಬಹುದು. ಅಥವಾ ಅದನ್ನು ಖಾತ್ರಿಪಡಿಸಿಕೊಳ್ಳಲು ಅಗತ್ಯ ಪರೀಕ್ಷೆಗಳನ್ನು ಸೂಚಿಸಬಹುದು. ವೈದ್ಯವಿಜ್ಞಾನವನ್ನು ಕಲಿಯುತ್ತಿರುವ ವಿದ್ಯಾರ್ಥಿಗಳಿಗೆ ಇದೇ ಸನ್ನಿವೇಶವನ್ನು ಕೃತಕವಾಗಿ ಸೃಷ್ಟಿಸಿದರೆ ಹೇಗಿರುತ್ತದೆ? ಅದುವೇ ಮಿಥ್ಯಾವಾಸ್ತವ ರೋಗಿ ಅಥವಾ ಸರಳವಾಗಿ ಮಿಥ್ಯಾರೋಗಿ. ಇದನ್ನು ಇಂಗ್ಲಿಷಿನಲ್ಲಿ virtual patient ಎಂದು ಕರೆಯುತ್ತಾರೆ. ಬನ್ನಿ, ಈ ಸಂಚಿಕೆಯಲ್ಲಿ ಅದರ ಬಗ್ಗೆ ತಿಳಿಯೋಣ.

ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಮಿಥ್ಯಾವಾಸ್ತವ (virtual reality) ಎನ್ನುವುದು ದೊಡ್ಡ ಹೆಸರು. ಯಾವುದಾದರೊಂದು ವಸ್ತು, ದೃಶ್ಯ ಅಥವಾ ಕೆಲಸವನ್ನು ಮೂರು ಆಯಾಮಗಳಲ್ಲಿ ಕೃತಕವಾಗಿ ಸೃಷ್ಟಿಸಿದಂತೆ ಭ್ರಮೆ ಮೂಡಿಸುವುದಕ್ಕೆ ಮಿಥ್ಯಾವಾಸ್ತವ ಎನ್ನುತ್ತಾರೆ. ಉದಾಹರಣೆಗೆ ಕಟ್ಟಡಗಳ ಪ್ರತಿಕೃತಿ. ಮಿಥ್ಯಾವಾಸ್ತವ ವೀಕ್ಷಕವನ್ನು ಬಳಸಿ ನೋಡಿದರೆ ನೀವು ಕಟ್ಟಡದ ಒಳಗೆಲ್ಲ ಸುತ್ತಾಡಿದಂತೆ ನಿಮಗೆ ಭಾಸವಾಗುತ್ತದೆ. ನೀವು ಕೊಳ್ಳಲಿರುವ ಅಪಾರ್ಟ್‌ಮೆಂಟಿನ ಕೋಣೆಗಳು, ಅಡುಗೆ ಮನೆ, ಹಾಲ್ ಎಲ್ಲ ಹೇಗಿವೆ ಎಂದು ನೀವು ಮನೆಯಲ್ಲೇ ಕುಳಿತು ಮೂರು ಆಯಾಮದಲ್ಲಿ ವೀಕ್ಷಣೆ ಮಾಡಬಹುದು. ಇದೇ ತಂತ್ರಜ್ಞಾನದ ಮೂಲಕ ವೈದ್ಯಕೀಯ ವಿದ್ಯಾರ್ಥಿಗಳಿಗೆ ಶಸ್ತ್ರಚಿಕಿತ್ಸೆ ಮಾಡುವುದನ್ನು, ವಿಮಾನ ಚಾಲಕರಿಗೆ ವಿಮಾನ ಹಾರಿಸುವುದನ್ನು, ಆಟಗಳನ್ನು ಆಡುವುದು, ಇನ್ನೂ ಹಲವು ವಿಷಯಗಳ ಕಲಿಕೆಯಲ್ಲಿ ಇದನ್ನು ಬಳಸಲಾಗುತ್ತದೆ. ಈ ತಂತ್ರಜ್ಞಾನವನ್ನು ಮತ್ತು ಮಾಹಿತಿ ತಂತ್ರಜ್ಞಾನದ ಇತರೆ ಸವಲತ್ತುಗಳನ್ನು ಬಳಸಿ ಕೃತಕವಾಗಿ ರೋಗಿಯ ಸನ್ನಿವೇಶವನ್ನು ಸೃಷ್ಟಿಸಿದರೆ ಅದುವೇ ಮಿಥ್ಯಾವಾಸ್ತವ ರೋಗಿ ಅಥವಾ ಮಿಥ್ಯಾರೋಗಿ.

ಮಾಹಿತಿ ತಂತ್ರಜ್ಞಾನವನ್ನು ಬಳಸಿ ಪ್ರತಿಸ್ಪಂದನಾತ್ಮಕ ಪ್ರತ್ಯನುಕರಣೆಯ (interactive simulation) ಮೂಲಕ ವೈದ್ಯಕೀಯ ವಿದ್ಯಾರ್ಥಿಗಳಿಗೆ ವೈದ್ಯಕೀಯ ರೋಗ ಪತ್ತೆ ಹಚ್ಚುವಿಕೆ ಮತ್ತು ಚಿಕಿತ್ಸೆ ನೀಡುವಿಕೆಯ ಬಗೆಗೆ ಶಿಕ್ಷಣವನ್ನು ನೀಡುವ ವಿಧಾನಕ್ಕೆ ಮಿಥ್ಯಾರೋಗಿ ಎನ್ನುತ್ತಾರೆ. ಮಿಥ್ಯಾರೋಗಿ ಆಧುನಿಕ ತಂತ್ರಜ್ಞಾನ ಮತ್ತು ಆಟದ ಮೂಲಕ ಕಲಿಯುವುದನ್ನು ಸಮ್ಮಿಲನಗೊಳಿಸಿ ಸಾಂಪ್ರದಾಯಿಕ ಶಿಕ್ಷಣಕ್ಕೆ ಪೂರಕವಾಗಿ ಕೆಲಸ ಮಾಡುತ್ತದೆ. ಮಿಥ್ಯಾರೋಗಿಯಲ್ಲಿ ಹಲವು ವಿಧಾನಗಳಿವೆ. ಆದರೆ ಎಲ್ಲದರಲ್ಲೂ ಇರುವ ಸಮಾನ ಅಂಶವೆಂದರೆ ಪ್ರತಿಸ್ಪಂದನೆ.

ಒಂದು ವಿಧಾನದ ಮಿಥ್ಯಾರೋಗಿಯು ಈ ಲೇಖನದ ಪ್ರಾರಂಭದಲ್ಲಿ ನೀಡಿದ ಪ್ರಶ್ನೋತ್ತರದ ಮಾದರಿಯಲ್ಲಿ ಕೆಲಸ ಮಾಡುತ್ತದೆ. ಗಣಕದಲ್ಲಿ ಬೇರೆ ಬೇರೆ ರೋಗಿಗಳ ಜೊತೆ ನಡೆಸಿದ ಪ್ರಶ್ನೋತ್ತರಗಳ ದೊಡ್ಡ ಭಂಡಾರವಿರುತ್ತದೆ. ವೈದ್ಯಕೀಯ ವಿದ್ಯಾರ್ಥಿ ಈ ಮಿಥ್ಯಾರೋಗಿಗೆ ಅಂದರೆ ಗಣಕಕ್ಕೆ ಪ್ರಶ್ನೆಗಳನ್ನು ಕೇಳುತ್ತಾನೆ/ಳೆ. ಮಿಥ್ಯಾರೋಗಿ ಉತ್ತರಗಳನ್ನು ನೀಡುತ್ತ ಹೋಗುತ್ತದೆ. ಇವು ಬಹುತೇಕ ನೈಜ ಸನ್ನಿವೇಶವನ್ನೇ ಪ್ರತ್ಯನುಕರಣೆಯ ಮೂಲಕ ಸೃಷ್ಟಿ ಮಾಡುತ್ತವೆ. ಮಿಥ್ಯಾರೋಗಿ ನೀಡುತ್ತ ಹೋದ ಉತ್ತರಗಳ ಆಧಾರದಲ್ಲಿ ವಿದ್ಯಾರ್ಥಿಯು ರೋಗ ಯಾವುದಿರಬಹುದೆಂಬ ತೀರ್ಮಾನಕ್ಕೆ ಬರಬೇಕು. ನಂತರ ನೀಡಬಹುದಾದ ಔಷಧಿ ಹಾಗೂ ಚಿಕಿತ್ಸೆಯ ವಿಧಾನವನ್ನೂ ಸೂಚಿಸಬೇಕು. ರೋಗಿಗೆ ಮಾಡಬೇಕಾದ ಪರೀಕ್ಷೆಗಳನ್ನೂ ಸೂಚಿಸಬೇಕು. ಇವುಗಳು ಎಷ್ಟರ ಮಟ್ಟಿಗೆ ಸರಿ ಎಂದು ಗಣಕ ನಿರ್ಧರಿಸಿ ವಿದ್ಯಾರ್ಥಿ ಎಷ್ಟು ಮಟ್ಟಿಗೆ ಸರಿ ಎಂದು ತಿಳಿಸುತ್ತದೆ.

ಕೆಲವು ಸಂದರ್ಭಗಳಲ್ಲಿ ಮಿಥ್ಯಾರೋಗಿ ಅಂದರೆ ಗಣಕವು ರೋಗಿಯ ಮೇಲೆ ಬೇರೆ ಬೇರೆ ವೈದ್ಯಕೀಯ ಪರೀಕ್ಷೆಗಳನ್ನು ನಡೆಸಿದರೆ ಬರಬಹುದಾದ ಫಲಿತಾಂಶಗಳನ್ನು ತೋರಿಸುತ್ತದೆ. ಉದಾಹರಣೆಗೆ ಮಿಥ್ಯಾರೋಗಿ ತಾನು ಹೃದಯ ಸಂಬಂಧಿ ಕಾಯಿಲೆಯಿಂದ ಬಳಲುತ್ತಿದ್ದೇನೆ ಎಂದು ಸೂಚಿಸುತ್ತಿದೆ. ಆಗ ಅದು ಇಸಿಜಿ ಮಾಡಲು ಸೂಚಿಸುತ್ತದೆ. ನಂತರ ಹೃದಯದ ತೊಂದರೆ ಇರುವವರಿಗೆ ಇಸಿಜಿ ಮಾಡಿದರೆ ದೊರೆಯುವಂತಹ ಫಲಿತಾಂಶವನ್ನು ತೋರಿಸುತ್ತದೆ. ಆಗ ವೈದ್ಯಕೀಯ ವಿದ್ಯಾರ್ಥಿಯು ಈ (ಮಿಥ್ಯಾ)ರೋಗಿಗೆ ಹೃದಯದ ಕಾಯಿಲೆ ಇದೆ, ಇದಕ್ಕೆ ಇಂತಹ ಚಿಕಿತ್ಸೆ ಮಾಡಬೇಕು ಎಂದು ಉತ್ತರಿಸಬೇಕು. ಬೇರೆ ಉತ್ತರ ನೀಡಿದರೆ ವಿದ್ಯಾರ್ಥಿ ಫೇಲು. ಇದು ಒಂದು ಉದಾಹರಣೆ ಮಾತ್ರ. ಮಿಥ್ಯಾರೋಗಿ ತಂತ್ರಾಂಶದಲ್ಲಿ ಮನುಷ್ಯರಿಗೆ ಬರಬಹುದಾದ ಬಹುತೇಕ ಕಾಯಿಲೆಗಳ ಲಕ್ಷಣ, ಪರೀಕ್ಷೆ, ಚಿಕಿತ್ಸೆ, ಔಷಧಿ ಇವೆಲ್ಲವುಗಳ ಮಾಹಿತಿಯ ಅತಿ ದೊಡ್ಡ ಭಂಡಾರವೇ ಇರುತ್ತದೆ.

ಮಿಥ್ಯಾರೋಗಿ ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ ಗ್ರಾಫಿಕ್ಸ್ ಅನ್ನೂ ಬಳಸಬಹುದು. ಅದೂ ಪ್ರತಿಸ್ಪಂದನಾತ್ಮಕವಾಗಿರುತ್ತದೆ. ಈ ವಿಧಾನದಲ್ಲಿ ಗಣಕದ ಪರದೆಯ ಮೇಲೆ ಗಣಕ ರೂಪಿಸುವ ರೋಗಿಯ ಚಿತ್ರ ಮೂಡಿಬರುತ್ತದೆ. ಅದನ್ನು ನಿಜವಾದ ರೋಗಿಯನ್ನು ಮಾಡುವಂತೆ ಪರೀಕ್ಷೆ ಮಾಡಬಹುದು. ಅದಕ್ಕಾಗಿ ಮೌಸ್ ಮೂಲಕ ತಿರುಗಿಸುವ, ಕೃತಕವಾಗಿ ಮುಟ್ಟುವ, ಪರಿಶೀಲಿಸುವ ಸವಲತ್ತುಗಳಿರುತ್ತವೆ. ವಿದ್ಯಾರ್ಥಿಯು ನಿಜವಾದ ರೋಗಿಯನ್ನು ಪರೀಕ್ಷೆ ಮಾಡುವಂತೆ ಈ ಮಿಥ್ಯಾರೋಗಿಯನ್ನು ಪರೀಕ್ಷೆ ಮಾಡಬೇಕು. ರೋಗಿಯನ್ನು ಹಿಂದೆ ಮುಂದೆ ಮಾಡಿ, ತಿರುಗಿಸಿ, ಬೇಕಾದ ಕಡೆ “ಮುಟ್ಟಿ” ಪರಿಶೀಲಿಸಿದಾಗ ಗಣಕದ ಪರದೆಯ ಮೇಲೆ ಆ (ಮಿಥ್ಯಾ)ರೋಗಿ ಯಾವ ಕಾಯಿಲೆಯಿಂದ ನರಳುತ್ತಿದ್ದಾನೆಯೋ ಅದಕ್ಕೆ ಸಂಬಂಧಿಸಿದ ಫಲಿತಾಂಶಗಳನ್ನು ತೋರಿಸುತ್ತದೆ. ಉದಾಹರಣೆಗೆ ಹೊಟ್ಟೆಯ ಭಾಗವನ್ನು ಮೌಸ್ ಮೂಲಕ ತಲುಪಿ ಅದನ್ನು ಒತ್ತಿದರೆ, ಅಂದರೆ ಮೌಸ್ ಅನ್ನು ಕ್ಲಿಕ್ ಮಾಡಿದರೆ, ಪರದೆಯಲ್ಲಿ ನೋವು ಎಂದು ತೋರಿಸುತ್ತದೆ. ಆಗ ವಿದ್ಯಾರ್ಥಿಯು ಈ ರೋಗಿಗೆ ಹೊಟ್ಟೆನೋವು ಇದೆ ಎಂದು ತೀರ್ಮಾನಿಸಬೇಕು. ಇದು ಒಂದು ಚಿಕ್ಕ ಅತಿ ಸರಳ ಉದಾಹರಣೆ ಮಾತ್ರ. ನಿಜ ಸಂದರ್ಭದಲ್ಲಿ ಇದು ಇಷ್ಟು ಸರಳವಾಗಬೇಕಿಲ್ಲ.

ಮಿಥ್ಯಾರೋಗಿಗೆ ಶಸ್ತ್ರಚಿಕಿತ್ಸೆಯನ್ನೂ ಮಾಡಬಹುದು. ಹೊಲಿಗೆಗಗಳನ್ನು ಹಾಕಬಹುದು. ಬ್ಯಾಂಡೇಜ್ ಅಂಟಿಸಬಹುದು. ಕಾಯಿಲೆ ಕಡಿಮೆಯಾದಾಗ ಬ್ಯಾಂಡೇಜು ತೆಗೆಯಬಹುದು, ಹೊಲಿಗೆ ತೆಗೆಯಬಹುದು. ಹೀಗೆ ಹಲವು ರೀತಿಯಲ್ಲಿ ವೈದ್ಯಕೀಯ ವಿದ್ಯಾರ್ಥಿಗಳಿಗೆ ಪರಂಪರಾಗತ ಕಲಿಯುವಿಕೆಗೆ ಪೂರಕವಾಗಿ ಮಿಥ್ಯಾರೋಗಿ ತಂತ್ರಜ್ಞಾನವು ಸಹಾಯ ಮಾಡುತ್ತದೆ.         

–ಡಾ| ಯು.ಬಿ. ಪವನಜ

gadgetloka @ gmail . com

The post ಮಿಥ್ಯಾವಾಸ್ತವ ರೋಗಿ first appeared on Vishva Kannada.

ಅಮೆರಿಕದ ಡಿಜಿಸೆಂಟ್ ಟೆಕ್ನಾಲೋಜಿ ಎಂಬ ಕಂಪೆನಿ ಈ ತಂತ್ರಜ್ಞಾನವನ್ನು ಬಳಸಿ ಐಸ್ಮೆಲ್ ಎಂಬ ಸಾಧನವನ್ನು ತಯಾರಿಸಿದೆ. ಇದು ಬಹುಮಟ್ಟಿಗೆ ಗಣಕದ ಪರದೆಯ ರೀತಿಯಲ್ಲೇ ಇದೆ. ಇದನ್ನು ಗಣಕದ ಪರದೆಯ ಮೇಲೆ ಅಳವಡಿಸಬೇಕು. ಇದರ ನಾಲ್ಕು ಮೂಲೆಗಳಲ್ಲಿ ವಾಸನೆಯನ್ನು ಸೃಷ್ಟಿಸುವ ಅಂಗಗಳಿವೆ. ಇವು ಗಣಕ ನೀಡಿದ ಆದೇಶವನ್ನು ಅವಲಂಬಿಸಿ ಸೂಕ್ತವಾದ ವಾಸನೆಯನ್ನು ಹೊರಹೊಮ್ಮಿಸುತ್ತವೆ. ತಂತ್ರಜ್ಞಾನದ ಮೂಲಕ ದೃಶ್ಯ ಅಥವಾ ಧ್ವನಿಯನ್ನು ಸೃಷ್ಟಿಸುವುದಕ್ಕೂ ವಾಸನೆಯನ್ನು ಸೃಷ್ಟಿಸುವುದಕ್ಕೂ ತುಂಬ ವ್ಯತ್ಯಾಸವಿದೆ. ದೃಶ್ಯವನ್ನು ವಿದ್ಯುತ್ಕಾಂತೀಯ ತರಂಗಗಳ ಮೂಲಕ ಹಾಗೂ ಧ್ವನಿಯನ್ನು ಧ್ವನಿ ತರಂಗಗಳ ಮೂಲಕ ಸೃಷ್ಟಿಸಲಾಗುತ್ತದೆ. ಆದರೆ ವಾಸನೆಯನ್ನು ಸೃಷ್ಟಿಸಲು ಆ ವಾಸನೆಯನ್ನು ಸೂಸುವ ಪದಾರ್ಥದ ಅಗತ್ಯವಿದೆ. ನಮ್ಮ ಮೂಗಿನೊಳಗೆ ಆ ಪದಾರ್ಥ ಅತಿ ಕಡಿಮೆ ಪ್ರಮಾಣದಲ್ಲಿ ಹೋದರೂ ನಮಗೆ ವಾಸನೆಯ ಗ್ರಹಿಕೆ ಆಗುತ್ತದೆ. ಪ್ರಮಾಣ ಅತಿ ಕಡಿಮೆ ಇರಬಹುದು. ಆದರೆ ಪದಾರ್ಥವನ್ನು ಮೂಗಿಗೆ ಕಳುಹಿಸುವುದು ಅಗತ್ಯ. ಬೆಳಕಿನಲ್ಲಿ ಮೂಲಭೂತವಾಗಿ ಇರುವುದು ಮೂರೇ ಬಣ್ಣಗಳು. ಅವುಗಳು – ಕೆಂಪು, ಹಸಿರು ಮತ್ತು ನೀಲಿ. ಈ ಬಣ್ಣಗಳನ್ನು ಬೇರೆ ಬೇರೆ ಪ್ರಮಾಣದಲ್ಲಿ ಮಿಶ್ರ ಮಾಡಿ ಲಕ್ಷಗಟ್ಟಲೆ ಬಣ್ಣಗಳನ್ನು ಗಣಕದ ಪರದೆಯ ಮೂಲೆ ಮೂಡಿಸಲಾಗುತ್ತದೆ. ವಾಸನೆಯಲ್ಲೂ ಕೆಲವು ಮೂಲಭೂತ ವಾಸನೆಗಳು ಮತ್ತು ಮಿಶ್ರಣದಿಂದ ಸೃಷ್ಟಿಸಲ್ಪಟ್ಟ ವಾಸನೆಗಳು ಇವೆ ಎಂಬುದನ್ನು ವಿಜ್ಞಾನಿಗಳು ಪತ್ತೆ ಹಚ್ಚಿದ್ದರು. ಈ ಸಿದ್ಧಾಂತವನ್ನು ಡಿಜಿಸೆಂಟ್‌ನವರು  ತಮ್ಮ ಐಸ್ಮೆಲ್‌ನಲ್ಲಿ ಬಳಸಿದ್ದರು. ಮೂಲಭೂತವಾದ ವಾಸನೆಗಳನ್ನು ಹೊರಹೊಮ್ಮಿಸುವ ಸುಮಾರು 128 ವಸ್ತುಗಳನ್ನು ಅವರು ಈ ಸಾಧನದಲ್ಲಿ ಅಳವಡಿಸಿದ್ದರು. ಗಣಕದಿಂದ ಬಂದ ಆದೇಶಕ್ಕೆ ಅನುಗುಣವಾಗಿ ಈ ಸಾಧನವು ಆ ವಸ್ತುಗಳನ್ನು ಬೇಕಾದ ಪ್ರಮಾಣದಲ್ಲಿ ಹೊರಸೂಸುತ್ತದೆ. ಇದರಿಂದ ನಮಗೆ ವಾಸನೆಯ ಗ್ರಹಿಕೆ ಆಗುತ್ತದೆ.

ಮೊತ್ತಮೊದಲಿಗೆ ಈ ನಮೂನೆಯ ತಂತ್ರಜ್ಞಾನ ಬಂದುದು ಸಿನಿಮಾಗಳಿಗೆ. ಒಂದು ಸಿನಿಮಾದಲ್ಲಿ ಬೇರೆ ಬೇರೆ ದೃಶ್ಯಗಳು ಬಂದಾಗ ಆಯಾ ದೃಶ್ಯಕ್ಕೆ ಸಂಬಂಧಿಸಿದ ವಾಸನೆಯನ್ನು ಥಿಯೋಟರಿನೊಳಗೆ ಹರಿಬಿಡಲಾಯಿತು. ಸಿನಿಮಾದಲ್ಲಿ ಒಬ್ಬಾತ ಮೀನು ಸುಟ್ಟು ತಿನ್ನುತ್ತಿರುವ ದೃಶ್ಯ ಬಂದಾಗ ಸುಟ್ಟ ಮೀನಿನ ವಾಸನೆ ಥಿಯೇಟರನ್ನು ತುಂಬಿತ್ತು. ಇದು ಜನಪ್ರಿಯವಾಗಲಿಲ್ಲ. ಥಿಯೇಟರಿನ ಹಿಂದಿನ ಸಾಲುಗಳಲ್ಲಿ ಕುಳಿತವರಿಗೆ ವಾಸನೆ ತಲುಪುವಾಗ ತಡವಾಗುತ್ತಿತ್ತು. ಪರದೆಯಲ್ಲಿ ದೃಶ್ಯ ಬಂದು ಹೋಗಿ ಸ್ವಲ್ಪ ಹೊತ್ತಾದ ನಂತರ ಆ ವಾಸನೆ ಅವರನ್ನು ತಲುಪುತ್ತಿತ್ತು. ಅಂತೂ ವಾಸನಾಭರಿತ ಸಿನಿಮಾ ಜಯಶಾಲಿಯಾಗಲಿಲ್ಲ.

ವಿದ್ಯುನ್ಮಾನ ವ್ಯಾಪಾರ ಅಂದರೆ ಇ-ಕಾಮರ್ಸ್‌ನಲ್ಲಿ ಈ ಡಿಜಿಟಲ್ ವಾಸನೆಯ ತಂತ್ರಜ್ಞಾನ ಸರಿಯಾಗಿ ಬಂದರೆ ಅದು ಒಂದು ಕ್ರಾಂತಿಯನ್ನೇ ಮಾಡಬಲ್ಲುದು. ನಾವು ಕೊಳ್ಳುವ ವಸ್ತುಗಳ ವಾಸನೆಯನ್ನು ನಾವು ಪರದೆಯಲ್ಲೇ ಗ್ರಹಿಸಿ ಅದನ್ನು ಕೊಳ್ಳಬೇಕೇ ಬೇಡವೇ ಎಂದು ತೀರ್ಮಾನಿಸಬಹುದು. ಇದು ಆಹಾರ, ಸೌಂದರ್ಯವರ್ಧಕಗಳು, ಸುಗಂಧ ದ್ರವ್ಯಗಳು, ಮಸಾಲೆ ಪುಡಿ, ಔಷಧ, ಪಾನೀಯಗಳು, ಹೀಗೆ ಹಲವು ವಸ್ತುಗಳ ಮಾರಾಟದಲ್ಲಿ ಪ್ರಯೋಜನಕಾರಿ. ಒಂದು ರೆಸ್ಟಾರೆಂಟ್ ತನ್ನ ಆಹಾರಗಳ ಮೆನು ಜೊತೆ ಅವುಗಳ ವಾಸನೆಯನ್ನೂ ವೀಕ್ಷಕನಿಗೆ ಪರದೆಯ ಮೂಲಕ ತಲುಪಿಸಿದರೆ ಆತನ ವ್ಯಪಾರ ತುಂಬ ಜಾಸ್ತಿಯಾಗಬಲ್ಲುದು.  ಗಣಕದಲ್ಲಿ ಆಟಗಳನ್ನು ಆಡುವಾಗಲೂ ಈ ತಂತ್ರಜ್ಞಾನವು ಹೆಚ್ಚಿನ ಒಂದು ಅನುಭವವನ್ನು ನೀಡಬಲ್ಲುದು. ಆಟದಲ್ಲಿ ಆಡುವಾತ ಕೊಚ್ಚೆ, ಗಲೀಜು ನೀರಿನ ಚರಂಡಿಯನ್ನು ದಾಟಬೇಕಾಗಿದೆ ಎಂದಿಟ್ಟುಕೊಳ್ಳಿ. ಆ ದೃಶ್ಯ ಬಂದಾಗ ಪರದೆಯಿಂದ ಚರಂಡಿಯ ವಾಸನೆ ಬಂದರೆ ಆಟ ಆಡುವ ಅನುಭವ ಪರಿಪೂರ್ಣವಾಗುತ್ತದೆ. ಈಗ ಬಳಕೆಯಲ್ಲಿರುವ ಮಿಥ್ಯಾವಾಸ್ತವ ತಂತ್ರಜ್ಞಾನಕ್ಕೆ (virtual reality) ಇದು ಪೂರಕವಾಗಬಲ್ಲುದು.  

ಐಸ್ಮೆಲ್‌ನಲ್ಲಿ ಪರದೆಯ ನಾಲ್ಕು ಮೂಲೆಗಳಲ್ಲಿ ನಾಲ್ಕು ವಾಸನೆಯನ್ನು ಸೂಸುವ ಸಾಧನಗಳನ್ನು ಅಳವಡಿಸಲಾಗಿತ್ತು. ಈ ಸಾಧನವು ಗಣಕದ ಆದೇಶದಂತೆ ಬೇರೆ ಬೇರೆ ವಾಸನೆಗಳನ್ನು ಸೂಸುತ್ತಿತ್ತು. ಈ ವಾಸನೆಗಳನ್ನು ಹೊರ ಸೂಸಲು ಅನಿಲಗಳನ್ನು ಬಳಸಲಾಗುತ್ತಿತ್ತು. ಈ ಸಾಧನವು ಒಂದು ಸ್ಪೀಕರಿನಷ್ಟು ದೊಡ್ಡದಿದ್ದು ಗಣಕಕ್ಕೆ ಯುಎಸ್‌ಬಿ ಕಿಂಡಿ ಮೂಲಕ ಜೋಡಣೆಯಗುತ್ತಿತ್ತು. ಇಂಕ್ ಜೆಟ್ ಪ್ರಿಂಟರಿನಲ್ಲಿ ಚಿಕ್ಕ ನೋಝಲ್ ಮೂಲಕ ಶಾಯಿ ಹೊರ ಸೂಸಿ ಕಾಗದದ ಮೇಲೆ ಚಿಮ್ಮಿ ಅಕ್ಷರ, ಚಿತ್ರಗಳನ್ನು ಮೂಡಿಸುತ್ತದೆ. ಈ ಐಸ್ಮೆಲ್ ಸಾಧನದಲ್ಲೂ ಚಿಕ್ಕ ಚಿಕ್ಕ ನೋಝಲ್ ಮೂಲಕ ವಾಸನೆಯನ್ನು ಸೃಷ್ಟಿಸುವ ರಾಸಾಯನಿಕ ಅನಿಲಗಳು ಹೊರಸೂಸುತ್ತಿದ್ದವು. ಮೂಲಭೂತ ವಾಸನೆಗಳನ್ನು ಸೃಷ್ಟಿಸುವ 128 ಬೇರೆ ಬೇರೆ ರಾಸಾಯನಿಕಗಳು ಐಸ್ಮೆಲ್ ಒಳಗೆ ಸಂಗ್ರಹವಾಗಿದ್ದವು. ಇವುಗಳ ಬೇರೆ ಬೇರೆ ಪ್ರಮಾಣದ ಮಿಶ್ರಣವು ಬೇರೆ ಬೇರೆ ವಾಸೆಗಳನ್ನು ಸೃಷ್ಟಿ ಮಾಡುತ್ತಿದ್ದವು. ನಾವು ಸಹಸ್ರಾರು ನಮೂನೆಯ ವಾಸನೆಗಳನ್ನು ಗ್ರಹಿಸಬಲ್ಲೆವು ಹಾಗೂ ಅವುಗಳನ್ನು ಯಾವು ಯಾವುದು ಎಂದು ಗುರುತಿಸಬಲ್ಲೆವು. ಆದರೆ ಐಸ್ಮೆಲ್ ಸಾಧನದಲ್ಲಿ ಮೂಲಭೂತವಾಗಿ 128 ರಾಸಾಯನಿಕಗಳಿದ್ದವು. ಅವುಗಳ ಮಿಶ್ರಣದಿಂದ ಸುಮಾರು 2000 ದಷ್ಟು ಬೇರೆ ಬೇರೆ ವಾಸನೆಗಳನ್ನು ಸೃಷ್ಟಿಸಬಹುದಾಗಿತ್ತು. ಆದರೂ ಅದು ಮಾನವನು ಗ್ರಹಿಸಬಲ್ಲ ವಾಸನೆಗಳಿಗೆ ಹೋಲಿಸಿದರೆ ಅತಿ ಚಿಕ್ಕ ಸಂಖ್ಯೆಯಾಗಿತ್ತು. ಹಾಗಿದ್ದರೂ ಅದೇನೂ ಚಿಕ್ಕ ಸಾಧನೆಯಾಗಿರಲಿಲ್ಲ. 

ಹಲವು ಕಾರಣಗಳಿಂದ ಡಿಜಿಸೆಂಟ್ ಟೆಕ್ನಾಲೋಜಿ ಕಂಪೆನಿ ಜಯ ಸಾಧಿಸಲಿಲ್ಲ ಹಾಗೂ ಐಸ್ಮೆಲ್ ಸಾಧನವು ಮಾರುಕಟ್ಟೆಯಲ್ಲಿ ಪೂರ್ಣ ಪ್ರಮಾಣದಲ್ಲಿ ಬರಲಿಲ್ಲ. ಆದರೆ ಈ ಸಿದ್ಧಾಂತವನ್ನು ಬಳಸಿ ಬೇರೆ ಯಾರಾದರೂ ಇನ್ನೊಮ್ಮೆ ಪ್ರಯತ್ನಿಸಿ ಜಯಶಾಲಿಯಾಗುವ ಸಾಧ್ಯತೆಗಳಿವೆ.

–ಡಾ| ಯು.ಬಿ. ಪವನಜ

gadgetloka @ gmail . com

The post ಡಿಜಿಟಲ್ ವಾಸನೆ first appeared on Vishva Kannada.

ವಿದ್ಯುನ್ಮಾನ ಮೂಗು ಎಂದರೆ ವಾಸನೆಯನ್ನು ಗ್ರಹಿಸಲು ಬಳಸುವ ಒಂದು ಇಲೆಕ್ಟ್ರಾನಿಕ್ ಸಾಧನ. ಮನುಷ್ಯರು ಯಾವ ರೀತಿ ವಾಸನೆಯನ್ನು ಗ್ರಹಿಸುತ್ತಾರೋ ಅದೇ ರೀತಿ ಇಲೆಕ್ಟ್ರಾನಿಕ್ ಸಾಧನ ಮೂಲಕ ವಾಸನೆಯನ್ನು ಗ್ರಹಿಸುವ ತಂತ್ರಜ್ಞಾನ ಇದಾಗಿದೆ. ಮನುಷ್ಯರ ಮೂಗಿನಲ್ಲಿ ವಾಸನೆಗೆ ಸ್ಪಂದಿಸುವ ಲಕ್ಷಗಟ್ಟಲೆ ಸಂವೇದಕಗಳಿವೆ. ಸಹಸ್ರಾರು ನಮೂನೆಯ ವಾಸನೆಗಳನ್ನು ಅವು ಪತ್ತೆ ಹಚ್ಚಬಲ್ಲವು. ವಿದ್ಯುನ್ಮಾನ ಮೂಗಿನಲ್ಲಿ ಅಷ್ಟೆಲ್ಲ ಸಂವೇದಕಗಳಿಲ್ಲ. ಅವುಗಳು ಅಷ್ಟೆಲ್ಲ ನಮೂನೆಯ ವಾಸನೆಗಳನ್ನು ಪತ್ತೆಹಚ್ಚಲೂ ಬಾರವು. ಆದರೂ ಅವುಗಳ ಉಪಯೋಗಗಳಿವೆ.

ಮನುಷ್ಯರು ಗ್ರಹಿಸಬಲ್ಲ ವಾಸನೆಗಳನ್ನು ಎಂಟು ವಿಭಾಗಗಳಾಗಿಸಬಹುದು. ಅವುಗಳೆಂದರೆ – ಮಣ್ಣು, ಹೂವು, ಹಣ್ಣು, ಮಸಾಲೆ, ಮೀನು, ಚರಂಡಿ ಗಲೀಜು, ಔಷಧಿ ಮತ್ತು ರಾಸಾಯನಿಕ. ಇವು ಪ್ರಮುಖ ವಿಭಾಗಗಳು. ಇವುಗಳೊಳಗೆ ಹಲವು ಉಪ ವಿಭಾಗಗಳಿವೆ. ಉದಾಹರಣೆಗೆ ಹೂವು ಎಂಬುದನ್ನು ತೆಗೆದುಕೊಳ್ಳೋಣ. ಕಣ್ಣು ಮುಚ್ಚಿ ಯಾವುದಾದರೊಂದು ಹೂವನ್ನು ನಮ್ಮ ಮೂಗಿನ ಮುಂದೆ ಹಿಡಿದರೆ ಅದು ಹೂವು ಎಂದು ಮಾತ್ರವಲ್ಲ -ಮಲ್ಲಿಗೆ, ಸಂಪಿಗೆ, ಗುಲಾಬಿ, ಇತ್ಯಾದಿಯಾಗಿ ಯಾವ ಹೂವು ಎಂದೂ ನಾವು ಗುರುತಿಸಬಲ್ಲೆವು. ನಮ್ಮ ಮೂಗಿನಲ್ಲಿರುವ ಲಕ್ಷಗಟ್ಟಲೆ ಸಂವೇದಕಗಳಲ್ಲಿ ಬೇರೆ ಬೇರೆ ವಾಸನೆಯನ್ನು ಗ್ರಹಿಸಲು ಬೇರೆ ಬೇರೆ ಸಂವೇದಕಗಳಿವೆ.

ವಿದ್ಯುನ್ಮಾನ ಮೂಗಿನಲ್ಲೂ ಹಲವಾರು ಸಂವೇದಕಗಳಿವೆ. ಬೇರೆ ಬೇರೆ ವಾಸನೆಗೆ ಬೇರೆ ಬೇರೆ ಸಂವೇದಕಗಳು ಸ್ಪಂದಿಸುತ್ತವೆ. ಇವು ಬಹುತೇಕ ವಿದ್ಯುತ್ತನ್ನು ಪ್ರವಹಿಸಬಲ್ಲ ಪಾಲಿಮರುಗಳಾಗಿರುತ್ತವೆ. ಬಹುತೇಕ ಸ್ಪಂಜಿನ ಮಾದರಿಯಲ್ಲಿರುತ್ತವೆ. ವಾಸನೆಯ ಗಾಳಿ ಅದರ ಮೇಲೆ ಹಾದಾಗ ಅದು ಉಬ್ಬುತ್ತದೆ. ಇದರಿಂದಾಗಿ ಅದರಲ್ಲಿ ಪ್ರವಹಿಸುವ ವಿದ್ಯುತ್ ಸಂಚಾರದಲ್ಲಿ ಏರುಪೇರಾಗುತ್ತದೆ. ಈ ಏರುಪೇರು ಯಾವ ವಾಸನೆಗೆ ಎಷ್ಟು ಎಂದು ಮೊದಲು ಅಳತೆ ಮಾಡಿ ನಿಗದಿ ಮಾಡಿರುತ್ತಾರೆ. ನಂತರ ಈ ಕೋಷ್ಟಕ ಬಳಸಿ ಯಾವ ವಾಸನೆ ಎಷ್ಟಿದೆ ಎಂದು ಮಾಪನ ಮಾಡುತ್ತಾರೆ.

ವಿದ್ಯುನ್ಮಾನ ಮೂಗುಗಳಲ್ಲಿ ಮೂರು ಅಂಗಗಳಿರುತ್ತವೆ. ಮೊದಲನೆಯದು ಯಾವುದರ ವಾಸನೆಯನ್ನು ಗ್ರಹಿಸಬೇಕೋ ಆ ವಸ್ತುವನ್ನು ಊಡಿಸುವ ಅಂಗ. ಊಡಿಕೆ ಗಾಳಿಯ ಅಥವಾ ಆವಿಯ ರೂಪದಲ್ಲಿರುತ್ತದೆ. ಘನ ವಸ್ತುಗಳ ವಾಸನೆಯನ್ನು ವಿದ್ಯುನ್ಮಾನ ಮೂಗು ಗ್ರಹಿಸಲಾರದು. ವಾಸನೆಯನ್ನು ಗ್ರಹಿಸಬೇಕಾದರೆ ಆ ವಸ್ತು ಸಂವೇದಕವನ್ನು ತಲುಪಬೇಕು. ಇದಕ್ಕಾಗಿ ಆ ವಸ್ತು ಆವಿಯ ರೂಪದಲ್ಲಿರಬೇಕು. ಇದು ಮಾನವರ ಮೂಗಿಗೂ ಅನ್ವಯಿಸುತ್ತದೆ. ಎರಡನೆಯ ಅಂಗ ವಾಸನೆಯನ್ನು ಗ್ರಹಿಸುವ ಅಂಗ. ಅದು ಹೇಗಿರುತ್ತದೆ ಎಂದು ಈಗಾಗಲೇ ವಿವರಿಸಿದ್ದೇನೆ. ಮೂರನೆಯ ಅಂಗ ಯಾವ ವಾಸನೆ ಎಷ್ಟಿದೆ ಎಂದು ಲೆಕ್ಕ ಹಾಕುವ ಅಂಗ ಅರ್ಥಾತ್ ಕಂಪ್ಯೂಟರ್.  

ಚಾಲಕರು ಹೆಂಡ ಕುಡಿದು ವಾಹನ ಚಲಾಯಿಸುತ್ತಿದ್ದಾರೋ ಎಂದು ರಸ್ತೆ ಬದಿಯಲ್ಲಿ ವಾಹನಗಳನ್ನು ಅಡ್ಡಗಟ್ಟಿ ಪೋಲೀಸರು ಪರೀಕ್ಷಿಸುತ್ತಾರಲ್ಲ? ಅದನ್ನು ವಿದ್ಯುನ್ಮಾನ ಮೂಗನ್ನು ಬಳಸಿ ಮಾಡುತ್ತಾರೆ. ಚಾಲಕರಿಗೆ ಒಂದು ಸಾಧನದ ಪೈಪಿಗೆ ಊದಲು ಹೇಳುತ್ತಾರೆ. ಹಾಗೆ ಊದಿದಾಗ ಬಾಯಿಯಿಂದ ಹೊರಬರುವ ಗಾಳಿ ಆ ಯಂತ್ರದೊಳಕ್ಕೆ ಹೋಗುತ್ತದೆ. ಆ ಯಂತ್ರವು ಮದ್ಯದ ವಾಸನೆಗೆ ಸ್ಪಂದಿಸುವ ಸಂವೇದಕವನ್ನು ಹೊಂದಿರುತ್ತದೆ. ಅಂದರೆ ಅದು ಬೇರೆ ವಾಸನೆಗಳನ್ನು ಗ್ರಹಿಸಲಾರದು. ಮದ್ಯದ ವಾಸನೆ ಆ ಗಾಳಿಯಲ್ಲಿ ಇದ್ದರೆ ಅಲ್ಲಿರುವ ಸಂವೇದಕವು ಸ್ಪಂದಿಸಿ ವಿದ್ಯುತ್ ಪ್ರವಾಹದಲ್ಲಿ ಏರಿಳಿತಗಳಾಗುತ್ತವೆ. ಈ ಏರಿಳಿತವನ್ನು ಅಳತೆಯ ಕೋಷ್ಟಕ ನೋಡಿ ತಾಳೆ ಹಾಕಿ ಎಷ್ಟು ಪ್ರಮಾಣದ ಮದ್ಯ ಊದಿದ ಗಾಳಿಯಲ್ಲಿದೆ ಎಂದು ಅದು ಲೆಕ್ಕ ಹಾಕಿ ತೋರಿಸುತ್ತದೆ. ಅದರ ಪ್ರಕಾರ ಪೋಲೀಸರು ಮುಂದಿನ ಕ್ರಮ ಕೈಗೊಳ್ಳುತ್ತಾರೆ. ಆ ಸಾಧನವು ಮದ್ಯದ ವಾಸನೆಗೆ ಮಾತ್ರ ಸ್ಪಂದಿಸುತ್ತದೆ. ಬೇರೆ ವಾಸನೆಯನ್ನು ಅದು ಗ್ರಹಿಸುವುದಿಲ್ಲ. ಬೇರೆ ವಾಸನೆ ಎಷ್ಟಿದ್ದರೂ ಅದರ ಗಣನೆಗೆ ಬರುವುದಿಲ್ಲ. ಅಂದರೆ ಮದ್ಯದ ವಾಸನೆ ಬರಬಾರದು ಎಂದು ಮದ್ಯ ಸೇವಿಸಿದವರು ಮಿಂಟ್, ಏಲಕ್ಕಿ ಇತ್ಯಾದಿ ತಿಂದರೂ ಪ್ರಯೋಜನವಿಲ್ಲ.

ಮನುಷ್ಯರು ಲಕ್ಷಗಟ್ಟಲೆ ವಿಧದ ವಾಸನೆಗಳನ್ನು ಗುರುತಿಸಬಲ್ಲರು, ಅವುಗಳನ್ನು ಗ್ರಹಿಸಬಲ್ಲರು. ಆದರೆ ವಿದ್ಯುನ್ಮಾನ ಮೂಗು ಗ್ರಹಿಸಬಲ್ಲ ವಾಸನೆಗಳು ನೂರನ್ನು ಮೀರಲಾರವು. ಆದರೂ ಅವುಗಳ ಉಪಯೋಗಗಳಿವೆ. ಒಂದು ಉಪಯೋಗವನ್ನು ಈಗಾಗಲೇ ವಿವರಿಸಿದ್ದೇನೆ. ಫ್ಯಾಕ್ಟರಿಗಳಲ್ಲಿ ತಯಾರಾಗುವ ರಾಸಾಯನಿಕ ವಸ್ತುಗಳ ಗುಣಮಟ್ಟವನ್ನು ಅಳೆಯಲು, ಉದ್ಯಮದಲ್ಲಿ ಬಳೆಕಯಾಗುವ (ಮೂಲ)ವಸ್ತುಗಳ ಗುಣಮಟ್ಟವನ್ನು ಅಳೆಯಲು, ಬೇರೆ ಬೇರೆ ಬ್ಯಾಚ್‌ಗಳಲ್ಲಿ ತಯಾರಾಗುವ (ರಾಸಾಯನಿಕ) ವಸ್ತುಗಳು ಒಂದೇ ಗುಣಮಟ್ಟವನ್ನು ಹೊಂದಿವೆ ಎಂದು ಖಾತ್ರಿಪಡಿಸಿಕೊಳ್ಳಲು, ರಾಸಾಯನಿಕ ವಸ್ತುಗಳಲ್ಲಿ ಆಗಿರಬಹುದಾದ ಪ್ರದೂಷಣವನ್ನು ಪರಿಶೀಲಿಸಲು, ಮಾಂಸ ಉದ್ದಿಮೆಯಲ್ಲಿ ತಯಾರಾಗುವ ಮಾಂಸದ ಗುಣಮಟ್ಟವನ್ನು ಪರಿಶೀಲಿಸಲು, ಹೀಗೆ ಹಲವು ರಿತಿಯಲ್ಲಿ ಉದ್ದಿಮೆಗಳಲ್ಲಿ ವಿದ್ಯುನ್ಮಾನ ಮೂಗನ್ನು ಬಳಕೆ ಮಾಡಬಹುದು. ವಿಮಾನ ನಿಲ್ದಾಣದಲ್ಲಿ ಪ್ರಯಾಣಿಕರ ಬ್ಯಾಗುಗಳಲ್ಲಿ ಪ್ರತಿಬಂಧಿತ ರಾಸಾಯನಿಕ ವಸ್ತುಗಳು, ಉದಾಹರಣೆಗೆ ಮಾದಕ ಔಷಧಿಗಳು, ಇದೆಯೋ ಎಂದು ಪರಿಶೀಲಿಸಲು, ಕ್ಯಾನ್ಸರ್ ಅನ್ನು ಪ್ರಾರಂಭಿಕ ಹಂತದಲ್ಲೇ ಪತ್ತೆ ಹಚ್ಚಲು, ಮಾನವರು ಪ್ರವೇಶಿಸಲು ಸಾಧ್ಯವಿಲ್ಲದ ರಾಸಾಯನಿಕ ವಸ್ತುಗಳು ಇರುವ ಪ್ರದೇಶದಲ್ಲಿ ಬಳಕೆ – ಹೀಗೆ ಹಲವು ರೀತಿಯಲ್ಲಿ ವಿದ್ಯುನ್ಮಾನ ಮೂಗಿನ ಬಳಕೆ ಆಗುತ್ತದೆ.

–ಡಾ| ಯು.ಬಿ. ಪವನಜ

gadgetloka @ gmail . com

The post ವಿದ್ಯುನ್ಮಾನ ಮೂಗು first appeared on Vishva Kannada.

ಯಾವುದೇ ಹೊಸತು ಬಂದ ಕೂಡಲೇ ಕೆಲವರು ಅದಕ್ಕೆ ಹಾರುವುದು ಸಹಜ. ಪ್ರಪಂಚವೆಲ್ಲ ಮುಂದಕ್ಕೆ ಹೋಗುತ್ತದೆ, ನಾನು ಹಿಂದೆ ಉಳಿದುಬಿಡುತ್ತೇನೆ ಎಂಬ ಭಯವು ಜನರನ್ನು ಹಾಗೆ ಮಾಡಿಸುತ್ತದೆ. ಇದು ತಂತ್ರಜ್ಞಾನ ಇರಲಿ ಹೊಸ ಹಣಕಾಸಿನ ವ್ಯವಹಾರವಿರಲಿ ಎಲ್ಲೆಡೆ ನಡೆಯುತ್ತಿದೆ. ಹಣಕಾಸು ಮತ್ತು ತಂತ್ರಜ್ಞಾನ ಒಟ್ಟು ಸೇರಿದರೆ? ಅದಕ್ಕೆ ಉತ್ತಮ ಉದಾಹರಣೆ ಗೂಢನಾಣ್ಯ. ಇವುಗಳ ಬಗ್ಗೆ ಇದೇ ಅಂಕಣದಲ್ಲಿ ಬರೆಯಲಾಗಿತ್ತು. ಎಲ್ಲಿ ಮನುಷ್ಯರಿರುತ್ತಾರೋ ಅಲ್ಲೆಲ್ಲ ಒಳ್ಳೆಯದು ಮತ್ತು ಕೆಟ್ಟದು ಇರುತ್ತವೆ. ಎಲ್ಲಿ ತನಕ ಮೋಸ ಹೋಗುವವರಿರುತ್ತಾರೋ ಅಲ್ಲಿ ತನಕ ಮೋಸ ಮಾಡುವವರಿರುತ್ತಾರೆ. ಈ ಲೇಖನದಲ್ಲಿ ಗೂಢನಾಣ್ಯದ ಕ್ಷೇತ್ರದಲ್ಲಿ ನಡೆಯುತ್ತಿರುವ ವಂಚನೆಗಳ ಬಗ್ಗೆ ತಿಳಿದುಕೊಳ್ಳೋಣ.

ಗೂಢನಾಣ್ಯ ಅರ್ಥಾತ್ ಕ್ರಿಪ್ಟೋಕರೆನ್ಸಿ ಎಂದರೆ ಬ್ಲಾಕ್‌ಚೈನ್ ತಂತ್ರಜ್ಞಾನವನ್ನು ಬಳಸಿ ನಡೆಯುವ ಒಂದು ವಿಕೇಂದ್ರಿತ ವಿತ್ತ ವ್ಯವಸ್ಥೆ. ಇದು ಡಿಜಿಟಲ್ ಹಣ. ಇದಕ್ಕೆ ಮುದ್ರಿತ ನೋಟು, ಭೌತಿಕ ನಾಣ್ಯಗಳು ಇಲ್ಲ. ಈ ಹಣವನ್ನು ಇಟ್ಟುಕೊಳ್ಳಲು ಒಂದು ಡಿಜಿಟಲ್ ವ್ಯಾಲೆಟ್ (ಪರ್ಸ್ ಎನ್ನಬಹುದು) ಇರುತ್ತದೆ. ಡಿಜಿಟಲ್ ಹಣವನ್ನು ಒಂದು ವ್ಯಾಲೆಟ್‌ನಿಂದ ಇನ್ನೊಂದಕ್ಕೆ ಅಂತರಜಾಲದ ಮೂಲಕ ವರ್ಗಾಯಿಸಲಾಗುತ್ತದೆ. ಅದರ ಬೆಲೆಯನ್ನೂ ವರ್ಗಾಯಿಸಲಾಗುತ್ತದೆ. ಈ ಎಲ್ಲ ವ್ಯವಹಾರಗಳೂ ಅಂತರಜಾಲದ ಮೂಲಕವೇ ನಡೆಯುತ್ತದೆ. ತುಂಬ ಜನಪ್ರಿಯವಾದ ಗೂಢನಾಣ್ಯ ಎಂದರೆ ಬಿಟ್‌ಕಾಯಿನ್. ಒಮ್ಮೆ ಇದರ ಬೆಲೆ ಒಂದು ಬಿಟ್‌ಕಾಯಿನ್‌ಗೆ ಸುಮಾರು 52 ಲಕ್ಷ ರೂ. ತನಕ ಹೋಗಿತ್ತು. ಈಗಿನ ಬೆಲೆ ಸುಮಾರು 15 ಲಕ್ಷ ರೂ. ಅಂದರೆ ಬಿಟ್‌ಕಾಯಿನ್‌ಗೆ ಹಣ ಹಾಕಿದವರಿಗೆ ಭರ್ಜರಿ ನಷ್ಟ. ಇದನ್ನು ಮೋಸ, ವಂಚನೆ ಎನ್ನುವಂತಿಲ್ಲ. ಶೇರು ಮಾರುಕಟ್ಟೆ  ಕೂಡ ಇದೇ ರೀತಿ ಮೇಲೆ ಕೆಳಗೆ ಹೋಗುತ್ತಿರುತ್ತದೆ. ಅದರಲ್ಲಿ ಹಣ ಹಾಕುವವರು ಈ ವಿಷಯ ಗೊತ್ತಿದ್ದೇ ಹಾಕಿರುತ್ತಾರೆ. ಆದರೆ ಗೂಢನಾಣ್ಯದ ಲೋಕದಲ್ಲಿ ಹಲವು ರೀತಿಯ ಮೋಸ ವಂಚನೆಗಳು ನಡೆಯುತ್ತಿವೆ . ಅವು ಯಾವುವು ಎಂದು ನೋಡೋಣ.

ಮೋಸದ ಕಿರುತಂತ್ರಾಂಶಗಳು (ಆಪ್‌)

ಗೂಢನಾಣ್ಯಗಳ ವ್ಯವಹಾರಕ್ಕೆ ಹಲವು ಜಾಲತಾಣಗಳು ಮತ್ತು ಆಪ್‌ಗಳಿವೆ. ಎಲ್ಲ ವಿಷಯಗಳಲ್ಲಿರುವಂತೆ ಇಲ್ಲೂ ಸಾಚಾ ಮತ್ತು ಮೋಸದ ಆಪ್‌ಗಳಿವೆ. ಈ ಮೋಸದ ನಕಲಿ ಆಪ್‌ಗಳೂ ಇತರೆ ಸಾಚಾ ಆಪ್‌ಗಳಂತೆಯೇ ಇರುತ್ತವೆ. ಅವುಗಳಲ್ಲೂ ಸಾಚಾ ಆಪ್‌ಗಳಂತೆ ಗೂಢನಾಣ್ಯಗಳನ್ನು ಇಟ್ಟುಕೊಳ್ಳಲು ವ್ಯಾಲೆಟ್ ಇರುತ್ತದೆ. ಈ ವ್ಯಾಲೆಟ್ ಅಂದರೆ ಡಿಜಿಟಲ್ ಪರ್ಸ್ ಎನ್ನಬಹುದು. ಗೂಢನಾಣ್ಯ ಎಂಬುದು ಒಂದು ಉದ್ದದ, ಬರಿಗಣ್ಣಿಗೆ ಅಸಂಬದ್ಧ ಎಂದು ಅನ್ನಿಸುವಂತಹ, ಪಠ್ಯಗಳ ಸರಪಣಿಯಾಗಿರುತ್ತದೆ. ಗೂಢನಾಣ್ಯದ ವ್ಯವಹಾರದಲ್ಲಿ ಬಳಸುವ ಪ್ರತಿ ವ್ಯಾಲೆಟ್‌ಗೂ ಒಂದು ಡಿಜಿಟಲ್ ವಿಳಾಸವಿರುತ್ತದೆ. ಆಪ್‌ಗಳಲ್ಲಿ ಬಳಕೆಯಾಗುವುದು ಆನ್‌ಲೈನ್ ವ್ಯಾಲೆಟ್. ಈ ವ್ಯಾಲೆಟ್‌ನಲ್ಲಿ ನೀವು ನಿಮ್ಮ ಗೂಢನಾಣ್ಯವನ್ನು ಸಂಗ್ರಹಿಸಿ ಇಡಬೇಕು. ಬೇಕಿದ್ದಾಗ ಮಾರಾಟ ಮಾಡಬಹುದು. ನಕಲಿ ಆಪ್‌ಗಳು ಈ ರೀತಿ ಹಣ ಇಟ್ಟುಕೊಂಡು ಒಂದು ದಿನ ಇದ್ದಕ್ಕಿದ್ದಂತೆ ನಾಪತ್ತೆಯಾಗುತ್ತವೆ. ಅದರಲ್ಲಿ ಇಟ್ಟವರ ಹಣ ಮಂಗಮಾಯ.  

ಫಿಶಿಂಗ್ ವಂಚನೆ

ಅಂತರಜಾಲದ ಮೂಲಕ ಜನರನ್ನು ಸೆಳೆದು ಅವರಿಂದ ಗೌಪ್ಯ ಮಾಹಿತಿಗಳನ್ನು ಪಡೆದುಕೊಳ್ಳುವುದಕ್ಕೆ ಫಿಶಿಂಗ್ ಎನ್ನುತ್ತಾರೆ. ಇದು ಸಾಮಾನ್ಯವಾಗಿ ಇಮೈಲ್ ಅಥವಾ ವಾಟ್ಸ್‌ಆಪ್ ಇತ್ಯಾದಿ ಸಂದೇಶದ ಮೂಲಕ ನಡೆಯುತ್ತದೆ. ಬಂದ ಸಂದೇಶದಲ್ಲಿ ಯಾವುದೋ ಕಾರಣ ನೀಡಿ ಹೆಚ್ಚಿನ ಮಾಹಿತಿಗೆ ಇಲ್ಲಿ ಕ್ಲಿಕ್ ಮಾಡಿ ಎಂದಿರುತ್ತದೆ. ಉದಾಹರಣೆಗೆ ನಿಮ್ಮ ಗೂಢನಾಣ್ಯ ವ್ಯವಹಾರದ ವ್ಯಾಲೆಟ್‌ನ್ನು ಇನ್ನೊಮ್ಮೆ ಖಾತರಿಪಡಿಸಿಕೊಳ್ಲಲು ಇಲ್ಲಿ ಕ್ಲಿಕ್ ಮಾಡಿ ಎಂದಿರುತ್ತದೆ. ಅಲ್ಲಿ ಕ್ಲಿಕ್ ಮಾಡಿದಾಗ ಅದು ನಿಮ್ಮ ಲಾಗಿನ್, ಪಾಸ್‌ವರ್ಡ್ ಕೇಳುತ್ತದೆ. ಅಲ್ಲಿ ಅವನ್ನು ನೀಡಿದಿರೋ ಅಲ್ಲಿಗೆ ಮುಗಿಯಿತು. ನಿಮ್ಮ ಹಣವನ್ನು ಅವರು ತಮ್ಮ ಖಾತೆಗೆ ವರ್ಗಾಯಿಸಿಕೊಳ್ಳುತ್ತಾರೆ. ಇದು ತುಂಬ ಸಾಮಾನ್ಯವಾದ ವಂಚನೆ. ಆದುದರಿಂದ ಅನುಮಾನಾಸ್ಪವಾದ ಆಪ್ ಅಥವಾ ಜಾಲತಾಣಗಳಲ್ಲಿ ನಿಮ್ಮ ಲಾಗಿನ್ ಪಾಸ್‌ವರ್ಡ್ ನೀಡಬೇಡಿ.

ಡಿಜಿಟಲ್ ಆಟ ಮತ್ತು ಸಂಗ್ರಹಗಳು

ಆನ್‌ಲೈನ್ ಆಟಗಳನ್ನು ಆಡುವವರಿಗೆ ಆಟದಲ್ಲಿಯ ಹಂತಗಳನ್ನು ದಾಟುವ ಅಂದರೆ ಹಂತಗಳನ್ನು ಗೆಲ್ಲುವ ಅತೀವ ಉತ್ಕಟತೆ ಇರುತ್ತದೆ. ಆಟದ ಪ್ರತಿ ಹಂತದಲ್ಲೂ ಏನೋ ಬಹುಮಾನ ದೊರೆಯುತ್ತದೆ. ಅವುಗಳನ್ನು ತಮ್ಮಂತೆಯೇ ಆಟದ ಹುಚ್ಚಿರುವವರಿಗೆ ತೋರಿಸಿ ಹೆಮ್ಮೆಪಟ್ಟುಕೊಳ್ಳುವ ಇರಾದೆ ಇರುತ್ತದೆ. ಅಂತಹವರನ್ನು ವಂಚಕರು ಆಮಿಶಗಳ ಮೂಲಕ ಸೆಳೆಯುತ್ತಾರೆ. ಯಾವುದೋ ಆಟದ ಯಾವುದೋ ಟ್ರೋಫಿಯನ್ನು ಆಮಿಶವಾಗಿ ತೋರಿಸುತ್ತಾರೆ. ಅದು ಬೇಕಿದ್ದರೆ ಇಂತಿಷ್ಟು ಬಿಟ್‌ಕಾಯಿನ್ ಕೊಡಬೇಕೆನ್ನುತ್ತಾರೆ. ಇದರ ಬಲೆಗೆ ಬಿದ್ದ ಕೆಲವರು ಗೂಢನಾಣ್ಯಗಳ ಮೂಲಕ ಹಣ ನೀಡಿ ಮೋಸಹೋಗುತ್ತಾರೆ.

ಹೊಸ ಹೊಸ ಗೂಢನಾಣ್ಯಗಳು

ಗೂಢನಾಣ್ಯಗಳು ಬ್ಲಾಕ್‌ಚೈನ್ ಎಂಬ ತಂತ್ರಜ್ಞಾನವನ್ನು ಬಳಸುತ್ತವೆ. ಇವೇ ಮಾದರಿಯಲ್ಲಿ ಇನ್ನೂ ಹಲವಾರಿವೆ. ಈ ತಂತ್ರಜ್ಞಾನ ಹೇಗಿದೆ ಎಂದರೆ ಯಾರು ಬೇಕಾದರೂ ತಮ್ಮದೇ ಆದ ಗೂಢನಾಣ್ಯ ಪ್ರಾರಂಭಿಸಬಹುದು. ಯಾವುದೇ ಕ್ಷೇತ್ರದಲ್ಲಿ ಮೊದಲು ನುಗ್ಗಿದವರಿಗೆ ಲಾಭ ಜಾಸ್ತಿ. ಇದೇ ತತ್ತ್ವವನ್ನು ಬಳಸಿ ಜನರನ್ನು ಸೆಳೆಯುತ್ತಾರೆ. ತಮ್ಮದೇ ಆದ ಹೊಚ್ಚ ಹೊಸ ಗೂಢನಾಣ್ಯ ಇದೆ. ಇದನ್ನು ಪ್ರಾರಂಭದಲ್ಲಿ ಅತಿ ಕಡಿಮೆ ಬೆಲೆಗೆ ನೀಡುತ್ತಿದ್ದೇವೆ, ನಂತರ ಬೆಲೆ ಜಾಸ್ತಿಯಾಗುತ್ತದೆ ಎಂದೆಲ್ಲ ನಂಬಿಸುತ್ತಾರೆ. ನಂಬಿ ಹಣ ಹಾಕಿದವರಲ್ಲಿ ಬಹುತೇಕ ಮಂದಿ ಹಣ ಕಳೆದುಕೊಂಡಿದ್ದಾರೆ. ಯಾಕೆಂದರೆ ಈ ಗೂಢನಾಣ್ಯಗಳಲ್ಲಿ ಬಹುತೇಕ ಮೋಸ. ಅವುಗಳು ಯಾವುದೇ ಬ್ಲಾಕ್‌ಚೈನ್ ಅಥವಾ ಅಂತಹುದೇ ತಂತ್ರಜ್ಞಾನವನ್ನು ಬಳಸುತ್ತಿಲ್ಲ. ಅವುಗಳಿಗೆ ಯಾವುದೇ ಅಧಿಕೃತ ಸ್ವೀಕೃತಿಯಿಲ್ಲ. ಅವುಗಳನ್ನು ಮಾರಲು ಆಗುವುದಿಲ್ಲ. ಅಂದರೆ ಹಾಕಿದ ಹಣ ಹೋಯಿತು. ಆದುದರಿಂದ ಹೆಸರೇ ಕೇಳದ ಗೂಢನಾಣ್ಯಗಳನ್ನು ಕೊಳ್ಳಲು ಹೋಗದಿರುವದೇ ಉತ್ತಮ.

ನೆಟ್‌ವರ್ಕ್ ಮಾರ್ಕೆಟಿಂಗ್

ನೆಟ್‌ವರ್ಕ್ ಮಾರ್ಕೆಟಿಂಗ್ ಕೇಳಿರಬಹುದು. ನೀವು ಮೊದಲು ಸ್ವಲ್ಪ ಹಣ ನೀಡಿ ಸದಸ್ಯರಾಗಬೇಕು. ನಂತರ ನಾಲ್ಕ, 8, 16 ಇತ್ಯಾದಿ ಸಂಖ್ಯೆಯಲ್ಲಿ ಸದಸ್ಯರನ್ನು ಮಾಡಬೇಕು. ಅವರು ನೀಡಿದ ಸದಸ್ಯತ್ವದಲ್ಲಿ ನಿಮಗೆ ಪಾಲು ಇರುತ್ತದೆ. ನಿಮಗೆ ಒಂದು ಕಿಟ್ ನಿಡಲಾಗುತ್ತದೆ. ಅದರಲ್ಲಿರುವ ವಸ್ತುಗಳನ್ನು ಮಾರಿದರೆ ಅದರ ಲಾಭ ನಿಮಗೆ. ಈಗ ಈ ಕಿಟ್‌ನಲ್ಲಿರುವ ವಸ್ತು ಭೌತಿಕ ವಸ್ತು ಆಗಿರದೆ ಬಿಟ್‌ಕಾಯಿನ್ ಮಾದರಿಯ ಯಾವುದೋ ಗೂಢನಾಣ್ಯ ಆಗಿದೆ ಎಂದಿಟ್ಟುಕೊಳ್ಳಿ. ಇದುವೇ ಗೂಢನಾಣ್ಯಗಳ ನೆಟ್‌ವರ್ಕ್ ಮಾರ್ಕೆಟಿಂಗ್. ಇಂದು ಒಂದು ರೀತಿಯ ಪಿರಮಿಡ್‌ನಂತೆ. ಅದರ ಕೆಳಭಾಗದಲ್ಲಿದ್ದವರು ಲಾಭ ಮಾಡುತ್ತಾರೆ. ಮೇಲುಭಾಗದಲ್ಲಿರುವವರು ಹಣ ಕಳೆದುಕೊಳ್ಳುತ್ತಾರೆ. ಇದರ ಕಡೆಗೆ ಗಮನ ಕೊಡದಿರುವುದೇ ಉತ್ತಮ.

ಇನ್ನೂ ರೀತಿಯ ಕೆಲವು ಮೋಸ ವಂಚೆನಗಳಿವೆ. ಒಂದು ಬಹುದೊಡ್ಡ ಹಗರಣ ಸುದ್ದಿಯಾಗಿತ್ತು. ಅವುಗಳ ಬಗೆಗೆ ವಿವರವಾಗಿ ಬರೆಯಲು ಪ್ರತ್ಯೇಕ ಲೇಖನವೇ ಬೇಕು.

–ಡಾ| ಯು.ಬಿ. ಪವನಜ

gadgetloka @ gmail . com

The post ಗೂಢನಾಣ್ಯ ವಂಚನೆ first appeared on Vishva Kannada.

ಅಂತರಜಾಲ ತಾಣಗಳು ಮತ್ತು ಅವುಗಳ ವಿಳಾಸ ಅಂದ ಕೂಡಲೆ ನಮಗೆ ನೆನಪಾಗುವುದು ಇಂಗ್ಲಿಷ್ ಭಾಷೆಯಲ್ಲಿರುವ www ನಿಂದ ಪ್ರಾರಂಭವಾಗುವ ವಿಳಾಸಗಳು. ಉದಾಹರಣೆಗೆ www.google.com, www.vishvakannada.com, ಇತ್ಯಾದಿ. ಇದರಲ್ಲಿ www ಅಂದರೆ world-wide web ಅಂದರೆ ವಿಶ್ವವ್ಯಾಪಿ ಜಾಲ. ಎರಡನೆಯ ಭಾಗ google ಅಥವಾ vishvakannada ಜಾಲತಾಣದ ಹೆಸರು. ಮೂರನೆಯ ಭಾಗ .com ಅಂದರೆ commercial ಎಂದು. ಇದು .net, .org, ಇತ್ಯಾದಿ ಮೂರಕ್ಷರದ ಅಥವಾ .in, .gov.in, ಇತ್ಯಾದಿ ಇರಬಹುದು. ಇಲ್ಲಿ .in ಅಂದರೆ India ಅಂದರೆ ಭಾರತ. ಈ ವಿಳಾಸಗಳು ಇಂಗ್ಲಿಷಿನಲ್ಲೇ ಯಾಕಿರಬೇಕು? ಪ್ರಪಂಚದಲ್ಲಿ ಸರಿಸುಮಾರು 6000 ಭಾಷೆಗಳಿವೆ. ಅವುಗಳಲ್ಲಿ ಇಂಗ್ಲಿಷ್ ಕೂಡ ಒಂದು ಭಾಷೆಯಷ್ಟೆ. ಹಾಗಿರುವಾಗ ಜಾಲತಾಣ ವಿಳಾಸಗಳು ಯಾಕೆ ಇಂಗ್ಲಿಷಿನಲ್ಲೇ ಇರಬೇಕು? ಹಾಗೇನು ಇಲ್ಲ. ಈಗ ಜಾಲತಾಣ ವಿಳಾಸಗಳು ಜಗತ್ತಿನ ಹಲವಾರು ಭಾಷೆಗಳಲ್ಲಿರಬಹುದು. ಇವುಗಳಲ್ಲಿ ಭಾರತೀಯ ಭಾಷೆಯೂ ಸೇರಿವೆ. ಅಂದರೆ ಈಗ ಭಾರತೀಯ ಭಾಷೆಗಳಲ್ಲೂ ಜಾಲತಾಣ ವಿಳಾಸ ಪಡೆದುಕೊಳ್ಳಬಹುದು. ಆದರೆ ಸದ್ಯಕ್ಕೆ ಅವು .ಭಾರತ, .भारत, .భారత, .ഭാരത, ಇತ್ಯಾದಿಗಳಿಗೆ ಮಾತ್ರ ಸೀಮಿತವಾಗಿದೆ. ಡೊಮೈನ್ ನೇಮ್‌ಗಳ ಈ ಭಾಗಕ್ಕೆ ಟಾಪ್ ಲೆವೆಲ್ ಡೊಮೈನ್ (Top Level Domain, TLD) ಎನ್ನುತ್ತಾರೆ. ಈ ಭಾಗದ .in ಗೆ ಪರ್ಯಾಯವಾದ .ಭಾರತ ಎಂಬುದು ಭಾರತೀಯ ಲಿಪಿಗಳಲ್ಲೂ ಲಭ್ಯ. ಈ ಡೊಮೈನ್‌ಗಳ ಬೆಲೆ ತುಂಬ ಇಲ್ಲ. ವರ್ಷಕ್ಕೆ ಸುಮಾರು ರೂ.500 ಆಗಬಹುದಷ್ಟೆ. ಇಂಗ್ಲಿಷಿನಲ್ಲಿ .news, .cooporation, .info, ಇತ್ಯಾದಿ ನಮಗೆ ಬೇಕಾದ ರೀತಿಯಲ್ಲಿ ಹೆಸರು ಪಡೆದುಕೊಳ್ಳಬಹುದು. ಭಾರತೀಯ ಭಾಷೆಗಳಿಗೆ ಈ ಸೌಲಭ್ಯ ಇನ್ನೂ ಬಂದಿಲ್ಲ. ಅಂದರೆ ಕನ್ನಡದಲ್ಲಿ .ಪತ್ರಿಕೆ, .ಮಾಧ್ಯಮ, .ಸುದ್ದಿ, .ಚಲನಚಿತ್ರ, ಇತ್ಯಾದಿ ನಮಗಿಷ್ಟಬಂದ ಟಾಪ್ ಲೆವೆಲ್ ಡೊಮೈನ್ ಪಡೆದುಕೊಳ್ಳುವ ಸೌಲಭ್ಯ ಬಂದಿಲ್ಲ.

ಜಾಲತಾಣ ವಿಳಾಸ ಕನ್ನಡದಲ್ಲಿ ಬಂದಾಗ ಅದರ ಜೊತೆ ಇಮೈಲ್ ಕೂಡ ಇರಬೇಕಲ್ಲ? ಅಂದರೆ ವಿಶ್ವಕನ್ನಡ.ಭಾರತ ಎಂಬ ಜಾಲತಾಣದ ಜೊತೆ ಪವನಜ@ವಿಶ್ವಕನ್ನಡ.ಭಾರತ ಇಮೈಲ್ ಸಾಧ್ಯವಿದೆ. ಅದು ಇದೆ ಕೂಡ. ಅದೇ ರೀತಿ ಇತರೆ ಇಮೈಲ್‌ಗಳೂ ಸಾಧ್ಯವಿದೆ. ಕರ್ನಾಟಕ ಸರಕಾರದ ಜಾಲತಾಣದ ವಿಳಾಸ ಕನ್ನಡದಲ್ಲೂ ಇದೆ. ಅದು ಕರ್ನಾಟಕ.ಸರ್ಕಾರ.ಭಾರತ. ಭಾರತದ ಬೇರೆ ರಾಜ್ಯಗಳು ಇದೇ ರೀತಿ ತಮ್ಮ ತಮ್ಮ ಭಾಷೆಗಳಲ್ಲಿ ತಮ್ಮ ಸರ್ಕಾರದ ಜಾಲತಾಣಗಳಿಗೆ ತಮ್ಮದೇ ಭಾಷೆಯಲ್ಲಿ ಜಾಲತಾಣ ವಿಳಾಸ ಪಡೆದುಕೊಂಡಿದ್ದಾರೋ ಎಂದು ನನಗೆ ಗೊತ್ತಿಲ್ಲ. ಕರ್ನಾಟಕ ಸರ್ಕಾರವು ಕನ್ನಡದಲ್ಲಿ ಜಾಲತಾಣ ವಿಳಾಸವನ್ನೆನೋ ಪಡೆದುಕೊಂಡಿದೆ. ಆದರೆ ಕನ್ನಡದಲ್ಲಿ ಇಮೈಲ್ ವಿಳಾಸ ಪಡೆದುಕೊಂಡಿದೆಯೋ ಎಂದು ನನಗೆ ಮಾಹಿತಿ ಇಲ್ಲ. ಕರ್ನಾಟಕ ಸರ್ಕಾರದ ಇ-ಆಡಳಿತ ವಿಭಾಗವನ್ನು ಈ ಬಗ್ಗೆ ವಿಚಾರಿಸಲು ಯಾವುದೇ ಉತ್ತರ ಬಂದಿಲ್ಲ.

ಮಾಹಿತಿ ತಂತ್ರಜ್ಞಾನದ ಹಲವು ಅಂಗಗಳಲ್ಲಿ ಅಂತರಜಾಲ, ಅದರೊಳಗೆ ಅಡಕವಾದ ವಿಶ್ವವ್ಯಾಪಿ ಜಾಲ, ಇಮೈಲ್ ಎಲ್ಲ ಸೇರಿವೆ. ಇವೆಲ್ಲದರ ನಡುವೆ ಪರಸ್ಪರ ಮಾಹಿತಿ ವರ್ಗಾವಣೆ ಆಗುತ್ತಿರುತ್ತದೆ. ಅದರಲ್ಲೂ ಪ್ರಮುಖವಾದುದು ಇಮೈಲ್. ಅಂತಾರಾಷ್ಟ್ರೀಯ ಡೊಮೈನ್ ನೇಮ್ (Internationalised Domain Name, IDN) ಎಂಬುದು ಈ ವ್ಯವಸ್ಥೆಯ ಒಂದು ಪ್ರಮುಖ ವಿಷಯವಾಗುತ್ತಿದೆ. ಅಂದರೆ ಇಂಗ್ಲಿಷ್ ಅಲ್ಲದೆ ಇತರೆ ಭಾಷೆಗಳಲ್ಲೂ ಜಾಲತಾಣ ವಿಳಾಸಗಳ ಬಳಕೆ. ಜಾಲತಾಣ ವಿಳಾಸ ಮತ್ತು ಇಮೈಲ್ ವಿಳಾಸಗಳು ಇಂಗ್ಲಿಷ್ ಅಲ್ಲದೆ ಇತರೆ ಭಾಷೆಗಳಲ್ಲೂ ಇರಬಹುದು ಎಂದೆನಲ್ಲ? ಇಲ್ಲಿ ಸ್ವಲ್ಪ ತೊಂದರೆ ಇನ್ನೂ ಉಳಿದುಕೊಂಡಿದೆ. ಹಲವು ಸಂವಹನ ತಂತ್ರಾಂಶಗಳು ಇನ್ನೂ ಹಳೆಯ ತಂತ್ರಜ್ಞಾನವನ್ನೇ ಬಳಸುತ್ತಿವೆ. ಅವುಗಳು ಇಂಗ್ಲಿಷ್ ಅಲ್ಲದ ಇತರೆ ವಿಳಾಸಗಳನ್ನು ಅರ್ಥ ಮಾಡಿಕೊಳ್ಳುವುದಿಲ್ಲ. ಇಂಗ್ಲಿಷ್ ಅಲ್ಲದ ವಿಳಾಸಗಳು ಯುನಿಕೋಡ್ ಬಳಸುತ್ತವೆ. ಹಳೆಯ ತಂತ್ರಾಂಶಗಳು ಯುನಿಕೋಡನ್ನು ಅರ್ಥ ಮಾಡಿಕೊಳ್ಳುವುದಿಲ್ಲ. ಇದರಿಂದಾಗಿ ಹಲವು ಇಮೈಲ್ ತಂತ್ರಾಂಶಗಳಲ್ಲಿ ಇಂಗ್ಲಿಷ್ ಅಲ್ಲದ ಇಮೈಲ್ ವಿಳಾಸವನ್ನು ಬಳಸಲು ಆಗುವುದಿಲ್ಲ.

ಜಾಲತಾಣ ವಿಳಾಸ ಮತ್ತು ಇಮೈಲ್ ವಿಳಾಸಗಳು ಯುನಿಕೋಡ್ ಬಳಸಿದಾಗ, ಅಂದರೆ ಇಂಗ್ಲಿಷ್ ಅಲ್ಲದೆ ಇತರೆ ಭಾಷೆಗಳನ್ನೂ ಬಳಸಿದಾಗ ಅವುಗಳನ್ನು ಅರ್ಥ ಮಾಡಿಕೊಂಡು ಸಮರ್ಥವಾಗಿ ಬಳಸಿಕೊಳ್ಳುವುದು ಎಲ್ಲ ಸಂದರ್ಭಗಳಲ್ಲಿ ಸಾಧ್ಯವಾದಾಗ ಅದನ್ನು universal acceptance ಎನ್ನುತ್ತಾರೆ. ಇದನ್ನು ಕನ್ನಡದಲ್ಲಿ ಸಾರ್ವತ್ರಿಕ ಸ್ವೀಕೃತಿ ಎನ್ನಬಹುದು. ಈ ಬಗ್ಗೆ ಐಕಾನ್‌ನಲ್ಲಿ ಒಂದು ವಿಭಾಗವಿದೆ. ಐಕಾನ್ ಎಂದರೆ ಇಂಟರ್‌ನೆಟ್ ಕಾರ್ಪೊರೇಶನ್ ಫಾರ್ ಅಸೈನ್ಡ್ ನೇಮ್ಸ್ ಆಂಡ್ ನಂಬರ್ಸ್ (Internet Corporation for Assigned Names and Numbers, ICANN).  ಇದೊಂದು ಸರಕಾರೇತರ, ಲಾಭ ನಷ್ಟಗಳಿಲ್ಲದ ಸಂಸ್ಥೆ. ಇದನ್ನು ಸಮುದಾಯದ ಜನರೇ ನಡೆಸುವುದು. ಇದಕ್ಕೆ ಯಾರು ಬೇಕಾದರೂ ಕೊಡುಗೆ ನೀಡಬಹುದು. ಜಗತ್ತಿನ ಎಲ್ಲ ಜಾಲತಾಣಗಳ ಹೆಸರುಗಳ ಉಸ್ತುವಾರಿ ಇದರ ಕೆಲಸ. ಐಕಾನ್‌ನಲ್ಲಿ ಸಾರ್ವತ್ರಿಕ ಸ್ವೀಕೃತಿಗಾಗಿ ಇರುವ ವಿಭಾಗವು ಈ ಬಗ್ಗೆ ಹಲವು ಕೆಲಸಗಳನ್ನು ಮಾಡುತ್ತಿದೆ. ಎಲ್ಲ ತಂತ್ರಾಂಶಗಳಲ್ಲಿ, ಜಾಲತಾಣಗಳನ್ನು ವೀಕ್ಷಿಸುವ ತಂತ್ರಾಂಶಗಳಲ್ಲಿ (ಬ್ರೌಸರುಗಳಲ್ಲಿ), ಇಮೈಲ್ ತಂತ್ರಾಂಶಗಳಲ್ಲಿ, ಪ್ರೋಗ್ರಾಮ್ಮಿಂಗ್ ಭಾಷೆಗಳಲ್ಲಿ, ಹೀಗೆ ತಂತ್ರಾಂಶ ಕ್ಷೇತ್ರದ ಹಲವು ಅಂಗಗಳಲ್ಲಿ ಸಾರ್ವತ್ರಿಕ ಸ್ವೀಕೃತಿ ಸರಿಯಾಗಿ ಕೆಲಸ ಮಾಡುತ್ತಿದೆಯೋ ಎಂದು ಪರಿಶೀಲಿಸುವುದು ಇದರ ಕೆಲಸ. ಹೀಗೆ ಪರಿಶೀಲಿಸಿ ಎಲ್ಲೆಲ್ಲಿ ಸುಧಾರಣೆ ಆಗಬೇಕು ಎಂದು ಸೂಚನೆಗಳನ್ನು ಆಯಾ ತಂತ್ರಾಂಶಗಳ ಒಡೆಯರಿಗೆ ಅದು ಕಾಲಕಾಲಕ್ಕೆ ನೀಡುತ್ತದೆ. ಮುಕ್ತ ತಂತ್ರಾಂಶವಾದರೆ ತಾನೆ ಹಣ ಖರ್ಚು ಮಾಡಿ ಅದನ್ನು ಸರಿಪಡಿಸುತ್ತದೆ. ಐಕಾನ್‌ನ ಸಾರ್ವತ್ರಿಕ ಸ್ವೀಕೃತಿ ವಿಭಾಗಕ್ಕೆ ಯಾರು ಬೇಕಾದರೂ ಸೇರಿಕೊಂಡು ತಮ್ಮಿಂದಾದ ಕೊಡುಗೆ ನೀಡಬಹುದು. ಅದರ ಕೆಲಸಗಳಲ್ಲಿ ಸಕ್ರಿಯವಾಗಿ ಭಾಗವಹಿಸಬಹುದು. ಅದು ಹೇಗೆ ಎನ್ನುತ್ತೀರಾ? ನಿಮಗೆ ಆಸಕ್ತಿ ಇದ್ದಲ್ಲಿ http://uasg.tech  ಜಾಲತಾಣಕ್ಕೆ ಭೇಟಿ ನೀಡಿ ಎಲ್ಲ ವಿವರಗಳನ್ನು ಓದಬಹುದು. ಅಲ್ಲಿ ಹೆಸರು ನೋಂದಾಯಿಸಿಕೊಳ್ಳಬಹುದು.

[ಲೇಖಕರು ಐಕಾನ್‌ನ ಸಾರ್ವತ್ರಿಕ ಸ್ವೀಕೃತಿ ವಿಭಾಗಕ್ಕೆ ಉಪಾಧ್ಯಕ್ಷರಾಗಿದ್ದವರು]

–ಡಾ| ಯು.ಬಿ. ಪವನಜ

gadgetloka @ gmail . com

The post ಜಾಲತಾಣ ವಿಳಾಸಗಳ first appeared on Vishva Kannada.

ಸಮಸ್ಯೆಯ ಪರಿಚಯ

ಕನ್ನಡದಲ್ಲಿ ವಿಜ್ಞಾನ ಸಂವಹನದ ಬಗ್ಗೆ ಲೇಖಕರ ನಡುವೆ ಚರ್ಚೆ ನಡೆದಿದೆ; ವಿದ್ಯಾರ್ಥಿಗಳೊಡನೆ ಮಾತುಕತೆ ಆಗಿದೆ; ಪ್ರಕಾಶಕರ ಜೊತೆ ವಾಗ್ವಾದಗಳಾಗಿವೆ. ಆದರೆ ನೇರವಾಗಿ ಓದುಗರ ಜೊತೆ ಸಂವಾದ ಆದಂತಿಲ್ಲ. ಕನ್ನಡದಲ್ಲಿ ವಿಜ್ಞಾನ ಸಾಹಿತ್ಯಕ್ಕೆ ಓದುಗರು ಎಲ್ಲಿದ್ದಾರೆ ಎಂದು ಕೂಡ ಸುಲಭವಾಗಿ ತಿಳಿಯುವುದಿಲ್ಲ. ಸಾಹಿತ್ಯ ಸಂತೆಗಳಲ್ಲಿ ವಿಜ್ಞಾನದ ಪುಸ್ತಕಗಳು ದೊರೆಯುವುದು ಕಡಿಮೆ. ಅಂತಹ ಮಳಿಗೆಗಳಲ್ಲಿ ಜನರೂ ಕಡಿಮೆ.

ಕನ್ನಡ ಪುಸ್ತಕೋದ್ಯಮ ಇನ್ನೂ ಒಳ್ಳೆಯ ಸ್ಥಿತಿಯಲ್ಲೇ ಇದೆ. ಪುಸ್ತಕ ಕೊಂಡು ಓದುವ ಕನ್ನಡಿಗರಿದ್ದಾರೆ. ವಾರಕ್ಕೆ ಏನಿಲ್ಲವೆಂದರೂ 25 ಹೊಸ ಪುಸ್ತಕಗಳು ಲೋಕಾರ್ಪಣವಾಗುತ್ತವೆ. ಕನ್ನಡ ಪುಸ್ತಕಗಳನ್ನು ಮಾರುವ ಮಳಿಗೆಗಳು ಚೆನ್ನಾಗಿ ನಡೆಯುತ್ತಿವೆ. ಕನ್ನಡ ಪುಸ್ತಕಗಳನ್ನು ಮಾತ್ರ ಪ್ರಕಾಶನ ಮಾಡುವ ಹಲವಾರು ಪ್ರಕಾಶಕರು ಒಳ್ಳೆಯ ವ್ಯವಹಾರ ಮಾಡುತ್ತಿದ್ದಾರೆ. ಎರಡು-ಮೂರು ದಿನಗಳ ಪುಸ್ತಕ ಸಂತೆಗಳಲ್ಲಿ, ಸಾಹಿತ್ಯ ಪರಿಷತ್ತಿನ ಸಮ್ಮೇಳನದಲ್ಲಿ ಕೋಟಿ ರೂಪಾಯಿ ಮೀರಿದ ಕನ್ನಡ ಪುಸ್ತಕಗಳ ವ್ಯಾಪಾರ ಆಗುತ್ತಿದೆ.

ಆದರೆ ಕನ್ನಡದ ವಿಜ್ಞಾನ ಸಾಹಿತ್ಯ ಈ ನಿಟ್ಟಿನಲ್ಲಿ ಸಮಾನಾಂತರ ಪ್ರಗತಿ ಸಾಧಿಸಿಲ್ಲ. ಕನ್ನಡದಲ್ಲಿ ವಿಜ್ಞಾನ ವಿಷಯಕ್ಕೆ ಸಂಬಂಧಿಸಿದ ಪುಸ್ತಕಗಳು ಪ್ರಕಟವಾಗುವುದೂ ಕಡಿಮೆ; ಮಾರಾಟ ಆಗುವುದು ಮತ್ತೂ ಕಡಿಮೆ. ಜಗತ್ತಿನ ಬೇರೆಲ್ಲ ವಿಷಯಗಳನ್ನೂ ಓದುವ ಕನ್ನಡ ಓದುಗರು ವಿಜ್ಞಾನ ಸಾಹಿತ್ಯದ ಕಡೆಗೆ ಮಾತ್ರ ಅಷ್ಟಾಗಿ ಒಲವು ತೋರದಿರಲು ಕಾರಣವೇನು?

ಈ ವಿಷಯವನ್ನು ಓದುಗರ ದೃಷ್ಟಿಯಿಂದ ವಿವೇಚಿಸಲು ಈ ಸರಣಿ. ಇಲ್ಲಿ ಮುಖ್ಯವಾಗಿ ಅಭಿಪ್ರಾಯ ವ್ಯಕ್ತಪಡಿಸಬೇಕಾದ್ದು ಓದುಗರು. ವಿಜ್ಞಾನ ಲೇಖಕರ ಅಭಿಪ್ರಾಯಗಳು ಇಲ್ಲದಿಲ್ಲ. ಆದರೆ ಕಾರಣಗಳನ್ನು ಓದುಗರ ದೃಷ್ಟಿಯಿಂದ ವಿವೇಚಿಸಬೇಕಾದ್ದು ವಿಜ್ಞಾನ ಲೇಖಕರ ಕರ್ತವ್ಯ. ಹೀಗಾಗಿ, ಎಲ್ಲ ವಿಜ್ಞಾನ ಲೇಖಕರು ತಮ್ಮ ನಿಲುವುಗಳ ಬದಲಿಗೆ ಓದುಗರ ಪ್ರಶ್ನೆಗಳಿಗೆ, ಅವರ ಅಭಿಪ್ರಾಯಗಳಿಗೆ, ಅವರ ಸಲಹೆಗಳಿಗೆ, ಅವರ ಆಗ್ರಹಗಳಿಗೆ, ಅವರು ಬಯಸುವ ಬರವಣಿಗೆಯ ವಿಧಾನಗಳ ಕಡೆಗೆ ಗಮನ ಕೊಡಬೇಕೆಂದು ವಿನಂತಿ.

ವಿಜ್ಞಾನ ಲೇಖನದಲ್ಲಿ ನಿರೂಪಣೆಯ ಶೈಲಿ

ಕನ್ನಡದ ವಿಜ್ಞಾನ ಲೇಖಕರು ನಿರೂಪಣೆಯ ಬಹುತೇಕ ಶೈಲಿಗಳನ್ನು ಬಳಸಿದ್ದಾರೆ. ಪಠ್ಯಪುಸ್ತಕದ ಗ್ರಾಂಥಿಕ, ಯಾಂತ್ರಿಕ ಶೈಲಿಯೇ ಬಹಳ ಪ್ರಚಲಿತ. ಕತೆಯ ಮೂಲಕ ವಿಜ್ಞಾನದ ಬೆಳವಣಿಗೆಯನ್ನು ವಿವರಿಸುವ ವಿಧಾನ; ದಶಕಗಳ ಹಿಂದೆ ದೂರದರ್ಶನದಲ್ಲಿ ಕನ್ನಡ ವಾರ್ತೆಗಳನ್ನು ಓದುತ್ತಿದ್ದಂತಹ ಪರಮ ನೀರಸ ಬರವಣಿಗೆ; ಸಂಭಾಷಣೆಯ ಮಾಧ್ಯಮದಿಂದ ವಿಷಯ ತಿಳಿಸುವ ಪದ್ಧತಿ; ಒಂದೆರಡು ಹಳೆಯ ಘಟನೆಗಳನ್ನು ತಿಳಿಸಿ, ಅದರಿಂದ ವರ್ತಮಾನದ ಬೆಳವಣಿಗೆಗೆ ಕೊಂಡಿ ಬೆಸೆಯುವ ಸಂವಿಧಾನ; ನೇರವಾಗಿ ಸಂಬಂಧವಿಲ್ಲದ ವಿಷಯವೊಂದರ ಅನ್ಯಾರ್ಥದ ಮೂಲಕ ಇಂದಿನ ವಿದ್ಯಮಾನಗಳ ಪರಿಚಯ; ನೇರಾನೇರ ಬುಲೆಟ್ ಪಾಯಿಂಟುಗಳಂತೆ ಒಂದರ ಕೆಳಗೊಂದು ಸಾಲು ಹಚ್ಚಿ ಮಾಹಿತಿ ನೀಡುವಿಕೆ; ಜಗತ್ತಿನ ಯಾವುದೋ ಭಾಗದಲ್ಲಿ ನಡೆದ ಘಟನೆಯೊಂದನ್ನು ಹಂತಹಂತವಾಗಿ ವಿವರಿಸುತ್ತಾ, ಅದರ ಹಿಂದಿನ ವಿಜ್ಞಾನವನ್ನು ಬಿಡಿಸಿ ಇಡುವ ಪತ್ತೇದಾರಿ ನಿರೂಪಣೆ – ಹೀಗೆ ಅನೇಕಾನೇಕ ವಿಧಾನಗಳ ಬಳಕೆ ವಿಜ್ಞಾನ ಸಂವಹನದಲ್ಲಿ ಆಗಿದೆ. ಆದರೆ ಯಾವುದೇ ಒಂದು ವಿಧಾನವೂ ಓದುಗರನ್ನು ಬಹಳ ಕಾಲ ಪಕ್ಕಾ ಹಿಡಿದಿಡುವಲ್ಲಿ ಯಶಸ್ಸು ಕಂಡಿಲ್ಲ.

ಹೀಗೇಕೆ ಆಗುತ್ತಿದೆ? ಓದುಗರು ಯಾವ ಹಂತದಲ್ಲಿ ಆಸಕ್ತಿ ಕಳೆದುಕೊಳ್ಳುತ್ತಿದ್ದಾರೆ? ಯಾವ ಮಟ್ಟದ ಮಾಹಿತಿ ಓದುಗರನ್ನು ಕನೆಕ್ಟ್ ಆಗುವಲ್ಲಿ ವಿಫಲವಾಗಿದೆ? “ಲೇಖನದಲ್ಲಿ ಈ ಸಾಲಿನವರೆಗೆ ಅರ್ಥವಾಗುತ್ತಿತ್ತು; ಆನಂತರ ಎಲ್ಲಾ ತಲೆಯ ಮೇಲಿಂದ ಹಾದುಹೋಯಿತು” ಎನ್ನುವ ಅಡ್ಡಗೆರೆ ಇದೆಯೇ? ಅನೇಕ ಮಾದರಿಗಳ ನಿರೂಪಣೆಯಲ್ಲಿ ಓದುಗರಿಗೆ ಇಷ್ಟವಾದದ್ದು ಯಾವುದು; ಆಗದೇ ಹೋದದ್ದು ಯಾವುದು? “ಇಂತಹ ವಿಷಯಕ್ಕೆ ಇಂತಹ ನಿರೂಪಣೆಯ ವಿಧಾನ ಸೂಕ್ತ” ಎನ್ನುವ ಮಾಹಿತಿ ಏನಾದರೂ ಉಂಟೇ? ಓದುಗರ ಆಸಕ್ತಿಯನ್ನು ಅಂತಿಮ ಸಾಲಿನವರೆಗೆ ಹಿಡಿದಿಟ್ಟುಕೊಂಡು ಸಂಪೂರ್ಣವಾಗಿ ಓದಿಸಿಕೊಂಡ ವಿಜ್ಞಾನ ಲೇಖನಗಳು ಯಾವುವು? ಯಾವ ರೀತಿಯಿಂದ ಅವು ಓದುಗರಿಗೆ ಕನೆಕ್ಟ್ ಆದವು? – ಇಂತಹ ಮಾಹಿತಿ ಪ್ರಾಯಶಃ ಯಾರ ಬಳಿಯೂ ಇಲ್ಲ. ವಿಜ್ಞಾನ ಲೇಖನಕ್ಕೆ ಇಷ್ಟೆಲ್ಲಾ ಪ್ರಾಧಾನ್ಯ ಕೊಡುವ ಮಾಧ್ಯಮಗಳೂ ಇಲ್ಲ. ಹೀಗಾಗಿ, ವಿಜ್ಞಾನ ಲೇಖನಕ್ಕೆ ಓದುಗರಿಂದ ನೇರವಾಗಿ ಫೀಡ್-ಬ್ಯಾಕ್ ಪಡೆಯುವ ವಿಧಾನವೇ ಸೂಕ್ತ.

ಓದುಗರು ನೆನಪಿನ ಅಂಗಳಕ್ಕೆ ಕೈ ಹಾಕಿದರೆ, ಈ ಹಿಂದೆ ಓದಿರಬಹುದಾದ ಯಾವ ವಿಜ್ಞಾನ ಲೇಖನ ಇಂದಿಗೂ “ಬಹಳ ಚೆನ್ನಾಗಿತ್ತು” ಎನಿಸಿಕೊಂಡಿತು? ಅನೇಕ ನಿರೂಪಣೆಯ ವಿಧಾನಗಳಲ್ಲಿ ಯಾವುದು ಹೆಚ್ಚು ಆಪ್ತ ಎನಿಸಿದೆ? ಇಂತಹ ಮಾಹಿತಿಯನ್ನು ಹೀಗೆ ಹೇಳಿದರೆ ಚೆನ್ನಾಗಿರುತ್ತದೆ ಎನ್ನುವ ಅಭಿಪ್ರಾಯ ಇದೆಯೇ? ದಯವಿಟ್ಟು ತಿಳಿಸಲು ವಿನಂತಿ.

ವಿಜ್ಞಾನ ಲೇಖನದಲ್ಲಿ ಪಾರಿಭಾಷಿಕ ಪದಗಳು

ವಿಜ್ಞಾನದ ಬರವಣಿಗೆಯ ಬಗ್ಗೆ ಇರುವ ಮೊದಲ ಮತ್ತು ಮುಖ್ಯ ಸಮಸ್ಯೆ ಪಾರಿಭಾಷಿಕ ಪದಗಳದ್ದು.

ವಿಜ್ಞಾನ ಇರುವುದು ಹಾಗೆಯೇ. ಅದು ನಿಂತಿರುವುದು ಕೆಲವು ತತ್ತ್ವಗಳ, ನಿಯಮಗಳ, ಲೆಕ್ಕಾಚಾರಗಳ, ಈಗಾಗಲೇ ವ್ಯವಸ್ಥಿತವಾಗಿ ಸಿದ್ಧವಾದ ಮಾಹಿತಿಗಳ ಮೇಲೆ. ಇಂತಹ ಸಂವಹನದಲ್ಲಿ ಪಾರಿಭಾಷಿಕ ಪದಗಳ ಬಳಕೆ ಕೆಲವೊಮ್ಮೆ ಅನಿವಾರ್ಯ. ಅವನ್ನು ಒಂದು ಭಾಷೆಯಿಂದ ಮತ್ತೊಂದು ಭಾಷೆಗೆ ಅರ್ಥ ಮುಕ್ಕಾಗದಂತೆ ಸರಳ ಪದಗಳನ್ನು ಬಳಸಿ ಹೇಳುವುದು ಸವಾಲು ಎನಿಸಿಕೊಳ್ಳುತ್ತದೆ.

ವಿಜ್ಞಾನ ಅಂತಲೇ ಅಲ್ಲ; ಪಾರಿಭಾಷಿಕ ಪದಗಳ ಬಳಕೆ ಎಲ್ಲೆಡೆಯೂ ಇದೆ. ಉದಾಹರಣೆಗೆ, ಸಂಗೀತದಲ್ಲಿ ಸ್ವರ, ರಾಗ, ಸ್ಥಾಯಿ, ತಾಳ, ಗತಿ, ಆರೋಹಣ-ಅವರೋಹಣ, ಗಮಕ, ಲಯ ಎಲ್ಲವೂ ಇರುತ್ತವೆ. ಆದರೆ, ಸಂಗೀತವನ್ನು ಕೇಳಿ ಆನಂದಿಸಲು ಇವುಗಳ ಜ್ಞಾನ ಇರಲೇಬೇಕೆಂದಿಲ್ಲ. ಇಂತಹ ಮಾಹಿತಿ ಇದ್ದವರು ಸಂಗೀತವನ್ನು ಮತ್ತಷ್ಟು ಆಸ್ವಾದಿಸಬಲ್ಲರು. ಹಾಗೆಂದ ಮಾತ್ರಕ್ಕೆ ಇದು ತಿಳಿಯದವರು ಸಂಗೀತದಿಂದ ದೂರಾಗಬೇಕೆಂದೇನೂ ಇಲ್ಲ.

ಮೂಲ ಪಾರಿಭಾಷಿಕ ಪದಗಳನ್ನು ಮತ್ತೊಂದು ಭಾಷೆಯಲ್ಲಿ ಟಂಕಿಸುವ ಅಗತ್ಯ ಇಲ್ಲದೆ ವಿಜ್ಞಾನ ಸಂವಹನ ಸಾಧ್ಯವೇ? ಬೇರೆ ಭಾಷೆಯ (ಗ್ರೀಕ್, ಲ್ಯಾಟೀನ್, ಸ್ಪಾನಿಷ್) ಪಾರಿಭಾಷಿಕ ಪದಗಳ ಬಳಕೆಯ ಅಗತ್ಯ ಬಂದಾಗ ಇಂಗ್ಲೀಷಿನ ಹಲವಾರು ಲೇಖಕರು ಹೊಸ ಇಂಗ್ಲೀಷ್ ಪದವನ್ನು ಟಂಕಿಸದೆಯೇ ಲೇಖನವನ್ನು ಸಾಧಿಸಿದ್ದಾರೆ. ಅವರು ಒಂದು ತತ್ತ್ವಕ್ಕೆ ಸರಳ ವಿವರಣೆ ನೀಡುತ್ತಾ ಸಾಗುತ್ತಾರೆ. ಎಲ್ಲೋ ಒಂದೆಡೆ “ಇದಕ್ಕೆ ಹೀಗೆನ್ನುತ್ತಾರೆ” ಎಂದು ಸೇರಿಸಿಬಿಡುತ್ತಾರೆ.

ಕನ್ನಡದಲ್ಲಿ ಪಾರಿಭಾಷಿಕ ಪದಗಳ ಸಮಸ್ಯೆ ಎರಡು ಬಗೆಯದ್ದು. ಹಳೆಯ ಕಾಲದ ಪಠ್ಯಪುಸ್ತಕ ನಿರ್ಮಾತೃಗಳು ತಮ್ಮ ಪ್ರಕಾಂಡ ಸಂಸ್ಕೃತ ಜ್ಞಾನವನ್ನು ಪ್ರದರ್ಶಿಸುತ್ತಾ ಎಲ್ಲ ವೈಜ್ಞಾನಿಕ ಪದಗಳಿಗೂ ಸಂಸ್ಕೃತ ಸಮಾಸಗಳನ್ನು ಬಳಸಿದ್ದಾರೆ. ಇದೊಂದೇ ಕಾರಣದಿಂದ ನೀರಿಳಿಯದ ಗಂಟಲಲ್ಲಿ ವಿಜ್ಞಾನ ತುರುಕಲಾಗದೇ ಕನ್ನಡ ಮಾಧ್ಯಮದ ಅದೆಷ್ಟೋ ಪ್ರತಿಭಾವಂತ ಮಕ್ಕಳು ವಿಜ್ಞಾನ ಬಿಟ್ಟು ಓಡಿಹೋಗಿದ್ದಾರೆ. ಅವರಲ್ಲಿ ಹಲವರು ಈಗಲೂ ವಿಜ್ಞಾನ ಸಾಹಿತ್ಯ ಓದದೇ ಸೇಡು ತೀರಿಸಿಕೊಳ್ಳುತ್ತಿದ್ದಾರೆ.

ಕಠಿಣ ಸಂಸ್ಕೃತ ಪದಗಳ ಬಳಕೆಗೆ ವಿರೋಧ ತೋರುವುದನ್ನು ಒಪ್ಪಬೇಕಾದ್ದೇ. ಸರಿಯಾಗಿ ಉಚ್ಛರಿಸಲೂ ಬಾರದ ಪದಗಳಿಗೆ ಶಿಕ್ಷಕರೇನು ಅರ್ಥ ಹೇಳಿಯಾರು? ಆದರೆ ಇದಕ್ಕೆ ಕೆಲವರು ಕಂಡುಕೊಂಡ ಪರ್ಯಾಯ ಇನ್ನೂ ದಿಗಿಲು ಹುಟ್ಟಿಸುವಂತಹದ್ದು – ಹೆಚ್ಚು ಜನರಿಗೆ ಪರಿಚಯವಿಲ್ಲದ ಪಕ್ಕಾ ಕನ್ನಡ ಪದಗಳನ್ನು ಬಳಸುವುದು. ಅದು ಮತ್ತೊಂದು ದಿಕ್ಕಿನಿಂದ ವಿಜ್ಞಾನ ಸಂವಹನವನ್ನು ಕಠಿಣಗೊಳಿಸುತ್ತಿದೆ.

ಇದಕ್ಕೆ ಪರಿಹಾರವೇನು? ಇಂಗ್ಲೀಷ್ ಪಾರಿಭಾಷಿಕ ಪದಗಳನ್ನು ಭಾಷಾಂತರ ಮಾಡದೆ ಹಾಗೆಯೇ ಉಳಿಸಿಕೊಳ್ಳೋಣ ಎನ್ನುತ್ತಾರೆ ಕೆಲವು ತಜ್ಞರು. ಜಲಜನಕವೂ ಬೇಡ; ನೀರಪ್ಪನೂ ಬೇಡ – ಹೈಡ್ರೋಜನ್ ಎನ್ನುವ ಪದವೇ ಇರಲಿ. ಹೇಗೂ ಭವಿಷ್ಯದಲ್ಲಿ ಮಕ್ಕಳ ಕಲಿಕೆಯ ಮಾಧ್ಯಮ ಬದಲಾದಾಗ ಇದೇ ಪದಗಳನ್ನು ಬಳಸಬೇಕಾಗುತ್ತದೆ. ಮೊದಲಿನಿಂದಲೂ ಆ ಪದಗಳ ಪರಿಚಯ ಇರುವುದು ಅನುಕೂಲ ಎನ್ನುವ ಮಾತು ಕೂಡ ಇದೆ.

ಪಾರಿಭಾಷಿಕ ಪದಗಳ ವಿಷಯದಲ್ಲಿ ವಿಜ್ಞಾನ ಲೇಖಕರ ಅಭಿಮತಕ್ಕಿಂತಲೂ ಓದುಗರ ಅಭಿಪ್ರಾಯ ಮುಖ್ಯವಾಗುತ್ತದೆ. ಓದುಗರು ವಿಜ್ಞಾನ ಲೇಖನ ಓದುವಾಗ ಪಾರಿಭಾಷಿಕ ಪದಗಳನ್ನು ಯಾವ ರೀತಿ ಬಳಸಬೇಕು ಎನ್ನುತ್ತೀರಿ? ಭಾಷಾಂತರ ಮಾಡದೆ ಮೂಲ ಪದಗಳನ್ನು ಉಳಿಸಿಕೊಳ್ಳುವುದು ಸೂಕ್ತವೇ? ಹೆಚ್ಚು ಪಾರಿಭಾಷಿಕ ಪದಗಳನ್ನು ಬಳಸದ, ಹೆಸರುಗಳಿಲ್ಲದೆ ಮೂಲಭೂತ ತತ್ತ್ವಗಳನ್ನು ಮಾತ್ರ ವಿವರಿಸುವ ಲೇಖನ ಓದುವುದು ಸುಲಭವೇ? ಈ ಸಮಸ್ಯೆಗೆ ಬೇರೆ ಯಾವುದಾದರೂ ಪರ್ಯಾಯ ಇದೆಯೇ? ನಿಮ್ಮ ಅಭಿಪ್ರಾಯ ತಿಳಿಸಿ.

ವಿಜ್ಞಾನ ಲೇಖನಗಳನ್ನು ಯಾರು ಬರೆಯಬೇಕು

ವಿಜ್ಞಾನ ಲೇಖನವನ್ನು ಆಯಾ ವಿಷಯ ತಜ್ಞರು ಮಾತ್ರ ಬರೆಯಬೇಕೇ ಅಥವಾ ವಿಜ್ಞಾನ ಸಂವಹನ ಸಾಮರ್ಥ್ಯ ಉಳ್ಳ ಯಾರು ಬೇಕಾದರೂ ಬರೆಯಬಹುದೇ? ಈ ಚರ್ಚೆ ವಿಜ್ಞಾನ ಲೇಖಕರ ನಡುವೆಯೇ ಹಲವಾರು ಬಾರಿ ಅನೇಕ ವೈಮನಸ್ಯಗಳಿಗೆ ದಾರಿಯಾಗಿದೆ. ವ್ಯಾಪಕ ಮಾರುಕಟ್ಟೆ ಇರುವ ಇಂಗ್ಲೀಷಿನಂತಹ ಭಾಷೆಗಳಲ್ಲಿ ಆಯಾ ವಿಷಯವನ್ನು ಮಾತ್ರ ಬರೆಯಬಲ್ಲ ವಿಜ್ಞಾನ ಲೇಖಕರು ಇದ್ದಾರೆ. ಆದರೆ ಇದೇ ಮಾತನ್ನು ದೇಶೀಯ ಭಾಷೆಗಳ ವಿಷಯದಲ್ಲಿ ಹೇಳಲಾಗದು. ಇಲ್ಲಿ ವಿಷಯ ತಜ್ಞರೇನೋ ಇದ್ದಾರೆ; ಆದರೆ ಅವರು ಸರಳ ಕನ್ನಡದಲ್ಲಿ ತಮ್ಮ ವೈಶಿಷ್ಟ್ಯದ ವಿಷಯವನ್ನು ಬರೆಯಲಾರರು.

ಒಳ್ಳೆಯ ವಿಜ್ಞಾನ ಸಂವಹನಕಾರರೂ ಇದ್ದಾರೆ. ಆದರೆ ಅವರಿಗೆ ಪ್ರತಿಯೊಂದೂ ವಿಷಯದಲ್ಲಿ ತಳಸ್ಪರ್ಷಿ ಜ್ಞಾನ ಇರಬೇಕೆಂದು ಬಯಸುವುದು ಅಸಂಗತ. ಇದರ ಜೊತೆಗೆ ಓದುಗ ವಲಯ ಎಂತಹದ್ದು? ಅವರ ಆಸಕ್ತಿಯ ಮಟ್ಟ ಏನು? ಯಾವ ಹಂತದವರೆಗೆ ಅವರಿಗೆ ವಿಷಯ ಗ್ರಹಿಸುವ ಸಾಮರ್ಥ್ಯ ಇದ್ದೀತು? – ಮೊದಲಾದ ಪ್ರಶ್ನೆಗಳ ಉತ್ತರವೂ ಸುಲಭವಲ್ಲ.

ಯಾವುದೇ ವಿಷಯದ ಮೂಲ ಸೂತ್ರಗಳನ್ನು, ಪರಿಚಯಾತ್ಮಕ ಪ್ರವೇಶವನ್ನು, ಒಂದು ಮಟ್ಟದವರೆಗಿನ ಮಾಹಿತಿ ಸಂವಹನವನ್ನು ಆಯಾ ವಿಷಯವನ್ನು ಬರೆಯಲು ಬಲ್ಲ ಯಾರು ಬೇಕಾದರೂ ಬರೆಯಬಹುದು. ಆದರೆ ಉನ್ನತ ಮಟ್ಟದ ಸಂವಹನ ವಿಷಯ ತಜ್ಞರೇ ಮಾಡುವುದು ಒಳಿತು. ಉದಾಹರಣೆಗೆ, ಹೃದಯ ಹೇಗೆ ಕೆಲಸ ಮಾಡುತ್ತದೆ ಎನ್ನುವುದನ್ನು ಜೀವವಿಜ್ಞಾನ ಬಲ್ಲ ಯಾರು ಬೇಕಾದರೂ ಬರೆಯಬಹುದು. ಆದರೆ ಹೃದಯಾಘಾತದ ಚಿಕಿತ್ಸೆಯ ಆಧುನಿಕ ವಿಧಾನಗಳನ್ನು ಆ ಕ್ಷೇತ್ರದಲ್ಲಿ ಕೆಲಸ ಮಾಡುವ ತಜ್ಞ ವೈದ್ಯರು ಬರೆದರೆ ಮಾತ್ರ ಅದಕ್ಕೆ ಮೌಲ್ಯ ಹೆಚ್ಚು. ಇದಾಗದಿದ್ದಲ್ಲಿ ಲೇಖನದಲ್ಲಿ ಅಂತಹ ತಜ್ಞರ ಸಹಭಾಗಿತ್ವ ಇರುವುದು ಅಪೇಕ್ಷಣೀಯ. ದೇಶೀಯ ಭಾಷೆಗಳಲ್ಲಿ ಅರ್ಥವಾಗುವಂತೆ ಬರೆಯಬಲ್ಲ ವಿಷಯ ತಜ್ಞರು ದೊರೆಯುವುದು ಕಷ್ಟದ ಕೆಲಸ.

ಈ ಚರ್ಚೆಗೆ ಅರ್ಥ ಬರುವುದು ಓದುಗರು ಯಾವ ಮಟ್ಟದವರೆಗೆ ಮಾಹಿತಿ ಬಯಸುತ್ತಾರೆ ಎನ್ನುವುದರ ಆಧಾರದ ಮೇಲೆ. ಓದುಗರ ಒಲವು ಕೇವಲ ಮೂಲಭೂತ ವಿಷಯಗಳನ್ನು ಚೆನ್ನಾಗಿ ಅರಿಯುವತ್ತ ಇದ್ದರೆ, ಅದನ್ನು ಸರಳವಾಗಿ ನಿರೂಪಿಸಬಲ್ಲ ಸಂವಹನಕಾರರು ಗೆಲ್ಲುತ್ತಾರೆ. ಆದರೆ ಕೆಲವೊಮ್ಮೆ ಓದುಗರಿಗೆ ಅತ್ಯಂತ ನಿಖರವಾದ, ಅತ್ಯಾಧುನಿಕ ಮಾಹಿತಿಯನ್ನೂ ಒದಗಿಸಬೇಕಾಗುತ್ತದೆ. ಅಂತಹ ವೇಳೆ ತಜ್ಞರ ಒಡಗೂಡಿ ಪಕ್ಕಾ ಮಾಹಿತಿಯನ್ನು ಮನರಂಜನೀಯವಾಗಿ ವಿವರಿಸಬಲ್ಲ ಲೇಖಕರು ದೊರಕಿದರೆ ಪ್ರಾಯಶಃ ಸಂವಹನ ಹೆಚ್ಚು ಜನರನ್ನು ಮುಟ್ಟುತ್ತದೆ. ಆದರೆ ಮಿತವಾದ ಸಂಖ್ಯೆಯ ವಿಜ್ಞಾನ ಲೇಖಕರಿರುವ ನಮ್ಮಂತಹ ಭಾಷೆಯಲ್ಲಿ ಈ ರೀತಿಯ ಸಹಭಾಗಿತ್ವ ಅಷ್ಟೇನೂ ಸುಲಭವಲ್ಲ!

ಕನ್ನಡದಲ್ಲಿ ಚಾಲ್ತಿಯಲ್ಲಿರುವ ವಿಜ್ಞಾನ ಪತ್ರಿಕೆಗಳು

ಕನ್ನಡದ ವಿಜ್ಞಾನ ಪತ್ರಿಕೆಗಳಿಗೆ ಒಂದು ಶತಮಾನಕ್ಕೂ ಮೀರಿದ ಇತಿಹಾಸವಿದೆ. 1918 ರಲ್ಲಿ “ವಿಜ್ಞಾನ” ಎನ್ನುವ ಮಾಸಪತ್ರಿಕೆ ಎರಡು ವರ್ಷಗಳ ಕಾಲ ನಡೆದಿತ್ತು. ಇಂದಿಗೂ

ಕನ್ನಡದಲ್ಲಿ ವಿಜ್ಞಾನಕ್ಕೆ ಮೀಸಲಾದ ಹಲವಾರು ಪತ್ರಿಕೆಗಳಿವೆ.

1. ಕರ್ನಾಟಕ ರಾಜ್ಯ ವಿಜ್ಞಾನ ಪರಿಷತ್ತು ಪ್ರಕಟಿಸುವ “ಬಾಲ ವಿಜ್ಞಾನ” ಮಾಸಪತ್ರಿಕೆ 1978ರಿಂದ ಸತತವಾಗಿ ಪ್ರಕಟಗೊಳ್ಳುತ್ತಿದೆ.

2. ಹಂಪಿ ಕನ್ನಡ ವಿಶ್ವವಿದ್ಯಾಲಯದ “ವಿಜ್ಞಾನ ಸಂಗಾತಿ”. 1993 ರಲ್ಲಿ ಆರಂಭವಾದ ಈ ಪತ್ರಿಕೆ ಈಗ ತ್ರೈಮಾಸಿಕವಾಗಿದೆ.

3. ಕರ್ನಾಟಕ ವಿಜ್ಞಾನ ಮತ್ತು ತಂತ್ರಜ್ಞಾನ ಅಕಾಡೆಮಿ ಪ್ರಕಟಿಸುವ “ವಿಜ್ಞಾನ ಲೋಕ” ಎನ್ನುವ ದ್ವೈಮಾಸಿಕ.

4. ಕರ್ನಾಟಕ ವಿಜ್ಞಾನ ಮತ್ತು ತಂತ್ರಜ್ಞಾನ ಅಕಾಡೆಮಿ ಪ್ರಕಟಿಸುವ “ವಿಜ್ಞಾನ ವಾಹಿನಿ” ಎನ್ನುವ ತ್ರೈಮಾಸಿಕ.

5. ಕೇಂದ್ರ ಸರ್ಕಾರದ ವಿಜ್ಞಾನ್ ಪ್ರಸಾರ್ ಸಂಸ್ಥೆ ಮುಚ್ಚಿ ಹೋದ ನಂತರವೂ, ಅದು ಪ್ರಕಟಿಸುತ್ತಿದ್ದ “ಕುತೂಹಲಿ” ಎಂಬ ವಿಜ್ಞಾನ ಮಾಸಿಕವನ್ನು ಕೊಳ್ಳೇಗಾಲ ಶರ್ಮಾ ಅವರು ಮುಂದುವರೆಸಿದ್ದಾರೆ.

6. ರಾಷ್ಟ್ರೀಯ ವೈಮಾಂತರಿಕ್ಷ ಸಂಸ್ಥೆಯ ಕನ್ನಡ ಸಾಂಸ್ಕೃತಿಕ ಸಂಘ ಪ್ರಕಟಿಸುವ “ಕಣಾದ” ಎನ್ನುವ ಹೆಸರಿನ ವಾರ್ಷಿಕ ವಿಜ್ಞಾನ ಪತ್ರಿಕೆ.

ಇದರ ಜೊತೆಗೆ ಬಹುತೇಕ ದಿನಪತ್ರಿಕೆಗಳು, ನಿಯತಕಾಲಿಕಗಳು ವಿಜ್ಞಾನ ಲೇಖನಗಳಿಗೆ ಅವಕಾಶ ನೀಡುತ್ತವೆ.

ಕನ್ನಡದಲ್ಲಿ ವಿಜ್ಞಾನ ಸಾಹಿತ್ಯದ ಬಗ್ಗೆ ತಿಳಿಯಬಯಸುವವರಿಗೆ ಈ ಪತ್ರಿಕೆಗಳು ಬಹಳ ಅನುಕೂಲ. ಇವುಗಳು ಡಿಜಿಟಲ್ ರೂಪದಲ್ಲಿ ಉಚಿತವಾಗಿ ಲಭ್ಯವಿವೆ. ಇವುಗಳ ಯಾವುದೇ ಸಂಚಿಕೆಯನ್ನಾದರೂ ಗಣಕದಲ್ಲಿ ನೋಡಬಹುದು. ವರ್ಷಕ್ಕೊಂದರಂತೆ ಯಾವುದಾದರೂ ಸಂಚಿಕೆಗಳನ್ನು ನೋಡುತ್ತಾ ಹೋದಂತೆ ಕನ್ನಡದಲ್ಲಿ ವಿಜ್ಞಾನ ಸಾಹಿತ್ಯ ಸಾಗಿರುವ ಜಾಡಿನ ಅರಿವಾಗುತ್ತದೆ.

ಈ ಪತ್ರಿಕೆಗಳನ್ನು ಒಮ್ಮೆ ನೋಡಲು ಎಲ್ಲ ಓದುಗರಲ್ಲಿ ಮನವಿ. ಆ ಪತ್ರಿಕೆಗಳಲ್ಲಿ ಆಸಕ್ತಿ ಎನಿಸುವ ಕೆಲವು ಲೇಖನಗಳನ್ನು ಓದಿ, ಅವು ನಿಮ್ಮ ನಿರೀಕ್ಷೆಯ ಮಟ್ಟಕ್ಕೆ ಇವೆಯೇ; ಅವುಗಳಲ್ಲಿ ಯಾವ ಬದಲಾವಣೆಗಳನ್ನು ಬಯಸುತ್ತೀರಿ; ಯಾವ ಪ್ರಕಾರದ ಲೇಖನಗಳನ್ನು ಓದಲು ಬಯಸುವಿರಿ; ಅವುಗಳ ಶೈಲಿ ಹೇಗಿದೆ; ಅವುಗಳಿಗೆ ಚಂದಾದಾರರಾಗಲು ಬಯಸುವಿರಾ ಎನ್ನುವುದನ್ನು ತಿಳಿಸಬೇಕಾಗಿ ವಿನಂತಿ.

ವಿಜ್ಞಾನದಲ್ಲಿ ಓದುಗ-ಲೇಖಕರ ನಡುವಿನ ಅಂತರ

ಮಾರ್ಕೆಜ್ ನ ಕೃತಿಗಳನ್ನು ಇಂಗ್ಲೀಷಿಗೆ ಅನುವಾದಿಸಿದ ಗ್ರೆಗರಿ ರಬಸ್ಸ Every act of communication is an act of translation ಎನ್ನುತ್ತಾನೆ. ಯಾವುದೇ ಸಂವಹನದಲ್ಲೂ ಭಾಷೆಯಷ್ಟೇ ಅದು ಹೇಳಬಯಸುವ ಧ್ವನಿಯೂ ಮುಖ್ಯವಾಗುತ್ತದೆ. ವಿಜ್ಞಾನ ಸಂವಹನದಲ್ಲೂ ಪ್ರಾಯಶಃ ಭಾಷೆಯ ಲಕ್ಷಣಕಾರರ ಈ ಮಾತು ಮುಖ್ಯವಾಗುತ್ತದೆ. ಇಂದಿನ ಕಾಲದಲ್ಲಿ ಗೂಗಲ್ ಭಾಷಾಂತರ ಲಭ್ಯವಿದೆ. ಅದನ್ನು ಬಳಸಿಕೊಂಡು ದೇಶೀಯ ಭಾಷೆಗಳಲ್ಲಿ ಹುಲುಸಾಗಿ ವಿಜ್ಞಾನ ಸಾಹಿತ್ಯ ನಿರ್ಮಿಸಿದ ಭೂಪರೂ ಇದ್ದಾರೆ. ಆದರೆ ಅದು ಸಂವಹನದಲ್ಲಿ ಯಶಸ್ಸು ಸಾಧಿಸಿದೆಯೇ ಎನ್ನುವುದು ಪ್ರಶ್ನೆ.

ಸಮಸ್ಯೆ ಆಗುವುದು ಇಲ್ಲಿಯೇ. ವಿಜ್ಞಾನ ಲೇಖಕರಿಗೆ ತಾವು ಬರೆಯುತ್ತಿರುವ ವಿಷಯದ ಪರಿಜ್ಞಾನವಿದೆ; ಅದನ್ನು ಬರೆಯಲೂ ಬಲ್ಲರು. ಆದರೆ ಅವರು ಹೇಳಬಯಸುವ ಮಾಹಿತಿ ಓದುಗರಿಗೆ ತಲುಪುತ್ತದೆಯೇ? ಇದಕ್ಕೆ ಕಾರಣ ಪಾರಿಭಾಷಿಕ ಪದಗಳೋ ಅಥವಾ ಭಾಷೆಯ ಶೈಲಿಯೋ ಮಾತ್ರವಲ್ಲ. ಬಹಳಷ್ಟು ಬಾರಿ ವಿಜ್ಞಾನ ಲೇಖಕ ತನ್ನ ಲೇಖನವನ್ನು ಆರಂಭಿಸುವ ಹಂತವೇ ಓದುಗರಿಗೆ ಡೋಲಾಯಮಾನವಾಗಿರಬಹುದು. ಉಪಗ್ರಹ ಉಡಾವಣೆಯ ಬಗ್ಗೆ ಬರೆಯುವ ವಿಜ್ಞಾನ ಲೇಖಕ ಆಗಸದ ಯಾವ ಸ್ತರದಲ್ಲಿ ಉಪಗ್ರಹದ ಕಕ್ಷೆ ಇರುತ್ತದೆ; ಅದು ಭೂಮಿಯ ಚಲನೆಗೆ ಯಾವ ರೀತಿ ಹೊಂದಿಕೊಳ್ಳುತ್ತದೆ; ಅದು ಹೇಗೆ ಕೆಲಸಗಳನ್ನು ಮಾಡುತ್ತದೆ ಮೊದಲಾದ ವಿಷಯಗಳನ್ನು ಸರಾಗವಾಗಿ ಬರೆದಿರಬಹುದು. ಆದರೆ ಉಪಗ್ರಹ ಅಂತರಿಕ್ಷವನ್ನು ಹೇಗೆ ಸೇರುತ್ತದೆ ಎನ್ನುವ ಸ್ಪಷ್ಟ ಕಲ್ಪನೆ ಇಲ್ಲದ ಓದುಗರಿಗೆ ಲೇಖನದಲ್ಲಿನ ವಿವರಗಳು ಗೊಂದಲ ಮೂಡಿಸುತ್ತವೆ. ನೋಡುಗರ ಕಣ್ಣಿಗೆ ಕಾಣುವುದು ಉಪಗ್ರಹವನ್ನು ಉಡ್ಡಯನ ಮಾಡಿದ ರಾಕೆಟ್ ಮಾತ್ರ. ಅದನ್ನೇ ಉಪಗ್ರಹ ಎಂದು ಭಾವಿಸಿದವರೂ ಇದ್ದಾರು. ಹೀಗಾಗಿ, ಅಂತಹವರು ಲೇಖನದ ಜೊತೆಗೆ ಕನೆಕ್ಟ್ ಆಗಲಾರರು.

ವಿಜ್ಞಾನ ಲೇಖನದ ಓದುಗ ವರ್ಗದ ಬಗ್ಗೆ ಸ್ಪಷ್ಟ ಕಲ್ಪನೆ ಬರುವುದು ಕಷ್ಟ. ತೀರಾ ಮೂಲಭೂತ ವಿಷಯಗಳಿಂದ ಆರಂಭಿಸಿದರೆ “ಇದ್ಯಾವುದೋ ಮಕ್ಕಳ ಲೇಖನ” ಎಂದು ಬಿಡುವವರು ಹಲವರು. ಸ್ವಲ್ಪ ಮೇಲಿನ ಮಟ್ಟದಿಂದ ಮೊದಲಿಟ್ಟರೆ “ಇದು ತಲೆಯ ಮೇಲಿಂದ ಹಾದುಹೋಗುತ್ತಿದೆ” ಎಂದು ತಿರಸ್ಕರಿಸುವವರು ಕೆಲವರು. ಇದರ ನಡುವಿನ ಸುವರ್ಣ ಮಧ್ಯಮ ಮಾರ್ಗ ಪತ್ತೆಯಾಗುವುದು ವಿಜ್ಞಾನದಲ್ಲಿ ಕಷ್ಟವಿದೆ. ಓದುಗರ ಆಸಕ್ತಿಯನ್ನು ಹಿಡಿದಿಟ್ಟುಕೊಂಡು, ಅವರಿಗೆ ಅಧಿಕೃತ ಮಾಹಿತಿಯನ್ನೂ ನೀಡುತ್ತಾ, ಹೊಸ ವೈಜ್ಞಾನಿಕ ಅಂಶಗಳನ್ನು ದಾಟಿಸುವ ಸವಾಲುಗಳನ್ನು ವಿಜ್ಞಾನ ಲೇಖನ ಸಾಧಿಸಬೇಕಾಗುತ್ತದೆ. ಅದರ ಜೊತೆಗೆ ಏನನ್ನು ಹೇಳಬಯಸಿದ್ದೇವೆ ಎನ್ನುವ ಅಂಶವೂ ಮುಖ್ಯವಾಗುತ್ತದೆ.

ಪತ್ರಿಕಾ ಲೇಖನಗಳನ್ನು ಬದಿಗಿಟ್ಟರೆ, ವಿಜ್ಞಾನದ ವಿಷಯಗಳನ್ನು ವಿವರವಾಗಿ ನಿರೂಪಿಸುವ ಪುಸ್ತಕದ ಲೇಖನಗಳನ್ನು ಬರೆಯುವಲ್ಲಿ ಲೇಖಕರ ಸ್ವಾತಂತ್ರ್ಯ ಹೆಚ್ಚು. ಇಂತಹ ಪುಸ್ತಕಗಳಲ್ಲಿ ವಿಜ್ಞಾನವನ್ನು ಯಾವ ಹಂತದಿಂದ ಪರಿಚಯಿಸಲು ಓದುಗರು ಬಯಸುತ್ತಾರೆ? ಆಯಾ ವಿಷಯಗಳ ಬಗ್ಗೆ ಓದುಗರಿಂದ ಒಂದು ಮಟ್ಟದ ಪೂರ್ವ ಜ್ಞಾನವನ್ನು ಅಪೇಕ್ಷಿಸುವುದು ಸೂಕ್ತವೇ ಅಥವಾ ಮೂಲಭೂತ ಅಂಶಗಳಿಂದ ವಿಷಯವನ್ನು ಪ್ರಸ್ತಾಪಿಸುವುದು ಒಳಿತು ಅನಿಸುತ್ತದೆಯೇ? ಈ ಬಗ್ಗೆ ಓದುಗರ ಅಭಿಪ್ರಾಯವೇನು? ದಯವಿಟ್ಟು ತಿಳಿಸಿ.

ವಿಜ್ಞಾನ ಪುಸ್ತಕಗಳು ಮಾರಾಟದ ಸರಕಲ್ಲ!

ಸರ್ಕಾರದ ಪ್ರಕಟಣೆಗಳನ್ನು ಹೊರತುಪಡಿಸಿದರೆ ಖಾಸಗಿ ಪ್ರಕಾಶನದವರು ಪ್ರಕಟಿಸಿರುವ ವಿಜ್ಞಾನ ಪುಸ್ತಕಗಳ ಪೈಕಿ ಈವರೆಗೆ ಅತಿ ಹೆಚ್ಚು ಮಾರಾಟ ಆಗಿರುವ ಪುಸ್ತಕ ಯಾವುದು? ಪ್ರಾಯಶಃ ನವಕರ್ನಾಟಕ ಪ್ರಕಾಶನದ, ಕೊಳ್ಳೇಗಾಲ ಶರ್ಮಾ ಅವರು ಸಂಪಾದಿಸಿದ “ಇದೇಕೆ ಹೀಗೆ?” ಪುಸ್ತಕ ಅನಿಸುತ್ತದೆ. ಕನ್ನಡದ ವಿಜ್ಞಾನ ಪುಸ್ತಕಗಳನ್ನು ಪ್ರಕಟಿಸುವಲ್ಲಿ ಮುಂಚೂಣಿಯಲ್ಲಿರುವುದು ಕೂಡ ನವಕರ್ನಾಟಕ ಪ್ರಕಾಶನವೇ. ಅಂತಹ ಬೃಹತ್ ಸಂಸ್ಥೆಗೆ ಇದೇನೂ ದೊಡ್ಡ ವಿಷಯವಲ್ಲ.

ಕನ್ನಡದಲ್ಲಿ ವಿಜ್ಞಾನ ಪುಸ್ತಕಗಳ ಮಾರಾಟ ಸುಲಭವಲ್ಲ. ಕಳೆದ ದಶಕದಲ್ಲಿ ಒಬ್ಬ ಲೇಖಕರಿಂದ ಬರೆಯಲ್ಪಟ್ಟ ವಿಜ್ಞಾನ ಪುಸ್ತಕವೊಂದು ಒಂದು ಸಾವಿರ ಪ್ರತಿಗಳಿಗಿಂತಲೂ ಹೆಚ್ಚು ಸಂಖ್ಯೆಯಲ್ಲಿ ಮಾರಾಟವಾಗಿರುವ ನಿದರ್ಶನಗಳು ಬೆರಳೆಣಿಕೆಯಷ್ಟು. ಅಗಾಧ ವೇಗದಿಂದ ಮುನ್ನಡೆಯುವ ವಿಜ್ಞಾನದಂತಹ ಕ್ಷೇತ್ರದಲ್ಲಿ “ಸಮಕಾಲೀನ” ಎನ್ನುವ ಮಾಹಿತಿಗೆ ಅರ್ಥವಿಲ್ಲ. ವಿಷಯ ಬರೆದು, ಪುಸ್ತಕ ಪ್ರಕಟಿಸುವಷ್ಟರಲ್ಲಿ ಮಾಹಿತಿ ಹಳೆಯದಾಗಿರುತ್ತದೆ.

ವಿಜ್ಞಾನದ ಪುಸ್ತಕಗಳ ಬರವಣಿಗೆ ಕೂಡ ಸುಲಭವಲ್ಲ. ಜನಪ್ರಿಯ ಕತೆಗಳಲ್ಲಿ ಅಸಂಗತಗಳು ಹಾಸುಹೊಕ್ಕಾಗಿದ್ದರೂ ಯಾರೂ ಆಕ್ಷೇಪಿಸುವುದಿಲ್ಲ. ಆದರೆ ವಿಜ್ಞಾನ ವಿಷಯದಲ್ಲಿ ಮಾಹಿತಿ ಅಧಿಕೃತವಾಗಿಯೇ ಇರಬೇಕು. ಸಾಧ್ಯವಾದರೆ ಆಧಾರಗಳನ್ನು ಕೊಡಬೇಕು. ಬರೆಯುವುದನ್ನು ಆಸಕ್ತಿ ಮೂಡಿಸುವಂತೆ, ಜನಸಾಮಾನ್ಯರಿಗೆ ಸುಲಭವಾಗಿ ಅರ್ಥವಾಗುವಂತೆ ಇರಬೇಕು. ಪುಸ್ತಕ ವಿಫುಲವಾದ ಚಿತ್ರಗಳಿಂದ ಕೂಡಿರಬೇಕು. ಪುಸ್ತಕದ ಬೆಲೆ ಹೆಚ್ಚಾಗಿರಬಾರದು. ಪುಸ್ತಕದ ಲೇಖಕರು ಈಗಾಗಲೇ ಸ್ವಲ್ಪ ಹೆಸರು ಮಾಡಿ ಪರಿಚಿತರಾಗಿದ್ದರೆ ಒಳಿತು.

ಇಷ್ಟಾದರೂ ಪುಸ್ತಕಕ್ಕೆ ಪ್ರಕಾಶಕರು ಸಿಗುವುದು ಕಷ್ಟ. ಪ್ರಕಟವಾದ ಪುಸ್ತಕ ಮಾರಾಟವಾಗುವುದು ಮತ್ತೂ ಕಷ್ಟ. ಈಗಂತೂ ಅಂಚೆಯ ಬೆಲೆಯಲ್ಲಿ ತೀವ್ರ ವ್ಯತ್ಯಾಸವಾದ ಕಾರಣ ಪುಸ್ತಕವನ್ನು ಲೇಖಕರೇ ನೇರವಾಗಿ ಗ್ರಾಹಕನಿಗೆ ಅಂಚೆಯಲ್ಲಿ ಕಳಿಸುವುದೂ ದುಬಾರಿಯ ವಿಷಯ. ಹೀಗೆ ಬರೆಯುವ ಹಂತದಿಂದ ಹಿಡಿದು ಓದುಗರಿಗೆ ತಲುಪಿಸುವ ಮಟ್ಟದವರೆಗೆ ಸುಮ್ಮನೆ ಕಷ್ಟಗಳನ್ನೇ ಎದುರಿಸಬೇಕಾದ ಸಂದರ್ಭದಲ್ಲಿ ಯಾವ ವಿಜ್ಞಾನ ಲೇಖಕರು ತಾನೇ ಇದರಲ್ಲಿ ಬಹುಕಾಲ ಆಸಕ್ತಿ ತೋರಿಯಾರು? ವಿಜ್ಞಾನ ಪುಸ್ತಕದಿಂದ ಹಣ ಸಂಪಾದನೆ ಗಗನಕುಸುಮ; ಆದರೆ, ಪುಸ್ತಕ ಬರವಣಿಗೆಗೆ ಕಷ್ಟವನ್ನೂ ಪಟ್ಟು, ಅದರ ಪ್ರಕಟಣೆಯಲ್ಲಿ ನಷ್ಟವನ್ನೂ ಅನುಭವಿಸಿ, ಅದನ್ನು ಮಾರಲು ಗೋಗರೆಯುವ ಗೋಳು ಯಾರಿಗೆ ಬೇಕು? ಇಂತಹ ವಾಸ್ತವಗಳನ್ನು ಗಮನಿಸಿದರೆ “ವಿಜ್ಞಾನ ಪುಸ್ತಕ ಬರೆಯಿರಿ” ಎಂದು ಯಾರಿಗೂ ಹೇಳುವ ಮನಸ್ಸೂ ಆಗುವುದಿಲ್ಲ.

ವಿಜ್ಞಾನ ಸಾಹಿತ್ಯ ಹೆಚ್ಚು ಪ್ರಚಾರ ಪಡೆದು, ವ್ಯಾಪಕವಾಗಿ ಜನರನ್ನು ಸೇರಲು ಯಾವ ಮಾರ್ಗಗಳಿವೆ? ಲಾಭ ಬೇಡ; ಕನಿಷ್ಠ ವಿಜ್ಞಾನ ಲೇಖಕರ ಶ್ರಮಕ್ಕೆ ಅದನ್ನು ಅರ್ಹ ಜನರಿಗೆ ತಲುಪಿಸಿದ ಸಂತಸ ನೀಡುವ ಹಾದಿಗಳು ಯಾವುದಿದೆ? ವಿಜ್ಞಾನ ಲೇಖಕರು ಸೇರಿ ಸಂಘಟಿತರಾಗಿ ಏನನ್ನಾದರೂ ಮಾಡಲಾದೀತೆ? ಅದಕ್ಕೆ ಓದುಗರ ಸಹಕಾರ ಯಾವ ರೀತಿ ಇದ್ದೀತು? ಈ ಬಗ್ಗೆ ಓದುಗರ ಅಭಿಪ್ರಾಯವೇನು? ದಯವಿಟ್ಟು ತಿಳಿಸಿ.

ಉಪಸಂಹಾರ

ಕನ್ನಡದಲ್ಲಿ ವಿಜ್ಞಾನ ಸಾಹಿತ್ಯದ ಬಗ್ಗೆ ಆಸಕ್ತ ಓದುಗರಿದ್ದಾರೆ. ಆದರೆ, ಅವರ ಅಪೇಕ್ಷೆಗೆ ತಕ್ಕಂತಹ ವಿಜ್ಞಾನ ಸಾಹಿತ್ಯ ನಿರ್ಮಾಣ ಆಗುತ್ತಿಲ್ಲ.

ಸರಳ ಶೈಲಿಯಲ್ಲಿ, ಹೆಚ್ಚು ಗೊಂದಲವಾಗದ ಭಾಷೆಯಲ್ಲಿ, ಹೆಚ್ಚು ವೈಜ್ಞಾನಿಕ ಪದಗಳನ್ನು ಬಳಸದೆ, ಮಾಹಿತಿಯನ್ನು ಆಕರ್ಷಕವಾಗಿ ಪ್ರಸ್ತುತ ಪಡಿಸುವ ಲೇಖಕನಗಳಿಗೆ ಓದುಗರ ಹೆಚ್ಚು ಮನ್ನಣೆ ಇದೆ.

ಪಾರಿಭಾಷಿಕ ಪದಗಳ ಗೊಂದಲ ಬಗೆಹರಿದಿಲ್ಲ. ಈ ಬಗ್ಗೆ ವಿಜ್ಞಾನ ಲೇಖಕರು ಒಮ್ಮತದಿಂದ ಒಂದು ಪದ್ಧತಿ ಅನುಸರಿಸುವುದು ಸೂಕ್ತ. ಎಲ್ಲಿ ಭಾಷಾಂತರ ಸರಳ ಮತ್ತು ಅರ್ಥಪೂರ್ಣ ಅನಿಸುತ್ತದೆಯೋ, ಅಲ್ಲಿ ಮಾಡಬಹುದು. ತೀರಾ ಗೊಂದಲಮಯ ಭಾಷಾಂತರಕ್ಕಿಂತಲೂ ಮೂಲ ಪದವನ್ನೇ ಉಳಿಸಿಕೊಳ್ಳುವುದು ಉಪಯುಕ್ತ.

ವಿಜ್ಞಾನ ಸಾಹಿತ್ಯವನ್ನು ಅದರ ಸ್ಪಷ್ಟ ಅರಿವು ಇರುವ ಯಾರು ಬೇಕಾದರೂ ಬರೆಯಬಹುದು. ಆದರೆ ತೀರಾ ಉನ್ನತ ಮಟ್ಟದ ವಿಷಯಗಳನ್ನು ಆಯಾ ವಿಷಯ ತಜ್ಞರು ಬರೆಯುವುದು ಮಾಹಿತಿಯ ನಿಷ್ಕೃಷ್ಟತೆಯ ದೃಷ್ಟಿಯಿಂದ ಒಳಿತು. ಆ ರೀತಿ ಬರೆಯಬಲ್ಲ ವಿಷಯ ತಜ್ಞರು ದೊರೆಯದಿದ್ದರೆ ಕನಿಷ್ಠ ಅಂತಹವರನ್ನು ಲೇಖನದಲ್ಲಿ ಸಹಭಾಗಿಯನ್ನಾಗಿ ಮಾಡುವುದು ಸೂಕ್ತ.

ಕನ್ನಡದಲ್ಲಿ ವಿಜ್ಞಾನ ಪತ್ರಿಕೆಗಳಿವೆ. ಅಂತಹ ಒಂದು ಪತ್ರಿಕೆಗಾದರೂ ಎಲ್ಲ ವಿಜ್ಞಾನಾಸಕ್ತರೂ ಚಂದಾದಾರರಾಗಬೇಕು. ಇಲ್ಲವಾದರೆ ಕನಿಷ್ಠ ಅವುಗಳ ಡಿಜಿಟಲ್ ಪ್ರತಿಯನ್ನಾದರೂ ಅವಲೋಕಿಸಬೇಕು. ಆಗ ವಿಜ್ಞಾನಾಸಕ್ತಿ ಮುಂದುವರೆಯುತ್ತದೆ. ಇಂದಿನ ಕಾಲದಲ್ಲಿ ಯಾವುದೇ ಆಸಕ್ತಿಯನ್ನು ಜೀವಂತವಾಗಿ ಇರಿಸಿಕೊಳ್ಳುವುದೂ ಸವಾಲಿನ ಸಂಗತಿಯೇ.

ವಿಜ್ಞಾನ ಲೇಖಕ ಮತ್ತು ಓದುಗರ ಸಮನ್ವಯ ಒಳಿತು. ತಾನೇನು ಹೇಳುತ್ತಿದ್ದೇನೆ ಎಂಬುದರ ಅರಿವು ಇರುವಷ್ಟೇ ಚೆನ್ನಾಗಿ ಅದು ಓದುಗನಿಗೆ ಮುಟ್ಟುತ್ತಿದೆಯೇ ಎಂಬುದರ ಪರಿವೆಯೂ ಲೇಖಕರಿಗೆ ಮುಖ್ಯವಾಗುತ್ತದೆ. ಈ ಅಂತರ ಕಡಿಮೆಯಾದಷ್ಟೂ ವಿಜ್ಞಾನ ಸಾಹಿತ್ಯಕ್ಕೆ ಲಾಭವಿದೆ.

ಕನ್ನಡದಲ್ಲಿ ವಿಜ್ಞಾನ ಪುಸ್ತಕಗಳಿಗೆ ಮಾರುಕಟ್ಟೆ ಬಹಳ ಸೀಮಿತವಾದದ್ದು. ವಿಜ್ಞಾನ ಲೇಖಕರಿಗೆ ತಮ್ಮ ಪುಸ್ತಕದಿಂದ ಹಣ ಮಾಡುವ ಉದ್ದೇಶವಿಲ್ಲದಿದ್ದರೂ, ತಮ್ಮ ಪ್ರಯತ್ನಕ್ಕೆ ಓದುಗರ ಮೆಚ್ಚುಗೆ ಸಲ್ಲಬೇಕು ಎನ್ನುವ ಆಶಯವಂತೂ ಇರುತ್ತದೆ. ಇದು ಸಾಧಿಸಲಾಗದ ಹೆಜ್ಜೆಯೇನೂ ಅಲ್ಲ. ಆದರೆ ಈ ಬಗ್ಗೆ ವಿಜ್ಞಾನ ಲೇಖಕರು ಸ್ವಲ್ಪ ಗಮನ ಕೊಡಬೇಕು; ಹೊಸ ದಾರಿಗಳನ್ನು ಹುಡುಕಬೇಕು. ಸಂಘಟಿತ ಪ್ರಯತ್ನವಿಲ್ಲದೆ ಕನ್ನಡ ವಿಜ್ಞಾನ ಸಾಹಿತ್ಯ ಬೆಳೆಯುವುದು ಕಷ್ಟವಿದೆ.

ಕನ್ನಡ ವಿಜ್ಞಾನ ಸಾಹಿತ್ಯದ ಭವಿಷ್ಯಕ್ಕೆ ಶುಭವಾಗಲಿ.

-ಡಾ. ಕಿರಣ ಸೂರ್ಯ

The post ಕನ್ನಡದಲ್ಲಿ ವಿಜ್ಞಾನ ಸಾಹಿತ್ಯಕ್ಕೆ ಓದುಗರು ಏಕಿಲ್ಲ ? first appeared on Vishva Kannada.